Welcome To MM Storyteller
LOGIN
🚩Chapter -82
Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 20 ]
_____
တိရှစ်ထျန်းသည် ဟွေ့မော့ယိရှောင်နှင့် ညီနောင်အုပ်စုလိုက်ကြီးအား ကြားနေမြေပုံသို့ ခေါ်လာသည့်အချိန်တွင် မြင်ကွင်းတစ်ခုကိုမြင်လိုက်ရသည်….။
‘အဆုံးမရှိည’အုပ်စုမှလူများသည် ပျော်ရွှင်ကခုန်နေကြကာ ဖီးနစ်အုပ်စုမှညီအစ်မများကို မကောင်းဆိုးဝါးများအား ရှင်းလင်းရန်ကူနေကြလေသည်။
ဟုတ်ပြီ ဟုတ်ပြီ ဟုတ်ပြီ အဲ့နေရာကိုသွား။
ကောင်းတယ် ကောင်းတယ် အဲ့စွမ်းရည်ကိုသုံးလိုက်။
ပြီးတော့ အဆုံးမရှိညကညီအစ်မတွေလား...သူတို့ဘာတွေလုပ်နေကြတာလဲ။
ညီအစ်မများ : ခေါင်းဆောင်ဝူဖုန်း ရှင့်ရဲ့ဓားကအရမ်းမိုက်တာပဲ။
ဝူဖုန်း : ……
ညီအစ်မများ : ခေါင်းဆောင်ဝူဖုန်း ကောင်မလေးရှိလားဟင်။
ဝူဖုန်း : ……
ကျန်ရှိနေသည့် ကောင်းကင်ဘုံကိုးထပ်ရှိဖီးနစ်အုပ်စုမှယောက်ျားလေးများ : ငါတို့က မဟာမိတ်တွေရဲ့ လျစ်လျုရှုတာကိုခံနေရတာလား...တကယ်ကိုလျစ်လျူရှုခံနေရတာလား... သေချာပေါက်ကိုလျစ်လျူရှုခံနေရတာပဲ...။
လူတိုင်းပျော်ရွှင်နေကြသည့်အချိန်တွင် ပါဝင်ပျော်ရွှင်နေသော ပင်းဟွေ့ရှင်ကျဲ့က ရုတ်တရက် ကြီးမားလှသည့် ရှစ်ထျန်းအုပ်စုကြီးကိုတွေ့လိုက်သည်။
ဒါကဘယ်လိုကြည့်ကြည့် လူငါးရာကြီးတောင်။
လူငါးရာက...သိပ်...မများပါဘူး။
မဟာမိတ်အယောက်တစ်ထောင်ရှိနေခြင်းက ချက်ချင်းပင် ပင်းဟွေ့ရှင်ကျဲ့၏ကျောကိုဖြောင့်သွားစေသည်။ သူမအသံကပင် ပုံမှန်ထက်ပိုကျယ်နေတော့၏။
“တပ်သားတို့ အာရုံစိုက်ကြ ရှစ်ထျန်းခွေးတွေရောက်လာပြီ။”
ပင်းဟွေ့ရှင်ကျဲ့၏အသံကြောင့် ပြန့်ကျဲနေသော ‘ကောင်းကင်ဘုံကိုးထပ်ရှိဖီးနစ်’နှင့် ‘အဆုံးမရှိည’အုပ်စုမှ လူများသည် စုဝမ်နှင့်စုရွေ့ဘေး၌ ချက်ချင်းပုံစံတကျနေရာယူလိုက်ကြ၏။
တိရှစ်ထျန်းက သူတို့ဝိုင်းရံလိုက်သော လူနှစ်ယောက်ကိုမြင်နိုင်သည်။
အမှန်အတိုင်းဆိုရလျှင် သူအနည်းငယ်လန့်သွား၏။ စုချန်းဝမ်ယွဲ့တွင် ယဲ့ယွီအားအပိုင်ကြံနိုင်သည့်အရည်အချင်း ရှိလိမ့်မည်ဟု သူထင်မထားခဲ့ပေ။
“ခေါင်းဆောင်ယဲ့ယွီ... မင်းနဲ့တွေ့ဖို့ ငါအချိန်အကြာကြီးစောင့်မျှော်နေခဲ့တာ။”
တိရှစ်ထျန်းကရှေ့သို့တစ်လှမ်းတိုး၍ စုရွေ့အား ပြေပြစ်နေသည့်မျက်နှာအမူအရာဖြင့် နှုတ်ဆက်လိုက်သည်။
သို့သော် မိသားစု၏စစ်သူကြီးစုသည် မည်သို့သောလူမျိုးနည်း။ သူ၏စရိုက်အတိုင်း တိရှစ်ထျန်းအား နည်းနည်းလေးတောင်အဖက်မလုပ်ပေ။
စတုတ္ထမြောက်ပြည်နယ်၏နံပါတ်တစ်က ယခုလိုလျစ်လျူရှုခံလိုက်ရခြင်းက နည်းနည်း.....
တိရှစ်ထျန်း၏ဘေးတွင်ရပ်နေသော ဟွေ့မော့ယိရှောင်သည် မျက်လုံးများနီရဲနေဆဲပင်။ သူမက စုဝမ်အား ဒေါသတို့ဖြင့် ဖောက်ထွက်မတတ်စိုက်ကြည့်လိုက်ပြီး စုရွေ့ကိုတော့သိချင်စိတ်တို့ဖြင့် ကြည့်နေ၏။
ဒါက ဟွာရှားဒေသတစ်ခုလုံးရဲ့ နံပါတ်တစ် ယဲ့ယွီမဟုတ်ဘူးလား။
သူကဘယ်လိုဖြစ်လို့ စုချန်းဝမ်ယွဲ့နဲ့အတူရှိနေရတာလဲ။ စုချန်းဝမ်ယွဲ့ကြောင့် အချစ်မျက်ကန်းဖြစ်နေတဲ့ပုံပဲ။
စုရွေ့က တိရှစ်ထျန်းအား လုံးဝအဖက်မလုပ်သည်ကိုတွေ့သောအခါ သူမကိုယ်သူမ ချစ်စဖွယ်ကောင်းပြီး ချဥ်းကပ်လွယ်သည်ဟုခံယူထားသော ဟွေ့မော့ယိရှောင်ကအရှေ့ကိုတိုး၍ ချိုသာနူးညံ့နေသည့်အသံဖြင့် ပြောလာသည်။
“ခေါင်းဆောင်ယဲ့ယွီ... ကျွန်မတို့က စုချန်းဝမ်ယွဲ့နဲ့ ကိုယ်ရေးကိုယ်တာ ပြဿနာလေးတွေဖြေရှင်းဖို့လာခဲ့တာပါ။ မနေ့တည်းတွေ့ဖို့စီစဥ်ထားခဲ့ပါတယ်။ ခေါင်းဆောင်...သူမလှည့်စားတာမခံပါနဲ့။ သူမက....”
“အိုး”
တိုတောင်းလှသောအသံတစ်ခုက ဟွေ့မော့ယိရှောင်၏စကားကိုဖြတ်လိုက်သည်။ စုရွေ့က ရှေ့သို့တိုးလာကာ ရှေ့တွင်ရှိနေသော ဘဝင်မြင့်နေသည့်မိန်းမအား အန္တရာယ်ကြီးစွာစိုက်ကြည့်လိုက်သည်။
“ကိုယ်ရေးကိုယ်တာပြဿနာတဲ့လား။ ငါတို့မိသားစုရဲ့ရှောင်ဝမ်ကမင်းကို သတ်ခဲ့လို့ မင်းကကျ မင်းလူကိုအားကိုးလို့ရပြီး ငါ့ရဲ့ရှောင်ဝမ်ကရော ငါ့ကိုအားကိုးလို့မရဘူးလား။”
ပြောနေရင်းနှင့် စုရွေ့ကမျက်ခုံးပင့်လိုက်ကာ နှုတ်ခမ်းထောင့်တို့ကွေးတက်သွား၍ လှောင်ပြောင်နေသည့် အပြုံးဖြင့် “ဘာလို့တိရှစ်ထျန်းတစ်ယောက်တည်းကိုပဲခေါ်ခဲ့တာလဲ။ တုလန်ရောမလာဘူးလား။ နှစ်ယောက်စလုံးကို တစ်ချိန်တည်းမှာပဲအပြတ်ရှင်းမယ်လို့တွေးထားတာ ခုတစ်ယောက်တည်းဆိုတော့ မခက်တော့ဘူးပေါ့။”
“ယဲ့ယွီ”
စုရွေ့၏စကားများနှင့် ယုံကြည်ချက်တို့ပြည့်ဝနေသည့် အကြည့်တို့ကြောင့် တိရှစ်ထျန်းကရှေ့သို့တိုးလာ၍ ဟွေ့မော့ယိရှောင်အား သူ့နောက်ပို့လိုက်၏။
“ယောက်ျားလေးအချင်းချင်းဖြေရှင်းစမ်းပါ။ မိန်းကလေးတွေကို ဆွဲထည့်မနေနဲ့။”
“ကြည့်ရတာ တိရှစ်ထျန်း မင်းကိုယ်မင်းတော့ ယောက်ျားမှန်းသိသေးတဲ့ပုံပဲ။ ငါ့မိသားစုရဲ့ရှောင်ဝမ်ကိုလိုက်သတ် ခဲ့တုန်းကရော ဘာလို့ယောက်ျားမဆန်ခဲ့တာလဲ။”
စုရွေ့၏အကြည့်များကရေခဲတမျှအေးစက်နေပြီး သူယခုပြောနေသည့် စကားလုံးများကလည်း အပူချိန်ကို ကျဆင်းလာစေ၏။
သူတို့သာ ပြည်နယ်တစ်ခုတည်းဖြစ်ခဲ့ရင် ရှစ်ထျန်းအုပ်စုကို အမြစ်ပြတ်သွားတဲ့အထိ သတ်ပစ်ပြီးပြီ။
ကံကောင်းစွာနဲ့ အခုကလည်းနောက်မကျသေးဘူး။
“ယဲ့ယွီ... စကားပြောနေတာတော်လောက်ပြီ။ စုချန်းဝမ်ယွဲ့အတွက် မင်းဒီလောက်တောင် စိတ်ပြင်းပြနေမှတော့ နှစ်ယောက်ချကြတာပေါ့။”
ပြောနေစဥ်ပင် တိရှစ်ထျန်းသည် သူ့အနားမှလူများအား လက်ဝှေ့ယမ်းပြလိုက်သည်။ ချက်ချင်းပင် လူများကနောက်ဆုတ်သွားကြကာ သူ့နားတွင် နေရာအကျယ်ကြီးဖြစ်သွားတော့သည်။
သူ့အဆင့်သည် ယဲ့ယွီလောက်မမြင့်သော်လည်း တိရှစ်ထျန်းသည် သူ၏စွမ်းရည်များကို အလွန်ယုံကြည်ချက်ရှိပြီး လင်ရှန်းတွင် ဓားသမားများက ယှဥ်ပြိုင်တိုက်ခိုက်ရာ၌ အလွန်အင်အားကြီးသောဇာတ်ကောင်များဖြစ်သည်။ သူတို့က များပြားသောအသတ်မှတ်နှင့် ပြင်းထန်သည့်တိုက်ခိုက်ချက်များပိုင်ဆိုင်သည်တင်မဟုတ်ပေ။ ဓားသမားများတွင် တိုက်ခိုက်ရာ၌ တစ်ဖက်လူအားခေါင်းမူးစေသည့် ပြိုင်ဘက်ကင်းစွမ်းရည်၊ ‘ချိတ်ပိတ်ဓားသွား’ရှိ၏။ ၎င်းကိုအသုံးပြုလိုက်ပြီး ပစ်မှတ်အားထိသွားသည့်အခါ ပစ်မှတ်က ငါးစက္ကန့်ကြာ ချိတ်ပိတ်ခံထားရမည်ဖြစ်သည်။ ထိုငါးစက္ကန့်အတွင်း ပစ်မှတ်သည် သူ၏ဇာတ်ကောင်စွမ်းရည်များအား အသုံးမပြုနိုင်ချေ။
တိရှစ်ထျန်း၏မျက်နှာသည်လေးနက်နေပြီး အတည်ပြောနေတာကိုတွေ့လျှင် စုရွေ့ကအရှေ့သို့ တစ်လှမ်းတိုးလိုက်သည်။
ယခုတွင် ကိုးနာရီကျော်သွားပြီဖြစ်ကာ ကြားနေမြေပုံတစ်ခုလုံးသို့ ကစားသူများအဆက်မပြတ် ဝင်ရောက်လာကြသည်။ အနည်းငယ်ကအဆင့်တင်ရန်နှင့်ပွဲကြည့်ရန်လာကြသော်လည်း အများစုမှာ အပျော်ကြည့်ရန်ရောက်လာကြခြင်းဖြစ်သည်။
သူတို့သည် ရည်းစားဟောင်းများဖြစ်ကြသည့် တိရှစ်ထျန်းနှင့် စုချန်းဝမ်ယွဲ့တို့၏ နောက်ထပ်ပဋိပက္ခအား ကြည့်ရှုနိုင်လိမ့်မည်ဟု ထင်ထားခဲ့ကြ၏။ တိရှစ်ထျန်းနှင့် ပြဿနာဖြစ်နေသူမှာ ယဲ့ယွီဖြစ်နေမည်ဟု ထင်မထားခဲ့ချေ။
ဒါကဘယ်လိုအခြေအနေကြီးလဲ။
ထိုအခိုက်တွင် ယခုမနက်တွင် အစောကြီးရောက်ကာ ကြည့်ရှုနေကြသောသူများက နောက်ကျမှရောက်လာသည့် သူများကို အခြေအနေတို့အားရှင်းပြလေသည်။
လူတိုင်း : အိုး သေစမ်း ဒါဆိုအဲ့လိုဖြစ်ခဲ့တာပေါ့။
လက်ရှိတွင် တိရှစ်ထျန်းသည် သူ၏ ‘ချည်နှောင်ဓားချက်’စွမ်းရည်ကိုထုတ်လွှတ်နေပြီးဖြစ်သည်။ ၎င်းက ဓားသမားတစ်ယောက်၏ မကောင်းဆိုးဝါးများကို ပူးတွဲချည်နှောင်နိုင်သော အခြေခံစွမ်းရည်ပင်ဖြစ်သည်။ ယှဥ်ပြိုင်တိုက်ခိုက်သောအခါ တစ်ဖက်လူအား ကိုယ့်ဆီသို့ချည်နှောင်ခေါ်ဆောင်နိုင်ကာ အဝေးပစ်ဇာတ်ကောင်များ၏ စွမ်းရည်များအားအသုံးမဝင်အောင်လုပ်နိုင်သည်။
“ခေါင်းဆောင် သတိထား...”
‘အဆုံးမရှိည’အုပ်စုမှလူများသည် ယဲ့ယွီ အခြားသူများနှင့် ယှဥ်ပြိုင်တိုက်ခိုက်တာကို မတွေ့ဖူးပေ။ တိရှစ်ထျန်းက အဖွင့်လှုပ်ရှားမှုလုပ်လိုက်သည့်တိုင် သူကမည်သည့်စွမ်းရည်မှမထုတ်ဘဲ နေရာ၌သာ မလှုပ်မယှက် ရပ်နေသည်ကိုတွေ့လျှင်လူတိုင်းက စိုးရိမ်လာကြတော့သည်။
ငါတို့မိသားစုရဲ့ ခေါင်းဆောင်ကြီးက အဆင့်မြင့်ပေမယ့် ဘယ်လိုတိုက်ခိုက်ရမလဲမသိဘူး။ ဘယ်လိုလုပ်ကြမလဲ။
ယခုတွင် စုရွေ့သည် ပြင်းထန်သည့်ဆွဲငင်မှုကြောင့် ခေါင်းကိုက်ခြင်းကိုခံစားနေရကာ သူ့ခန္ဓာကိုယ်သည် တိရှစ်ထျန်း၏ရှေ့တွင်ရောက်သည်ထိ ဆွဲခေါ်ခံလိုက်ရသည်။ တိရှစ်ထျန်းမျက်လုံးထဲတွင် ပျော်ရွှင်မှုအချို့ ဖြတ်ပြေးသွား၍ ချက်ချင်းဓားဖြင့်လွှဲခုတ်လိုက်သည်။ ထို့နောက်တွင်....
တိရှစ်ထျန်း၏အသက်ပြဘားသည် အောက်ဆုံးထိကျသွားပြီး ကျယ်လောင်လှသည့်အသံဖြင့် မြေပေါ်သို့ကျသွားတာကိုတွေ့သောအခါ လူတိုင်းသည်ပါးစပ်အဟောင်းသားဖြင့် အခြေအနေကိုနားမလည်နိုင်ဘဲ အံ့ဩနေကြ၏။
အခုလေးတင်ဘာတွေဖြစ်ပျက်သွားလဲဆိုတာ ဒီသခင်လေးကိုတစ်ယောက်ယောက်ပြောပြကြပါဦး။
“အဲ့ဒါ ဟာကွက်စွမ်းရည်ပဲ”
စုဝမ်တစ်ယောက်သာ တိရှစ်ထျန်းရှေ့သို့ စုရွေ့ရောက်သွားသည့်အခိုက်အတန့်ကို သေချာမြင်လိုက်သည်။ စုရွေ့က ‘ဟာကွက်’ဟုခေါ်သည့် အဆင့်၆၅မှော်ပညာရှင်စွမ်းရည်ကိုသုံးလိုက်ခြင်းဖြစ်သည်။ ပစ်မှတ်ထားသော သူ၏ဗဟိုချက်ကိုထိသွားသည်နှင့် ချက်ချင်းသေစေနိုင်မှုအပေါ်လေးရာခိုင်နှုန်းသက်ရောက်မှုရှိသည်။
သာမန်မှော်ပညာရှင်တစ်ယောက်သာအသုံးပြုပါက အနီးကပ်သတ်ဖြတ်မှုအပေါ်တွင်သာသက်ရောက်မှုရှိသည်။ ချက်ချင်းသေစေနိုင်မှုအပေါ်လေးရာခိုင်နှုန်းသက်ရောက်မှုသည် အမှန်တကယ်တွင် ဂိမ်းဆက်တင်၌ သက်ရောက်နှုန်းနည်းရာ ၎င်းကအသုံးမဝင်သောစွမ်းရည်ဖြစ်သည်။
သို့သော်ထိုစွမ်းရည်သည် တိုက်ခိုက်မှုပညာရှင်စုရွေ့၏အရှေ့တွင် ချက်ချင်း မမှတ်မိနိုင်လောက်အောင် ဖြစ်သွားလေသည်။ သူဂိမ်းထဲသို့ဝင်လာသည့်အချိန်တွင် စုရွေ့ကထိုစွမ်းရည်ကိုထိန်းချုပ်ကာ ထောင်ပေါင်များစွာသော မကောင်းဆိုးဝါးတို့နှင့်စမ်းသပ်မှုပြုလုပ်ပြီး နောက်ဆုံး၌ ပြိုင်ဘက်၏အကွာအဝေးသည် လုံလောက်စွာနီးကပ်နေပါက နေရာတစ်ခုကိုအတိကျဆုံးတိုက်ခိုက်နိုင်စေရန်အတွက် မိမိ၏တိုက်ခိုက်စွမ်းရည်ကို ကောင်းစွာထိန်းချုပ်ပြီး ချက်ချင်းသေစေနိုင်မှုအပေါ်တစ်ရာရာခိုင်နှုန်းသက်ရောက်စေနိုင်ကြောင်း သူသိရှိသွားခဲ့၏။
သေချာပေါက် အရေးအကြီးဆုံးသောအခြေအနေမှာ တိုက်ခိုက်သည့် တည်နေရာပင်ဖြစ်သည်။ ၎င်းက ပြိုင်ဘက်၏ အားအနည်းဆုံး သေစေနိုင်သည့်နေရာဖြစ်ရမည်။
ထိုသို့နှင့် စုရွေ့သုံးလိုက်သော ပြီးပြည့်စုံသည့်သာမန်စွမ်းရည်လေးသည် စက္ကန့်ပိုင်းလေးအတွင်း၌ တိရှစ်ထျန်းအား သတ်နိုင်လိုက်လေ၏။
တိရှစ်ထျန်းလဲကျသွားသောအခါ စုဝမ်က အဆင့်မြင့်ပြန်လည်ရှင်သန်ခြင်းစွမ်းရည်ကိုသုံးလိုက်သည်။
ပြန်လည်ရှင်သန်လာပြီးနောက် တိရှစ်ထျန်းက နားမလည်နိုင်ဖြစ်နေဆဲပင်။ စုချန်းဝမ်ယွဲ့အား သူ့အသက်ကို ပြန်ဖြည့်လိုက်ကြောင်း သတိထားမိသွားသောအခါ သူကတစ်ကြိမ်သေဆုံးသွားခဲ့သည့်အချက်ကို လက်ခံလိုက်ရသည်။
တစ်ဖက်တွင်ရှိနေသော ဟွေ့မော့ယိရှောင်သည် မမျှော်လင့်ထားသောအဖြစ်အပျက်ကြောင့် ကြောက်ရွံ့သွားသည်။ သူမကနတ်ဆရာမတစ်ယောက်ဖြစ်ပြီး သူမ၏လူအား ကုစားပေးရန် မေ့လျော့သွားကာ စုရွေ့ကို အကြောက်တရားတို့ဖြင့်ကြည့်၍ အနောက်သို့ ခြေလှမ်းဆုတ်လိုက်မိသည်။
သူမကြောက်လန့်နေချိန်တွင် စုဝမ်ကတိရှစ်ထျန်း၏အသက်အား အပြည့်ထိပြန်ဖြည့်ပေးလိုက်ပြီးဖြစ်သည်။ သူမကနတ်ဆရာမနှင်တံကိုချလိုက်ကာ စုရွေ့အား မကျေနပ်သည့်အမူအရာဖြင့်ကြည့်လိုက်သည်။
“နောက်တစ်ခါ သူ့ကိုသတ်တဲ့အခါကျရင် ကျွန်မဂါထာရွတ်ဖို့အချိန်လေးနည်းနည်းစောင့်ပါဦးလား။”
ပတ်ဝန်းကျင်မှကြည့်ရှုသူများ : ……….
စုရွေ့ : ကောင်းပြီ။
စုဝမ်အား ပြောပြီးသည့်အခါ စုရွေ့က ဘေးတွင်ရှိနေသာ တိရှစ်ထျန်းအားလှည့်ကြည့်လိုက်သည်။
“လာ ဒီတစ်ခါ ငါးစက္ကန့်အကြောပေးမယ်။”
တိရှစ်ထျန်း : ……..
တိရှစ်ထျန်းဂိမ်းကစားလာသည်မှာ နှစ်ပေါင်းများစွာကြာပြီဖြစ်သည်။ လွန်ခဲ့သည့်နှစ်အနည်းငယ်တွင် သူကအရာအားလုံး၏ အထက်တွင်ရှိနေခဲ့သည်။ သူတိမ်ပေါ်တွင်ရပ်တည်နေခဲ့သည့်နေ့ရက်များမှာ ရှည်ကြာနေပြီဖြစ်သည်။ ယခုအခိုက်အတန့်တွင်တော့ တိမ်ပေါ်မှ ရွံ့တောထဲသို့ပြုတ်ကျကာ သူ၏စိတ်ခံစားချက်များ အတက်အကျဖြစ်နေတော့သည်။ စုဝမ်၏လှောင်ပြောင်သရော်နေသည့်စကားတို့ကို ကြားသောအခါ တိရှစ်ထျန်း၏မျက်နှာသည် ဒေါသတကြီးဖြစ်လာပြီး ‘ချည်နှောင်ဓားချက်’အား အသုံးပြုလိုက်၏။
ထိလိုက်စမ်း။
စုရွေ့ပတ်လည်တွင်သွေးနီရောင် သင်္ကေတများပေါ်လာသည့်အခါ တိရှစ်ထျန်း၏မျက်လုံးများတွင် မိုက်ရူးရဲဆန်မှုများဖုံးလွှမ်းသွားပြီး ဓားသမား၏ သတ်ဖြတ်နှုန်းမြင့်သော စွမ်းရည်သုံးခုကို တစ်ဆက်တည်း ပစ်လွှတ်လိုက်သည်။
သေစမ်း...သေစမ်း...သေစမ်း...။
‘သွေးမိုးဓားချက်’စွမ်းရည်သက်ရောက်မှုသည် အမည်အတိုင်းပင် ကောင်းကင်အပြည့်သွေးမိုးများ ကျနေစေသည်။
ငါးစက္ကန့်ကုန်ဆုံးသွားကာ စွမ်းရည်အနည်းငယ်ဖြင့် မျက်တောင်တစ်ခါခတ်သည့်အချိန်အတွင်း အဆက်မပြတ် တိုက်ခိုက်ခဲ့သော တိရှစ်ထျန်းသည် စုရွေ့အသက်ဆုံးရှုံး၍မြေပေါ်တွင်လဲနေသည်ကိုမြင်ချင်ခဲ့သည့် ဆန္ဒမပြည့်ဝလိုက်ပေ။
သွေးမိုးတို့ပျောက်ကွယ်သွားသောအခါ စုရွေ့ကထိုနေရာတွင်ရပ်နေမြဲဖြစ်၏။
ကြည့်ရှုသူ A : မြတ်စွာဘုရားရေ…ယဲ့ယွီကတိုက်ခိုက်မှုအားလုံးကို ရှောင်လိုက်နိုင်တယ်။ အံ့ဩဖို့ကောင်းလိုက်တာ။ ငါမှတ်တမ်းတင်ထားချင်တယ်။ ညီအစ်ကိုတို့ မှတ်တမ်းတင်နေကြပြီလား။
ကြည့်ရှုသူ B : ဒါက ဒဏ္ဍာရီလာသတ်ဖြတ်သူနတ်ဘုရားပဲကွ။ မင်းအမေ… ဒီသခင်လေးရဲ့မျက်လုံးတွေ ကန်းကုန်တော့မှာပဲကွာ။
ကြည့်ရှုသူ C : ချီးပဲ…ယဲ့ယွီသွေးတစ်စက်တောင်လျော့မသွားဘူး။ ဒါကသိပ္ပံသဘောတရားကိုဆန့်ကျင်နေတာပဲ။
စုဝမ် : …….
ကျိကုန်းကိုသိကြလား... လင်းပိုးရဲ့ခြေလှမ်းလေးတွေကိုရောမြင်ဖူးကြလား။ စုရွေ့ရဲ့ကျိကုန်းက ဝူရှားဝတ္ထုတွေထဲက ဇာတ်လိုက်တွေထက်အများကြီးစွဲမက်ဖွယ်ကောင်းတယ်လို့ပြောရင် ဘယ်လိုတွေးကြမလဲမသိဘူး။
ထိုအချိန်တွင် စုရွေ့သည် အင်တာနက်ပေါ်တွင်ရေပန်းစားနေသော စာကိုသတိရသွားသည်။
‘လူတွေက ငါးစာသာဖြစ်၏’
ကောင်းပြီ။ အခုလိုပုံရိပ်ယောင်နဲ့လက်တွေ့ရောနှောနေတဲ့ ကမ္ဘာမှာ စုရွေ့က နတ်ဘုရားမဟုတ်ဘူး ဒါပေမယ့်…. သူကနတ်ဘုရားကိုတောင်စိန်ခေါ်နိုင်စွမ်းရှိတယ်...။
_____
🚩
Welcome To MM Storyteller
LOGIN
Welcome To MM Storyteller
REGISTER