Welcome To MM Storyteller
LOGIN
🚩Chapter -84
Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 22 ]
_____
“ယဲ့ယွီ... ရှင်တကယ်ပဲ စုချန်းဝမ်ယွဲ့က တိရှစ်ထျန်းကိုဘယ်တုန်းကမှမချစ်ခဲ့ဘူးဆိုတာကိုယုံလား”
ဟွေ့မော့ယိရှောင်၏စကားလုံးများသည် စုရွေ့၏နှလုံးသားထဲ၌ လှိုင်းသေးသေးလေးတစ်ခုပင် လှုပ်ခတ်မသွားစေသော်လည်း ‘အဆုံးမရှိည’နှင့် ‘ကောင်းကင်ဘုံကိုးထပ်ရှိဖီးနစ်’အုပ်စုဝင်များ အထူးသဖြင့် အုပ်စုနှစ်စုထဲရှိ ညီအစ်မများအား မပျော်ရွှင်အောင်လုပ်ဆောင်နေလေသည်။
မိန်းမလှလေး : ဝေ့ ဝေ့ ဝေ့ ဟိုအနားကအရှက်မရှိတဲ့မိန်းမ နင့်လူကလိုင်းဆင်းသွားတာတောင် ငါတို့မိသားစုက နတ်ဘုရားကို လာမြှူဆွယ်နေတာလား။ ကျေးဇူးပြုပြီး ဂုဏ်သိက္ခာလေးနဲ့ အသိဉာဏ်ရှိရှိလေးနေပေးလို့ရမလား။ ငါတို့မိသားစုရဲ့ခေါင်းဆောင်နတ်ဘုရားက နတ်ဘုရားမဝမ်ယွဲ့ရဲ့လူပဲ။ နင်နဲ့ဘာမှဆိုင်မနေဘူးနော်။
ဇူလိုင်၇ရက် : အမှန်ပဲ...ဘယ်မိန်းကလေးဖြစ်ဖြစ် ဆန်ကုန်မြေလေးကောင်တွေကို မှားယွင်းကြိုက်မိနိုင်တာပဲလေ။ ဝမ်ယွဲ့ကအရင်က ဆန်ကုန်မြေလေးကောင် တိရှစ်ထျန်းကိုကြိုက်ခဲ့ရင်တောင်မှ အဲ့ဒါကအတိတ်မှာကျန်ခဲ့ပြီ။
ကျော်ကြားသည့် မိန်းမလှလေး : ဟွေ့မော့ယိရှောင်လို့ခေါ်တဲ့ လက်ဖက်စိမ်းရမယ်နော်...တစ်ခုဝယ်တစ်ခုလက်ဆောင်ရပါမယ်။
ဝူပေါင်ပေ့ : အန်တီ သဘောထားကွဲလွဲအောင်မျိုးစေ့ချတာမျိုးတာ အခုခေတ်မှာ ရေပန်းမစားတော့ဘူးနော် သိလား ရှင်သာ ရက်စက်ကြမ်းကြုတ်အမျိုးသမီးအရံဇာတ်ကောင်အဖြစ်သရုပ်ဆောင်ရင်တောင် အရမ်းအိုဗာလွန်းလို့ သဘောကျကြမှာမဟုတ်ဘူး သိရဲ့လား။
ဖီးနစ်အုပ်စုမှ ညီအစ်မများ၏အရှေ့တွင် ဟွေ့မော့ယိရှောင်သည် လူအများပြက်ရယ်ပြုစရာဖြစ်နေတော့သည်။ သူမက ဘာမှမပြောနိုင်သဖြင့် မျက်ရည်တို့ကိုထိန်းထားသည့်မျက်နှာအမူအရာဖြစ်နေ၏။
ပတ်ဝန်းကျင်ရှိ အမျိုးသားအုပ်ကြီးကတော့ ပွဲအား ပျော်ရွှင်စွာကြည့်နေကြလေသည်။ သူမကို မည်သူကသနားသဖြင့် သွားရောက်နှစ်သိမ့်ပေးကာ အလကားလိင်ဆက်ဆံခွင့်ရယူကြမည်နည်း။
လူတိုင်းက ယခုအချိန်ထိဟွေ့မော့ယိရှောင်၏ ပုံစံအစစ်အမှန်အား မမြင်ကြသေးလျှင် သူတို့၏ပုံမှန်ထက်လျော့နည်းနေသည့်အိုင်ကျူအား မြှင့်တင်ရန် ဦးနှောက်အာဟာရဖြစ်စေသည့် အစားအစာများစားသုံးပေးသင့်သည်။
“အရမ်းပျင်းဖို့ကောင်းတယ်”
စုရွေ့ကစုဝမ်ကိုအပြုံးလေးဖြင့်ကြည့်လျက် ဆိုလိုက်သည်။
“အဆင့်တင်ဖို့ခေါ်သွားပေးရမလား။”
“ကောင်းပြီ”
စုဝမ်ခေါင်းညိမ့်လိုက်သည်။ သူတို့နှစ်ယောက်ကတစ်သင်းထဲဖြစ်နေသေးရာ စုဝမ်ကခေါင်းဆောင်အနောက်အား ပွင့်ပွင့်လင်းလင်းပင်လိုက်သွား၏။ ထို့နောက် သူတို့နှစ်ယောက်သည် ဤစိတ်ရှုပ်စရာနေရာ၌ မည်သူမျှမရှိတော့ သကဲ့သို့ သဘောထားကာ ထွက်သွားကြတော့သည်။ ဟွေ့မော့ယိရှောင်က လူအုပ်ကြီး၏ဝိုင်းရံပိတ်ဆို့ခြင်းမှ ရုန်းကန်ထွက်လာချိန်တွင် ယဲ့ယွီနှင့် စုချန်းဝမ်ယွဲ့တို့သည် အဝေးသို့ထွက်သွားကြပြီဖြစ်ကြောင်း သတိထားမိသွား၏.....။
ယနေ့ကအလွန်တက်ကြွတဲ့ နေ့တစ်နေ့ပင်။ ယနေ့သည် လင်ရှန်း ဟွာရှားဒေသ၏ မှတ်ကျောက်တင်စရာနေ့တစ်နေ့လည်း ဖြစ်နေသေးသည်။
တိရှစ်ထျန်းလိုင်းဆင်းသွားပြီးနောက် သိပ်မကြာခင်၌ ယဲ့ယွီက တိရှစ်ထျန်းအား သတ်ဖြတ်သည့်ဗီဒီယိုမှာ ဖိုရမ်ပေါ်တွင်တက်လာသည်။
ဟွာရှားဒေသရဲ့သတ်ဖြတ်ခြင်းနတ်ဘုရားအသစ်ပေါ်လာပြီ လက်ခံဖို့ခက်ခဲနေလား သွားပြီးတိုက်ခိုက်ကြည့်ပါ...။
စတုတ္ထမြောက်ပြည်နယ်ရဲ့နံပါတ်တစ် တိရှစ်ထျန်း ချေမှုန်းခံလိုက်ရ။
တစ်နေ့လုံး ဖိုရမ်ပေါ်တွင် စိတ်လှုပ်ရှားနေကြသော ကစားသူများ၏ ကောမန့်များနှင့် ရိုက်ကူးထားသော ဗီဒီယိုရာပေါင်းများစွာမှာ ပြည့်နှက်နေတော့သည်။ ဟွာရှားဒေသတစ်ခုလုံး၏ဖိုရမ်သည် များပြားလာသည့် ပို့စ်များကြောင့် စနစ်ချို့ယွင်းလုနီးပါးပင်ဖြစ်လာ၏။
ယဲ့ယွီ...ပထမဆုံးတိုက်ခိုက်သတ်ဖြတ်ပွဲ၌ နတ်ဘုရားတစ်ပါးဆိုသည့်ခေါင်းစဥ်ရရှိခဲ့။
ပထမဆုံးတိုက်ခိုက်သတ်ဖြတ်ပွဲနှင့်တင် ဟွာရှားဒေသတစ်ခုလုံးတွင် နာမည်ကြီးသွားလေသည်။ လူထုအလယ်တွင် ယုံကြည်ချက်အပြည့်ဖြင့် ထူးချွန်ပြောင်မြောက်စွာ အနိုင်ရခဲ့သည်။
မြောက်အမေရိကဒေသ၏ တိုက်ခိုက်မှုစွမ်းအားတွင်နံပါတ်တစ်နေရာ၌ရှိနေသော ဂျက်သည်ပင် ဖိုရမ်သို့ရောက်လာခဲ့ပြီး ယဲ့ယွီ၏ တိုက်ခိုက်သတ်ဖြတ်မှုဗီဒီယိုကို ဒေါင်းလုတ်ရယူကာ သူ့ကိုယ်ပိုင်လူမှုစာမျက်နှာ၌တင်ခဲ့လေသည်။ လက်တွေ့နှင့် ပုံရိပ်ယောင်အဆင့်များကို သတ်ဖြတ်သူနတ်ဘုရားယဲ့ယွီမှ တိကျစွာပြသပေးခဲ့ကာ ဇာတ်ကောင်များ၏အကြောင်းအရာများနှင့် ဇာတ်ကောင်များ၏ပြောင်းလဲမှုများသည် လင်ရှန်းဆော့ကစားသည့် ကမ္ဘာ့ဒေသတစ်ခုလုံးသို့ အချိန်အတိုင်းအတာ တစ်ခုထိ ပျံ့နှံ့သွားလေသည်။ ၎င်းက လင်ရှန်း၏အနာဂတ်အတွက် ဇာတ်ကောင်နှစ်ခု၏ပြောင်းလဲမှုများနှင့် အဓိကဇာတ်ကောင်နှစ်ခု၏စွမ်းရည်များအား မိတ်ဆက်ပေးရန် ပြတ်သားသည့်အထောက်အပံ့ဖြစ်စေခဲ့၏။
ထိုကဲ့သို့သော လေထုအောက်တွင် မထင်ရှားသော အိုင်ဒီတစ်ခုကလူများမမြင်ဖူးသေးသော ဗီဒီယိုအသေးလေးတစ်ခုအား ဖိုရမ်သို့တင်လာသည်။
လင်ရှန်းမှာ ဘယ်ယောက်ျားလေးရဲ့ လူသိရှင်ကြားချစ်ပြခြင်းက ပြင်းထန်သလဲဆွေးနွေးကြမယ်။
မူရင်းတင်သူ : ရေခဲတမျှအေးစက်သောလက်များ - စကားများများမပြောဘူး ဒီတိုင်းဗီဒီယိုလေးလာတင်တာ။
၎င်းကအတိုချုံ့ထားသည့်ဗီဒီယိုဖြစ်သည်။ အဆိုပါဗီဒီယိုသည် ယဲ့ယွီကလေထဲတွင်ရပ်နေကာ မှော်ပညာရှင်နှင်တံအား လှုပ်ရမ်းနေပြီး မိုင်ထောင်ပေါင်းများစွာကိုဖြတ်၍ ရေခဲမြစ်ကြီးတစ်ခုကို ပုံဖော်လိုက်ခြင်းဖြင့် စတင်ထားသည်။
ထို့နောက် ရိုက်ချက်က ပြောင်းလဲသွားကာ စုချန်းဝမ်ယွဲ့ ကူးပြောင်းရေးလမ်းကြောင်းထဲထွက်လာ၍ အဆုံးမရှိသောအဝါရောင်သဲများနှင့် လူထောင်ပေါင်းများစွာကြားတွင် လူနှစ်ယောက် တစ်ယောက်ကိုတစ်ယောက် ကြည့်နေတာကို ပြသလာသည်။
ထိုအချိန်တွင် နောက်ခံသီချင်းအဖြစ် ယခုနှစ်တွင်း လင်ရှန်း၌ ရေပန်းအစားဆုံးအချစ်သီချင်းဖြစ်သည့် (One Glance Millennium) ကထွက်ပေါ်လာသည်။
ထို့နောက် ဗီဒီယိုတွင် နူးညံ့သည့်အလင်းရောင်အထူးပြင်ဆင်ချက်ကိုသုံးထားသည်။ ယဲ့ယွီက စုချန်းဝမ်ယွဲ့ဆီသို့လျှောက်သွားကာ လက်တစ်ဖက်တည်းနှင့် သူမကိုရင်ခွင်အတွင်းဆွဲသွင်း၍ သူတို့နှစ်ယောက်က ဖြေးညင်းစွာလေပေါ်သို့ပျံတက်သွားသည်။ ထို့နောက်တွင် ဗီဒီယို၏ရှုထောင့်သည် ကောင်းကင်မှ မြေပေါ်သို့ပြောင်းလဲသွား၏။
အေးခဲနေသည့်မကောင်းဆိုးဝါးများသည် စာလုံးငါးလုံးအားပုံဖော်ထားတာကိုလူတိုင်းမြင်နိုင်သည် - ရှောင်ဝမ် ကိုယ်မင်းကိုချစ်တယ်။
၎င်းကထပ်ကြည့်ရန်မလိုတော့ချေ။ ကွန်ပျူတာအရှေ့တွင်ထိုင်၍ ထိုဗီဒီယိုအားအမှတ်တမဲ့ဖွင့်ကြည့်မိကြသော ညီအစ်မများမှာ ပင်ပန်းသည်အထိ ငိုကြွေးကြတော့သည်။
ဝူးဝူးဝူး ယဲ့ယွီကချောလိုက်တာ အရူးအမူးကိုပဲ...ဒီဘဝမှာသူတို့ချက်ချင်း သေရမယ်ဆိုရင်တောင်မှ ဒီလိုယောက်ျားမျိုးကိုရဖို့ဆန္ဒရှိတယ်။
တစ်နာရီကြာပြီးနောက် ‘ရေခဲတမျှအေးစက်သောလက်များ’၏ ဗီဒီယိုသည် များပြားလှသော တိုက်ခိုက်သတ်ဖြတ်မှုဗီဒီယိုများ၏အထက်သို့ထိုးတက်သွားကာ ဖိုရမ်တွင် ထိပ်ဆုံး၌နေရာယူနေတော့သည်။
မူလကမယုံကြည်ကြသော အရူးအမူးတိုက်ခိုက်သူများသည် ဗီဒီယိုအားကြည့်၍ အမှားတို့ကိုထောက်ပြချင်သော်လည်း အဆုံး၌ သူတို့ကတိတ်ဆိတ်စွာနှင့်ထွက်သွားကြပြီး စိတ်ထဲတွင်သာ ဆက်လက်လှောင်ပြောင်နေလိုက်ကြသည်။
မင်းအမေ... ချောချောမောမောကြီးပြင်းလာခဲ့ရင်တောင်မှတိုက်ခိုက်မှုမကောင်းရင်အရေးမပါတော့ဘူး...မင်းရဲ့ မိန်းမလိုက်ပိုးပန်းတဲ့စွမ်းရည်က ငါတို့ညီအစ်ကိုတွေထက်ပိုမြင့်တာပဲကွ...။
ငါတို့သေမျိုးတွေကိုပျော်ပျော်ရွှင်ရွှင်လေးကစားခွင့်ပေးပါဦး...။
သေစမ်း ဒီသခင်လေးမှာသာ ယဲ့ယွီရဲ့ဆယ်ပုံတစ်ပုံ... မဟုတ်ဘူး... တစ် ရာခိုင်နှုန်းလောက်ပဲရှိပါစေဦး။ အဲ့ဒီ တစ်ရာခိုင်နှုန်းနဲ့ ဘေးအိမ်ကကျောင်းပန်းကလေးကိုလိုက်ပိုးပန်းရင်တောင်မှ အခက်မခဲမရှိ အေးဆေးရနိုင်တယ်...။
............
လင်ရှန်းမှထွက်လာလိုက်ပြီးနောက်တွင် ယဲ့ယွီသည် သူ့လက်မောင်းကိုနှိပ်နယ်လိုက်သည်။ လင်ရှန်းသည် ဇာတ်ကောင်နှင့်လူအား ပမာဏတော်တော်များများဆက်သွယ်ပေးသည်ဟုကြော်ငြာထားသော်လည်း ယနေ့ဂိမ်းထဲတွင် ယဲ့ထျန်းနဲ့တိုက်ခိုက်ရန် သစ်သားဓားကိုအသုံးပြုခဲ့စဥ်က ဂိမ်းစနစ်၏ကန့်သတ်ချက်များကြောင့် စုယွေ့မှာ သူ၏ကိုယ်တွင်းရှိ အတွင်းအားတော်တော်များများကိုအသုံးပြုခဲ့ရသည်။ သူက သစ်သားဓားအတွင်းသို့ အားအပြင်းအထန်စုစည်းခဲ့၏။ သို့မဟုတ်လျှင် ထိုကဲ့သို့ကြီးမားသည့်ထိခိုက်မှုပမာဏ ဖြစ်စေမည်မဟုတ်ပေ။
ယခုသူလိုင်းဆင်းလာသောအခါ သူ့လက်မောင်းနှစ်ဖက်လုံးက အနည်းငယ်နာကျင်နေသည်။ ၎င်းသည် ဂိမ်းစနစ်က အတွင်းအားအသုံးပြုမှုကို ဆန့်ကျင်ကာ တန်ပြန်သက်ရောက်မှုကိုဖြစ်စေလိုက်သောကြောင့်ပင်။
သက်ပြင်းချလိုက်ရင်း စုရွေ့သည် အိပ်ရာပေါ်တွင်ထိုင်၍ သူ့အတွင်းအားကိုပြန်လည်ဖြည့်တင်းရန် အတွင်းအားအသက်ရှုနည်းကို ချိန်ညှိနေလိုက်သည်။ အချိန်တို့ကုန်လွန်သွားပြီး စုရွေ့မျက်လုံးဖွင့်ကြည့်လိုက်ချိန်တွင် သူထိုင်နေသည်မှာ တစ်နာရီခွဲရှိသွားပြီဖြစ်သည်။
အိပ်ခန်းတံခါးကိုဖြတ်၍ မီးဖိုခန်းမှလာသော ဟင်းရနံ့များကို သူရှူရှိုက်လိုက်ရသည်။ ထိုဟင်းရနံ့များက အလွန်မွှေးကြိုင်ကာ စုရွေ့နှင့်ရင်းနှီးနေသည်။
ဒီနေ့စာဖိုမှူးစောစောရောက်လာတာပဲ။
ယနေ့ သူအားစိုက်ထုတ်လိုက်ရသောကြောင့် စုရွေ့ဗိုက်ဆာနေခြင်းဖြစ်နိုင်သည်။ သူကအိပ်ရာပေါ်မှထ၍ မီးဖိုခန်းသို့သွားလိုက်သည်။ ရလဒ်အနေနှင့် မီးဖိုခန်းထဲသို့ ဝင်လိုက်သည့်အခါ စုရွေ့မှင်သက်သွား၏။
စုဝမ်က အေပရွန်ကိုဝတ်ဆင်ထားပြီး မီးဖိုခန်းထဲတွင်ရပ်နေကာ သူမရဲ့ဖြောင့်စင်းနက်မှောင်နေသည့် ဆံပင်များအား လျော့တိလျော့ရဲလေးစည်းထားလေသည်။ ယခုတွင် သူမကစွတ်ပြုတ်အိုးအား လေးနက်နေသည့် မျက်နှာနှင့် မွှေနေသည်။ သူမက မီးဖိုခန်းဝင်ပေါက်ကို နောက်ကျောခိုင်းထားတာကြောင့် စုရွေ့ရောက်လာကြောင်းကို ချက်ချင်းသတိမထားမိချေ။
မီးဖိုခန်းထဲတွင် ဟင်းလျာနှစ်ခွက်အား အလွန်လှပသောအပြင်အဆင်နှင့် အနံ့မွှေးကြိုင်လှစွာ ပြင်ဆင်ပြီးနေပြီဖြစ်သည်။
စုရွေ့တစ်ချက်ကြည့်လိုက်သည်နှင့် ထိုဟင်းလျာနှစ်ခွက်အား မှတ်မိသွားသည်။ တစ်ခုမှာ ကြက်သားမျှင်များအား မှိုဖြင့်ကြော်ထားခြင်းဖြစ်ပြီး နောက်တစ်ခုမှာ အသားမွှေကြော်ဖြစ်သည်။ ယခုစုဝမ်ချက်ပြုတ်နေသည့်အရာက....
“ငါးကြင်းစွတ်ပြုတ်”
စုရွေ့ကဟင်းလျာအမည်ကို သတိလက်လွတ်ထုတ်ပြောမိလိုက်၏။ ၎င်းသည် သူစစ်သူကြီးအိမ်တော်တွင် ရှိခဲ့တုန်းက အကြိုက်ဆုံးအစားအစားပင်။
“ဒီကနေ အနံ့ရနေတာပဲ”
စုဝမ်က စုရွေ့အသံကိုကြားသောအခါ အသာရယ်မောလိုက်မိသည်။
“ဒါကျွန်မ ပထမဆုံးလုပ်ဖူးတာ... အရသာမရှိရင် စိတ်မဆိုးနဲ့နော်။”
“ဘာလို့စိတ်ဆိုးရမှာလဲ။ မင်းချက်ပေးတာမှန်သမျှ အကုန်ပြောင်ရှင်းသွားတဲ့အထိစားပစ်မှာ။”
စုရွေ့က မီးဖိုခန်းတံခါးကိုမှီကာ လက်ပိုက်ထားပြီး စုဝမ်၏ကိုယ်လုံးလေးအား တိတ်ဆိတ်စွာ ကြည့်နေမိသည်။
“စုဝမ် ဒါကိုယ့်အတွက် မင်းပထမဆုံးချက်ပေးတာပဲ”
ဇွန်းကိုင်ထားသော စုဝမ်ရဲ့လက်များတောင့်ခဲသွားသည်။
“ဟုတ်လား...သတိမထားမိဘူး။”
စုရွေ့ပြုံးလိုက်ကာ ပြီးခဲ့သည့် ကမ္ဘာတွင် သူကဆက်နေဖို့အကြောင်းပြချက်ကိုတမင်ရှာဖွေနေခဲ့ပြီး စုဝမ်က သူ့ကိုပြန်ပို့ရန် လက်မခံနိုင်စရာအကြောင်းပြချက်တို့ကိုသုံးခဲ့ကြောင်းသတိရသွားသည်။
ယခုတွင် သူတို့၏ဆက်ဆံရေးမှာ ယခင်နှင့်မတူတော့ချေ။
“စုဝမ် ကိုယ်ဒီနေ့အရမ်းပျော်တယ် ဝိုင်နီလေးတစ်လုံးလောက်သွားယူလိုက်မယ်လေ”
ပြောပြီးသည်နှင့် သူကစုဝမ်၏အဖြေကိုမစောင့်ဘဲ သူ့အခန်းထဲသို့လျင်မြန်စွာပြန်သွားလေ၏။ အိပ်ခန်းထဲ၌ စစ်ထူမိသားစု၏ သခင်လေးစစ်ထူယဲ့အမြတ်တနိုးတန်ဖိုးထားသော လက်ရာပြောင်မြောက်သည့် ပရိဘောဂများရှိပြီး ဝိုင်ပုလင်းများမှာ စင်များအထပ်လိုက်နှင့် မနည်းမနောပင်။
စုရွေ့ထွက်သွားသည့်ခြေသံများကိုကြားသောအခါ စုဝမ်သည် အိုးထဲရှိငါးစွပ်ပြုတ်ကို တွေဝေစွာကြည့်ရင်း အတွေးထဲတွင် နစ်မြောနေမိ၏။
သူမဘာဖြစ်သွားလဲ သူမကိုယ်တိုင်လည်းမသိချေ။ သူ့အပေါ်မျှော်လင့်ချက်တစ်စုံတစ်ရာထပ်မပေးရန် ကိုယ့်ကိုယ်ကိုယ် သတိပေးထားသော်လည်း ယနေ့တွင် သူက သူမရင်ကို သိသိသာသာလှုပ်ခတ်စေခဲ့သည်။
အထူးသဖြင့် ယနေ့နေ့လည် စုရွေ့ သူမအား အဆင့်တင်ရန်ခေါ်သွားသည့်အချိန်တွင်ဖြစ်သည်။ စုဝမ်က သူ့လက်မောင်းများ ထူးခြားနေတာကိုသတိထားမိသော်လည်း သူကသည်းခံနေသည်ကို တွေ့သောအခါ သူမရှည်ရှည်ဝေးဝေး မမေးဘဲနေခဲ့သည်။
သို့သော် လိုင်းဆင်းလာပြီးနောက် စုဝမ်ကချက်ချင်းပင် စုရွေ့အခန်းဆီသို့သွားခဲ့သည်။ သူမကသူ့အခြေအနေကို ကြည့်ရန်သွားလိုက်သော်လည်း စုရွေ့ကအိပ်ရာပေါ်တွင်လှဲနေကာ အတွင်းအားပြန်လည်ဖြည့်တင်းနေတာကို တွေ့လိုက်ရသည်။ ထိုအချိန်ခဏတွင် စုဝမ် စိတ်မကောင်းဖြစ်သွားခဲ့၏။
ထို့ကြောင့်သူမက သူမအခန်းသို့လှည့်ပြန်မသွားဘဲ မီးဖိုခန်းဆီသို့ဦးတည်လိုက်သည်။ သူမက ကြီးမြတ်သည့်ရှမင်းဆက်တွင်ရှိနေတုန်းက ရရှိခဲ့သောကျင်းကျူလေး၏မှတ်ဉာဏ်များကို အခြေခံ၍ စုရွေ့ကြိုက်သော ဟင်းလျာများကို ရှာဖွေပြီး မီးဖိုခန်းထဲတွင် တစ်ယောက်တည်းချက်ပြုတ်နေလိုက်သည်။
စုဝမ်သည် ယခုတစ်ကြိမ်တွင် သူမ ဝန်မခံချင်သည့်အချက်တစ်ခုအား သူမကိုယ်တိုင်တောင် သတိမထားမိခြင်းဖြစ်ကောင်းဖြစ်နိုင်သည်......။
စုရွေ့က သူမအတွက် သူစိမ်းတစ်ယောက်မဟုတ်တော့ပေ။
_
🚩
Welcome To MM Storyteller
LOGIN
Welcome To MM Storyteller
REGISTER