Chapter 85
Viewers 4k
Chapters 444

🚩Chapter -85 

Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 23 ]


_____



လွန်ခဲ့သည့်ရက်အနည်းငယ်အတွင်း စုရွေ့သည် စုဝမ်အား ကြားနေမြေပုံသို့အဆင့်တင်ရန်ဆက်တိုက်ခေါ်သွားခဲ့ပြီး သူသွားလိုက်သည့်နေရာတိုင်းတွင် မိုင်ထောင်ပေါင်းများစွာအေးခဲသွားသည်ပင်။


ထိုကြီးမားသည့် လွှမ်းမိုးမှုကြောင့် ဖြတ်သွားသည့်ကြည့်ရှုသူများသည် မနာလိုအားကျမှုတို့ကိုသာ ဖော်ပြနိုင်၏။


မနာလိုအားကျမုန်းတီးခြင်းလား... အမလေး ကျေးဇူးပြုပြီး ယဲ့ယွီနင်းခြေတာမခံချင်ရင် အဲ့စကားတွေကို ပြန်မျိုချလိုက်တာကအကောင်းဆုံးဖြစ်လိမ့်မယ်...။ 


ယဲ့ယွီတစ်ယောက် တိရှစ်ထျန်းအားပြင်းထန်စွာသတ်ဖြတ်ခဲ့ပြီး လိုင်းဆင်းသွားစေသည့်နေ့မှစ၍ ရှစ်ထျန်းအုပ်စုသည် နောက်တစ်နေ့တွင်ပြောင်းလဲသွားခဲ့သည်။ ဟွေ့မော့ယိရှောင်သည်လည်း လုံးဝပေါ်မလာခဲ့‌‌ပေ။ သို့သော် ၎င်းက အဆုံးသတ်မဟုတ်ခဲ့ချေ။ 


ထိုနေ့၌ပင် ယဲ့ယွီသည် ဆာဗာတစ်ခုလုံးသို့ ရှစ်ထျန်းအုပ်စုမှ လူအားလုံးအား သတ်ဖြတ်ရန် သတ်ဖြတ်မိန့်တစ်ခုထုတ်ပြန်ခဲ့သည်။ 


တိရှစ်ထျန်းက စုချန်းဝမ်ယွဲ့အား သတ်ဖြတ်မိန့်ထုတ်ခဲ့စဥ်က အုပ်စုတစ်ခုမှ လူတစ်ယောက်တည်းအား သတ်ဖြတ်မိန့်ထုတ်ခဲ့ခြင်းဖြစ်သည်။ သို့သော်ယခုတွင်မူ လူတစ်ယောက်တည်းမှ အုပ်စုတစ်စုလုံးအား သတ်ဖြတ်မိန့်ထုတ်ခြင်းဖြစ်၏။ 


ရှစ်ထျန်းအုပ်စုပျက်သုဥ်းသွားရန် အချိန်ဘယ်လောက်မှမယူလိုက်ရပေ။ ရှစ်ထျန်းကျဆုံးသွားပြီးနောက် ယဲ့ယွီသည် သတ်ဖြတ်မိန့်ကိုမရုတ်သိမ်းသေးဘဲ ဝံပုလွေအစွယ်အုပ်စုကို ပစ်မှတ်ထားခဲ့သည်။ 


တုလန်က စုချန်းဝမ်ယွဲ့ကိုသာမက ယဲ့ယွီကိုပါဆက်သွယ်ရန်ကြိုးစားခဲ့သည်။ သို့သော် သူ၏ကြိုးစားမှုများက သိသိသာသာပင်သက်ရောက်မှုတစ်စုံတစ်ရာမရှိခဲ့ချေ။ နောက်တစ်နေ့တွင် ကြောက်လန့်ကုန်ကြသော ဝံပုလွေအစွယ်အုပ်စုဝင်များက အုပ်စုမှထွက်ကြတော့သည်။ သိပ်မကြာလိုက်ခင်မှာပင် ဝံပုလွေအစွယ်အုပ်စုလည်း လိုင်းပေါ်တွင်မရှိတော့ပေ…..။


ဝံပုလွေအစွယ်ကျဆုံးသွားပြီးနောက် ဟွာရှားပြည်နယ်ရှိ ကစားသူများသည် ကြောက်မက်ဖွယ်အုပ်စိုးမှုများပြီးဆုံးသွားပြီဟု ထင်နေသည့်အချိန်တွင် ရုတ်တရက်ဖိုရမ်၌ အမည်စာရင်းအကြီးကြီးတစ်ခုတက်လာလေသည်။ ထိုအမည်စာရင်းတွင် တစ်ချိန်က စုချန်းဝမ်ယွဲ့အား လိုက်လံသတ်ဖြတ်ကာ ဆုငွေရယူခဲ့ကြသောသူများ၏အမည်များပါဝင်ပြီး ဖီးနစ်အုပ်စုအား အဆုံးမရှိညအုပ်စုနှင့် မထိုက်တန်ဟုလှောင်ပြောင်သရော်ထားကြသူများလည်း မျက်နှာဖြတ်ရိုက်ခံလိုက်ရသကဲ့သို့ ပါလာတော့၏။


ထိုအချိန်တွင်လူတိုင်းသည် အဆုံးမရှိညမိသားစု၏ခေါင်းဆောင်ယဲ့ယွီက မိန်းမတစ်ယောက်အတွက်နှင့် ဆာဗာတစ်ခုလုံးအား ရန်သူအဖြစ်ပြောင်းလဲပစ်နိုင်ကြောင်း သိရှိသွားကြတော့သည်။ 


ဖိုရမ်တွင် တမင်တကာ ကဲ့ရဲ့လှောင်ပြောင်ခဲ့ကြသူများသည် ဟွာရှား၏အဓိကပြည်နယ်အသီးသီးတွင်ပြန့်ကျဲနေပြီး အချို့မှာ အခြားသောပြည်နယ်များရှိ အုပ်စုကြီးများ၏ အဓိကအဖွဲ့ဝင်များဖြစ်ကြောင်း သိထားသင့်သည်။ 


မဟုတ်မှ သူကဆာဗာတစ်ခုလုံးရဲ့ ဘုံရန်သူအဖြစ်ခံမယ်လို့တော့မပြောနဲ့နော်။


ယဲ့ယွီထိုသို့မလုပ်လျှင်တောင်မှ သူက ဆာဗာထဲရှိ အမျိုးသားကစားသူတိုင်း၏ဘုံရန်သူဖြစ်နေပြီးဖြစ်သည်။ အဘယ်ကြောင့်ဆိုသော် ယဲ့ယွီ၏အမည်စာရင်းအကြီးကြီးထွက်လာပြီးနောက်တွင် ပို့စ်အောက်၌ အမျိုးသမီးကစားသူများ၏ စိတ်အားထက်သန်နေသည့် စာများနှင့်ပြည့်နေသောကြောင့်ဖြစ်သည်။ ညီအစ်မအုပ်စုကြီးသည် ယဲ့ယွီကထိုမျှလောက် လွှမ်းမိုးမှုမပြင်းထန်သင့်ကာ စုချန်းဝမ်ယွဲ့လည်း မပျော်မရွှင်ဖြစ်နေလိမ့်မည်ဟု ခံစားနေကြရသည်။ 


ထိုချစ်သူနှစ်ယောက်ကောင်းမွန်စွာအတူရှိနိုင်ရေးအတွက် ညီအစ်မများသည် သူတို့ကိုယ်ပိုင်ပြည်နယ်များရှိ အတားအဆီးများကိုရှင်းလင်းကာ ‘အပြစ်သား’များအား ခွဲထုတ်ရန်ဆုံးဖြတ်လိုက်ကြသည်။ ဤကြီးမားသည့် အမဲလိုက်ပွဲကြီးသည် နှစ်လတာကြာ ကြာမြင့်ခဲ့ပြီး နောက်ပိုင်းအချိန်များထိ လင်ရှန်းတွင်နာမည်အကြီးဆုံး ဒဏ္ဍာရီလာဖြစ်ရပ်တစ်ခုအဖြစ်ရှိနေဆဲဖြစ်သည်…..။ 


စုရွေ့၏အကူအညီဖြင့် စုဝမ်သည်အဆင့်၈၀ထိ ရောက်ရှိသွားကာ ‘ကောင်းကင်ဘုံကိုးထပ်ရှိဖီးနစ်’အုပ်စုသည်လည်း စတုတ္ထမြောက်ပြည်နယ်၏ ထိပ်သီးအုပ်စုအဖြစ် ထင်ရှားလာခဲ့သည်။ အဆုံးမရှိညနှင့် မဟာမိတ်ဖွဲ့လိုက်ပြီးနောက် ဖီးနစ်အုပ်စုသည် ရှောင်ယောင်တပ်စခန်းနှင့် မဟာမိတ်ဖွဲ့ခဲ့ကာ အုပ်စုသုံးစုသည် အချင်းချင်းကူညီစောင့်ရှောက်ခဲ့ကြသည်။ သိပ်မကြာခင်မှာပင် ကြားနေစစ်မြေပြင်၌ အုပ်စု ခံတပ်မြို့တစ်မြို့တည်ထောင်လိုက်ကြသည်။ 


မြို့သည် ‘ဝမ်ယွဲ့’ဟုအမည်တွင်ပြီး စုဝမ်ကိုကိုယ်စားပြုနေလေသည်။ 


ဖီးနစ်အုပ်စုမှညီအစ်မများ : ခဲအိုကဆွဲဆောင်မှုအရှိဆုံးနဲ့ အတော်ဆုံးပဲ။


အဆုံးမရှိညအုပ်စုမှညီအစ်ကိုများ : ခေါင်းဆောင်ရေ လူသိရှင်ကြားတစ်ရက်လောက်ချစ်မပြတာနဲ့ သေသွားမှာမို့လို့လား...။ 


#ငါတို့ခေါင်းဆောင်မှာ တစ်ရက်လောက်လူသိရှင်ကြားကဲကဲသဲသဲလုပ်မပြရရင် သေမယ့်ရောဂါရှိနေတယ်...။ သူအသက်ရှင်နိုင်ပါ့မလား...။ အွန်လိုင်းပေါ်မှာ စိတ်အားထက်သန်စွာနဲ့စောင့်နေမယ်...။ အရမ်းအရေးကြီးတယ်။#


စုရွေ့က စုဝမ်အား အမြင့်ဆုံးအဆင့်ထိရောက်အောင်ကူညီပေးပြီးနောက်တွင် လိုင်းပေါ်သိပ်မတက်ဖြစ်သောကြောင့် အဆုံးမရှိညအုပ်စုမှလူများ၏ ဖန်နှလုံးသားများအစိတ်စိတ်အမြွှာမြွှာ ကွဲကြေနေသည်ကို ဂရုမစိုက်နိုင်ချေ။ သူကလက်တွေ့ကမ္ဘာတွင် ယဲ့မိသားစုကို ကိုင်တွယ်ရင်းအလုပ်ရှုပ်နေခဲ့သည်။


ယဲ့ထျန်း လင်ရှန်းမှအနားယူသွားခဲ့ပြီးနောက် သူကချက်ချင်းပင် မိသားစုစီးပွားရေးလုပ်ငန်းကို လွှဲပြောင်းရယူကာ စစ်ထူမိသားစုကိုလက်တုံ့ပြန်ရန် စတော့ဈေးကွက်တွင်ထောင်ချောက်ဆင်ခဲ့သည်။ စတော့ဈေးကွက်နှင့် ပတ်သက်၍ စုရွေ့အတွေ့အကြုံမရှိပေ။ ကံကောင်းစွာနှင့် သူ့ဘေးတွင် ငွေကြေးဆိုင်ရာဉာဏ်ကြီးရှင် ရှောင်ဝမ်ရှိနေခဲ့သည်။ 


သူတို့နှစ်ယောက်က အင်အားစုစည်းကာ ယဲ့မိသားစုအား ဆိုးဝါးသောအခြေအနေရောက်သည်ထိ ထိုးနှက်ခဲ့ကြသည်။ စုရွေ့က သူ့အသက်အားနှုတ်ယူချင်နေသည့်ရောဂါကိုအခွင့်ကောင်းယူ၍ ယဲ့မိသားစုဒေဝါလီခံရသည်အထိ အရူးလုပ်ခဲ့၏။


ယဲ့မိသားစုဒေဝါလီခံရသွားပြီးနောက် ယဲ့ထျန်းဘက်မှ လှုပ်ရှားမှုတစ်စုံတစ်ရာမရှိတော့သည့်အချိန်တွင် စုဝမ်သည် အတိတ်ကကဲ့သို့ တာဝန်ကျကမ္ဘာမှ ထွက်သွားရန် ချက်ချင်းမတောင်းဆိုခဲ့ပေ။ 


စုဝမ်ထွက်မသွားသောအခါ စုရွေ့က သူမ ထွက်သွားရန် စကားတစ်ခွန်းတစ်လေမှမပြောခဲ့ပေ။


တကယ်တမ်းတွင် စု‌ရွေ့ဤကမ္ဘာအားအလွန်နှစ်သက်သည်။ ထို့အပြင် လင်ရှန်းသည်နောက်နှစ်လအတွင်း နောက်တစ်ဖန် စနစ်အဆင့်မြှင့်တင်လိမ့်မည်ကိုသူသိသည်။ ထိုအချိန်တွင် ဂိမ်းတွင်းအဆင့်များသည် ၁၀၀အထိမြှင့်တင်လိုက်မည်ဖြစ်ပြီး ထိမ်းမြားသည့်စနစ်၊ စျေးဝယ်သည့်စနစ်နှင့် နယ်မြေသိမ်းတိုက်ပွဲစနစ်များအထိ လူဝင်မှုကြီးကြပ်ရေးမှုစနစ်များကိုအနီးကပ်လိုက်နာ၍ အဆင့်မြှင့်တင်လိမ့်မည်ပင်။ ထိုလူဝင်မှုကြီးကြပ်ရေးစနစ်သည် ဂိမ်းကစားနေစဥ်အတွင်း နိုင်ငံသားဖော်ပြချက်ကို ပြောင်းလဲတတ်သော နိုင်ငံသားအချို့အတွက်အထူးပါဝင်လာခြင်းဖြစ်သည်။ သတ်မှတ်ထားသည့် အခကြေးငွေကိုပေးထားခြင်းဖြင့် မိမိ၏မူလဒေသမှ နိုင်ငံ၏လက်ရှိဒေသသို့ပြောင်းလဲနိုင်သည်။


စုရွေ့ကထိုအရာတို့ကိုဂရုမစိုက်ချေ။ သူကထိမ်းမြားလက်ထပ်ကိုစနစ်ပွင့်လာမည့်အချိန်ကိုသာ စောင့်မျှော်နေပြီး စုဝမ်အားလက်ထပ်ခွင့်တောင်းကာ နှစ်ယောက်လက်တွဲ၍ ယခင်ကမ္ဘာကထက်ပိုခမ်းနားသည့်လက်ထပ်ပွဲအား ဂိမ်းထဲတွင် ကျင်းပမည်ဖြစ်သည်။


ကမ္ဘာတိုင်းတွင် လက်ထပ်ချင်သည့်အတွေးက တွေးကြည့်လိုက်သည်နှင့်တင် အလွန်အံ့ဩဖွယ်ကောင်းလေသည်။


စုဝမ်ကစုရွေ့၏အတွေးများကို လုံးဝမသိ‌ပေ။ သူမ မထွက်မသွားသေးသည့်အကြောင်းအရင်းသည် ဤကမ္ဘာ၏နိယာမအရ အမျိုးသမီးဇာတ်လိုက်ဟွေ့မော့ယိရှောင်သည် လွယ်လွယ်နှင့် ကျဆုံးသွားမည့်သူ မဟုတ်သောကြောင့်ပင်။ သူမတွင် တိရှစ်ထျန်းမရှိတော့သည့်အတွက် ဟွေ့မော့ယိရှောင်သည် ဂိမ်းထဲမှစိတ်ပျက်အားလျော့စွာ ထွက်သွားခဲ့၏။


သို့သော် ဟွေ့မော့ယိရှောင်ကမည်သူနည်း။ 


သူမက ငူငူငိုင်ငိုင်နှင့် အပြင်သို့ထွက်လာကာ ကားတိုက်ခံရလျှင်ပင် ကားမောင်းလာသူမှာ အာဏာရှင်CEO ဖြစ်နေမည့်ကံဇာတာဖြစ်သည်။ 


သူမကနို့လက်ဖက်ရည်ဆိုင်တွင် အချိန်ပိုင်းအလုပ်လုပ်နေရလျှင်တောင် မတော်တဆတွေ့ဆုံမည့် ဝယ်သူမှာ နိုင်ငံခြားမှပြန်လာသည့် လက်ရွေးစင်ကစားသမားတစ်‌ယောက်ဖြစ်လိမ့်မည်။ 


သူမသာ.....


ဘာပဲဖြစ်ဖြစ် ငါတို့မိသားစုက ဟွေ့မော့ယိရှောင်လျှောက်သွားတဲ့လမ်းတစ်လျှောက်မှာ ပန်းတွေပွင့်နေလိမ့်မယ်။ 


မှန်သည်။ ၎င်းက အမျိုးသမီးဇာတ်လိုက်ရဲ့နိယာမဖြစ်၏။ 


အမျိုးသမီးဇာတ်လိုက်သည် ဖိနှိပ်ခံရလေ ပိုမိုရဲရင့်လာလေဖြစ်သည်။ အမျိုးသမီးဇာတ်လိုက်က အာဏာရှင်CEOနှင့် မလွဲမသွေတွေ့ဆုံရမည်ပင်။ 


အမျိုးသမီးဇာတ်လိုက် ခက်ခဲသောအခြေအနေတွင်ရှိနေသည့်အခါ အမျိုမျိုးသော CEO များနှင့် ဖြတ်သွားဖြတ်လာဖြင့် တွေ့ဆုံ၍ ချိုမြိန်မှုများဝေဆာသော ဇာတ်လမ်းတစ်ပုဒ်ဖြစ်လာလိမ့်မည်။ 


၎င်းအချက်များသည် စုဝမ်၏ခန့်မှန်းချက်များသာဖြစ်၏။ ဟွေ့မော့ယိရှောင်၏ အမည်ရင်းမှာ ယွီရှောင်းရှောင်းဖြစ်သည်။ သူမနှင့်ယဲ့ထျန်း၏ဆက်ဆံရေးသည် လက်တွေ့ကမ္ဘာတွင်လည်း တိုးတက်လျက်ရှိပြီး ယဲ့မိသားစုဒေဝါလီခံသွားရပြီးနောက်တွင် ယဲ့ထျန်းကပြန်နာလန်ထူရန်မတတ်နိုင်ခဲ့ပေ။ ယွီရှောင်းရှောင်းက အခြေအနေတို့ပြန်လည်ကောင်းမွန်စေရန် ယဲ့ထျန်း၏သူငယ်ချင်းများထံ အကူအညီတောင်းခံခဲ့သည်။ ကံဆိုးစွာနှင့်ယဲ့မိသားစု ပြိုလဲသွားသည့်အပေါ် ကူညီချင်ကြသည့်သူမရှိချေ။ သို့သော်လည်း ယွီရှောင်းရှောင်း၏ ချောမောလှပမှုကို သွားရေကျကာ သူမအားအမဲဖြတ်ချင်လိုသော လူတစ်ယောက်ရှိခဲ့သည်။ ယွီရှောင်းရှောင်းက ဖြူစင်စွာနှင့် ထိုလူအား လူကောင်းတစ်ယောက်ဟုထင်ခဲ့သော်လည်း သူမအရူးလုပ်ခံလိုက်ရမှန်းသိရသည့် အချိန်တွင် ယွီ‌ရှောင်းရှောင်းသည် အဝတ်အစားတို့ ကပိုကရိုနှင့် လျှောက်လမ်းတစ်လျှောက်ပြေးထွက်လာခဲ့၏။ ထို့နောက် သူမသည် ကြောက်လန့်တကြားနှင့် မရင်းနှီးသောလူ၏ကားပေါ်သို့ မသိလိုက်ဘဲတက်သွားမိခဲ့သည်။ တိုက်ဆိုင်စွာနှင့်ပင် ထိုလူက အာဏာရှင်CEOတစ်ယောက်ဖြစ်နေခဲ့သည်။ 


ငှားရမ်းထားသောစုံထောက်က ယွီရှောင်းရှောင်း၏လတ်တလော အခြေအနေများကို စုဝမ်အား အီးမေးလ်မှတစ်ဆင့် သတင်းပို့လာသောအခါ စုဝမ် ငိုရမလိုရယ်ရမလိုဖြစ်သွားသည်။ 


ယွီရှောင်းရှောင်းရဲ့ဘဝကိုအခြေခံပြီး အချစ်ဇာတ်လမ်းဘယ်လောက်များများ ရေးဦးမလို့လဲမသိဘူး။


ကောင်းကင်ဘုံမှ ယွီရှောင်းရှောင်းအား အချစ်နှင့်ထပ်မံတွေ့ရန် အခွင့်အရေးပေးလိုက်သောကြောင့် စုဝမ်သည်လည်း ဤကမ္ဘာတွင် လအနည်းငယ်လောက်ထပ်နေရဦးမည်ဖြစ်ကြောင်းတွေးလိုက်မိသည်။ 


.........


အချိန်ခဏလေးအတွင်းမှာပင် နှစ်လကုန်ဆုံးသွားပြီး‌နောက် ခရစ်စမတ်မတိုင်ခင်တွင် လင်ရှန်းသည် နောက်ဆုံးတွင် အဆင့်မြှင့်တင်ခဲ့ပြီး ထိမ်းမြားလက်ထပ်သည့်စနစ်နှင့် လူဝင်မှုကြီးကြပ်ရေးစနစ်တို့လဲ အချိန်ကိုက်ပွင့်လာခဲ့သည်။


ဂိမ်းထဲသို့ဝင်လိုက်သည်နှင့် မျက်စိတဆုံးမြင်ရမည့်နှင်းဆီအနီရောင်ပန်းများနှင့် ကမ္ဘာ့ချန်နယ်ကြေညာဘုတ်ပေါ်ရှိ ပန်းရောင်စာလုံးကြီးများကိုကြည့်ရင်း ဟွာရှားပြည်နယ်မှ ကစားသူများသည် သည်းခံနိုင်စွမ်းမရှိကြတော့ချေ။ 


ဘာကို စုချန်းဝမ်ယွဲ့ ကိုယ့်နဲ့လက်ထပ်နိုင်မလားလဲ ဘာကို စုချန်းဝမ်ယွဲ့ ကိုယ်မင်းကိုချစ်တယ်လဲ။ 


တော်သင့်ပြီ...။ 


ကြီးမြတ်လှတဲ့နတ်ဘုရားတစ်ယောက်အနေနဲ့ လူသိရှင်ကြားဒီလောက်အထိ သဲသဲကဲကဲလုပ်ပြနေတာ ငါတို့လို စင်ဂယ်တွေရဲ့ခံစားချက်ကို ထည့်တွေးပေးဖူးရဲ့လား...။


ယောက်ျားတစ်ယောက်ရဲ့ သိမ်ငယ်စိတ်ကို နားလည်ရဲ့လားကွ။ 


စင်ဂယ်ကစားသူလူအုပ်ကြီး : ယဲ့ယွီနဲ့စုချန်းဝမ်ယွဲ့ လက်ထပ်ပွဲက ကြီးကြီးသေးသေး ငါသေချာပေါက်....မသွားဘူး။ 


ဘာပြောတယ်...လက်ထပ်ပွဲအပြီးမှာ ရွှေဒင်္ဂါးတွေကြဲမယ်တဲ့လား။ 


ဖီးနစ်အုပ်စုက အလှပဂေးလေးတွေက သတို့သမီးအရံလုပ်ကြမှာတဲ့လား...။ 


အဟမ်း ကောင်းပြီလေ... ဒါဆိုလည်း သွားရတာပေါ့...။ 


ယဲ့ယွီ၏ လက်ထပ်ခွင့်တောင်းသည့်စာသည် သုံးနာရီကြာအောင် ရှိနေလေသည်။ ယခုတွင် စုဝမ်သည် ဂိမ်းထဲရှိ သတ်မှတ်ထားသောခန်းမတွင် စုရွေ့နှင့် လက်မထပ်နိုင်သေးပေ။ 


လွန်ခဲ့သော သုံးနာရီအကြာက....


ဂိမ်းထဲသို့ဝင်လို့ရသည့်အချိန်တွင် သူမလုပ်ဆောင်ရမည့် လျှို့ဝှက်တာဝန်ရှိသေးကြောင်း သတိရသွားသောကြောင့် စုဝမ်ချက်ချင်းလိုင်းတက်လာခဲ့သည်။ မစ်ရှင်စာရင်းကိုဖွင့်လိုက်သောအခါ မျှော်လင့်ထားသလိုပင် တာဝန်တစ်ခုကိုတွေ့လိုက်ရ၏.....။ 


လျှို့ဝှက်တာဝန် : ရေသူမလေး၏ဆန္ဒ (ရှားပါး) 


တာဝန်ပြီးမြောက်မှု 0% 


လုပ်ဆောင်ရမည့်တာဝန် : ထောင်စုနှစ်ပေါင်းများစွာကြာအောင် ပိတ်လှောင်ထားခံရသော ရေသူမလေးသည် သူမ၏မျိုးနွယ်များနှင့် တွေ့ချင်သည်။ ကစားသူသည် ရေသူမနယ်မြေသို့သွား၍ ငါးနတ်ဆိုးကိုရှာဖွေကာ ပယင်းသလင်း‌ကျောက် အခု၁၀၀စုဆောင်းပါ။ 


ယခုတစ်ခေါက်တွင် စနစ်သည် အဆင့်အသစ်နှင့်မြေပုံအသစ်တစ်ခုကို အဆင့်မြှင့်တင်ခဲ့သည်။ ဤရေသူမနယ်မြေသည် အဆင့်၈၅မြေပုံဖြစ်၏။ 


စုဝမ်ကအများကြီးမတွေးလိုက်ဘဲ ရေသူမနယ်မြေကိုကူးပြောင်းသွားခဲ့သည်။ ပယင်းသလင်းကျောက်များသည် ငါးနတ်ဆိုးများကိုသတ်ဖြတ်ပြီး ရရှိလာမည့် ဆုများဖြစ်ပြီး ရရှိနိုင်နှုန်းမမြင့်ပေ။ တိုက်ခိုက်နေရင်းနှင့် စုဝမ်သည် ကမ္ဘာ့ချန်နယ်တွင် စုဝမ်ကသူမအားလက်ထပ်ခွင့်တောင်းနေသည့် အသိပေးချက်တက်လာတာကို သတိထားမိလိုက်သည်။


ထို့နောက် တစ်ဆက်တည်း သီးသန့်စကားပြောခန်းတွင် စုရွေ့၏စာတက်လာသည်။ စုရွေ့က စစ်ထူမိသားစုအရေးကိစ္စများကိုကိုင်တွယ်နေသည့်အတွက် စုဝမ်ထက်နောက်ကျ၍ လိုင်းတက်လာခဲ့သည်။ 


စုရွေ့က လက်ထပ်ခွင့်တောင်းသည့်ကိစ္စကိုမပြောခဲ့ပေ။ သူက စုဝမ်အား သူမ၏တည်နေရာကိုမေးပြီး ချက်ချင်းပင် သူမနေရာသို့ကူးပြောင်းရောက်ရှိလာခဲ့သည်။ 


သူမက စုရွေ့သည်စျေးကြီးသည့် “နှလုံးသားနှစ်ခုသည် သေခြင်းတရားမှခွဲခွာစေသည့်အချိန်အထိ တစ်ခုတည်းအဖြစ်ခုန်လှုပ်နေမည်” ဟူသည့်စိန်လက်စွပ်အားကိုင်ထားသည်ကိုတွေ့သောအခါ စုဝမ်ကသူ့အား ပခုံးတွန့်ပြလိုက်၍ အကူအညီမဲ့နေသည့်အသံဖြင့်ပြောလိုက်သည်။ 


“ကျွန်မအခု မစ်ရှင်လုပ်နေတာ...ကျွန်မကို ခဏလောက်စောင့်နေဦး”



__

🚩

Prev Next