MM Story Teller

Chapter 88 Arc 4 end

Viewers 4k

🚩Chapter -88

Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ် [ 26] END

_____

စုဝမ်သည်အိတ်ထဲမှ Tablet ကိုထုတ်၍ ဗီဒီယိုတစ်ခုအားဖွင့်လိုက်သည်။

“အခု လိုက်ဖ်လွှင့်နေတာလေးကို ကြည့်ရအောင်... မင်းသားရဲ့လက်ထပ်ပွဲက ကြီးကျယ်ခမ်းနားသင့်တယ်မလား။”

ယခုလက်ရှိ Tablet၏ မျက်နှာပြင်တွင် ခမ်းနားသည့်လက်ထပ်ပွဲကြီးအား ပြသနေပြီး သတို့သားသည် ထင်ရှားသည့်ပုံပန်းသဏ္ဌာန်ရှိသည်။ အပြာရောင်မျက်လုံးများ၊နက်မှောင်နေသောဆံနွယ်များနှင့် ထိုသူမှာ ယွီရှောင်းရှောင်း၏လက်ရှိချစ်သူ မင်းသားCharlesပင်ဖြစ်သည်။

“ဘာ...ဒါကဘာလဲ။ စုဝမ် ဒါက နင်ငါ့ကိုလှည့်စားဖို့လုပ်ထားတဲ့ လူတွေမလား။ ဒါတကယ်မဟုတ်ဘူး...အစစ်မဟုတ်ဘူး။”

ယွီရှောင်းရှောင်းက အသည်းအသန်သူမခေါင်းအား ရမ်းခါနေပြီး မျက်လုံးများကလည်းနီရဲနေကာ နှုတ်ခမ်းအား ဖိကိုက်ထားလေသည်။

“စုဝမ် အဆုံးထိဘာလုပ်ဖို့ကြိုးစားနေတာလဲ။ ဘာလို့ငါ့ကိုလွှတ်ပေးမထားနိုင်ရတာလဲ။”

စုဝမ်ခေါင်းခါလိုက်ရင်း “ နင့်ကိုလွှတ်မထားနိုင်တာက နင်ကိုယ်တိုင်ပဲလေ။ ယဲ့ထျန်းနောက်ကို ကောင်းကောင်းမွန်မွန်နဲ့ သစ္စာရှိရှိ လိုက်ခဲ့မယ်ဆိုရင် ဒီနေ့လိုကိစ္စမျိုးတွေအထိရှိလာလိမ့်မယ်လို့ထင်လား။ ယွီရှောင်းရှောင်း... အရာရာတိုင်းကို နင်ပဲလုပ်ခဲ့တာ။ ‘ယဲ့ထျန်းကိုချစ်တာကြောင့်’ ‘ယဲ့ထျန်းအတွက်စတေးခံလိုက်တာ’ တို့ကိုဆင်ခြေအဖြစ်နဲ့သုံးမနေနဲ့။ နင်တကယ် ယဲ့ထျန်းကိုပဲချစ်တယ် Charlesအပေါ်မှာခံစားချက်မရှိဘူးဆိုရင် မင်းသားCharlesလက်ထပ်ပွဲကိုမြင်တဲ့အချိန်မှာ ဘာတွေဒီလောက်တောင်လှုပ်ရှားသွားရတာလဲ။ ဘာတွေမှားယွင်းခံလိုက်ရသလိုခံစားနေရတာလဲ။ နင့်ကိုနင်ဘယ်လိုမြင်လိုက်လဲ...မင်းသားရဲ့အချစ်စစ်လား။ နင် နတ်သမီးပုံပြင်တွေအများကြီးဖတ်ခဲ့တာလား။ နင်က သူ့ရဲ့များပြားလှတဲ့ ဇာတ်လမ်းတွေထဲက တစ်ယောက်ပဲ။ မင်းသားCharlesက နင့်အပေါ်မှာ ခဏတာပဲစိတ်ဝင်စားသွားတာ။ သူ နင့်ကို ကူညီပေးဖို့ကတိပေးခဲ့တဲ့ အဓိကအကြောင်းအရင်းက ယဲ့ထျန်းရဲ့အရည်အချင်းကြောင့်ပဲ။”

စုဝမ်ကပြောပြီးနောက် Tabletအား ယွီရှောင်းရှောင်းထံသို့တိုးပေးလိုက်သည်။

“အုပ်စုထဲမှာ ဘယ်ယောက်ျားကအကောင်းဆုံးလဲဆိုတာ နင့်မျက်လုံးကိုသေချာဖွင့်ပြီးကြည့်။”

အဲ့ဒါက....

ယဲ့ထျန်းပဲ။

လက်ထပ်ပွဲတွင်ရှိနေသော ယဲ့ထျန်းသည် ယဲ့မိသားစုဒေဝါလီခံသွားရပြီးနောက် ဆုံးရှုံးမှုများကြောင့် စိတ်ပျက်အားလျော့မှုများရှိမနေချေ။ သူကအနက်ရောင်အနောက်တိုင်းဝတ်စုံကိုဝတ်ထားကာ တစ်ကိုယ်လုံးသည် ‌ကောင်းမွန်သည့်ခံစားချက်တို့ပြည့်နေသည့်ပုံပေါ်နေ၏။

“မဟုတ်ဘူး...ဒါကအမှန်မဟုတ်ဘူး။ အစစ်မဟုတ်ဘူး”

ယွီရှောင်းရှောင်း၏ ခန္ဓာကိုယ်သည် ယခုတစ်ခေါက်တွင် အားအချို့ရှာဖွေတွေ့သွားသည့်ပုံပင်။ ရုတ်တရက် သူမကရူးနှမ်းသွားသကဲ့သို့ ထိုင်ခုံအား ပစ်လှဲလိုက်ကာ ကော်ဖီဆိုင်ထဲမှ ပြေးထွက်သွားတော့သည်။ စုဝမ်က နှင်းတောထဲမှ ယွီရှောင်းရှောင်း၏ပုံရိပ်အား ကြည့်ရုံကြည့်နေလိုက်သည်။ သူမပြေးထွက်သွားတာကိုတိတ်ဆိတ်စွာကြည့်ရင်း စုဝမ်ကဖုန်းခေါ်လိုက်၏။ သိပ်မကြာခင်ပင် အရှိန်အပြည့်နှင့်မောင်းနှင်လာသောကားတစ်စီးသည် သူမ၏ခန္ဓာကိုယ်အား ဝင်တိုက်သွားတော့သည်။

ကြက်သွေးရောင် သွေးများက ဖြူဖွေးသောနှင်းတို့အား အနီ‌ရောင် ဆိုးခြယ်လိုက်လေသည်။

စုဝမ်ကတည်ငြိမ်စွာ Tabletကိုပိတ်လိုက်၏။ ပြီးနောက် သူမဖုန်းမှအသံမြည်လာသည်။

“အားလုံးရှင်းရှင်းလင်းလင်းပြီးသွားပြီ။”

စုဝမ်ကဖုန်းကိုင်လိုက်ကာ နိုင်ငံခြားအသံဖြင့် အသံနိမ့်နိမ့်ပြောလိုက်သည်။ ဖုန်းတစ်ဖက်မှ အလွန်ကျက်သရေရှိလှသော မိန်းကလေးအသံထွက်ပေါ်လာသည်။

“ဒီလို အနှောင့်အယှက်မျိုးကို တော်ဝင်မိသားစုရဲ့မျက်နှာအရှေ့ကနေ စောစောရှင်းထုတ်လိုက်တာ ကောင်းပါတယ်။ ကျွန်မ ရှင့်ကိုကျေးဇူးတင်ရဦးမှာပဲ။ ငွေကြေးအပြင် သတင်းအချက်အလက်တွေနဲ့ပတ်သက်ပြီး ရှင့်ရဲ့ရက်ရောလှတဲ့အကူအညီတွေအတွက် ကျွန်မစိတ်ရင်းနဲ့ကျေးဇူးတင်မိပါတယ်။ ကျွန်မရဲ့ ဘုရင်က Charlesကိုအနိုင်ယူပြီး ပလ္လင်ပေါ်ကိုအောင်မြင်စွာတက်တဲ့အချိန်ကျရင် ကျွန်မတို့ကတိပေးထားတဲ့အတိုင်း ယဲ့မိသားစုက လူအများရှေ့ကိုပေါ်မလာစေရဘူးလို့အာမခံပါတယ်။”

“ဒါဆိုရင်တော့ စုဝမ် ဘုရင်မကြီးကိုကျေးဇူးတင်ပါတယ်။”

ဖုန်းပြောခြင်းပြီးသွားပြီးနောက် စုဝမ်က ပစ္စည်းများကိုစနစ်တကျပြန်သိမ်းလိုက်ကာ ပိုက်ဆံရှင်း၍ ကော်ဖီဆိုင်ထဲမှ တစ်ယောက်တည်းဖြေးညင်းစွာထွက်လာလိုက်သည်။ သူမဤကမ္ဘာတွင် အကြာကြီးနေခဲ့သည်။ သူမက စတော့ဈေးနှုန်းများ ကောင်းကင်သို့ထိုးတက်မတတ်မြင့်နေချိန်တွင် စတော့အားလုံးအား ပိုက်ဆံများအဖြစ်ပြောင်းလဲကာ ဘုရင်မ Niaအား ထောက်ပံ့ပေးရန်သုံးခဲ့၍ ယနေ့အချိန်ကိုစောင့်နေခဲ့သည်။

ယခုတွင် မတော်တဆမှုဖြစ်ပျက်သွားရာ လမ်းမထက်တွင် လူများစုအုံနေကြပြီး သွေးတို့က နှင်းများကြားပျံ့နှံ့နေဆဲဖြစ်သည်။ စုဝမ်ကလုံးဝလှည့်မကြည့်ချေ။

“သွားတော့မှာလား”

အမျိုးသားအသံနိမ့်နိမ့်က သူမအနောက်မှထွက်ပေါ်လာသည်။

စုဝမ်၏ခြေလှမ်းများလေးလံသွားသော်လည်း သူမ ပြန်မလှည့်လိုက်ပေ။

“ဆောရီး ဒီတစ်ခေါက်တော့ ကျွန်မရှင့်အမှတ်တွေကို ဖြတ်ယူလိုက်ပြီ။ ဒီဘဝမှာကျွန်မအမုန်းဆုံးက ကိုယ်ကျင့်တရားပျက်ပြားနေပြီး အထိမ်းအမှတ်ကျောက်တိုင် အထူခံချင်နေတဲ့လူမျိုးတွေဆိုတာ ရှင်သိသင့်တယ်။”

“အင်း”

သူမအနောက်မှ စုရွေ့က အရှေ့သို့တိုးလာသည်။ စုဝမ်၏ပခုံးအားဖက်ပေးချင်သော်လည်း စုဝမ်က ရုတ်တရက်ခြေလှမ်းကျဲများနှင့် လျှောက်သွားလေသည်။

ဖြူဖွေးလှသောနှင်းတောများကြားတွင် နောက်ဆုံးတစ်ကြိမ်အဖြစ် သူကသူမအနောက်တွင် တစ်လှမ်းချင်း ကျန်ခဲ့လေသည်။

ယခုတစ်ကြိမ်တွင်တော့ သူမက သူ့အားကျောခိုင်းထားကာ အရင်းနှီးဆုံးနှင့် အဝေးဆုံးအကွာအဝေးကို ထိန်းသိမ်းထား၏…..။

“စုရွေ့ နောက်တစ်ခေါက်ဆိုရင်လည်း ကျွန်မဒီလိုဆက်လုပ်နေဦးမှာပဲ။ ဒါကြောင့် ကျွန်မနောက်ကိုလိုက်နေတာ ရပ်သင့်ပြီ”

စုဝမ်၏အသံကလေးနက်နေသော်လည်း ကျဆင်းနေသည့်နှင်းစက်များကြားတွင် သူမသည်အထီးကျန်နေသည့်ပုံ ပေါက်နေ၏။

“ကျွန်မလူဘယ်နှစ်ယောက်ကို ထိခိုက်စေခဲ့လဲမမှတ်မိတော့ဘူး။ ဒါပေမယ့် ဒီလမ်းအတိုင်း ဆက်သွားနေဦးမှာပဲ။”

“အင်း”

စုရွေ့ကသဘောတူကြောင်းအသံပြုလိုက်ပြီး သူ့အသံကမူ တည်ငြိမ်နေသော်လည်း အလွန်လေးနက်နေသည်။

“စုဝမ် ကိုယ်မင်းထက်လူအများကြီးသတ်ခဲ့တယ်။ ကိုယ်က မင်းထက် ပိုအထိန်းအကွပ်မဲ့ပြီး ပိုရက်စက်တယ်။ ပြီးတော့…စုဝမ် မင်းသိလား။ ကိုယ်ပျောက်ဆုံးနေတဲ့အာကာသကိုလာပြီး တာဝန်ထမ်းဆောင်သူဖြစ်လာတာ မင်းကိုရှာချင်လို့ပဲ။ ကိုယ်အမှတ်တစ်မှတ်မှမရလည်း ဂရုမစိုက်ဘူး။ မင်းနဲ့ တစ်ကမ္ဘာတည်းရှိနေနိုင်သရွေ့ ကိုယ်ကျေနပ်တယ်။”

“တကယ်လား”

စုဝမ်ရဲ့အသံက တွန့်ဆုတ်မှုတို့ရောဆွတ်နေ၏။

လက်ရှိတွင် သူမသည် ဌာနချုပ်အားဆက်သွယ်၍ မစ်ရှင်မှထွက်သွားရန်ဆုံးဖြတ်ချက်ချပြီးခဲ့ပြီဖြစ်သည်။

စုရွေ့…..

ကျွန်မယုံချင်တယ်...ဒါပေမယ့် ကျွန်မရှင့်ကိုမယုံရဲဘူး။

ကျွန်မရဲ့ သတ္တိကြောင်တဲ့တစ်ကိုယ်ကောင်းဆန်မှုအတွက် ခွင့်လွှတ်ပေးပါ။

ထူထဲစွာကျဆင်းနေသော နှင်းခဲများသည် စုရွေ့၏အမြင်အား ဖုံးကွယ်သွားသည်။ စုဝမ်သည် ဝေးသထက်ဝေးရာ ထွက်သွားပြီဖြစ်သည်။ ယခုတွင် မစ်ရှင်ကျဆုံးသွားကြောင်းအသိပေးချက်က စုရွေ့ စိတ်ထဲတွင် ပဲ့တင်ထပ်နေ၏။

ယွီရှောင်းရှောင်းသေဆုံးသွားပါပြီ မစ်ရှင်ကျဆုံးပါတယ်။

“မစ်ရှင်ကျဆုံးသွားပြီပဲ”

မည်သည့်နေရာမှထွက်လာမှန်းမသိလိုက်ရသော စုရှောင်စူးသည် အနီရောင်သိုးမွေးအပေါ်ထပ်လေးအား ဝတ်ဆင်ထား၍ အားငယ်စွာပြောလာသည်။ စုရွေ့စကားမပြောလာတာကိုတွေ့လျှင် စုရှောင်စူး၏မျက်လုံးများက လှည့်ကြည့်လာပြီး သူမ၏ကလေးအသံလေးနှင့်ပြောလာသည်။

“မစ်ရှင်ကျဆုံးသွားတဲ့နောက်မှာ သတ်မှတ်ထားတဲ့အချိန်အတွင်း ကမ္ဘာကနေထွက်ဖို့လိုတယ်မလား။ ဖေဖေ သမီးရဲ့ ချပ်စ်ပြားထဲက အချက်အလက်တွေကိုမြန်မြန်ကူးယူထားသင့်တယ်။ သမီးလင်ရှန်းရဲ့စနစ်တစ်ခုလုံးကို ကူးယူထားပြီးပြီ။ နောက်ပိုင်းမှာ ဒီအချက်အလက်တွေကို အသုံးချနိုင်တယ်။”

စုရှောင်စူး၏စကားများက စုရွေ့အား သတိပြန်ကပ်သွားစေသည်။

အမှန်တကယ်တွင် စုရှောင်စူးအား ဂိမ်းထဲတွင်တွေ့လိုက်ချိန်၌ စုရွေ့မှာ ထူးဆန်းသည့်ခံစားချက်ရခဲ့သည်။ ထိုနေ့လိုင်းဆင်းခဲ့ပြီးနောက် စုရှောင်စူးကရုတ်တရက် စုရွေ့၏အိပ်ခန်းထဲတွင်ပေါ်လာခဲ့၏။ ၎င်းက သူနှင့် စုရှောင်စူးကြားတွင် ရင်းနှီးသည့်ဆက်သွယ်မှု တစ်စုံတစ်ရာရှိကြောင်း စုရွေ့အားသေချာသွားစေခဲ့သည်။

ထို့နောက် စုရှောင်စူး၏ဇာတ်ကြောင်းတွင် အရွယ်ရောက်ပြီးသူတစ်ယောက်အဖြစ်ပြောင်းလဲနိုင်သော အဆင့်မြင့်လူလုပ်အသိဉာဏ်တစ်ခုအနေနှင့် စုရှောင်စူးသည် နည်းပညာတိုးတက်ထွန်းကားနေသည့် အနာဂတ်ကမ္ဘာမှ သူတီထွင်ဖန်တီးထားသော စမ်းသပ်မှုရလဒ်ဖြစ်ကြောင်း စုရွေ့သိလိုက်ရသည်။

“ဖေဖေ... သမီးကတကယ်တော့ မူရင်းကိုယ်ရဲ့ပုံတူတစ်ခုပဲ။ အခု သမီးကလင်ရှန်းကမ္ဘာနဲ့ ခွဲလို့မရဘူးဖြစ်သွားပြီ။ ဒါပေမယ့်လည်း အနာဂတ်တာဝန်ကျကမ္ဘာတစ်ခုကိုရောက်သွားရင် သမီးရဲ့မူရင်းကိုယ်ကိုသုံးပြီး သုတေသနဆက်လုပ်ပါ။ အဲ့ဒါဆိုရင် သမီးတို့မိသားစုသုံးယောက်ပြန်ဆုံနိုင်လိမ့်မယ်။”

ထိုစကားများသည် ထိုအချိန်က စုရှောင်စူး စုရွေ့ကိုပြောခဲ့သောစကားများဖြစ်သည်။ စုရှောင်စူး၏ ဇာတ်ကြောင်း၌ စုဝမ်အပါအဝင်သူတို့သုံးယောက်သည် အလွန်ပျော်ရွှင်ကြည်နူးဖွယ်ကောင်းသော မိသားစုလေးဖြစ်သည်ဟူ၍ပင်။ စုရှောင်စူးပြောခဲ့သောအနာဂတ်သည် သူလိုချင်တောင့်တနေသောအရာ ဖြစ်၍သော်လည်းကောင်း၊ သူနှင့်သူမကြားရှိ ဆက်သွယ်မှုက အလွန်ရင်းနှီးနေကြောင်း ခံစားရ၍သော်လည်းကောင်း စုရွေ့က စုရှောင်စူး၏စကားများကိုယုံလိုက်သည်.....။

အနာဂတ်မှ ဤကမ္ဘာသို့ပစ်လွှတ်ခံလိုက်ရသော စုရှောင်စူး၏ပုံတူမှာ ချစ်စဖွယ်သရုပ်ဆောင်ပြရန်နှင့် သူမ၏တည်ရှိမှုအားပြသရန်‌ ရောက်လာခဲ့ခြင်းမဟုတ်ပေ။

အမှန်တကယ်တွင် သူမသည် လင်ရှန်း၏စနစ်အချက်အလက်များအား ကူးယူရမည့် မစ်ရှင်အား လာရောက်ထမ်း‌ဆောင်ခြင်းဖြစ်သည်။

စုရှောင်စူးက လင်ရှန်း၏အချက်အလက်အားလုံးအား စုရွေ့၏စိတ်ထဲသို့ ကူးပြောင်းပေးပြီးသည့်နောက် သူမက အချက်အလက်လေးတစ်ခုအဖြစ်ပြောင်းလဲသွားကာ လင်ရှန်းဂိမ်းကမ္ဘာထဲသို့ ပြန်လည်ရောက်ရှိသွားတော့သည်။ အနာဂတ်တွင် သူမက ထိုကမ္ဘာထဲတွင်သာနေနိုင်လိမ့်မည်........။

“စုရှောင်စူး ဖေဖေတို့ပြန်တွေ့ကြမယ်”

ထိုစကားအားတိတ်တဆိတ်ပြောလိုက်ရင်း စုရွေ့သည် ဤတာဝန်ကျကမ္ဘာမှထွက်ခွာရန် လုပ်ငန်းစဥ်များကို စတင်လိုက်လေသည်။

လင်ရှန်းတွင် ခရစ်စမတ်ကျင်းပရန်အတွက် တစ်ကမ္ဘာလုံးဖြူဖွေးနေကာ နှင်းများကထူထဲစွာကျနေသည်။

စုရှောင်စူးကတိတ်ဆိတ်စွာ လူသိပ်မရှိသောမြေပုံတွင်တစ်‌ယောက်တည်းလျှောက်နေသည်။ ဖြူဖွေးနေသော နှင်းများက သူမ၏သေးငယ်သော ပခုံးလေးအားဖုံးလွှမ်းလျက်ရှိ၏။

“ဖေဖေ...မေမေ”

ရုတ်တရက် စုရှောင်စူးငိုချင်လာသော်လည်း ဖေဖေက သူမအား မျက်ရည်ဂလင်းတို့ထည့်ပေးရန် မေ့သွားခဲ့သည့်ပုံပင်။

သူမအား လူသားတို့ခံစားချက်အားလုံးဖြင့်ဖန်တီးခဲ့သော်လည်း ငိုသည့်အချက်အလက်တော့ပါမလာခဲ့ပေ။ ရုတ်တရက် စုရှောင်စူးသည် ကမ္ဘာတစ်ခုမှစုရွေ့၏ခပ်နိမ့်နိမ့်အသံအား သူမနားထဲတွင် ကြားလိုက်ရ၏။

ဒီနေ့ကစပြီး မင်းကို စုရှောင်စူးလို့ခေါ်မယ်...မင်းက ဖေဖေနဲ့စုဝမ်ရဲ့သမီးပဲ။

မင်းရဲ့ကမ္ဘာမှာ မျက်ရည်တွေမလိုဘူး...ဘာလို့လဲဆိုတော့ ဖေဖေနဲ့မေမေက ဘယ်တော့မှငိုအောင်လုပ်မှာ မဟုတ်လို့ဘဲ...

အဲ့ဒီ့ကမ္ဘာမှာ သူမတကယ်ပဲ အမြဲပျော်ရွှင်နေရလား။

စုရှောင်စူးသည် ရုတ်တရက် သူမ၏မူရင်းကိုယ်အား အနည်းငယ်မနာလိုဖြစ်မိသွားသည်။

ယခုစုရှောင်စူးသည် သူမကဤလင်ရှန်းကမ္ဘာ၌သာ ထာဝရတည်ရှိနေလိမ့်မည်ဟုယုံကြည်နေသည်။ အနာဂတ် တစ်နေ့နေ့တွင် သူမသည် စုရွေ့၊စုဝမ်တို့နှင့် ပြန်ဆုံစည်းလိမ့်မည်ကို သူမ မသိခဲ့ချေ.......။

---------

🚩Arc_4 . အွန်လိုင်းဂိမ်းနတ်ဘုရားက ငါ့ကိုအလိုလိုက်နေတယ်

END

[မူရင်းဇာတ်ကြောင်းက စိတ်ဝင်စားစရာပဲ]

Prev Next