MM Story Teller

Chapter 204

Viewers 32k

🌍Chapter 204

ထန်မော့၏လက်ချောင်းများမှာ ဖောက်ထွင်းမြင်ရသော နာရီ၏ မျက်နှာပြင်ကို ပွတ်သပ်သွားခဲ့သည်။ သူ၏အမူအရာက ရှုပ်ထွေးလျက် တစ်စုံတစ်ခုကိုစဥ်းစားနေသည့်အလား။ ထို့နောက် သက်ပြင်းကိုအသာချလျက် အိတ်ကပ်ထဲသို့ နာရီကိုပြန်ထည့်လိုက်တော့သည်။

အနက်ရောင်မျှော်စင်၏ အဆုံးမဲ့ မဖြစ်နိုင်ချေနာရီမှာ အမည်ကို ကြားရုံမျှဖြင့်ပင် အဖိုးတန်လှကြောင်း သိသာလှသည်။ ကမ္ဘာကြီးအွန်လိုင်းပေါ်တက်လာစဥ်ကတည်းက ထန်မော့ အကူပစ္စည်းများစွာကို ရရှိခဲ့သည်။ ဘွားဘွား၀ံပုလွေကြီး၏ ထီးကလေး၊ ဦးဦးမာရီယို၏ ဦးထုပ်နှင့် မျက်နှာပြောင်လေး၏ မီးခြစ်ဆံတို့ အပါအ၀င်ပင်။ ဤအိတ်ဆောင်နာရီတစ်ခုကသာ အနက်ရောင်မျှော်စင်၏ အမည်ပါရှိခြင်းဖြစ်သည်။

သို့သော် ဤနာရီ၏ မကောင်းသောအချက်မှာလည်း အလွန်သိသာလွန်းလှသည်။

ဤသည်မှာ ဖြစ်နိုင်ချေများကိုရှာဖွေနိုင်သော အိတ်ဆောင်နာရီတစ်လုံးဖြစ်သည်။ ဥပမာ ထန်မော့မှ ဘွားဘွား၀ံပုလွေကြီးကို သတ်နိုင်ချေမှာ ၁၄၂၁၃၄၁ ပုံတွင် ၁ပုံသာ ရှိနေပြီး ဘွားဘွား၀ံပုလွေကြီးမှ ထန်မော့ကို စားနိုင်ချေမှာ ၁၄၂၁၃၄၁ပုံတွင် ၄၂၁၃၄၀ပုံ ရှိလေသည်။ မည်သည့်ရှုထောင့်ကပင် ကြည့်ပါစေ ထန်မော့မှာ သေရမည်ဖြစ်သည်။ ထန်မော့အနိုင်ယူနိုင်သော ဖြစ်နိုင်ချေမှာ သုညသာရှိပြီး ဘွားဘွား၀ံပုလွေကြီးထံ အစားခံရကာ သေဆုံးမည်သာဖြစ်သည်။သို့သော် ထိုအချိန်တွင် ဤ အဆုံးမဲ့မဖြစ်နိုင်ချေ နာရီကိုဖွင့်လိုက်ပါက ဖြစ်နိုင်ချေများကို တိုက်ရိုက်ဖျက်ဆီးလိုက်ပြီး ဖြစ်ရပ်ကိုသာ စဥ်းစားရတော့မည်ဖြစ်သည်။

ထန်မော့တွင် ဘွားဘွား၀ံပုလွေကြီးကို သတ်နိုင်ရန် အခွင့်အရေးရှိသည်လား...

မှန်၏။ ရှိနေသ၍ ထန်မော့သေနိုင်သောဖြစ်နိုင်ချေမှာ ဖျက်ဆီးခံရမည်ဖြစ်သည်။

ထန်မော့မှ ဘွားဘွား၀ံပုလွေကြီးကို သတ်နိုင်သော ဖြစ်နိုင်ချေမှာ ၁၄၂၁၁၃၄၁ပုံ ၁ပုံဖြစ်သည်။ အဆုံးမဲ့ မဖြစ်နိုင်ချေ အိတ်ဆောင်နာရီကို ဖွင့်လိုက်ပါက ဤဖြစ်ရပ်မှာ...

ထန်မော့သည် ဘွားဘွား၀ံပုလွေကြီးကို သတ်နိုင်သွားလိမ့်မည်။

ထိုနေရာတွင် ဖြစ်နိုင်ချေဟူ၍မရှိတော့ပဲ ဖြစ်ရပ်သာလျှင်ရှိတော့မည်ဖြစ်သည်။ သီအိုရီအရ ဤပစ္စည်းမှာ ကြက်ဆင်ဥထက်ပင်ပိုရှားပါးလှသည်။ ဤနာရီဖြင့် ကျိုးကြောင်းပြနိယာမထဲမှ ဖြစ်ရပ်ကို တိုက်ရိုက်ချိုးဖောက်နိုင်သည်။ သို့သော် သူ၏ဆိုးကွက်များမှာလည်း ကောင်းကွက်များထပ်တူ သိသာလှသည်။

ဤဖြစ်နိုင်ချေကိုရှာဖွေသော နာရီအား အသက်သွင်းနိုင်ချေမှာ ၅၀ရာခိုင်နှုန်းသာရှိသည်။ အကယ်၍ သူသည် ဘွားဘွား၀ံပုလွေကြီးထံတွင် အသတ်ခံရမည့်ဖြစ်နိုင်ချေအား ဤနာရီက ခြေရာမခံမိပါက သူ့အနေနှင့် ဤနာရီကို အသက်မသွင်းနိုင်ဟု ဆိုလိုခြင်းပင်။ ခြေရာခံမိလျှင်တောင် အောင်မြင်စွာအသက်သွင်းနိုင်ချေမှာ ၅၀ရာခိုင်နှုန်းမျှသာရှိသည်။

ထန်မော့သူ့မျက်နှာကို ပွတ်သပ်လိုက်မိသည်။ သူသည် ဖြူချောလေးဟု ခဏခဏအခေါ်ခံရသော်လည်း သူ၏ကံကားအလွန်သာမာန်မျှသာ။ မာရီယို၏ ဦးထုပ်ကို ရရှိပြီးကတည်းက ၅လလုံးလုံး နံရံများကို ၀င်တိုက်ခဲ့သော်လည်း ယခုထိတိုင် အသုံး၀င်သော ပစ္စည်းများမရရှိဖူးခဲ့ချေ၊ ထန်မော့တွေးနေသည်မှာ သူသာဤနာရီကို သုံးပါက တလွဲဖြစ်ကာ နာရီ၏ ပြန်သတ်ခြင်းကို ခံရမည်လားဟုပင်။

ထန်မော့ နောက်ဆုံးအခြေအနေမရောက်သ၍ ဤနာရီကို လုံး၀ထုတ်မသုံးရန်တေးထားလိုက်လေသည်။ သူသည် နာရီကိုအသုံးပြုရန်နည်းလမ်းကို တဖြည်းဖြည်း ရင်းနှီးလာလိမ့်မည်။ ပိုကောင်းသော နည်းကိုတောင် ရှာကောင်းရှာတွေ့နိုင်လာလိမ့်မည်။

အကူပစ္စည်းတစ်ခုမှာ ကောင်းကင်ကို ဆန်တက်နေလေလေ ကန့်သတ်ချက်မှာ ကြီးမားလေလေဖြစ်သည်။ သို့မဟုတ်ပါက ဂိမ်း၏ မျှချေပျက်ဆီးသွားမည်ဖြစ်သည်။ ဤအဆုံးမဲ့ မဖြစ်နိုင်ချေနာရီ၏ ကန့်သတ်ချက်ကို ကြည့်ခြင်းဖြင့်ပင် ၄င်းမှာ မည်မျှ ကြောက်မက်ဖွယ်ကောင်းကြောင်းခန့်မှန်းနိုင်လေသည်။

ထန်မော့ သူရရှိခဲ့သော ပစ္စည်း၂မျိုးကို စစ်ကြည့်ပြီးသည်နှင့် စွမ်းရည်စာအုပ်ကို ထုတ်ယူကြည့်လိုက်သည်။ သူသည်စာအုပ်ကိုဖွင့်လျက် နောက်ဆုံးစာမျက်နှာကို လှန်ကြည့်လိုက်သည်။ ၄င်းတွင်ပေါ်လာသော စာကြောင်းများကို ဖတ်ကြည့်ပြီးနောက် သူ၏အမူအရာမှာ ထူးဆန်းလာခဲ့လေသည်။

သူမည်သို့ခံစားနေရာမှန်း ပြောမပြတတ်ချေ။

[စွမ်းရည်: လှမျက်၀န်းများ ရှူသူမြင်စေ]

[ပိုင်ရှင်: လီစစ်ရွှီ]

[အမျိုးအစား: အထူးအမျိုးအစား]

[အသုံးပြုပုံ: ဤစွမ်းရည်ကို ပစ်မှတ်ပေါ်အသုံးပြု၍ တဖက်လူ၏မျက်လုံးထဲတွင် မိမိ၏ အလှတရားကို ပွင့်လန်းစေပါ။ မိမိ၏အလှတရားမှာ ကြည့်ရှုသူ ပစ်မှတ်၏ ရင်ထဲမှ အနှစ်သက်ဆုံး အသွင်အဖြစ်ပြောင်းလဲသွားလိမ့်မည်]

[အဆင့်:၂]

[ကန့်သတ်ချက်: ၁ရက်တွင် ၃ကြိမ်အသုံးပြုနိုင်။ အလွန်ဆုံးအသုံးပြုနိုင်ချေ ၁၀စက္ကန့်။ (အသုံးပြုသူ၏ ကြံ့ခိုင်မှုအပေါ်မူတည်သည်။)အတိုဆုံးအချိန်မှာ ၁စက္ကန့်ဖြစ်သည်]

[မှတ်ချက်: ထတော့...ပစ်မှတ်လေးဘာလေးမရှိဘူးလား]

[ထန်မော့ဗားရှင်းအသုံးပြုရန်အညွှန်: မည့်သည့် ထပ်တိုးကန့်သတ်ချက်မှမရှိပါ။ ဒီအမှိုက်လို စွမ်းရည်ကို ကန့်သတ်စရာလိုမနေဘူး ငါ့နှယ်...]

ဤသည်မှာ ထန်မော့ရရှိဖူးသမျှထဲ ထပ်တိုးကန့်သတ်ချက်မရှိသော စွမ်းရည်တစ်ခုဖြစ်လေသည်။

ထန်မော့ ဤစွမ်းရည်ကို ခန့်မှန်းမိပြီးဖြစ်သော်လည်း အမှန်တကယ်ရရှိလိမ့်မည်ဟု ထင်မထားခဲ့ချေ။ အမှန်တရားနာရီဂိမ်းထဲမှ ယုန်နက်၏ အမည်အစစ်မှာ လီစစ်ရွှီဖြစ်ပြီး ခိုး၀င်သူလည်းဖြစ်သည်။ ထန်မော့အမှန်တရားနာရီဂိမ်းကို ရှင်းပြီးစဥ်က လီစစ်ရွှီမှာ အနိုင်ရရှိရန် အခွင့်အရေးရှိနေဆဲပင်။ သူက ထန်မော့ကို သတ်ကာ နာရီပေါ်နောက်ဆုံးရပ်နေသူတစ်ဦးဖြစ်လာသ၍ သူအနိုင်ရရှိမည်ဖြစ်သည်။ ကံဆိုးသည်မှာ သူ၏တိုက်ရည်ခိုက်ရည်မှာ အလွန်ဆိုးရွားကာ ဖူ၀မ်ရှန်း အဆင့်သာရှိလေသည်။ သို့သော် သူ၏စွမ်းရည်မူ အတော်လေး ထူးခြားလေသည်။ ထန်ံမာ့မှာ သူ့အား ၂ကြိမ်၃ကြိမ်ခန့်ဖမ်းမိခဲ့သည့်တိုင် ထိုစွမ်းရည်ကြောင့် ခဏခဏပြန်လွတ်သွားတတ်သည်။

အဘယ်ကြောင့်မူ ထန်မော့ လီစစ်ရွှီိကို ဖမ်းမိလိုက်တိုင်း အလွန်ချောမောသော မျက်နှာတစ်ခုရုတ်ချည်းပေါ်လာတတ်၍ပင်။

ထိုမျက်နှာမှာ လီစစ်ရွှီနှင့် ၃၀ရာခိုင်နှုန်းခန့်တူညီနေသေးသော်လည်း ၇၀ရာခိုင်နှုန်းမှာ အပိုမှတ်များ ပေါင်းထည့်သွားခဲ့ခြင်းဖြစ်သည်။ ထိုမျက်နှာမှာ အင်တာတိန်းမန့်လောကတွင် စူပါစတားတစ်ယောက်ဖြစ်လာမည့် မျက်နှာမျိုးပင်။ လီစစ်ရွှီမှာ အလွန့်အလွန်သာမာန်ဆန်လှသော ရုပ်ရည်နှင့် လူမျိုးဖြစ်သည်။ သူကရုပ်မဆိုးသော်လည်း လုံး၀မချောချေ။ ထို သူ့အကြိုက်နှင့် ကိုက်ညီသော မျက်နှာချောချောကြီးပေါ်လာတိုင်းထန်မော့မှာ နှလုံးတစ်ချက်ခုန်လျက် တန့်တန့်သွားရသည်။ သူကအလန့်တကြားနှင့် လီစစ်ရွှီကို ၂ခါ၃ခါလွှတ်ပးခဲ့ရသည်။

ဤစွမ်းရည်မှာ အမှန်တကယ်ကို အနည်းငယ် ရှက်ဖွယ်ကောင်းလှသည်။ ၄င်းမှာ ပစ္စည်း အသုံးပြုရန်ရေရွတ်ရသော စကားစုများကြောင့်လည်းမဟုတ်ချေ။ သို့သော် တစ်ယောက်နှင့် တိုက်ခိုက်ကြရာတွင် အလုပ်ဖြစ်နိုင်သည်။ ရန်သူကမသေလျှင် နောက်တစ်ကြိမ်မျက်နှာချင်းဆိုင်းရပါက အနည်းငယ် မျက်နှာ ပူစရာဖြစ်နိုင်ခြင်းပင်။

သူ လီစစ်ရွှီကို တိုက်ရိုက်သတ်ခဲ့ခြင်းမဟုတ်၍ ဤစွမ်းရည်ကို မရလောက်ဟု ထင်ခဲ့သည်။ ယခုရရှိခဲ့ပြီဖြစ်၍ သူအကျိုးရှိရှိ အသုံးချရုံအပြင်မရှိတော့။

သူသည် စွမ်းရည်စာအုပ်နှင့် အကူပစ္စည်းများကိုပြန်သိမ်းလိုက်သည်။ ထန်မော့သည် ဆိုင်ထဲမှ ကုတင်တစ်ခုတွင် လဲလျောင်းလျက် မျက်လုံးများကို မှိတ်လိုက်တော့သည်။

၅နာရီကြာပြီးနောက် ကောင်းကင်မှာ တဖြည်းဖြည်း ရောင်ခြည်သန်းလာခဲ့သည်။ ရွှေရောင်နေရောင်ခြည်က လမ်းတစ်လျှောက်ကို အလင်းနေခဲ့သည်။ အိမ်ဆောက်ပစ္စည်းဆိုင် နောက်တံခါးမှ အနက်ရောင်အရိပ်တစ်ခု ၀ှစ်ခနဲ ထွက်လာခဲ့လေသည်။ ထန်မော့လွယ်အိတ်ကို သယ်လျက် လျင်မြန်စွာပြေးနေခဲ့သည်။

မျှော်စင်တိုက်ခိုက်ခြင်းဂိမ်းထဲသို့ မ၀င်စဥ်ကပင် ဖူ၀မ်သော်က ပေကျင်းမြေပုံပေါ်တွင် သူ့အိမ်လိပ်စာကို မှတ်ထားပေးခဲ့သည်။ ထန်မော့ လမ်းတစ်လျှောက် သတိအပြည့်နှင့် ပြေးလွှားနေရင်း ၄င်းကို ထုတ်ကြည့်ရန်လည်း မမေ့ခဲ့ချေ။ မနက်ခင်းရောက်သည်နှင့် အစားအစာနှင့် ရေများထွက်ရှာသော ကစားသမားများရှိလာခဲ့သည်။ ထန်မော့နှင့် လူလတ်ပိုင်း မိန်းမကြီးတစ်ဦးမှာ လမ်းပေါ်တွင်ဆုံလျက် တစ်ဦးကိုတစ်ဦး သတိဖြင့်ကြည့်လိုက်မိကြသည်။

ထန်မော့ ထိုအမျိုးသမီးကြီး၏ လက်ထဲမှ အမဲသားစည်သွပ်ဘူးနှင့် ဓါတ်ဆားရည်ပုလင်းကိုကြည့်လိုက်သည်။ သူမျက်ခုံးကိုပင့်လျက် အသားမစားရသည်မှာ အတော်ကြာပြီဖြစ်ကြောင်း သတိရသွားမိလေသည်။ အမျိုးသမီးမှာ ထန်မော့ သူမ၏ စည်သွပ်ဘူးများကို ကြည့်နေသည်အားမြင်လျှင် ရန်လိုစွာပြန်လည်စိုက်ကြည့်လာခဲ့သည်။ ထန်မော့ သူမအား တစ်ချက်မျှသာကြည့်လျက် လှည့်ထွက်သွားခဲ့လေသည်။

ပေကျင်းတွင် ရှင်ကျန်ရစ်သော ကစားသမားများမှာ နန်ကျင်းထက်ပိုများကာ ဟန်ဒန်၏ အစွန်အဖျားများထက်လည်း ပိုသာလေသည်။

ထန်မော့လမ်းတစ်လျှောက်တွင် လူများနှင့် ပိုတွေ့ခဲ့ရသည်။ သူသည် ဤမရင်းနှီးသော မြို့စိမ်းတွင် မည်သည့်ကစားသမားများနှင့်မှာ ထိပ်တိုက်မတွေ့လိုသဖြင့် တတ်နိုင်သမျှရှောင်ရှားခဲ့လေသည်။ သူ ဖူ၀မ်သော်၏ အိမ်ကိုရှာတွေ့ချိန်တွင် ၂နာရီခန့်ရှိနေခဲ့ပြီဖြစ်သည်။ ၄င်းမှာ လုံခြုံရေးမြင့်မားသော တရုတ်စတိုင်အဆောက်အဦးတစ်ခုပင်။ ပတ်၀န်းကျင်မှာတိတ်ဆိတ်နေပြီး အိမ်တွင်းဥယျာဥ်လေးလည်းရှိကာ အသီးအရွက်တချို့ကိုလည်း စိုက်ပျိုးထားလေသည်။ ထန်မော့တံခါးကို တွန်းဖွင့်လိုက်သည်။ အသံဟူ၍ မရှိ လူသူကင်းမဲ့သည့်နှယ် တိတ်ဆိတ်နေခဲ့သည်။

ထန်မော့ သူအိမ်မှားလာခြင်းမဟုတ်ကြောင်းအတည်ပြုရန် မြေပုံကို ၂ခါပြန်စစ်ဆေးလိုက်သည်။ သူ အိတ်ထဲမှ ကြက်ဆင်ဥကို ခေါက်ရန်ပြင်လိုက်စဥ်မှာပင် သူ၏နောက်မှ အမျိုးသားတစ်ဦး၏ အသံကို ကြားလိုက်ရလေသည်။

"မင်းအကြာကြီးရှာလိုက်ရတာလား"

ထန်မော့တောင့်တင်းသွားလျက် အနောက်ကို ချက်ချင်းလှည့်ကြည့်လိုက်မိသည်။ တဖက်လူမှာ ဖူ၀မ်သော်ဖြစ်မှန်းအတည်ပြုပြီးသော် သူစိတ်အေးသွားခဲ့တော့သည်။ သူက ဖူ၀မ်သော်လက်ထဲတွင် တစ်ခုခုကိုင်ထားသည်ကို တွေ့လိုက်ရလေသည်။

"အဲဒါက ဘာလဲ"

အတော်ကြာပြီးနောက် ရှောင်ဖူသည်လည်း အိတ်တစ်လုံးနှင့်အတူ နောက်မှရောက်လာခဲ့လေသည်။ သူကထန်မော့ကိုမြင်သော် အံ့အားသင့်သွားခဲ့သည်။

"အကိုထန် ပြန်ရောက်နေပြီပေါ့"

ဖူ၀မ်သော်ကဆိုလိုက်သည်။

"အိမ်ထဲအရင်၀င်ဦး"

အိမ်ထဲသို့၀င်လာပြီးနောက် ဖူ၀မ်သော်က ဂိုထောင်ထဲမှ အသားကင်သည့်စင်ကို ထုတ်ယူလာခဲ့သည်။ သူ ထင်းတချို့ဖြင့် မီးမွှေးနေစဥ် ရှောင်ဖူက အိတ်ထဲမှ အေးခဲထားသောအသားများနှင့် အသီးအရွက်အချို့ကို ထုတ်ယူလာခဲ့လေသည်။ ထန်မော့မှာ ထိုညီအစ်ကို၂ဦး၏ လှုပ်ရှားမှုကိုတွေ့လျှင် အနည်းငယ် အံ့အားသင့်သွားခဲ့လေသည်။ဖူ၀မ်သော် သူ့ကိုကြည့်လျက်ဆိုလိုက်သည်။

"ရှောင်ရှန်းကို ပြင်ဆင်ဖို့နည်းနည်းကူပေးလိုက်လေ"

ထန်မော့ခေါင်းညိတ်လိုက်ကာ ဖူ၀မ်ရှန်းနှင့်အတူ အသားနှင့် အသီးအရွက်များကိုလှီးလိုက်သည်။

ဤမြင်ကွင်းက အလွန်မှော်ဆန်လွန်းနေသည်။

ထန်မော့သည် ကမ္ဘာကြီးအွန်လိုင်းပေါ်တက်လာပြီးနောက် ဘာဘီကျူးကို အရသာခံစားရရန် အခွင့်အရေးရလာဦးမည်ဟု မထင်ထားမိချေ။

"ဒီဟာက မြေအောက်ခန်းမှာအေးခဲထားတဲ့ အသားတွေလေ...ပေကျင်းမှာ အပူချိန်အရမ်းနည်းတော့ ခဲထားတဲ့ အသားတွေက မဆိုးသေးဘူး..နွေရောက်လာရင်တော့ ကမ္ဘာပေါ်မှာ ဘာအသားမှ ရှိတော့မှာ မဟုတ်ဘူး"

ဖူ၀မ်သော်က ဘာဘီကျူးစင်ကိုပြင်ဆင်ရင်း ရှင်းပြလိုက်သည်။

"အနာဂါတ်မှာ ကိုယ်တို့ အသားစားရတော့မှာမဟုတ်ဘူး...အခုများများစားထားရမယ်"

ဖူ၀မ်ရှန်းကမေးလိုက်သည်။

"လူသားရောပါလား"

ဖူ၀မ်သော် သူ၏ညီဖြစ်သူကို အေးစက်စွာကြည့်လိုက်သည်။

"မင်းအသားလား"

ရှောင်ဖူ၏ လည်တိုင်မှာပု၀င်သွားလျက် ဘာမှမဆိုရဲတော့ချေ။

ထန်မော့မေးလိုက်သည်။

"ခင်များအရင်ကအသားကင်ဖူးတာလား"

ဖူ၀မ်သော် ဘာဘီကျုးပြင်နေသည့်ပုံမှာ အလွန်ကျွမ်းကျင်ပုံပင်။

ဖူ၀မ်သော်ကပြန်ဖြေလာခဲ့သည်။

"တပ်ထဲမှာ ကိုယ်လုပ်ဖူးလို့ပါ... တတိယထပ်က ဘယ်လိုလဲ"

ထန်မော့လည်း မှော်၀င်မြက်ခင်းပြင်တွင် သူကြုံတွေ့ခဲ့ရသော မီးနှင့် မွန်းစတားများအပြင် အမှန်တရားနာရီဂိမ်းအကြောင်းကိုပါ အသေးစိတ်ရှင်းပြလိုက်သည်။ အသင်းဖော်များဖြစ်၍ ထန်မော့မှာ သူရရှိခဲ့သော အကူပစ္စည်းများကိုလည်း ဖုံးကွယ်မထားခဲ့ချေ။ အဆုံးမဲ့ မဖြစ်နိုင်ချေ နာရီက ဖူ၀မ်သော်အား မျက်မှောင်ကျုံ့သွားစေသည်။ ရှောင်ဖူမှာ ရှုပ်ထွေးနေသော်လည်း ထုတ်တော့မမေးခဲ့ချေ။ ထို့နောက် ထန်မော့ ရွှေရောင်သကြားလုံးကို ထုတ်ပေးလိုက်လျှင် ဖူ၀မ်သော်နှင့် ရှောင်ဖူတို့ ၄င်းကို စူးစမ်းလိုက်ကြသည်။ ထို့နောက် ညီအစ်ကို၂ဦးစလုံးမှာ ဤသကြားလုံးကို တခါမျှမမြင်ဖူးကြောင်းအတည်ပြုလျက် ထိုသကြားလုံးကို ကြိုက်သော အနက်ရောင်မျှော်စင်မွန်းစတား ရှိကောင်းရှိလိမ့်မည်ဟုတွေးလိုက်ကြလေသည်။

ပထမအချီအသားများ ကောင်းစွာကင်ပြီးစွားပြီးနောက် ဖူ၀မ်သော်က ထိုအသားများကို ထန်မော့အား တိုက်ရိုက် ထည့်ပေးလိုက်သည်။ ထန်မော့လည်း အသားကင်တန်စို့ကိုယူလျက် ဖူ၀မ်ရှန်းကို ကမ်းပေးလိုက်သည်။

ဖူ၀မ်သော်မျက်ခုံးအသာပင့်လိုက်ပြီး ဖူ၀မ်ရှန်းမှာမူ တံတွေးကို အသာမြိုချလျက် အသားကို တစ်ကိုက်ကိုက်လိုက်လေသည်။

"ကျေးဇူး အစ်ကိုထန်"

ထန်မော့က ရယ်လိုက်သည်။

"မင်းအစ်ကိုကိုပဲ ကျေးဇူးတင်ရမှာ"

ရှောင်ဖူကသွက်သွက်ဆိုလိုက်သည်။

"ကျေးဇူးပါ Ge"

၂ဦးသားရယ်လိုက်မိကြသည်။

ဖူ၀မ်သော်မှာ သူ၏ညီဖြစ်သူနှင့် ထန်မော့တို့ ရယ်မောနေသည်ကို မြင်သော် သူ၏နှုတ်ခမ်းထောင့်တို့လည်း မြင့်တက်သွားခဲ့လေသည်။

ထင်းများကို ဖူ၀မ်သော်နှင့် ဖူ၀မ်ရှန်းတို့ ယနေ့မနက်တွင်ခုတ်ထားခြင်းဖြစ်သည်။ ဖူမိသားစုခြံ၀န်းထဲမှ အပင်များမှာ နှစ်ရာကျော်သက်တမ်းရှိသော အပင်အိုကြီးများဖြစ်သည်။ ၂ဦးသား မျက်တောင်တစ်ချက်မျှမခတ်ပဲ ခုတ်လှဲလျက် လိုအပ်သည်တို့ကို ပြင်ဆင်ခဲ့လေသည်။ ထင်းမီးမှာ ကျောက်မီးသွေးနှယ် အပူချိန်ဖြင့် တမြေ့မြေ့လောင်ကျွမ်းနေပြီး အသားများမှာ တရှဲရှဲမြည်သံဖြင့် မွှေးပျံ့စွာလောင်ကျွမ်းနေခဲ့သည်။ ဒုတိယအသားတံစို့လည်းကျက်သွားပြီးနောက် ဖူ၀မ်သော် ၄င်းကို ထန်မော့အား ကမ်းပေးလိုက်သည်။ ထန်မော့လက်ကိုလှမ်း၍ ယူလိုက်စဥ် ဖူ၀မ်သော်မှာ သူ၏လက်ကို ရုတ်တရက် ဖမ်းဆွဲလာခဲ့သည်။

ထန်မော့သူ့အား ချက်ချင်းကြည့်လိုက်မိလေသည်။

လေထုမှာ အေးခဲနေသည့်အလား။

လေအေးများက ခြံ၀န်းထဲမှ အပင်များကို တိုးဝှေ့သွားလျက် တရှဲရှဲ အသံများကို မြည်စေသည်။ ဖူ၀မ်ရှန်းမှာ ခေါင်းငုံ့ကာ အသားကိုစားနေပြီး ထန်မော့မှာ သစ်သားခုံပုလေးတွင် ထိုင်နေခဲ့သည်။ ဖူ၀မ်သော်က သူ၏လက်ကို ဆုပ်ကိုင်ထားပြီး ၂ဦးသားမှာတစ်ဦးကိုတစ်ဦး တိတ်ဆိတ်စွာ ကြည့်နေခဲ့ကြသည်။ အချိန်များကျော်လွန်သွားပြီထင်ရသော်လည်း တကယ်တမ်းတွင် ၂စက္ကန့်မျှသာ ရှိသေးတာဖြစ်သည်။

ဖူ၀မ်ရှန်း အသားကို ၀ါးနေရာမှ ခေါင်းမော့လာစဥ်တွင် သူ့အစ်ကိုဖြစ်သူနှင့် ထန်မော့ကြားမှ ထူးဆန်းသောလေထုကို တွေ့လိုက်ရလေသည်၊ သူက အရွယ်ရောက်ပြီးသော ယောကျာ်း၂ဦးကြားမှ ဆုပ်ကိုင်ထားသော လက်များကို အထိတ်တလန့်ကြည့်လိုက်သည်။

"အစ်ကိုတို့.."

ဘန်း...

ထန်မော့မှာ သူ၏အိတ်ကပ်ထဲမှ ငွေသေနတ်ကိုထုတ်ယူလျက် ဖူ၀မ်သော်လက်ထဲထည့်ပေးလိုက်သည်။ ဖူ၀မ်သော်မှာ သေနတ်ကိုရရှိသည်နှင့် ချိန်ရွယ်စရာပင် မလိုပဲ ခြံအပြင်ဘက်မှ အပင်အိုကြီးကို ပစ်ချလိုက်တောာ့သည်၊ ကျယ်လောင်သော သေနတ်သံနှင့်အတူ ထိုအပင်မှ အနက်ရောင်အရိပ်၂ခုလှစ်ခနဲထွက်လာခဲ့လေသည်။ တချိန်တည်းမှာ ပင် ဆန့်ကျင်ဘက်ဦးတည်ရာမှလည်း အရိပ်တစ်ခုက ပြေး၀င်လာခဲ့သည်။

ထန်မော့၏ အမူအယာမှာ ချက်ချင်းအေးစက်သွားတော့သည်။

ဖူ၀မ်သော်နှင့် ဖူ၀မ်ရှန်းမှာ ဤနေရာတွင် မည်သူမျှမသိပဲ အချိန်အတော်ကြာ ပုန်းကွယ်နေနိုင်ခဲ့သည်။ ယခုတော့ဤလူများမှာ ထန်မော့ရောက်လာပြီးသည်နှင့် ချက်ချင်းရောက်လာခဲ့လေသည်။ သူ့နောက်သို့လိုက်လာသည်ဆိုသည်မှာ ပြောနေစရာပင် မလိုချေ၊ ပေကျင်းတွင် သူ၏တည်နေရာကို နောက်ယောင်ခံလိုက်နိုင်သည်က တစ်ဖွဲ့သာရှိသည်။

ထန်မော့ဖူ၀မ်သော်အား ကြည့်လိုက်သည်။

"ထျန်းရွှမ်"

ဖူ၀မ်သော်သည်လည်း ဤလူများ၏ သရုပ်မှန်ကို ခန့်မှန်းမိလျက် ဓါးတချို့ကို ဘေးသို့ရို့လျက် ရှောင်လိုက်လေသည်။

တဖက်ခြမ်းမှ ဓါးကိုပစ်လွှတ်လိုက်သော လူ၏ပုံသဏ္ဍာန်မှာ တဖြည်းဖြည်း နီးကပ်လာခဲ့သည်။ ထိုမျက်နှာမှာ ကမ္ဘာကြီးအွန်လိုင်းပေါ် မတက်မီက မရေတွက်နိုင်သော ပရိတ်သတ်များကို အော်ဟစ်စေခဲ့သော်လည်း ယခုမူ လျန်ယွီကျန်း၏ လှပသော မျက်နှာတွင် မည်သည့်အမူအယာမှရှိမနေခဲ့ချေ။ သူမသည် အမှောင်ထုထဲမှ သွက်လက်စွာထွက်လာပြီး ဓါးပျံများကို ထန်မော့ထံဦးတည်၍ သွေးအေးစွာ ပစ်ထုတ်လိုက်သည်။

လျန်ယွီကျန်းသည် ဘာဘီကျူးစင်ကို ကန်ထည့်လျက် ဖူ၀မ်သော်၏ လမ်းကို ပိတ်လိုက်သည်။ သူမက ထိုအခွင့်အရေးကို ယူလျက် ထန်မော့အား တိုက်ခိုက်ချင်နေပုံပင်။

ဖူ၀မ်သော်၏ သေနတ်မှ ကျည်ဆံနောက်တစ်ချက်ထွက်ပေါ်လာပြီး ဓါးကိုတိကျစွာမှန်လျက် ဦးတည်ရာလွဲသွားစေသည်။

ထန်မော့သည် ထိုအချိန်၌ ထီးကလေးကို အလျင်အမြန်ဆွဲထုတ်လိုက်သည်။ ဖူ၀မ်သော်က လျန်ယွီကျန်း၏ ပစ်ချက်များကို သေနတ်ဖြင့် ပစ်ကာ တားဆီးနေပြီး ထန်မော့မှာမူ သူမအား ထီးကလေးဖြင့်တိုက်ခိုက်လိုက်လေသည်။ လူ၂ဦးကြားမှ စကားလုံးမလိုပဲ နားလည်နိုင်စွမ်းမှာ လျန်ယွီကျန်းအား စက္ကန့်ပိုင်းအတွင်း ဖိနှိပ်ထားနိုင်ခဲ့သည်။ ထီးကလေး၏ ထိပ်ဖျားမှာ လျန်ယွီကျန်း၏ ၀မ်းဗိုက်ကိုဖောက်၀င်ခါနီးဆဲဆဲတွင် မြေကြီးထံမှ အသံတစ်ခုကိုကြားလိုက်ရလေသည်။

ကမ္ဘာမြေကြီးမှာ တီးတိုးစကားဆိုနေသည့်နှယ် ထန်မော့၏ ခြေထောက်များကို တုန်လှုပ်သွားစေခဲ့သည်။ သူကချက်ချင်းနားလည်သွားလျက် ဖူ၀မ်သော်အားလှည့်ကြည့်လိုက်လေသည်။ ထန်မော့ နှုတ်ခမ်းကို ဟလျက် တစ်ခုခုမဆိုနိုင်ခင်မှာပင် ပြင်းထန်သော မြေဆွဲအားတစ်ခုကို ရုတ်ချည်းခံစားလိုက်ရလေသည်။

ဘုန်း...

ထန်မော့ ဖူ၀မ်သော်နှင့် ဖူ၀မ်ရှန်းသာမက လျန်ယွီကျန်းပင်လျှင် ၏ ပြင်းထန်သော ဆွဲအားကြောင့် ကမ္ဘာမြေကြီးထံ ကပ်နေရတော့သည်။

မြေဆွဲအားဖိနှိပ်မှု...

🌍

Prev Next