MM Story Teller

Chapter 206

Viewers 32k

🌍Chapter 206

ထန်မော့၏ ယခင်ကောက်ချက်ချမှုများအရ အလင်းစက်တစ်ခုချင်းစီမှာ မျှော်စင်အထပ်တစ်ခုချင်းစီကို ကိုယ်စားပြုလေသည်။ လက်ရှိကမ္ဘာပေါ်တွင်မျှော်စင်တတိယထပ်ကို ရှင်းလင်းထားသော ကစားသမား၂ဦးသာရှိသည်။ ရုရှားကစားသမားမှာ ပထမဆုံးဖြစ်ကာ ထန်မော့မှာ ဒုတိယဖြစ်သည်။

သို့သော် အနက်ရောင်မျှော်စင်က အဆင့်ထပ်မြင့်ခြင်းမရှိခဲ့ချေ။

ယခုမှ ထိုအလင်းစက်များ အဘယ်ကြောင့် ရုတ်တရက်လင်းလာရပါသနည်း...

အမည်မသိခံစားချက်တစ်ခုက ထန်မော့၏ရင်ထဲသို့၀င်ရောက်လာခဲ့ပြီး မျှော်စင်အား မျက်တောင်မခတ်ပဲ ကြည့်နေခဲ့မိလေသည်။ သို့သော် ထိုတတိယအလင်းမှာ ၂ကြိမ်ခန့်တဖြတ်ဖြတ်လင်းသွားပြီးသော်လည်း ရပ်မသွားခဲ့ချေ။ ၄င်း၏ အောက်တွင် တတိယမြောက် အလင်းစက်တစ်ခုမှိန်ဖျော့ဖျော့နှင့် လင်းလာသည်ကို တွေ့လိုက်ရလေသည်။

ထန်မော့၏ မျက်လုံးတို့ ပြူးကျယ်သွားလျက် ထိုအလင်းစက်ကို ကြည့်နေခဲ့မိသည်။

ထို့နောက် ကျယ်လောင်သော သီချင်းသံနှင့် ရောင်စုံအလင်းများဖြာထွက်လာသည်ကို တွေ့လိုက်ရတော့သည်။

"တစ် တစ် တစ်...အိပ်ပျော်နေတဲ့ မင်းသမီးလေးရဲ့ အနမ်းလေးပေးတယ်..."

"တစ် တစ် တစ်...ဘွားဘွား၀ံပုလွေကြီးက မင်းကိုစားချင်တယ် .."

"တစ် တစ် တစ် အနီရောင်နှလုံးသားဘုရင်မက မင်းကို မနာလိုတယ်..."

"တစ် တစ် တစ်...ဆပ်ကပ်ကမင်းကို အလိုရှိနေပါတယ်"

အဖြူရောင်အလင်းစက်မှာ လူတိုင်း၏အာရုံကိုတော့ မဖမ်းစားနိုင်ခဲ့ချေ။ ထိုအနက်ရောင်မျှော်စင်ပေါ်မှ ထူးဆန်းသော အလင်းစက်ကို သတိထားမိသူများမှာ အယောက်၁၀၀ထက်နည်းလေသည်။ သို့သော် သီချင်းသံ စထွက်လာသည်နှင့် ကမ္ဘာပေါ်မှ လူတိုင်း အနက်ရောင်မျှော်စင်ကို ကြည့်လိုက်မိကြလေသည်။

ကမ္ဘာအနှံ့တွင် အနက်ရောင်မျှော်စင်များမှာ ရောင်စုံအလင်းများ တဖြတ်ဖြတ်လင်းနေပြီး မြူးကြွသော သီချင်းကို သံပြိုင်သီဆိုနေကြသည်။

"ခိုး၀င်သူ၃ယောက်ဟာ လမ်းတစ်၀က်မှာ သေကုန်တယ်"

"အရံကစားသမား၂ယောက်ဟာ အစားခံလိုက်ရတယ်"

"တရား၀င်ကစားသမားတစ်ယောက်ကတော့ မျှော်စင်ကို ကြိုးစားတိုက်ခိုက်မနေဘူး"

"မင်းသာ...မင်းတစ်ယောက်တည်းသာ..."

"တစ် တစ် တစ် အနက်ရောင်မျှော်စင်က မင်းကိုချစ်တယ်...မင်းကိုမြတ်နိုးတယ်..."

ကလေးသံများမှာ အနက်ရောင်မျှော်စင်က မင်းကိုချစ်တယ်ဟူသော စာသားကို ၄ကြိမ်ခန့်သီဆိုပြီးနောက် တောက်ပသော အလင်းရောင်များမှာ ရုတ်ချည်းရပ်တန့်သွားတော့သည်။ ထို့နောက် ကျယ်လောင်သော ကြေညာသံက ကမ္ဘာတစ်၀ှမ်းလုံးပျံ့နှံ့သွားတော့သည်။

"တင်းတောင်~ တရုတ်ပြည် ခရိုင် ၃ ကစားသမား

မူဟွေ့..."

အနက်ရောင်မျှော်စင်၏ ကြေညာသံမှာ ထူးဆန်းစွာ ရပ်တန့်သွားတော့သည်။

လေထုမှာ ရပ်တန့်နေသည့်နှယ် အပ်ကျသံကိုပင် ကြားရမတတ်။ အနက်ရောင်မျှော်စင်၏ သီချင်းနှင့် ကြေညာသံမှာ ထိုသို့မူမမှန်စွာ တစ်ခန်းရပ်သွားခဲ့လေသည်။ ထန်မော့ လက်ချောင်းများကို တင်းတင်းဆုပ်လျက် ကြေညာမှုကို တဖန်ထပ်စောင့်နေခဲ့သည်။ ၁မိနစ်ကြာပြီးနောက် အနက်ရောင်မျှော်စင်၏ ကြေညာသံတဖန်ထွက်ပေါ်လာပြန်သည်။

"တင်းတောင်~ ၂၀၁၈ မတ်လ ၂၇ရက်. ဒေတာမှားယွင်းနေပါသည်...အနက်ရောင်မျှော်စင်ဗားရှင်း ၄.၀မြှင့်တင်ခြင်းကို ရပ်တန့်လိုက်ပါပြီ"

အနက်ရောင်မျှော်စင်၏ ကျယ်လောင်သော ကြေညာသံမှာ ကမ္ဘာတစ်၀ှမ်းကိုပြန့်နှံ့သွားခဲ့ပြီး နေလုံးကြီးမှာလည်း မိုးကုပ်စက်၀ိုင်းမှ တဆင့်တဖြည်းဖြည်း ၀င်သွားခဲ့လေသည်။ နေရောင်ပျောက်ကွယ်သွားပြီးနောက် လရောင်မှာ ချက်ချင်းရောက်ရှိလာခဲ့သည်။ ကျယ်၀န်းသောခြံထဲတွင် ထန်မော့ ဖူ၀မ်သော်နှင့် ဖူ၀မ်ရှန်းတို့မှာ အဆောက်အဦးအနီးတွင်အတူတကွရပ်နေခဲ့ကြလေသည်။

၂ဖက်စလုံးက အနက်ရောင်မျှော်စင်ပြောင်းလဲမှုမှ ပြန်လည်သတိ၀င်လာခဲ့ပြီး တစ်ဖက်နှင့်တစ်ဖက် တိတ်တဆိတ်ကြည့်နေခဲ့ကြလေသည်။

လေထုမှာအေးခဲနေသည့်အလား။ အဆုံးတွင် ထန်မော့ လှည့်ထွက်သွားတော့သည်၊ ဖူ၀မ်သော်သည်လည်း သူ၏ညီဖြစ်သူကော်လာကိုဆွဲကာ အတူထွက်လာခဲ့သည်။

ချီဟန် သူတို့နောက်သို့လိုက်ချင်ခဲ့သော်လည်း ရွမ်၀မ်ရှုက သူ့ကိုတားခဲ့သည်။ သူက မချင့်မရဲဖြင့်ခေါ်လိုက်မိသည်။

"ခေါင်းဆောင်"

ဖြူဖျော့နေသော ဆယ်ကျော်သက်လေးက အမှောင်ထုထဲ ၀င်ရောက်ပျောက်ကွယ်သွားသော ထန်မော့တို့ ၃ယောက်၏ ကျောပြင်များကို စိုက်ကြည့်နေခဲ့ပြီး သူ၏ မျက်၀န်းများမှာ အေးစက်နေခဲ့သည်။

"အခြေအနေမကောင်းဘူး အန္တရာယ်များတယ်"

ချီဟန်က စောဒကတက်လာခဲ့သည်။

"ပေးထားတဲ့အချိန်ကုန်တော့မယ်လေ ပြီးရင် အနက်ရောင်မျှော်စင်ကကျွန်တော်တို့ကို သူ့တည်နေရာကို ပေးတော့မှာမဟုတ်ဘူး"

"ငါ့ဒဏ်ရာတွေပြန်မကောင်းသေးဘူး လျန်ယွီကျန်းရောပဲ"

ချီဟန်မှာ တစ်ခုခုပြောချင်သေးသော်လည်း ရွမ်၀မ်ရှုကသူ၏အိတ်ကပ်ထဲမှ ငွေရောင်တောက်နေသော သတ္တုပြားတစ်ခုကိုထုတ်ယူလာခဲ့သည်။ ၄င်းအပေါ်တွင် အသေးစားပေကျင်းမြေပုံလေးတစ်ခုရှိသည်၊ လျှို့၀ှက်မြို့တော်၏ဘေးတွင် အမဲစက်ကလေးမှာ ရွေ့လျားနေခဲ့လေသည်။ မြို့တော်အ၀င်၀ရောက်သည်နှင့် ထိုအမဲစက်လေးမှာ ရုတ်ချည်းပျောက်ကွယ်သွားတော့သည်။ ထို့နောက် သတ္တုပြားမှာလည်းစက္ကူအပိုင်းအစများလို လေထုထဲ ကြေမွသွားလေတော့သည်။

ချီဟန် စိတ်ဓါတ်ကျစွာ တိတ်တဆိတ်ကျိန်ဆဲရုံသာ တတ်နိုင်တော့သည်။

ရွမ်၀မ်ရှုမှာမူ ဖတ်ရခက်သော အမူအယာဖြင့် မျက်နှာလွှဲသွားခဲ့သည်။

ချီဟန်ကမေးလိုက်သည်။

"သူတို့ကို ဒီလိုပဲလွှတ်ပေးလိုက်တော့မှာလား...အဲဒါက ပြန်သုံးလို့ရတဲ့ ရှားပါးအဆင့်အကူပစ္စည်းနော်..ဘုရင့်ရွှေဒင်္ဂါးထက်တောင် သာရင်သာမှာ စန်တာကလော့ရဲ့ လက်ဆောင်အိတ်နဲ့တောင်ယှဥ်လို့မရဘူး"

လျန်ယွီကျန်းမှာသူ့အား မာထန်စွာကြည့်လာခဲ့သည်။

"နင်သာ အဲဒီ ငတုံး၄ကောင်ကို အမိန့်မပါပဲ မလှုပ်ရှားခိုင်းလိုက်ရင် သူတို့ အခုလိုကြိုသိပြီး ပြင်ဆင်ထားမှာတဲ့လား"

ချီဟန်"..."

ခတ္တမျှနေပြီးနောက် သူကမကျေမနပ်ရေရွတ်လာခဲ့သည်။

"သူတို့ကထန်မော့နဲ့ ဖူ၀မ်သော်က အသင်းဖော်တွေဆိုတာကိုမှ မသိတာ...ဖူ၀မ်သော်သာမရှိရင် သူတို့ရဲ့အချိန်ပြန်ဆုတ်တဲ့စွမ်းရည်နဲ့ဆို လုပ်နိုင်ခဲ့မှာ သေချာတယ်"

"သူနဲ့ ဖူ၀မ်သော်က အသင်းဖော်တွေ"

ချီဟန်နှင့် လျန်ယွီကျန်းမှာ ရွမ်၀မ်ရှုအားကြည့်လိုက်ကြသည်။

"သူကသန်မာပေမယ့် ရင်ဆိုင်လို့မရလောက်အောင်တော့ မဟုတ်ဘူး...ဖူ၀မ်သော်ရှိနေလို့ သူ့ဆီက အဲဒီပစ္စည်းကိုရဖို့ ပိုခက်နေတာ...ဒါပေမယ့်လည်း သူ့အသင်းဖော်ကဖူ၀မ်သော်ဆိုမှတော့ ငါတို့အနာဂါတ်မှာလည်း သူ့ကိုရှာတွေ့ဦးမှာပဲ မဟုတ်ဘူးလား"

*****

ပေကျင်း သုန်ချန်းခရိုင်တွင်...

ထန်မော့နှင့် ဖူ၀မ်သော်တို့ ထိုမြို့တော်မှ လျင်မြန်စွာ ထွက်ခွာလာကြတော့သည်။ ဖူ၀မ်ရှန်း၏ အမြန်နှုန်းမှာ သူတို့ကို အမီမလိုက်နိုင်၍ ဖူ၀မ်သော်က သူ့ကိုသယ်လာပြီး လူသူမဲ့အဆောက်အဦးတစ်ခုထံရောက်ရှိလာကြသည်

။ ဖူ၀မ်ရှန်း၏ ပါးပြင်များမှာ လေပြင်းကြောင့် နီရဲနေပြီး ဖူ၀မ်သော်သူ့အား ချပေးလိုက်သည်နှင့် အသက်ကို ပြင်းစွာရှူလာခဲ့သည်။ သူ၏ပထမဆုံးစကားမှာဤသို့ဖြစ်သည်။

"Geကျွန်တော့်ရေတွေ ကျွန်တော့်ဓါတ်ဆားရည်တွေ အိမ်မှာ ကျန်ခဲ့ပြီ"

၄င်းမှာ သူ၁၀ရက်မျှ ကြိုးစားစုဆောင်းထားရသော ဓါတ်ဆားရည်များဖြစ်သည်။

ဖူ၀မ်သော် သူ၏ ညီဖြစ်သူကို ထူးဆန်းစွာကြည့်လျက် အိတ်ထဲမှ ကြက်သိုက်ကလေးကို ထုတ်ယူလိုက်သည်။

ဖူ၀မ်ရှန်း သူ၏ အစ်ကိုဖြစ်သူကို ကြောင်တောင်တောင်ကြည့်နေမိသည်။ ဖူ၀မ်သော်မှာ ထိုကြက်သိုက်ထဲမှ ဥတစ်လုံးကိုယူလျက် မြေကြီးပေါ်ချလိုက်သည်။ ချက်ချင်းဆိုသလို သူတို့၏ရှေ့တွင် ဓါတ်ဆားရည်ဘူးများ အပုံလိုက်ပေါ်လာခဲ့လေသည်။

ဖူ၀မ်သော်ကဆိုလိုက်သည်။

"ဒီနေ့အဲဒီကနေထွက်လာဖို့ ပြင်ထားပြီးသား မနေ့ကတည်းက ပစ္စည်းတွေ သိမ်းထားတာ"

၄င်းမှာ အံ့သြဖွယ်ပင်။

ထန်မော့မှာ ဘာဘီကျူးလည်းမစားလိုက်ရပဲ အိမ်ကိုသေချာတောင်မကြည့်လိုက်ရခင်မှာပင် ထွက်လာခဲ့ရသည်။ ယခုဖူ၀မ်သော်၏အိမ်မှာ အန္တရာယ်ရှိသော နယ်မြေအဖြစ်ပြောင်းလဲသွားပြီဖြစ်ကာ မဖြစ်မနေအရေးပေါ်အခြေအနေမဟုတ်သ၍ ပြန်မသွားနိုင်တော့ချေ။ သို့သော် ဖူ၀မ်သော်မှာ ပစ္စည်းများကို သိမ်းလာခဲ့ပြီးဖြစ်ကာ သူတို့ပြန်မသွားနိုင်လျှင်လည်း ကိစ္စမရှိတော့ချေ။

ယနေ့ဖြစ်ခဲ့သမျှမှာ များလွန်း၍ သူတို့၃ဦးစလုံး အနားယူရန်လိုအပ်သည်။

ဖူ၀မ်သော် ထိုဓါတ်ဆားရည်ဘူးများကို ငှက်သိုက်ထဲပြန်ထည့်လိုက်ချိန်တွင် ကောင်းကင်ကြီးမှာ မှောင်မည်းနေချေပြီ။ ဤအဆောက်အဦးမှာ ကမ္ဘာကြီးအွန်လိုင်းပေါ်တက်မလာခင်က အပြီးမသတ်နိုင်လောက်သော အဆောက်အဦးတစ်ခုဖြစ်နိုင်လေသည်။ ထို့ကြောင့် တံခါးပေါက်များမှာ တံခါးရွက်များရှိမနေချေ။ ထိုကဲ့သို့နေရာမျိုးတွင် သူတို့၃ယောက်မှာ အလင်းကိုမဖွင့်ပဲ မှောင်ရိပ်ခိုနေရန်ရွေးချယ်ခဲ့ကြသည်။ လရောင်ကွယ်ရာတွင် တိတ်တဆိတ်ထိုင်လျက် ယနေ့ဖြစ်ပျက်ခဲ့သမျှကို ပြန်လည်စဥ်းစားနေကြသည်။

"ဒီနေရာက ပေ့ရှင်းရှောင်းနယ်မြေထဲက သုန်ချန်းခရိုင်ပဲ...ထျန်းရွှမ်တည်နေရာနဲ့နီးပေမယ့် သူတို့သာ မင်းကို ခြေရာခံနိုင်တုန်းပဲဆိုရင်တော့ ဘယ်နေရာမှာ ပုန်းပုန်း ထူးမှာတော့မဟုတ်ဘူး ရွမ်၀မ်ရှုက ဒဏ်ရာပြင်းပြင်းထန်ထန်ရထားသလို လျန်ယွီကျန်းလည်း သူ့ထက်တော့အရမ်းပိုမကောင်းလောက်ဘူး"

ရွမ်၀မ်ရှူ၏ ဒဏ်ရာများမှာ သိသာလှသည်။ ထန်မော့သူနှင့်တိုက်ခိုက်စဥ်က သူ၏နံရိုးများ ပုံစံမကျမှုကို သတိပြုမိပြီး သူ၏ လှုပ်ရှားမှုမှာလည်း နှေးကွေးနေခဲ့သည်။ လျန်ယွီကျန်းမှာ သူ့ထက်အနည်းငယ်ပိုကောင်းသော်လည်း သူမနှင့် တိုက်ခိုက်နေသူမှာ ဖူ၀မ်သော်ဖြစ်၍ မူမမှန်သည့်အချက်ကို ချက်ချင်းရှာတွေနိုင်လေသည်။

ထန်မော့ခေါင်းညိတ်လိုက်သည်။

"သူတို့ကဒဏ်ရာရထားသော ခဏလောက်အထိ တိုက်ခိုက်လာဦးမှာမဟုတ်ဘူး...ဒီနေ့လည်း သူတို့ဘာအကျိုးမှ မရလိုက်ဘူး...နောက်တစ်ကြိမ်မလှုပ်ရှားခင်အထိတော့ လျန်ယွီကျန်းနဲ့ ရွမ်၀မ်ရှုပြန်ကောင်းလာတဲ့အထိ စောင့်သင့်တယ်"

ယနေ့ညတွင် ခြုံခိုတိုက်ခိုက်လာနှုန်းမှာ ၃၀ရာခိုင်နှုန်းဟုဆိုနိုင်သော်လည်း ထန်မော့၏ ခံစားချက်အရ ၁၀ရာခိုင်နှုန်းမျှသာဖြစ်သည်။

"ရွမ်၀မ်ရှုကဥာဏ်ကောင်းတဲ့သူ...ကျွန်တော်တို့ဖိနပ်တွေက မြေဆွဲအားကို ဆန့်ကျင်နိုင်တဲ့ အကူပစ္စည်းမှန်းရှာတွေ့ဖို့ ၅မိနစ်ပဲလိုတယ်...နောက်တစ်ကြိမ် အလောတကြီးလှုပ်ရှားမှာမဟုတ်ဘူး"

ဖူ၀မ်သော်ကထန်မော့၏ စကားကိုထောက်ခံခဲ့သည်။

ဖူ၀မ်ရှန်းက သူ၏ခြေထေက်ကို ဖက်လို့ထားသည်။ မတ်လကုန်ခါနီးဖြစ်ကာ ပေကျင်းမှာ အနည်းငယ်အေးနေဆဲ။ သူသည်မြေကြီးပေါ်မှ အ၀ိုင်း၂၀ိုင်းကိုကြည့်ကာ မနေနိုင်တော့ပဲဆိုလိုက်သည်။

"ထျန်းရွှမ်ရဲ့ခေါင်းဆောင်ကအဲလောက်ထိငယ်မယ်လို့မထင်ထားဘူး ကြည့်ရတာ ကျွန်တော်နဲ့ရွယ်တူလောက်ပဲ"

ထန်မော့လှည့်ကြည့်လိုက်မိသည်။ ရွမ်၀မ်ရှုနှင့်ရှောင်ဖူမှာ အနည်းငယ်တော့ ဆင်တူလှသည်။

ထန်မော့ဆိုလိုက်သည်။

"သူကအခု၁၄နှစ်လေ မင်းက၁၂နှစ် မင်းလည်း အတွေ့အကြုံတွေရှိလာမှာပါ"

ကမ္ဘာကြီးအွန်လိုင်းပေါ်တက်လာပြီးနောက် ထန်မော့ငယ်ရွယ်သော ကလေးများကိုလည်းတွေ့ခဲ့ရသည်။ ဤကမ္ဘာပျက်ကပ်ကာလကြီးတွင် ရွမ်၀မ်ရှုကဲ့သို့ ရင့်ကျက်မှုနှင့် ခွန်အားတို့လျင်မြန်စွာတိုးတက်လာသူမှ လွဲလျှင် ကလေးအများစုမှာ လူကြီးများထက် အားနည်းလှသည်။

ကိုယ်ခွန်အားတိုးလာခြင်းမှာ မူလကိုယ်၏ ခွန်အားနှင့် သက်ဆိုင်သည်။ ကလေးတစ်ဦးနှင့် လူကြီးတစ်ဦးအတူတကွ သန်မာလာလျှင်တောင် ကလေးမှာ လူကြီးထက် ပိုအားနည်းနေဆဲဖြစ်သည်။ အဘယ်ကြောင့်မူ ခွန်အားကိုအသုံးပြုပုံ အလျင် ပေါက်ကွဲအားနှင့် ကျန်ရှူထောင့်များတွင် ကလေးများမှာ လူကြီးများလောက် မသန်မာ၍ဖြစ်သည်။

ရွမ်၀မ်ရှုမှာ သူများတကာနှင့် အလွယ်တကူနှိုင်းယှဥ်လို့မရသော ကွဲပြားသည့် လူတစ်မျိုးဖြစ်သည်။

ဖူ၀မ်ရှန်းကဆိုလာသည်။

"ကျွန်တော်က အတွေ့အကြုံရှိလာမှာဆိုပေမယ့် သူနဲ့ကျွန်တော်နဲ့ တစက်မှတူမနေဘူးလေ...အရွယ်တူတူလောက်လေးပဲဆိုပေမယ့် သူနဲ့ဘယ်နေရာမှ တူမနေဘူး"

"တူနေတာရှိပါတယ်"

ဖူ၀မ်ရှန်း သူ၏အစ်ကိုကြီးကိုမော့ကြည့်လာခဲ့သည်။

ဖူ၀မ်သော်က နံရံကိုမှီထားပြီး ရှောင်ဖူမှာ သူနှင့် ထန်မော့ကြားတွင်ထိုင်နေခဲ့သည်။ ဖူ၀မ်သော် သူ၏အကြည့်ကို သူ၏ညီဖြစ်သူထံ ပို့လိုက်လေသည်။

"မင်းလည်း သူ့လောက်ပုတာပဲလေ"

ဖူ၀မ်ရှန်း"..."

ထန်မော့"..."

ဖူ၀မ်ရှန်းအတော်ကြာဆွံ့အနေခဲ့လေသည်။ ထို့နောက် အနိုင်ကျင့်ခံရသည့်အမူအယာလေးဖြင့် ခေါင်းငိုက်စိုက်ချကာ တိတ်သွားတော့သည်။

ထန်မော့ကအနည်းငယ်တွေးလျက်ဆိုလိုက်သည်။

"ရှောင်ရှန်းကတကယ်တော့ရှည်ပါတယ်...ယောကျာ်းလေးတွေက ဖွံ့ဖြိုးမှုပိုနှေးပေမယ့် ရှောင်ဖူက ၁.၆မီတာတောင်ရှိပြီလေ...သူကပိုတောင်ရှည်လာဦးမှာ ...ရွမ်၀မ်ရှုကတောင် ပိုပုသေးတယ်"

ဖူ၀မ်သော်ကဆိုလာခဲ့သည်။

"ကိုယ် ၁၂နှစ်လောက်တုန်းကတော့ ၁.၇မီတာရှိတယ်ရော"

ထန်မော့"..."

ဖူ၀မ်ရှန်း"..."

သူတကယ်ကြီးပြောလိုက်တယ်ပေါ့...

ရှောင်ဖူ သူ့အစ်ကိုဖြစ်သူ၏ ဆောင့်ကြွားကြွားနိုင်မှုကို မတုန့်ပြန်ရဲသော်လည်း လု၃ယောက်ကြားမှာ ကျဥ်းကြပ်ကြပ်လေထုမှာ ပြိုကွဲသွားခဲ့လေသည်။ ထန်မော့ ဖူ၀မ်သော်အား တိတ်တဆိတ်ကြည့်လိုက်မိသည်။ သူသည် ဖူ၀မ်သော်မှာ မိမိတို့ စိတ်ပြေလက်ပျောက်ဖြစ်စေရန် တမင်နောက်လိုက်သည်လားဟု ရှာဖွေကြည့်နေခြင်းပင်။ သို့သော် လက်ရှိဤနေရာတွင် လူ၃ယောက်ရှိနေသည်။ တိုက်ခိုက်ခံရသူအနေနှင့်ရှောင်ဖူကတော့ မရယ်နိုင်ခဲ့ချေ။ ထန်မော့သည်လည်း ဖူ၀မ်သော်၏ အဖြောင့်ဟာသများကို နားမလည်နိုင်ခဲ့။

ကောင်းပြီ...ဖူ၀မ်သော်ရဲ့ အကွေးဟာသတွေနဲ့ အဖြောင့်ဟာသတွေက အတူတူလောက်ရှိပေမယ့်လည်း...

ခတ္တမျှကြာပြီးနောက် ထန်မော့ အတည်အတံ့ဆိုလာခဲ့သည်။

"အနက်ရောင်မျှော်စင် ၄.၀ဗားရှင်းကို ကြားလိုက်တယ်မလား"

ဖူ၀မ်သော် နှင့် ရှောင်ဖူ၏ အမူအယာမှာ ပို၍လေးနက်လာခဲ့သည်။

ထန်မော့ကဆိုလိုက်သည်။

"ဗားရှင်း ၂.၀ နဲ့ ၃.၀ တွေတုန်းက အနက်ရောင်မျှော်စင်က ရက်ကြိုကြေညာပြီး ကျွန်တော်တို့ကို အဆင့်မြှင့်တင်မယ့် အကြောင်းရယ် ရက်ရယ်ကို ကြိုအသိပေးတယ်လေ...ဒီနေ့ကျတော့ အဆင့်မြှင့်တင်မှုရပ်သွားပြီလို့ ရုတ်တရက်ကြီးပြောတယ်"

တရုတ်ပြည်တွင်နာမည်ကြီးသည့် ကစားသမား ၄ယောက်ရှိသည်။

ဖူ၀မ်သော် ထန်မော့ ရွမ်၀မ်ရှုနှင့်လျန်ယွီကျန်းတို့ပင်။

ဤ၄ယောက်မှာ အနက်ရောင်မျှော်စင်ထံမှာ တရား၀င်ကြေညာခံရသူများဖြစ်ကာ ကမ္ဘာပေါ်မှ ကစားသမားတိုင်း သူတို့ကို သိလေသည်။

မူဟွေ့မှာမူ လုံး၀ကို မကြားဖူးသော သူစိမ်းတစ်ယောက်ပင်။

ထန်မော့၏လေသံမှာ အလွန်သေချာနေခဲ့သည်။

"အနက်ရောင်မျှော်စင်ကသူ့အတွက် သီချင်းတောင်ဆိုပေးခဲ့တယ်...အိပ်ပျော်နေသော မင်းသမီး ဘွားဘွား၀ံပုလွေ အနီရောင်နှလုံးသားဘုရင်မ ဆပ်ကပ်ဆိုတာတွေထည့်ဆိုထားတယ်...ကမ္ဘာကြီးအွန်လိုင်းပေါ်တက်လာကတည်းက အနက်ရောင်မျှော်စင်က သီချင်းဆိုပေးဖူးတဲ့သူတစ်ယောက်ပဲရှိတယ်"

🌍

Prev Next