MM Story Teller

Chapter 207

Viewers 32k

🌍Chapter 207

လွန်ခဲ့သော ၆လခန့်က အနက်ရောင်မျှော်စင်မှာ အွန်လိုင်းပေါ်သို့တက်လာခဲ့သည်။ တတိယမြောက်နေ့တွင် ဖူ၀မ်သော်က မျှော်စင်တိုက်ခိုက်ဂိမ်းကိုဖွင့်လျက် အနက်ရောင်မျှော်စင်အား အံ့အားသင့်လျက် စိတ်လှုပ်ရှားစေအောင် ပြုလုပ်နိုင်ခဲ့သည်။ ၄င်းမှာ ဖူ၀မ်သော်အတွက် ကျေးဇူးတင်ပါတယ် သီချင်းကိုဆိုခဲ့ပြီး ထိုအချိန်မှစ၍ မည်သူကမှ အနက်ရောက်မျှော်စင်ကို သူတို့အတွက် သီချင်းဆိုအောင် မလုပ်နိုင်တော့ချေ။

မူဟွေ့မှာ ဒုတိယမြောက်လူဖြစ်သည်။

ထန်မော့၏ လက်ချောင်းများမှာ သူ၏ဒူးခေါင်းကို တတောက်တောက်ခေါက်လျက် မျက်လုံးများ မှိတ်ကာ စဥ်းစားနေခဲ့သည်။

ဖူ၀မ်ရှန်းက တွက်ဆလာခဲ့သည်။

"အနက်ရောင်မျှော်စင်က မျှော်စင် ပထမထပ် ဒုတိယထပ်နဲ့ တတိယထပ်တွေကို ပထမဆုံးစရှင်းတဲ့သူတွေအတွက် သီချင်းမဆိုခဲ့ဘူး...မူဟွေ့က အတော်အရေးကြီးတဲ့ တစ်ခုခုကိုလုပ်ခဲ့တာပဲဖြစ်မယ်...ပြီးတော့မျှော်စင်ဗားရှင်းအသစ်ကိုတောင် ဖွင့်လိုက်သေးတယ်...ဒါပေမယ့်အဆင့်မြှင့်တင်တာက တ၀က်တပျက်ရပ်သွားတာပဲ ပြဿနာတစ်ခုခုကြုံလို့များလား"

အနက်ရောင်မျှော်စင်ပင်လျှင် ထူးထူးခြားခြားပြုမူရသည်အထိ မည်သို့ထူးခြားသော အရာကိုများ ပြုလုပ်ခဲ့ပါသနည်း။

ဖူ၀မ်သော်မှာ ပထမထပ်နှင့် ဒုတိယထပ်တို့ကို ပထမဆုံးရှင်းလင်းခဲ့သူဖြစ်ကာ ရုရှားမှာ အန်ဒရီမှာလည်း တတိယထပ်ကို ပထမဆုံးရှင်းလင်းခဲ့သူဖြစ်သော်လည်း ကမ္ဘာလုံးဆိုင်ရာကြေညာချက် ၃ခါကိုသာ ရရှိခဲ့သည်။

"သူက လေးထပ်မြောက်ကို ရှင်းခဲ့တာ"

ထန်မော့မျက်လုံးများကို ဖွင့်လျက် ဖူ၀မ်သော်ကို ကြည့်လိုက်သည်။

ဖူ၀မ်ရှန်းလည်း အံ့အားသင့်သွားခဲ့လေသည်။

"ဘယ်လိုဖြစ်နိုင်မှာလဲ အစ်ကိုထန်က မနေ့ကမှ တတိယထပ်ကို ပထမဆုံးရှင်းပြီးတဲ့သူလေ..ဒီလိုဖြစ်ဖို့ဆို မူဟွေ့က အစ်ကိုထန်နဲ့ကပ်ပြီး တတိယထပ်ကို ရှင်းပြီးသွားတာဖြစ်မှရမယ် ပြီးတော့ လေးထပ်မြောက်ကို တစ်ရက်တည်းမှာ ရှင်းလိုက်တာလား"

ထန်မော့တည်ငြိမ်စွာဆိုလိုက်သည်။

"လေးထပ်မြောက်ကိုရှင်းဖို့ဆိုတာ မဖြစ်နိုင်တာတော့မဟုတ်ဘူး...သူကငါ့နောက်ကနေ တတိယထပ်ကို ရှင်းနိုင်ခဲ့တာဆိုရင် မျှော်စင်က သူ့ကိုကြေညာပေးခဲ့မှာ မဟုတ်ဘူး..ဒါပေမယ့် အခုလေးတင် အဆင့်မမြှင့်ခင်က တတိယအလင်းစက်က ၂ခုပဲရှိတယ်...ဒီတော့ ကမ္ဘာပေါ်မှာ လောလောဆယ် တတိယထပ်ကိုရှင်းထားတာ ၂ယောက်ပဲရှိတယ်ဆိုတာပဲ..."

ထန်မော့က တန့်သွားခဲ့မိသည်။ သူသည် ဖူ၀မ်သော်က အဘယ်ကြောင့် တဖက်လူမှ လေးထပ်မြောက်ကို ရှင်းလိုက်သည်ဟု ထင်သည်ကို နားလည်နိုင်သည်။

"အိပ်ပျော်နေသောမင်းသမီး ဘွားဘွား၀ံပုလွေ အနီရောင်နှလုံးသားဘုရင်မ နဲ့ဆပ်ကပ်...အနက်ရောင်မျှော်စင်က ဒီနေရာလေးခုကို ဒီတိုင်းပြောတာပဲမဖြစ်နိုင်ဘူး...မူဟွေ့သာလေးထပ်မြောက်ကိုတကယ်ရှင်းခဲ့တယ်ဆိုရင် အဲဒီလေးနေရာက သူ့ရဲ့ မျှော်စင်အထပ်တွေကို တိုက်ခိုက်ခဲ့တဲ့နေရာပဲဖြစ်မယ်"

ထန်မော့ခတ္တမျှတွေးတောနေပြီးနောက် ဖူ၀မ်သော်အား မော့ကြည့်လိုက်သည်။

"ခိုး၀င်သူ အရံကစားသမား တရား၀င်ကစားသမား...အနက်ရောင်မျှော်စင်ကအကုန်လုံးကို ထည့်ပြောသွားတယ် ခိုး၀င်သူ၃ယောက်က လမ်းမှာသေတယ် အရံကစားသမား၂ယောက်က စားခံရတယ် တရား၀င်ကစားသမားတစ်ယောက်က အလုပ်မကြိုးစားဘူး"

"ဒီ၃မျိုးထဲမှ မူဟွေ့တစ်ယောက်ကိုပဲ အနက်ရောင်မျှော်စင်က ကြိုက်တာ"

ထန်မော့ကရေရွတ်လိုက်သည်။

"ခိုး၀င်သူ အရံကစားသမား တရား၀င်ကစားသမား ..

မူဟွေ့က ဘယ်သူတွေလဲ"

လက်ရှိကောက်ချက်ချထားသော နယ်မြေခွဲခြားမှုအရ တရုတ်ပြည်ခရိုင်၃မှာ ကွမ်းကျိုးဖြစ်သည်။

ယနေ့မတိုင်ခင်အထိ အနက်ရောင်မျှော်စင်မှာ ကွမ်းကျိုးနှင့်ပတ်သက်၍ မည်သည့်ကြေညာမှုကိုမှ မပြုလုပ်ခဲ့ဖူးချေ။ ထန်မော့သည်လည်း ခရိုင်၃မှ ကစားသမားတစ်ယောက်ကိုမှ ဂိမ်းထဲတွင် မဆုံဖူးခဲ့။

ထန်မော့က ၀ါယာကြိုးတစ်ချောင်းဖြင့် မြေကြးပေါ်တွင် စက်၀ိုင်း၃ခုကို ရေးဆွဲလိုက်သည်။ ထိုစက်၀ိုင်းတစ်ခုစီက ပေကျင်း ရှန်ဟိုင်းနှင့် ကွမ်ကျိုးကို ကိုယ်စားပြုလေသည်။

ထန်မော့သည် သူတတိယထပ်ကိုရှင်းလင်းခဲ့သော အချိန်နှင့် အနက်ရောင်မျှော်စင်မှ မူဟွေ့အားကြေညာခဲ့သော အချိန်ကို ချရေးလိုက်သည်။

ဖူ၀မ်ရှန်းမှာ ထိုအချိန်၂ခူကိုကြည့်လျက် အတွေးဖြင့်ဆိုလာသည်။

"နာရီ၂၀ထက်နည်းတာပဲ...ပုံမှန်းဆို ကစားသမားတစ်ယောက်အတွက် နာရီ၂၀အတွင်း တတိယထပ်ရော လေးထပ်မြောက်ရောရှင်းဖို့ဆိုတာ မဖြစ်နိုင်ဘူး...သူကအဲလောက်တောင် သန်မာရင် အနက်ရောင်မျှော်စင်က သူ့ကို အရင်ကတည်းကသတိထားမိမှာပေါ့ အခုမှ ဘာလို့ သူ့အကြောင်းကို ကြေညာရတာလဲ"

"အချိန်စီးဆင်းနှုန်းက မတူနိုင်ဘူး"

ဖူ၀မ်သော်ကဆိုလာလျှင် သူ့ကိုလှည့်ကြည့်လိုက်မိကြသည်။ ဖူ၀မ်သော်က ဆက်ပြောလာခဲ့သည်။

"မင်းရဲ့ တတိယထပ်တိုက်ခိုက်ဂိမ်းမှာ အပြင်ဘက်မှာ အချိန်၅ရက်ကုန်သွားပေမယ့် ဂိမ်းထဲမှာတော့ ၁ရက်ပဲမလား...အချိန်စီးဆင်းမှုနှုန်းက မတူဘူး...ကမ္ဘာပေါ်က နာရီ၂၀က ဂိမ်းထဲမှာ နာရီ၂၀မကတာလည်းဖြစ်နိုင်တယ်...ရက်၂၀ဖြစ်ရင်လည်းဖြစ်နေမှာ"

ထန်မော့ခေါင်းညိတ်လိုက်သည်။

"အဲလိုလည်းဖြစ်နိုင်တယ်"

လေးထပ်မြောက်ကို ရှင်းနိုင်မှုဖြစ်နိုင်ချေမှာ မဖြစ်နိုင်တာမဟုတ်သော်လည်း ဖြစ်နိုင်ချေအတော်နည်းနေခဲ့တာဖြစ်သည်။ ထိုမေးခွန်းကို လောလောဆယ်ဖြေနိုင်ကြဦးမည်မဟုတ်ချေ။ သူတို့အနေနှင့် ကစားသမားမှာ ယောကျာ်းမှန်း မိန်းမမှန်းတောင်မသိနိုင်သေးချေ။ ထိုပြဿနာကိုခဏဖယ်ထားပြီးနောက် မျှော်စင်အဆင့်မြှင့်တင်မှု ရပ်တန့်သွားရသည့်အကြောင်းကိုသာ ဆက်၍ဆွေးနွေးကြတော့သည်။

အနက်ရောင်မျှော်စင် ဗားရှင်း ၄.၀မှာ ကျိန်းသေပေါက်မြှင့်တင်ရမည်ပင်။ မည်သည့်အချိန်ပြန်လည်မြှင့်တင်မည်နှင့် အဘယ်ကြောင့် ရပ်တန့်သွားရသည်ကိုသာ မသိကြခြင်းဖြစ်သည်။

"ဘယ်လိုပဲဖြစ်ဖြစ် ကျွန်တော်တို့ ပြင်ဆင်ထားမှရမယ်...ကျွန်တော့်ခံစားချက်အရတော့ သိပ်မကောင်းဘူး"

ဥာဏ်ကြီးရှင်၏ တွေးခေါ်နိုင်စွမ်းကြောင့် ထန်မော့တည်ငြိမ်စွာဆိုနိုင်ခဲ့သည်။

"နောက်တစ်ကြိမ်အဆင့်မြှင့်တာက သိပ်ရိုးရှင်းမယ်မထင်ဘူး...၄ထပ်မြောက်ကိုရှင်းတဲ့ ကစားသမားတွေနဲ့ပတ်သက်နေလောက်တယ်...လောလောဆယ်ဂိမ်းကိုရှင်းထားတဲ့ ကစားသမားအများကြီးရှိမနေဘူး...ဒါပေမယ့် ၆ရက်အတွင်းမှာ အနက်ရောင်မျှော်စင်က ၃လအတွင်းမျှော်စင်ကိုမတိုက်ရသေးတဲ့ လူတိုင်းကို ဂိမ်းထဲဆွဲသွင်းလိမ့်မယ် အဲဒီအချိန်ကျရင် သေတဲ့သူတွေရော ရှင်ကျန်တဲ့သူတွေရော ပိုများလာမယ်...တတိယထပ်ကို ရှင်းပြီးတဲ့သူတွေလည်း ပိုများလာမှာပဲ..ဒီလိုဆို ၄ထပ်မြောက်ကိုရှင်းဖို့ပိုနီးစပ်သွားမယ်"

သူသည်ဖူ၀မ်သော်ကို ကြည့်လိုက်ပြီး ဖူ၀မ်သော်က သူ့ကိုကြည့်နေခဲ့သည်။ ၂ဦးသားမှာ စကားတစ်ခွန်းမှမဆိုသော်လည်း ဆိုလိုရင်းကိုနားလည်လေသည်။

လာမည့်ခြောက်ရက်အတွင်း မျှော်စင်တိုက်ခိုက်ဂိမ်းမှာ ကမ္ဘာပေါ်မှ ရှင်ကျန်ရစ်သော ကစားသမားများအတွက် စိန်ခေါ်မှုကြီးဖြစ်ပေလိမ့်မည်။

နောက်ဆုံးကျန်ရစ်သူ အမှိုက်ရှင်းလင်းရေးဂိမ်းတွင် ပါ၀င်ခဲ့သော ကစားသမားများမှ လွဲ၍ ကမ္ဘာတစ်၀ှမ်းမှ ကျန်ရစ်သော ကစားသမားများအားလုံး ထို၃လအတွင်း မျှော်စင်ကို အချိန်မီမတိုက်ခိုက်ခဲ့ပါက မည်သူမျှ မလွတ်မြောက်နိုင်ချေ။ ထိုဂိမ်းပြီးလျှင်ကမ္ဘာပေါ်တွင် ရှိနေသော ကစားသမားတိုင်း အနည်းဆုံး မျှော်စင်ပထမထပ်ကို ရှင်းလင်းပြီးဖြစ်လိမ့်မည်။ အားနည်းသူများက ရှင်းလင်းခံရပြီး သန်မာသူများသာ ရှင်ကျန်နိုင်မည်။

ထန်မော့ကဆိုလိုက်သည်။

"သူတို့နေရာမှာ ကျွန်တော်သာဆို ၆ရက်စောင့်ပြီး ဆွဲသွင်းခံရတာကို မစောင့်ဘူး"

ဖူ၀မ်သော်ကလည်းပြောလာခဲ့သည်။

"အနက်ရောင်မျှော်စင်ရဲ့ ၃ခုမြောက် သံမဏ်စည်းကမ်းက ကစားသမားတိုင်း မျှော်စင်ကို တိုက်ခိုက်ဖို့ ကြိုးစားရမှာလေ"

ထန်မော့သူ့ကို ကြည့်လျက် နှုတ်ခမ်းထောင့်တို့တွန့်ကွေးလာမိပြီးမှ သက်ပြင်းချလိုက်မိသည်။

"သူတို့နားလည်ကြမယ် မျှော်လင့်တာပဲ...အနက်ရောင်မျှော်စင်က နောက်ဆုံးကစားသမားတွေကို စစ်ထုတ်ပြီး နောက်ဆုံးကျန်ကစားသမားဂိမ်းမျိုးထုတ်လာနိုင်တယ်...ဆိုလိုတာက သူကမသိနားမလည်တဲ့ စက်တစ်လုံးသာသာမဟုတ်ဘူး...ကစားသမားတွေက ဒီ၆ရက်အတွင်း ကိုယ့်ဆန္ဒနဲ့ကိုယ် မျှော်စင်ကို မတိုက်ခိုက်ဘူးဆိုရင် ဆွဲသွင်းခံလိုက်ရတဲ့ ဂိမ်းက ပိုခက်ခဲမှာပဲ"

ဖူ၀မ်ရှန်းမှာ ၄င်းကိုကြားလျှင် တစ်ခုခုပြောရန် ပါးစပ်ကိုဖွင့်လိုက်ပြီးမှ ပြန်ပိတ်လိုက်ပြန်သည်။

ကမ္ဘာကြီးအွန်လိုင်းပေါ်တက်လာသည်မှာ ၅လကျော်လွန်သွားချေပြီ။ ထို၅လအတွင်းမျှော်စင်ကိုမတိုက်ခိုက်ရသေးသည့်သူတို့မှာ အားနည်းလွန်း၍ မျှော်စင်မှ ၄င်းတို့ကို သတိမထားမိခြင်းလည်းဖြစ်နိုင်သလို မျှော်စင်ကိုတိုက်ခိုက်ရန် သတ္တိမရှိသည်လည်းဖြစ်နိုင်သည်။ ထိုကစားသမားများမှာမျှော်စင်ကို ဆန္ဒအလျောက်တိုက်ခိုက်ခြင်းနှင့် အတင်းအကြပ်ဆွဲသွင်းခံရခြင်းကြားမှ ကွာခြားချက်ကိုသိမည်မဟုတ်ချေ။ သိလျှင်တောင် သူတို့ကိုယ်တောင် မျှော်စင်ကို စတင်တိုက်ခိုက်လိုလိမ့်မည်မဟုတ်။

၃ယောက်သားမှာ အေးစက်သောနံရံကိုမှီလျက် အမှောင်ထုထဲတွင် ခပ်ကုပ်ကုပ်ထိုင်ကာ မျက်လုံးများကို မှိတ်ထားခဲ့ကြသည်။

ဖူ၀မ်ရှန်းမှာ အိပ်ပျော်သွားခဲ့ပြီဖြစ်သော်လည်း ခံနိုင်ရည်ပိုကောင်းသော ဖူ၀မ်သော်နှင့်ထန်မော့မှာ အိပ်ချင်စိတ်မရှိကြချေ။

သူတို့သည်မျက်လုံးများကိုယ်စီမှိတ်လျက် အနားယူနေပုံပေါ်သော်လည်း ပတ်၀န်းကျင်ကို အပြည့်အ၀အာရုံစိုက်ထားလေသည်။ ထန်မော့သည် လေတိုးသံကအစ မိမိအနီးအနားမှ အသံပေါင်းစုံကို နားစွင့်ထားခဲ့သည်။ သူသည် ထျန်းရွှမ်အဖွဲ့အစည်းမှာ ဤညလာမတိုက်နိုင်ဟုဆိုထားသော်လည်း လုံ၀ကြီး အာမခံနိုင်သည်တော့မဟုတ်ချေ။ ထိုသူတို့ထပ်မံရောက်ရှိလာလျှင် ကြိုတင်ပြင်ဆင်ထားမှရလိမ့်မည်။

ကလေးငယ်၏ အသက်ရှုသံတိုးတိုးမှာ ညအမှောင်တွင် ကျယ်လောင်နေခဲ့သည်၊ ထန်မော့ထရပ်လျက် နံရံတစ်ခုဆီ သတိနှင့်လျှောက်သွားလိုက်သည်။ သူ လေတိုး၍ လှုပ်ခတ်သွားသော သစ်ကိုင်းတစ်ကိုင်းကို အတော်ကြာကြည့်နေပြီးမှ ကျောခိုင်းကာ ပြန်လှည့်လာခဲ့သည်။ သူနောက်သို့လှည့်လိုက်စဥ်မှာပင် ဖူ၀မ်သော်မှာ မျက်လုံးများပွင့်လျက် သူ့ကို စိုက်ကြည့်နေသည်ကို တွေ့လိုက်ရလေသည်။

အနက်ရောင်မျက်၀န်းများမှာ သူ့ထံတွင်စွဲကပ်လျက်။ ထန်မော့အသက်ရှူသံတို့တောင် ရပ်တန့်သွားသယောင်ခံစားလိုက်ရသည်။ ထန်မော့တည်ငြိမ်စွာ နေရာသို့ ပြန်လျှောက်သွားရန်ကြိုးစားလိုက်သည်။ သူ နဂိုနေရာတွင် ပြန်ထိုင်ချင်ခဲ့သော်လည်း ဖူ၀မ်ရှန်းမှာ ငြိမ်ငြိမ်အိပ်တတ်သူမဟုတ်ခဲ့။ သူသည်ကြမ်းပြင်ပေါ်လဲကျသွားပြီး ထန်မော့ထိုင်နေခဲ့သောနေရာကို အပြည့်အ၀ယူသွားတော့သည်။

ထန်မော့တန့်သွားမိပြန်သည်။

ဖူ၀မ်သော် သူ၏ဘေးမှ နေရာကို ပုတ်ပြလာခဲ့သည်။

"ဒီကိုလာ"

အေးစက်သော ညချမ်းတွင် အမျိုးသား၏ လေသံမှာ ပျင်းရိပျင်းတွဲဖြင့် နားထောင်ရကောင်းလှသည်။

ထန်မော့အမူအရာမပြောင်းလဲပဲ ထိုနေရာတွင်ပင် ထိုင်ချလိုက်သည်။ လူ၃ယောက်ထိုင်နေရာမှာ ထန်မော့ ရှောင်ဖူ ဖူ၀မ်သော်မှ ရှောင်ဖူ ဖူ၀မ်သော် ထန်မော့ အဖြစ်ပြောင်းလဲသွားခဲ့လေသည်။

ထန်မော့ထိုင်ချလိုက်ပြီးနောက် နေရာမှာ အတန်ငယ်ကြပ်တည်းလျက် သူ၏ပုခုံးထံမှ အပူဓါတ်ကိုခံစားလိုက်ရသည်။ လူ၂ဦး၏ ပုခုံးများမှာ အတူတကွကပ်နေခဲ့သည်။ ထန်မော့ဘေးသ်ို့ရွေ့ချင်ပါသော်လည်း နေရာလွတ်မရှိတော့ချေ။ ထပ်ရွေ့လိုက်ပါက သူ၏ ကိုယ်မှာ မှောင်ရိပ်မှ လွတ်သွားပြီး လရောင်အောက်သို့ ကျရောက်သွားပေတော့မည်။

"မင်းနည်းနည်းပိုညိုသွားသလိုပဲ ဘယ်လိုဖြစ်တာလဲ"

ထန်မော့ ဤအမျိုးသားထံမှ ဝေးဝေးဘယ်လိုရွေ့ရမည်ကို စဥ်းစားနေချိန် ၄င်းကိုကြားလိုက်ရခြင်းဖြစ်သည်။

"ညိုသွားတယ်ဟုတ်လား"

ဖူ၀မ်သော်က ထန်မော့ကိုလှည့်ကြည့်လာခဲ့သည်။

"အင်း...မင်းရဲ့နဖူးဆိုပိုသိသာတယ်"

ဖူ၀မ်သော်က ရုတ်တရက်လက်ကိုဆန့်ထုတ်လျက် ထန်မော့နဖူးမှ ဆံစများကို ထိလိုက်လေသည်။ ထန်မော့မှာ ထိုအထိအတွေ့ကို မမျှော်လင့်မိသဖြင့် မျက်လုံးများ၀ိုင်းစက်လျက် တစ်ကိုယ်လုံးတောင့်တင်းသွားမိသည်။ အမျိုးသား၏ လက်ချောင်းများက သူ၏နဖူးကို အသာပွတ်သပ်နေခဲ့သည်။

"တကယ်မဲနေတာပဲ ဒါကဘာတွေလဲ"

ထန်မော့လည်း ဖူ၀မ်သော်သူ၏နဖူးမှ ဖယ်ရှားလိုက်သော အမဲရောင် အစွန်းအထင်းများကိုကြည့်လိုက်သည်။ ထန်မော့ အတော်လေးအံ့အားသင့်သွားမိလေသည်။ သူက၄င်းကိုအနံ့ခံကြည့်ပြီးနောက် ချက်ချင်းနားလည်သွားခဲ့လေသည်။

"မီးခိုးနံ့ပဲ...ကျွန်တော်မှော်၀င်မြက်ခင်းပြင်မှာ နာရီပိုင်းလောက် မီး၀ိုင်းခံလိုက်ရလို့ ကြပ်ခိုးတွေ စွဲနေတာများလား..."

ဖူ၀မ်သော် လည်ချောင်းသံဖြင့် ခပ်တိုးတိုးရယ်လိုက်သော်လည်း လျင်မြန်စွာ ဖုံးကွယ်လိုက်သည်။

ထန်မော့"..."

ထိုအချိန်ကသူ့မှာ တခြားနည်းလမ်းမရှိခဲ့ချေ။ မီးကိုလည်းလွတ်အောင်မပြေးနိုင်၍ မီးတောက်ခွဲဖြာရာ နေရာတစ်ခုသာပြုလုပ်ခဲ့ရသည်။ ထို့ကြောင့်သူက နာရီအတော်ကြာ မီးခိုးမှိုင်းတိုက်ခံလိုက်ရခြင်းပင်။ အကယ်၍ ထန်မော့သာပို၍သန်မာလာခြင်းမဟုတ်ပါက ထိုအချိန်အတွင်း မီးခိုးမွှန်လျက်သေလျှင်သေ မသေလျှင် မီးလောင်ပြီး ပြာဖြစ်သွားလောက်ပြီဖြစ်သည်။

သူအနည်းငယ်မျှ ညိုသွားသည်က အကောင်းဆုံး ရလဒ်ဖြစ်နေဆဲပင်။

ထန်မော့သည် ဖူ၀မ်သော်ဆိုလျှင် ၄င်းကိုမည်သို့ဖြေရှင်းခဲ့မည်ကို စဥ်းစားနေခဲ့မိသည်။ အဆုံးတွင်တော့ ဤလူမှာ သူ့လိုလုပ်ခဲ့လိမ့်မည်မဟုတ်ဟူသော အမှန်တရားနှင့်ပင် နိဂုံးချုပ်လိုက်ရလေသည်။

ရုတ်ချည်း ရှောင်ဖူမှာ အိပ်မက်ယောင်လျက် စကားတွေဆိုလာခဲ့သည်။

ထန်မော့နှင့် ဖူ၀မ်သော်လည်း ရုတ်တရက်ဖြစ်၍ အနည်းငယ်လန့်သွားခဲ့သည်။ သူတို့သည်အိပ်ပျော်နေသောကလေးကို အတူကြည့်လိုက်မိကြသည်။

ထန်မော့ကရေရွတ်လိုက်သည်။

"ခင်များညီလေးက သဘောထားမဆိုးဘူးပဲ"

ဖူ၀မ်သော်ကမူ အနည်းငယ်မျှ ညှာမနေခဲ့။

"သူကငတုံးပါ"

ထန်မော့ကမူ ရှောင်ဖူအား အနည်းငယ်မျက်နှာသာပေးနိုင်ရန်ကြိုးစားနေဆဲပင်။

"သူကငယ်သေးတယ်လေ"

ဖူ၀မ်သော်လည်းသူ၏ညီဖြစ်သူကို သနားသောအားဖြင့် မျက်နှာသာပေးရန်ကြိုးစားလိုက်သည်။

"သူကသိပ်တော့မတုံးပါဘူး ရူးကြောင်ကြောင်လေးဖြစ်နေရုံပါပဲ"

ထန်မော့"..."

သူအတတ်နိုင်ဆုံးကြိုးစားခဲ့ပါတယ်...

ထို့အပြင် သူ ဤမျှအေးအေးချမ်းချမ်း အိပ်စက်နိုင်သော ဖူ၀မ်ရှန်းကို အနည်းငယ်မနာလိုဖြစ်မိသည်။ သူကတော့ မျက်လုံးမှိတ်လိုက်သည်နှင့် ထျန်းရွှမ်အဖွဲ့အစည်းအကြောင်းသာ ခေါင်းထဲရောက်လာခဲ့သည်။ ထို့အပြင် ဆန်းကြယ်သော မူဟွေ့ဟူသည့် ကစားသမားနှင့် ရပ်တန့်သွားသော အနက်ရောင်မျှော်စင် ၄.၀ဗားရှင်းလည်းရှိသေးသည်။ တွေးလေတွေးလေ သူ၏ဦးနှောက်ကနာကျင်လာလေပင်။

"မင်းကအရင်က စာကြည့်တိုက်မှူးလို့ ပြောခဲ့တယ်နော်"

ထန်မော့ကတုန့်ပြန်လိုက်သည်။

"အင်း ဘာလို့လဲ"

ဖူ၀မ်သော်က ခေါင်းအသာညိတ်လိုက်သည်။

"ကိုယ်လည်း ပေကျင်းစာကြည့်တိုက်ကို ခဏခဏသွားဖြစ်ပါတယ်"

သူကဆက်ပြောလာသည်။

"၁၈နှစ်မတိုင်ခင်အထိပေါ့"

ထန်မော့သူ၏ဆိုလိုရင်းကိုနားလည်လိုက်သည်။ ၁၈နှစ်မတိုင်ခင်က ဖူ၀မ်သော် တပ်ထဲမ၀င်သေးပေ။ ထိုစဥ်ကတဖက်လူမှာ သာမာန်အထက်တန်းကျောင်းသားတစ်ဦးသာဖြစ်ခဲ့လိမ့်မည်။ ထန်မော့ကမေးလိုက်သည်။

"ဘယ်စာအုပ်တွေဖတ်ရတာကြိုက်လဲ"

"စစ်တပ်ပိုင်းဆိုင်ရာ လက်နက်တွေနဲ့ စစ်ပွဲအကြောင်း"

ထန်မော့"..."

နည်းနည်းမှ သာမာန်ဆန်မနေဘူးနော်...

ဖူ၀မ်သော်ကမေးလာသည်။

"မင်းရော..."

ထန်မော့၏ ၀ါသနာများမှာ ခေတ်ရေစီးကြောင်းအလိုက်ဟုဆိုနိုင်သည်။

"ကျွန်တော်က စာပေနဲ့ ကွန်ပျူတာတွေကိုသဘောကျတယ်...ကျွန်တော်တကယ်တော့ကွန်ပျူတာတက်ချင်ခဲ့တာ..ဒါပေမယ့်ကျွန်တော့်အမှတ်တွေကအဲလောက် မမြင့်ခဲ့ဘူး"

🌍

Prev Next