Chapter 35

🐯Chapter 35

ကြော်ငြာလား...

ကုယွီမြန် အံ့ဩသွားသည်။ ကူညီပံ့ပိုး​ပေးသည့် စီမံကိန်းအသစ်များထဲမှ တစ်ခုက ကြော်ငြာရိုက်ကူးရန် အခွင့်အရေးဖြစ်လိမ့်မည်ဟု သူ မထင်ခဲ့မိ​ပေ။

"ငါက အင်တာနက်က နာမည်ကြီးတဲ့သူတစ်ယောက်နီးပါးဖြစ်နေပြီ…"

နှင်းကျားသစ်လေးက ကျောင်းသွားပြီဖြစ်​သော​ကြောင့် ပန်ဒါလေးနှင့်အတူ ကော်ဇောပေါ်တွင်ထိုင်နေသည့် ကုယွီမြန်က ပြောလိုက်သည်။

ထန်ယွမ်​လေးက သူနှင့်အတူ 'လက်ခုပ်တီးခြင်းကစားနည်း' ကို ပျော်ရွှင်စွာ ကစားနေသည်။ ကုယွီမြန် သူ့ကို မေးခွန်းများမေးလိုက်​သောအခါ အူ​ကြောင်ကြောင် ရယ်မောလိုက်ပြီး အသံသေးသေးလေးများ ပြုလုပ်လာသည်။ 

သူ၏နောက်ဆုံးဘဝတွင်မူ အွန်လိုင်းနာမည်ကြီးများ၏ အဓိက၀င်ငွေက အမှန်တကယ်တွင် ကြော်ငြာများမှ ရရှိခြင်းဖြစ်သည်။ ကြော်ငြာများက အလွန်အကျိုးရှိသည်။ ကုယွီမြန်က ထိုအကြောင်းကို အထက်တန်းကျောင်းသားဘဝတွင် သိခဲ့ခြင်းဖြစ်သည်။ ဒေါ်လာသန်းပေါင်းများစွာတန်သော ကြော်ငြာတစ်ခုက တစ်စုံတစ်ဦးအား ကိန်းဂဏန်းခြောက်လုံးအထိပေးကာ ရှန်ဟိုင်းမြို့လယ်ရှိ အိမ်တစ်လုံးကို နှစ်နှစ်ကြာ ငှားရမ်းခွင့်ရပေလိမ့်မည်။

သို့သော် ကြော်ငြာရိုက်ရန် တင်ဆက်သူတစ်​ယောက်ကို တိုက်ရိုက်ကမ်းလှမ်းခြင်းက ထူးဆန်းလှသည်။ 

ကြော်ငြာဆိုတာက အနုပညာရှင်​တွေ၊ မော်ဒယ်တွေနဲ့ပဲ ဖြစ်သင့်တယ်မလား...

ကုယွီမြန် ၎င်းကို နားမလည်နိုင်​ပေ။ သူ ကောင်းကောင်းမလုပ်နိုင်မည်ကို အနည်းငယ်စိုးရိမ်မိသည်။ အနည်းဆုံးအ​နေဖြင့် သူ့တွင် သက်ဆိုင်ရာ အတွေ့အကြုံများပင်မရှိ​ပေ။ ကုယွီမြန်က သကြားခဲ သကြားခဲကို  နောက်တစ်ကြိမ်ထပ်မေးပြီး​နောက် သူနားလည်သွားခဲ့သည်။

[သကြားခဲ သကြားခဲ: ဒီအမှတ်တံဆိပ်က အရမ်းကောင်းတယ်… အင်ပါယာသိပ္ပံအကယ်ဒမီ​ကျောင်းနဲ့လည်း သက်ဆိုင်ရာပူးပေါင်းဆောင်ရွက်မှု​တွေရှိတယ်… သူ့ရဲ့​ကျော်ကြားမှု အရည်အသွေးနဲ့ပတ်သက်ပြီး ပြဿနာမရှိဘူး… ဒါ​ပေမဲ့ လူထုကိုချပြတာနဲ့ ထိတွေ့ရတာက မျှ​ခြေမညီဘူးဖြစ်​နေတယ်… အဲဒါအပြင် ဒီကြော်ငြာရဲ့ဒါရိုက်တာက အရမ်းတင်းကျပ်လွန်းတယ်… မကြာသေးခင်က အွန်လိုင်းအား​ပေးသူ အများအပြားရှိတဲ့ အနုပညာရှင်​တွေ​တောင် ဒါရိုက်တာရဲ့မျက်လုံးထဲ မရောက်နိုင်လို့ သူတို့က တင်ဆက်သူတစ်​ယောက်ကို ရှာချင်ခဲ့တာ... နောက်ပိုင်း ကျွန်မတို့က မင်း အပါအဝင် တင်ဆက်သူတချို့ရဲ့ အချက်အလက်အားလုံးကို ပို့​ပေးခဲ့တယ်… ဒါရိုက်တာက မင်းကို ရွေးလိုက်တယ်…မင်းအတွက်လည်း အဆင်​ပြေသွားတာ​ပေါ့…]

[သကြားခဲ သကြားခဲ: ဒါက အခွင့်အလမ်းတစ်ခုလည်း ဟုတ်တယ်… မင်း အရမ်းကြီးစိတ်ပူနေဖို့ မလိုပါဘူး… ကြိုးစားကြည့်ရုံပေါ့… အောင်မြင်နိုင်တဲ့ အခွင့်အလမ်း​တွေက အများကြီးမရှိဘူး… တကယ်လို့ အောင်မြင်သွားရင်လည်း မင်းအတွက် ပိုပြီးကောင်းလာပါလိမ့်မယ်…]

[သကြားခဲ သကြားခဲ: လူသစ်​တွေရဲ့ပြိုင်ပွဲမစခင် ဆယ်ရက်ကျော်​လောက်လို​သေးတယ်… အခု မင်းလုပ်ရမဲ့ အဓိကတာဝန်က မင်းရဲ့တိုက်ရိုက်ထုတ်လွှင့်မှု ​ကျော်ကြားနှုန်းကို တည်ငြိမ်​အောင်ဆက်ထိန်းထားပြီး မင်း အချိန်အားတဲ့အခါ ဗီဒီယိုကို ရိုက်ကူးဖို့ပဲ…]

ဤအမှတ်တံဆိပ်က အမှန်တကယ်ကောင်း​ပေသည်။ သကြားခဲ သကြားခဲက လူထုကို ဆွဲ​ဆောင်သည့်လုပ်ငန်းစဉ်ကို မြင်​တွေ့ခဲ့ဖူးပြီးဖြစ်​သော​ကြောင့် ကုယွီမြန် အနိုင်ရအောင် ကူညီ​ပေးရန် ကြိုးစားလာသည်။ သို့သော် ထုတ်ကုန်အဆင့်နေရာချထားခြင်းက အမှန်တကယ် ဘက်လိုက်မှုရှိသောကြောင့် ပရိုမိုးရှင်းတစ်ခုအတွက် ပရိတ်သတ်ဘလော့ဂါ သန်းပေါင်းများစွာကို ရှာဖွေနိုင်ရန်မှာ မဖြစ်နိုင်သလောက်ပင်။

ထို့ကြောင့် ကုယွီမြန် ထိုသို့သောအခွင့်အရေးကို ရရှိလာသောအခါ ကြယ်တာရာ​ကောင်းကင်၏ ထိပ်တန်းတင်ဆက်သူများသည်လည်း ကန့်ကွက်ခြင်းမရှိကြ​တော့​ပေ။ သူတို့ထဲမှ အတော်များများက ကုယွီမြန်၏ကျရှုံးမှုကို တိတ်တဆိတ် စောင့်ဆိုင်းနေကြဆဲပင်။

သကြားခဲ သကြားခဲက ယခု ထိုကဲ့သို့ပြောလာ​သောအခါ ကုယွီမြန်၏နှလုံးသားက ပြန်လည်တည်ငြိမ်သွားသည်။

​ကြော်ငြာအတွက် လိုအပ်​သောပစ္စည်းများနှင့် အစီအစဥ်ကို သူ ​​တွေ့ပြီးပြီဖြစ်၍ မည်ကဲ့သို့ဖြစ်လာမည်ကို တွေးတောပြီးနောက် သူ့ဗီဒီယိုကို ဖန်တီးရန် စိတ်ဆုံးဖြတ်လိုက်သည်။ ကြယ်တာရာတည်းဖြတ်ခြင်း၏ နည်းပညာဆိုင်ရာ အကန့်အသတ်သတ်မှတ်ချက်က များစွာမြင့်မားလှ​ပေသည်။ လက်ပတ်ကွန်ပျူတာတစ်လုံးရှိ​နေသရွေ့ ပရိုဂရမ်အသစ်တစ်ခုကို လေ့လာခြင်းမပြုဘဲ ဖြတ်တောက်ပစ်နိုင်သည်။

သို့​သော် ​ဒေတာအချက်အလက်တစ်ခုကို သိုမှီးထား​သော ကွန်ပျူတာ၏ယူနစ်တစ်ခုက အတူတူပင်။

သောကြာနေ့မွန်းလွဲပိုင်းတွင် နှင်းကျားသစ်​လေးက ကျောင်းသွား​နေဆဲဖြစ်၍ ကုယွီမြန်နှင့် ပန်ဒါလေးတစ်ကောင်သာ ဗီလာတွင်ကျန်နေခဲ့သည်။

"ပထမဆုံးအနေနဲ့ ငါ့မှာ အနုပညာနဲ့သက်ဆိုင်တဲ့ ဦးနှောက်ဆဲလ်တစ်ခု​တော့ရှိရမယ်​လေ…"

ရက်အတော်ကြာ ရုန်းကန်ကြိုးစားခဲ့ရသော ဗီဒီယိုကိုကြည့်ပြီး ကုယွီမြန်က ကူကယ်ရာမဲ့စွာဖြင့် ​ပြောလိုက်သည်။ 

"ယွမ်ယွမ် ငါက အနုပညာနဲ့သက်ဆိုင်တဲ့လူလို့ ငါ​တော့မထင်ဘူး…"

ထိုဗီဒီယိုဖိုင်အတို​လေးက နောက်ဆုံး တိုက်ရိုက်ထုတ်လွှင့်မှုမှ ဖြစ်​ပေသည်။ သူ၏ ၃နာရီကြာ တိုက်ရိုက်ထုတ်လွှင့်မှုမှစ၍ ဇာတ်​ကြောင်း​ပြောပြသည့်ဖြစ်စဥ်တစ်ခုကို မပျက်စီးသွား​စေဘဲ ဇာတ်လမ်းတစ်ခုလုံးအတွက် လူများကို နားလည်ပြီး စာနာမှုဖြစ်စေရန် မိနစ်အနည်းငယ်ကြာ​သော အနှစ်သာရပြည့်ဝသည့် ဗီဒီယိုအနည်းငယ်ကို ထုတ်နုတ်ခြင်းက ခက်ခဲလှသည်။ ၎င်းက သူ၏မကျွမ်းကျင်သည့် အသိပညာနယ်ပယ်တစ်ခုဟု ကုယွီမြန် ထင်မိသည်။

ထန်ယွမ်​လေးက ကုယွီမြန်၏ ရင်ခွင်ထဲသို့ သိလိုစိတ်ပြင်းပြစွာဖြင့် တိုးဝင်လာပြီး အလင်းမျက်နှာပြင်ပေါ်တွင် ပြသထားသည့် အ​ချောမသတ်ရ​သေးသည့် ကုန်ကြမ်းဗီဒီယိုကို မော့ကြည့်လိုက်သည်။

ကုယွီမြန်က ဗီဒီယိုကိုတည်းဖြတ်ရန် ရက်အနည်းငယ်ကြာအောင် ​နောက်ကျသည်အထိနေခဲ့သည်။ သူက အိပ်ငိုက်လွန်း​သော​ကြောင့် သူ့မေးစေ့ကို ပန်ဒါလေး၏ခေါင်းပေါ်သို့တင်ကာ အနားယူလိုက်သည်။ ရလဒ်အနေဖြင့် သူ့မျက်ခွံများ လေးလံသထက် ​လေးလံလာပြီး နောက်ဆုံးတွင် အိပ်ငိုက်ခြင်းက အောင်နိုင်သွားခဲ့သည်။

ငါးမိနစ်ကြာပြီး​နောက်...

နောက်​ကျောကြိုးသိုင်းဘောင်းဘီဝတ်ဆင်ထားသည့် ကိုးနှစ်သားအရွယ်ပုံစံရှိသော ကလေးငယ်​လေးက ကုယွီမြန်၏ရင်ခွင်ထဲတွင် ထိုင်ကာ ​​ဘေးပတ်ပတ်လည်သို့ ဗလာသက်သက်ကြည့်နေသည်။ သူက ကုယွီမြန်၏ ရင်ခွင်ထဲတွင် ​ထွေး​ပွေ့ခံထားရ​ကြောင်း ပထမဦးဆုံး ခံစားလိုက်ရသည်။ ၎င်းက အစ်ကိုကြီးတစ်​ယောက်၏ ​ထွေး​ပွေ့ခြင်းကို ခံထားရသည်နှင့်တူပြီး အလွန်စိတ်လုံခြုံသွား​စေသည်။

ထို့နောက် သူ့လက်ချောင်းများကို မြင်လိုက်ရသည်။ 

ငါ အရင်ပုံစံ ပြန်ဖြစ်လာပြီလား...

ပုံမှန်အ​နေအထားသို့ မကြာခဏဆိုသလို ပြန်ဖြစ်သွားခြင်းက ဘဝသစ်တစ်ခုနှင့် ထူးခြားသည့် အတွေ့အကြုံတစ်ခုပင်။ ကောင်လေးက သူ့မျက်လုံးဝိုင်းဝိုင်းလေးများဖြင့် မျက်​တောင်ခတ်လိုက်သည်။ ခဏအကြာတွင် သူ၏မျက်လုံးများက အလင်းမျက်နှာပြင်ပေါ်တွင် လှုပ်ရှားနေသည့် ဗီဒီယိုကြောင့် ရုတ်တရက် ဆွဲဆောင်ခံလိုက်ရသည်။

အမ်...

အစပိုင်းတွင် ကောင်လေးက ပေါ့ပေါ့ပါးပါး ကြည့်နေခဲ့သည်။ ထို့နောက် သူ့အမူအရာက တဖြည်းဖြည်း လေးနက်လာသည်။

အချို့သော ပရိသတ်အ​ဟောင်းများ သိသည့်အတိုင်း ကောအာရှစ်စစ်၏ ဘွဲ့ကြိုလေ့လာမှုက သရုပ်​ဆောင်ဌာနတွင် မဟုတ်ဘဲ ညွှန်ကြားရေးဌာနတွင်ဖြစ်သည်။ သူက သူ့မျိုးနွယ်စု၏ သဘာဝအားသာချက်များနှင့် မိသားစုနောက်ခံကိုသာ အားကိုးသည်ဟု မကြာခဏပြောလေ့ရှိသော်လည်း ​ကောအာရှစ်စစ်က အမှန်တကယ် ပညာ​ရေးနောက်ခံရှိပြီး သူကိုယ်တိုင် ညွှန်ကြားကာ သရုပ်​ဆောင်ရိုက်ကူးထားသည့် မိုက်ခရိုဖလင်က တက်သစ်စဒါရိုက်တာဆုကို ရရှိခဲ့သည်။

မည်သည့်အရာက ကျောက်တုံးဖြစ်ပြီး မည်သည့်အရာက တကယ့်အစစ်အမှန်ဖြစ်သည်ကို သူပြောပြနိုင်​ပေသည်။

ဥပမာအားဖြင့် လက်ရှိ ၈ မိနစ်စာဗီဒီယိုတွင် အသံအနည်းငယ်ယိုင်ခြင်းနှင့် အချိန်ကိုက်မဖြစ်ခြင်းကဲ့သို့​သော ဟာကွက်အနည်းငယ်ကို ကျွမ်းကျင်ပညာရှင်များ တွေ့မြင်နိုင်သော်လည်း ထိုအချက်များကြောင့် ၎င်းက ကျောက်စိမ်းအပိုင်းအစ​လေး ဖြစ်သည်ဟူသောအချက်ကို ဖုံးကွယ်ထား၍မရပေ။ အ​ချောမသပ်ရ​သေး​သောကျောက်စိမ်းသည်လည်း ကျောက်စိမ်းပင်ဖြစ်သည်။

ကောင်လေးက အမှန်တကယ်ကို အသည်းယားလာ​သော​ကြောင့် သေးငယ်ပြီး မသိသာ​သော ပြောင်းလဲမှုအချို့ကို မပြုလုပ်ဘဲမ​နေနိုင်​တော့​ပေ။ အသံယိုင်ခြင်းနှင့် ​ရှေ့​နောက်ချိန်သားမကိုက်ခြင်းကို ဖယ်ရှားကာ ဗီဒီယို၏ကြာသည့်အချိန်အတိုင်းအတာကို တူညီ​စေရန် ကြိုးစားထိန်းသိမ်းခဲ့သည်။ ထို့​ကြောင့် မည်သည့်ကွာခြားချက်ကိုမျှ ကုယွီမြန် သတိပြုမိမည်မဟုတ်ပေ။

နာရီဝက်ကြာပြီး​နောက်...

ကုယွီမြန် နိုးလာသောအခါတွင် ပန်ဒါလေးက သူ့ရင်ခွင်ထဲတွင် အိပ်ပျော်နေပြီး အလင်းမျက်နှာပြင်ကလည်းအလိုအလျောက် ပိတ်သွားပြီဖြစ်သည်။ သူ ဗီဒီယိုကို တစ်ချက်ကြည့်ကာ သက်ပြင်းချမိပြန်သည်။ သူ အကြိမ်​ပေါင်းများစွာတည်းဖြတ် ပြောင်းလဲထားပြီးဖြစ်သည်။ သူ အမှန်တကယ်ကို ဤထက်ပိုပြီး မပြောင်းလဲနိုင်တော့​ပေ။ သူ ၎င်းကို သကြားခဲ သကြားခဲဆီ ဦးဆုံးပို့လိုက်မည်။ ​

နောက်ထပ် ဒီ ထိုဗီဒီယိုကို ပြန်မကြည့်နိုင်တော့ဘူး...

တင်း တောင်... 

ကြယ်တာရာ​ကောင်းကင်၏ ရုံးချုပ်တွင် သကြားခဲ သကြားခဲ၏ လုပ်ငန်းခွင်သုံး လက်ပတ်ကွန်ပြူတာက မီးလင်းသွားပြီး SMS မက်ဆေ့ခ်ျအသစ်တစ်ခု လက်ခံရရှိထားကြောင်း ​ဖော်ပြ​နေသည်။

ဖန့်ထန်က သူမကိုယ်တိုင် ကော်ဖီ​သွားဖျော်ရန် သူ့စားပွဲမှ ထွက်လာခဲ့သည်။ တွဲဖက်တစ်ဦးထံ ဖိုင်တစ်ခုကို လွှဲပြောင်း​ပေးနေဆဲဖြစ်သောကြောင့် လက်ပတ်ကွန်ပျူတာကို ဖွင့်ထားခဲ့သည်။

( T/N - ဖန့်ထန်က သကြားခဲ သကြားခဲရဲ့ နာမည်ရင်းပါ၊ ထန်က သကြားခဲဆိုတဲ့ အဓိပ္ပါယ်ဖြစ်တဲ့အတွက် သူ့ usernameကို သကြားခဲ သကြားခဲ လို့ ပေးထားတာပါ )

အမှန်တွင် ကြယ်တာရာ​ကောင်းကင်၏ဆာဗာကို အဆင့်မြင့်မွမ်းမံပြင်ဆင်နေဆဲဖြစ်သည်။ ကုမ္ပဏီ၏ သတင်းအချက်အလက် ​ဝေမျှ​ရေးကိုယ်ပိုင်ကွန်ရက်က တက်လိုက်ကျလိုက်ဖြင့် မတည်မငြိမ်ဖြစ်​နေသည်။ ကုယွီမြန် ပေးပို့လိုက်သော ဗီဒီယိုက သူမလုပ်ဖော်ကိုင်ဖက်၏ ​mailboxထဲသို့ တိုက်ရိုက်​ရောက်ရှိသွားတော့သည်။

ကော်ဖီသွားယူသွားသော ဖန့်ထန်က သူမ၏ကြီးကြပ်ရေးမှူးထံမှ ခေတ္တခဏ အ​ခေါ်ခံရကာ ကိစ္စအများအပြားကို ညွှန်ကြားခံခဲ့ရသည်။ သူမ ထိုင်ခုံသို့ ပြန်ရောက်သောအခါ စာတိုကဏ္ဍတွင် သူမ၏လုပ်ဖော်ကိုင်ဖက်ထံမှ မက်ဆေ့ချ်များ၏ ပေါက်ကွဲထွက်လာသံကြောင့် သူမ ထိတ်လန့်သွားသည်။

[မင်း ငါ့ကို အပိုဗီဒီယိုတစ်ခု ပို့လိုက်တယ်နော် မှားပို့လိုက်တာလား…] ၁၄:၄၀

[​တောင်းပန်ပါတယ် ကျွန်မ မတော်တဆ ပို့မိတာ… ကျွန်မ ဘာလို့မပိတ်​လိုက်မိရတာလဲ… အဲဒါက အပြင်ကိုမ​ပေါက်ကြားသင့်ဘူး…] ၁၄:၄၃ 

မိနစ်နှစ်ဆယ်ကြာ တိတ်ဆိတ်သွားပြီး​နောက်-

[မစ္စဖန့် ဒီဗီဒီယိုက တတ်သစ်စလူငယ်ဆုဖလားအတွက် တင်ပြလာတဲ့ဗီဒီယိုလား… ဒီဗီဒီယိုက ကျိန်း​သေ​ပေါက်ကို ပထမနေရာရမယ်ဆိုတာ သေချာတယ်…] ၁၅:၀၀

[ဆုဖလားအတွက် တင်ပြလာတာသာမဟုတ်ရင် ချက်ချင်းထုတ်လွှင့်လိုက်ဖို့ မင်း သူ့ကို အကြံပေးသင့်တယ်… အခုပဲ ငါတို့ အကြီးအကဲက မြင်ပြီးသွားပြီ… သူက "ကောင်းတယ်" ဆိုပြီး​တော့ကို တိုက်ရိုက်​ပြောလာတယ်... အခု သူ အသံပုံစံနဲ့ နည်းပညာ​တွေကို အကျဥ်းချုပ် ပိုင်းခြားစိတ်ဖြာနေတယ်…] ၁၅:၀၀

[ပြီးတော့ ငါက သိပ္ပံအကယ်ဒမီ​ကျောင်းမှာ အလုပ်လုပ်​နေတာ... အင်း ငါ့သူငယ်ချင်းလည်း ဒါကို မြင်ပြီးသွားပြီ… အခု ဗီဒီယိုကို အသံသွင်းရိုက်ကူးတဲ့လူက ဘယ်သူလဲလို့ မေးနေတယ် မင်း သိလား…] ၁၅:၀၀

သကြားခဲ သကြားခဲ: "......"

-----

အထက်တန်းလွှာမြို့ပြခရိုင်ရှိ သိပ္ပံအကယ်ဒမီ​ကျောင်း၌-

အဖြူရောင်ကုတ်အင်္ကျီ ၀တ်ဆင်ထားသည့် ချောမောခန့်ငြားသော လူငယ်လေးက ​ခေါင်း​ဆောင်​နေရာတွင် အမူအရာမဲ့စွာထိုင်​နေပြီး ကိုယ်ပိုင်လက်ပတ်ကွန်ပြူတာပေါ်တွင် လှုပ်ရှားနေ​သော ဗီဒီယိုကို ကြည့်နေခဲ့သည်။ သူ့အသွင်အပြင်က အလွန်ငယ်လွန်းလှသည်။ သူ့ပတ်ဝန်းကျင်ရှိ ဝန်ထမ်းများအားလုံးက အနည်းဆုံး အသက်တစ်ရာခန့်ရှိပြီဖြစ်သည်။ ​မြောက်များစွာ​သော အလင်းမျက်နှာပြင်များ လေထဲတွင် လွင့်မျောနေပြီး ဒေတာအမျိုးအစားအားလုံးက အရှိန်အပြည့်ဖြင့် လှည့်ပတ်နေသည်။ ရံဖန်ရံခါတွင် စမ်းသပ်ပြွန်များနှင့် ကိရိယာများ ​ပေါ့​ပေါ့ပါးပါး ပွတ်တိုက်သံများ ထွက်ပေါ်လာသည်။ ပတ်ဝန်းကျင်တစ်ခုလုံးက အလွန်လေးနက်ပြီး နည်းပညာဆိုင်ရာအာရုံများနှင့် ပြည့်နှက်နေသည်။

ဤသည်မှာ အင်ပါယာသိပ္ပံအကယ်ဒမီ​ကျောင်းပင်ဖြစ်၏။ 

ဤနေရာက အင်ပါယာတစ်ခုလုံးအတွက် အသိပညာ အောင်မြင်မှုအသီးအပွင့်များအားလုံး၏ တစ်ခုတည်းသောဗဟိုချက်တစ်ခုဖြစ်သည်။ အသစ်အသစ်​သော အောင်မြင်မှုများအားလုံးနှင့် အကြီးမားဆုံး​အောင်မြင်မှုများက နှစ်ပေါင်းတစ်ရာနီးပါးအတွင်း အင်ပါယာကြီးတစ်ခုလုံး၏ အရည်အချင်းရှိသူအားလုံးကို ထို​ကျောင်း​တော်ကြီးတွင် စုဆောင်း​ပေးခဲ့သည်။ ဤနှစ်တွင် အရွယ်ရောက်အသက်ပြည့်ပြီဖြစ်​သော ယင်းလူငယ်​လေးက သိပ္ပံအကယ်ဒမီ​ကျောင်း၏ အကြီးအကဲဖြစ်နေ​ပေပြီ။ သူက ဉာဏ်ကြီးရှင်များကြားတွင် ပါရမီရှင်ထူးချွန်သူတစ်ဦးဖြစ်သည်။

သူ ငယ်စဉ်တည်းက တစ်​ယောက်တည်း​နေထိုင်ခဲ့သည်။ ဤဆယ်​ကျော်သက်​လေးက ရက်သတ္တပတ်နှစ်ပတ်ခန့် အစာမစားဘဲ အာဟာရဓာတ်​ဖျော်ရည်များကိုသာ ​သောက်သုံးပြီး နေထိုင်ခဲ့​ကြောင်းကို သူ့မိဘများအပါအဝင် လူအနည်းငယ်သာ သိ​ပေသည်။ သူက ရည်ရွယ်ချက်ရှိရှိ အစားမစားခြင်းမဟုတ်ဘဲ အစာစားချင်စိတ်မရှိရုံမျှသာဖြစ်သည်။

ဆရာဝန်၏အဆိုအရ ၎င်းက ရေရှည်စိတ်ပိုင်းဆိုင်ရာဖိအားနှင့် သိပ္ပံအကယ်ဒမီ​ကျောင်း၏ ပြင်းထန်သိပ်သည်းသော အလုပ်များကြောင့် အစာစားချင်စိတ်နှင့် ရေရှည်အိပ်မပျော်ခြင်းအပါအဝင် အသက်ရှင်ရန်လုပ်ငန်း​ဆောင်တာများအတွက် သူ၏စိတ်ဆန္ဒအားလုံး ဆုံးရှုံးသွားခဲ့ခြင်းဖြစ်သည်။ သို့​သော် ယခုအခါ အလုပ်က အရေးကြီးသည့်အချိန်​ရောက်နေပြီ​ဖြစ်​သော​ကြောင့် ဤအချိန်တွင် သူ မနုတ်ထွက်နိုင်​ပေ။

ဤဗီဒီယိုက သူငယ်ချင်းတစ်ဦးထံမှ လွှဲ​ပြောင်း​ပေးလာခြင်းဖြစ်သည်။ စုစုပေါင်း ရှစ်မိနစ်ကျော်သာကြာသည်။ တစ်ကြိမ်ကြည့်ပြီးနောက် ၎င်းကို အလိုအလျောက် ပြန်လည်ပြသ​နေသည်။

၎င်းက သုံးဖက်မြင်ဗီဒီယိုတစ်ပုဒ်ဖြစ်ပြီး နောက်ခံ​တေးဂီတမှာ အလွန်နူးညံ့သိမ်မွေ့ပြီး ကြည်နူးစရာ​ကောင်း​သော လှိုင်းသံတစ်ခုပင်ဖြစ်သည်။ အစပိုင်းတွင် ပုံရိပ်က အနည်းငယ် မပီသမသဲကွဲ​သော အရောင်အတုံးများသာဖြစ်ပြီး တဖြည်းဖြည်း ရှင်းလင်လာကာ အစကနဦးအရောင်က တဖြည်းဖြည်း အ​ရောင်အ​သွေးစုံလင်​သောရုပ်ပုံ ဖြစ်လာသည်။ 

​နေဝင်ဆည်းဆာချိန်အလင်း​ရောင်၊ မီးပုံနှင့် တောင်လေများပင်...

မီးဖိုပေါ်ရှိ စွပ်ပြုတ်အိုးမြည်သံ၊ တောင်လေတိုက်သံနှင့် ပုစဉ်းရင်ကွဲ​အော်သံများကို သူ့နားထဲတွင်ကြား​နေရပြီး သူ့နှာဖျားထိပ်တွင် အရသာရှိ​သော အစားအ​သောက်အနံ့ကိုလည်း ရှူရှိုက်မိ​နေ​ပေသည်။ လူငယ်လေး၏ ရင်ခွင်ထဲတွင်ပွေ့ဖက်မှုက သူ့နှလုံးသားကို နူးညံ့ပျော့ပျောင်းသွားစေသည့် နားမလည်နိုင်သော စိတ်ကျေနပ်မှုတစ်ခုကို ပေးစွမ်းနိုင်ကာ လေဒဏ်၊ မိုးဒဏ်တို့ မကျူးကျော် မဝင်​ရောင်နိုင်သော ကမ္ဘာငယ်လေးတစ်ခုထဲအတွင်း ​ရောက်ရှိသွားသကဲ့သို့ပင်။

ဗီဒီယိုက ရုပ်ပုံငယ်များစွာကို တစ်ခုနှင့်တစ်ခု ချိတ်ဆက်ရန် သဲလွန်စအဖြစ် အ​ရောင်များကို အသုံးပြုထားသည်။

ဇာတ်​ကြောင်း သို့မဟုတ် စာသားများမပါရှိသည်မှာ ထင်ရှားသော်လည်း အလွန်အာရုံဖမ်းစားနိုင်စွမ်းရှိသည်။ လူတစ်​ယောက်၏ စိတ်ခံစားချက်များနှင့်အတူ အဆက်မပြတ် နစ်မြုပ်သွားခဲ့သည်။ တောင်ပေါ်ရှိ ညင်သာနူးညံ့ပြီး အကန့်အသတ်မရှိသော နွေရာသီညကို သူကိုယ်တိုင် ခံစားနိုင်သည့်ပုံပေါ်​နေသည်။ နေဝင်ရီတရောအချိန်တွင် ကောင်းကင်ယံတခွင်၌ ကြယ်​လေးများ လင်းလက်​တောက်ပနေသည်။ ထို့နောက် ချိုမြသော ဖရဲသီးကိုစားကာ ညကောင်းကင်ယံအောက်တွင် စကားစမြည်ပြောကြမည်။ ၎င်းသည် ပြောပြ၍မရနိုင်​သော ဇာတ်လမ်းတစ်ပုဒ်ပင်။

သို့​သော် ၎င်းသည် ပြီးပြည့်စုံသွားပြီဟု မခံစားရ​ပေ။ တစ်စုံတစ်ရာသည် ပျောက်ဆုံးနေပြီး ထူးဆန်း​နေကာ မပြီးဆုံးသေးသလိုပင်။ ခါးသီးချိုမြိန်မှုနှင့်အတူ ပုစဉ်းရင်ကွဲများ ​အော်မြည်ခြင်း မပြုခင်မှာပင် အရာအားလုံးသည် ပြီးဆုံးသွားရန် အလျင်လိုနေသည်။

ထိုကဲ့သို့​သောလေထုအ​ခြေ​နေတွင် လျှို့ဝှက်ဖုံးကွယ်ထားသော အရာတစ်ခုကို သူ အရသာခံနိုင်​ပေသည်။ ဟင်းရည်များ လျှံကျမည့်အ​ခြေအ​နေကို ​စောင့်ဆိုင်းရင်း ဤညက စိတ်ခံစားချက်များကို လှုပ်ရှားသွားစေခဲ့သည်။

ဘန်း…

ကြိုတင်ပြင်ဆင်မထားသော ရောင်စုံမီးရှူးမီးပန်းများ ပေါက်ကွဲထွက်လာသည်။

များပြားလှသော အရောင်များနှင့် ရုပ်ပုံများက မြင်ကွင်းထဲသို့ အရှိန်အဟုန်ဖြင့် ဝင်ရောက်လာကာ ထိုအချိန်တွင် စန္ဒယားသံသည်လည်း ကြားဖြတ်ဝင်​ရောက်လာသည်။ စန္ဒယားသံက ငြိမ့်ညောင်းစွာ စီးဆင်း​နေသည့် ​ရေသံများနှင့်တူလှပြီး ကမ္ဘာကြီးတစ်ခုလုံးကို ပွေ့ဖက်ထားကာ ကမ္ဘာ​မြေ​ပေါ်သို့ မီးပွားများ ကျဆင်း​နေသကဲ့သို့ပင်။ ထိုအချိန်တွင် ဤရာသီ၊ ယင်းညနှင့်ဆက်စပ်​နေ​သော ခံစားချက်များအားလုံးကို လွတ်​မြောက်သွား​စေသည်။

ထိုအချိန်က အံ့အားသင့်မှုမှာ စကားနှင့်ပင် ​ပြောပြ၍မရနိုင်​အောင်ပင်။

ဒီရေတက်လာပြီးနောက် ဂီတသံက နူးညံ့သိမ်မွေ့လာပြီး အဆုံးသတ်သို့ ရောက်ရှိလာသည်။ ​နောက်ဆုံးရိုက်ချက်၏ အရှေ့စာမျက်နှာတွင် "နွေရာသီ" ဟူသောစကားလုံးပါရှိသည့် စာအုပ်ပေါ်တွင်ဦးတည်ထားခဲ့သည်။

သွယ်လျသည့်အဖြူရောင်လက်တစ်စုံက စာအုပ်ကိုပိတ်လိုက်ပြီး​နောက် ဗီဒီယိုက ရုတ်တရက်ရပ်သွားသည်။

"..."

သိပ္ပံအကယ်ဒမီ​ကျောင်းတွင် ကောင်လေးက သူ့မျက်လုံးများကိုမှိတ်ထားလိုက်သည်။

အချိန်ကြာမြင့်စွာ မခံစားခဲ့ရသော အိပ်ငိုက်ခြင်းနှင့် အစာစားချင်စိတ်ကို ခံစားရပြီး ယခင်က မခံစားဖူး​သော သူ၏​ဟောင်း​လောင်းဖြစ်​နေ​သောဗိုက်က အပြင်းအထန်တုန်ခါ​နေပြီး သတိ​ပေး​နေ​ပေသည်။ သူက ဗီဒီယိုထဲသို့ ဝင်သွားပြီး လူငယ်​လေး၏ပွေ့ဖက်ခြင်းကိုပင် ခံချင်မိသည်။ ကြက်သားကို မြည်းစမ်းကြည့်ကာ စွပ်ပြုတ်ပျစ်ပျစ်​လေး အရသာရှိမရှိကိုလည်း သိချင်လှသည့်အပြင် ဖရဲသီး​အေး​အေး​လေးကို စားချင်လှသည်။

ဤခံစားချက်မျိုးက ထင်မှတ်မထား​လောက်​အောင်... အလွန်ကောင်းလှသည်။

အချိန်အတော်ကြာပြီးနောက် နောက်ဆုံးတွင် သူ ပြန်လည်ရှင်သန်လာခဲ့​ပေပြီ။

🐯🐯🐯