MM Story Teller

Chapter 42

Viewers 4k

🐯Chapter 42

လူသစ်ပြိုင်ပွဲစတင်ပြီး နာရီဝက်အကြာ ခြောက်နာရီခွဲတွင် ကြည့်ရှုသူပရိသတ် ၁သိန်းအထိ ရှိလာခဲ့သည်။

ကြယ်တာရာမြို့တော်တစ်ခုလုံး၏ ဤမျှများပြားသောလူဦးရေဖြင့် တွက်ကြည့်လျှင် အလွန်များပြားပုံမပေါ်သော်လည်း ကုယွီမြန် ယခု တိုက်ရိုက်ထုတ်လွှင့်နေသည်မှာ နာရီဝက်ခန့်သာရှိသေးသည်။

ထုတ်လွှင့်ခြင်းဆိုင်ရာ စည်းမျဉ်းများနှင့် ရင်းနှီးသူတိုင်း မည်သည့်အရာများဖြစ်ပျက်နေသည်ကို သိကြပေသည်။

{ထုတ်လွှင့်မှုမစတင်မီ နာရီဝက်အလိုသည် သာမန်အကြံပြုသူများနှင့် အတုအယောင် အကြံပြုသူများအား စီစစ်ရှာဖွေသည့်ကာလဖြစ်သည် }

ထုတ်လွှင့်မှုမစတင်မီ နာရီဝက်အလိုတွင် တိုက်ရိုက်ထုတ်လွှင့်သည့်အခန်းက စနစ်ထဲသို့ ၀င်ရောက်မည်မဟုတ်သောကြောင့် ၎င်းကို ထည့်သွင်းစဥ်းစားလိမ့်မည်မဟုတ်ပေ။ ယေဘုယျအားဖြင့်ပြောရလျှင် တိုက်ရိုက်ထုတ်လွှင့်သည့်အခန်းထဲသို့ အချိန်ကိုက်ဝင်ရောက်လေ့ရှိသော ပရိတ်သတ်ဟောင်းများမှလွဲ၍ ဤအချိန်၌ ပရိသတ်များက တဟုန်ထိုးတက်လေ့ရှိပြီး ပရိသတ်အရေအတွက်မှာ နာရီဝက်အတွင်း တည်ငြိမ်သွားတတ်သည်။

လူသစ်တင်ဆက်သူတစ်ဦးအနေဖြင့် ကုယွီမြန်တွင် ယခင်ကရှိသော ပရိသတ်အဟောင်းများက တစ်သိန်းထက် နည်းပေသည်။

အဆိုပါကြော်ငြာ၏ကျော်ကြားမှုနှင့် ကြယ်တာရာကောင်းကင်၏ တရားဝင်လူသိရှင်ကြားထုတ်ပြန်ခြင်းက အမှန်တကယ်ပင် အသုံးဝင်သော်လည်း ၎င်က ယမန်နေ့ညကထက် စွမ်းအားကြီးနိုင်လိမ့်မည်မဟုတ်ပေ။ ထို့အပြင် နာရီဝက်သာ ရှိသေးသည်။ လူအတော်များများက ကုယွီမြန် တိုက်ရိုက်ထုတ်လွှင့်နေကြောင်း မသိခဲ့ကြပေ။

တာ့ခ်ဂြိုဟ်ပေါ်တွင် ခီရီက သူမလက်ချောင်းများဖြင့် ဒေတာကို ရေတွက်နေခဲ့သည်။

"ပရိသတ် ၁၀၀,၀၀၀ ထဲက ၈၀,၀၀၀ လောက်က မြို့တော်ကနေရလာတဲ့ ပရိသတ်အသစ်တွေပဲ… ဒီအရှိန်နဲ့ဆိုရင် တစ်နာရီအတွင်း ပရိသတ်တစ်သန်းကျော်ဖို့တောင် ပြဿနာရှိမှာမဟုတ်ဘူး…"

တစ်နာရီအတွင်း တစ်သန်းကျော်ဆိုတာက ဘယ်လိုကောက်ချက်ချလိုက်တာလဲ...

အကြံပြုသည့်အနေအထားအပြီးတွင် ပရိသတ်အသစ်များ ဝင်လာမည်ဖြစ်သည်။ ယေဘုယျအကြံပြုထားသည့်အဆင့်က ပထမတစ်နာရီအတွင်း စတင်မည်ဖြစ်သည်။ ပထမဦးစွာ နောက်ဆုံးတိုက်ရိုက်ထုတ်လွှင့်မှုတွင် စတင်လိမ့်မည်။ ထို့နောက် အခြားတင်ဆက်သူများနှင့် နှိုင်းယှဥ်ရန် 'အချိန်နှင့်တစ်ပြေးညီ လူကြိုက်များမှုစာရင်း' နှင့် 'ယခုလက်ရှိ လူကြိုက်များမှုစာရင်း' များအတွက် ကျော်ကြားမှုရေတွက်သည့် ကွန်ပျူတာစနစ်ဖြင့် ရေတွက်ကာ စနစ်က အဆင့်များလျာထားမှုကို ခွဲဝေသတ်မှတ်ပေးလိမ့်မည်။

လက်ရှိတွင် ကြယ်တာရာတစ်ခုလုံးရှိ အဓိကကြော်ငြာများ၏ အသိအမှတ်ပြုခံရပြီး ဖြစ်ရပ်မှန်ရှိုးပွဲများတွင် ပုံမှန်လာရောက်လည်ပတ်သူဖြစ်သည့် ထိပ်တန်းတင်ဆက်သူက ပျမ်းမျှပရိသတ် သန်း ၅၀ ခန့်အထိ ထိန်းထားနိုင်ခဲ့သည်။ ပထမတစ်နာရီအတွင်း ပရိတ်သတ်အဟောင်းများအပြင် ရာနှင့်ချီသော ပရိသတ်များလည်း ရှိပေလိမ့်မည်။

သို့သော် ကုယွီမြန်က လူသစ်တစ်ယောက်ဖြစ်၏။

တာ့ခ်ဂြိုဟ်ပေါ်ရှိ လူတော်တော်များများက သူတို့ မူးမေ့လဲသွားမည်ဟုပင် ထင်ခဲ့ကြသည်။

တိုက်ရိုက်ထုတ်လွှင့်သည့်စတူဒီယို၌ ရလဒ်များ သို့မဟုတ် ပြင်ပမှမှတ်ချက်များက ကုယွီမြန်အပေါ်တွင် သက်ရောက်မှုမရှိခဲ့ပေ။ စည်းချက်များက တည်ငြိမ်နေဆဲဖြစ်သည်။

-----

အနီရောင် တုန်းဖိုဝက်သားဟင်းအပိုင်းအစများကို အဖြူရောင်ကြွေပန်းကန်လုံးထဲရှိ ကြာရွက်ပေါ်တွင် သပ်သပ်ရပ်ရပ်ချထားကာ အပေါ်မှ ဆော့စ်အရည်ပျစ်ပျစ်ကို လောင်းချလိုက်ပြီး အလင်းရောင်အောက်တွင် တောက်ပကာလှပနေသည်။ ကြာရွက်နှင့်အတူ သကြားခဲ ဝိုင်ဖြူတို့နှင့် ရောစပ်ထားပြီး ချိုမြိန်ကာနူးညံ့သော ဝက်ဗိုက်သားက ကြည့်ရှုသူပရိတ်သတ်များအား ကိုယ်ပိုင်လက်များဖြင့် ကောက်ယူစားသောက်ချင်သည့်စိတ်များ ဖြစ်ပေါ်လာစေသည်။

တူကိုသုံးလိုက်သောအခါ ဝါးတူ၏ကိုယ်ထည်က ဝက်သားထဲသို့ အနည်းငယ်မြုပ်သွားပြီး နူးညံ့မွှေးပျံ့သောဆော့စ်အရည်က တူများအောက်သို့ စီးကျလာသည်။

ကုယွီမြန်က သေးငယ်သောကြွေဇွန်းလေးနှင့် လဲလှယ်လိုက်ပြီး ဇွန်းဖြင့် တုန်းဖိုအသား သေးသေးလေးတစ်ပိုင်းကို ကောက်ယူကာ အေးသွားအောင်မှုတ်လိုက်ပြီး နှင်းကျားသစ်လေးအား ကျွေးလိုက်သည်။

"ထွမ်ထွမ် ငါ့လက်ရာကို လာမြည်းကြည့်ပါလား… ပူမယ်သတိထားနော်…"

တုန်းဖိုဝက်သားဟင်းက ကုယွီမြန်၏အကောင်းဆုံး ဟင်းလျာများထဲမှ တစ်ခုဖြစ်ပြီး သူက ထိုဟင်းကို အထူးကျွမ်းကျင်ပေသည်။ သူ လလေးနှစ်သားခန့်တည်းက အဘိုးအဘွားများနှင့်သာ နေခဲ့ရသည်။ မျက်လုံးမှိတ်ထားလျှင်ပင် "အသားကို ဘယ်လိုလှီးရမလဲ၊ မှန်ကန်တဲ့ဟင်းခတ်အမွှေးအကြိုင်တွေကို ဘယ်လိုရွေးရမလဲ၊ အပူချိန် ဘယ်လောက်ထားရှိဖို့ လိုအပ်လဲ" ဟူသည့် အရာအားလုံးကို သူ သိပေသည်။

နှင်းကျားသစ်လေးက သူ့ကို စိုက်ကြည့်ရင်း ကြွေဇွန်း၏လက်ကိုင်ကို ဆွဲယူလိုက်ပြီး သူ့လက်သည်းကို ဆန့်ထုတ်လိုက်ကာ ကုယွီမြန်၏လက်ကောက်ဝတ်ကို ဖိလိုက်သည်။ ထို့နောက် ခေါင်းကိုငုံ့ကာ ဂရုတစိုက် မြည်းစမ်းကြည့်လိုက်သည်။

သူ့နှုတ်ခမ်းများနှင့် သွားများအကြား ပထမဆုံးပျံ့နှံ့သွားသည့်အရာမှာ သကြားခဲနှင့် ဝက်ဗိုက်သား၏ လတ်ဆတ်ပြီး ချိုမြနူးညံ့သောအရသာပင်ဖြစ်သည်။

အဆီတစ်ဝက်နှင့် ပါးလွှာသောအသားတစ်ဝက်ကို ပေါင်းထားပြီး သကြားနှင့်ဝိုင်ရောထားသောအရည်ထဲတွင် နှစ်ထားသည်။ ၎င်းက ကြွပ်ရွနေသော်လည်း ကြေမွမနေပေ။ ချိုမြိန်ပြီးစေးကပ်နေသော်လည်း အဆီမပါပေ။ ဆော့စ်အရည်က ချိုမြိန်ကာ အရသာရှိသော ဝက်သားထဲတွင် အရည်ပျော်ဝင်သွားသည်။ ဂရုတစိုက်ရွေးချယ်ထားသော အသားပိုင်းများက ပါးလွှာပြီးနူးညံ့သည်။ ကိုက်ယူရန် အင်အားအနည်းငယ်စိုက်ထုတ်ရန်ပင် မလိုအပ်ပေ။ ပထမတစ်ကိုက်၏အရသာက ချက်ချင်းအံ့အားသင့်စရာကောင်းလှသည်။

စက္ကန့်အနည်းငယ်ကြာပြီးနောက်-

နှင်းကျားသစ်ငယ်လေး၏ အမြီးရှည်က လေထဲတွင် ရပ်သွားပြီး ပိုမိုမြန်ဆန်စွာ လွှဲရမ်းလာသည်။ ကျေနပ်စွာဖြင့် သူ၏ခဲပြာရောင်မျက်လုံးများကို စွေကြည့်ပြီး ကုယွီမြန်၏လက်ကို လှမ်းဆွဲလိုက်သည်။

နောက်ထပ်တစ်ကိုက်လောက်…

[အစိမ်းရောင်ခို: အား အား အား အား အား အား ဒါက တကယ်ကြီးလား… နူးညံ့တယ်၊ အရသာရှိတယ်၊ ရိုးသွားမှာမဟုတ်ဘူး… ငါ့လျှာကိုတောင် မျိုချလုနီးပါးပဲ…]

[ဂျူနီယာ ဘီ: ငါစိတ်ကူးထားတာထက်တောင် ဘယ်လိုလုပ် အရသာပိုကောင်းနေရတာလဲ… အစ်ကိုရေ... ငါ ခေါင်းမူးသွားပြီ… စောစောစီးစီး ကြိုနှုတ်ဆက်ထားချင်တယ်… ]

[တိမ်လေးတစ်ခုရှိတယ်: ဂုဏ်ယူဝင့်ကြွားပြောဆိုဖို့ စကားလုံးတွေ မစဉ်းစားနိုင်လောက်အောင်ကို အံ့သြစရာကောင်းတယ်… တကယ်အရသာရှိပြီး ပြောမပြတတ်လောက်အောင်ပဲ… ဒီဟင်းက ကောင်းကင်ဘုံမှာပဲ ရှိသင့်တယ်… ငါတို့ရဲ့လေးစားမှုကို ဖော်ထုတ်ပြသဖို့ မီးရှူးမီးပန်းတွေ ပစ်ဖောက်ရုံနဲ့ မလုံလောက်တော့ဘူး… ဒီမှာ မင်းအတွက် မီးရှူးမီးပန်းငါးခု…]

[မိုင်းတွင်းထဲမှာ မိသားစုတစ်စုရှိတယ်: မြန်မြန်ရေ နောက်ထပ် တုန်းဖိုအသားတစ်ပိုင်းပေးပါဦး… မြန်မြန်ရဲ့ တိုက်ရိုက်ထုတ်လွှင့်မှုကို ကြည့်ပြီး အဆင့်မြင့် စားသောက်ဆိုင်က ကြက်ကြော်က ရုတ်တရက် မကောင်းတော့သလိုပဲ QAQJ]

[ထိပ်ပြောင်သိပ္ပံသုတေသနခွေး: ငါ့အစ်ကိုအကြီးဆုံးက ဒီတိုက်ရိုက်ထုတ်လွှင့်မှုကို ကြည့်ပြီး ထမင်းအဖြူကိုပဲ စားနေတယ်… သူ အရမ်းအပိုလုပ်တယ်လို့ ထင်နေခဲ့တာ… ငါ အပေါ်တက်ပြီး ကြည့်လိုက်တယ်... ခုတော့... ငိုးပဲ၊ ငါ့ကို သဲတစ်အိုးသာပေး၊ မြိန်ရေယှက်ရေနဲ့ကို စားနိုင်တယ်…]

တစ်ချိန်တည်းမှာပင် မှတ်ချက်များစွာ ထွက်ပေါ်လာပြီး လက်ဆောင်ပေးပို့သည့် အထူးပြုလုပ်ချက်မြင်ကွင်းများပါ တစ်လှည့်စီ ပေါက်ကွဲထွက်လာသည်။ ပရိသတ်များ ပြောနေသည်များကို ကုယွီမြန် လုံးဝ မမြင်ရတော့ပေ။ မှတ်ချက်များ ရပ်ဆိုင်းရန်ကြိမ်နှုန်းကို သတ်မှတ်ပေးထားသော်လည်း အထောက်အကူမဖြစ်သောကြောင့် ကုယွီမြန်ကို အနည်းငယ် ကူကယ်ရာမဲ့စေခဲ့သည်။

ယခုအချိန်တွင် ကုယွီမြန် အချက်အလက်များကို ဂရုမစိုက်အားသေးပေ။ ထိုသို့မဟုတ်လျှင် ကောင်းမွန်သည့် အကြောင်းအရာများနှင့် တဟုန်ထိုးမြင့်တက်လာသည့် ပရိတ်သတ်များကြောင့် မျက်နှာပြင်ပေါ်တွင် မှတ်ချက်များ များစွာပေါ်လာရသည်ကို သူ တွေ့ပေလိမ့်မည်။

အကာအကွယ်အချိန် နာရီဝက်ပြီးနောက် ကုယွီမြန်က နေထိုင်ရာနယ်မြေ၏ အချိန်နှင့်တပြေးညီ လူကြိုက်များစာရင်းတွင် စာရင်းဝင်ခဲ့ပြီး ဤအဆင့်များလျာထားမှု၏ လမ်းကြောင်းက ကုယွီမြန်၏ တိုက်ရိုက်ထုတ်လွှင့်မှုအခန်းသို့ စတင်ဦးတည်သွားစေခဲ့သည်။ ခြောက်နာရီခွဲမှ ယခုအချိန်အထိ မိနစ်အနည်းငယ်အတွင်း ပရိသတ် သောင်းနှင့်ချီ တိုးလာခဲ့သည်။

ခီရီ မှန်းဆထားသည့်အတိုင်း တစ်နာရီအတွင်း သန်းပေါင်းများစွာသောလူများက ကြည့်ရှုနေပေလိမ့်မည်။

"စိတ်မပူပါနဲ့ ဒီနေ့ ငါ အများကြီးလုပ်ထားတယ်… ဒါကြောင့် မင်း ဖြည်းဖြည်းစားလို့ရတယ်…"

ကုယွီမြန်က နှင်းကျားသစ်လေး၏မေးစေ့ကို ကုတ်ခြစ်ပွတ်သပ်ပေးလိုက်သည်။ သို့သော် ပန်ဒါပေါက်လေးက သူ့နို့ဘူးကို ကိုင်ထားလျက် အလွန်သိချင်နေခဲ့သည်။ လက်ကို ဆန့်ထုတ်ကာ ကုယွီမြန်၏လက်မောင်းကို ဆုပ်ကိုင်လိုက်ပြီး သူ့အား ခွံကျွေးရန်တောင်းဆိုလိုက်သည်။

ကုယွီမြန် အခြားဘာကိုမှ လုပ်နိုင်တော့ပေ။ ထန်ယွမ်လေး၏ ဆွဲဆောင်မှုကို မည်သူကမှ မခုခံနိုင်ပေ။ နှင်းကျားသစ်လေး၏ ဒေါသထွက်နေသောအကြည့်အောက်တွင် သုက ပန်ဒါလေး၏ခေါင်းကို ပုတ်ပေးလိုက်ပြီး ခွံကျွေးရန် တုန်းဖိုဝက်သားသေးသေးလေးတစ်ပိုင်းကို လှီးဖြတ်လိုက်သည်။

"အီ…"

ခဏအကြာတွင် ထန်ယွမ်လေးက မျက်လုံးများပြူးကျယ်သွားပြီး အရသာရှိကြောင်း ဖော်ပြရန် သူ၏ဗိုက်ဖြူဖြူလေးကို လှုပ်ရမ်းလိုက်သည်။ ကုယွီမြန် သူ့နှာခေါင်းကိုယ်သူ ကုတ်ခြစ်လိုက်သည်။

"ကောင်းပြီ… ယွမ်ယွမ် မင်းက မင်းရဲ့ နို့ကိုပဲ သောက်သင့်တယ် အစာမကြေဖြစ်မှာကို ဂရုစိုက်ဦး…"

အဓိကဟင်းလျာအဖြစ် တုန်းဖိုဝက်သားဟင်းအပြင် မျှစ်မွှေကြော် ဟင်းလျာကိုလည်း ကုယွီမြန် ချက်ကျွေးခဲ့သည်။ ထိုဟင်းက ချက်ရလွယ်ပေ၏။ မျှစ်ကို ရေဆေး၊ ပါးပါးလှီးကာ ရေနွေးဆူဆူထဲတွင် ခေတ္တနှစ်ထားလိုက်သည်။ ထို့နောက် ချက်ချင်း ရေအေးထဲသို့ထည့်ကာ အခြောက်ခံသည်။ ပြီးနောက် သံလွင်ဆီဖြင့် အပူပေးကာ ကြက်သွန်နီနှင့် ဆားအနည်းငယ်ထည့်ပြီး မျှစ်ကို တိုက်ရိုက်မွှေကာ ကြော်လိုက်သော်လည်း အရသာက ထူးကဲလှသည်။

မျှစ်မွှေကြော်၏ ထူးခြားသောလက္ခဏာရပ်များမှာ လတ်ဆတ်ပြီး အရသာထိမိလှကာ လုပ်ရလည်းလွယ်ပြီး လန်းဆန်းစေသည်။ အချိုကဲလွန်းပြီးနူးညံ့ကာ မွှေးကြိုင်လှသော တုန်းဖိုအသားဟင်းကို စားပြီးနောက် လန်းဆန်းပေါ့ပါးသော်လည်း အရသာရှိလှသော မျှစ်ကြော်ကို မြည်းစမ်းကြည့်လိုက်လျှင် အရသာသည် လုံးဝထူးခြားပေလိမ့်မည်။

၎င်းက အလွန်အရသာရှိသည်ဟု ကုယွီမြန် ထင်မိသည်။ ဝေဖန်ချက်များ၏ တန်ပြန်သက်ရောက်မှုများသည်လည်း အလွန်ကောင်းလှ၏။ နှင်းကျားသစ်လေးက မသိစိတ်မှပင် ကုယွီမြန်၏ လက်ဖဝါးအောက်ရှိ သူ့ခေါင်းကို ဆန့်ကြည့်လိုက်သည်။

[ဗီဗီယန်: တုန်းဖိုဝက်သားက အရမ်းအရသာရှိတယ်… ဒါပေမဲ့ တင်ဆက်သူက ထန်ယွမ်ငယ်လေးအတွက် သီးသန့်ကာကွယ်ရေးဆက်တင်တွေ တပ်ဆင်ပေးထားတယ်ဆိုတာကို ငါ အခုမှ သဘောပေါက်သွားတယ်…အခုအချိန်ထိ ထန်ယွမ်လေးက ဘယ်လိုတိရိစ္ဆာန်အမျိုးအစားလဲဆိုတာ မသိရသေးဘူး…]

[ကြယ်ပွင့်မိန်းကလေး: နူးနူးညံ့ညံ့ ကလေးနှစ်ယောက်က မျက်နှာသာရဖို့ ပြိုင်ဆိုင်နေကြတာ အရမ်းချစ်စရာကောင်းတာပဲ ဝူး ဝူး… ငါလည်း တက်တက်ကြွကြွမရှိတော့ဘူး… မြန်မြန်ရေ ရွှယ်ထွမ်နဲ့ ထန်ယွမ်တို့ကို မနာလိုဖြစ်သင့်လားငါ မသိတော့ဘူး…]

[အရက်သောက်ရအောင်: မျှစ်မွှေကြော်ရဲ့အရသာက အရမ်းကောင်းတယ်… အဲဒါက အရသာရှိရုံတင်မကဘူး… ခံစားချက်တစ်ခုလုံးကလည်း နားမလည်နိုင်အောင် သက်တောင့်သက်သာရှိတယ်…]

ယခုအချိန်က နေမဝင်သေးပေ။ ညနေစောင်းတွင် နူးညံ့သော ညနေဆည်းဆာအလင်းရောင်က မျက်နှာကျက်ရှိ ပြတင်းပေါက်မှတစ်ဆင့် ကြမ်းပြင်ပေါ်သို့ ဖြာကျနေလေသည်။ ကုယွီမြန်က သူ့ရင်ခွင်ထဲတွင် နှင်းကျားသစ်လေးကို ချီထားကာ ပန်ဒါလေးက သူ့ပေါင်ပေါ်တွင် လှဲလျောင်းနေပြီး နို့ဘူးကိုကိုင်ကာ နို့သောက်နေသည်။

တီဗွီအလင်းမျက်နှာပြင်ပေါ်ရှိ သတင်း၏နောက်ခံအသံက ဆူညံပြီး အသက်ဝင်လှသည်။ မီးဖိုချောင်ထဲရှိ ရေမှော်များနှင့်အတူ ဝက်နံရိုးနှပ်စွပ်ပြုတ်၏အသံက အိမ်နှင့်တူသော ခံစားချက်များကဲ့သို့ပင် ခံစားရပေသည်။

"ယွမ်ယွမ် ဒီနေ့ မြေကြီးပေါ် နောက်ထပ်လှိမ့်ပြန်ပြီလား… မင်းကိုယ်ပေါ်မှာ ဖုန်တွေအများကြီး ရှိနေတယ်…"

ကုယွီမြန် တိုးတိုးလေးပြောလိုက်သည်။

ပန်ဒါလေးက သူ့နားရွက်များကို ထိရန် သူ့လက်သည်းများကို ဆန့်ထုတ်နေစဥ်တွင် နှင်းကျားသစ်လေးက ထန်ယွမ်လေးကို တစ်ချက်ကြည့်လိုက်သည်။ သူ နားမလည်နိုင်သည်ကို ကုယွီမြန် သိသော်လည်း သူ့အကောင်ပေါက်လေးများ၏ စကားလုံးတိုင်းနှင့် အပြုအမူတိုင်းက ချစ်စရာကောင်းသည်ဟုတွေးကာ ရယ်မောလိုက်သည်။ ကုယွီမြန် နှင်းကျားသစ်လေးကို ညစာကျွေးနေစဉ် ဘရပ်ရှ်သေးသေးလေးကို ယူကာ ပန်ဒါလေး၏ကိုယ်ပေါ်တွင်ရှိသော ဖုန်မှုန့်များနှင့် ထုံးနေသောအမွေးများကို ကူရှင်းပေးရင်း မကြာသေးမီက သူကြုံတွေ့ခဲ့ရသည့် စိတ်လှုပ်ရှားဖွယ်ရာများနှင့် သူ့ဘဝ၏သေးငယ်သည့် အရာများအကြောင်းကို ပြောပြလေသည်။

၎င်းက လူအများစု တွေ့ကြုံဖူးသော သာမန်မြင်ကွင်းတစ်ခုပင်ဖြစ်၏။

သို့သော် လူများက တစ်နည်းနည်းကြောင့် သူတို့၏မျက်လုံးများ မဖွင့်နိုင်ကြတော့ပေ။

ပထမမြင်ကွင်းရှုထောင့်မှကြည့်လျှင် ပန်ဒါလေးက နွေးထွေးဆူညံသောအသံများ၊ သတင်းထုတ်လွှင့်မှုအသံများ၊ ပုစဉ်းရင်ကွဲအော်သံများနှင့် ကုယွီမြန်၏ တည်ငြိမ်သော အသက်ရှုသံများကို ကြားနိုင်သည်။ ရေမှော်များနှင့်အတူ ဝက်နံရိုးစွပ်ပြုတ်၏ မွှေးပျံ့သောအနံ့က သူ့နှာခေါင်းဝတွင် ရစ်ဝဲနေသည်။ ဤသာယာသောနွေရာသီညနေခင်းတွင် သူ့ခန္ဓာကိုယ်ပေါ်သို့ကျရောက်လာသော နေရောင်ခြည်များက နွေးထွေးကာနူးညံ့လှပေသည်။

🐯🐯🐯

Prev Next