Chapter 41

🐯Chapter 41

ညနေ ခြောက်နာရီထိုးပြီဖြစ်၏။ လူသစ်ပြိုင်ပွဲဧရိယာကို အချိန်မီဖွင့်လှစ်ခဲ့ပြီး ပထမအ​ကျော့၏ လူကြိုက်များမှု​ရေတွက်ခြင်းကို တရားဝင် စတင်ခဲ့သည်။

အသစ်တင်ဆက်သူအများစုကဲ့သို့ပင် ကုယွီမြန်က ၆ နာရီထိုးသည်နှင့် သူ၏တိုက်ရိုက်ထုတ်လွှင့်မှုကို စတင်ခဲ့သည်။ ထုံးစံအတိုင်း သူက ပန်ဒါလေး၏ရှုထောင့်မြင်ကွင်းကို ရွေးချယ်ပြီး ပန်ဒါလေးအတွက် သီးသန့်ကာကွယ်မှုပုံစံများကို ဖွင့်ကာ ပရိသတ်များကို နှုတ်ဆက်လိုက်သည်။ 

"မင်္ဂလာပါ ကျွန်တော့်နာမည်က ကုယွီမြန်ပါ… ဒီနေ့ညစာအတွက် တုန်းဖိုဝက်သားဟင်းကို ချက်ပါမယ်… အချိုပွဲက​တော့ ဒိန်ချဉ်ရေခဲမုန့်ပါ… အဲဒါပြီးရင် ရွှယ်ထွမ်နဲ့ ထန်ယွမ်တို့ရဲ့ အမွေးတွေကို ကူပြီးဖြီး​ပေးရမယ်… ပြီးရင် ကလေးများနေ့ကို အတူဆင်နွှဲကြပါမယ်…"

ကြယ်တာရာမြို့​တော်သို့ရောက်ပြီး လဝက်ကျော်အကြာတွင် ကုယွီမြန်က ပုံမှန်ပရိသတ်တစ်အုပ်စုကို အခိုင်အမာစုဆောင်းထားပြီးဖြစ်သည်။ မီးဖိုချောင်သုံးစနစ် ကြော်ငြာအသုံးပြုပြီးနောက် ယမန်​နေ့က ​ကြော်ငြာမှုနှင့် စဉ်ဆက်မပြတ် လှုံ့​ဆော်မှု၏ ရေပန်းစားလာမှုနှင့်အတူ သူ၏တိုက်ရိုက်ထုတ်လွှင့်မှု စတင်ပြီးနှစ်မိနစ်အတွင်း မကြာမီမှာပင် ပရိသတ် ၃၀,၀၀၀အထိ ဝင်​ရောက်ကြည့်ရှုလာခဲ့သည်။

ကြည့်ရှုသူဦးရေတိုးလာခြင်းနှင့် ရင်းနှီးသော ID အများအပြားကို ကြည့်ရှုနေရင်း ကုယွီမြန် သူ့မျက်လုံးများ ကွေးညွှတ်မသွားဘဲ မ​နေနိုင်​တော့​ပေ။

[တရုတ်ပြည်​တောင်ဘက်ကကျားက ဘယ်​တော့မှချိန်းမ​တွေ့ဘူး: ဒီမှာပဲ… မြန်မြန်အတွက် မီးရှူးမီးပန်းနှစ်ခု ပစ်​ဖောက်ပြီး လူသစ်ပြိုင်ပွဲမှာ ချောမွေ့တဲ့ခရီးလမ်းကို လျှောက်လှမ်းနိုင်ပါစေလို့ ဆုတောင်း​ပေးပါတယ်…]

[မိုင်းတွင်းထဲမှာ မိသားစုတစ်စုရှိတယ်: ဒီနေ့ ငါတို့ ဘာစားပြီး ဘာကိုဆော့ကြဦးမလဲ… အရမ်း အရမ်းစိတ်လှုပ်ရှား​နေတာ​ကြောင့် လက်​တွေ​ကို အရင်​ဆေးထားလိုက်ပြီ…]

[ငါက ယန်း​ကော၊ မာနကြီးတယ်: ​ကောင်လေး တုန်းဖိုဝက်သားဟင်းနဲ့ ကလေးများနေ့ဆိုတာ ဘာလဲ… ဘာပဲဖြစ်​ဖြစ်​ အရင်ဆုံး ငါ ​စောင့်​ကြည့်လိုက်မယ်​… ဘာဖြစ်လို့လဲဆို​တော့ ဒီတင်ဆက်သူ ပါဝင်သရုပ်​ဆောင်ထားတဲ့ ​ကြော်ငြာက ငါ့ကို မီးဖိုချောင်စနစ် ​အော်ဒါမှာ​စေခဲ့လို့ပဲ… ဒီလိုအရသာရှိတဲ့ အစားအစာတွေကို မဖန်တီးနိုင်ပေမယ့် သုံးရတာ​တော့ အရမ်းလွယ်တယ်၊သင့်​လျော်တယ်ဆိုတာထက်ကို ပိုသင့်​လျော်တယ်… မင်းတို့ မဝယ်ရသေးဘူးဆိုရင် သွားဝယ်လိုက်​တော့…]

[​မြောက်အ​မေရိက သမင်ကြီး: တင်ဆက်သူက ခရိုင် D မှာ နေတာလား…ဒီနေ့ ပရောဂျက်တစ်ခု လုပ်နေတယ် လို့ ကြားထားတယ်… အပြင်ထွက်တဲ့အခါ ဘေးကင်းအောင် ဂရုစိုက်သင့်တယ်…]

"ကျေးဇူးတင်ပါတယ်… ကျွန်တော် ဂရုစိုက်လိုက်ပါ့မယ်…"

ကုယွီမြန်က ခေါင်းညိတ်ပြပြီး ဆက်ရှင်းပြလာသည်။ 

"တုန်းဖိုဝက်သားဟင်းက ကျွန်တော် အရမ်းကြိုက်တဲ့ ဟင်းပါ… ဒီဟင်းက အဆီတစ်ဝက်နဲ့ အသားပါးကတစ်ဝက်ပါတယ်… စုတုန်းဖိုလို့​ခေါ်တဲ့ အမျိုးသားက တီထွင်ခဲ့တာ​ကြောင့် တုန်းဖိုဝက်သားဟင်းလို့ ခေါ်တယ်လို့ ​ပြောကြတာပဲ…"

ကုယွီမြန်က ကျန်းနန်တွင်ကြီးပြင်းလာခဲ့သည်။ သူ စီနီယာအထက်တန်းကျောင်းသားဖြစ်လာချိန်တွင် စီချွမ်သို့သာ ရောက်ဖူးခဲ့သည်။ တုန်းဖိုဝက်သားဟင်းက သူ့အတွက် အထူးခံစားချက်တစ်မျိုး ​ပေးစွမ်းနိုင်သည်။ သူ ငယ်စဥ်က အဘိုးအဘွားများနှင့်အတူ ကျန်းနန်တွင် နေထိုင်ခဲ့သည်။ တရုတ်နှစ်သစ်ကူးပွဲတော်အချိန်တွင် ကိတ်မုန့် မစားချင်​သောကြောင့် အရသာရှိသည့် တုန်းဖိုဝက်သား ဟင်းတစ်ပန်းကန်ကို သူ့အား ကျွေးခဲ့သည်။ ထိုနေ့က သူ့အတွက် အလွန်ပျော်စရာကောင်းသောနေ့ဖြစ်ခဲ့သည်။

နောက်ဆုံးအကြိမ်က နှင်းကျားသစ်လေးမှာ ဤကဲ့သို့ချိုမြိန်သောဟင်းကို ကြိုက်နှစ်သက်ကြောင်း သူ တွေ့ရှိခဲ့သည်။ ထို့​ကြောင့် သူ့အတွက် နောက်ထပ် ထပ်လုပ်​ပေးရန် စဉ်းစားခဲ့သည်။

"ကျွန်တော် ဝက်ဗိုက်သားကို ဟင်းချက်ဖို့ ရွေးချယ်ထားတယ်… လှီးထားတဲ့အသားက အဆီတစ်ဝက်နဲ့ ပါးလှပ်တဲ့အသားတစ်ဝက်မို့ ဆီအရမ်းများသွားမှာကို ရှောင်ဖို့ အသားကို ရေထဲမှာအရင်ပြုတ်ရပါမယ်…"

ကုယွီမြန်က ဝက်ဗိုက်သားကို ပွက်ပွက်ဆူနေသောရေထဲသို့ ထည့်ပြီး ငါးမိနစ်ခန့်အကြာ အအေးခံထားရန် ဆွဲထုတ်ယူလိုက်ပြီး ၎င်းတို့ကို နှစ်လက်မစတုရန်းတုံးများဖြစ်အောင်  လှီးဖြတ်လိုက်သည်။ ​အောက်​ခြေတွင် ကြာရွက်တစ်ရွက်ရှိ​သော ဒယ်အိုးတစ်လုံးကို အချိန်အတော်ကြာကတည်းက ပြင်ဆင်ထားပြီးဖြစ်သည်။ ကုယွီမြန် ရေဆေးကာ အခွံခွာပြီး ထိပ်ပိုင်းကို လှီးထား​သော ကြက်သွန်နီစိမ်းနှင့် ထူထူလေးလှီးထား​သောဂျင်းကို အိုးထဲသို့ထည့်လိုက်သည်။ လှီးဖြတ်ထားသော ဝက်ဗိုက်သားကို ထိုအ​ပေါ်တွင် သပ်သပ်ရပ်ရပ် အုပ်ထားလိုက်သည်။

"အဖွားက ​အောက်​ခြေမှာ ကြာရွက်ထားရမယ်လို့ သင်ပေးခဲ့တာ​လေ… ဒါမှ ပေါင်းလိုက်တဲ့အခါကျရင် ကြာရွက်နံ့​မွှေး​မွှေးလေး ရလာလိမ့်မယ်… ပြီးတော့ ဆီ​တွေများ​နေတာလည်း ကူညီပေးလိမ့်မယ်... အာ ယွမ်ယွမ်…"

ကြာရွက်ကြီးက ပန်ဒါလေး၏ စိတ်ဝင်စားမှုကို လှုပ်ရှားသွား​စေခဲ့သည်။ သူ့မျက်လုံးဝိုင်းဝိုင်း​လေးများကို မှိတ်တုပ်မှိတ်တုပ်လုပ်ရင်း သူ၏နူးညံ့​သော လက်သည်း​လေးများနှင့် သူ့ခေါင်းပေါ်တွင် ကြာရွက်တစ်ရွက်ကို ကိုင်ထားသည်။ ​၎င်းက ခေါင်း​ပေါ်တွင် အစိမ်း​ရောင်ဦးထုပ်အဝိုင်း​လေးကို ​ဆောင်းထားသကဲ့သို့ပင် ရယ်စရာကောင်းပြီး ချစ်စရာကောင်းလှ၍ ကုယွီမြန် ခဏမျှ မရယ်​မောဘဲမ​နေနိုင်​ပေ။

ပရိသတ်များက ပန်ဒါလေး၏ ရှုထောင့်မှ ကြည့်နေသောကြောင့် ထန်ယွမ်၏အသွင်အပြင်ကို မမြင်နိုင်သော်လည်း ကုယွီမြန်၏ မျက်နှာပေါ်ရှိ အပြုံးကိုဖြင့် ရှင်းရှင်းလင်းလင်း မြင်နိုင်သည်။ မှတ်ချက်​ရေးသားသည့် မျက်နှာပြင်၌ 'အရမ်းချစ်စရာ​ကောင်းတာပဲ' နှင့် 'ကိုကို' ဟူ​သော စကားလုံးများက ​နေရာ​အတော်​များများတွင် ချက်ချင်း ထွက်ပေါ်လာသည်။

[အလှကုန်တွေကို လွှင့်ပစ်မယ်: မြန်မြန်ရဲ့ပါးချိုင့်လေးတွေထဲမှာ သကြားဓါတ်တွေ အရမ်းများနေတယ်… ဝူး ဝူး ဝူး ဝူး ချိုမြိန်မှု​တွေကြောင့် သတိလစ်သွား​တော့မယ်…]

နှင်းကျားသစ်လေးက တစ်စက္ကန့်မျှ မပျော်မရွှင်ဖြစ်သွားရသည်။

သူာခဏတုံ့ဆိုင်းသွားပြီး ခေါင်းငုံ့ကာ ကျန်ရှိ​နေ​သောကြာရွက်တစ်ရွက်ကို လက်သည်းနှင့်ထိလိုက်သည်။ ထို့နောက် တဖြည်းဖြည်း အနည်းငယ် ရှက်ရွံစွာဖြင့် သူလည်း ကြာရွက်ကို သူ့ခေါင်းပေါ်သို့ တင်လိုက်သည်။ ထို့နောက် နှင်းကျားသစ်လေးက ကုယွီမြန်အား ကြည့်မ​နေသည့်ပုံစံ ဟန်ဆောင်ကာ ချီးမွမ်းခြင်းကိုမလိုလားသည့် ပျင်းရိသောအမူအရာဖြင့် လှည့်ပတ်ကစားနေသည်။

ကုယွီမြန် : "အိုး... ထွမ်ထွမ်​လေးလည်း အစိမ်း​ရောင်ဦးထုပ်ကို ကြိုက်တယ်​ပေါ့…" 

နှင်းကျားသစ်လေး : ဟမ်…

မှတ်ချက်​ရေးသားသည့် မျက်နှာပြင် : "ဟားဟားဟား"

[ ဦးထုပ်စိမ်းဆောင်းတယ်ဆိုတာ ဖောက်ပြန်တယ်ဆိုတဲ့ အဓိပ္ပါယ်နဲ့သုံးတဲ့ တရုတ်ဗန်းစကားမို့ပါ🤣 သန်းမေ့ဖတ်တဲ့သူ တော်တော်များများ သိကြလို့ အသေးစိတ်မရှင်းပြတော့ဘူးနော် 💙 ]

ကုယွီမြန်၏မျက်လုံးများ ​ကွေးသွားပြီး ခံစားချက်မဲ့​နေ​သော မျက်နှာရှိ​နေသည့် နှင်းကျားသစ်လေးကို သူ့ရင်ခွင်ထဲသို့ ဆွဲယူလိုက်ပြီး နားရွက်​လေးကို နမ်းလိုက်သည်။ 

"ကောင်းပြီ ငါ မင်းတို့နဲ့ကစား​ပေးမယ်… ငါတို့ တုန်းဖိုဝက်သားဟင်းကို ဆက်ချက်ကြမယ်…"

နှင်းကျားသစ်​လေး "..."

သူ့နားရွက်ဖျား​လေးများက တဖြည်းဖြည်း ပူလောင်လာပြီး ကုယွီမြန်၏လည်ကုပ်ပေါ်တွင် သူ့လက်သည်းများကို ဖိထားလိုက်သည်။ သူ တစ်စက္ကန့်မျှ ဒေါသဖြစ်​နေသည် ဆိုသည့်အ​ကြောင်းကို မေ့သွားခဲ့သည်။

[ဟာဟားဟား အစိမ်း​ရောင်ဦးထုပ်​ရောင်းသူကြီး… သူက က​လေးအ​ဖေတစ်​ယောက်ဆိုပေမယ့် ရယ်စရာကောင်းတယ်…]

[မင်းက ​တော်​တော်ဆိုးတဲ့အ​ဖေပဲ… ကလေး​တွေအ​ပေါ် အရမ်းရက်စက်တာပဲ Lol]

[ရွှယ်ထွမ်ကို ကြည့်ရတာ အံ့သြသွားပုံရတယ်…]

ယခုအခါ ကုယွီမြန်က တိုက်ရိုက်ထုတ်လွှင့်မှု၏ စည်းချက်အပေါ် ကျိုးကြောင်းဆီလျော်စွာ ထိန်းချုပ်နိုင်နေပြီဖြစ်သည်။ သူ့ထံတွင် စိတ်သက်​တောင့်သက်သာဖြစ်မှုက သင့်တင့်​သောအတိုင်းအတာတစ်ခုထိရှိသည်။ ငြီး​ငွေ့စရာ​ကောင်းသည့် အစားအသောက် ပါဝင်ပစ္စည်းများ ပြင်ဆင်​နေချိန်အတွင်း ပေါ့ပေါ့ပါးပါး ဟာသများနှင့် အပြန်အလှန် ပြောဆိုမှုများကို ထည့်သွင်း​ပြောဆိုခဲ့သည်။ တိုက်ရိုက်ထုတ်လွှင့်သည့်နေရာရှိ လေထုက ချက်ချင်းပင် သက်​တောင့်သက်သာဖြစ်လာပြီး နွေးထွေးလာသည်။ ထို့အပြင် ၎င်းက အစပိုင်း တိတ်ဆိတ်ငြိမ်သက်စွာ လုပ်ဆောင်ခြင်းထက် များစွာသာလွန်ကောင်းမွန်​ပေသည်။

ကြည့်ရှုသူအရေအတွက်က တဖြည်းဖြည်း မြင့်တက်လာပြီး မကြာမီ အရေအတွက် ၁သိန်းသို့ ရောက်ရှိလာခဲ့သည်။

လူသစ်ပြိုင်ပွဲကို ABCD နယ်​မြေလေးခုတွင် ခွဲခြားထားခဲ့သည်။ ကုယွီမြန်က နယ်​မြေ D ထဲတွင်ပါဝင်သည်။ ယခုအခါ သူက ပထမနေရာကို အခိုင်အမာ သိမ်းပိုက်ထားပြီး ဒုတိယနေရာကို သိမ်းပိုက်ထားသူနှင့် နှိုင်းယှဉ်လျှင် လူကြိုက်များမှု အချက်အလက်က နှစ်ဆကျော် ကွာခြားလာခဲ့သည်။ ဧရိယာလေးခုလုံး ယှဥ်ပြိုင်ခဲ့လျှင်ပင် ကုယွီမြန်က နာရီဝက်အတွင်း ပရိတ်သတ် ၉၀,၀၀၀ နှင့် ၁၀၀,၀၀၀ သို့ ​ရောက်ရှိခဲ့​သော ပထမဆုံးတင်ဆက်သူပင်ဖြစ်သည်။

လာကြည့်သူပရိတ်သတ်အဟောင်းများက ကုယွီမြန်၏တိုးတက်လာမှုနှင့် သူ၏စွမ်းဆောင်ရည် ပိုမိုကောင်းမွန်လာ​ကြောင်းကို အသေးစိတ်မြင်နိုင်သည်။ သူတို့အားလုံး ဆန္ဒပြည့်​မြောက်သွားသလို ခံစားခဲ့ကြရသည်။

ဤအချိန်တွင် ကုယွီမြန်က ဝက်ဗိုက်သားကို ပန်းကန်အောက်ခြေရှိ ကြာရွက်ပေါ်တွင် သပ်သပ်ရပ်ရပ် စုပုံထားသည်။ ထို့​နောက် နောက်ဆုံးတွင် မူလလိုအပ်နေသော ​ရှောက်ရှင်းဝိုင်ကို အစားထိုးနိုင်ရန် ဟင်းချက်ဝိုင်တစ်ခုကို လောင်းမထည့်မီ သကြားခဲ၊ ငံပြာရည်နှင့် ဆိုဒီယမ်အနည်းသာပါ​သော ပဲငံပြာရည်တို့ကို သင့်လျော်သော ပမာဏတစ်ခုဖြင့် ​ထပ်ထည့်လိုက်သည်။

"ဝိုင်ရဲ့အမြင့်ကို အသားမြုပ်သွား​တဲ့အထိ ​မထည့်သင့်ဘူး… ဒီ​နေရာမှာ အသားရဲ့အညှီနံ့ကို ဖယ်ရှားပစ်ဖို့ ရေအစား ဝိုင်ကို သုံးတယ်…ဘယ်လိုပဲဖြစ်ဖြစ် ပြုတ်ထားတဲ့အသားက ပိုနူးညံ့ပြီး အရသာရှိလာလိမ့်မယ်…"

သူက လက်အိတ်ကိုဝတ်ကာ အိုးကို မီးဖိုပေါ်သို့ တင်လိုက်သည်။ စတင်ပွက်ပွက်ဆူလာသည့်အချိန်အထိ အိုးကို အပူချိန်မြင့်မြင့်နှင့် ထားလိုက်ပြီး​နောက် အပူချိန်ကို​လျှော့ချလိုက်သည်။ သူ ယခင်ရှေးဟောင်းကမ္ဘာပေါ်တွင် နှစ်နာရီ၊ သုံးနာရီခန့် စောင့်ခဲ့ရသည်။ သို့သော် ယခုအခါ ဤနည်းပညာက မိနစ်အနည်းငယ်သာ စောင့်ရန်လိုအပ်​ပေသည်။

​မီး​အေး​အေး​လေးပေါ်တွင် တင်ထားသော အသားများကိုကြည့်​နေရင်း ထိုး​ဖောက်မြင်ရ​သော အိုးအဖုံး၏​အောက်ရှိ ဝက်ဗိုက်သား၏အ​ရောင်နှင့်ပုံသဏ္ဍာန်ကို ကုယွီမြန် သေ​သေချာချာ ​စောင့်ကြည့်​နေလိုက်သည်။ ကျက်သွားချိန်တွင် ဝက်သားကိုထုတ်ယူကာ တူနှင့် ညင်သာစွာ ထိုးလိုက်သည်။ ၎င်းတို့ကို အလွယ်တကူ ထိုးဖောက်နိုင်​သော​ကြောင့် အသား၏အရည်အသွေးက အလုံအ​လောက်နူးအိ​နေပြီဖြစ်ကြောင်း ဖော်ပြ​နေ​ပေသည်။

ဤအဆင့်တွင် ဝက်ဗိုက်သား၏မျက်နှာပြင်က သကြားခဲ၏ တောက်ပနေသော သကြားအရောင်ကို စုပ်ယူသွား​ပေသည်။ အိုးအဖုံးကိုဖွင့်လိုက်သောအခါ စူးရှသောရနံ့က ပျံ့လွင့်လာသည်။

ပန်ဒါကလေးသည်လည်း အိုးအစွန်းတွင် စပ်စုစွာဖြင့် ​ရောက်ရှိလာသည်။ အပူ​လောင်သွားမည်ကို ကုယွီမြန်က စိုးရိမ်သဖြင့် သူ့ရင်ခွင်ထဲတွင် ချီထားလိုက်သည်။ ထန်ယွမ်လေးက အချီခံရပြီးနောက် တုန်းဖိုအသားအ​ကြောင်းကို ချက်ချင်းမေ့သွားပြီး ကုယွီမြန်၏ရင်ခွင်ထဲတွင် သူ့​ခေါင်းကို ပျော်ရွှင်စွာဖြင့် ပွတ်သပ်လိုက်သည်။

[အန်နာနာ: ဒါကိုမြင်ရတာ ​ကောင်းလိုက်တာ…အခုစားဖို့အဆင်သင့်ဖြစ်ပြီလား... မင်း ဟင်းစချက်တဲ့အချိန်တုန်းက ငါ့ဗိုက်ရဲ့ တဂွီဂွီမြည်​နေတဲ့အသံကို ငါ့လုပ်ဖော်ကိုင်ဖက်တွေ ကြားသွားတယ် orz]

"မပြီးသေးဘူး…နည်းနည်းကြာကြာ ​ပေါင်းပေးရင် ပိုကောင်းတယ်…"

ကုယွီမြန် ခေါင်းခါလိုက်သည်။

တုန်းဖိုဝက်သား၏ အရေးကြီးသောအချက်က အရသာပင်ဖြစ်၏။ ကုယွီမြန် အိုးထဲမှ အစာသွတ်ထား​သောအသားများကို တစ်ခုပြီးတစ်ခု ထုတ်ယူခဲ့သော်လည်း အသားကို အပူဒဏ်ခံနိုင်သော ဖန်သေတ္တာတစ်ခုထဲသို့ထည့်ကာ ဖုံးအုပ်လိုက်ပြီး ဟင်းချက်​ပေါင်းအိုးထဲသို့ထည့်ကာ အချိန်အတိုင်းအတာတစ်ခုအထိ မီးပြင်းပြင်းဖြင့် ​ပေါင်းထားလိုက်သည်။

မိနစ်အနည်းငယ်ကြာပြီးနောက် ကုယွီမြန် ခဏမျှ ဂရုတစိုက် စစ်​ဆေးလိုက်သည်။ ​ပေါင်းအိုးကိုဖွင့်လိုက်ချိန်တွင် အရောင်အဆင်းနှင့် အမျိုးမျိုး​သော အ​ခြေအ​နေ​ဖော်ပြမှုများအားလုံးသက စံနှုန်းပြည့်မီလှ​သော​ကြောင့် တုန်းဖိုဝက်သားဟင်းကို ထုတ်ယူလိုက်သည်။

"ကဲ ကျက်သွားပြီ…သတိထားဦးနော်…"

ဖန်အဖုံးကိုဖွင့်လိုက်သည့် အခိုက်အတန့်တွင် ​လေးပင်ကာချိုမြိန်ပြီး နူးနူးညံ့ညံ့ရှိလှသည် အနံ့ပြင်းပြင်းတစ်ခု ထွက်​ပေါ်လာသည်။

သကြားခဲမှဖြစ်​ပေါ်လာသော အရောင်နှင့် အစင်း​ကြောင်းများက ဝက်ဗိုက်သား၏မျက်နှာပြင်ထဲသို့ လုံးလုံးလျားလျား ထိုးဖောက်ဝင်ရောက်သွားသည်။ အ​ပေါ်ယံမျက်နှာပြင်တွင် သကြား၊ ကြက်သွန်နီ၊ ဂျင်းနှင့် ဟင်းချက်ဝိုင်များဖြင့် အရော​ရောအနှော​နှော ပြုလုပ်ထားသည့် ​ဆော့စ်အရည်ပျစ်ပျစ်အလွှာတစ်ခုရှိသည်။ ဝက်ဗိုက်သားအပိုင်းအစများက တောက်ပကာ သလင်း​ကျောက်ကဲ့သို့ ကြည်လင်​နေပြီး အလွန်ဆွဲဆောင်မှုရှိလှသည်။

များပြားလှ​သော လုပ်ငန်း​ဆောင်တာများအပြီးတွင် ဝက်ဗိုက်သား၏အဆီက ပါးလွှာပြီး နူးညံ့သွား​ပေသည်။ ချိုမြိန်​စေးကပ်ကာ ကြွပ်ကြွပ်ရွရွနှင့် ဆီမပါ​သော ဝက်သား၏အရသာကို မည်သူမဆို စိတ်ကူးကြည့်နိုင်​ပေသည်။ အသားက အမှန်တကယ် ​စေးကပ်မွှေးကြိုင်ကာ ပျော့ပျောင်းနူးညံ့သည့်အတွက် ကုယွီမြန် ၎င်းကို တူနှင့်ကောက်ယူလိုက်သည့်အခါ ယူ၍မရလုနီးပါးဖြစ်သွားရသည်။ သူမြင်ကွင်းရှု့​ထောင့်ကို မပြောင်းမီ နှင်းကျားသစ်လေးအား ကျွေးလိုက်သည်။ ဖန်သားပြင်​ပေါ်တွင်​ပေါ်​နေသည့် မှတ်ချက်များက ယခင်ကထက် ပိုမိုမြန်ဆန်နေလေသည်။

[လီယွမ်​နွေဦးနှင့်​ဆောင်းဦးပွဲ​တော်: မြန်မြန်ရေ စားချင်နေပြီ …]

[​ကြောင်ပူတင်း​လေး: အရမ်းအရသာရှိတယ် ဟုတ်တယ်မလား… နေရာအနှံ့ သားရည်တွေ စီးကျလာပြီ…အရမ်းစားချင်တယ်… နောက်ပြီး ဒီလူက ဘယ်လောက်လဲ… ငါပိုင်ဆိုင်သမျှ အားလုံးသုံးပြီး သူ့ကိုဝယ်​လိုက်​မယ်​…]

[ဂျူနီယာ ဘီ: အရမ်းအရသာရှိတယ်… ငါ ဘာလို့ ဒီဟာကို အရမ်းစားချင်​နေရတာလဲ… ငါ့ရဲ့အရင်ဘ၀တုန်းက ဝက်သားအပိုင်းအစတစ်ခု ဖြစ်ခဲ့တာ​ကြောင့်ဖြစ်လိမ့်မယ်…]

[တိမ်လေးတစ်ခုရှိတယ် : တင်ဆက်သူအတွက် မီးရှူးမီးပန်းဆယ်ခုပါ… တင်ဆက်သူရဲ့ တိုးတက်လာမှုက တကယ်ကိုမိုက်တယ်… လူသစ်ပြိုင်ပွဲမှာ ​ချော​ချော​မွေ့​မွေ့ ​အောင်မြင်ပြီး ချက်ပြုတ်ခြင်းနဲ့ ထိန်းချုပ်ခြင်းစတဲ့ ကဏ္ဍပေါင်းစုံမှာ အောင်မြင်ပါစေလို့ ဆု​တောင်း​ပေးပါတယ်…]

တစ်ချိန်တည်းမှာပင် ကြည့်ရှုသူဦးရေ ၁၀၀,၀၀၀ အထက် ကျော်လွန်သွားခဲ့သည်။

နယ်​မြေ D တစ်ခုလုံး၏ ဆက်သွယ်​ရေးကို သူတစ်ယောက်တည်းဖြင့် ဆွဲ​ဆောင်ထားခဲ့သည်။ ကုယွီမြန်မှလွဲပြီး အမြင့်ဆုံးကြည့်ရှုသည့်ပရိသတ်က ၄၀,၀၀၀ သာရှိသည်။ ၎င်းသည် ဆန့်ကျင်ယှဥ်ပြိုင်မှုနှင့် မတူညီ​တော့​ပေ။

-----

ထိုအချိန်တွင်-

ကြယ်တာရာမြို့​​တော်၏ အထက်တန်းလွှာနယ်​မြေ၊ သိပ္ပံအကယ်ဒမီ​ကျောင်း၌-

မျက်နှာအမူအရာကင်းမဲ့​နေသော ဆယ်ကျော်သက်​လေးက ဆုံလည်ကုလားထိုင်ပေါ်တွင် ထိုင်ကာ အလင်းမျက်နှာပြင်ကို ​ထိုင်ကြည့်​နေသည်။ သူ့အကြည့်များက စေ့စေ့စပ်စပ် သုတေသနလုပ်နေသည့်အချိန်ကထက်ပင် ပို၍လေးနက်သော အကြည့်များဖြင့် ကြည့်နေသည်။ သူ့လက်ထဲတွင် ထမင်းဖြူတစ်ပန်းကန်ကို ကိုင်ထားရင်း တိုက်ရိုက်ထုတ်လွှင့်မှုကို တစ်ချက်ကြည့်ကာ ထမင်းတစ်လုပ်ကို စားလိုက်သည်။

အခြားသုတေသီများ: "..."

ပြီးသွားပြီ… သိပ်မကြာခင်က အလုပ်က အရမ်းတင်းကျပ်သွားတဲ့ပုံပဲ… နောက်ဆုံးတော့ သူဌေးလည်း ဖိအား​တွေကြောင့် ရူးသွပ်သွားပြီ...

-----

အခြား တာ့ခ်ဂြိုဟ်​ပေါ်တွင်-

ခီရီက တိုက်ရိုက်ထုတ်လွှင့်မှုကို ကြည့်ရှုနေစဉ် ​ပေါင်မုန့်စားနေသည်။ ထိုအချိန်တွင် သူမလက်ထဲမှမုန့်က ပြုတ်ကျသွားခဲ့သည်။

"ခဏနေပါဦး ဘာ​တွေဖြစ်​နေတာလဲ… လူတစ်သိန်း​လား…"

ပထမဆုံးအကြိမ်အဖြစ် တာ့ခ်ဂြိုဟ်​ပေါ်ရှိ ကြယ်တာရာ​ကောင်းကင်၏ ဝန်ထမ်းများက တစ်ယောက်ကိုတစ်ယောက် ကြည့်လိုက်ကြသည်။

ဤအခိုက်အတန့်တွင် ​ရှေး​ဟောင်းကမ္ဘာ၏ ​ခေတ်စကားအရ​ ရွာတစ်ရွာလုံးမှ ကောလိပ်ကျောင်းသားတစ်​ယောက် ​ပေါ်ထွက်လာသလိုမျိုး လူတိုင်း ခံစားနေရသည်။ သာမန်ကျောင်းသို့တက်ခဲ့လျှင် ပိုကောင်းလိမ့်မည်ဟု သူတို့ထင်ခဲ့ကြ​သော်လည်း တစ်ဖက်လူက ဟားဗတ်တက္ကသိုလ်၌ တက်​ရောက်ခွင့်ရလိမ့်မည်ဟု မမျှော်လင့်ထားခဲ့ကြ​ပေ။

🐯🐯🐯