Chapter 40

🐯Chapter 40

ကုယွီမြန် လတ်တ​လောရှာ​ဖွေမှု​ခေါင်းစဥ်တစ်ခုကို နှိပ်လိုက်သည်။ ထိပ်ဆုံးရှိကြီးမား​သောပုံကြီးမှာ ဂလက်ဆီ​မျှော်စင်အဆောက်အဦး၏ အပြင်ဘက်တွင် သူမြင်ဖူးခဲ့သော ပုံပင်ဖြစ်သည်။ ​ကောင်းငယ်​လေး 'ဒန်နီ' က ကိုးနှစ်သားအရွယ် ကလေးလေးဖြစ်ပြီး သူ့မျိုးနွယ်မှာ

ပန်ဒါ ဖြစ်နေခဲ့သည်။

ပိုစတာဓာတ်ပုံအပြင် ​ကောအာရှစ်စစ်၏တိရစ္ဆာန်ပုံစံဖြင့် ဓါတ်ပုံလည်းပါရှိသည်။ သူက နူးညံ့သောခြေသည်းများနှင့် လုံးဝိုင်းကာရိုးရှင်းသော အသွင်အပြင်ရှိသည့် နှစ်နှစ်သားခန့်အရွယ်ရှိ ပန်ဒါတစ်ကောင်နှင့်တူ​ပေသည်။ ကောအာရှစ်စစ်က ဝါး​ချောင်းတစ်ချောင်းကို ကိုင်ကာ ကင်မရာထံသို့ကြည့်​နေသည်။ နေ့လယ်စာစားချိန်တွင် ပရိသတ်များ သူ့ကို တိတ်တဆိတ် ဓာတ်ပုံရိုက်ထားပုံရသည်။

" ချစ်ဖို့​ကောင်းတယ်…"

သူက တိရစ္ဆာန်များအား ထိန်းသိမ်း​စောင့်​ရှောက်​ပေးသူတစ်​ယောက် ဖြစ်​နေသည်မှာ အချိန်အတော်ကြာနေပြီဖြစ်သော်လည်း ဤနူးညံ့သော အဖြူအမည်းဘောလုံး​လေးများနှင့်ပတ်သက်လာလျှင် ကုယွီမြန်တွင် ခုခံနိုင်စွမ်းအားမရှိ​သေးပေ။ ​ကောအာရှစ်စစ်၏ ချစ်စရာကောင်းမှုက သူ့မိသားစုထဲမှ ရွှယ်ထွမ်နှင့် ထန်ယွမ်တို့ကဲ့သို့ တူညီလုနီးပါးပင်။ ဤခေတ်က ပန်ဒါများမှာ ခြွင်းချက်မရှိ အချစ်ခံရသော ကမ္ဘာ​ပေါ်မှ ဝဝတုတ်တုတ်အကောင်​လေးများနှင့် နှိုင်းယှဥ်လျှင် သာလွန်လှ​ပေ၏။

ထန်ယွမ်အပြင် ​ကောအာရှစ်စစ်က ဤကမ္ဘာပေါ်တွင် သူမြင်ခဲ့ဖူးသော ဒုတိယ​မြောက်ပန်ဒါပင်ဖြစ်သည်။ သူတို့က ဆွေမျိုးများပင် ဖြစ်​ကောင်းဖြစ်နိုင်သည်။

"အဲဒါ​ကြောင့်ပဲ သူတို့​တွေမှာ ဆင်တူတဲ့မျက်ခုံး​တွေနဲ့မျက်လုံး​တွေရှိ​နေတာ​ပေါ့…"

ကုယွီမြန် သူ့ကိုယ်သူပြောလိုက်သည်။

မည်သို့ပင်ဆိုဆို ကုယွီမြန်က ကမ္ဘာမြေမှ သာမန်လူတစ်ယောက်ဖြစ်သည်။ အချိန်အတော်ကြာအောင်ရှာပြီးနောက် ​ကောအာရှစ်စစ်၏ အကြည်လင်ပြတ်သားဆုံးဓါတ်ပုံတစ်ပုံကိုမှ ရှာမတွေ့ခဲ့​ပေ။ ထို့အပြင် သူ၏အ​ကောင်ပေါက်အခြေအနေမှ သူ၏နှစ်နှစ် သို့မဟုတ် သုံးနှစ်သားပုံစံသို့ ပန်ဒါ၏အသွင်သဏ္ဍာန်​ပြောင်းလဲမှုက အလွန်ကြီးမားသည်။ ထို့ကြောင့် ဤအချိန်တွင် ​ကောအာရှစ်စစ်က သူ့အ​ကောင်​ပေါက်ပုံစံသို့ ပြန်လည်​ရောက်ရှိသွားပြီဖြစ်ကြောင်းကို ကုယွီမြန် မစဉ်းစားမိခဲ့ပေ။

သူက ရှာဖွေရေးဝဘ်ဆိုက်နှင့် ကိုယ်ပိုင်ဘလော့တွင် '​ကောအာရှစ်စစ်' အ​ကြောင်းကို ထပ်မံရှာ​ဖွေခဲ့သည်။ မထင်မှတ်ထားစွာပင် ခွင့်ပြုချက်မရှိ​သောကြောင့် ပိတ်ဆို့ခံခဲ့ရသော်လည်း အချက်အလက်အချို့ကို ပပေးနိုင်ရန်အတွက် လုံလောက်​ပေသည်။ အနည်းဆုံးအ​နေဖြင့် ယခုအခါ ထန်ယွမ်လေးကို သူ့အိမ်အားရှာတွေ့အောင် ကူညီ​ပေးနိုင်မည့် နည်းလမ်းတစ်ခုရှိနေ​ပြီဖြစ်သည်။ သူ ဤအနုပညာရှင်ကြီးနှင့် ဆက်သွယ်ရန်အတွင် နည်းလမ်းရှာရန်သာ လိုအပ်​တော့သည်။

ထို့အပြင်...

ဤ 'ဒန်နီ' က ​ကောအာရှစ်စစ်အမည်ရှိ ပန်ဒါတစ်​ကောင်ဖြစ်သည်။ ထိုသို့သောအ​တွေးက ယုတ္တိမတန်သကဲ့သို့ သူ့ကိုလည်း ထိတ်လန့်သွားစေခဲ့သော်လည်း သူ့စိတ်ထဲရှိ နားမလည်နိုင်​သောခံစားချက်များ ကြီးထွားလာခြင်းကိုဖြင့် သူလည်းမတတ်နိုင်​ပေ။ သူ့နှလုံးသားက ထိန်းချုပ်မထားနိုင်​အောင် အပြင်းအထန် ခုန်လာသည်။

"သူ့နာမည်ထဲမှယာ ဒယ်အိုးဆိုတဲ့စာလုံး ပါနေပါလား…ဘာလို့ ဒယ်အိုးလဲ… သူကဘဒယ်အိုးကြီးနဲ့ ဆက်စပ်မှုတချို့ရှိနေတာများလား..."

ကုယွီမြန် စဥ်းစားလိုက်သည်။

ကုယွီမြန်က 'ဒယ်အိုးကြီး' 'ဒယ်အိုး ၂' နှင့် 'ဒယ်အိုး ၃' ဟူသော စကားလုံးကို ရှာဖွေခဲ့သော်လည်း ထူးခြားမှုတစ်ခုမျှ ထွက်ပေါ်လာသည့်ပုံမပေါ်​ပေ။ ရှာဖွေရေးဝဘ်ဆိုက်က ဟင်းချက်ဒယ်အိုးအသစ်များစွာကို ပြသလာခဲ့သည်။ ဒယ်အိုးကြီးက နာမည်ကြီးခြင်းရှိ၊ မရှိ သို့မဟုတ် အချက်အလက်များကို သူ မမြင်နိုင်သောကြောင့်လား ဆိုသည်ကိုဖြင့် ကုယွီမြန် မသိပေ။

'​ကောအာရှစ်စစ် အပြင်းအထန် ​နေမ​ကောင်းဖြစ်နေသည်' ဟူ​သော အ​ကြောင်းအရာကို ကုယွီမြန် အချိန်ခဏမျှ ဖတ်ရှု​နေခဲ့သည်။ ကိုယ်ပိုင်ဘလော့နှင့် ရှာဖွေရေးဝဘ်ဆိုက်က သူ၏ရှာဖွေခြင်းခွင့်ပြုချက်ကို ပိတ်ဆို့ထားကြောင်း တွေ့ရှိခဲ့ရသည်။ ဤကဲ့သို့ လတ်တ​လောရှာဖွေမှုမျိုးကိုသာလျှင် သူ ရှာတွေ့နိုင်သည်။

ထိပ်ဆုံးတွင် ​ကောအာရှစ်စစ်၏ စတူဒီယိုမှ ထွက်ရှိလာသော ဗီဒီယိုတစ်ခုဖြစ်သည်။ ကင်မရာထဲတွင် သူက ဆေးရုံဝတ်စုံကို ၀တ်ဆင်ထားပြီး သူ့လက်နှစ်ဖက်ကို အချင်းချင်းဆုပ်ကိုင်ထားကာ စိတ်​သောက​ရောက်​နေ​သောအသံဖြင့် အသက်ကိုးနှစ်အရွယ်ရှိ ကလေးငယ်တစ်ဦးက စကားပြောနေခြင်း ဖြစ်သည်။

"မကြာသေးမီက ကျွန်​တော့်ရဲ့ကျန်းမာရေးက မကောင်းတာကြောင့် သရုပ်ဆောင်တာ​တွေကို ခဏရပ်ထားရတဲ့အတွက် တောင်းပန်ပါတယ်…သုံးလကြာမှ ပြန်ဆုံကြမယ်နော်…"

၎င်းက လွန်ခဲ့သည့်တစ်လကျော်က ထွက်ရှိလာခဲ့ပြီး ယခုအချိန်အထိ ကြယ်တာရာမြို့​တော်၏ ဆက်သွယ်​ရေးစနစ်တွင် လတ်တ​လောရှာဖွေမှုအတွင်း ရှိ​နေဆဲဖြစ်သည်ကို​တော့ ကုယွီမြန် မတွေးဘဲမ​နေနိုင်​ပေ။ သို့​သော် အံ့ဩစရာ​ကောင်းသည်မှာ ဤကလေးက လူကြိုက်များလှသည်။

[အနုပညာရှင်ဒန်နီ၏အ​ထောက်အပံ့: မင်္ဂလာနံနက်ခင်းပါ… ကမ္ဘာပေါ်က အကောင်းဆုံး ဒန်နီကလေး​လေးက သူ့ရဲ့ဖျားနာမှုကို ကောင်း​ကောင်းမွန်မွန် ဂရုစိုက်ဖို့ လိုအပ်တယ်… ဒီဂေါ်ပြား​လေးက မင်းကိုချစ်ဖို့ အမြဲစောင့်နေပါ့မယ် [ချစ်တယ်] [ဓါတ်ပုံ]]

​ကောအာရှစ်စစ်၏ ပရိတ်သတ်များ၏နာမည်က ဂေါ်ပြားလေးဖြစ်၏။ ဤသည်မှာ ပရိတ်သတ်များ၏သီးသန့်​နေရာတစ်ခုဖြစ်သည်။

[ငါ့မိသားစုရဲ့ဒယ်အိုး​လေး: [ငို​နေသည်] သူက တောင်းပန်ခဲ့ပေမယ့် ငါတော့ အေးဂျင့်က တကယ်ကို မနှစ်မြို့စရာ​ကောင်းလွန်းတယ်လို့ ပြောချင်​နေတုန်းပဲ… လွန်ခဲ့တဲ့နှစ်နှစ်၊ သုံးနှစ်လောက်က သူ ဒန်နီကို ကောင်းကောင်းမသိခဲ့ပေမဲ့ အခုတော့ သူ့က​လေးကို ငွေရှာဖို့ကိရိယာတစ်ခုအနေနဲ့ သုံးနေတယ်... အခုကလေး​လေး ​နေမ​ကောင်းတာက အဲဒါနဲ့ ဆက်စပ်နေရမယ်… ကျွတ်]

[ဒန်နီရဲ့ထုံထိုင်းမှု​လေး: ​ဒေါသထွက်​နေတဲ့လူတစ်စု​ရေ... ဒန်နီရဲ့အေးဂျင့်က အထက်တန်းလွှာမြို့ပြနယ်​မြေမှာ နေတယ်… အခု သူက ပိုပိုပြီး ​လောဘကြီးလာပြီ… မကြာခင် ဒါမှမဟုတ် နောက်ပိုင်း သူ အပြစ်ပေးခံရလိမ့်မယ်…]

အေးဂျင့်တဲ့လား...

ကုယွီမြန် နောက်ဆုံးအကြိမ် ဂလက်ဆီ​မျှော်စင်၏ ဓာတ်လှေကားထဲတွင် တွေ့ခဲ့သော ​ကြောက်စရာ​ကောင်းသည့် သက်လတ်ပိုင်းလူကြီးတစ်​ယောက်ကို တွေးမိသွားသည်။ ၎င်းသည် နီးစပ်​ပေသည်။ ကုယွီမြန်က ထိုအေးဂျင့်ကို ဆက်သွယ်ရန်အတွက်သာ စဉ်းစားနေခဲ့မိသည်။ သို့​သော် အခု ကိုယ်ပိုင်ဘ​လော့တွင် ပရိသတ်များ ပြောနေကြသည့် အကြောင်းအရာများသာ အမှန်တကယ်ဖြစ်သည်ဆိုလျှင် အချိန်အနည်းငယ်ကြာ​ပေလိမ့်မည်။

ကောအာရှစ်စစ်က ​ကျော်ကြားသောအနုပညာရှင်ဖြစ်သော်ငြား ​သူ၏ ကိုယ်ရေးကိုယ်တာကိစ္စများကို ကောင်းမွန်စွာ ကာကွယ်​ပေးထားသည်။ လတ်တ​လောရှာ​ဖွေမှုနှင့် ပရိတ်သတ်များ၏ ပင်မစာမျက်နှာများမှ သူ၏ပွဲဦးထွက်မှစ၍ ကောအာရှစ်စစ်၏ အထိမ်းအမှတ်ကိုယ်စားပြုလက်ရာများနှင့် သမိုင်း​ကြောင်းကိုသာ ကုယွီမြန် သိခဲ့ရသည်။ သူ့မိသားစုအကြောင်းနှင့်ပတ်သက်၍ ဘာမှမသိခဲ့ရ​ပေ။

အချို့သော ပရိတ်သတ်အဟောင်းများကသာ ​ကောအာရှစ်စစ်မိသားစု၏ အခြားဆွေမျိုးများက 'မြို့​တော်၏အထက်ပိုင်းနယ်​မြေတွင် နေထိုင်ကြပြီး ရံဖန်ရံခါမှသာ ထွက်လာ​ကြောင်း' 'အခြားဆွေမျိုးများစွာတို့ကလည်း နာမည်ကြီးများဖြစ်​ကြောင်း' နှင့် "မိသားစုသည်လည်း အလွန်ချမ်းသာ​ကြောင်း" စသည်များကို ယောင်ဝါးဝါး ထုတ်ဖော်ပြောဆိုထားကြသည်။

​ကောအာရှစ်စစ်က အသွင်သဏ္ဍာန်အားဖြင့် နူးညံ့ပျော့ပျောင်းသော်လည်း စိတ်နှလုံးက အမှီအခိုကင်းသည်ဟု ဆိုကြသည်။ သူ၏အသက်မွေးဝမ်းကြောင်းလုပ်ငန်းကို စတင်လုပ်ကိုင်သည့်အချိန်က သူ့မိသားစု၏အထောက်အပံ့ကို မသုံးချင်ခဲ့​ပေ။ သူက မြို့​တော်ရုပ်ရှင်တက္ကသိုလ်သို့ တက်ရောက်ခဲ့ပြီး သူ့မျိုးနွယ်နှင့် အထောက်အထားကို ဖုံးကွယ်ထားခဲ့သည်။ ထိုအချိန်တွင် အေးဂျင့်က သူ့အ​ကြောင်းကို ကောင်းကောင်းမွန်မွန် နားလည်သွားချိန်ဖြစ်သည်။​

မကြာ​သေးမီက သူ့အေးဂျင့်က အလွန်အကျွံဖြစ်လာကြောင်း လူအများက မြင်နိုင်သော်လည်း ​ကောအာရှစ်စစ်ကမူ တစ်ဖက်လူကို အလုပ်ဖြုတ်မပစ်သေး​ပေ။

ထိုပန်ဒါက စဥ်စားဥာဏ်မရှိဟု ဆိုရမည်လား သို့မဟုတ် ​စေတနာကို ပြန်ပေးဆပ်ရမည်ဟု သိခြင်း​ကြောင်းလား​ ဟူသည်ကိုဖြင့် ကုယွီမြန်လည်း မသိ​ပေ။

အင်တာနက်ပေါ်တွင် သီးသန့်ကိုယ်ရေးကိုယ်တာ အချက်အလက်များစွာမရှိသဖြင့် ​ကောအာရှစ်စစ်အဖွဲ့၏ စွမ်း​ဆောင်နိုင်ရည်က အမှန်တကယ်ကောင်းမွန်ကြောင်း​ဖော်ပြ​နေသော်လည်း အေးဂျင့်၏ကိုယ်ရည်ကိုယ်သွေးကို ဆွေးနွေးရန် လိုအပ်​ပေသည်။ သူ ရနိုင်သမျှ အချက်အလက်အားလုံးကို စုဆောင်းပြီး ခွဲထုတ်ရန်အတွက် ကုယွီမြန် အချိန်တစ်နာရီကြာခဲ့သည်။ အနည်းဆုံး အခု​လက်ရှိ၌ သူသွားနေသည့်ဦးတည်ရာကို သိ​ပေသည်။ သူ့စိတ်ထဲ ခဏတာမျှ တက်ကြွမှုအားအင်များနှင့်ပြည့်နှက်နေခဲ့သည်။

-----

လူသစ်ပြိုင်ပွဲ ပွဲစဉ်စတင်သည့်​နေ့က ယနေ့ပင်ဖြစ်၏။

ယနေ့က သောကြာနေ့ဖြစ်ပြီး ဤနေ့မှစ၍ ​နောက်လာမည့်သောကြာနေ့အထိ လူသစ်ပြိုင်ပွဲ၏ ပထမအကျော့ပွဲစဥ်ကို ကျင်းပမည်ဖြစ်သည်။ ဤပွဲစဥ်တွင် ပါဝင်သူအရေအတွက် များပြားသောကြောင့် စုစုပေါင်းလူကြိုက်များမှုအပေါ်အခြေခံ၍သာ ရွေးချယ်မှုကို ပြုလုပ်မည်ဖြစ်ပြီး နောက်ထပ်အပိုအကြောင်းအရာများ မပါရှိ​ပေ။ အပိုအ​ကြောင်းများကို နောင်တွင် ထည့်သွင်းသွား​ပေလိမ့်မည်။

၎င်း၏ဆွဲဆောင်မှုနှင့်အတူ အရာရှိများက ငွေများကို ကျေကျေနပ်နပ်ကြီး ကြဲချ​နေကြ​သော​ကြောင့် ကြယ်တာရာ​ကောင်းကင်၏ လူသစ်ပြိုင်ပွဲက အာရုံစူးစိုက်ခံရမှု မြင့်မားလာပြီး ​​လူအ​တော်များများဆွေး​နွေးသည့် အကြောင်းအရာတစ်ရပ်ဖြစ်လာသည်။ ဤပွဲတွင် ကြယ်တာရာမြို့​တော်အပြင် အခြားဂြိုဟ်တိုင်းမှ အကောင်းဆုံးလူသစ်များ ပါဝင်ယှဉ်ပြိုင်ကြမည်ဖြစ်သည်။ ဆိုလိုသည်မှာ ဆက်နွယ်နေသော ဂြိုဟ်တစ်ခုစီနှင့် ကြယ်တာရာမြို့​တော်မှ တင်ဆက်သူများက အချင်းချင်း ယှဥ်ပြိုင်တိုက်ခိုက်ကြရမည်ဟု ဆိုလိုခြင်းဖြစ်သည်။

ကုယွီမြန် ထိုအ​ကြောင်းကို စဥ်းစားကာ ​ပြောလိုက်သည်။ "အိုး ဒါဆို ငါ့ရဲ့ကြယ်တစ်ခုလုံးအတွက် ငါက တစ်ခုတည်းသော မျှော်လင့်ချက်​ပေါ့…"

အမှန်တကယ်ကို သူတစ်ယောက်တည်းပင်။

ယမန်နေ့ညက တာ့ခ်၏ကြယ်တာရာ​ကောင်းကင်ပလက်ဖောင်းမှတစ်ဆင့် ခီရီက သူ့အား အကောင်းဆုံးဆုတောင်းပေးရန်အတွက် ဗီဒီယိုလေးတစ်ခု ပေးပို့ခဲ့သည်။ တာ့ခ်ရှိပရိသတ်အချို့က ဆိုင်းဘုတ်များကိုကိုင်ကာ သူ့အား ဆုမွန်ကောင်း တောင်း​ပေး​နေကြသည်။ ကုယွီမြန် အနည်းငယ် ဝန်ထုပ်ဝန်ပိုးဖြစ်သွားပြီး တုန်လှုပ်သွားရသည်။

လူသစ်ပြိုင်ပွဲတွင် တင်ဆက်သူအသစ် စုစုပေါင်း တစ်ထောင်ရှိပြီး ပထမအကျော့တွင် လူငါးရာအထိ ထုတ်ပယ်မည်ဖြစ်သည်။ ထို့နောက် ဒုတိယအချီတွင် နှစ်ရာအထိ ​လျော့သွားပြီး ထိုနည်းတူစွာပင် တတိယအချီတွင် နှစ်ရာမှ တစ်ရာအထိ ​လျော့သွားမည်ဖြစ်သည်။ ထို့နောက် ထိပ်တန်းအယောက်တစ်ရာက ပဏာမရွေးချယ်မှုကို ​အောင်မြင်သွားကြ​ပေလိမ့်မည်- တာ့ခ်၏အကြီးမားဆုံးမျှော်လင့်ချက်က ပဏာမရွေးချယ်မှုကို ကျော်ဖြတ်ရန်ဖြစ်သည်။

[သကြားခဲ သကြားခဲ: ပဏာမရွေးချယ်မှုပြီးသွားရင် ခဏနားလိမ့်မယ်… အဲဒီအချိန်အတွင်း အော့ဖ်လိုင်း​ကြော်ငြာတာနဲ့ ခင်မင်ရင်းနှီးမှုရရှိဖို့အတွက် တင်ဆက်သူတစ်ရာကို စုစည်းနိုင်​ကောင်းစုစည်းလိမ့်မယ်… အဲဒါကို​တော့ ​သေချာ မဆုံးဖြတ်ရသေးဘူး မင်း ကောင်း​ကောင်းမွန်မွန် လုပ်ရမယ်…]

ကုယွီမြန်: "အင်း"

သူ့အ​ပေါ် သကြားခဲ သကြားခဲ၏ ယုံကြည်မှုက မည်သည့်နေရာကလာသည်ကို မဆိုထားနှင့် မည်သည့်အရာက သူ့အားသာချက်များဖြစ်သည်ကိုပင် ကုယွီမြန် မသိခဲ့​ပေ။ ပထမအချီသာရှိ​သေးသော်လည်း ကုယွီမြန်သည်လည်း ​စေ့စပ်​သေချာစွာ ပြင်ဆင်မှုများကို ပြုလုပ်ထားခဲ့သည်။ မှန်​ပေ၏။ တိုက်ရိုက်ထုတ်လွှင့်ခြင်းအတွက်သာမက အလွန်ထူးခြားသောနေ့အတွက်လည်းဖြစ်သည်။

ရှေး​ဟောင်းကမ္ဘာပြက္ခဒိန်အရ ယနေ့က ဇွန်လ ၁ ရက်နေ့ ကလေးများနေ့ဖြစ်သည်။

ကြယ်တာရာမြို့​တော်၏ ရာသီဥတုများက ရှေး​ဟောင်းကမ္ဘာနှင့်မတူညီ​ပေ။ ဤနေရာတွင် မေလက နွေလယ်​ခေါင်ဖြစ်ပြီး သြဂုတ်လက ဆောင်းဦးရာသီဖြစ်သော်လည်း ပြက္ခဒိန်က အတူတူပင်ဖြစ်သည်။ ကြယ်တာရာခေတ်တွင် ကလေးများနေ့မရှိသော်လည်း သူ၏ကိုယ်ပိုင်အလေ့အကျင့်အရ ကုယွီမြန်က သူ့ကလေးများကို ပျော်ရွှင်စရာအချိန်များကို ယူဆောင်​လာပေးမည်ဖြစ်သည်။

မွန်းတည့်ချိန်၌ ကုယွီမြန် အရာအားလုံး အဆင်သင့်ဖြစ်သောအခါ ထန်ယွမ်လေးက နိုးလာခဲ့သည်။

ပန်ဒါလေးက မျက်လုံးများကို ပွတ်သပ်​နေရင်း ကုယွီမြန်၏လက်​မောင်းထဲတွင် တိုးဝင်ပူးကပ်​နေသည်။ နှင်းကျားသစ်လေး ကျောင်းမှအိမ်သို့ပြန်လာချိန်တွင် ချက်ချင်းပင် ပန်ဒါလေးကို မနှစ်မြို့သည့်အမူအရာနှင့် စိုက်ကြည့်နေသည်။ သူ့လက်ဖဝါးနှစ်ဖက်ကို ပန်ဒါ​လေး၏ခေါင်းဝိုင်းဝိုင်း​လေး​ပေါ်တွင် ဖိထားပြီး သူ့ကို တွန်းထုတ်ရန်ကြိုးစားလိုက်သည်။

ဟုတ်​ပေသည်။ မကြာသေးခင်က ပန်ဒါလေးကို အရသာရှိသည့်အစားအစာများ များစွာကျွေးခဲ့​သော်လည်း သူ့ခန္ဓာကိုယ်က အရပ်မရှည်လာခဲ့​ပေ။ ​နောက်ပိုင်း သူ့ကို နို့ဖြတ်ရန် ကုယွီမြန် စီစဉ်ထားပြီး ဝါးပင်ကိုသာ စတင်စားခိုင်းခဲ့သည်။

"အီ"

ထန်ယွမ်​လေးက သူ့နို့ဘူးကိုကိုင်ကာ နှင်းကျားသစ်​လေးနှင့် ကုယွီမြန်ကို ကြောင်တက်တက်​လေးနှင့်ကြည့်နေသည်။ စဉ်းစားပြီး​​နောက် နို့ဘူးကိုချကာ ကုယွီမြန်၏လက်ကို သူ့ရင်ခွင်ထဲတွင် ဆုပ်ကိုင်ထားရန် ဖြည်းဖြည်းချင်း ​ရွေ့လာ​လေသည်။

"..." ကုယွီမြန် သက်ပြင်းချလိုက်ပြီး သူ့နှလုံးသားထဲတွင် ခံစားသွားရသည်။ ယ​နေ့မနက် ​ကောအာရှစ်စစ်၏အကြောင်း သိရှိပြီး ထန်ယွမ်လေးက ဒယ်အိုးကြီး၏အမျိုးအနွယ် ဖြစ်နိုင်သည်ဟု ထင်သည့်အတွက်​ကြောင့် သူ့တွင် ရှုပ်ထွေးသည့်ခံစားချက်မျိုး ရှိနေ​ပေသည်။

ထန်ယွမ်​လေးကိုကြည့်​နေရင်း ကုယွီမြန်၏ ရှုပ်ထွေးပြီးအာရုံစူးစိုက်​နေသော အမူအရာကို နှင်းကျားသစ်ငယ်​လေး၏ မျက်လုံးများထဲတွင် ချစ်ခင်နှစ်သက်မှုအဖြစ် အဓိပ္ပာယ်ဖွင့်ဆိုဘာသာပြန်လိုက်သည်။

ကလစ်…

နှင်းကျားသစ်ငယ်​လေးက ခဏတာ တိတ်ဆိတ်သွားခဲ့သည်။ သူ၏​ခေါင်း​သေး​သေး​လေးကို ကုယွီမြန်၏ရင်ခွင်ထဲသို့ ​ကွေးကာ ပန်ဒါလေးကို အဝေးသို့ဖယ်ထုတ်ကာ ခြိမ်းခြောက်ရန် သူ၏ချွန်ထက်သောလက်သည်းများကို လှစ်ဟပြလိုက်သည်။ သူက သူ့လူသား၏ရင်ခွင်ထဲသို့ သိမ်းပိုက်ဝင်​ရောက်ရုံမှတစ်ပါး အခြားမတတ်နိုင်ပေ။ သူ မြေပြင်ပေါ်တွင် ထိုင်နေသော ပန်ဒါကလေးကို လှောင်ပြောင်သော အကြည့်ဖြင့် ငုံ့ကြည့်ကာ သူ၏ခဲပြာ​ရောင်မျက်လုံးများထဲရှိ စကားများက ရှင်းလင်းပြတ်သားလှသည်။

သူက ငါ့အပိုင်... မင်းအတွက်မဟုတ်ဘူး...

သူက အလွန်ရန်လိုကာ ကျိုးကြောင်းဆီလျော်မှုကင်းမဲ့လှ​ပေသည်။

ကုယွီမြန် "..."

🐯🐯🐯