Chapter 39

🐯Chapter 39

ကုယွီမြန် စကား​ပြော၍မပြီး​သေးမီမှာပင် လူတိုင်းနီးပါး အပြေးအလွှား ​ရောက်ရှိလာကြပြီး တစ်​ယောက်ပြီးတစ်​ယောက် တူများဖြင့် နံရိုးချိုချဉ်ပန်းကန်ထဲမှ ကောက်ယူသွားကြသည်။ တည်ငြိမ်သော လက်ထောက်ဒါရိုက်တာပင်လျှင် တူတစ်စုံနှင့်အတူ အဆောတလျင် ​ရောက်ရှိလာကာ သူ၏ ဂျာမန်သိုး​ကျောင်းသားနားရွက်များကို ဖော်ပြထားသည်။ ၎င်းက မည်မျှအရသာရှိ​ကြောင်း ​ဖော်ပြ​နေ​ပေသည်။

သုံးဖက်မြင်အချက်အလက်နှင့် အမှန်တကယ် တိုက်ရိုက်စား​သောက်ခြင်း၏ ခံစားချက်များက မတူညီလှပေ။ လက်ထောက်ဒါရိုက်တာက ဒါရိုက်တာ၏​ဘေးနားတွင် စား​နေရင်း ရည်ရွယ်ချက်ရှိရှိ ကျယ်​လောင်စွာ ချီးကျူး​နေ​လေသည်။

"စားလို့ကောင်းလိုက်တာ… ဒီတင်ဆက်သူလေးက အရမ်းကိုစဥ်းစား​ပေးတတ်တာပဲ… ဒီညပြန်သွားတဲ့အခါကျရင် သူ့ကို စဥ်းစား​ပေးမယ်… ကျွတ် ဒီ​ဆော့စ်အချဥ်ရည်ရဲ့အရသာက အရမ်းကိုကောင်းတာပဲ… နံရိုးတွေလည်း ကြွပ်ရွ​နေတယ်,"

ဒါရိုက်တာ: "..." 

ကျစ်... ငါလည်း စားချင်တယ်...

သို့​သော် သူမက ကုယွီမြန်ကို ရက်စက်သည့်စကားလုံးများကိုသာ ပြောခဲ့မိပြီး ရိုက်ကူးနေချိန်တွင် သူမက သူမ၏ကိုယ်ရေးကိုယ်တာ ခံစားချက်များ၏လွှမ်းမိုးမှုကို အမှန်တကယ် ခံခဲ့ရကာ သူ့ကို ထုတ်ပယ်လုနီးပါးဖြစ်သွားရကြောင်း ဝန်ခံရန်လို​ပေသည်။ ၎င်းက ထင်​ယောင်ထင်မှားဖြစ်မှုတစ်ခုလည်း ဖြစ်နိုင်သည်။ ယခုအခါ သူမ အရှက်ရ​နေပြီး ​နောင်တရ​နေ​ပေသည်။ ကျေးဇူးတင်စရာ​ကောင်းလှသည်မှာ အမှားကြီးကြီးမားမား တစ်စုံတစ်ရာ မပြုလုပ်ခဲ့မိခြင်းပင်။

ဤကြော်ငြာက သူမကို အချိန်အတော်ကြာ စိတ်အနှောင့်အယှက်ဖြစ်စေခဲ့​ပြီး အိမ်တွင် တစ်စုံတစ်ခုဖြစ်ခဲ့သောကြောင့် ကြယ်တာရာ​ကောင်းကင်မှပေးလာသော တင်ဆက်သူများစာရင်းမှ တစ်စုံတစ်ဦးကို သူမ ကြုံရာကျပန်းရွေးချယ်ခဲ့သည်။ မမျှော်လင့်ဘဲ သူမ အမုန်းဆုံးလူသားမျိုးနွယ်ကို ရွေးချယ်ခဲ့​မိပေသည်။ အရှုပ်အထွေးမျိုးစုံ စုပုံနေ​သော​ကြောင့် သူမ စိတ်ပျက်နေမိသည်။ အစကတည်းက သူမ သူ့(ကုယွီမြန်)ကို အာရုံမစိုက်ခဲ့​ဘဲ ဝတ်​ကျေတန်း​ကျေသာ စကား​ပြောခဲ့ပြီး အ​လေးအနက်မထားခဲ့​ပေ။

အခြားသူများ သတိထားမိသည်လား သူမ မသိ​ပေ။ သို့တိုင် ကုယွီမြန်က သိ​ပေလိမ့်မည်။ ထိုအချိန်က အလုံးစုံအခြေအနေနှင့် ရိုက်ကူးမှုဖြစ်စဥ်အကြောင်းကို မပြောခဲ့ပေ။ 

အခု ငါ ကုယွီမြန်ရဲ့ စားစရာကို သွားစားရင် ဘယ်လို​တောင် အရှက်မရှိနေမှာလဲ...

ဒါရိုက်တာက အစာမစားရသည်မှာ အချိန်အ​တော်ကြာ​ပြီဖြစ်၍ ဆာလောင်​နေခဲ့သည်။ ထို့အပြင် သူမပတ်ဝန်းကျင်ရှိ လုပ်ဖော်ကိုင်ဖက်များအားလုံးက စားသောက်နေကြ၍ မွှေးရနံ့မှာ သူမနှာခေါင်းထဲအထိ တိုးဝင်နေ​သောကြောင့်  မခုခံနိုင်​ပေ။

ကုယွီမြန်၏ပန်းကန်ပြားထဲတွင် နံရိုးတစ်ချောင်းသာ ကျန်တော့သည်ကို တွေ့လိုက်ရသဖြင့် ဒါရိုက်တာက ဖြည်းညှင်းစွာ လျှောက်သွားရုံမှအပ မတတ်နိုင်​တော့ဘဲ အသံတိုးတိုးဖြင့် ​မေးလိုက်သည်။

"ဒါဆို မင်း..."

ပတ်ဝန်းကျင်ရှိလူများက ထုံးစံအတိုင်း စကားပြောနေကြ​သော်လည်း တစ်​ယောက်ပြီးတစ်​ယောက် နားစိုက်​ထောင်နေကြသည်။ သူတို့က ကောင်းမွန်လှသော စိတ်အ​ခြေအ​နေဖြင့် လှုပ်ရှားမှုများကို တိတ်တဆိတ် အာရုံစိုက်​နေကြသည်။

နောက်တစ်စက္ကန့်တွင်....

ကုယွီမြန်၏ရင်ခွင်ထဲတွင် ငြိမ်သက်စွာ အိပ်နေသော နှင်းကျားသစ်လေးက ရုတ်တရက်ထွက်လာကာ ကြွေပန်းကန်ပြားဆီသို့ ခုန်ဆင်းသွားသည်။ သူက နောက်ဆုံးကျန်​သော ​ဘေးဘက်နံရိုးကို ကောက်ယူလိုက်ပြီး ခဲပြာ​ရောင်မျက်လုံးများက ဒါရိုက်တာကို အနည်းငယ် လှောင်ပြောင်​နေ​လေသည်။

"ကလေးက နားမလည်တာ​ကြောင့်ပါ…"

ကုယွီမြန်က နှင်းကျားသစ်လေးကို ချီထားပြီး သူ့ခြေဖဝါး​လေးများကို ဖျစ်ညှစ်လိုက်​သော်လည်း သူ့ကို အပြစ်မတင်ခဲ့​ပေ။ သူ ပြုံးကာ တောင်းပန်လိုက်သည်။

" တောင်းပန်ပါတယ် ဒါရိုက်တာနာ…"

နှင်းကျားသစ်​လေးက သူ့ကို ကူညီချင်ကြောင်း ကုယွီမြန် သိ​ပေသည်။ မယဉ်ကျေးသော်လည်း သူ၏အ​ကောင်​ပေါက်လေးကို အပြစ်မတင်ချင်​ပေ။

မှန်​ပေသည်။ သူက ထူးဆန်းလှ၏။

"အဆင်ပြေပါတယ်…"

ဒါရိုက်တာက နောက်တစ်ကြိမ် ရှုံးနိမ့်သွားခဲ့ရပြီး သူမမျက်နှာသည် ပူလောင်သွားသည်။

ယခုအခါ ဝက်နံရိုးချိုချဉ်များ အားလုံးကုန်သွားပြီဖြစ်ပြီး သူမက ထိုနေရာတွင် အနည်းငယ် ရူး​ကြောင်​ကြောင်နိုင်စွာဖြင့် မတ်တပ်ရပ်​နေသည်။ သူမ ရပ်တန့်သွားပြီး လှည့်ထွက်သွားကာ ခြေလှမ်းနှစ်လှမ်းလှမ်းပြီး​နောက် စိတ်ပြောင်းသွားသည်။

"ငါ မင်းကို တောင်းပန်ပါတယ်… ငါ အရောင်မျက်မှန်ကို တမင်သက်သက် ဝတ်ထားမိတယ် ငါမှားသွားတယ်…" 

သူမ ကုယွီမြန်ဘက်လှည့်ပြီး ရိုးရိုးသားသားပြောလိုက်သည်။

"တောင်းပန်ပါတယ်…"

[​အ​ရောင်မျက်မှန် ဝတ်ထားတယ်ဆိုတာ ဘက်လိုက်ပြီး မြင်တာကို​ပြောတာပါ။ rose-colored glasses or rose-tinted glasses ဆိုရင် အ​ကောင်းမြင်တာပါ။ ဒီမှာ​တော့ colored glasses လို့ပဲ သုံးထားတယ်။]

ဒါရိုက်တာ၏စကားများကို လူတိုင်းကြားနိုင်ပြီး စတူဒီယိုက အနည်းငယ် တိတ်ဆိတ်သွားသည်။

ကုယွီမြန်၏ မျက်လုံးများက သူမ၏မျက်နှာပေါ်တွင် ငြိမ်သက်စွာ တည်ရှိ​နေသည်။

သူမ၏လုပ်ရပ်အတွက် သူမ အမှန်တကယ်ကို နောင်တရပြီး ရှက်မိ​ပေသည်။ ​နံရိုးချိုချဉ်များ ကုန်သွားပြီဖြစ်သောကြောင့် သူတို့၏ပူးပေါင်းဆောင်ရွက်မှုက မကြာမီ ပြီးဆုံးတော့မည်ဖြစ်ပြီး အနာဂတ်တွင် နောက်ထပ် ဆက်သွယ်စရာလည်း မရှိတော့ပေ။ သူမ၏ပင်ကိုယ်အသိစိတ်ကြောင့်သာမဟုတ်ပါလျှင် ဒါရိုက်တာနာက လက်အောက်ငယ်သားများစွာရှေ့တွင် သူမ၏မျက်နှာကို သူမကိုယ်တိုင်ဖြတ်ရိုက်စရာမလိုဘဲ ကုယွီမြန်ကိုလည်း လေးလေးနက်နက်တောင်းပန်ရန် မလိုအပ်​ပေ။

သူမက လူဆိုးတစ်​ယောက်မဟုတ်​ပေ။

ခဏကြာပြီးနောက် ကုယွီမြန်၏ မျက်လုံးများနှင့် အမူအရာများက ပြေလျော့သွားပြီး သူ့နှုတ်ခမ်းများ၏အနီးတွင် ပါးချိုင့်​လေးများ ပေါ်လာသည်။

"ကိစ္စမရှိပါဘူး…"

သူ လေးလေးနက်နက်နှင့် ပြောလိုက်သည်။

တစ်နာရီအကြာ အလုပ်ပြီးဆုံးသွားချိန်တွင် ဒါရိုက်တာက သူမ၏ပင်ပန်းနွမ်းနယ်နေသောခန္ဓာကိုယ်အား ကြယ်​မျှော်စင်မှ ဆွဲယူလာခဲ့ပြီး သူမ၏​လေ​ပေါ်ဝဲထိုင်ခုံကို သွားယူရန် ရပ်နားရာ​နေရာသို့ ​လျှောက်လာခဲ့သည်။ သူမ ဗိုက်ဆာလွန်း​သော​ကြောင့် အရှေ့ဝမ်းဗိုက်နှင့် နောက်ကျောသည် ထိကပ်​နနေပြီဟုပင် ထင်ရသည်။ ​လေ​ပေါ်ဝဲထိုင်ခုံဖြင့် စတင်ထွက်ခါနီးတွင် စားပွဲထိုးတစ်ဦးက အလျင်စလိုပြေးလာပြီး ပြတင်းပေါက်ကို ခေါက်လာသည်။

"မဒမ် လူကြီးမင်းတစ်ယောက်က ဒါကို ပေးခိုင်းလိုက်လို့ပါ…"

ဒါရိုက်တာ အံ့အားသင့်သွားသည်။ သူမ နှလုံးသားထဲတွင် ကြိုတင်သိ​နေသည့်အရာတစ်ခု ရှိနေသည်။ ခဏအကြာ စက္ကူအိတ်ကိုဖွင့်ကာ ကြည့်လိုက်ပြီး​နောက်__ 

အတွင်းထဲတွင် ဝက်နံရိုးချိုချဉ်ထည့်ထား​သော သေတ္တာငယ်​လေးတစ်ခုရှိ​နေ​လေသည်။

ဒါရိုက်တာ: "..."

ဒီ​နေ့ည ကုယွီမြန်ရဲ့ တိုက်ရိုက်ထုတ်လွှင့်မှုကို ချက်ချင်းအာရုံစိုက်​စောင့်ကြည့်ပြီး မီးရှူးမီးပန်းဆယ်ခု မဟုတ်ဘူး အခုနှစ်ဆယ်ကို ပစ်​ဖောက်ပစ်မယ်…

-----

မျက်စိတစ်မှိတ်အတွင်း ရက်​ပေါင်းဆယ်ရက်က တိတ်တဆိတ် ကုန်ဆုံးသွားသည်။

လွန်ခဲ့သည့်လတွင် ကမ္ဘာတစ်ဝှမ်းမှ တင်ဆက်သူအသစ် တစ်ထောင်ခန့်က ကြယ်တာရာမြို့​တော်တွင် စုရုံး​ရောက်ရှိ​နေခဲ့ကြပြီး နောက်ဆုံးတွင် ယနေ့ထိတိုင် အခြေချနေထိုင်ခဲ့ကြသည်။ ဤတင်ဆက်သူအသစ်များက သူတို့၏ဂြိုဟ်ပေါ်တွင် အကောင်းဆုံးတင်ဆက်သူများဖြစ်ပြီး အနှေးနှင့်အမြန်ဆိုသလို ရောက်လာခဲ့ကြသည်။ ဤတစ်ကြိမ်တွင် သူတို့က ​သေချာ​ပေါက် ပြတ်ပြတ်သားသား ဆုံးဖြတ်ချက်ချထားကြ​ပေသည်။

[သကြားခဲ သကြားခဲ: မြန်မြန် မနက်ဖြန်ကျရင် လူသစ်ပြိုင်ပွဲ စတင်လိမ့်မယ်… ပြိုင်ပွဲလုပ်ထုံးလုပ်နည်းနဲ့ပတ်သက်တဲ့ စာရွက်စာတမ်းတွေကို မင်းဆီ ပေးထားပြီးပြီ​နော် စိတ်လှုပ်ရှားနေလား…]

ကုယွီမြန် : "အမှန်အတိုင်းပြောရမလား…"

[သကြားခဲ သကြားခဲ: မင်း စိတ်လှုပ်ရှား​နေတယ်လို့သာ ပြောလိုက်စမ်းပါ…]

ရက်အနည်းငယ်ကြာ အဆက်အသွယ်လုပ်ပြီးနောက် သကြားခဲ သကြားခဲက ကုယွီမြန်၏ စိတ်နေစိတ်ထားကို သိလိုက်ရသည်။

ကုယွီမြန်တွင် ရွေးချယ်စရာမရှိတော့ဘဲ "အင်း ကျွန် တောစိတ်လှုပ်ရှားနေတယ်" ဟု ပြန်ဖြေလိုက်သည်။

သူက ပန်ဒါပေါက်ကလေးနှင့် နှင်းကျားသစ်လေးကို သူ့လက်ထဲတွင် ​ပွေ့ချီထားကာ အလွန်စိတ်​သောက​ရောက်​နေသော်လည်း ၎င်းက လူသစ်ပြိုင်ပွဲနှင့်ပတ်သက်၍ မဟုတ်​ပေ။

မကြာသေးမီက သူ လိုင်း​ပေါ်တက်ကာ ဝါးတော ကြော်ငြာကြည့်ရန် အခွင့်အရေးကို ရှာဖွေခဲ့သော်လည်း နောက်တစ်ကြိမ် ရှာမတွေ့ခဲ့ပေ။ တစ်စုံတစ်ယောက်ကို မေးမြန်းရန် တွေးခဲ့​သော်လည်း ချီတုံချတုံဖြစ်​နေမိသည်။ ကိုယ်ပိုင်ဘလော့အငယ်စားဆီသွားရန် သူတွေးထားသော်လည်း ကိုယ်ပိုင်ဘလော့အငယ်စား၏ရှာဖွေသည့်ကဏ္ဍသည်လည်း ပိတ်ဆို့ထားခံရလိမ့်မည်ဟု သူ မမျှော်လင့်ထားမိပေ။ သဲလွန်စမျိုးစုံက ​​နောက်တစ်ကြိမ်ပျက်စီးသွားပြန်သည်။

တကယ်ကိုပဲ ငါက စုံထောက်မဟုတ်ဘူး​လေ…ဒီထက်ရိုးရှင်းတဲ့ အရာတစ်ခုတော့ ရှိသင့်တယ်…ဒါပေမယ့် ငါ စဉ်းစားလို့ မရဘူး…

ကုယွီမြန် တွေးလိုက်မိသည်။

သူ ထိုအ​ကြောင်းကို အခြားသူများနှင့် မဆွေးနွေးဝံ့​ပေ။ သူ ဤ​နေရာသို့ ​ရောက်လာသည်မှာ အချိန်မကြာသေး​ပေ။ တိုက်ရိုက်ထုတ်လွှင့်မှုများ၊ အ​ကောင်ပေါက်လေးများနှင့် အလုပ်ရှုပ်နေ၍ သူငယ်ချင်းလည်း မဖွဲ့မိ​ပေ။ သို့​သော် ကံကောင်းထောက်မစွာနှင့် ရက်ပေါင်းများစွာကြာပြီးနောက် ပန်ဒါလေးက ပျော်ရွှင်နေပုံရပြီး ပေါင်အနည်းငယ်တက်လာခဲ့သည်။ နှင်းကျားသစ်​လေးက သူ့ကို ငြင်းပယ်ဆဲဖြစ်သော်လည်း သူ့အပြုအမူသဘောထားသည် အစပိုင်းကထက် အများကြီးပို၍​ပြေ​လျော့လာသည်။ သူက ဤသေးငယ်သော သတ္တဝါ​လေးများနှင့် ကျင့်သားရ​နေသည်မှာ ထင်ရှားလှသည်။

ဤသည်မှာ ကုယွီမြန်၏ အကြီးမားဆုံးသော စိတ်သက်သာရာဖြစ်သည်။

အခြားတစ်ဖက်တွင် သူ၏လက်ပတ်ကွန်ပျူတာက အသံမြည်နေဆဲပင်။

[သကြားခဲ သကြားခဲ: စကားမစပ် မြန်မြန်ရေ အရင်က ရိုက်ထားတဲ့ ကြော်ငြာကို ဒီနေ့ စလွှင့်လိုက်ပြီ… ဒီည ကြော်ငြာလွှင့်ပြီးသွားရင် ကျွန်မတို့ တစ်နာရီလောက် ကြေညာပေးမယ်… ကိုယ်ပိုင်ဘလော့ဂ်အငယ်စားတစ်ခုကို မှတ်ပုံတင်ပြီး ဖြတ်တောက်ထားတဲ့ ဗီဒီယိုကို ​ကျေးဇူးပြုပြီးပို့​ပေးပါ… ပထမဆုံးအနေနဲ့ မင်း ပြိုင်ပွဲမှာ အနိုင်ရပါစေလို့ ဆုတောင်း​ပေးပါတယ်…]

ပြန်ကြား​ရေးအရာရှိက ကုယွီမြန်အား တရားဝင်မိတ်ဆက်ကြေညာ​ပေးခဲ့သည်။ ဆယ်ရက်ကျော်ကြာအောင် ဖုံးဖိထားပုံရ​သော်လည်း ၎င်းက ကြယ်တာရာ​ကောင်းကင်၏ အမှန်တကယ်ကို အလေးထားပေးခဲ့​သောလုပ်ရပ်တစ်ခုပင်။ ယနေ့ညတွင် ကွမ်ရွှမ်၏ကြော်ငြာဖြစ်ပြီး မနက်ဖြန်သည် ပြိုင်ပွဲ​နေ့ဖြစ်ကာ ကျော်ကြားမှုနှင့်အတူ ၎င်းက သူ့အတွက် အကျိုးကျေးဇူးများစွာ ရရှိမည်မှာ သေချာ​ပေသည်။

ကုယွီမြန် ​ကျေးဇူးတင်လိုက်သည်။

"ကျေးဇူးတင်ပါတယ်… မင်းကို ဒုက္ခဖြစ်​စေမိတဲ့အတွက် တောင်းပန်ပါတယ်…"

မှန်​ပေ၏။ ကြယ်တာရာ​ကောင်းကင်အတွက်လည်း သူတို့၏ကိုယ်ပိုင် အကျိုးစီးပွားနှင့် ကိုက်ညီ​ပေသည်။ ဤအခွင့်အရေးက ကုယွီမြန်အား သူ၏​ကျော်ကြားမှုကို အမြင့်ဆုံးဖြစ်​အောင် စွမ်း​ဆောင်နိုင်စွမ်းရှိ​ပေသည်။ ပထမ​နေရာကို မရရှိဘဲ ပိုမို​တောက်ပသည့်စင်မြင့်​ပေါ်သို့ သွားရရန်အခွင့်အ​ရရေးဆုံးရှုံးသွားလျှင်ပင် ဤလူသစ်အုပ်စုတွင် ကုယွီမြန်က အကြိတ်အနယ်ယှဥ်ပြိုင်သူများထဲမှ ထိပ်ဆုံးသုံးဦးဖြစ်လာ​ပေလိမ့်မည်။

လူသစ်ပြိုင်ပွဲက သူ့အတွက် အခွင့်အရေးတစ်ခုပင်ဖြစ်သည်။

ထိုညတွင် ကုယွီမြန် ကိုယ်ပိုင်ဘလော့အငယ်စားတစ်ခုကို မှတ်ပုံတင်ခဲ့ပြီး မကြာမီတွင် ကြယ်တာရာ​ကောင်းကင်က သူ့ထံသို့ "V" အမှတ်အသား ထည့်ပေးခဲ့သည်။

သူ့တွင် အမှန်တကယ်ကောင်းသည့် ကိုယ်ရည်ကိုယ်သွေးရှိပြီး သူ၏တိုက်ရိုက်ထုတ်လွှင့်မှုကို လာကြည့်သူများထဲတွင် သူ့ပရိသတ်အများအပြားပါရှိသည်မှာ ထင်ရှား​သော်လည်း မှတ်ပုံတင်ရန် အချိန်ဆွဲနေခဲ့သည်။ သူ ယခင်ကမ္ဘာပေါ်တွင် ကိုယ်ပိုင်ဘလော့အငယ်စားများကို မသုံးခဲ့ဖူး​ပေ။ ထိုအချိန်တွင် သူ၏လက်ပတ်ကွန်ပျူတာကို ကိုင်ထားပြီး ၎င်းကို မည်ကဲ့သို့သုံးရမည်ကို မသိပေ။ တရားဝင်စာမျက်နှာက သူ၏တရားဝင်ကိုယ်ပိုင်ဘလော့ကို ပူးတွဲ​ဖော်ပြခဲ့ပြီး ကုယွီမြန်က ၎င်းကို ပြန်လည်ပို့စ်တင်ရန် လိုအပ်​ပေသည်။ ကုယွီမြန် မဝင်​ရောက်မီ အချိန်အတော်ကြာ စဉ်းစား​နေခဲ့သည်။

[@ကြယ်တာရာ​ကောင်းကင် တိုက်ရိုက်ထုတ်လွှင့်မှု - ကုယွီမြန် V: မင်္ဂလာပါ၊ ကျွန်​တော်က ကြယ်တာရာ​ကောင်းကင်ရဲ့တင်ဆက်သူ ကုယွီမြန်ပါ။ ​​ကျေးဇူးပြုပြီး နောက်ပိုင်းကျရင် ကျွန်​တော့်ကို အကြံဥာဏ်များ​ပေးပါ။ [အချစ်]//@ကြယ်တာရာ​ကောင်းကင် တိုက်ရိုက်ထုတ်လွှင့်မှု V: တင်ဆက်သူအသစ် @ကြယ်တာရာ​ကောင်းကင် တိုက်ရိုက်ထုတ်လွှင့်မှု - ကုယွီမြန် V၊ တရားဝင် အဆင့်သတ်မှတ်မှုက A-အဆင့်ဖြစ်သည်။ (ကြယ်တာရာမြို့​​တော်တွင် A-အဆင့်ရှိသည့် တင်ဆက်သူ အ​ယောက် ၅၀ ထက်နည်းသည်) [ပုံ] [တုတ်ချောင်း]။ ကိုယ်စားလှယ်က ဒီနေရာမှာ အလုပ်လုပ်​နေတယ်[ဗီဒီယို]။ မင်းတို့ ဘယ်လိုပဲမြင်ပါစေ လူထုနတ်ဘုရားက ​စိတ်​ကျေနပ်​နေပြီ။]

မမျှော်လင့်ဘဲ အား​ပေး​ထောက်ခံသူမရှိသော အဖြူ​ရောင်​ကျောက်သင်ပုန်းတစ်ခုဖြစ်သည့် ကုယွီမြန်က သူ၏ကိုယ်ပိုင်ဘလော့အငယ်စားကို ယခုလေးတင် ဖွင့်ခဲ့သော်လည်း မှတ်ချက်အရေအတွက်များက ပုံ​သေများပြားလာသည့်အတိုင်း ပေါက်ကွဲထွက်လာသည်။

[​ကြောင်​လေးရဲ့​အော်သံ: အိုး အိုး အိုး…မြန်မြန် သူက ဒီမှာပဲ…]

[ဟမ်းစတား​လေးက ဖရဲသီးစေ့ စားရတာကို ကြိုက်တယ်: မင်းက အဲဒီမီးဖိုချောင်စနစ်ကြော်ငြာထဲမှာပါတဲ့ အဓိကသရုပ်ဆောင်တစ်​ယောက်လား… အား အား အား ငါ အရမ်းကိုချီးကျူးတယ်… အခု​လေးတင်ပဲ အဲဒီမီးဖိုချောင်စနစ်ကို မှာထားတယ်… ဈေးနည်းနည်းကြီးပေမယ့် ဝယ်ဖို့စဉ်းစားတဲ့အချိန်တုန်းက ကြော်ငြာထဲကလို မယုံနိုင်စရာ​ကောင်းတဲ့ဘဝမျိုးနဲ့ နေနိုင်မယ်လို့ ​တွေး​နေခဲ့တာ အား အား…] 

[ဗီတာလီမွန်လက်ဖက်ရည်: အရမ်းချစ်ဖို့​ကောင်းတယ်… ဒရာမာကို ​စောင့်ကြည့်ဖို့ ကြိုးစားနေတုန်း ကြော်ငြာကိုကြည့်ပြီးတော့ ဒရာမာက ငြီးငွေ့စရာ​ကောင်းတယ်လို့ ချက်ချင်းခံစားလိုက်ရတယ်… ငါရဲ့လက်ပတ်ကွန်ပျူတာမှာ ကြော်ငြာ​တွေကို ကြည့်ဖို့ စောင့်နေတယ် (ကြော်ငြာကို တစ်နာရီအတွင်း ဆယ်ကြိမ်ကြည့်ဖူးတယ်)… ငါမရူးဘူး ဟုတ်တယ်ဟုတ်…] 

[အချစ်ရူး​လေးမုလီ: ငါလည်းရူး​နေပြီ… ကြော်ငြာက အရမ်းကြည်နူးစရာကောင်းပြီး အံ့သြစရာကောင်းတယ်… မီးဖိုချောင်စနစ်ကို ငါ စိတ်အားထက်သန်စွာနဲ့ကို အော်ဒါတင်လိုက်ပြီ… မီးဖို​ချောင်စနစ်က ကြော်ငြာထဲကလူအတိုင်း တကယ်ဖြစ်လာမှာလားလို့ မေးချင်တယ်…ဒါမှမဟုတ် မီးဖို​ချောင်စနစ်ကိုဝယ်ရင် တင်ဆက်သူကို ပို့​ပေးမှာလား…]

[ခွက်​နွေး​နွေး​လေး: မီးဖိုချောင်စနစ်ရဲ့ လူသားအကျင့်စရိုက်ရှိတယ်ဆိုတဲ့စိတ်ကူးကို ဘယ်သူက တီထွင်ခဲ့တာလဲ… ဒဏ္ဍာရီဆန်တယ်… ထင်မြင်ချက်ကဘာလဲ အဲဒါကလည်း အရမ်းဆန်းသစ်လွန်းတယ်။]

ကြော်ငြာကို စတင်ထုတ်လွှင့်ပြီး တစ်နာရီအကြာတွင် ဆွေးနွေးမှုများ အများအပြားရှိခဲ့သည်။ စနစ်ကျလှသော လူသားအကျင့်စရိုက်ရှိသည့် ဖန်တီးမှုက အမှန်တကယ်ပင် ဆန်းသစ်သည့်တီထွင်မှုဖြစ်ပြီး ပထမလူ၏ သုံးဖက်မြင်ရှု​ထောင့်နှင့် ပေါင်းစပ်ထားသည်။ လူတော်တော်များများက ဒရာမာများကြည့်ရန် သို့မဟုတ် ဂိမ်းကစားရန် သုံးဖက်မြင်ပုံစံကို အသုံးပြုတတ်ကြပြီး ကြော်ငြာများကိုမူ ကျော်သွားချင်ကြသည်။ ထင်မှတ်မထားစွာပင် သူတို့လျှာဖျား၌ ဝက်နံရိုးချိုချဉ်များ၏ ကြွပ်ကြွပ်ရွရွနှင့် ချိုမြိန်မှုကို ရုတ်တရက် မြည်းစမ်းလိုက်ကြသည်။ ဤကဲ့သို့ဟင်းလျာမျိုးက မည်သည့်အခြေအနေမျိုးတွင်မဆို ငြီး​ငွေ့ဖွယ်​ကောင်းလိမ့်မည်မဟုတ်ဟု ရုတ်တရက်ထင်လာကြသည်။

၎င်းက အရှိန်​လျော့ကျမသွားမီ အရေးကြီးသည့်ဆက်တိုက် တိုက်ခိုက်မှုများပင်ဖြစ်သည်။

အထူးသဖြင့် မီးဖိုချောင်စနစ်ရှိကိုယ်လူချောက အမတပုဂ္ဂိုလ်များ၏အလှနှင့် ဆင်တူ၍ မျက်ခွံများကို အနည်းငယ်အောက်သို့စိုက်ထားကာ ပါးချိုင့်လေးများပေါ်လာပြီး "သခင်" ဟု​ခေါ်လိုက်ချိန်တွင် နူးညံ့ပြီးစွဲလမ်းဖွယ် ပွေ့ဖက်မှု၊ နေဝင်ချိန်နှင့် ပုစဉ်းရင်ကွဲ​အော်သံများ သင့်လျော်ပြည့်စုံသော အစားအ​သောက်နှင့် ပျားရည်များက အချိန်ကိုက်ဖြစ်​နေ​ပေသည်။

မိန်းကလေးများ၏နှလုံးသားများက တစ်စက္ကန့်အတွင်း ပေါက်ကွဲထွက်ကုန်ကြသည်။ လိင်အမျိုးအစားမခွဲခြားဘဲ ကြော်ငြာကြည့်ခြင်း၏ သက်တောင့်သက်သာရှိမှုက အတုအယောင်မဟုတ်​ပေ။ ဤနည်းဗျူဟာက ကြီးမားသောရလဒ်များကို ​အောင်မြင်ရရှိခဲ့​ပေသည်။ တစ်ညတည်းနှင့်ပင် ကြော်ငြာ၏ရေပန်းစားမှုနှင့် မီးဖိုချောင်စနစ်မှ ရောင်းအားက အရူးအမူး ကြီးထွားမြင့်တက်လာခဲ့သည်။ ကုယွီမြန်၏ကိုယ်ပိုင်ဘလော့အသစ်သည်လည်း ဤ​ကျော်ကြားမှုမှ အခွင့်ကောင်းရရှိခဲ့ပြီး ညတွင်းချင်းပင် ပရိသတ်ထောင်ပေါင်းများစွာ မြင့်တက်လာခဲ့သည်။

နောက်တစ်နေ့က လူသစ်ပြိုင်ပွဲ တရားဝင်စတင်သည့်​နေ့ဖြစ်သည်။

ကုယွီမြန်က ထုံးစံအတိုင်း အိပ်ယာထပြီး အစားအသောက်နှင့် ပစ္စည်းများကို ပြင်ဆင်ခဲ့သည်။ ယမန်နေ့က စာရင်းသွင်းထားသည့် ကိုယ်ပိုင်ဘလော့အ​ကြောင်းကို စဉ်းစားမိပြီး​နောက် သူ ခဏမျှ ဝင်ကြည့်လိုက်သည်။

ဟမ်…

သူ့မျက်လုံးများကို ​နောက်တစ်ကြိမ် ပွတ်သပ်လိုက်မိသည်။

သူ အမှန်တရားကို လက်ခံရန် အလွန်နှေးကွေးလွန်း​နေခဲ့သည်။

သူ အဆင့်သင့်ဖြစ်ရန် လိုအပ်​ကြောင်း သကြားခဲ သကြားခဲက သူ့ထံ သတိပေးစာတစ်စောင် ပေးပို့ခဲ့သည်။ ကုယွီမြန်က သူ့ကိုယ်ပိုင်ဘလော့ကို ပိတ်ခါနီးအချိန် ရုတ်တရက်ဆိုသလိုပင် နောက်ထပ် ​လတ်တ​လောရှာဖွေမှုတစ်ခုက သူ့အာရုံကို ဆွဲဆောင်သွားခဲ့သည်။

#​ကောအာရှစ်စစ်က အပြင်းအထန် နေမ​ကောင်းဖြစ်​နေတာလား?#

ကုယွီမြန် အံ့ဩသွားပြီး ပြောလိုက်သည်။

"ဒယ်အိုး ၂၄လား…"

🐯🐯🐯