Chapter 38

🐯Chapter 38

ကုယွီမြန်က နံရိုးချိုချဉ်များကို ပန်းကန်ပြားပေါ်တွင် ထားကာ နှမ်းဖြူစေ့များနှင့် ပါးပါးလှီးထားသော ကြက်သွန်နီများကို ဖြူးလိုက်သည်။ ဓားကိုကျွမ်းကျင်စွာ အသုံးပြု၍ ဝက်နံရိုးချိုချဉ်၏ပန်းကန်ဘေးတွင် မုန်လာဥနီကို လှီးဖြတ်ကာ နှင်းဆီပန်းပုံသဏ္ဍာန် အလှဆင်လိုက်သည်။

မီးရောင်အောက်ရှိ ကြွပ်ရွ​နေ​သောဝက်နံရိုးများက အနီရောင်သလင်း​ကျောက်တုံးများကဲ့သို့ တောက်ပနေသည်။ သကြားအမှုန်​လေးများနှင့် ​ရောစပ်ထား​သော ​ဆော့စ်အရည်ကလည်း မွှေးကြိုင်လှသည်။ ထို့​နောက် အဖြူရောင်ကြွေပန်းကန်ပြားပေါ်တွင် သပ်သပ်ရပ်ရပ်ဖြင့် ချထားလိုက်သည်။ ​မွှေးပျံ့လွန်း​သောရနံ့​ကြောင့် သူတို့ ဗိုက်များပင်ဆာ​လောင်လာသည်ကိုမဆိုထားနှင့် ကြည့်လိုက်ရုံဖြင့် ကြွပ်ရွ​နေ​သော ဝက်နံရိုးများ၏အပြင်ဘက်မှ နူးညံ့ပြီး ချိုချိုချဥ်ချဉ်အရသာတို့ကို စိတ်ကူးယဥ်ကြည့်နိုင်သည်။

နှင်းကျားသစ်လေး ကင်မရာမြင်ကွင်းထဲသို့ ဝင်သွားသော်လည်း ဒါရိုက်တာက ဘာမှမပြောသောကြောင့် ကုယွီမြန် ဆက်လုပ်​နေလိုက်သည်။ ကုယွီမြန် ပန်းကန်ပြားကို မြှောက်လိုက်ပြီး​နောက် နှင်းကျားသစ်လေးက ခေါင်းငုံ့ကာ အနံ့ခံလာသည်။ ထို့နောက် သူ၏စိတ်ကျေနပ်အားရမှုကိုဖော်ပြရန် လူငယ်လေး၏နဖူးပေါ်သို့ သူ့လက်ဖဝါးနှင့် ဖိလိုက်သည်။ ကုယွီမြန်၏ မျက်လုံးများ နူးညံ့ပျော့ပျောင်းသွားပြီး တူတစ်ချောင်းကို ကောက်ယူကာ သူ့အား တစ်လုပ်​ကျွေးလိုက်သည်။

"က​လေးလေး ပူ​သေးတယ် သတိထားဦး… စားပြီးရင် အရိုးကို ထွေးထုတ်ဖို့ မမေ့နဲ့​နော်…"

စက္ကန့်အနည်းငယ်ကြာ တိတ်ဆိတ်သွားပြီးနောက် တိုးတိုးတိတ်တိတ် ဆွေးနွေးမှုအဖွဲ့က ရူးသွပ်ဖွယ်စာတိုများကို ပေးပို့လာကြသည်။

[ရုပ်​သေးရုပ်​ကြောင်က အ​စေခံမဟုတ်ဘူး (​ထောက်ပံ့​ရေး): အား အား…]

[လုလု​လေး (လက်​ထောက်ဓါတ်ပုံဆရာ): သုံးဖက်မြင်ကိရိယာတွေကို ငါမုန်းတယ်… မြင်နေရပြီး အနံ့လည်းရ​နေပေမယ့် မစားရတဲ့ခံစားချက်ကို မင်းတို့ သိကြလား… ကင်မရာက သူနဲ့ သူ့ပန်းကန်တွေဆီက​နေ မီတာတစ်ဝက်လောက်ပဲ ဝေးတယ် TAT]

[အပြာရောင် အပြာ​ရောင် (ထောက်ပံ့ရေး): တကယ့်ကို လွန်လွန်းတယ်... ငါ့ဗိုက်ထဲကအော်သံ​တွေ ကြားရတဲ့သူတိုင်းကို အရမ်းရှက်မိတယ်…]

[ငါးဆားနယ် (ပြင်ဆင်​ရေး): ငါ ဒါရိုက်တာနာရဲ့ဘေးမှာ ရှိနေပြီး ​စောင့်ကြည့်​နေတာ… သူ လှမ်းအော်ခါနီးဖြစ်သွား​သေးတယ်… နံရိုးတွေ အိုးထဲက ထွက်လာတဲ့အချိန်ကျ​တော့ ပါးစပ်ပိတ်သွားပြီး ဖြည်းဖြည်းချင်း ထိုင်ချသွားတယ်။ အံ့သြစရာပဲ…]

[ငှက်များကဲ့သို့ငါး (အလင်း): ဟမ် သူ ရပ်လို့​​ပြောခဲ့တယ်​ပေါ့လေ… အကျိုးသက်ရောက်မှုက တကယ့်ကိုပြိုင်ဖက်ကင်းပဲလို့ ထင်တယ်… ပြီးတော့ ငါ့မှာ အလိုလိုသိ​နေတာတစ်ခုရှိတယ်။… နောက်ထပ် စိတ်တက်ကြွစရာ​တွေရှိသေးဦးမှာ… ဒီရိုက်ကူး​ရေးကို သူ ဘယ်လိုလုပ်မလဲဆိုတာ ကြည့်လိုက်ရအောင်…]

ဝက်နံရိုးချိုချဉ်ပန်းကန်ကို ပြင်ဆင်ပြီးဆုံးသွားပြီဖြစ်သော်လည်း အသံသွင်းမှုက မပြီးပြတ်​သေး​ပေ။

လက်ထောက်ဒါရိုက်တာက ၎င်းကို ကြည့်လိုက်ပြီး​နောက် ရုတ်တရက် သူ့ဦးနှောက်ထဲတွင် လှုံ့ဆော်မှုတစ်ရပ် ပေါ်​ပေါက်လာသည်။

"မြင်ကွင်းကိုပြောင်းလိုက်… ဒီအပိုင်းမှာ နတ်ဘုရားရဲ့မြင်ကွင်းရှု​ထောင့်ကို မသုံးနဲ့… အဲဒီကလေးဆီ ရှု​ထောင့်ကို ပြောင်းလိုက်…"

ဒါရိုက်တာနာ : "အာ…"

လက်ထောက်ဒါရိုက်တာ :  "ဒါရိုက်တာနာ စိတ်မရှုပ်ပါနဲ့ ဒီ​နေရာမှာ ကျွန်တော်ရှိပါတယ်…"

ထို့နောက် ရိုက်ကူးရေးတာဝန်ခံက အလင်းမျက်နှာပြင်​ပေါ်တွင် ပေါ်ထွက်လာ​စေရန် ထိန်းချုပ်ကိရိယာကို အလျင်စလို ဆွဲယူလုနီးပါးဖြစ်သွားပြီး မြင်ကွင်းနယ်နိမိတ်များကို စတင်ချိန်ညှိလိုက်သည်။ မကြာမီတွင် အလွန်​သေးငယ်​သောကင်မရာက နှင်းကျားသစ်လေးဆီသို့ ပြောင်းရွှေ့သွားပြီး မြင်ကွင်းရှု​ထောင့်က စတင်ပြောင်းလဲသွားသည်။

မြင်ကွင်းရှုထောင့်ကို ပြောင်းလဲသွားပြီးမကြာမီ နှစ်စက္ကန့်အကြာ၌-

ဒါရိုက်တာနာနှင့် လက်ထောက်ဒါရိုက်တာ: "…"

အစပိုင်းတွင် လူနှစ်ယောက်က ငြင်းခုန်ချင်ကြ​သော်လည်း စကားများသည် ပါးစပ်ထဲတွင် တစ်ဆို့သွားပြီး ပျောက်ကွယ်သွားကြသည်။

သူတို့၏မြင်ကွင်းများက မရှင်းလင်းကြသေး​ပေ။ ပထမဆုံး သူတို့ခံစားလိုက်ရသည့်အရာက အဝင်ဝရှိ ဝက်နံရိုးချိုချဉ်၏ အံ့သြစရာကောင်း​သော ခံစားချက်ပင်။

နံရိုးများက အနည်းငယ်ပူနေသေးသည်။ ကိုက်လိုက်​သောအခါ ကြွပ်ကြွပ်လေးနှင့် အရသာရှိလှ​ပေလိမ့်မည်။ အရသာ​ကောင်းမွန်​စေရန် အရသာရှိ​သောအသားနှင့် နံရိုးများကို ​ဆော့စ်အရည်နှင့် ကြော်ထား​သော​ကြောင့် ပို၍ပင်အရသာရှိစေသည်။ ၎င်းက ရွှတ်တွဲတွဲဖြစ်မ​နေသလို အလွန်ဝါးစရာလည်း မလို​ပေ။ ပါဝင်ပစ္စည်းများဖြစ်သည့် ချိုမြ​သော သဘာဝသကြားမှုန့်နှင့် ဆန်ရှာလကာရည်တို့ကို ​ဆော့စ်အရည်ထဲတွင် ထည့်ကျိုထား​သော​ကြောင့် အနည်းငယ်အ​ရောင်တောက်ပ​နေသည်။ ​ဘေးနံရိုးများက အသားများစွာ မပါရှိ​သော​ကြောင့် တစ်လုတ်စားရုံနှင့် မလုံလောက်ဘဲ အရိုးထဲရှိ​ဆော့အရည်များကိုပင် စုပ်ယူချင်လာသည်။

သူတို့ အမှန်တကယ် မစားရဘဲ အတုအပပြုလုပ်ထားသည့် အချက်အလက်​ ခံစားချက်မျှသာဖြစ်သော်လည်း ဒါရိုက်တာနှင့် ဓာတ်ပုံဒါရိုက်တာတို့က သူတို့၏တံတွေးကို မသိစိတ်က​နေ မျိုချမိဆဲပင်။

လုံလောက်ပြီဟု သူတို့ ထင်ခဲ့ကြသည်။ သို့သော် မပြီး​သေး​ပေ။

ကုယွီမြန်က ကောင်တာပေါ်သို့ ဖန်ခွက်အလွတ်တစ်လုံးကို တင်လိုက်သည့်အခါ  မီးဖိုချောင်စနစ်က ၎င်းထဲသို့ ​ကြည်လင်တောက်ပ​သောပျားရည်ကို အလိုအလျောက် ဖြည့်​ပေးလာသည်။ ဝက်နံရိုးချိုချဉ်၏ ကြွပ်ရွပြီးနူးညံ့​သောအရသာကို မြည်းစမ်းပြီး​နောက် ပျားရည်က ကျန်​နေခဲ့​သော အဆီအနည်းငယ်ကို ဖယ်ရှား​ပေးလိမ့်မည်။ လည်ချောင်းမှ အစာအိမ်အထိ ခံစားချက်က အလွန်လန်းဆန်းသွား​ပေလိမ့်မည်။

ကုယွီမြန်က အလွန်လုံခြုံသော ကိုယ်ဟန်အနေအထားနှင့် နှင်းကျားသစ်လေးကို ညင်သာစွာ ​ပွေ့ချီထားသည်။ နှင်းကျားသစ်လေးက ကုယွီမြန်၏​မေး​စေ့ကို ပွတ်သပ်ရန် သူ့ခေါင်းကို မော့ကာ မျက်လုံးများကို မှိတ်လိုက်သည်။

"နေဝင်သွားပြီလား…ဟမ်…"

ကုယွီမြန်က နှင်းကျားသစ်​လေး၏နားရွက်ကို ကုတ်ရင်း ပြောလိုက်သည်။

နှင်းကျားသစ်လေးက ပျင်းရိစွာဖြင့် မျက်လုံးများမှိတ်ထားပြီး သ​ဘောတူညီ​ကြောင်း​ဖော်ပြရန် ကုယွီမြန်၏ရင်ခွင်ထဲသို့ အနည်းငယ် နီးကပ်စွာ မှီထားလိုက်သည်။

မီးဖိုချောင်စနစ်က ကြမ်းပြင်မှ မျက်နှာကျက်ပြတင်းပေါက်များမှဝင်လာ​သော အလင်း​ရောင်၏ထိုး​ဖောက်မြင်သာမှုကို အချိန်နှင့်တစ်ပြေးညီ လျော့နည်းသွားစေပြီး ရွှေရောင်နေဝင်ချိန် ဆည်းဆာအ​ရောင်က ကြိုတင်အ​ကြောင်းကြားခြင်းမရှိဘဲ ဝင်ရောက်လာသည်။ ကုယွီမြန်၏လက်​မောင်းထဲတွင် လဲလျောင်းနေပြီး နေဝင်ချိန်ကို ခံစားရင်း အပန်း​ဖြေ​နေ​သော နှင်းကျားသစ်​လေးက တစ်ကိုယ်လုံးရှိ ​တောင့်တင်းနေသော အာရုံကြောများအားလုံး ပြေလျော့သွားစေသည်အထိ သက်တောင့်သက်သာရှိနေ​ပေသည်။

အထပ်မြင့်အဆောက်အဦးများ အပြင်ဘက်တွင် စည်ကားသိုက်မြိုက်နေသော မြို့တော်၏မီးရောင်များ ထိန်လင်း​နေပြီး အကွာအဝေးတစ်ရာတွင် နှစ်ထောင်ပေါင်းများစွာ တည်ရှိခဲ့သော သမုဒ္ဒရာနှင့် တောင်တန်းများရှိသည်။ နေမ၀င်မီမှာပင် ကြယ်များက ကောင်းကင်ယံ၏ထောင့်စွန်းသို့ မြင့်တက်လာခဲ့ကြသည်။

သုံးဖက်မြင်ကိရိယာက ခံစားချက်အားလုံးကို တိကျစွာ ရောင်ပြန်ဟပ်​စေပြီး ကြည့်ရှုသူအားလုံး၏ အစားထိုးခံစားချက်များမှာ ယခင်ကထက် ပိုမိုအားကောင်းလာသည်။

သူတို့ ကုယွီမြန်ထံမှ ပင်လယ်ဆားနှင့် ဝါးရွက်များ၏ ရနံ့သင်းသင်းလေးကို ရလိုက်သည်။ သူ့လက်ဖဝါးဖြင့် ကျားသစ်လေး၏အရေပြားကို ထိ​တွေ့လိုက်​သောအခါ ထိုနူးညံ့လွန်း​သောအထိအတွေ့က သူတို့၏သွေးကြောများအထိ ​ပေါ့ပါး​သောလျှပ်စီး​ကြောင်းများကို သယ်ဆောင်လာခဲ့သည်။ သူ့ခန္ဓာကိုယ် အပူချိန်နှင့် အသက်ရှုသံများက ပွေ့ဖက်မှုနှင့်အတူ ​ရော​နှောစိမ့်ဝင်နေသည်။

ထိုကဲ့သို့​ ပွေ့ဖက်ထားခြင်း​ကြောင့် သူ၏တည်ငြိမ်သော နှလုံးခုန်သံကိုပင် ကြားနိုင်​ပေသည်။ မငြိမ်မသက်ဖြစ်​နေပြီး စိုးရိမ်သောက​ရောက်​နေ​သော စိတ်ခံစားချက်များအားလုံးကလည်း ငြိမ်သက်သွားသည်။ တဖြည်းဖြည်းနှင့် ကောင်းကင်နှင့် ကမ္ဘာ​မြေကြီးအကြားတွင် အသံအနည်းငယ်သာ ကျန်ခဲ့တော့သည်။

​နေဝင်ချိန် ပုစဉ်းရင်ကွဲ​အော်သံ၊ မီးဖိုပေါ်မှ လက်ဖက်ရည်အိုးဆူသံနှင့် လေညှင်းတိုက်ခတ်သံများပင်။

စက္ကန့်အနည်းငယ်ကြာ တိတ်ဆိတ်သွားပြီးနောက် ကြော်ငြာအဖွဲ့သားများ၏ တိတ်တိတ်တဆိတ် ဆွေးနွေးမှုအဖွဲ့က လုံးဝပေါက်ကွဲထွက်သွားခဲ့သည်။

[လုလု​လေး (လက်ထောက်ဓါတ်ပုံဆရာ): အားးး အားးး ဝှက်သယ်ဖတ်…  အရမ်းခံစားရတယ်… ငါဘာလို့ သူ့ကို ချီးကျူးချင်​နေရတာလဲ… ဒီသုံးဖက်မြင်ကိရိယာက ငါ့ကို သတ်နေတာပဲ… ငါက အရည်အချင်းရှိတဲ့ ဓာတ်ပုံဆရာတစ်ယောက်ပါ… အဲဒါကိုကြည့်လိုက်တဲ့အချိန်တုန်းက ငါ့အလုပ်တွေကို လုံးဝမေ့သွားတယ် ငါ သူ့လက်ဖဝါးထဲမှာ အိပ်ချင်တယ်…]

[အပြာရောင် အပြာ​ရောင် (ထောက်ပံ့ရေး): ငါ့မှာ သုံးဖက်မြင်ကိရိယာမရှိ​ပေမဲ့ ငါ သူ့ကိုကြည့်လိုက်တုန်းက စိတ်တည်ငြိမ်သွားသလို ခံစားရတယ်…]

[အန်နာ (မိတ်ကပ်): ငါ ထပ်ပြီးချစ်မိသွားပုံပဲ… ဒါပေမယ့် သူက ငါ မရနိုင်တဲ့ ယောက်ျားတစ်ယောက်ဖြစ်ဖို့ ကံကြမ္မာပါလာပြီးသား… ငါ ဘာလုပ်သင့်သလဲ…]

[ငှက်များကဲ့သို့ငါး (အလင်း): ငါ​ မေးချင်တာတစ်ခုရှိတယ်… ဒါရိုက်တာနာရဲ့မျက်နှာက ဒဏ်ရာရထားတာလား… အခုမှ သူ အရမ်းကိုပြုံးလွန်း​နေတယ် ဟား ဟား ဟား… သူသာ ရပ်လို့ ​အော်လိုက်ရင် တစ်သက်လုံး နောင်တရနေလိမ့်မယ်… သူ ပြောလိုက်ရင် ဘာဖြစ်ဆက်ဖြစ်သွားမလဲဆိုတာ ငါ ကြောက်မိတယ်…]

[ငါးဆားနယ် (ပြင်ဆင်​ရေး): ဒါရိုက်တာနာရဲ့အပြုအမူကို ငါ တိတ်တိတ်​လေး ဓာတ်ပုံရိုက်ထားတယ် [ရုပ်ပုံ] မင်းတို့သိလား… သူ့မျက်နှာက ပြာသွားလိုက် ဖြူသွားလိုက် နီသွားလိုက်၊ ခရမ်းရောင်​ပြောင်းသွားလိုက်လို့ ငါ ထင်တယ်… အဲဒါ သူရဲ့နှလုံးသားက ဖရိုဖရဲဖြစ်​နေပြီး စိတ်ရှုပ်ထွေးနေတာ​ကြောင့်လို့ထင်တယ်… ] 

သူတို့၏မျက်လုံးများ ပြူးကျယ်မသွားမီအထိ ဒါရိုက်တာနှင့် လက်ထောက်ဒါရိုက်တာတို့က အတူတကွ အချိန်အ​တော်ကြာ နှုတ်ဆိတ်နေခဲ့ကြသည်။ လက်ထောက်ဒါရိုက်တာက စားပွဲခုံကို ရိုက်လိုက်ပြီး မတ်တပ်ရပ်လိုက်သည်။ ဒါရိုက်တာက စိတ်ရှုပ်ထွေးနေပြီး သူမ၏အမူအရာက ထိုင်းမှိုင်းကာဗလာနတ္ထိဖြစ်​နေ​ကြောင်း ​ဖော်ပြ​နေ​ပေသည်။ သူမက ကုယွီမြန် ဖန်တီးထားသည့်လေထုထဲတွင်လုံးဝနှစ်မြှုပ်နေခဲ့သည်။

အစပိုင်းတွင် ကုယွီမြန်၏လုပ်ဆောင်ချက်က ကကျေနပ်အားရစရာဖြစ်ခဲ့လျှင်ပင် ဤအခိုက်အတန့်၌ အကျိုးသက်ရောက်မှုက သူတို့မျှော်လင့်ထားသမျှထက် ကျော်လွန်သွား​ပေသည်။ 

"ဒါပေမယ့် အဲဒါက မီးဖိုချောင်စနစ်နဲ့ ဘာဆိုင်လို့လဲ…" 

ဒါရိုက်တာက နောက်ဆုံးမေးခွန်းကို ဖြေးဖြေးချင်းမေးလိုက်သည်။

လက်ထောက်ဒါရိုက်တာ :  "အမ်..."

ထိုအချိန်တွင် ရိုက်ကူးမှုက အဆုံးသတ်သွား​ပေပြီ။ ကုယွီမြန်က နှင်းကျားသစ်​လေးကို ​ပွေ့ချီထားပြီး ကျေးဇူးတင်စကားပြောကာ ဝန်ထမ်းထံမှ ရေဘူးကိုယူလိုက်သည်။ နှင်းကျားသစ်​လေး ပြေးဝင်လာသော နောက်ဆုံးအပိုင်းသည်လည်း ​ခေတ္တမျှသာဖြစ်သည်။ သူ ထိုအ​ကြောင်းကို စဉ်းစားပြီး​နောက် အကြံ​ပေးလိုက်သည်။

"ဒါဆို ဘာလို့ ​နောက်ထပ်နည်းနည်း​လောက် ထပ်မရိုက်ရတာလဲ… ကျွန်​တော်က 'စနစ်' ဖြစ်​ပေးရင်​ရော…"

ဒါရိုက်တာနှင့် လက်ထောက်ဒါရိုက်တာ: "....."

မီးဖိုချောင်စနစ်၏ အရည်အ​သွေး…

ကြော်ငြာထဲတွင် ကုယွီမြန်က သာမန်စားဖိုမှူး မဟုတ်တော့​သော်လည်း မီးဖိုချောင်စနစ်၏ အရည်အ​သွေးက စားဖိုမှူးဖြစ်လာလိမ့်မည်။

မီးဖိုချောင်စနစ်၏ ရည်ရွယ်ချက်မှာ လူနေမှုဘဝ တိုးတက်စေရန်ဖြစ်သည်။ ထိုအချိန်တွင် ကြော်ငြာက နှင်းကျားသစ်ငယ်၏ ရှုထောင့်မြင်ကွင်းကိုသာ အဓိကရှုထောင့်အဖြစ် ယူ​ပေလိမ့်မည်။ ကုယွီမြန်က 'မီးဖိုချောင်စနစ်'အ​နေဖြင့် နှင်းကျားသစ်​လေးကို ဂရုစိုက်​ပေးပြီး သူ့အတွက် အစားအစာ ပြင်ဆင်​ပေးကာ ပျားရည်တစ်ခွက်ကူ​ဖျော်​ပေးပြီး နေရောင်အောက်တွင် ​ပွေ့ချီပေးထားသည်။

အိုင်ဒီယာကိုယ်တိုင်က ကြီးကျယ်ပြီး ဆန်းသစ်လှသည်။ ကြော်ငြာများက ဂိမ်းများနှင့် တီဗီဒရာမာများတွင် ရောနှော​နေ​သော​ကြောင့် အများစုက သုံးဖက်မြင်များသာဖြစ်သည်။ သုံးဖက်မြင်ဗားရှင်းက ဤကြော်ငြာ၏ အကျိုးသက်ရောက်မှုကို အပြည့်အဝပြသနိုင်​ပေလိမ့်မည်။

ဤနယ်ပယ်ထဲတွင် နှစ်ပေါင်းများစွာ ပါဝင်လုပ်ကိုင်လာသည့် သူတို့၏စူးရှ​သောအာရုံခံစားမှုက ဤအချိန်က သင့်တင့်ညီမျှ​ကြောင်း သူတို့အား ပြောပြ​နေခဲ့သည်။

"စကားမစပ် ကျွန်​တော် ဝက်နံရိုးချိုချဉ်​တွေကို အပိုလုပ်ထား​သေးတယ်…"

ကုယွီမြန်က နှင်းကျားသစ်​လေးကို ​အောက်ချလိုက်ပြီး ပန်းကန်ပြားတစ်ခုကို ထုတ်လိုက်သည်။ ၎င်းက အလွန်ချိုလွန်း​သော​ကြောင့် နှင်းကျားသစ်လေးက အလွန်အကျွံ မစားနိုင်​ပေ။ ကုယွီမြန် ရည်ရွယ်ချက်ရှိရှိ ပိုလုပ်ထားခဲ့ခြင်းဖြစ်သည်။ ရိုက်ကူး​ရေးအဖွဲ့သားများက အချိန်အတော်ကြာအောင် ပြင်းပြင်းထန်ထန် အလုပ်ကြိုးစားခဲ့​သော်လည်း သူက ချက်ပြုတ်ရန် ပြင်းပြင်းထန်ထန် အလုပ်ကြိုးစားစရာမလို​သော​ကြောင့်​ပင်။

"စိတ်မရှိဘူးဆိုရင် လူတိုင်း ဒါကိုစားလို့ရပါတယ်…"

လူတိုင်း: "....."

ဒါပေါ့... ငါတို့ စိတ်မရှိပါဘူး…

🐯🐯🐯