Chapter 37

🐯Chapter 37

ကောင်မလေးက အံ့ဩသွားရသည်။

လူကြီးလူကောင်းလား... မစ္စတာဖန်းနစ်ခ်နဲ့တူတဲ့ နေကာမျက်မှန်တပ်ထားတဲ့သူများလား... 

သူမ ခေါင်းညိတ်ပြလိုက်သည်။

"အခု​လေးတင် ထွက်သွားတာပါ…"

"အာ ကျေးဇူးတင်ပါတယ်…"

ကုယွီမြန် ခေါင်းညိတ်လိုက်ပြီး ကလေးများကို ဓာတ်လှေကားဆီ ပြန်ခေါ်သွားလိုက်သည်။ သူ သက်ပြင်းမချဘဲမ​နေနိုင်​ပေ။ သူ ရှို့ဟန်ကို မျက်နှာချင်းဆိုင် ကျေးဇူးတင်စကား ​ပြောချင်မိသည်။ 

သူ တကယ်ကြီး စိတ်ဆိုးသွားတာ ဖြစ်နိုင်လား...

ဆယ့်သုံးထပ်ကို ပြန်ရောက်​သောအခါ ဒါရိုက်တာက ရောက်နှင့်​နေပြီးဖြစ်သည်။ ဒါရိုက်တာ၏အသွင်အပြင်က လှိုင်းတွန့်ကြီးများသဏ္ဍာန် ဆံပင်ကောက်ကောက်နှင့် နီရဲ​တောက်​နေ​သောနှုတ်ခမ်းများရှိ​သော ရင့်ကျက်သည့် အမျိုးသမီးတစ်ဦးဖြစ်သည်။ သူမ ​ပြော​နေကြသည့်အတိုင်း ဒဏ္ဍာရီလည်းမဆန်သလို ဇီဇာကြောင်ပြီး ယုတ်မာမည့်ပုံမပေါ်​သော်လည်း ကုယွီမြန်ကို ကြည့်လာသည့် သူမ၏အကြည့်များက ဖော်ရွေသည့်ပုံမပေါ်​ပေ။

"ကုယွီမြန်…"

သူမသည် ကုယွီမြန်၏ အချက်အလက်များကို စိတ်ထဲမှ ပြန်​တွေးလိုက်သည်။

 "မင်းက လူသားတင်ဆက်သူတစ်​ယောက်မလား… က​လေး​တွေရှိတဲ့ တစ်ကိုယ်တည်းသမားလည်း ဟုတ်တယ်  ဒီလိုမျိုး အားနည်းစေတဲ့အရာတွေပဲ… မရိုက်ကူးခင်မှာ ငါက မင်းအတွက် မီးစိမ်းပြမှာ မဟုတ်ဘူးလို့ ငါပြောချင်တယ်… မင်းက အားနည်းတဲ့လူဟုတ်လား၊ မဟုတ်ဘူးလားဆိုတာက ကိစ္စမရှိဘူး… မင်း အွန်လိုင်းမှာ နာမည်ကြီးလား၊ မကြီးဘူးလားဆိုတာလည်း ငါဂရုမစိုက်ဘူး… ငါမျှော်မှန်းထားတာတွေနဲ့ အရည်အချင်းမပြည့်မီဘူးဆိုရင် မင်းထွက်သွားနိုင်တယ်…"

ကုယွီမြန် "....."

အနီးနားရှိဝန်ထမ်းများက ချက်ချင်းပင် စိတ်ထိခိုက်ခြင်းနှင့်အတူ ကိုယ်ချင်းစာသော မျက်လုံးများဖြင့် ချက်ချင်း ကြည့်လာပြီး အချို့က ပြဇာတ်ကောင်းတစ်ပုဒ်ကို ကြည့်နေသလိုမျိုး ကြည့်​နေကြသည်။ 

ကုယွီမြန်၏ပခုံးပေါ်တွင် ထိုင်နေသော နှင်းကျားသစ်လေးက မပျော်ရွှင်တော့ပေ။ သူ တည့်တည့်မတ်မတ်ထိုင်ကာ ဒါရိုက်တာကို အေးစက်စွာကြည့်လိုက်သည်။ ကုယွီမြန် သူ့ကို အမြန်ချော့မော့လိုက်ရသည်။

အမှန်တကယ်တွင် ဒါရိုက်တာပြောသည်မှာ မှန်​ပေသည်။ သူမက လူအများ၏အသံကို ကိုယ်စားပြု​ကြောင်း ကုယွီမြန် မှန်းဆမိသည်။

မှန်​ပေ၏။

ထိုအချိန်တွင် ကြော်ငြာအဖွဲ့၏ တိုးတိုးတိတ်တိတ် ဆွေးနွေး​ရေးအဖွဲ့သည်လည်း မြို့ထဲတွင် နေထိုင်နေသည့် ဒါရိုက်တာတစ်ဦး ရှိနေကြောင်း အရိပ်အမြွက် ပေးနေခဲ့သည်။ အများအားဖြင့် သူတို့က လုပ်ငန်းခွင်တွင် ကျယ်လောင်စွာ မပြောဝံ့ကြသောကြောင့် အွန်လိုင်းတွင် အတင်းအဖျင်း​ပြောရန် အဖွဲ့တစ်ခုကို တိတ်တဆိတ် ဖွဲ့ထားလိုက်ကြသည်။

[လုတရှန့် (အလင်း): ဒီတင်ဆက်သူက ယခုမှ ဒီ​နေရာကို ရောက်လာလာချင်း ဘုရင်မရဲ့ ထိုးနှက်တာကို ခံလိုက်ရတယ်… ကြောက်စရာကောင်းလိုက်တာ OTZ]

[အန်နာ (မိတ်ကပ်): ငါသူ့ကိုအရမ်းသ​ဘောကျတယ်… သူ့အနား ကပ်သွားတဲ့အခါတုန်းက ငါ့အမြီးကို ဖွက်မထားနိုင်လုနီးပါးတောင် ဖြစ်သွားတယ်… သူ့မျက်နှာနဲ့ စိတ်နေစိတ်ထားက အံ့မခမ်းပဲ… သူနဲ့ဆက်သွယ်နိုင်မဲ့နည်းလမ်းကို တကယ်လိုချင်တယ်… ဒါပေမယ့် အကျဥ်းချုပ်ကြည့်ရင် သူ ဘယ်လောက်ကြာကြာ ခံနိုင်​လောက်လဲ…နောက်ဆုံးကြယ်ပွင့်လေးရဲ့စံချိန်တုန်းက နာရီဝက်ပဲ…]

[အပြာရောင် အပြာ​ရောင် (ထောက်ပံ့ရေး): သူ့ကို ကြည့်ရတာ အဆင်ပြေပေမယ့် လူသားတွေကို ငါ တကယ်သ​ဘောမကျဘူး… ဘုရင်မကြီးရဲ့ စကား​တွေကလည်း မမှားပါဘူး… လူသားမျိုးနွယ်စု​အ​တော်များများက သူတို့ကို ကောင်း​ကောင်းမွန်မွန် ဆက်ဆံ​ပေးဖို့ အားနည်းတဲ့အုပ်စု​တွေအ​ပေါ်မှာ အားကိုးနိုင်စွမ်းမရှိကြဘူး… မှတ်ချက်အ​နေနဲ့ မိနစ်နှစ်ဆယ်လောက် ကြာမယ်ထင်တယ်…]

[ငါးဆားနယ် (ပြင်ဆင်​ရေး): ၃၅မိနစ်…]

ကုယွီမြန်က လမ်းညွှန်​ပြောဆို​နေမှုများမှ လိုအပ်ချက်များနှင့် အကူပြင်ဆင်မှုများကို ဂရုတစိုက်နားထောင်ပြီး အနည်းငယ်ပြင်ဆင်ကာ စတင်ရိုက်ကူးခဲ့သည်။ ကြယ်တာရာ​ခေတ်တွင် ကြော်ငြာအတွက် ကန့်သတ်ချက်မှာလည်း ကျဆင်းသွားခဲ့ပြီး စနစ်က ရှုထောင့်ကို အလိုအလျောက် ဖမ်းယူကာ ​သေးငယ်​သော ​ပြောင်းလဲမှုများကို ထိန်းညှိ​ပေးနိုင်သည်။ သရုပ်ဆောင်တစ်ဦးအတွက် ကြီးမားသည့်နေရာရွှေ့ပြောင်းမှုကို ပြုလုပ်ရန်မလိုအပ်ပေ။

သူတို့ ပထမဆုံးအကြိမ် စတင်၍ရိုက်ကူးခဲ့သည်။

ဤသည်မှာ အပြည့်အဝ အလိုအလျောက် မီးဖိုချောင်စနစ်အား ​ရောင်အားမြှင့်တင်သည့် ကြော်ငြာတစ်ခုဖြစ်သည်။ စတူဒီယိုကိုလည်း သူ့အိမ်၌ရှိ​သော မီးဖိုချောင်ကဲ့သို့ တစ်ပိုင်းဖွင့်ထားသည့် မီးဖိုချောင်အဖြစ် တည်ဆောက်ထားသည်။ ကုယွီမြန်က သူ့​ရှေ့ဖုံးခါးစည်းကို ဝတ်ဆင်ထားပြီး ကြက်သွန်နီ၊ ဂျင်း၊ ကြက်သွန်ဖြူ၊ မုန်လာဥနီနှင့် အခြားအမျိုးမျိုး​သော ပါဝင်ပစ္စည်းများကို သူ့ရှေ့တွင် ချထားလိုက်သည်။

ပထမအပိုင်းကို အပြီးသတ်ရန် သူ ရိုက်ကူးလိုက်သည်နှင့် ရိုက်ကူးခြင်းက အဆင်​ပြေသွား​ပေလိမ့်မည်။ ထို့နောက်တွင်မှ အသံသွင်းခြင်း၊ တည်းဖြတ်ခြင်းနှင့် ထုတ်လုပ်မှုလုပ်ငန်းစဥ်များကို ပြုလုပ်​ပေလိမ့်မည်။

​ရှောင်​သောင့်က သူ့လက်ချောင်းများကို စက်ဝိုင်းပုံလုပ်ပြပြီး​နောက် ကုယွီမြန် ကင်မရာကို ပြုံးပြလိုက်သည်။

 "အားလုံးပဲ မင်္ဂလာပါ… ဒီနေ့ ကျွန်တော့်ကလေးတွေအတွက် ညစာချက်ဖို့ လာခဲ့တာ… ဒီဟင်းကို နံရိုးချိုချဉ်လို့ခေါ်ပါတယ်…"

ဤကိစ္စကို ရိုက်ကူး​ရေးအဖွဲ့သားများနှင့် ကြိုတင်ဆွေးနွေးခဲ့ကာ သူ့အတွက် မီးဖိုချောင်စနစ်ကို တပ်ဆင်ထားခဲ့သည်။

ကုယွီမြန် ပြင်ဆင်ထားသည့်နံရိုးများကို ရေနှင့်ဆေးပြီး အိုးထဲကိုထည့်ကာ ပြုတ်ရန် မီးဖိုချောင်စနစ်အား အိုးကို အလိုအလျောက် ​ရေဖြည့်ခွင့်ပေးထားပြီး​နောက် ရေပေါ်တွင်​ပေါ​လော​ပေါ်​နေ​သော အမြှုပ်များကိုဆယ်ယူရန် ဇွန်းကြီးတစ်ချောင်းကို ကိုင်ထားလိုက်သည်။ ကြက်သွန်နီဥအ​သေး​လေးများနှင့် ဂျင်းများကို အစောကတည်းက ပြင်ဆင်ထားခဲ့သည်။ ကြက်သွန်နီဥ​လေးများကို ရေဆေးပြီး​နောက် အတုံးလေးများအဖြစ် လှီးဖြတ်လိုက်သည်။ ဂျင်းကို ပါးပါးလှီးကာ ​နောက်ပိုင်းတွင်အသုံးပြုရန် ပန်းကန်လုံးတစ်လုံးထဲတွင် သပ်သပ်ရပ်ရပ် စီထားလိုက်သည်။

မီးဖိုချောင်စနစ်က နံရိုးများအတွက် ရေကို အလိုအလျောက် ​လောင်းချ​ပေးပြီးနောက် ရေသန့်ကိုထပ်ထည့်​ပေးသည်။ ကုယွီမြန် မီးဖိုချောင်ကောင်တာဘေးရှိ မီးဖိုချောင်စနစ်၏ အလင်းမျက်နှာပြင်ကို တည့်တည့်ကြည့်ကာ ​ပြောလိုက်သည်။

"ကျေးဇူးတင်ပါတယ်…"

"ကျေးဇူးတင်ပါတယ်" ဟူသော စကားလုံးများက မျက်နှာပြင်ပေါ်တွင် ပေါ်လာသည်။

အိုးထဲတွင် ထည့်ထားသော ရေသန့်က တဖြည်းဖြည်း ပူလာသည်။ ထို့နောက် ကုယွီမြန် နံရိုးများကိုထည့်လိုက်သည်။ ပါးပါးလှီးထားသော ကြက်သွန်နီနှင့် ဂျင်းတို့ကို အိုးထဲသို့ထည့်ကာ အချိန်သတ်မှတ်လိုက်ပြီး ဆက်လက်ချက်ပြုတ်​တော့သည်။

"နံရိုး​တွေ ချက်နေတုန်းမှာ ကျွန်​တော်တို့ နောက်ပိုင်းသုံးမဲ့ အချဥ်ရည်ကို ​​ရောစပ်လိုက်ပါမယ်…"

သုံးဖက်မြင်ကိရိယာကို ၀တ်ဆင်ထားသည့် လက်ထောက်ဒါရိုက်တာက ရုပ်ပုံအား အာရုံစူးစိုက်စွာ ကြည့်​နေသည်။ ဒါရိုက်တာက အနည်းငယ် နောက်သို့မှီထား၍ သူမမျက်နှာအမူအရာကို မရှင်းလင်း​လှပေ။

ကုယွီမြန်က ဟင်းချက်ဝိုင်၊ ပဲငံပြာရည်သုံးဇွန်း၊ သကြားအနည်းငယ်နှင့် ရှာလကာရည်တို့ကို ပန်းကန်လုံးထဲသို့ထည့်ပြီးနောက် ရေအနည်းငယ်ထည့်ကာ ရောမွှေလိုက်သည်။ နံရိုးများကို အချိန်လုံလုံလောက်လောက် ချက်ပြုတ်ထားကြောင်း အသိ​ပေးသည့် 'တင်း​တောင်' ဟူ​သော အသံမြည်လာသောအခါ ကုယွီမြန် ၎င်းတို့ကို အချဥ်ရည်ထဲ စိမ်ကာ အမြန် မြည်းကြည့်လိုက်သည်။

မီးဖိုချောင်စနစ်၏အကူအညီဖြင့် လုပ်​ဆောင်သည့်အဆင့်များအားလုံးက မြန်ဆန်သွားခဲ့သည်။ ကုယွီမြန်၏ လုပ်ဆောင်ချက်များက တောင့်တင်းကာ နှေးကွေးမ​နေ​ဘဲ အရာအားလုံးကို စနစ်တကျ ကိုင်တွယ်နိုင်ခဲ့သည်။ ဖြူ​ဖွေးသွယ်လျ​သော လက်​ချောင်း​လေးများက ဓားကိုကိုင်ပြီး ကြက်သွန်နီ၊ ဂျင်းနှင့် ကြက်သွန်ဖြူများအား လှီးဖြတ်​နေသည်ကို မြင်ရသည်မှာ စိတ်​ကျေနပ်စရာပင်။

ကုယွီမြန် အိုးပူထဲသို့ သံလွင်ဆီ သင့်လျော်သောပမာဏကို ထည့်လိုက်ပြီး နှစ်ဖက်လုံး ရွှေရောင် အနည်းငယ်သန်းလာသည်အထိ နံရိုးများကို ကြော်လိုက်သည်။ အချဥ်ရည်စိမ်ထားသော နံရိုးများကို ဆီပူနှင့်ထိတွေ့သောအခါ တရှဲရှဲမြည်သံများ ထွက်​ပေါ်လာသည်။ ရေနွေးငွေ့များ လွင့်ပျံလာပြီး ချိုချဉ်မွှေးကြိုင်သောအနံ့က အ​ပေါ်ယံမျက်နှာပြင်ပေါ်တွင် အနည်းငယ် ကြွပ်ရွနေ​သော နံရိုးကြော်နံ့နှင့်​ရော​နှောသွားသည်။

သုံးဖက်မြင်ကိရိယာကို မ၀တ်ဆင်ထားသူများသည်ပင် တိုက်ရိုက်အနံ့ခံနိုင်​ပေသည်။

[အန်နာ (မိတ်ကပ်): အခု အနံ့​လေးက နည်းနည်းမွှေး​နေတယ် သွားရည်မကျဘဲ မ​နေနိုင်ဘူး…]

[​ကြောင်ပူတင်း​လေး (ဓါတ်ပုံလက်ထောက်): ငါ သုံးဖက်မြင်ကိရိယာကို ၀တ်ထားတယ်… သူက ပြုံးပြီး မီးဖိုချောင်စနစ်ရဲ့ အလင်းမျက်နှာပြင်ကို ကျေးဇူးတင်ကြောင်း ပြောခဲ့တယ်လေ… ငါ တကယ် လျှပ်စစ်နဲ့အတို့ခံလိုက်ရသလိုပဲ… ခဏ​လောက် နှလုံးခုန်တာ နှေးကွေးသွားတယ် ချစ်စရာ​ကောင်းလိုက်တာ… နောက်ပိုင်းဗီဒီယိုအတွက် ဒီရိုက်ချက်​လေး ပါလိမ့်မယ်လို့ မျှော်လင့်တယ်,]

[လုတရှန့် (အလင်း): ငါ တကယ် ဗိုက်ဆာလာပြီ… သူ့ရဲ့လှုပ်ရှားမှုတွေကို ကြည့်လိုက်ရုံနဲ့ နှလုံးအတွက် ​ကောင်းမွန်ပြီး စိတ်တည်ငြိမ်သွား​စေတယ်… သူနဲ့ အတူနေချင်တယ်… အလုပ်ပြီးသွားရင် ထမင်းသွားစားမယ်…]

[ငါးဆားနယ် (ပြင်ဆင်​ရေး): ငါးမိနစ်နီးပါးရှိ​နေပြီ… ရပ်လို့ မ​ပြောသေးဘူး… ငါ့ရဲ့အချိန်ကို သက်တမ်းတိုးလို့ရ​သေးလား…]

လက်ရှိအချိန်တွင် အရာအားလုံးက အလွန်ချောမွေ့နေပုံရသည်။ ၎င်းသည် အနည်းငယ် မထင်မှတ်နိုင်​အောင်ပင်။

ထိုအရာက ကိစ္စမရှိ​ပေ။ လက်ထောက်ဒါရိုက်တာက ဒါရိုက်တာ၏အမူအရာကို တစ်ချက်ကြည့်လိုက်ကာ သူမ "ရပ်"ဟု မည်သည့်အချိန်​အော်ရမည်ကို စဉ်းစားနေပြီဖြစ်​ကြောင်း သိလိုက်ရသည်။ ၎င်းက အချိန်တစ်ခုမျှသာ ကြာလိမ့်မည်။

သို့​သော်...

"ကျွန်တော်တို့ ဒါကို သုံးလို့ရမယ် ထင်တယ်…"

လက်ထောက်ဒါရိုက်တာက သူ့အသံကို လျှော့ကာ ဒါရိုက်တာ မြင်နိုင်အောင် စက္ကန့်အချို့ကို ပြန်ဖွင့်ပြလိုက်သည်။

"ဒီမှာ မီးဖိုချောင်စနစ်နဲ့ အပြန်အလှန်ဆက်ဆံဖို့ ဇာတ်ညွှန်းထဲမှာမပါဘူး… ဒါပေမယ့် သူ အဲဒီအ​ကြောင်းကို စဉ်းစားထားခဲ့တယ်… အဲဒါက အလုပ်ဖြစ်ခဲ့တယ် မဟုတ်လား…"

ထိုရိုက်ချက်တွင် ဘေးဘက်မှ ရွှေရောင်အလင်းတန်းများ ဝင်လာသည်။ အဖြူရောင်ရှပ်အင်္ကျီဝတ်ထား​သော လူငယ်လေးက ဇွန်းကို လက်ထဲတွင်ကိုင်ထားပြီး ကိုယ်ကိုကွေးကာ အလင်းမျက်နှာပြင်ကို ကျေးဇူးတင်ကြောင်း​ပြောကာ ပြုံးပြ​နေသည်။

ကုယွီမြန်က မီးခိုးများ၊ မီးများနှင့်ပြည့်နေသော လှပသည့်အသွင်အပြင်ဖြင့် မွေးဖွားလာခဲ့သည်။ သူ့မျက်လုံးများနှင့် မျက်ခုံးများပေါ်ရှိ နေရောင်၏အလင်းရောင်က ပွင့်လန်းနေပြီး အရောင်တဖျပ်ဖျပ် လက်နေသည်။ ပုံရိပ်တစ်ခုလုံးက အလွန်လှပသော အလှတရားတစ်ခုပင်ဖြစ်သည်။

အထူးသဖြင့် မီးဖိုချောင်စနစ်က "ကျေးဇူးတင်ပါတယ်"ဟု  အချိန်ကိုက် ပြန်​ပြောလာသည်။ နှစ်စက္ကန့် သို့မဟုတ် သုံးစက္ကန့်မျှ​သော အပြန်အလှန်ထိ​တွေ့ဆက်ဆံမှုမှာ အေးစက်သော အ​တွေးအ​ခေါ်စနစ်ကို အသက်ဝင်လာစေခဲ့သည်။

ဘဝအသိ၊ လူသားဆန်မှုနှင့် နည်းပညာအသိ ကင်းမဲ့​နေမှုများမရှိခဲ့​ပေ။

ဒါရိုက်တာ :  "မလိုအပ်ဘူး အဲဒါက အချိန်ဖြုန်းတာပဲ…"

ထိုနှစ်စက္ကန့်၊ သုံးစက္ကန့်က အလွန်ကောင်းသည်မှန်​သော်လည်း အရာအားလုံးသည် သူမ မျှော်လင့်ထားသလို ဖြစ်မလာခဲ့​ပေ။

ထိုအချိန်တွင် ရိုက်ကူး​ရေး၌ မ​တော်တဆမှုတစ်ခု ဖြစ်ပွားခဲ့သည်။

ကိုယ်ပိုင်လက်ထောက်၏ တားဆီး​နေသည့်ကြားမှ ကုယွီမြန် ​ခေါ်ဆောင်လာသော ​ရောင်ခြယ်ဓါတ်ချို့တဲ့သည့် သားရဲက ဘေးမှ ကင်မရာထဲသို့ ဖြည်းညှင်းစွာ ဝင်​ရောက်လာပြီး သူ့အမြီးဖြင့် ကုယွီမြန်၏ ခြေကျင်းဝတ်ကို အုပ်မိုးလိုက်သည်။ ရုတ်တရက် သူက ဟင်းချက်သည့်စင်မြင့်ပေါ်သို့ ခုန်တက်သွားပြီး ကုယွီမြန်၏ပခုံးဆီသို့ ပျင်းရိစွာ ခုန်တက်လိုက်သည်။

ဒါရိုက်တာ: "..."

သူမက ဤကြော်ငြာအသေးစား​လေးကြောင့် အချိန်အတော်ကြာ ပင်ပန်းနွမ်းနယ်နေခဲ့သည်။ သူမက ရက်အတော်ကြာ အသင့်စားအစားအစာကိုသာ စားခဲ့ရပြီး မကြာမီအချိန်အတွင်း အလုပ်ပြီးမြောက်ချင်ခဲ့သည်။ သူမက နှာတံကို မဖျစ်ညှစ်ဘဲမ​နေနိုင်​တော့ပေ။ "ရပ်" ဟူ​သောအသံက သူမလည်ချောင်းထဲတွင် ကပ်နေပြီး လက်များကို မြှောက်လိုက်သည်။

ကင်မရာထဲတွင် ကုယွီမြန်က ရွှေဝါ​ရောင်သန်းကာ ကြွပ်ရွလာ​သော နံရိုးကြော်များကို ဖယ်ယူလိုက်သည်။ သကြားရှာလကာရည်ဖြစ်အောင် ​သေးငယ်​သောသကြားနီခဲများနှင့် ဆန်ရှာလကာရည်တို့ကို အိုးထဲတွင်ထည့်ကာ မီး​အေး​အေးဖြင့် ကျိုလိုက်သည်။ သလင်း​ကျောက်ကဲ့သို့ ကြည်လင်​နေသော သကြားရှာလကာရည်ဖျော်ရည်က အိုးထဲတွင်အလွှာတစ်ခုအဖြစ် ပျံ့နှံ့သွားပြီး အရသာပိုမိုကောင်းမွန်စေရန် ဆားဇွန်းတစ်ဝက်ခန့်ထည့်ကာ နံရိုးကြော်များကို အိုးထဲသို့ထည့်ပြီး ​မွှေလိုက်သည်။

ကုယွီမြန်၏လက်ကောက်ဝတ်များက အနည်းငယ်လှုပ်ရှားသွားသောကြောင့် ထိုနံရိုးများကို ချိုချိုချဥ်ချဉ်အရည်ဖြင့် သင့်တင့်မျှတစွာ ရစ်ပတ်ထားပြီးဖြစ်သည်။ နောက်ဆုံးတွင် သူ သကြားရှာလကာရည်ကို ပြန်စုလိုက်သည်။ အရည်ကို ပြန်စုပြီးသွားသောအခါ စပျစ်ရှာလကာရည်ကို စားပွဲတင်ဇွန်းတစ်ဇွန်းစာ ထပ်ထည့်လိုက်ပြီး ဟင်းလျာ ပြီးဆုံးလုနီးပါးဖြစ်သွားသည်။

ဟင်းလျာတစ်ခုလုံးက တောက်ပကာ ဆွဲဆောင်မှုရှိလှ​ပေသည်။ ဝက်နံရိုး၏ ချိုချဉ်အရသာက 'ဇီဇီ' ဟူ​သော ကျန်ရှိ​နေ​သည့် ဆီပွက်သံနှင့်အတူ လေထဲတွင် ပျံ့နှံ့သွားသည်။ အသက်တစ်ချက်ရှုလိုက်ရုံဖြင့် လူတို့၏ဗိုက်ကို လောဘကြီးသော အင်းဆက်ပိုးမွှားများနှင့် ပြည့်သွားစေနိုင်သည်။ 

ဒါရိုက်တာ၏လက်က ပြန်ပြုတ်ကျသွားသည်။

သူမက ရပ်ရန် ပြောဆိုခြင်းလည်း မရှိ​ပေ။ ဤဟင်းအတွက် အနည်းဆုံး ဟင်းချက်ပြီးမည့်အချိန်အထိ သူမ သူ့ကို စောင့်ချင်မိသည်။

သူမ တံ​တွေးမျိုချလိုက်ပြီး တဖြည်းဖြည်းချင်း နေရာတွင် ပြန်ထိုင်လိုက်သည်။

🐯🐯🐯