Chapter 46

🐯Chapter 46

ဘယ်ရနိုင်ပါ့မလဲ…

မျိုးသုဉ်းလုနီးပါးမျိုးစိတ်များအတွက် မွေးစားခြင်းအစီအစဥ်ကို ယမန်နှစ်တွင် စတင်ပြုလုပ်ခဲ့သော်လည်း 'အသိဥာဏ်မရှိသော၊ အမှီအခိုလိုအပ်သော' မျိုးသုဉ်းလုနီးပါးမျိုးစိတ်များအတွက်သာ ကန့်သတ်ထားသည်။ 

ရှေးကမ္ဘာမြေပေါ်တွင် တစ်ချိန်ကနေထိုင်ခဲ့သော တိရိစ္ဆာန်များစွာတို့က ကြယ်တာရာခေတ်၏ ပြောင်းလဲမှုများနှင့် ကောင်းစွာ လိုက်လျောညီထွေမှု မရှိကြပေ။ အစပိုင်းတွင် သူတို့၏ စိတ်ဝိညာဉ်စွမ်းအားများကို နိုးထစေနိုင်ခဲ့ကြသော်လည်း နောက်ပိုင်းတွင်မူ သူတို့၏ မျိုးဆက်များသည် သာမန်တိရစ္ဆာန်များအဖြစ်သို့သာ တဖြည်းဖြည်း ပြောင်းလဲလာကြသည်။ ထိုကဲ့သို့သော ယိုယွင်းမှုမျိုးကို 'ရောင်ခြယ်ဓါတ်ချို့တဲ့သည့် မျိုးစိတ်' အဖြစ် သို့မဟုတ် အခြားပုံစံအချို့တို့ဖြင့် သိမြင်နိုင်သည်။ အမှီအခိုမရှိဘဲ အသက်မရှင်နိုင်သည့် ထိုကဲ့သို့သော မျိုးစိတ်များကိုသာမွေးစားနိုင်သည်။

ဥပမာအားဖြင့်၊ မျိုးတုန်းပျောက်ကွယ်လုနီးပါးမျိုးစိတ်နှစ်ခုဖြစ်သည့် တိဗက်ဒရယ် နှင့် မိကျောင်းဖမ်းလိပ်များမှာ သာမန်တိရစ္ဆာန်များအဖြစ်သို့သာ လုံးဝ ပြောင်းလဲသွားခဲ့ပြီး မြို့ပြရှိ အထက်တန်းလွှာမိသားစုအချို့က ၎င်းတို့အား မွေးစားခဲ့သည်။ 

အရွယ်ရောက်ပြီးသော မိမိကိုယ်ကို အားကိုးအားထားပြုနိုင်သည့် လူသား အမျိုးသားတစ်ဦးကို လုံးဝ မွေးစားနိုင်မည်မဟုတ်ပေ။ ၎င်းက လုံးဝကို အဓိပ္ပါယ်မရှိသည့် ကိစ္စပင်။ တစ်ဖက်လူက သူ၏ဧကရာဇ် ဖြစ်ခဲ့လျှင်ပင်…

မဟုတ်သေးဘူး ဖြစ်နိုင်သေးတယ်…

ရှေးခေတ်က ကမ္ဘာပေါ်တွင် စစ်ပွဲအကြောင်း ပြဇာတ်များ ရှိခဲ့ဖူးသည်။ 

ဖန်းနစ်ခ်လည်း ထိုကိစ္စကြောင့် ဧကရာဇ်က ဥပဒေကိုပင် ပြောင်းလဲပစ်လိုက်ပြီး အစိုးရအဖွဲ့ဝင်အုပ်စုများ ဒေါသကြောင့် သေသွားမည်ကိုပင် အနည်းငယ်ကြောက်လန့်သွားသည်။ သူ့ ခေါင်းပေါ်မှ ချွေးစေးများစီးကျလာပြီး ဧကရာဇ်ကို မဆန့်ကျင်ဘဲ စကားလုံးများ၏ အဓိပ္ပါယ်ကို မည်ကဲ့သို့ ဖော်ပြရမည်ကို စဉ်းစားနေသည်။ 

"သီအိုရီအရတော့ မဖြစ်နိုင်ပါဘူးအရှင်… မစ္စတာကုက မွေးစားခံရမဲ့ အခြေအနေတွေနဲ့ မကိုက်ညီပါဘူး…" 

ကံကောင်းထောက်မစွာဖြင့် ဧကရာဇ်က ထိုကိစ္စနှင့်ပတ်သက်ပြီး အလွန်အမင်း အလေးအနက်ထားနေပုံမပေါ်ခဲ့ပေ။ ရှို့ဟန်က ပေါ့ပေါ့ပါးပါးသာ ပြောလိုက်သည်။

 "ငါလည်း ဘာတွေတွေးနေမိမှန်းကို မသိဘူး..." 

ဧကရာဇ်က ယခု လတ်တလောတွင် စိတ်ကောင်းဝင်နေပြီး ဒေါသထွက်သည့် အကြိမ်ရေနှင့် ဒေါသပေါက်ကွဲနှုန်းတို့လည်း ကျဆင်းလာသည်။ 'မှုန်ကုပ်သော' နှင့် 'ကြမ်းတမ်းသော' ဟူသော စကားလုံးနှစ်လုံးက ယခု သူနှင့် မသက်ဆိုင်သလိုပင်။ ထိုကဲ့သို့သော အခြေအနေက ဖန်းနစ်ခ်လက်ထောက်အဖြစ် အမှုထမ်းခဲ့သည့် အနှစ်နှစ်ဆယ်အတွင်း မြင်ဖူးသည့် တစ်ခုတည်းသော အခြေအနေမျိုး ဖြစ်သည်။

ရှို့ဟန်က အလွန် တိတ်ဆိတ်လွန်းနေသည်။

မျက်လုံးကို အနည်းငယ်မှိတ်ထားသည့်အခါ ညနေခင်း၏ ပုစဉ်းရင်ကွဲသံများကို ကြားရသည်။ လရောင်က သစ်သားစင်္ကြန်လမ်းတွင် ထွန်းလင်းနေပြီး သူ့လူသား စိုက်ထားသည့် ကြောင်ဆေးပင်၏အကိုင်းအခက်များနှင့် သစ်ရွက်လေးများက လေထဲတွင် ယိမ်းနွဲ့နေသည်။ သူ့အိမ်မှာရှိနေစဉ်အချိန်လေးတွင် ကိစ္စများစွာကို လိုက်တွေးရန် အလွန် ဝန်လေးနေမိသည်။ 

ဟုတ်တယ် အိမ်လို့ပဲ ခေါ်လိုက်မိတာပဲ…

သူ့အိမ်က မြို့ပြအထက်တန်းလွှာခရိုင်ရှိ ကျယ်ပြောပြီး တန်ဖိုးကြီးသည့် ဧကရာဇ်နန်းတော်လည်း မဟုတ်သလို၊ သူ ငယ်စဉ်က နေထိုင်ခဲ့သည့် နေရာတိုင်းလည်း မဟုတ်ပေ။ သူ့အိမ်က ဤနေရာတွင်ဖြစ်ပြီး ကုယွီမြန်၏ဘေးကနေရာကပင် သူ့အိမ်ဖြစ်သည်။

"မွေးစားဖို့ မလိုပါဘူး…"

ရှို့ဟန် တိုးတိုးလေးပြောလိုက်သည်။ သူက သူ့လူသားနှင့် အဖေ၊ သား၊ ဆွေမျိုး သို့မဟုတ် ကျွန် အဖြစ် မတော်စပ်ချင်ခဲ့ပေ။ သူက ကုယွီမြန်ကို အချိန်တိုင်းလိုလို ကုယွီမြန်သာ ဖြစ်စေချင်ပြီး ကုယွီမြန် လုပ်ချင်သည်များကို သာ လုပ်စေကာ ကုယွီမြန် သူဖြစ်ချင်သည့် လူစားမျိုး သာ ဖြစ်စေချင်သည်။ 

တစ်ချိန်တည်းမှာပင် သူနှင့်လည်း သက်ဆိုင်နေစေချင်သည်။ 

“……”

ဖန်းနစ်ခ်က ဧကရာဇ် ပြောချင်သည်ကို သဘောပေါက်သွားပြီး ပြောလိုက်သည်။

 "အရှင်မင်းကြီး၊ အရှင် ဒီလိုတော့ လုပ်နိုင်ပါတယ် …....“

ငါးမိနစ်ခန့်ကြာသောအခါ…

ဖန်းနစ် နောင်တရသွားသည်။ ထိုအရာက မကောင်းသည့်အကြံတစ်ခုပင်။ ဝန်ကြီးသာ သိသွားပါက သူ့ကို ဆုတ်ဖြဲပစ်လိမ့်မည်။ သို့သော်လည်း ရှို့ဟန်ကမူ အလွန်ကျေနပ်သွားပြီး "မဆိုးပါဘူး" ဟု ပေါ့ပေါ့ပါ့းပါးပြောခဲ့သည်။ 

ထို့နောက် ဆက်သွယ်ရေး ပြီးဆုံးသွားသည်။ 

-----

ညသန်းခေါင်တွင် ကုယွီမြန် အိပ်ရာနိုးလာပြီး ရေတစ်ခွက် ထသောက်လိုက်သည်။ နှင်းကျားသစ်လေးက အိပ်ယာပေါ်တွင် မရှိသည်ကို သူတွေ့သွားခဲ့၍ သမ်းဝေပြီး သားပေါက်လေးကိုရှာရန် ဖိနပ်စီးလိုက်သည်။ 

"ထွမ်ထွမ်လား... ဘာလို့ဒီကို​ရောက်​​နေတာလဲ…" 

သစ်သားစင်္ကြန်တွင် ပျင်းရိစွာ ခွေနေသည့် နှင်းကျားသစ်လေးက သူ့ကလေးသုံးလက်ပတ်ကွန်ပြူတာကို သူ့ခြေသည်းအောက်တွင် ဖိကာ ပုံမှန်မဟုတ်သည့် အကြောင်းရင်းအချို့ကြောင့် ကုယွီမြန်ကို စိုက်ကြည့်နေလိုက်သည်။ 

ကုယွီမြန် မှင်သက်သွားသည်။ ထို့နောက် သူ ဘာကိုမှ စဉ်းစားမနေတော့ဘဲ နှင်းကျားသစ်လေးကို ကောက်ချီပြီး သူ့နားရွက်လေးကိုနမ်းကာ အိပ်ရန် ပြန်ခေါ်သွားလိုက်သည်။

ကုယွီမြန် သူ့ကလေးလေးများနှင့်အတူ အိပ်နေစဉ် ကြယ်ကွန်ရက်၏ မိုက်ခရိုဘလော့ဂ်များတွင် 'ကုယွီမြန်' ဟူသည့် ရှာဖွေမှုအကြိမ်ရေက တိုးမြင့်လာခဲ့သည်။ 'တိမ်လေးတစ်ခုရှိတယ်' ၏ ကနဦး တိုက်ရိုက်ပရိုမိုးရှင်း အပါအဝင် သူ၏ ယခင်တိုက်ရိုက်ထုတ်လွှင့်မှု အများအပြားက ကုယွီမြန်အတွက် ရေပန်းစားမှုအချို့ကို စုဆောင်းထားနိုင်ခဲ့သော်လည်း ထိုအရာက ကြယ်တာရာမြို့တော်၏ လူဦးရေနှင့် ယှဉ်ပါက သမုဒ္ဒရာထဲသို့ ကျဆင်းသွားသည့် ရေတစ်စက်ခန့်သာ ရှိသည်။ 

တရားဝင်လူသိရှင်ကြားအကဲဖြတ်မှု၊ ကြော်ငြာထုတ်လွှင့်မှုနှင့် လူသစ်ပြိုင်ပွဲ ဟူသည့် အဓိကအချက်သုံးချက်ကို စုစည်းပြီးချိန် မရောက်သေးသော်လည်း သူ၏ ပထမဆုံးအကြိမ် လူကြိုက်များမှုက အထွတ်အထိပ်ကိုရောက်ရှိသွားပြီး ပထမဆုံးအကြိမ်အဖြစ် မီဒီယာများဆီသို့ပါ တရားဝင်ရောက်ရှိသွားစေသည်။ 

မှတ်ချက်များတွင် ထူးခြားသော အမျိုးအစား နှစ်ခုရှိသည်။ တစ်မျိုးမှာ တိုက်ရိုက်ထုတ်လွှင့်မှုကို မကြည့်ဖူးဘဲ စပ်စုလိုခြင်း သို့မဟုတ် 'လူသား' ဖြစ်နေသောကြောင့် စောင့်မျှော်ကြည့်ရှုမည်ဟူသည့် သဘောထားရှိသူများဖြစ်သည်။ ကျန်တစ်မျိုးမှာ တိုက်ရိုက်ထုတ်လွှင့်မှုကို ကြည့်ပြီးသွားသော ပရိသတ်များဖြစ်ပြီး ၎င်းတို့၏ မိုက်ခရိုဘလော့ဂ်များတွင် သက်တံ့များ လွှင့်ထုတ်နေကြသူများဖြစ်သည်။ 

နောက်ပိုင်း ကြည့်ရှူသူအရေအတွက်က ယခင်ကထက်ပင် ပိုနေသေးသည်။ 

[နှင်းဆီစစ်ပွဲ: သွားကြည့်လိုက်ကြပါ…ကြည့်မကောင်းဘူးဆိုရင် ငါ မနက်ဖြန် အပြင်ထွက်ရင် အစိမ်းရောင် ဝတ်မယ်… ခေါင်းပေါ်မှာပါ မြက်စိုက်ပေးမယ်…လက်ရှိ ရည်းစားတွေ အားလုံးကို ရာထူးတိုးပြီး လက်ထပ်ပေးမယ်…]

[အန်နာ : @ နှင်းဆီစစ်ပွဲ ညီမရေ အရမ်းကြမ်းတယ်နော် [ပွေ့ဖက်] ဒါပေမယ့် ငါ တကယ်တမ်း ကြည့်ကြည့်လိုက်တော့  အားးး အားးးးအားးးးအားးးး မသေမျိုးပဲ... တကယ့်ကို နတ်သားလေးပဲ… တိုက်ရိုက်ထုတ်လွှင့်မှုက သုံးနာရီကြာတာတောင် ပထမစက္ကန့်ကနေ နောက်ဆုံးစက္ကန့်အထိ ကြည့်ရတာ လုံးဝမပင်ပန်းဘူးဆိုတာ ငါသိလိုက်ရပြီး တိုက်ရိုက်ထုတ်လွှင့်မှုကို အဆုံးသတ်လိုက်တာနဲ့ ငါအရမ်း စိတ်ပျက်သွားမိတယ်…] 

[နူးညံ့သော : မင်းက ရေတပ်လား ဒါမှမဟုတ် လူလိမ်လား ငါသံသယဝင်မိတယ်…အဲ့ဒီအကြောင်းကို ကြွားတာက နည်းနည်းလွန်လွန်းတယ်…]

 [ဝင်နီ: ငါပျော်လို့သေနိုင်တယ်… တကယ့်ကို လှပလွန်းတယ်…ဘယ်သူကမှ အဲ့ဒီခံစားချက်ကို ဖော်မပြနိုင်ဘူး မင်းကိုယ်တိုင်ကြည့်မှပဲ သိရလိမ့်မယ်…]

တင်ဆက်သူအသစ်၏ ထိုကဲ့သို့ ကျော်ကြားသည့် အချက်အလက်များအပြင် 'လူသား'ဟူသည့် တံဆိပ်ကပ်မှုနှင့် သက်တံ့အမြောက်အများလွှင့်ထုတ်ပေးမှုတို့ပါရှိနေသောကြောင့် လူအများ၏ အာရုံကို လုံလုံလောက်လောက် ဆွဲဆောင်နိုင်ခဲ့သည်။ မည်သည့်အမှားအယွင်းမှသာ မရှိခဲ့ပါက ထိုတိုက်ရိုက်ထုတ်လွှင့်မှုကို အကြည့်မည့်သူ ရှိမည် မဟုတ်ပေ။

 နက် နှစ်နာရီတွင် "ကုယွီမြန်က ဘယ်သူဆိုတာ ဘယ်သူက မသိတော့လို့လဲ" ထိုခေါင်းစဉ်မှာ အပူတပြင်းရှာဖွေမှု၏ ထိပ်ဆုံးဆယ်ခုကိုပင် ခေတ္တမျှ ရောက်ရှိသွားခဲ့သည်။

“………”

------

လီယွင်သည် မြို့တော်တက္ကသိုလ်၏ သိပ္ပံနှင့်နည်းပညာဌာနရှိ ဒုတိယနှစ်ကျောင်းသူဖြစ်သည်။ သူ့အိမ်က ကျောင်းနှင့်နီးသောကြောင့် ပိတ်ရက်တိုင်း အိမ်ပြန်လေ့ရှိသည်။ ယနေ့က သောကြာနေ့ဖြစ်သည်။ ညစာစားပြီးနောက် ခြောက်နာရီတွင် သူမက ဖုန်းကိုဖွင့်ကာ ပုံမှန်အတိုင်း အင်တာနက် စတင်အသုံးပြုခဲ့သည်။ မကြာသေးမီက၊ ကြယ်တာရာကောင်းကင်မှ လူသစ်တန်းပြိုင်ပွဲ၏ တိုက်ရိုက်ထုတ်လွှင့်မှုသက အလွန်ရေပန်းစားနေခဲ့သည်။ သူမက ကြယ်တာရာကောင်းကင်မှ တိုက်ရိုက်ထုတ်လွှင့်မှုများကို ရံဖန်ရံခါ ကြည့်ရှုလေ့ရှိသောကြောင့် ပုံမှန်အတိုင်း ကြည့်ရှုရန် ဆုံးဖြတ်ခဲ့သည်။

အာ….လူသားတင်ဆက်သူလား…ဘာလို့ လူကြိုက်များမှုက အဲ့လောက်မြင့်နေရတာလဲ အတုကြီးများလား…

 တစ်နာရီခန့်ကြာသောအခါ 

"အားးအားး…ဘုရားရေ…" 

လီယွင်တစ်ယောက် သူမ၏ လက်ပတ်ကွန်ပြူတာဖြင့် ကုတင်ပေါ်တွင် လူးလိမ့်နေရင်း ရှီဗာအူနူ(ခွေး အမျိုးအစားတစ်မျိုး)နားရွက်တစ်စုံကို ထုတ်ဖော်မိသွားသည်။

"ဒီလူကို သွားခိုးရမယ်…"

 “ကလစ်”

အိပ်ခန်းထဲတွင် မီးရောင်လင်းလာပြီး မေမေလီက သစ်သီးဗန်းတစ်ခုနှင့် ဝင်လာသည်။ အိပ်ခန်းထဲတွင် ရှုပ်ပွနေသည်ကို တွေ့လိုက်ရသောအခါ မျက်မှောင်ကြုတ်ပြီး သူ့သမီးအား ဆူပူကြိမ်းမောင်း လိုက်သည်။

“ဘယ်လို ငရဲမျိုးလဲတကယ့်ကိုပဲ… သမီးရဲ့အိပ်ဆောင်မှာ ဒီလိုပဲလုပ်ရင် အခန်းဖော်က သမီးကို ဘယ်လိုလုပ် သည်းခံနိုင်မှာလဲ…" 

မေမေလီက မြို့၏ လူလတ်တန်းစားရပ်ကွက်တွင် နေထိုင်သော်လည်း၊ သူမနှင့် သူမ၏ခင်ပွန်းက မြို့၏အထက်တန်းလွှာရပ်ကွက်ရှိ သိပ္ပံအကယ်ဒမီတွင် အလုပ်လုပ်ကြသည်။ သူတို့မိသားစုအားလုံးက ပညာတတ်များဖြစ်သည်။ လီမိဘများက ပို၍ပင် စည်းကမ်းတင်းကျပ်သည်။ မေမေလီက လေထဲတွင် လွင့်နေသော လီယွင်၏ တစ်ကိုယ်ရေသုံး လက်ပတ်ကွန်ပြူတာ ဖန်သားပြင်ကို တစ်ချက်ကြည့်လိုက်ပြီး အကျင့်ဖြစ်နေကျအတိုင်း ဆူပူလိုက်သည်။

"ဘာတွေကြည့်နေတာလဲ… တိုက်ရိုက်ထုတ်လွှင့်နေတာကိုလား… ဒီလို အသုံးမကျတဲ့အရာတွေကိုပဲ နေ့တိုင်းကြည့်နေမယ့်အစား အချိန်ရရင် စာအုပ်များများဖတ်သင့်တယ်… နောက်ဆုံးစာမေးပွဲ စာတမ်းကိုရေးလေ… စတောင် မစရသေးဘူးမလား…"

မေးခွန်းများက ဒဏ်ရာပေါ် တည့်တည့်ကျသွားသည်။ 

လီယွင် ရုတ်​တရက်​ မျက်​ရည်​ပင် ဝဲလာသည်​။

"အ​မေ သမီး ဗိုက်​ဆာ​တယ်…"

သူမ ဗိုက်ကို ထိကြည့်လိုက်သည်။ ညစာစားပြီးဖြစ်သော်လည်း တိုက်ရိုက်ထုတ်လွှင့်မှုကို ကြည့်ပြီးနောက် သူမ ဗိုက်ဆာလာခဲ့သည်။

"ဒီတင်ဆက်သူက တကယ်ကို နူးညံ့သိမ်မွေ့ပြီးကောင်းတဲ့ ခံစားချက်ကို ပေးနိုင်တယ်၊ သူ့ အစားအသောက်ကလည်း လတ်ဆတ်တယ်… တုန်ဖို အသားဆိုတာကို သမီး အရင်က မကြားဖူးဘူး…" 

🐯🐯🐯