MM Story Teller

Chapter 107

Viewers 4k

🚩Chapter -107

Arc_5 . အရံအမျိုးသမီး ဇာတ်ကောင်၏ တန်ပြန်စနစ် [ 19 ]

စုရွေ့ပြောတာကို ကြားလိုက်ရသောအခါ စုဝမ် အချိန်အတော်ကြာအောင် တိတ်ဆိတ်သွားခဲ့သည်။

ပြင်ပစိတ်ဝိညာဥ်ခန္ဓာကိုယ်က သူ့ကိုယ်သူ စနစ်အဖြစ်မှတ်ယူပြီး ဤကမ္ဘာကြီး၏ စိတ်ဝိညာဥ်စွမ်းအားများကို စုပ်ယူဖို့အတွက် Host၏ အားကောင်းသောဝိညာဥ်တွင်မှီခိုဖို့လိုအပ်သည် ။

ထို့နောက် ၎င်းစနစ်က တာဝန်များချပေးပြီး hostကို တာဝန်များပြီးစီးအောင်လုပ်ခိုင်ခြင်းဖြင့် စိတ်ဝိညာဥ်စွမ်းအားကို စုပ်ယူ၏ ။ တာဝန်ပြီးမြောက်သွားသောအခါ ဤကမ္ဘာ၏ သတ်မှတ်ထားသော စိတ်ဝိညာဥ်စွမ်းအား ယူနစ်ကို စုပ်ယူလိမ့်မည် ။

ယခုတွင် စုယန်အသက်ရှင်နေကြောင်း စနစ်ကရှာတွေ့သွားသောကြောင့် တစ်စုံတစ်ခုက ၎င်း၏ စိတ်ဝိည္ဥ်စွမ်းအားကို မတည်မငြိမ်ဖြစ်လာစေသည်။ထို့နောက် ယန်ကျစ်ရှီ၏ သံသယဝင်လာမှုနှင့် ယန်ဝူ ၏သတိထားမိသွားမှုတို့ကြောင့် ၎င်း၏ စိတ်ဝိညာဥ်စွမ်းအားကို အလွန်အကျွံသုံးလိုက်ရပြီး အနားယူရန် လိုအပ်လာသည်။

ဤအချိန်က စနစ်ကို အဆုံးသတ်ပေးဖို့အတွက် အကောင်းဆုံးအခွင့်အရေးပင် ။ သေချာပေါက် သူတို့သာ ဤအချိန်တွင် စနစ်ကို သုတ်သင်ပစ်ချင်ပါက စနစ်၏ လက်ခံကောင် ယန်ကျစ်ရှီကိုလည်း တစ်ပါတည်း သတ်ပစ်ဖို့ လိုအပ်သည် ။

ယန်ဝူ၏ အခန်းထဲသို့ စုဝမ် တိတ်တဆိတ် တစ်လှမ်းချင်းလှမ်းသွားခဲ့သည် ။ ဤအချိန်တွင် သူမ နှင့် စုရွေ့ ဆက်၍ ဟန်ဆောင်နေစရာ မလိုတော့ပေ ။

နှစ်ယောက်စလုံးက တစ်ပြိုင်တည်းထွက်ပေါ်လာတာကို တွေ့ရသောအခါတွင် သူ့လက်မောင်းထဲတွင် သတိလစ်နေဆဲဖြစ်သော ယန်ကျစ်ရှီကို ယန်ဝူ အသေအချာဆွဲဖွက်ထားလိုက်သည် ။

စုဝမ်၏ အသံက အလွန်အေးစက်နေပြီး သူမ၏ အကြည့်တို့တွင် နွေးထွေးမှု တစ်စက်မှမရှိပေ ။

" အာ "

ယန်ဝူပြုံးရုံသာ ပြုံးပြနိုင်သည် ။

" အဲ့ဒီ အိပ်မက်ထဲမှာ အတိတ်ဘဝတုန်းက သူမကို ကျွန်တော် တစ်ခါဆုံးရှုံးခဲ့ပြီး တစ်ခါလည်း သေခဲ့ပြီးသွားပြီ "

ယန်ဝူ ခေါင်းကို အနည်းငယ်မော့လိုက်ကာ စုဝမ်ကို ကြည့်လိုက်သည်။

" ခင်ဗျားတို့က ခင်ဗျားတို့ရဲ့ အင်အားကို ဖုံးကွယ်ထားတယ်ဆိုတာ ကျွန်တော်သိတယ် သေချာပေါက် ခင်ဗျားတို့အင်အားကို မဖုံးကွယ်ထားရင်တောင် အဲ့ဒါက အရေးမကြီးပါဘူး ။ ကျွန်တော် ခုခံမှာ မဟုတ်ဘူး ။ ကျွန်တော့်ကို သတ်လိုက်ပါ ။ အနည်းဆုံးတော့ ဒီဘဝမှာ ကျွန်တော် သူမနဲ့ အတူတူသေချင်တယ် "

စုဝမ်၏ အိပ်မက်ကမ္ဘာထဲတွင် ယန်ဝူ အတိတ်ဘဝမှ အရာအားလုံးကို ကြုံတွေ့ခဲ့ပြီးဖြစ်သည် ။

အတိတ်ဘဝတွင် ယန်ကျစ်ရှီကို ဆုံးရှုံးခဲ့သော ယန်ဝူမှာ သူ့ကိုယ်သူ သန်မာလာအောင် တွန်းအားပေးနေခဲ့ပြီး ချူးဖေးယန်ကို လက်တုံ့ပြန်ဖို့အတွက် သူက အခွင့်အရေးကို ရှာနေခဲ့ခြင်းပင်။

ကံမကောင်းစွာဖြင့်...အရံဇာတ်ကောင်အနေဖြင့် သူ့ထံတွင် ဇာတ်လိုက်ကို အလဲထိုးဖို့အတွက် အားအင်ရော ကံတရားပါ ဘယ်တုန်းကမှ မရှိနေခဲ့ပေ ။

ဤဘဝတွင် စနစ်၏ပေါ်ထွက်လာမှုကြောင့် ယန်ကျစ်ရှီသည် လုံးဝမတူညီသော လူတစ်ယောက်ဖြစ်သွားခဲ့၏ ။

သို့သော် သူမကို ယန်ဝူ လက်မလျှော့နိုင်သေးပေ ။ သူမက သူ့ကို မချစ်နိုင်တော့မှတော့...။

သူ့အမြင်တွင် အတူတူသေလိုက်ခြင်းက အကောင်းဆုံးအဖြေသာ ဖြစ်သည် ။

" ဒါဆိုလည်း ရှင်တို့ အတူတူသေလိုက်ကြ "

စုဝမ် အသံက အေးစက်နေမြဲပင် ။ ဓါးကဲ့သို့ ချွန်ထက်သော လက်သည်းစွယ်ဆယ်ချောင်းက ရုတ်တရက် သူမလက်ချောင်းများတွင် ပေါ်ထွက်လာပြီး လူနှစ်ယောက်၏ နှလုံးရှိရာဆီသို့ တိုက်ရိုက် ရောက်သွားခဲ့သည် ...

....

ယန်ကျစ်ရှီနိုးလာသောအခါ နောက်တစ်ရက်၌ မွန်းတည့်နေပြီ ဖြစ်၏ ။

အနည်းငယ်ကိုက်ခဲနေဆဲဖြစ်သော သူမ၏ ခေါင်းကိုပြန်ကိုင်ထားကာ သူမ သတိမလစ်ခင် မနေ့က စနစ်မှ ပေးလိုက်သော တာဝန်ကို ရုတ်တရက်ပြန်သတိရသွားသည် ။

ယန်ဝူကို သတ်ရမှာလား ။

ဟင့်အင်း ၊ မလုပ်နိုင်ဘူး ။ဤနှစ်များတွင် စနစ်ထံမှ မသုတ်သင်ခံရဖို့အတွက် သူမ၏ ဆန္ဒကို ဆန့်ကျင်နေသော အရာများစွာကို ယန်ကျစ်ရှီ လုပ်ခဲ့ရသည်။

သို့သော်...

ယန်ကျစ်ရှီ သူမ၏စိတ်ထဲမှ စနစ်ကို ဆက်သွယ်လိုက်သောအခါတွင် သူမဘယ်လောက်ပဲခေါ်နေပါစေ စနစ်က မတုံ့ပြန်လာခဲ့ပေ ။ သူမ စနစ်ဘောင်ကွက်ထဲမှ တာဝန်ကို စစ်ကြည့်ရန်သာရှိတော့သည် ။

အဓိကဇာတ်ကြောင်း၏ တောက်ပသောစာလုံးများ နှင့် တာဝန် ကို တွေ့ရသောအခါ ယန်ကျစ်ရှီ၏ အကြည့်တို့က ရုတ်တရက် တောက်ပလာခဲ့သည် ။

ဟုတ်သားပဲ ၊ ဒေါက်တာအယ်လ် ။

သူမသာ ဒေါက်တာအယ်လ်ကို အမိဖမ်းပြီး ဆွဲဆောင်နိုင်မယ်ဆိုရင် အဓိကဇာတ်ကြောင်းက ပြီးဆုံးသွားပြီး သူမလည်း အမှတ်အများကြီး ရလာလိမ့်မယ် ။ အဲ့ဒီအချိန်ကို ရောက်လာရင် စနစ်ကို အခြေအနေနဲ့ပတ်သက်ပြီး သူမ ပြောကြည့်လို့ရနိုင်လောက်တယ် ။

ဤအရာအားတွေးမိသောအခါ ယန်ကျစ်ရှီ ချက်ချင်းအိပ်ယာမှထကာ သန့်ရှင်းရေးလုပ်ပြီး မေပယ်ဓါတ်ခွဲခန်းသို့သာ တိုက်ရိုက်သွားတော့သည် ။

ယန်ကျစ်ရှီကို သူ့ရဲ့ စိတ်ဝိညာဥ်စွမ်းအင်ဖြင့် ဆက်တိုက်စောင့်ကြည့်နေသော စုရွေ့မှာ ချီယိကို ယန်ကျစ်ရှီသွားရှာသည့်အခါတွင် အာရုံပြန်စုစည်းလိုက်တော့သည် ။

မနေ့ညက ယန်ကျစ်ရှီကို သူတို့ တိုက်ရိုက်သတ်ဖြတ်ပစ်နိုင်မယ့် အခွင့်အရေးရခဲ့သော်လည်း စုဝမ်က မလုပ်ခဲ့ပေ ။

စုဝမ်က စိတ်နှလုံးနူးညံ့သော မိန်းမတစ်ယောက်ဟု စုရွေ့ဘယ်တုန်းကမှ မခံစားခဲ့ရပေ ။ သို့သော် ' အချစ်' ဆိုသော စကားလုံးက သူမနှလုံးသားအတွက် ဒဏ်ရာဖြစ်ပြီး အားနည်းချက်လည်း ဖြစ်နေ၏။

ထင်ထင်ရှားရှားပင် ယန်ဝူ၏ အရူးအမူးအချစ်က စုဝမ်၏ နှလုံးသားကို ထိတွေ့သွားစေသည် ။

ဤအချိန်တွင် စုရွေ့ မျှော်လင့်ချက်အချို့ကို ဆုပ်ကိုင်ထားမိသွား၏။

ယန်ကျစ်ရှီ၏ ရွေးချယ်မှုအပေါ်တွင် မျှော်လင့်ခြင်း ။ ယန်ဝူ၏ အဆုံးသတ်ကို မျှော်လင့်မိခြင်းတို့ပင် ။

ထိုအရာက မျှော့်လင့်ချက်ဆိုတဲ့ ခံစားမှုမျိုးအဖြစ်ပြောင်းလဲသွားတာက အလွန်ကောင်းပေ၏ ။

စုဝမ်၏ ကန့်သတ်ထားသော စိတ်တို့ကို သူစတင်ပြီး နားလည်လာခဲ့သည် ။

ဆက်တိုက် ဝိညာဥ်ကူးပြောင်းနေရချိန်တွင် သူမအမြဲရှာဖွေနေတတ်သော အရာ၊ ဘာကြောင့် သူမက ဖြိုခွင်းရေးသမားအဖြစ် ဆက်တိုက်လုပ်ဆောင်နေရသလဲဆိုတာကိုပင် ။ သူမ တစ်ချိန်လုံး ဖြစ်ချင်သောအရာက 'ဖြိုခွင်းရေးသမား' မလုပ်ချင်ခြင်းလား ။

သူမ တကယ်တမ်း မျက်မြင်တွေ့ချင်သည့်အရာက လူတို့၏ နှလုံးသားပင် ။ စုရွေ့အတွက် သူ၏ ' ကိုယ်စားလှယ် ' အထောက်ထားအပေါ် ဤအကြိမ်က ပထမဆုံးနားလည်သွားခြင်းပင်။

အရင်တုန်းက သူအေးစက်စွာဖြင့် တာဝန်များကို ဆောင်ရွက်ခဲ့ကာ ရိုးရိုးရှင်းရှင်း ပြီးမြောက်စေခဲ့သည် ။ သို့သော် ယခုတွင်တော့ စုရွေ့က ကမ္ဘာတိုင်းတွင် လိုက်လျောညီထွေဖြစ်လာရုံသာမက ကမ္ဘာတိုင်းရှိ လူတိုင်းနှင့် အတွေ့အကြုံယူနိုင်ဖို့ သူ၏ နှလုံးသားနှင့် ခန္ဓာ ကိုပါအသုံးချဖို့လိုအပ်တာကို သင်ယူနိုင်ခဲ့သည်။

မဟာမိတ်တပ်များ၏ စုပေါင်းတိုက်ခိုက်ခြင်းမှလွဲ၍ မထင်ထားရလောက်အောင်ပင် ချန်းယအခြေစိုက်စခန်းက အောင်ပွဲများကို အနိုင်ယူနိုင်ခဲ့သည်။ထိုနေရာတွင် ချန်းယအခြေစိုက်စခန်းအတွက် တိုက်ခိုက်ဖို့ မရေမတွက်နိုင်လောက်သော သန္ဓေပြောင်းဖုတ်ကောင် နှင့် ကူးစက်ခံထားရသူများ ရောက်ရှိလာခဲ့သည် ။ထိုသူများထဲတွင် ဘဝအသစ်ကို လိုသူများ ၊ ခွန်အားရဖို့ မျှော်လင့်နေကြသောသူများလည်း ပါဝင်လာ၏ ။ တစ်ချိန်တည်းတွင် ချန်းယ တပ်ဖွဲ့၌ သူတို့၏ ဘဝကို မြတ်နိုးစွာဆုပ်ကိုင်ထားပြီး ဘဝကိုဆက်ရှင်သန်လိုသော သာမန်သူများပါ ပါဝင်လာခဲ့သည် ။

......

အချိန်သုံးရက် ကုန်ဆုံးသွားဖို့ သိပ်မကြာပေ ။

ချန်းယအခြေစိုက်စခန်းရှိ လူများက သူတို့၏ အနိုင်ရမှုအတွက် အောင်ပွဲခံနေကြသည် ။

ကောင်းမွန်သောခံစားချက်များ ဖန်တီးဖို့အတွက် ယန်ကျစ်ရှီက ချီယိကို ဆက်တိုက်တွယ်ကပ်နေ၏။

ချီယိမှာ ပေါက်ကွဲလုနီးနီးပင်...

အစ်မ ၊ ခင်ဗျားက ကျွန်တော့်ရဲ့ အစ်မဖြစ်နေတာနဲ့တင် မလုံလောက်သေးဘူးလား ။

ခင်ဗျားကတကယ်ပဲ ကျွန်တော့်အတွက် ကောင်းကင်ဘုံကနေ အရုပ်တစ်ရုပ်ကိုပါ ပို့ပေးလိုက်တာလား ။

တစ်နေ့လုံး ဘာဘာညာညာတွေ မရပ်မနား ငါ့နားထဲမှာ ကြားနေရတာ ။ သူမက ငါ့ကို အဖက်မလုပ်ချင်ယောင်ဆောင်နေတာလား ၊ အစစ်အမှန်က စကားများတဲ့သူမလားနဲ့မေးနေတာ... ငါဘယ်လိုလုပ်ခံနိုင်ရည်ရှိတော့မှာလဲလို့ဟ... ။

တစ်ချိန်လုံး ချီယိ၏ မျက်နှာတွင် ရေခဲတုံးကဲ့သို့အေးစက်နေသည့်အမူအရာကိုလုပ်ထားပေမယ့် အမှန်တကယ်တွင် သူစိတ်ထဲ၌ ကွဲအက်ပြိုလဲနေခဲ့တာကြာပြီပင်။ သုံးရက်မြောက်ညတွင် ချီယိမထွက်သွားခင် ယန်ကျစ်ရှီ သူ့ကို တားလိုက်၏။

" ဒေါက်တာချီ ...ကျွန်မမှာ ...ကျွန်မမှာ ရှင့်ကိုပြောစရာရှိတယ်"

ချီယိ "...."

မမလေးရေ ခင်ဗျားအခုထိပြောလို့မဝသေးဘူးလား...။

သူ့ နှလုံးသားထဲတွင် ကွဲကြေနေပေမယ့် အပေါ်ယံတွင်မူ ယန်ကျစ်ရှီကို ချီယိက ကြက်သေသေနေသော မျက်နှာနှင့် အေးစက်စွာပြောလိုက်သည်။

" ပြော "

"ကျွန်မ..."

ထိုလူ၏ အကြည့်တို့ကို လက်ခံပြီးသောအခါ ယန်ကျစ်ရှီ၏ နှုတ်ခမ်းတို့ လှုပ်ရှားသွားခဲ့သည် ။

" သဘော.."

" ကျွန်မရှင့်ကို သဘောကျတယ် "

ဤစကားလုံးအနည်းငယ်က ပြောဖို့အလွန်လွယ်ကူပေသည် ။ သို့သော် ပြောပြီးသွားသောအခါတွင် ယန်ကျစ်ရှီ နှလုံးသားထဲ၌ ဗလာအဖြစ်သာ ခံစားရ၏ ။

အတိတ်ဘဝတုန်းက သူမ ချူးဖေးယန်ကို အလွန်သဘောကျခဲ့သော်လည်း ချူးဖေးယန်၏ လက်ထဲ၌သာ သူမ သေခဲ့ရသည် ။

ယခုအချိန်တွင် သူမအရှေ့တွင်ရှိနေသော ယောကျ်ားကို 'သဘောကျတယ်' ဟုပြောခဲ့သော်လည်း သူမ၏ စိတ်က တစ်ခြားတစ်ယောက်၏ သေရေးရှင်ရေးကို တွေးနေမိသည် ။

" အိုး "

ယန်ကျစ်ရှီ၏ စကားလုံးတို့ကို ကြားသောအခါ ချီယိက ထိုနေရာတွင် ရပ်နေရင်း အကျင့်ပါနေသည့်အတိုင်း တစ်လုံးထဲသာ ပြန်ဖြေလိုက်သည်။

အခုလေးတင် ယန်ကျစ်ရှီက သူ့ကို ဖွင့်ပြောလိုက်တာလား ။

နေပါဦး ၊ ဒီလူကို နည်းနည်းလောက် စိတ်ငြိမ်အောင် လုပ်ခွင့်ပေးပါဦး... ။

" ရှင်တုံ့ပြန်တာလား "

ချီယိ၏ တုံ့ပြန်မှုကို ကြားပြီး ယန်ကျစ်ရှီ မယုံကြည်နိုင်စွာ မေးလိုက်သည် ။

ယခုအချိန် ချီယိက လေးကန်နေဆဲပင် ။

ငယ်ရွယ်စဥ်တုန်းက သူသည် ထိပ်တန်းကျောင်းသားတစ်ယောက် ၊ အချစ်အကြောင်းဘယ်တုန်းကမှ မစဥ်းစားဖူးသော ရူးသွပ်သည့် သိပ္ပံပညာရှင်တစ်ယောက်ပင် ။ လှပသောသူတစ်ယောက်ထံမှ ဝန်ခံလာသောအခါတွင် ထိုအရာက အစစ်အမှန်မဟုတ်တာကို သူသိနေသော်လည်း အလွန်ရှက်ရွံ့ကာ စိတ်လှုပ်ရှားနေမိဆဲပင် ။

ငါအေးအေးဆေးဆေးပဲ လက်ခံလိုက်သင့်လား ။ဒါမှမဟုတ် အပြတ်ငြင်းလိုက်ရမလား ။ ဒါမှမဟုတ် ဆိတ်ဆိတ်ပဲနေလိုက်ရမလား ။

" ရှင်ဘာမှမပြောဘူးဆိုရင် အဲ့ဒါကို ရှင်လက်ခံတယ်လို့ပဲ ကျွန်မသတ်မှတ်လိုက်တော့မယ်နော် "

ချီယိ သူ၏အတွေးထဲ၌ ရစ်ပတ်နေစဥ် ယန်ကျစ်ရှီက နောက်ဆုံးစကားကိုပြောပြီး ဓါတ်ခွဲခန်းထဲမှ အလင်းလိုအရှိန်ဖြင့် ပြေးထွက်သွားတော့၏။ သူမ၏ အတွေးပင်လယ်ထဲ၌ စနစ်ကို ဆက်သွယ်နေရင်း သူမ၏ အခန်းဆီသို့ ယန်ကျစ်ရှီ ပြန်သွားခဲ့သည် ။

ဒေါက်တာအယ်လ်ကို အမိဖမ်းဖို့ တာဝန်က မအောင်မြင်သေးသောကြောင့် ယန်ကျစ်ရှီ တစ်စုံတစ်ခုကို အရေးတစ်ကြီးခံစားလာစေမိ၏ ။

ဒါက ဘယ်လိုလုပ် ဖြစ်နိုင်မှာလဲ ။ အဲ့ဒီလူက အခုထိ သူမရဲ့ နှလုံးသားကို လက်ခံဖို့ ရည်ရွယ်ချက်မရှိသေးဘူးလို့တော့ မပြောနဲ့ ။ ဒါမှမဟုတ် တစ်ခြား ပြဿနာတစ်ခုခုများပေါ်လာတာလား ။ ဥပမာအနေနဲ့ သူမက လူမှားသွားတာမျိုး တစ်ခုခုပေါ့ ။

ယန်ကျစ်ရှီ ထိုမျှအထိ မစဥ်းစားရဲတော့ပေ ။ အဘယ်ကြောင့်ဆိုလျှင် စနစ်က ယန်ဝူကို သုတ်သင်ဖို့ သူမကိုပေးထားသော အချိန်က နီးကပ်လာပြီး နာရီပိုင်းသာ လိုတော့၏ ။

အတွေးထဲတွင် တဝဲဝဲလည်နေသော ယန်ကျစ်ရှီမှာ မသိစိတ်ဖြင့် ယန်ဝူ၏ တံခါးအရှေ့သို့ပင် ရောက်လာခဲ့သည် ။ လွန်ခဲ့သော ရက်အနည်းငယ်တုန်းက ဒေါက်တာအယ်လ်ကို ဆွဲဆောင်ဖို့အတွက် သူမအာရုံရောက်နေခဲ့ပြီး ယန်ဝူကို ရက်အနည်းငယ်လောက် ဆက်တိုက်မတွေ့ခဲ့ရပေ ။

ယန်ဝူက တစ်ယောက်ထဲ တိတ်တဆိတ် သူ့ကိုယ်သူပတ်တီးစည်းနေတာကို တွေ့ရသောအခါ ယန်ကျစ်ရှီ ဒေါသထွက်ကာ ချက်ချင်းဝင်သွားတော့သည် ။

" ယန်ဝူ ဒါကဘယ်လိုဖြစ်တာလဲ "

"မမလေး "

ယန်ကျစ်ရှီကို ယန်ဝူတွေ့လိုက်ရသောအခါ သူ့တစ်ကိုယ်လုံးအေးခဲသွားပြီး ခဏကြာမှ သူ စိတ်အေးသွားကာ ငြိမ်သက်သည့်အမူအရာကို ပြလာခဲ့သည် ။

" မမလေး ၊ ကိစ္စ တစ်ခုခုရှိလို့လား "

တကယ်တမ်းတွင် အချိန်ကျလာပြီဆိုတာ သူသိနေ၏ ။

လွန်ခဲ့သော သုံးရက်တုန်းက စုဝမ်၏ အေးစက်သော စကားလုံးတို့ ယန်ဝူ နားထဲတွင် ကြားယောင်နေဆဲပင် ။

" ရှင်တို့နှစ်ယောက်လုံးကို ကျွန်မနောက်ဆုံးအခွင့်အရေးပေးလိုက်မယ် ရှင့်မှာ အချိန် ၃ရက်ကျန်သေးတယ် ။ "

ယန်ဝူ နောက်ဆုံးကျန်ရှိသောအချိန်ကို တွေးနေရင်း ယန်ကျစ်ရှီကို ကြည့်နေခဲ့သည် ။ သို့သော်လည်း ဤရက်အနည်းငယ်တွင် သူမ၏ အရိပ်ယောင်ကိုတောင် သူမမြင်ခဲ့ရပေ ။

မျှော်လင့်ချက်များကို လက်လျှော့ထားပြီးသားဖြစ်သော ယန်ဝူက သူ့အသက်အန္တရာယ်ကိုပင် တွန်းအားပေးကာ စစ်မြေပြင်ရှေ့တန်းတွင် တိုက်ပွဲဝင်ခဲ့သည် ။ ဤအရာက သူ့ဘဝအတွက် နောက်ဆုံးတန်ဖိုးလည်း ဖြစ်နိုင်သောကြောင့်ပင် ။

အခန်းထဲရှိ လူထုက မွန်းကြပ်နေစေတုန်းပင် ။ ယန်ကျစ်ရှီ နှင့် ယန်ဝူတို့အချင်းချင်း ကြည့်မိနေလျက် ။ လူနှစ်ယောက် ..။တစ်ယောက်က သေဖို့ စောင့်စားနေပြီး နောက်တစ်ယောက်က တကယ်တမ်းတွင် အလွန်စိုးရိမ်နေလေ၏ ။

ဤအချိန်တွင် သုံးရက်လောက် တိတ်ဆိတ်နေခဲ့သော စနစ်က ပြန်ရောက်လာခဲ့သည် ။

Host ဒေါက်တာအယ်လ်က်ို ဆွဲဆောင်တာ မအောင်မြင်ခဲ့ပါဘူး ။

🚩

Prev Next