MM Story Teller

Chapter 108Arc-5End

Viewers 4k

🚩Chapter -108

Arc_5 . အရံအမျိုးသမီး ဇာတ်ကောင်၏ တန်ပြန်စနစ် [ 20 ] END

____

Host ဒေါက်တာအယ်လ်က်ို ဆွဲဆောင်တာ မအောင်မြင်ခဲ့ပါဘူး ။

ဤစနစ်က မူလကဒီကမ္ဘာမှ မဟုတ်သောကြောင့် ဖြစ်နိုင်သည် ။ ထို့ကြောင့် ဒေါက်တာအယ်လ်ကို ဆွဲဆောင်နိုင်ဖို့မှ လွဲ၍ ဤကမ္ဘာ၏ အင်အားအကြီးဆုံး ဒေါက်တာအယ်လ်ကို ယန်ကျစ်ရှီ ဆွဲဆောင်ဖို့ မကျရှုံးခင်အထိ ဒေါက်တာအယ်လ်၏ အထောက်အထားအစစ်အမှန်ကို ရှာတွေ့ဖို့ နည်းလမ်းမရှိခဲ့ပေ ။ ဤနည်းလမ်းဖြင့် မစ်ရှင်သာ အောင်မြင်သွားခဲ့လျှင် ဤကမ္ဘာ၏ မူလလမ်းကြောင်းကို ပျက်ပြားစေလိမ့်မည် ။ ဤ အဓိကဇာတ်ကြောင်းပျက်ပြားစေနိုင်မည့် တာဝန်ကို အောင်မြင်နိုင်ဖို့က ထိုပြင်ပစနစ်တိုင်းအတွက် စံသတ်မှတ်ထားခြင်းပင် ။

ထို့ကြောင့် စနစ်နှင့် အလုံးစုံသောအရာများတွင် အာဏာအလုံးစုံမရှိခဲ့ပေ ။

" မအောင်မြင်ဘူး.."

ဤစကားတစ်ခွန်းက ယန်ကျစ်ရှီ၏ နှလုံးသားကို ရေခဲလိုဏ်ဂူထဲသို့ ထိုးကျသွားစေသလိုပင် ။

စနစ်၏ ဖော်ပြချက် : အတွင်းလူ ယန်ဝူကို ဖယ်ရှားရမည့်တာဝန်အတွက် အနီးကပ်ရေတွက်မည့်အချိန်သို့ ဝင်ရောက်သွားပါပြီ ။အချိန်မီ တာဝန်မပြီးစီးပါက hostရဲ့ ဝိညာဥ်က ဖယ်ရှားခံရပါလိမ့်မယ် ။ တစ်ဆယ် ၊ ကိုး ၊ ရှစ် ...

အေးစက်သော စက်ပုံစံစနစ်က အညှာအတာကင်းမဲ့စွာ နံပါတ်များကို နောက်ပြန်ရေတွက်နေပြီး ရေတွက်နေသည့်အသံက ယန်ကျစ်ရှီ၏ စိတ်ထဲတွင် ပဲ့တင်ထပ်နေခဲ့သည် ။

ယန်ကျစ်ရှီ ထိုနေရာတွင် ရပ်နေပြီး သူမ၏ လက်နှစ်ဖက်စလုံးက တုန်ရီနေ၏ ။

" သုံး ၊ နှစ် ၊ တစ် "

နောက်ဆုံးသုံးစက္ကန့်တွင် အတိတ်ဘဝမှ အကြောင်းအရာတို့က သူမ၏ စိတ်ထဲတွင် ရုတ်တရက် ပြန်လည် ထင်ဟပ်လာသည် ။ သူမ သေမင်းတံခါးဝနှင့် ရင်ဆိုင်နေရသောအချိန်ကို သူမတွေ့ခဲ့သည် ။ သူမတွေ့ခဲ့တာ ထိုအချိန်က...သာမန်လူသာသာပဲဖြစ်တဲ့သူမက ဖုတ်ကောင်အုပ်စုထဲသို့ အညှာအတာကင်းမဲ့စွာ ပစ်ထုတ်ခံခဲ့ရသည် ။

စုဝမ်ကိုခေါ်ကာ နှလုံးသားမဲ့စွာ ထွက်သွားသော ချူးဖေးယန်၏ နောက်ကျောကိုသာ သူမမြင်ခဲ့ရသည် ။ထို့နောက်တွင် သူမ၏ ခန္ဓာကိုယ်ကို ရက်စက်ကြမ်းကြုတ်စွာ ဖုတ်ကောင်များက တစ်စစီဖျက်ဆီးပစ်လိုက်တာကို တွေ့ခဲ့ရ၏ ။ ယခုလက်ရှိ၌ သူမက ခါးသီးမှုနှင့် အမုန်းတရားတို့ကိုသာ ခံစားရပြီး ဘာနာကျင်မှုကိုမှ မခံစားရတော့ပေ ။ ဤအချိန်တွင် ရင်းနှီးသော ပုံရိပ်တစ်ခုက သူမဆီကို အပြေးအလွှားရောက်လာတာ တွေ့လိုက်ရသည် ။

အဲ့ဒါ..ယန်ဝူပဲ ။

ယန်ကျစ်ရှီ၏ ပါးပေါ်တွင် သတိမထားမိဘဲ မျက်ရည်များ ကျဆင်းလာခဲ့သည် ။

" ကျွန်မ တောင်းပန်ပါတယ် "

" ယန်ဝူ ကျွန်မတောင်းပန်ပါတယ် "

ရှင်ကျွန်မကိုချစ်တယ်ဆိုတာ ကျွန်မသိတယ် ။

အချိန်ရေတွက်ခြင်း၏ နောက်ဆုံးစက္ကန့်အထိ ပြီးသွားသောအခါ ယန်ကျစ်ရှီ မျက်ရည်များကို သုတ်ရင်း ယန်ဝူကို ပြုံး၍ ကြည့်လိုက်သည်။

" အားဝူ ကျွန်မ...ကျွန်မလည်း ရှင့်ကိုချစ်ပါတယ် "

ဒါဆို ကျွန်မရှင့်ကို နာကျင်စေမှာမဟုတ်တော့ဘူး။ အဲဒါက ကျွန်မသေမှရမယ်ဆိုရင်တောင် ကျွန်မ ရှင့်ကို နာကျင်စေမှာ မဟုတ်ဘူး ။

နောက်ဆုံးသော စက္ကန့်တွင် သူမ၏ ပြန်လည်မွေးဖွားလာမှုက အဓိပ္ပါယ်မရှိသလို ယန်ကျစ်ရှီ ခံစားလိုက်ရသည် ။သူမ မြတ်နိုးသင့်ဆုံးလူကို မြတ်နိုးရကောင်းမှန်းမသိခဲ့ပေ ။ သူမ အဖမ်းဆုပ်ထားသင့်ဆုံး ခံစားချက်တို့ကိုလည်း မဖမ်းဆုပ်ထားနိုင်ခဲ့ချေ ။

ဘာလက်တုံ့ပြန်မှုလဲ ၊ ဘာအမှန်တရားလဲ ။

အရာအားလုံးက စွဲလမ်းမှုတစ်ခုထက် မပိုခဲ့..

ထိုကဲ့သို့ အတုအယောင်အရာမျိုးတွေအတွက် သူမရဲ့ အနီးဆုံးမှာရှိနေတဲ့ သူရဲ့ ခံစားချက်တို့ကို သူမ လက်လျှော့ခဲ့မိသည် ။

တကယ်လို့...

တကယ်လို့ အရံအမျိုးသမီးဇာတ်ကောင်တန်ပြန်စနစ်သာမရှိခဲ့ရင် ၊ တကယ်လို့ သူမသာ ရိုးရိုးရှင်းရှင်းပဲ ပြန်မွေးဖွားခဲ့မယ်ဆိုရင် ၊ ကမ္ဘာပျက်ကပ်တွင် ယန်ဝူနဲ့အတူ သူမ ငြိမ်းချမ်းသော ဘဝမျိုးနှင့် နေခဲ့နိုင်လောက်သည် ။

အဲ့ဒါက ပျော်ရွှင်မှုဆိုတဲ့ အရာမျိုးပဲ မဟုတ်ဘူးလား။

ဇာတ်လိုက်မအတွက်ရော ၊ အရံဇာတ်ပို့ အတွက်ပါ ကိုယ့်ကိုယ်ဆန့်ကျင်ရမည့် အလုပ်တွေလုပ်ဖို့ အေးစက်သော စက်လိုစနစ်ထံမှ ထိန်းချုပ်ခံထားရသည်ထက်စာလျှင် အားလုံးတွင် သူတို့ကိုယ်ပိုင်ဘဝကို ထိန်းချုပ်နိုင်ဖို့အခွင့်အရေးရှိသည်။

ဘာစနစ်လဲ ၊ အဲ့ဒါက စက်သာသာပဲ...ဘယ်လိုလုပ်ပြီး လူသားတွေရဲ့ ခံစားချက်ကို နားလည်နိုင်မှာလဲ ။

ယန်ကျစ်ရှီ မျှော်လင့်ချက်အားလုံးကို လက်လျှော့ရင်း စနစ်ထံမှ ဝိညာဥ်ဖယ်ရှားခံရဖို့စောင့်ဆိုင်းနေစဲတွင် အေးစက်သော အမျိုးသမီးတစ်ယောက်၏ အသံက သူမနားထဲတွင် ပဲ့တင်ထပ်လာခဲ့သည် ။

" နင့်ရဲ့ စိတ်ဝိညာဥ် စွမ်းအားကို စုစည်းလိုက် ၊ ပြီးရင် နင့်ရဲ့ အတွေးပင်လယ်ထဲက စနစ်ကို တိုက်ထုတ်ပစ် "

" ယန်ကျစ်ရှီ နင်သာ အသက်ဆက်ရှင်ဖို့ ခံယူချက်ရှိနေသ၍ ယန်ဝူနဲ့ အတူနေနိုင်ဖို့ ဆုံးဖြတ်ထားသ၍ နင်အဲ့ဒါကို အနိုင်ယူနိုင်တယ်"

အနိုင်ယူလိုက် ။

ဒီအချိန်ကစပြီး နင့်ဘဝကို ကိုယ်တိုင်ပဲ ချုပ်ကိုင်လိုက် ။

နင့်ကိုယ်ပိုင်ဘဝအတွက် ဦးဆောင်တဲ့သူပဲဖြစ်လိုက်။

ယန်ကျစ်ရှီတွင် အသံပိုင်ရှင် ဘယ်သူလဲဆိုတာကို စဥ်းစားနေချိန်မရသဖြင့် သူမ၏ စိတ်ဝိညာဥ်ကို စတင်စုစည်းတော့၏ ။ အဆင့်ခြောက် စွမ်းရည်အသုံးချသူအနေနှင့် သူမ၏ စိတ်ဝိညာဥ်စွမ်းအင်က အလွန်အင်အားရှိသည် ။ဤအချိန်တွင် ယန်ကျစ်ရှီ၏ လက်ကို ယန်ဝူက မိမိရရဖမ်းဆုပ်လာခဲ့သည် ။သူ၏ နွေးထွေးသော လက်ဖဝါးမှတစ်ဆင့် တည်ငြိမ်သော စိတ်ဝိညာဥ်စွမ်းအားတို့က ယန်ကျစ်ရှီ၏ ခန္ဓာကိုယ်ထဲသို့ စီးဆင်းလာခဲ့၏ ။

စုဝမ် နှင့် စုရွေ့က အပေါက်ဝတွင် တိတ်တဆိတ်ရပ်နေပြီး စိတ်ဝိညာဥ်ခန္ဓာ၏ဖုန်မှုန့်လိုမျိုးမီးခိုးရောင် အငွေ့က ယန်ကျစ်ရှီရဲ့ခန္ဓာကိုယ်ထဲမှ ထွက်သွားတော့သည်။

စုရွေ့ လှောင်ရယ်ကာ ထိုဖုန်မှုန့်မီးခိုးရောင်စိတ်ဝိညာဥ်ခန္ဓာ၏ ဒြပ်ထုကို တိုက်ရိုက်စိတ်ဝိညာဥ်ပိတ်ဆို့သည့် အထဲသို့ ပိတ်လှောင်ထားခဲ့သည် ။

နင်က...အယ်လ်...

စနစ်တွင် စုရွေ့ထံမှ အမြစ်ပြတ်ချေမှုန်းမခံရခင် နောက်ဆုံးသောစကားကိုတောင် အပြီးထိ ပြောချိန်မရှိလိုက်ရပေ ။

လက်ခံကောင်ကို ဆုံးရှုံးလိုက်ရသော စနစ်က တစ်ခဏစာတောင် မရပ်တည်နိုင်တော့ပေ။

ပြင်ပစနစ် ဖျက်ဆီးခံရပြီးပြီးချင်းတွင် မစ်ရှင်ပြီးမြောက်ကြောင်း ဖော်ပြချက်ကို စုဝမ်စိတ်ထဲ၌ လက်ခံရရှိလိုက်သည် ။

ပိုးမွှားကို ဖျက်ဆီးပြီးပါပြီ ။ ကိုယ်စားလှယ်က ဒီမစ်ရှင်ကမ္ဘာက ထွက်သွားဖို့ ဘယ်အချိန်မဆို ရွေးချယ်လို့ရပါတယ် ။

ခက်ခဲပုံပေါ်သော မစ်ရှင်က ဤကဲ့သို့ ရိုးရိုးရှင်းရှင်းပင် ပြီးဆုံးသွားခဲ့သည် ။

၎င်းက ဤမစ်ရှစ်ကမ္ဘာထဲသို့ လေးနှစ်ကြာဝင်ရောက်လာခဲ့သော စုဝမ်အတွက် မထင်ထားခဲ့သောအရာပင် ။

အကယ်၍ ယန်ဝူသာမရှိလျှင် ၊ အကယ်၍ ယန်ကျစ်ရှီသာ စနစ်ကို ငြင်းပယ်ဖို့ မရွေးချယ်ခဲ့လျှင် ထိုအရာက သူတို့၏ အင်အားတွင်သာ မူတည်လာမည်ဖြစ်ပြီး ယန်ကျစ်ရှီကို တွန်းလှန်ကာ စုရွေ့ နှင့် စုဝမ်တို့ အနိုင်ယူရလိမ့်မည် ။ သို့သော် အကယ်၍များ ယန်ကျစ်ရှီသာ လေဟာနယ်စနစ်ထဲသို့ ရှစ်နှစ် သို့မဟုတ် ဆယ်နှစ်ကြာမဝင်ရောက်ထားခဲ့လျှင် သူတို့၏ မစ်ရှင်လည်း ရှုံးနိမ့်လောက်သည် ။

ကောင်းကင်ဘုံ၏ တွက်ချက်နိုင်မှုက လူသားများ၏ တွက်ချက်နိုင်မှုလောက် မကောင်းပေ ။ဖန်တီးမှုက ဘယ်လောက်ပဲ အနုစိတ်နေပါစေ ၎င်းက လူသားတို့၏ ခံစားချက်ကို ဘယ်တော့မှ တွက်ချက်နိုင်လိမ့်မည်မဟုတ်ပေ ။

နောက်ဆုံးတွင် မစ်ရှင်ကမ္ဘာ၌ စုဝမ်ကျန်ရှိနေဖို့ ရွေးချယ်ခဲ့သည် ။ သူမတွင် အချိန် ခြောက်နှစ်မျှ ကျန်နေသေး၏ ။ဤခြောက်နှစ်ကို စုရွေ့ သူ့ မစ်ရှင်ပြီးစီးအောင်ဆောင်ရွက်ဖို့အတွက် သူမအဖော်ပြုပေးချင်သည် ။

ကမ္ဘာပျက်ကပ်မှာ လမ်းပျောက်ပြီး စိတ်ဆင်းရဲနေကြတဲ့သူတွေက ခေတ်သစ်မှာ ပျော်ရွှင်စွာနေထိုင်တာကို သူမစောင့်ကြည်ဦးမည်။

....

ခြောက်နှစ်အတွင်း ချန်းယအခြေစိုက်စခန်းသည် လူသားအရင်းအမြစ်၏ အကြီးမားဆုံး အခြေစိုက်စခန်းဖြစ်လာ၏ ။ ခေတ်သစ်သို့ ရောက်ရှိလာတာနှင့်အမျှ လူသားများကို ကိုက်သောဖုတ်ကောင်များ ဘယ်မှာမှ မရှိတော့ပေ ။ ကျန်ရှိနေသောသူအားလုံးက လူသားမျိုးနွယ်အသစ်များသာ ။

သူတို့ထံတွင် ကိုယ်ပိုင် သတိနှင့် အတွေးတို့ရှိကြသည် ။ သူတို့ကသလင်းကျောက်အမြုတေကိုသာ မှီခိုပြီး အာဟာရနှင့် စွမ်းအင်တို့ကိုစုပ်ယူရသော်လည်း ထိုအရာမှလွဲ၍ လူသားအသစ် နှင့် အခြားလူသားများကြားတွင် ကွာခြားမှုမရှိပေ ။ ကမ္ဘာပျက်ကပ်တွင် လူသားအသစ်များ၏ အခြေစိုက်စခန်းက သာမန်လူသားများ၏ စခန်းထက်ပင် ပို၍ ကြီးမားနေသေးသည် ။

အစိမ်းရောင်သစ်ရွက်ဓါတ်ခွဲခန်းက နောက်ဆုံးတွင် သမိုင်းကြောင်းတစ်လျှောက်၏ အဆုံး၌ ပျောက်ကွယ်သွားခဲ့သည်။လူတွေက သူတို့၏ မျက်နှာကို အရောင်ပြောင်းသွားစေနိုင်လောက်သည်အထိ စကားပြောစေနိုင်လောက်သော ဒေါက်တာအယ်လ်ကို မှတ်မိနေသောသူလည်း သိပ်မရှိတော့ပေ ။ ကမ္ဘာသစ်တွင် အားလုံးမှတ်မိကြသည့် ပထမဆုံးဓါတ်ခွဲခန်းမှာ ' မေပယ်ရွက်ဓါတ်ခွဲခန်း ' သာဖြစ်သည် ။

ကမ္ဘာသစ်၏ မြို့တော်သစ်ရဲ့ မိန်းလမ်းမကြီးမှတစ်ဆင့် အဝေးတွင် ဘေးချင်းကပ်ရပ်နေသော ရုပ်ထုနှစ်ခု မြင်နိုင်၏ ။

ထိုရုပ်ထုများက ယန်ယွီ ၊လီရှန်း တို့နှင့် သက်ဆိုင်သည်။ သူတို့က ခေတ်သစ်ကို ဖန်တီးခဲ့ပြီး သူတို့နှင့် သက်ဆိုင်သော ဘဝ နှင့် မေတ္တာတို့ကို ရရှိခဲ့သည် ။

" အမည်မသိသူရဲကောင်းဖြစ်ရတဲ့ အရသာကဘယ်လိုနေလဲ "

စုဝမ် နှင့် စုရွေ့တို့ လမ်းမရှည်ကြီးတွင် တဖြည်းဖြည်းသာ လျှောက်နေကြ၏ ။ ဤအချိန်တွင် ကောင်းကင်က အပြာရောင်ဖြစ်ပြီး လမ်းမဘေးတွင် မြင့်မားသော သစ်ပင်များ ပေါက်ရောက်နေသည်။

ကမ္ဘာပျက်ကပ်၏ ဆယ်နှစ်တာကာလတွင် အခြားကမ္ဘာများ၌ ပုံမှန်သာဖြစ်သော ဤအရာတို့က အလွန်အဖိုးတန်ကာ ကြည်နူးဖွယ်ကောင်းလှ၏။

အမည်မသိသူရဲကောင်း ။

မြင့်မားသောနည်းပညာနှင့် လူ့ခန္ဓာကိုယ်၏ အလားအလာကို ဖွင့်ပေးကာ ဗိုင်းရပ်စ်ကို နှိမ်နင်းနိုင်သည့် ဆေးဝါးအသစ်နှင့် စွမ်းအင်အမြုတေသလင်းကျောက်တို့က ဒေါက်တာအယ်လ်၏ လက်ထွက်များ ဖြစ်ကြောင်း မည်သူမှ မသိကြပေ ။

ဒေါက်တာအယ်လ်ဆိုသောသူမှာ အပြစ်သားများ၏ သမိုင်းတွင် မှတ်တမ်းတင်ရေးထိုးခံရမည့်သူပင် ။

" ကျွန်မ အရင်က တစ်ခြားကမ္ဘာကို ရောက်ဖူးတယ် "

စုဝမ်ပြောတာကို ကြားလိုက်သောအခါ သူသတိမမူမိဘဲ သူမ၏ လက်ကို တင်းတင်းဆုပ်ကိုင်မိသွားသည်။

" အဲ့ဒီနေရာမှာ နေရာတိုင်းက လုယက်တာတွေ သတ်ဖြတ်တာတွေအပြည့်ပဲ ။ ရှောင်ဝမ် ဒီမှာ ကျန်ခဲ့တဲ့ဆယ်နှစ်လုံးလုံး ကိုယ်အရမ်းပျော်ခဲ့ရတယ် ။အတိတ်က ဆုံးရှုံးခဲ့တဲ့ အရာတွေကို ကိုယ်ပြန်ရယူလိုက်နိုင်သလို ခံစားရတယ် ။ "

အရွယ်ရောက်ပြီးသူတိုင်းကလည်း တစ်ချိန်တုန်းက ကလေးများပင် ။

ကလေးတိုင်းကလည်း တစ်ချိန်က ရိုးသားမှုနှင့်ပင်..

" ကိုယ်လည်း..."

စုဝမ် ခေါင်းမော့ကာ စုရွေ့ကို ပြုံးပြလိုက်သည် ။

" ကျွန်မလည်း တစ်ချိန်တုန်းက ဆုံးရှူံးခဲ့ရတဲ့ အရာကို ပြန်ရှာတွေ့ခဲ့တယ် ။ ရှင့်လိုပဲပေါ့ ။အရမ်း အရမ်းအရေးကြီးတဲ့အရာတစ်ခု "

ယန်ဝူက သူလိုချင်သော သတ်မှတ်ထားသည့်ဘဝမျိုးအတွက် ငြိမ်းချမ်းသည့် နေရာသို့ ယန်ကျစ်ရှီကို ခေါ်သွားခဲ့သည် ။ တကယ်တမ်းတွင် ယန်ကျစ်ရှီသာ သူမပြန်လည်မွေးဖွားလာတုန်းက အရံအမျိုးသမီးဇာတ်ကောင်တန်ပြန်စနစ်ကို မရယူခဲ့ပါက သူမက ယန်ဝူနှင့် အတူ အစောကတည်းကပင် ငြိမ်းချမ်းသော ဘဝကို ရရှိခဲ့လောက်သည် ။

စနစ်၏ တည်ရှိမှုက သူမ၏ နှလုံးသားထဲက တောင့်တမှု နှင့် စွဲလမ်းမှုတို့ကို လှုံ့ဆော်ပေးကာ သူမဘေးရှိလူများကို မျက်ကွယ်ပြုစေခဲ့၏ ။

ကံကောင်းစွာဖြင့် နောက်ဆုံးသောအခိုက်အတန့်တွင် ယန်ကျစ်ရှီ ရုတ်တရက် နိုးထလာနိုင်ခဲ့သည် ။ယန်ကျစ်ရှီ နှင့်ပက်သက်၍ စုဝမ် သူမကို အလွန်မုန်းတီးခဲ့ခြင်းမရှိပေ ။သေချာပေါက် အဆုံးတွင် ယန်ဝူသာမရှိနေပါလျှင် ယန်ကျစ်ရှီကို စုဝမ် ဘယ်တော့မှ ညှာတာလိမ့်မည် မဟုတ်ပေ ။

စုဝမ်ကို လှုပ်ရှားစေခဲ့သောအရာက ယန်ဝူ၏ နှစ်ဘဝစာ တိတ်တဆိတ် အားထုတ်ခဲ့မှုပင် ။

စုရွေ့၏ အတွေးကဲ့သို့ပင် စုဝမ် နှလုံးသားထဲ၌ အားနည်းချက်ရှိသည် ။ ယန်ဝူ၏ ရူးရူးမူးမူးချစ်မြတ်နိုးခြင်းက သူမလိုက်ရှာနေသည့်အရာပင်..

တစ်ခြားရှုထောင့်မှ ကြည့်လျှင် ယန်ကျစ်ရှီ ကံကောင်းသွားပြီး အနှိုင်းမဲ့ ပျော်ရွှင်ရလောက်သည်ဟု ဆိုရမည် ။

သူမနှင့် ယှဥ်လျှင် ချူးဖေးယန်၏ ဤဘဝက ဝမ်းနည်းစရာပင် ။

လူသားများက ဤကဲ့သို့ အကျင့်ရှိသော သတ္တဝါများပင်။ သူတို့၏ အကျိုးအတွက် တစ်ခြားသူကို တစ်ကြိမ်စွန့်လွှတ်နိုင်လျှင် ဒုတိယအကြိမ်လည်း စွန့်လွှတ်လာနိုင်သည် ။ နောက်ပြီး တတိယ နှင့် စတုတ္ထအကြိမ်များတွင် ပို၍ပင် လွယ်ကူလာလိမ့်မည် ။

ပို၍ တစ်ကိုယ်ကောင်းဆန်လာသော ချူးဖေးယန်က ဤဘဝတွင် တစ်ကိုယ်တည်းရှင်သန်ဖို့သာ ကြမ္မာဖန်လာခဲ့သည် ။သူ့နှလုံးသားကို အခြားသူထံသို့ ပေးအပ်ဖို့ ဆန္ဒမရှိဘဲနှင့် အခြားသူများက မိမိအပေါ်သစ္စာရှိဖို့ ဘယ်လိုလုပ် မျှော်လင့်လို့ရပါမည်နည်း ။

ယန်ကျစ်ရှီ နှင့် ချူးဖေးယန်က သူတို့၏ အတိတ် ၊ ပစ္စုပ္ပန် နှင့် အနာဂတ်ကို ပြန်၍ရောင်ပြန်ဟပ်နေသော မှန်တစ်စုံကဲ့သို့ပင် စုဝမ် ခံစားလိုက်မိသည်။

ကမ္ဘာ၏ အဆုံးသတ်က လူများကို မြတ်နိုးတန်ဖိုးထားဖို့ သင်ယူစေခဲ့သည် ။

ဤကမ္ဘာတွင် စုဝမ်လည်း သူမဆုံးရှုံးခဲ့သော ယုံကြည်မှုတို့ကို ပြန်လည်ရရှိခဲ့သည် ။

ဆယ်နှစ်တာ အချိန်အကန့်အသတ်က သတိမထားမိလိုက်ခင်လေးတွင် ရောက်ရှိလာခဲ့သည် ။ သတ်မှတ်ချိန် ကုန်ဆုံးသွားသောအခါ စုဝမ် နှင့် စုရွေ့တို့ ဤကမ္ဘာမှ ထွက်ခွာဖို့ တွန်းအားပေးခံရတော့သည် ။

သူမ၏ ဝိညာဥ်က ခန္ဓာကိုယ်မှ အဝေးသို့ ဆွဲထုတ်ခံနေရတာကို ခံစားမိပြီး စုဝမ် ညင်သာသောအကြည့်ဖြင့်သာ စုရွေ့ကို ကြည့်နေမိ၏ ။

" စုရွေ့ နောက်ကမ္ဘာကျရင် ၊ ကျွန်မ..ရှင့်ကိုစောင့်နေပါ့မယ် "

ကျွန်မ ရှင့်ကိုစောင့်နေပါ့မယ် ။

ဒါက ရှင်နဲ့ ကျွန်မကြားသက်ဆိုင်တဲ့ ကတိကဝတ်ပဲ။

____

Arc_5 . အရံအမျိုးသမီး ဇာတ်ကောင်၏ တန်ပြန်စနစ်

End 🚩

Prev Next