Chapter 110

🚩Chapter -110

 Arc_6 . တိသမီးပြန်လာခြင်း [ 2 ] 

____

တချင်မင်းဆက်၊ ဧကရာဇ်မြို့တော်၊ ချင်းချွမ်မြို့စားမင်း၏ အိမ်တော်...

ချင်းချွမ် မြို့စားမင်း၏အကြီးဆုံးသားဖြစ်သည့် ချမ်ယွီရှု၏ နယ်စပ်တိုက်ပွဲမှ အောင်ပွဲခံပြန်လာခြင်းကို ဂုဏ်ပြုရန်အတွက် ချင်းချွမ် မြို့စားမင်း အိမ်တော်ရဲ့အတွင်းပိုင်းကို မီးပုံးများဖြင့်အလှဆင်ထားပြီး ရောင်စုံကချေသည်များဖြင့်လည်း စည်ကားနေကာ ကြီးကျယ်ခမ်းနားသော ပွဲကြီး ကျင်းပလျက်ရှိသည်။ 

ဧကရာဇ်မင်းမြတ်၏ ဆွေတော်မျိုးတော်များအားလုံးလည်း ယနေ့ အခမ်းအနားသို့ တက်ရောက်လာကြသည်။ 

မြို့စားမင်းအိမ်တော်၏ အရှေ့ခန်းမတစ်ခုလုံးတွင် အိမ်ရှင်များရော၊ဧည့်သည်များပါ အပြည့်အ၀ ပျော်မြူးနေကြသည်။ အိမ်ရှေ့ခန်းမ၏ အသက်ဝင်မှု၊စည်ကားမှုနှင့် နှိုင်းယှဉ်ပါက၊ အိမ်တော်၏ နောက်ဖေးသည် လက်ရှိတွင် အလွန်ခက်ခဲသော အခြေအနေ၌ ရှိနေ၏။

လွန်ခဲ့သော နှစ်နာရီခန့်က ကျင့်နင် မြို့စားမင်း၏သမီး စုဝမ်သည် ချင်းချွမ် မြို့စားမင်း အိမ်တော်၏ နောက်ဖေးမှ ရုတ်တရက် ပျောက်ကွယ်သွားခဲ့သည်။  သူမသည် ချမ်ယွီရှုနှင့် စေ့စပ်ထားသူဖြစ်သောကြောင့်၊ ချင်းချွမ် မြို့စားမင်း အိမ်တော်၏ကျေးကျွန်များသည် အနာဂတ် မြို့စားမင်းကတော်လေးကိုရှာဖွေရန် အတတ်နိုင်ဆုံးကြိုးစားနေကြ၏။

ရလဒ်အနေနှင့်၊ အစေခံမိန်းကလေးအသစ်တစ်ယောက်က သခင်မလေးစုသည် အိမ်မကြီးဘေးတွင်ဆောက်ထားသော ဘေးအခန်းထဲသို့ ဝင်သွားတာကို တွေ့လိုက်သည်ဟု ပြောလာသည်။ သူမ၏ ပြောပြချက်အတိုင်း၊ ချင်းချွမ် မြို့စားမင်း၏ ဇနီးယွီရှစ်၊ ကျင့်နင် မြို့စားမင်း၏ ဇနီးလျှိုရှစ်နှင့် တခြားသခင်မလေးများနှင့်အရာရှိ ဇနီးသည်များသည် ထိုအစေခံမိန်းကလေးပြသည့် အခန်းရှေ့သို့ တစ်အုပ်ကြီး ရောက်ရှိလာကြသည်။  

မကြာမီ အတွင်းခန်းမှနေ၍၊မကြားဝံ့မနာသာ ရှက်စရာကောင်းသော အသံများကို ကြားရလေသည်။သူတို့လည်း အတွင်းထဲသို့ မဝင်ရဲကြပေ။ချက်ချင်းပင်၊ ချင်းချွမ် မြို့စားမင်း၏ဇနီးသည် မျက်နှာက မည်းမှောင်သွားရသည်။ ကျင့်နင် မြို့စားမင်း၏ ဇနီးဖြစ်သူ မျက်နှာကလည်း ပျက်ယွင်းသွားပြီး တံခါးကို အမြန်တွန်းဖွင့်ကာ ဝင်သွားသည်။

အခန်းက ရှုပ်ပွနေပြီး အထဲက လူနှစ်ယောက်မှာ တစ်ယောက်နှင့်တစ်ယောက် ပူးကပ်ရောထွေးနေကြ၏။ 

တံခါးဝမှာ ရပ်ပြီး ကြည့်နေမိသူ သခင်မလေးတို့မှာ မကြည့်ဝံ့စရာ မြင်ကွင်းကြောင့်၊ စူးကနဲ ရှက်အော် အော်ကာ တစ်ဖက်ကို  လှည့်လိုက်ကြသည်။

 "ဘယ်က အယုတ်တမာရဲ့ သားလဲ..ဖယ်စမ်း"

ကျင့်နင် မြို့စားမင်း၏ဇနီးသည် လျှိုရှစ်သည် သမီးဖြစ်သူအား သူစိမ်းယောက်ျားတစ်ယောက်က ဗလက္ကာရ ပြုကျင့်နေသည်ဟု ထင်ကာ၊ထိုကောင်လေးကို ကြမ်းပြင်ပေါ်သို့အတင်းတွန်းထုတ်ရင်း အော်ဟစ်ငိုကြွေးနေတော့သည်။ များပြားလှသော မြို့စားမင်းကတော်နှင့် ဂုဏ်သရေရှိ မိန်းမပျိုများသည် မဖွယ်မရာပြုနေကြသော၊လူနှစ်ယောက်မျက်နှာကို မြင်ရသောအခါ အံ့အားသင့်နေကြသလို၊ လျှိုရှစ်၏မျက်နှာမှာလည်း ချက်ချင်းပင် ရွှင်လန်းသွားရသည်။

သူမ သမီးလေး ရှောင်ဝမ် မဟုတ်ဘူးဘဲ...

 "မြန်အာ...."

ထိုအချိန်တွင်၊ မူလက စိတ်လှုပ်ရှားစွာ အားသွန်ခွန်စိုက်ကြည့်နေသည့် ကျန်းကော နယ်စားမင်း၏ဇနီး ဝမ့်ရှစ်၏မျက်နှာမှာ ပြောင်းလဲသွားပြီး အသံထွက်လာသည်။ စိတ်လှုပ်ရှားမှုမရှိဘဲ ကြမ်းပြင်ပေါ်မှာ ခပ်တည်တည်ထိုင်နေသူသည် အမှန်တကယ်ပင် ကျန်းကော နယ်စားမင်း၏ တစ်ဦးတည်းသောသား ချမ်မြန် ဖြစ်သည်။

ဘေးခန်းတွင် လူအုပ်ကြီးနှင့် ပြည့်နှက်နေပြီး သူတို့၏ စိတ်ခံစားချက်များမှာလည်း မြင့်လိုက်ကျလိုက်နှင့် အံ့အားသင့်နေပေတော့သည်။  

****

တစ်ဖက်တွင်လည်း စုဝမ်သည် သေမတတ် နှိပ်စက်ညှဉ်းပန်းခံနေရသည်ဟု သူမကိုယ်ကို ခံစားမိသည်။ အလင်းရောင်ခပ်မှိန်မှိန်အောက်တွင် သူမ သတိရှိနေသေးသော်လည်း၊ခန္ဓာကိုယ်တစ်ခုလုံး ကြေမွသွားမတတ် နာကျင်မှုကို ခံစားနေရသည်။

 “တော်ပါတော့…”

 "အရမ်းနာတယ်"....

စုဝမ်၏ တိုးလျလျ တောင်းပန်သံက၊သူမ ကိုယ်ပေါ်က လူကို  ပို၍ပင် ခွန်အားဖြစ်သွားစေသည်။

ရှင့်ခန္ဓာကိုယ်က ကောင်းမှန်း သိပါပြီ၊ရှင့်ရဲ့ ကိုယ်ခံပညာကလည်း မြင့်တယ်ဆိုတာ သဘောပေါက်ပြီ…အတွင်းအားကလည်း မခေဘူးဆိုတာ ကျွန်မ သိပါပြီ....ဒါပေမယ့် စစ်သူကြီးစု ဒီလောက်ဆို ရပါပြီ..ရပ်ပါ‌တော့...

အချိန်တွေ ဘယ်လောက်ကြာသွားမှန်း မသိ၊ကောင်းကင်ကလည်း ပိုမှောင်လာသည်။စုဝမ်ခမျာ သူမတစ်ကိုယ်လုံး ဆုတ်ဖြဲခံရသလို နွမ်းလျနေ၏။

သူမ မခံစားနိုင်တော့ဘူး...အား

 “အရှင့်သား”

ရုတ်​တရက်​၊ မြင်းရထားအပြင်​ဘက်​မှ အသံတစ်ခု ထွက်ပေါ်လာသည်​။ 

ဟာ...  နောက်ဆုံးတော့ လူတစ်ယောက် ရောက်လာပြီပဲ...စုဝမ်အတွက်၊ ဤအသံသည် ကောင်းကင်မှကျလာသလိုမျိုး အားတက်ဖွယ် အသံပင်။

"ဧကရာဇ်မင်းမြတ်က ဆင့်ခေါ်နေပါတယ်”

မြင်းရထားပေါ်ရှိ စုရွေ့၏ လှုပ်ရှားမှုများ နှေးကွေးလာပြီး မကျေမနပ်ဖြစ်ကာ၊မှေးစင်းနေသော မျက်လုံးတစ်စုံက စူးရှသွားသည်။

"သူ့ကို စောင့်ခိုင်းလိုက်"

အစောင့်" ……. "

ဧကရာဇ်ကိုတောင် သူက အစောင့်ခိုင်းနေတာလား...

"ရှင် သွားသင့်တယ်နော်"

စုဝမ် ခွန်အားမရှိသလို ခံစားနေရသော်လည်း၊ ခဏရပ်လိုက်သည့် အချိန်ခဏလေးကို အခွင့်ကောင်းယူကာ သူ့လက်ကို အသာအယာ ဆုပ်ကိုင်လိုက်ရင်း ပြောလိုက်သည်။

"ကျွန်မကို ပြန်ပို့ပေးပါ"

ထိုသို့ပြောပြီးသည်နှင့် စုဝမ်တစ်ယောက် လုံးလုံးမေ့သွားလေတော့သည်။

ပင်ပန်းလွန်း၊နာကျင်ရလွန်းလို့ သေပါရစေ...

နောက်တစ်နေ့တွင် စုဝမ် မျက်လုံးကိုဖွင့်လိုက်ရာ၊ ကျင့်နင် မြို့စားမင်း အိမ်တော်ရှိ သူမ၏ အိပ်ဆောင်သို့ ပြန်ရောက်နေတာကို တွေ့လိုက်ရသည်။ယခုဆို ကောင်းကင်က၊ တောက်ပလင်းထိန်လျက်ပင်။သို့သော်၊ လျှိုရှစ်သည် တစ်ညလုံး ငိုထားသကဲ့သို့ မျက်လုံးနှစ်ဖက်လုံး နီရဲကာ သူမ အိပ်ယာအရှေ့တွင် ထိုင်နေသည်။

“အမေ"

"ကံဆိုးတဲ့ အမေ့သမီးလေး"

စုဝမ်၏ အသံကိုကြားသော်၊ လျှိုရှစ် ဝမ်းနည်းစွာဖြင့် လက်ကိုင်ပုဝါကိုယူကာ မျက်ရည်များအား သုတ်လိုက်သည်။

"ဘယ်လိုကောင်က သမီးကို ဒီလိုလုပ်လိုက်တာလဲ"

လျှိုရှစ်အတွက်၊ တစ်ရက်နှင့်တစ်ညတာ ကာလအတွင်း၊ ခံစားချက်များသည် အတည်အငြိမ်မရှိဘဲ တက်လိုက်ကျလိုက်ဖြစ်နေရလေ၏။ 

ပထမ၊ သူမ၏ သမီးလေး ပျောက်သွား၍ စိုးရိမ်ခဲ့ရသည်။ထို့နောက် ဘေးအခန်းမှ မျက်စိရှက်စရာ မြင်ကွင်းကြောင့် သူမ စိတ်က ပြိုလဲလုနီးပါး ဖြစ်သွားပြန်သည်။သမီးဖြစ်သူ ဘဝလေး ပျက်စီးသွားပြီဟု တွေးမိပြီး ရင်နာနေခဲ့ရ၏။ကံကောင်းထောက်မစွာ၊ လူမှားနေ၍ သူမ ဝမ်းသာရပြန်သည်။

ဒါပေမယ့် သူမရဲ့ သမီးလေး ဘယ်ရောက်သွားတာလဲ...

သူမသည် ကျင့်နင် မြို့စားမင်း အိမ်တော်ကို အပြန်ပြန်အလှန်လှန် လိုက်ရှာသော်လည်း သမီးဖြစ်သူကို ရှာမတွေ့သေးပေ။နောက်ဆုံးတွင်၊အိမ်တော်၏ ဘဏ္ဍာစိုးသည် လူတစ်ယောက်လွှတ်ကာ သမီးဖြစ်သူ ပြန်ရောက်ကြောင်း ပြောပြခဲ့၏။လာပြောသူက သူမအား ပြောရမှာစိုးနေသလိုဖြင့်၊ ရှက်ရွံ့စွာ ကြည့်ကာ နှုတ်ဆိတ်နေခဲ့သည်။

လျှိုရှစ် သူ့ကိုကြည့်ပြီး သမီးဖြစ်သူ တစ်ခုခုဖြစ်သွားမှန်း အတပ်သိလိုက်သည်။

သူမ အိမ်သို့ အမြန် ပြေးလာသောအခါတွင်၊ သမီးဖြစ်သူမှာ ကုတင်ပေါ်၌ သတိလစ်လျက် လှဲအိပ်နေပြီး  တစ်ကိုယ်လုံးမှာလည်း...

တိုတိုပြောရလျှင်၊ သူမလည်း သမီးဖြစ်သူ၏ ကံဆိုးပုံကိုကြည့်ကာ မေ့လဲသွားခဲ့၏။သူမ သတိပြန်လာရချိန်က  ညသန်းခေါင်ကြီး ဖြစ်သည်။သူမ နိုးနိုးချင်း စုဝမ်၏ အိပ်ယာဘေးသို့ ပြေးသွားပြီး ဝမ်းပမ်းတနည်း ငိုကြွေးတော့သည်။

"ဝမ်အာ အမေ့ကိုပြောစမ်း၊ အဲဒါဘယ်သူလဲ၊ သမီး တရားမျှတဖို့အတွက် အမေ ဧကရီကို တောင်းဆိုလိုက်မယ်"

လျှိုရှစ်သည် ကျင့်နင် မြို့စားမင်း၏ တရားဝင်ဇနီးသည်ဖြစ်ပြီး သာမန်အမျိုးသမီးတစ်ဦးမဟုတ်ပေ။မနေ့က ချင်းချွမ် မြို့စားမင်း အိမ်တော်မှာ ဖြစ်ခဲ့သည့် ကိစ္စသည် လူမှားပြောမိသော အစေခံတစ်ယောက်ကြောင့်ဖြစ်ပြီး၊ အရှုပ်တော်ပုံ၏ အဓိကဇာတ်ဆောင်က ကျန်းကော နယ်စားမင်း၏သားနှင့် ချင်းချွမ် မြို့စားမင်း အိမ်တော်၏ အစေခံမိန်းကလေးတစ်ဦးပင်။ သို့သော်လည်း ထိုအဖြစ်အပျက်ကို နောက်ကွယ်မှ တစ်စုံတစ်ယောက်က ကြိုးကိုင်ထားမှန်း ထင်ရှားသည်။ထိုသူ၏ မူလပစ်မှတ်က စုဝမ်ဖြစ်သည်မှာ သေချာ၏။

"သမီးလည်း......ဘယ်သူမှန်းမသိဘူး"

စုဝမ် တုံ့ဆိုင်းသွားကာ သူမ၏ အကြည့်များက ထိတ်လန့်နေပြီး မသေချာမရေရာဖြစ်နေပုံရသည်။

 မသိဘူး ဟုတ်လား...

လျှိုရှစ် သက်ပြင်းချလိုက်ပြီး သူမ မျက်နှာပေါ်ရှိ မျက်ရည်များကို ပွတ်သုတ်ရင်း စုဝမ် မျက်လုံးများဆီသို့တည့်တည့်ကြည်ကာ အေးစက်စက်အကြည့်ဖြင့် "အဲဒါဆို..အဲ့ဒီလူရဲ့ ရုပ်ကို မှတ်မိလား"

တစ်ကယ်တော့ သူမက စုဝမ်အား ထိုလူကို သိသလားဟု မေးချင်သော်လည်း၊သေချာတွေးကြည့်ပါက  တမင်တကာ မကောင်းကြံချင်သူသည် မျက်နှာသိ လူရင်းထဲမှ မဟုတ်ဘဲ သူစိမ်းတစ်ယောက်အား အကောက်ကြံခိုင်းလိမ့်မည်ဟု သူမ တွေးမိသည်။

သေစမ်း...သူမ၏ ချစ်လှစွာသော အဖိုးတန်သမီးလေးအား ဘယ်သူမှန်းမသိနိုင်သော အမျိုးသားတစ်ဦးထံမှ ဖျက်ဆီးခံခဲ့ရသည်။

 “သမီး….”

စုဝမ် မသိစိတ်က နှုတ်ခမ်းကို ကိုက်လိုက်မိသည်။ 

"မသိဘူး... သူဘယ်သူလဲ ဆိုတာ သမီး တစ်ကယ်မသိဘူး"

သူမ ဤစကားကို လိမ်ညာ၍ပြောခြင်းမဟုတ်။တစ်ကယ်တမ်းမှာ၊သူမ စုရွေ့ အား မည်သူမည်ဝါဖြစ်ကြောင်း မေးဖို့ အခွင့်အရေးမရှိခဲ့ချေ။သို့သော်လည်း ဤကမ္ဘာပေါ်ရှိ အခြေအနေတစ်ချို့ကို တွေးကြည့်လိုက်လျှင်၊သူ့အဆင့်အတန်းသည် သူမထက် သာလွန်နိုင်သည်။

စုဝမ်က အကြည့်ချင်း မဆုံတော့ဘဲ ညှိုးမှိုင်နေတာကြောင့် လျှိုရှစ် ဆက်လက်မေးမြန်းချင်စိတ်မရှိတော့။ 

"ဝမ်အာ ကောင်းကောင်းနားလိုက်နော်၊ဒီကိစ္စ….  ဒီကိစ္စကို အမေတို့ စိတ်ထဲမှာသာ ထားပြီး ဘယ်သူ့ကိုမှ လုံးဝအသိမပေးသင့်ဘူးနော်...ဒီအမေက သမီးကို ကူညီပေးမှာပါ…အမေ နည်းလမ်းတစ်ခုစဉ်းစားမယ်၊ စိတ်ချပါ၊ အမေက သမီး ဆန္ဒကို ဖြည့်ဆည်းပေးပြီး ချင်းချွမ် မြို့စားမင်း အိမ်တော်ထဲကိုဝင်‌ရအောင် လုပ်ပေးမှာ၊ကြည့်ထား သမီးကို ဘယ်သူမှထပ်ပြီးဒုက္ခမပေးနိုင်တော့ဘူး"

လျှိုရှစ် နောက်ဆုံးတော့ ထွက်သွားပြီဖြစ်သဖြင့်၊စုဝမ် အခန်းထဲမှာ တစ်ယောက်တည်းကျန်နေရင်း အဓိပ္ပါယ်မဲ့စွာ ကုတင်ထိပ်ကို ငေးကြည့်မိသည်။ 

သူမ ဒီကမ္ဘာကနေ ထွက်သွားပြီးရင်တော့ သေချာပေါက် သွားပြီး စောဒကတက်ရမှာပဲ....

အလုပ်ကမ္ဘာထဲသို့ မ၀င်ခင် မူလပိုင်ရှင်၏ အပျိုစင်ဘ၀ကို မဆုံးရှုံးခင် အချိန်ကာလကို သူမ ရှင်းရှင်းလင်းလင်း ရွေးချယ်ခဲ့သော်လည်း၊ယခု သူမ ဤလောကထဲကို ဝင်သွားသည့်အခါမှာတော့ ဤအဖြစ်မျိုး ကြုံတွေ့ခဲ့ရသည်။ထောက်ပံ့ပို့ဆောင်ရေးဌာနက ဤကိစ္စကို ရည်ရွယ်ပြီး လုပ်ခဲ့ခြင်း ဖြစ်ကြောင်း သေချာသည်။သူမ စိတ်ထဲမှထောက်ပံ့ပို့ဆောင်ရေးဌာနတစ်ခုလုံးကို ကျိန်ဆဲပြီး ပင်မဇာတ်ကြောင်းကို အဆောတလျင် ပြန်တွေးကြည့်မိသည်။

ဤကမ္ဘာက အမျိုးသမီးဇာတ်ဆောင်မှာ ချင်းချွမ် မြို့စားမင်း၏ တိ သမီးဖြစ်သူ ချန်ချင်းကျင်းဟုခေါ်သည်။ သူမကလည်း ပြန်လည်မွေးဖွားလာသူပင်။

ချန်ချင်းကျင်း၏ ယခင်ဘဝ၌ သူမ ချစ်ခဲ့ရသော၊ ပဉ္စမမင်းသား ချင်ထင်နှင့် လက်ထပ်ခဲ့သည်။ နောက်ဆုံးတွင် သူမကို ခင်ပွန်းဖြစ်သူနှင့် ညီမဖြစ်သူ ချန်ချင်းယောင်တို့က ပူးပေါင်း၍အကောက်ကြံခဲ့သည်။ သူမ ဗိုက်ထဲက ကလေးကိုလည်း တရားမ၀င်ကလေးအဖြစ် ဆဲဆိုရှုတ်ချခြင်းခံရရုံတင်သာမက နောက်ဆုံးတွင် မီးလောင်၍ပင် အသက်ဆုံးရှုံးခဲ့ရသည်။

ပြန်လည်မွေးဖွားပြီးနောက် ချန်ချင်းကျင်းသည် သူမကိုယ်သူမ ကျားကိုပင် စားနိုင်သော ဝက်တစ်ကောင်အဖြစ် အသွင်ပြောင်းရန် သင်ယူခဲ့သည်။အပြင်ပန်းတွင် အပြစ်ကင်းစင်ပြီး ဖြူစင်သော်လည်း သူမ စိတ်ထဲမှာ အကျင့်က တစ်မျိုးဖြစ်နေ၏။မျက်နှာနှစ်ခုရှိသူပုံစံမျိုးပင်။ထိုမှသာ၊ ယခုဘဝတွင် ထိုလူယုတ်မာ ပဉ္စမ မင်းသား၏ အချစ်အတုအယောင်ကြောင့် လှည့်စားခံရတော့မည် မဟုတ်တော့ဘဲ၊ သူမ၏ ရက်စက်ကြမ်းကြုတ်သော ညီမဖြစ်သူထံမှလည်း လိမ်လည်လှည့်ဖြားခံရမည် မဟုတ်တော့ပေ။

သူမရဲ့ ညီမနဲ့ အဲ့ဒီလူယုတ်မာ မင်းသားက အတော်လေး လိုက်ဖက်နေတာဆိုတော့ သူတို့နှစ်ယောက်ကို အရင်ကြိုက်သွားအောင် လုပ်ထားရမယ်၊အခုကတည်းက သူတို့တစ်ယောက်ကိုတစ်ယောက် ရွံမုန်းလာတဲ့အထိ တွဲနေကြပေတော့ ...

ဆွဲဆောင်မှုရှိ၊ မာနကြီးပြီး၊ထက်မြက်စွာ ပြန်လည်မွေးဖွားလာသောဇာတ်ဆောင် အမျိုးသမီး၏ ဘေးနားတွင် စမတ်ကျပြီး ထက်မြက်သည့် ဇာတ်ဆောင်အမျိုးသားတစ်ဦးအပြင်၊သူမကို လေးလေးနက်နက်ချစ်မြတ်နိုးသည့် ဇာတ်ပို့ အမျိုးသားများကလည်း ထုနှင့်ဒေးရှိမှာသေချာသည်။

ချန်ချင်းကျင်း၏ ပြတ်သားမှုနှင့် ဉာဏ်ပညာထက်မြက်မှုကြောင့်၊ ဒုတိယမင်းသား ချင်ယွဲ့ကို သူမအား အာရုံစိုက်လာစေခဲ့သည်။ အစပိုင်းတွင်၊နှစ်ယောက်သား အပြန်အလှန် စူးစမ်းလေ့လာခြင်းမှ ကာလကြာလာသော်၊ အပြန်အလှန်လေးစားမှုသို့ ကူးပြောင်းသွားကာ နောက်ဆုံးတွင် လိုက်ဖက်သော စုံတွဲဖြစ်လာမည်။

ထုံးစံအတိုင်း၊ ဇာတ်ဆောင် အမျိုးသား ချင်ယွဲ့ အပြင် အခြားအမျိုးသားများကိုလည်း သူမ၏ အရှိန်အဝါဖြင့် မလွှဲမရှောင်သာ ဆွဲဆောင်နိုင်ခဲ့သည်။အိမ်ရှေ့စံမင်းသား ချင်ယွီ၊ လက်ရှိ မင်းဆက်၏ တော်ဝင် စစ်ဘက်ရေးရာဝန်ကြီး ရှောင်ဝေ့၊ တော်ဝင်ဦးရီးတော်ချင်မူယန်ပင်လျှင် သူမ၏ စကတ်အောက်မှာ ပြားပြားဝပ် ခစားနေကြသူများပင်။သူမကို စိတ်ဝင်စားနေကြသည့် ဇာတ်ပို့အမျိုးသားများအား တစ်ယောက်ချင်းစီ ပြောပြ၍ကုန်မှာမဟုတ်ပေ။

ယခုလို အမွှမ်းတင်နေသည့် အမျိုးသမီးဇာတ်ဆောင်မှာ စုဝမ် မဟုတ်ချေ။ တစ်ကယ်တမ်း၊ ဤအလုပ်ကမ္ဘာတွင် စုဝမ်သည် အမျိုးသားဇာတ်ဆောင်၏ ရည်းစား‌ဟောင်း မဟုတ်ပေ။သူမက အမျိုးသမီးဇာတ်ဆောင်၏ အစ်ကို ချမ်ယွီရှု၏စေ့စပ်ထားသူပင်။ 

ယခင်ဘဝက ချန်ယွီရှုကို ချစ်ခဲ့သည့် မူရင်း စုဝမ်က ချင်းချွမ် မြို့စားမင်းအိမ်တော်ထဲကို ချောချောမွေ့မွေ့ ဝင်နိုင်ပြီး ချန်ချင်းကျင်း၏ ယောင်းမ ဖြစ်လာခဲ့သည်။

မူလက ချန်ချင်းကျင်းနှင့် ချန်ယွီရှုတို့ မောင်နှမမှာ သင့်မြတ်ကြသည်။သို့သော်လည်း၊ စုဝမ်နှင့် ချန်ချင်းယောင်တို့မှာ ခင်မင်နေပြီး အတွဲညီလာသဖြင့် တစ်‌ခါတလေ၊စုဝမ်ကလည်း ချန်ချင်းကျင်း အရှေ့မှာ မနှစ်မြို့စရာစကားများ ပြောခဲ့မိသည်။သို့ဖြစ်၍၊ချန်ချင်းကျင်းက စုဝမ်ကို မျက်မုန်းကျိုးခဲ့၏။

ထို့နောက် ချန်ချင်းကျင်းသည် ပဉ္စမမင်းသားနှင့် လက်ထပ်ပြီးနောက်တွင် တော်ဝင်သက်တော်စောင့်တစ်ဦးနှင့် မှားယွင်းစွာ ဖောက်ပြန်ပြီး ကိုယ်ဝန်လွယ်ထားရသည်ဟု စွပ်စွဲခံခဲ့ရသည်။ ချန်ယွီရှုသည် မူလက ဤကိစ္စကို မယုံကြည်ခဲ့သဖြင့် သူ့ညီမအတွက် တရားမျှတမှုကို ရှာရန် ကိုယ်တိုင်ကိုယ်ကျ စုံစမ်းရန် စီစဉ်ခဲ့သော်လည်း၊စုဝမ်သည်ချန်ချင်းကျင်းကို အမြဲတမ်း မလိုမုန်းထား၍ ကြည့်မရသောကြောင့် တတ်နိုင်သမျှ ခင်ပွန်းဖြစ်သူအား ဤကိစ္စကို မစုံစမ်းဖို့ တားဆီးခဲ့သည်။နောက်ဆုံးတွင်၊ စုဝမ်က ချန်ချင်းကျင်းကိုပင် သွယ်ဝိုက်သောနည်းဖြင့်  သေဆုံးစေခဲ့သည်။

ထို့ကြောင့်၊ ချန်ချင်းကျင်း၏ ကြေကွဲဖွယ်အတိတ်ဘဝတွင် စုဝမ်အား ကြံရာပါအဖြစ် မှတ်ယူသင့်သည်။သူမကို ကြံရာပါဟု ပြောခြင်းသည် အနည်းငယ် မြှောက်ပင့်ပြောခြင်းဟုပင် ဆိုနိုင်၏။ယခင်ဘဝတုန်းက မူရင်း စုဝမ်သည် ဦးနှောက်မရှိသော မိန်းကလေးတစ်ဦးဖြစ်ပြီး၊ဥာဏ်ပြေးသော ချန်ချင်းယောင် လှည့်စားသမျှ ခံရသူသာဖြစ်သည်။ 

စုဝမ်သည် ချန်ချင်းကျင်းကို မကြိုက်ရခြင်းမှာ နှစ်ချက်ရှိသည်။တစ်ချက်မှာ ချန်ချင်းယောင်သည် သူမနှင့် ချန်ချင်းကျင်းကို လိုက်ရန်တိုက်ပေးနေခြင်းကြောင့် ဖြစ်ပြီး၊နောက်တစ်ချက်မှာ သူမက ချန်ယွီရှုကို အလွန်ချစ်နေတာကြောင့်ပင်။ ချန်ချင်းကျင်းသည် ချန်ယွီရှု၏ ညီမအရင်းဖြစ်သော်လည်း၊ သူမ၏ ခင်ပွန်းသည် သူ့ညီမကို အလွန်ဂရုစိုက်လွန်းသောကြောင့်၊သူမ ချန်ချင်းကျင်းကို မုန်းနေရခြင်းဖြစ်ပေ၏။

ချန်ချင်းကျင်း အကောက်ကြံခံရသည့် ကိစ္စနှင့်ပတ်သက်ပြီး၊အိုင်ကျူနိမ့်သည့် မူရင်း စုဝမ်က၊ သူမအတွက် လိုက်မကာကွယ်ပေးဖို့ ခင်ပွန်းကို တားမြစ်ခဲ့သည်။အကြောင်းရင်းမှာ၊ယောက်ျားနှစ်ယောက်နှင့် ပွေရှုပ်နေသူ ချန်ချင်းကျင်းကို အထင်အမြင်သေးသလို၊သူမ၏ ခင်ပွန်းကိုလည်း ပဉ္စမ မင်းသားနှင့် ပြဿနာမတက်စေချင်တာကြောင့်ပင်။  

မူလပိုင်ရှင်က သူမကိုယ်သူမ မှန်သည်ဟု အမြဲထင်နေသော်လည်း၊ ပြန်လည်မွေးဖွားလာသော ချန်ချင်းကျင်း၏အမြင်တွင်မူ စုဝမ်က ခွင့်မလွှတ်နိုင်စရာပင်။အရည်အချင်းမရှိ၊ဦးနှောက်မရှိသော စုဝမ်လို မိန်းမမျိုးသည် သူမ၏ အစ်ကိုကြီးနှင့် မထိုက်တန်ဟု ထင်မြင်နေလေ၏။

သို့ဖြစ်၍၊ ဘဝတစ်ဖန်ပြန်စပြီးနောက်၊ချန်ချင်းကျင်းသည် အစ်ကိုဖြစ်သူနှင့် စုဝမ်တို့၏ လက်ထပ်ပွဲကို ဖျက်ပစ်ဖို့ ဆုံးဖြတ်လိုက်သည်။

အလုပ်ကမ္ဘာထဲကို ဝင်ရောက်လာပြီးနောက် စုဝမ် ကြုံတွေ့ခဲ့သည့် ရလဒ်က...

အဆိုပါမူးယစ်ဆေးသည် ချန်ချင်းကျင်း ရှာဖွေထားခြင်းဖြစ်ပြီး ဂုဏ်သရေရှိ အမျိုးသမီးလူအုပ်ကိုခေါ်သော အစေခံမိန်းကလေးမှာလည်း သူမကြိုတင်စီစဉ်ထားသည့်အရာဖြစ်သည်။

မူလက ချန်ချင်းကျင်းသည် စုဝမ်ကို ချင်းချွမ် မြို့စားမင်း အိမ်တော်နှင့် လက်ထပ်ရာတွင်၊ အရှက်ကွဲစေလိုခြင်း ဖြစ်သည်။အကယ်၍ စုဝမ်သည်လည်း ဤအချိန်တွင် အလုပ်ကမ္ဘာထဲသို့ မ၀င်ရောက်ခဲ့ပါက၊ချန်ချင်းကျင်း စီမံထားသည့်လမ်းကြောင်းအတိုင်း လျှောက်လှမ်းနေပေလိမ့်မည်။

ယင်းမှာ...

ချင်းချွမ် မြို့စားမင်း အိမ်တော်တွင် အရှုပ်တော်ပုံတစ်ခုဖြစ်ပွားပြီးနောက် စုဝမ်၏ ဂုဏ်သတင်းသည် အောက်ဆုံးသို့ရောက်ရှိသွားပြီး ကျန်းကော နယ်စားမင်း၏သား ချမ်မြန်နှင့်သာ မလွှဲသာမရှောင်သာ လက်ထပ်နိုင်ပေမည်။

ချမ်မြန်သည် အင်ပါယာမြို့တော်၏ ကျော်ကြားသော အရူးတစ်ယောက်ဖြစ်သည်။သူသည် အသုံးမကျသော်လည်း၊ခွန်အားကြီးမားကာ ဒေါသအလွန်ပြင်းထန်သည်။

မူလစုဝမ်မှာ ချမ်မြန်နှင့် အိမ်ထောင်ကျပြီး သိပ်မကြာခင်မှာပဲ၊ ရိုက်နှက်တာကို သည်းမခံနိုင်၍၊အစောင့်တစ်ယောက်နှင့် တရားမဝင်ငြိစွန်းခဲ့ကြသည်။ ဤကိစ္စကို ကျန်းကော နယ်စားမင်းက လျှင်မြန်စွာ သိရှိခဲ့သော်လည်း မိသားစု၏ အရှက်သိက္ခာကို အပြင်သို့မပြန့်စေချင်ပေ။ ထို့ကြောင့် သူ၏ ဂုဏ်သိက္ခာအတွက် ကျန်းကော နယ်စားမင်းက ဤသတင်းကို အဆုံးမှာ နှိမ်နင်းခဲ့သော်လည်း စုဝမ်၏ နေ့ရက််များမှာ တစ်နေ့ထက်တစ်နေ့ ပိုဆိုးလာပြီး မကြာခင်မှာပဲ သူမကို ရူးသွပ်သွားစေခဲ့သည်။

ဤသည်မှာ ပြန်လည်မွေးဖွားလာသည့် ဇာတ်ဆောင် မင်းသမီး လိုချင်နေသော အမြောက်စာလေး၏ ကံကြမ္မာဆိုးပင်။

__

🚩