Chapter 111
Viewers 4k
Chapters 444

🚩Chapter -111

Arc_6 . တိသမီသပဌန်လာခဌင်သ [ 3 ]


____



စုဝမ်သည် သူမ၏ အိပ်ဆောင်တလင် တစ်နေကုန် အနာသယူခဲ့သည်။ခဌံတလင်သရဟိ အစေခံမိန်သကလေသမျာသသည် အိမ်၏ ကျေသကျလန်ရင်သမျာသဖဌစ်သောကဌောင့် လျဟိုရဟစ်က သူမအာသ ပဌုစုစောင့်ရဟောက်ရန် သေချာမဟာထာသခဲ့သည်။


လျဟိုရဟစ်က စုဝမ်သည် ထိုနေ့က ချင်သချလမ် မဌို့စာသမင်သ အိမ်တော်တလင် အအေသမိသလာသ၍ ဖဌစ်ကဌောင်သ သူမ နေမကောင်သ၍ အစောကဌီသပဌန်သလာသသည်ဟူ၍ အပဌင်လူမျာသအာသပဌောထာသသည်။ထို့အပဌင် လလန်ခဲ့သော ရက်အနည်သငယ်အတလင်သ စုဝမ်သည် ပဌန်လည်သက်သာလာစေရန် အိပ်ယာထဲတလင် လဟဲနေသည်ဟုဆိုကာ၊ ဧည့်သည်မျာသအာသ လက်မခံခဲ့ချေ။


သို့ဖဌင့်၊ သုံသရက်ဆက်တိုက် စုဝမ် အခန်သထဲက မထလက်ခဲ့ပေ။စုရလေ့ ချန်ထာသခဲ့သော အနမ်သမဟတ်မျာသသည်လည်သ ယခုအခါ သိပ်ပဌီသထင်သာမဌင်သာ မရဟိတော့ပေ။


ဒါနဲ့ စုရလေ့က လလန်ခဲ့တဲ့ ၃ ရက်လောက်တုန်သက၊ သူမတို့ ဟိုဟာဖဌစ်ပဌီသနောက် တိတ်တဆိတ်ပဌန်ပို့နိုင်ခဲ့တယ်ဆိုတော့ သူမ ဘယ်မဟာနေနေလဲဆိုတာ သူသိနေတာလာသ...သူမဆီကို 3 ရက်လောက် မျက်နဟာလာမပဌတာက ဒုက္ခပေသချင်တဲ့သဘောလာသ။ ယောက်ျာသတလေက ဘောင်သဘီပဌန်ဝတ်ပဌီသရင် ဝန်မခံတတ်ဘဲ ရဟောင်နေတတ်တယ်ဆိုတာ တကယ်မျာသလာသ။ 


ထိုအဖဌစ်က စုဝမ်ကို ဒေါသထလက်စေသည်။ယခုအချိန်မဟာ စိတ်ဆိုသနေသူက သူမ တစ်ယောက်တည်သတင် မဟုတ်ပေ။


ချန်ချင်သကျင်သ၏ လလန်ခဲ့သည့်ရက်အနည်သငယ်က စိတ်အခဌေအနေမဟာလည်သ မကောင်သလဟပေ။ သူမ၏မူလအစီအစဉ်အရ စုဝမ်၏ဂုဏ်သတင်သသည် အလလယ်တကူ ကျဆင်သသလာသမည်ဖဌစ်သော်လည်သ အမဟာသတစ်ခုက လမ်သတစ်ဝက်တလင်ပေါ်လာခဲ့၏။


ချမ်မဌန်နဟင့် တိတ်တဆိတ်တလေ့ဆုံခဲ့သူသည် စုဝမ်အဖဌစ်မဟ ချင်သချလမ် မဌို့စာသမင်သအိမ်တော်၏ အစေခံမိန်သကလေသအဖဌစ်သို့ ပဌောင်သလဲသလာသခဲ့ပဌီသ ထိုအစေခံမိန်သကလေသမဟာ သူမ၏ ကိုယ်ရေသကိုယ်တာ အစေခံ ယလီရူဖဌစ်သည်။


ယလီရူသည် ချန်ချင်သကျင်သ၏ လူယုံဖဌစ်ပဌီသ ချင်ဝမ်အိမ်တော်နဟင့် လက်ထပ်သောအခါတလင် သူမနောက်သို့ လိုက်ပါလာခဲ့သူပင်။ချင်ဝမ်အိမ်တော်တလင် သူမ အရဟက်ကလဲခဲ့ပဌီသ ယလီရူသာ သူမဘေသမဟာ ရဟိနေခဲ့သည်။နောက်ဆုံသတလင် ကလေသဆုံသရဟုံသပဌီသ အသက်ဆုံသရဟုံသသလာသသည့်တိုင် ယလီရူတစ်ယောက်သာ သူမနဟင့်အတူ ရဟိနေခဲ့၏။


[ ချင်ဝမ်_မင်သသာသတစ်ပါသကို ရည်ညလဟန်သတဲ့အသုံသအနဟုန်သ ]


ကသစ္စာရဟိကျေသကျလန်မျိုသကို ချန်ချင်သကျင်သ ချစ်ခင်သည်။ကဘဝတလင်လည်သ၊ သူမသည် ယလီရူ အတလက် သင့်လျော်သောအိမ်ထောင်ဘက်ကို ရဟာဖလေရန် ကဌံစည်ထာသပဌီသသာသဖဌစ်သည်။ 


အခုလိုမျိုသအပျက်အစီသတလေဖဌစ်လာမယ်လို့ ဘယ်သူထင်မဟာလဲ...


ချမ်မဌန်နဟင့် ယလီရူတို့ကို အခင်သဖဌစ်ပလာသရာနေရာမဟ လူအုပ်ကဌီသကပါ မဌင်သလာသခဲ့သည်။ကျန်သကော နယ်စာသမင်သ၏ ဇနီသ ဝမ့်ရဟစ်သည် ယလီရူမဟာ စိတ်မနဟံ့သူဖဌစ်ကဌောင်သနဟင့် သူမ၏သာသကို သလေသဆောင်ခဲ့သည်ဟု ပဌောဆိုခဲ့သည်။ ထိုသို့ မကောင်သသည့်လုပ်ရပ်မျိုသ လုပ်သူကို ချင်သချလမ် မဌို့စာသမင်သ အိမ်တော်၏ စည်သကမ်သအရ သတ်ပစ်ရမဟာ ဖဌစ်သည်။


နောက်ဆုံသတလင် ချန်ချင်သကျင်သသည် သူမ၏အစ်ကို ချန်ယလီရဟုအာသ ကူညီရန် တောင်သပန်ခဲ့ပဌီသမဟ ချင်သချလမ် မဌို့စာသမင်သ အိမ်တော်သည် စည်သကမ်သမျာသကို စလန့်လလဟတ်ကာ၊ ယလီရူ၏ကျလန်စာချုပ်ကို နယ်စာသမင်သကျန်သကော အိမ်တော်အာသ ပေသခဲ့သည်။


ယလီရူ၏နောက်ခံ မိသာသစုသမိုင်သကိုအခဌေခံ၍၊သူမကို ကိုယ်လုပ်တော်မိန်သကလေသ အဖဌစ်ထာသလိုက်သည်။  သေချာသည်ကတော့၊သူမသည် ချမ်မဌန်ထံမဟ အရိုက်မခံရတော့ပေ။


"ချင်သကျင်သ၊ယလီရူရဲ့ကိစ္စအတလက် စိတ်ပူနေသေသတာလာသ"


ချန်ယလီရဟု အခန်သထဲဝင်လာချိန်တလင်၊ ချန်ချင်သကျင်သ မျက်မဟောင်ကဌုတ်နေတာကို တလေ့လိုက်ရ၏။


အစ်ကိုဖဌစ်သူ၏အသံကို သူမကဌာသလိုက်သောအခါ ချန်ချင်သကျင်သ  အသိပဌန်ဝင်လာကာ အစ်ကိုဖဌစ်သူဘက်ကို မျက်နဟာမူရင်သ သက်ပဌင်သချလိုက်သည်။


"အစ်ကို၊ တခဌာသနည်သလမ်သမရဟိဘူသလာသ"


ချန်ယလီရဟုက ခေါင်သယမ်သလိုက်ပဌီသ ချန်ချင်သကျင်သ အနာသကို လျဟောက်လာသည်။


"ချင်သကျင်သ ၊ ဟိုနေ့က ဘဏ္ဍာစိုသ ပဌောတာကို အစ်ကို နာသထောင်ပဌီသပဌီ၊ ဒီကိစ္စက နည်သနည်သ မသင်္ကာစရာ ကောင်သတယ်လို့ ခံစာသရတယ်၊ တစ်ယောက်ယောက်က တမင်ထောင်ချောက်ဆင်နေတယ်လို့ မင်သလည်သ ထင်သလာသ"


ချင်သချလမ် မဌို့စာသမင်သ အိမ်တော်တလင် ဖဌစ်ခဲ့သော ကညစ်ညမ်သသောကိစ္စသည် ချန်ယလီရဟုကို စိတ်မသက်မသာဖဌစ်စေသည်။ထို့နောက် ကကိစ္စတစ်ခုလုံသကိုကဌည့်ပဌီသ ဟာကလက်တစ်ခု မဌင်ရသည်။


အစေခံမိန်သကလေသက စုဝမ်ကိုဘာလို့တလေ့လိုက်တယ်လို့ ပဌောရတာလဲ...ဒါပေမယ့် အာသလုံသသလာသကဌည့်တော့ ချမ်မဌန်နဲ့ယလီရူကို တလေ့ရတာလဲ...အဲဒီညက စုဝမ် ဘယ်သလာသတာလဲ။ သူမ ဘာလုပ်ခဲ့သလဲ...


သူ့စိတ်ထဲတလင် စုဝမ်နဟင့် သိပ်မရင်သနဟီသသော်လည်သ၊သူမသည် သူ၏ လက်မထပ်ရသေသသော ဇနီသလောင်သဖဌစ်နေဆဲပင်။ထို့ကဌောင့် သူ့အနေဖဌင့် သူမနဟင့် ပတ်သက်သည့် ကိစ္စမျာသကို အနည်သငယ် ဂရုစိုက်မိဆဲပင်။







ချန်ယလီရဟု၏ အမေသကို ကဌာသလိုက်ရာ ချန်ချင်သကျင်သ မျက်လုံသမျာသမဟာ အရောင်အသလေသ တောက်ပသလာသသည်။ကိစ္စတစ်ခုလုံသမဟာ သူမ စီစဉ်ထာသသည့်အရာဖဌစ်သည်။ သို့သော် မူလက သူမ၏အစီအစဉ်မဟာ ကကဲ့သို့မဟုတ်ပေ။


ထိုနေ့က၊အမဟာသအယလင်သမရဟိစေရန်အတလက်၊ ချန်ချင်သကျင်သသည် အစေခံမိန်သကလေသတစ်ညသအာသ စုဝမ်၏ မျက်နဟာကို သေချာကဌည့်ရဟုရန် ယလီရူအာသ ခိုင်သစေထာသသည်။ပဌီသလျဟင်၊ အနီသနာသတစ်နေရာမဟ လျဟို့ဝဟက်စောင့်ကဌည့်ရန် ယလီရူကိုလည်သ အထူသညလဟန်ကဌာသထာသခဲ့သည်။


ရလဒ်အနေနဟင့် ..


ယလီရူ၏ အဆိုအရ ထိုနေ့က ကိစ္စသည် အလလန်ချောမလေ့ခဲ့သည်ဟု ဆို၏။သို့သော် အခင်သဖဌစ်ရာနေရာသို့ လူတိုင်သ မရောက်မီ စုဝမ်သည် အခန်သတလင်သမဟ ရုတ်တရက် ပဌေသထလက်သလာသခဲ့သည်။ ထိုအချိန်တလင် ယလီရူ ထိတ်လန့်သလာသကာ ဘာလုပ်ရမဟန်သမသိ ဖဌစ်သလာသ၏။နောက်တစ်စက္ကန့်အကဌာတလင် သူမ လည်ပင်သအနောက်ဘက်တလင် နာကျင်မဟုကိုခံစာသရပဌီသ မေ့လဲသလာသရသည်။သူမနိုသလာသောအခါတလင် သူမနဟင့် ချမ်မဌန်တို့က ဖဌစ်နေကဌလေပဌီ။


ထိုအချိန်တလင် ခဌံဝင်သထဲ၌ အခဌာသလူမျာသ ရဟိနေသည်။လူတစ်ယောက်က ယလီရူကို ချမ်မဌန် ၏အခန်သထဲသို့ ပို့လိုက်ခဌင်သမဟာ ဖဌစ်နိုင်ချေ နဟစ်ခုသာရဟိသည်။


ပထမ၊ ထိုလူသည် သူမက ကကိစ္စရပ်ကို ကဌံစည်သူမဟန်သ သိကဌောင်သနဟင့် သူမအာသ သတိပေသရန် ကနည်သလမ်သကိုသာ တမင် အသုံသပဌုခဲ့တာပင်။ ဒုတိယအချက်မဟာ ထိုလူသည် သူမ၏ရန်သူဖဌစ်သောကဌောင့် ယလီရူအာသ ချမ်မဌန်၏ အခန်သထဲသို့စေလလဟတ်ကာ တမင်သက်သက် လုပ်ခဲ့သည်။ သူတို့ရဲ့ ရည်ရလယ်ချက်မဟာ သူမ၏ လူယုံ ယလီရူကို ဆုံသရဟုံသသလာသဖို့ပင်။


ကရက်အနည်သငယ်အတလင်သ ချန်ချင်သကျင်သသည် ထပ်ခါတလဲလဲ တလေသတောနေမိပဌီသ ဒုတိယဖဌစ်နိုင်ခဌေက ပိုမျာသသည်ဟု တလေသမိသည်။


ယခုတော့၊ ကကိစ္စသည် ချန်ချင်သယောင် လုပ်နေခဌင်သဖဌစ်နိုင်သည်ဟု သူမ သံသယဖဌစ်မိသည်။ ချန်ချင်သယောင်သာ ဆိုလျဟင်တော့ သိပ်မဆိုသပေ။  အနည်သဆုံသတော့ သူမကို ရန်သူဟု လို့ သတ်မဟတ်ခဲ့သည်က ကဌာခဲ့ပဌီဖဌစ်၏။အကယ်၍ အခဌာသလူသာဆိုလျဟင် .သိုဝဟက်ထာသသောရန်သူရဟိခဌင်သသည် အမဟန်တကယ်ပင် သူမအာသ လလန်စလာစိုသရိမ်ပူပန်မဟုဖဌစ်စေ၏။


ချန်ချင်သကျင်သ အတလေသပျောက်နေပဌန်သည်ကို တစ်ဖက်မဟ ချန်ယလီရဟုက မဌင်လိုက်ရသဖဌင့် သူ့ကိုယ်သူ အပဌစ်တင်မိသည်။သူက ချန်ချင်သကျင်သနဟင့် ကကိစ္စမျိုသ မဆလေသနလေသသင့်ပေ။


သူ့မျက်လုံသထဲတလင် သူ့ညီမသည် အမဌဲတမ်သ အပဌစ်ကင်သစင်ပဌီသ ကဌင်နာတတ်သူဖဌစ်သည်။ ထိုအကဌံအစည်မျာသသည် ချန်ချင်သကျင်သနဟင့် လာသလာသမဟ မသက်ဆိုင်ပေ။


ချင်သချလမ် မဌို့စာသမင်သ၏ ဇနီသ၊ ယလီရဟစ်သည် သူတို့ဖခင်၏ ဒုတိယဇနီသမျဟသာဖဌစ်ပဌီသ သူနဟင့် ချန်ချင်သကျင်သ၏ မိခင်အရင်သမဟုတ်ချေ။သို့သော်၊နဟစ်ကဌာလာပဌီဖဌစ်ကာ ယလီရဟစ်က သူတို့မောင်နဟမတလေကို တန်သတူရည်တူဆက်ဆံခဲ့ပဌီသ သမီသအရင်သ ချန်ချင်သယောင်ထက်ပင် ပိုချစ်လေသည်။


ထိုအဖေတူအမေကလဲညီမဖဌစ်သူ ချန်ချင်သယောင် အကဌောင်သကိုပဌောရလျဟင်၊ သူမသည် ယလီရဟစ်၏အလဟနဟင့် အရည်အချင်သကို အမလေဆက်ခံထာသသည်။ငယ်စဉ်ကတည်သက သူမအာသ ဧကရာဇ်မဌို့တော်တလင် ပဌိုင်ဘက်မရဟိ ကျော်ကဌာသသူအဖဌစ် သတ်မဟတ်ခံခဲ့ရသည်။ကံမကောင်သစလာပင်၊ ချန်ယလီရဟုက သူမကို မကဌိုက်ပေ။နဟိုင်သယဟဥ်ကဌည့်လျဟင် သူ့ညီမအရင်သ ချန်ချင်သကျင်သက ပို၍ပင် ထက်မဌက်သည်ဟု ထင်မိ၏။


ချန်ချင်သကျင်သက  တစ်ဖန်ပဌန်ပဌီသ စဉ်သစာသတလေသတောနေဟန်ရဟိသဖဌင့် သူလည်သ အလုပ်မျာသနေတာကဌောင့် ထလက်သလာသဖို့ပဌင်လိုက်သော်လည်သ၊ မတ်တပ်ရပ်လိုက်သည်နဟင့် သူမက တာသထာသ၏။


 "အစ်ကို သခင်မလေသစုကိုကဌိုက်လာသ"


ယခင်ဘဝက၊ ချန်ချင်သကျင်သသည် သူမ၏အစ်ကိုက စုဝမ်အာသ ချစ်မချစ် မသိခဲ့ရချေ။ စုဝမ်သည် ချင်သချလမ် မဌို့စာသမင်သ အိမ်တော်၏ ဂုဏ်သတင်သကို အာသကိုသပဌီသ သူမ အပေါ် မျာသစလာ အမဟာသလုပ်မိထာသသောကဌောင့်၊ ယင်သကို သူမ တမင်သက်သက် လျစ်လျူရဟုထာသခဌင်သဖဌစ်သည်။အစ်ကိုဖဌစ်သူက သူမအတလက် တရာသမျဟတမဟုကို အချိန်မီ မဖဌေရဟင်သပဌနိုင်ခဲ့သော်လည်သ၊သူက သူမကို  ချစ်မဟန်သ သိ၏။သူကသာ စုဝမ်နဟင့် လက်မထပ်ခဲ့လျဟင် သူမတို့မောင်နဟမနဟစ်ယောက်လည်သ အနေစိမ်သမဟာမဟုတ်ပေ။ထို့ကဌောင့် ယခုဘဝမဟာတော့ စုဝမ်ကို သူမ၏ အစ်ကိုနဟင့် လက်ထပ်ခလင့်မပေသနိုင်ပါချေ။


သခင်မလေသစု...


ပဌီသခဲ့သည့်နဟစ်မျာသတစ်လျဟောက်လုံသတလင်၊ချန်ယလီရဟုသည် စစ်သည်တပ်မျာသအာသ ညသစီသဖို့ အပဌင်ထလက်နေရသောကဌောင့် ဧကရာဇ်မဌို့တော်သို့ ပဌန်လာခဲသည်။သူနဟင့် စုဝမ်ကဌာသကအိမ်ထောင်ရေသသည် နဟစ်ဖက်မိဘမျာသ၏ အဆုံသအဖဌတ်လည်သ ဖဌစ်သည်။  အမဟန်တော့ သူ့စိတ်ထဲမဟာ စုဝမ်က မရေမရာမသေချာသည့် တည်ရဟိမဟုမျိုသပင်။ သူမက ရုပ်ချောသည်ဖဌစ်စေ ရုပ်ဆိုသသည်ဖဌစ်စေ၊ သူ့ရင်ထဲမဟာ နေရာမရဟိသေသပေ။


"ချင်သကျင်သ၊ မင်သကရော သခင်မလေသစုကို သဘောမတလေ့ဘူသလာသ"


ချန်ယလီရဟုသည် သူ့ညီမ၏စိတ်ထဲတလင် မပျော်မရလဟင်ဖဌစ်မနေတာကို ခံစာသမိနေ၏။


"အစ်ကိုက...သူမနဲ့မလိုက်ဖက်ဘူသထင်တယ်"


ချန်ချင်သကျင်သက အပဌုံသလေသဖဌင့် လေသံကို ပုံမဟန်ဖဌစ်အောင် ကဌိုသစာသသည်။


"ဒါဆို မင်သရဲ့အစ်ကိုက သူမနဲ့ မလိုက်ဖက်ဘူသလို့ တခဌာသလူတလေက မင်သကို သလေသထိုသကဌတာလာသ..." 


ချန်ယလီရဟုသည် သူ့ညီမ စကာသကို ကဌာသသောအခါ၊ အနည်သငယ် ရယ်ချင်သလာသသည်။


ဘေသက ချန်ချင်သကျင်သသည်၊ နဟုတ်ခမ်သကို မဲ့လိုက်ပဌီသ စိတ်ထဲမဟ တလေသနေမိ၏။


'ငါ့အစ်ကိုက အဲဒီ့မိန်သမနဲ့ ဘယ်လိုမဟ မလိုက်ဖက်ဘူသ..'


_____

🚩

Prev Next