MM Story Teller

Chapter 112

Viewers 4k

🚩Chapter -112

Arc_6 . တိသမီးပြန်လာခြင်း [ 4 ]

____

စုဝမ်တစ်ယောက် ငါးရက်မြောက်နေ့တွင် ပြန်လည်သက်သာလာသောအခါ ပထမဆုံးဧည့်သည်အဖြစ် ချင်းချွမ် မြို့စားမင်း အိမ်တော်၏ ဒုတိယသမီး ချန်ချင်းယောင် ရောက်လာလေသည်။

ချန်ချင်းယောင်သည် ယခုနှစ်တွင် အသက် 15 နှစ်သာရှိသေးပြီး ပန်းပွင့်ကလေးနှင့်တူသော အရွယ်ဖြစ်သည်။ အဝါနုရောင်စကတ်ကို ၀တ်ဆင်ထားသည့် သူမသည် စုဝမ်အရှေ့မှာ ကြော့ရှင်းပြီး သပ်ရပ်စွာ ပေါ်လာသည်။စုဝမ်က သူမကို အားယူ၍ ပြုံးပြလိုက်သည်။

"ဝမ်ကျဲကျဲ အအေးမိတာသက်သာပြီလား"

ချန်ချင်းယောင်၏ အသံသည် ချိုမြိန်ပြီး နှစ်သက်ဖွယ်ကောင်းကာ ပန်းပွင့်လိုမျိုး မျက်နှာအသွင်သဏ္ဍာန်၊လခြမ်းပုံ နူးညံ့သော မျက်လုံးတစ်စုံနှင့် အလွန် လိုက်ဖက်လှပနေသည်။ ထို့ကြောင့်လည်း သူမက မူလစုဝမ်ကို လိမ်လည်လှည့်ဖြားနိုင်သည်မှာ အံ့သြစရာမရှိချေ။

“အခု ပြန်ကောင်းလာပါပြီ၊ကျဲကျဲ ကြောင့် ချင်းယောင် မေ့မေ့ကို စိတ်ပူစေမိပြီ"

စုဝမ် ပါးစပ်ကသာ ဘာပြဿနာမှကြီးကြီးမားမားမရှိဘူးဟု ပြောသော်လည်း၊ မျက်နှာက တစ်စုံတစ်ခုကို ဖုံးကွယ်ထားချင်သလိုလိုမျိုး ဖြစ်နေမှန်း ချန်ချင်းယောင် ရိပ်မိသည်။

ချန်ချင်းယောင်သည် ပြန်လည်မွေးဖွားလာခြင်း မဟုတ်သော်လည်း၊ အလွန်နက်နဲသော အကြံအစည်ရှိသည့် မိန်းကလေးဖြစ်သည်။ စုဝမ် အအေးမိခြင်းနှင့် ပတ်သက်၍ သူမမှာ သံသယရှိခဲ့သော်လည်း အတည်ပြုရန် အခွင့်အလမ်းမရှိခဲ့ပေ။

"ဝမ်ကျဲကျဲ သက်သာတာကိုကြားရတာ မေ့မေ့လည်း ဝမ်းသာပါတယ်"

သူမက စုဝမ်ကို အပြစ်ကင်းစွာ ပြုံးပြပြီး သက်ပြင်းချကာ "ဝမ်ကျဲကျဲ၊ ကိုကိုယွီရှုက တစ်ကယ်ပဲ ကျဲကျဲကိုလာတွေ့ချင်ပါတယ်၊ ဒါပေမယ့် ဧကရာဇ်မြို့တော်ကို ပြန်ရောက်လာတာနဲ သူ့အတွက် အလုပ်တွေက အရမ်းများနေတာလေ၊ အိမ်မှာကျတော့လည်း....ချင်းကျင်း ကျဲကျဲက သူနဲ့ အမြဲပူးကပ်နေတာဆိုတော့ သူ့မှာ အချိန်သိပ်မရှိဘူး ဖြစ်နေတာပါ"

ချန်ချင်းယောင်၏ အသံက အလွန်တိုးလျနေသည်။ သူမသည် ချန်ယွီရှု အကြောင်းကိုရှင်းပြနေသော်လည်း၊စုဝမ် နှင့် ချန်ချင်းကျင်း အကြား ဆက်ဆံရေးကွဲလွဲစေရန် သွေးထိုးနေခြင်းလည်းဖြစ်သည်။

စုဝမ် သူမစကားကို ကြားလျှင်၊ အကြည့်များ စူးရှသွားရ၏။

"ဟုတ်လား…. ဒီလိုကိုး၊ အံ့သြစရာမရှိပါဘူး၊ ဒါကြောင့် သူတစ်ခါမှ မရောက်လာတာကိုး..ကြည့်ရတာ သူက..."

ဤအထိစကားပြောနေရင်း စုဝမ် မသိစိတ်က သူမ၏ အင်္ကျီကော်လာကို စေ့ရန် လက်ကို မြှောက်လိုက်သည်။

ချန်ချင်းယောင်ကလည်း သူမ၏ လှုပ်ရှားမှုတိုင်းကို ၊စူးရှသည့်မျက်လုံးများဖြင့်၊ လိုက်ကြည့်နေရင်း သူမ၏လည်ပင်းမှ အနီကွက်များကို ချက်ချင်း သတိပြုမိသွားသည်။

ဒါတွေက...

ချင်းချွမ် မြို့စားမင်း အိမ်တော်တွင် ဖြစ်ပွားခဲ့သည့် အဖြစ်အပျက်ကို ဆက်စပ်ကြည့်ရင်း သူမ စိတ်ထဲတွင် အတွေးတစ်ခု ချက်ချင်း ပေါ်လာသည်။သို့သော်လည်း ထင်ကြေးမျှသာဖြစ်၍ နောက်ထပ် အတည်ပြုချက် လိုအပ်နေသေး၍ ထုတ်မပြောရဲပေ။

ဤနေရာအထိ တွေးတောရင်း၊ သူမ၏မျက်လုံးများက လေးနက်သွားကာ "ရက်အနည်းငယ်ကြာရင် ဆောင်းဦးအမဲလိုက်ပွဲ လုပ်မှာတဲ့၊အရင်နှစ်တွေတုန်းကတော့ ကိုကိုပဲ ဝင်ပြိုင်တာ မေ့မေ့နဲ့ ချင်းကျင်း ကျဲကျဲက အပျော်သဘောပဲ လိုက်ကြတာပါ၊ ဒီနှစ်ကျတော့ ဘာလို့လည်း မသိဘူး၊ကျဲကျဲက သူမလည်း ဝင်ပါချင်တယ်လို့ ပြောနေတယ် အဲ့ဒါဆို ပြိုင်ပွဲကျရင် ကိုကိုက သူမကို ဂရုစိုက်နေတာနဲ့ ပြိုင်ပွဲကိုအာရုံပျက်သွားမှာပဲ၊ ဒီနှစ်တော့ ဒုတိယမင်းသားနဲ့ ပဉ္စမမင်းသားတို့လည်း အမဲလိုက်ပွဲမှာ ပါကြမတဲ့၊ဟင်း... ကိုကိုယွီရှု ဒီနှစ် အကောင်းဆုံး အမဲလိုက်နိုင်သူဆုကို လွဲသွားမှာ မေ့မေ့ကြောက်လိုက်တာ"

ချန်ချင်းယောင်က စီကာပတ်ကုံးပြောပြသည်။ ပထမဦးစွာ၊ သူမသည် ဆောင်းဦးအမဲလိုက်ပွဲမှာ ပါဝင်ဖို့ စုဝမ်ကိုသတိပေးသည်။ ဒုတိယအချက်မှာ ချန်ချင်းကျင်းသည် ချန်ယွီရှုကို အလွန်တွယ်ကပ်ကြောင်း စုဝမ်အား ပြောပြသည်။တတိယအချက်က ပို၍ပင် အံ့သြစရာကောင်းလေသည်။

ယခင်နှစ်များက အမဲလိုက်ပွဲတွင်မပါဝင်ခဲ့ဖူးသော ချန်ချင်းကျင်းသည် အဘယ်ကြောင့် ယခုနှစ်တွင် ပါဝင်ချင်ရသလဲ ဆိုသည်ပင်။

ဒီနှစ်မှာ မင်းသားနှစ်ပါးလည်း ပါဝင်လာလို့ တော်ဝင်မင်းသားလေးတွေကို ဆွဲဆောင်ချင်တာမျိုးလား...

စုဝမ်သည် အသက် 15 နှစ်အရွယ် ချန်ချင်းယောင်မှာ တစ်ဖက်လူ စိတ်ဝင်စားလာအောင် စကားပြောဆိုရာတွင် ကျွမ်းကျင်နေပြီဆိုတာကို ဝန်ခံမိသည်။ချန်ချင်းယောင်သည် အဆင်ပြေသော စကားလုံးများကိုသာ ရွေးသုံး၍ သံသယအတွေးများကို သူမ စိတ်ထဲသို့တစ်ရစ်ချင်း ထည့်ပေးသည်။ထို့ကြောင့် သူမ စိတ်ထဲမှာ ချန်ချင်းကျင်းအပေါ် မလိုမုန်းတီးမှုများ တိုးပွား‌လာရလေ၏။

အဘယ်ကြောင့်ဆိုသော် သူမသည် အတိတ်ဘဝက ချန်အိမ်တော်နှင့် လက်ထပ်ပြီးနောက်၊ ချန်ချင်းကျင်းကို ပြင်းပြင်းထန်ထန် မုန်းတီးခဲ့ခြင်းကြောင့်ဖြစ်သည်။ ထို့အပြင် ချန်ချင်းကျင်းက ပဉ္စမမင်းသားနှင့်ပြဿနာတက်ရသည်ကိုလည်း၊သူမ စိတ်ထဲမှနေ၍ ကျေနပ်နေခဲ့သေးသည်။

ချန်ချင်းယောင်၏ ကြည်နူးမှုအပြည့်ဖြင့် ပြောလာသည့် စကားကိုကြားသောအခါ စုဝမ်၏အကြည့်များ ချက်ချင်းပြောင်းသွားကာ လက်နှစ်ဘက်စလုံးဖြင့် ကိုယ်ပေါ်ရှိ ဘရိုကိတ်စောင်ကို တင်းတင်းကြပ်ကြပ်ဆုပ်ကိုင်လိုက်သည်။

"ယွီရှုကို ငါ ယုံတယ်... ငါ သွားပြီးသူ့ကိုအားပေးမယ်၊ စိတ်ချ သူအနိုင်ရလိမ့်မယ်”

“ဟုတ်”

သူမ၏ ရည်ရွယ်ချက် အောင်မြင်သွား၍၊ ချန်ချင်းယောင်က စုဝမ်ကို ပြုံးပြပြီး "ကိုကိုယွီရှုကို မေ့မေ့လည်း ယုံကြည်တယ်....အဲ့ဒီ အချိန်ရောက်ရင် သူ့ကို အတူတူ အားပေးလိုက်ကြရအောင်"

မကြာမီ ချန်ချင်းယောင် ပြန်သွားပြီးနောက် လျှိုရှစ်သည် စုဝမ်၏အခန်းမှာ ချက်ချင်းပေါ်လာသည်။

"ချန်အိမ်တော်ရဲ့ကောင်မလေးက ဘာလာလုပ်တာလဲ "

လက်ရှိအခြေအနေအရ လျှိုရှစ်သည် ချန်အိမ်တော်မှ မည်သူ့ကိုမဆို အလွန်သတိထားနေခဲ့သည်။ သူမ သမီးကို လုပ်ကြံသည့်လူကို ရှာမတွေ့သေးသဖြင့်၊ထိုလူက ချန်အိမ်တော်မှလည်း ဖြစ်နိုင်ပေ၏။

ချန်ယွီရှုအပေါ် သမီးဖြစ်သူက အရူးအမူး ဖြစ်နေသည်ကို သိသောကြောင့် လျှိုရှစ်သည် သမီးဖြစ်သူ အပျိုစင်ဘ၀ကို ဆုံးရှုံးလိုက်ရသည့်ကိစ္စကို ချန်အိမ်တော်အား မသိစေချင်သေးပေ။

"ချင်းယောင်က သမီးဆီလာလည်ရင်း၊ ဆောင်းဦးအမဲလိုက်ပွဲအတွက် ဖူရှန်းအမဲလိုက်ကွင်းကိုသွားဖို့ လာခေါ်တာပါ"

လျှိုရှစ်သည် ဆောင်းဦးအမဲလိုက်ပွဲ အကြောင်း ကြားသောအခါ သူမ အကြည့်များက ရုတ်တရက်တောက်ပသွားသည်။

"ဝမ်အာ၊ သမီးရဲ့ မြင်းစီးစွမ်းရည်က မဆိုးဘူးဆိုတာ အမေ သိတယ်၊ ဒီနှစ် အမဲလိုက်ကွင်းမှာလည်း သမီး ပါမယ်ဆို ဘယ်လိုလဲ၊ဒါဆို..."

လျှိုရှစ်သည် စုဝမ် နားနားကို ငုံ့ထားပြီး တိုးတိုးလေးပြောလိုက်သည်။

စုဝမ်သည် လျှိုရှစ်၏ စကားကိုကြားသောအခါ နှုတ်ခမ်းထောင့်များက တွန့်ချိုးသွားရလေသည်။

လျှိုရှစ်က သူမအား အမဲလိုက်ရာမှာ ချန်ယွီရှု အရှေ့၌ တမင်တကာ ဒဏ်ရာရအောင် အခွင့်အရေးရှာခိုင်းသည်။ သို့ဆိုလျှင် သူမက ချန်ယွီရှုကို နှောင့်ယှက်ပြီး၊နှစ်ယောက်တည်း အတူရှိနေဖို့အချိန်ရအောင် ဖန်တီးခိုင်းခြင်းပင်။ထို့နောက် တတ်နိုင်သမျှ မြန်မြန်လက်ဦးမှုရယူကာ XXX ဖြစ်အောင် မြှူဆွယ်ပြီး မဖြစ်မနေ လက်ထပ်ဖို့ ဖြားယောင်းခြင်းပင်။

အာ...သမီးတစ်ယောက်ကို ဒီလိုမျိုး အရှက်တကွဲလုပ်ခိုင်းမလို့လား..ဒါပေမယ့် သူမက လျှိုရှစ်ရဲ့ တစ်ကယ့်သမီးအစစ်မဟုတ်ဘူးလေ၊ကူးပြောင်းလာတာကြီးပဲ..ဒီလိုလုပ်ဖို့ တစ်ကယ်ရော တန်လို့လား။

သမီးဖြစ်သူလေးအတွက် အတော်စေတနာထားပြီး ပြောရှာသည့် လျှိုရှစ်ကို စုဝမ် ဆွံ့အစွာကြည့်နေမိသည်။

အမေက ချန်ယွီရှုကို အရူးများ ထင်နေတာလား။သမီးတို့တစ်ကယ် XX ဖြစ်ပြီး၊သမီးက အပျိုမစစ်ဘူးဆိုတာကိုသာ သူတွေ့ခဲ့ရင် ဘာဆက်ဖြစ်မယ်ထင်လဲ။

ထို့အပြင် သူမသည် စုရွေ့မှလွဲ၍ အခြားအမျိုးသားများနှင့် ရင်းနှီးစွာ ထိတွေ့ရမည်ကို တွေးမိရုံဖြင့် သည်းမခံနိုင်ချေ။

နေဦး၊ မဟုတ်ဘူး...စုရွေ့လည်း ပါတယ်..

ရက်အတော်ကြာအောင် မျက်နှာမပြသေးသော စုရွေ့ကို သတိရလိုက်သည်နှင့် စုဝမ်မှာ ပို၍ပင် စိတ်တိုလာသည်။

သူမ ဆောင်းဦးအမဲလိုက်ပွဲမှာ သေချာပေါက် ပါဝင်မည်ဖြစ်သည်။ယင်းမှာ ချန်ယွီရှုနှင့် ဟိုဒင်းကိစ္စကို စိတ်ဝင်စား၍ မဟုတ်ဘဲ သူမစိတ်ဝင်စားသောအရာမှာ အခြားအရာတစ်ခုဖြစ်သည်။

****

ယခုအချိန်တွင် ဧကရာဇ်မြို့တော်၊ကျင်းချင်ဝမ် အိမ်တော်၌

[ ကျင်းချင်ဝမ် - ဧကရာဇ်မင်းမြတ်၏ ညီတော်အငယ်ဆုံး ချင်မူယန်၏ ရာထူးအမည် ]

"အရှင့်သားက ဖူရှန်း အမဲလိုက်ကွင်းကို အမဲလိုက် သွားမှာပါလား"

ဝမ်အိမ်တော်ရှိ ဘဏ္ဍာစိုး မိန်းမစိုးက သူ့သခင်၏ ခန္ဓာကိုယ်သေးသေးလေးကို ကြည့်ကာ မျက်လုံးပြူးကျယ်သွားရသည်။

"ဘာ"

မြင့်မားသောကုလားထိုင်ပေါ်တွင်ထိုင်နေသော ခရမ်းရောင်ဝတ်စုံဝတ်ထားသည့် အမျိုးသားသည် ထုံထိုင်းနေပြီး မှိုင်းညို့နေသော လေသံဖြင့် ပြန်ဖြေ၏။

"ငါကိုယ်တော်က ကိုယ့်အမဲလိုက်ကွင်းကိုသွားပြီး အမဲလိုက်မှာလေ၊ အဲဒါ မင်းရဲ့ခွင့်ပြုချက် လိုသေးလို့လား”

စူးရှရှနှင့် အေးစက်သောအကြည့်ကြောင့် ဘဏ္ဍာစိုးသည် ချွေးအေးများစို့လာခြင်းနှင့်အတူ ကြမ်းပြင်ပေါ်တွင် ချက်ချင်းဝပ်တွားလိုက်သည်။

"ကျွန်တော်မျိုး မပြောဝံ့ပါဘူး၊အရှင်မင်းသား ကျေးဇူးပြုပြီး ကျွန်တော့်ကို ခွင့်လွှတ်ပါ"

"ထွက်သွား"

“မှန်လှပါ...”

ထိုဘဏ္ဍာစိုးသည် ချွေးစို့ထားသော မျက်ခုံးများကိုပင် မသုတ်အား အလျင်အမြန် ပြေးထွက်သွားတော့သည်။

ခပ်မြင့်မြင့်ကုလားထိုင်ပေါ်မှ လူက ထိုလူအား စိုက်ကြည့်ကာ-

ဘယ်လောက်စိတ်ဆိုးစရာကောင်းလိုက်သလဲ...သူ လူတွေကို တစ်ကယ်သတ်ပစ်ချင်တယ်၊ ဘယ်လိုလုပ်ရမလဲ။

သူ၏ လက်ရှိအခြေအနေက အားမရစရာပင်။လက်ထဲတွင် စစ်တပ်အာဏာမရှိ။ ခန္ဓာကိုယ်က ပျော့ပျောင်းပြီး နုနယ်နေသဖြင့် သူနှစ်သက်သလို တခြားလူများကို သတ်ပစ်တာမျိုးကို တွေးကြည့်ရာ အနည်းငယ် မသင့်တော်ပုံရသည်။

ဒါပေမယ့်.... စုရွေ့ စိတ်တိုနေရတုန်းပဲ...အား

အမျိုးသမီး ဇာတ်ဆောင်တိုင်းမှာ ခန္ဓာကိုယ်အားနည်းပေမယ့် ဉာဏ်ပညာနှင့်ပြည့်စုံပြီး သူမ ဘေးမှာနေပြီး အသေခံပေးဖို့ ဆန္ဒရှိနေတဲ့ ဇာတ်ပို့မင်းသားက ဘာလို့ ရှိနေရတာလဲ...

ငယ်စဉ်ကတည်းက စစ်မြေပြင်တွင် ကြီးမားသော စစ်အင်အားကို ကိုင်ထားခဲ့သော စုရွေ့သည် သူ့လက်ဖဝါးထဲ၌ စစ်တပ်အာဏာကို ဆုပ်ကိုင်ထားရမှ အလုံခြုံဆုံးဟု အမြဲတမ်း ခံစားခဲ့ရသူပင်။ယခု သူသည်စာပေလိုက်စားသော မင်းသားတစ်ပါးဖြစ်လာသည်။ လက်ရှိ ဧကရာဇ်မင်းမြတ်၏ အငယ်ဆုံးညီတော်ပင်။ညီအစ်ကိုနှစ်ယောက်ရှိသည့်အနက် သူက စာပေလိုက်စားပြီး အစ်ကိုတော် ဧကရာဇ်က စစ်ရေးလိုက်စားကာ တိုင်းပြည်အတွက် ငြိမ်းချမ်းရေးနှင့် တည်ငြိမ်ရေးကို

ဆောင်ကြဉ်းပေးသည်ဟု ဆိုကြ၏။

‌ဧကရာဇ်မင်းမြတ်မှာ ကလောင်ရေးရာမှာရော၊ ဓားပညာမှာပါ ကျွမ်းကျင်သည့် သားတော်များစွာရှိရဲ့သားနဲ့၊ ဘာလို့ သူ့လို ညီတော်ကို ဆက်ပြီးအသုံးချနေသေးတာလဲ...

ထို့အပြင်၊ ဧကရာဇ်မင်းမြတ်သည် လွန်ခဲ့သည့် နှစ်ပေါင်းများစွာကတည်းက သူ့ကို မြေကွက်တစ်ကွက်ပင် အပိုင်စားမပေးခဲ့ဖူးပေ။ ယင်းအစား သူက ဧကရာဇ်မြို့တော်တွင်သာ နေထိုင်ခဲ့ရသည်။ ဧကရာဇ်သည် သူ့အပေါ် လေးလေးနက်နက် ဂရုစိုက်ပြီး မျက်နှာသာပေးနေပုံရသော်လည်း၊ လက်တွေ့တွင် သူ့အား နေအိမ်အကျယ်ချုပ်ချထားခြင်းမျှသာ။

' မင်းက အရမ်းလိမ္မာတယ်၊ အပြင်မှာတစ်ယောက်တည်းနေရင် အဆင်မပြေဘူး၊ ဒါကြောင့် မင်း ငါ့နှာခေါင်းအောက်မှာ နာခံမှုရှိရှိနေတာက အကောင်းဆုံးပဲ'

ထိုသို့ မျက်နှာနှစ်ဖက်ရှိသော အစ်ကိုကြီးတစ်ယောက်ရှိသဖြင့် မူလပိုင်ရှင်သည် အမြဲတမ်း စိတ်ဓာတ်ကျနေသည်မှာ အံ့သြစရာမဟုတ်တော့။ အချိန်မရွေးသေသွားမလိုမျိုး သူ့ခန္ဓာကိုယ်ကိုတောင် ဂရုမစိုက်နိုင်ချေ။

"အရှင့်သား"

စုရွေ့ အတွင်းစိတ်ထဲက လှောင်ပြောင်နေချိန်မှာ၊သူ့အရှေ့တွင် လူရိပ်တစ်ခု ပေါ်လာ၏။ဤသည်မှာ သူ၏ ကိုယ်ရေးကိုယ်တာ ကိုယ်ရံတော်များထဲမှ တစ်ဦးဖြစ်သည်။

"ဘာလဲ"

ထိုသူက ကျင့်နင် မြို့စားမင်း အိမ်တော်တွင် စုဝမ်ကို ကာကွယ်ရန် သူ လျှို့ဝှက်စီစဉ်ပေးထားသော အစောင့်ဖြစ်သည်။သူက ပုံမှန်ပြန်လာပြီး ကျင့်နင် မြို့စားမင်း အိမ်တော်မှ ကိစ္စရပ်များကို သတင်းပို့တတ်သည်။

"သခင် ဒီနေ့ ချင်းချွမ်မြို့စားမင်း အိမ်တော်ရဲ့ ဒုတိယ သခင်မလေးက၊သခင်မလေး စုကို တွေ့ဖို့ ကျင့်နင်မြို့စားမင်း အိမ်တော်ဆီ လာပါတယ်၊ပြီးတော့ ကျင့်နင် မြို့စားမင်းရဲ့ ဇနီးသည်က မြင်းပု‌ကောင်းကောင်းလေးတွေကိုရှာဖို့ မြင်းတင်းကုပ်က အစေခံတွေကို ခိုင်းပါတယ်၊ပြီးတော့ သူမက သခင်မလေးစုအတွက် ဆောင်းဦးပေါက် ဝတ်စုံဒီဇိုင်းမျိုး ချုပ်ပေးဖို့ အပ်ချုပ်သမားကို ပြောနေပါသေးတယ်၊ကြည့်ရတာ သခင်မလေးစုက ဆောင်းဦးအမဲလိုက်ပွဲမှာ ပါဝင်ချင်ပုံရပါတယ်”

သေချာတာပေါ့….

အစောင့်၏ စကားကိုကြားလျှင် စုရွေ့ စိတ်ထဲတွင် သက်ပြင်းချလိုက်သည်။ စုဝမ်သည် ယခုအကြိမ် ဆောင်းဦးအမဲလိုက်ပွဲတွင် သေချာပေါက် ပါဝင်မည်မှန်း သူသိ၏။

အဟမ်း...အဟမ်း

စုရွေ့ ရုတ်တရက် အနည်းငယ်ရှက်သွားမိသည်။ လွန်ခဲ့သည့်ရက်အနည်းငယ်က၊ သူ စုဝမ်အရှေ့တွင် မျက်နှာ မပြဝံ့ခဲ့ပေ။ စုဝမ် ထိုနေ့ညက သတိပြန်လည်လာပြီးနောက်တွင်၊သူ့အား ရပ်တန့်ရန် ကြိမ်ဖန်များစွာ အော်ဟစ်နေခဲ့သည်။

ဒါပေမယ်..ဒါမျိုးက..လုံးဝ တားလို့ မရဘူး..ဟုတ်တယ်မလား

မကြာမီ၊ စုရွေ့ နန်းတော်ထဲသို့ဝင်၍ ဧကရာဇ်အစ်ကိုတော်နှင့် မျက်နှာချင်းဆိုင် စကားပြာဆိုပြီးနောက်၊ဝတ္ထုဇာတ်ကွက်များနှင့် ဒရာမာဇာတ်ကွက်များစွာခင်းပြီး သူ့အိပ်ဆောင်သို့ ပြန်သွားသည့်လမ်းတွင် စိတ်ထဲတွင် ဟိုဟိုဒီဒီတွေးမိရသည်။

ဇာတ်လမ်းထဲက အမျိုးသမီးဇာတ်ဆောင်ကသာ ထိုကဲ့သို့ အဖြစ်မျိုး ကြုံတွေ့လိုက်ရလျှင် များသောအားဖြင့် သူတို့က--

အမျိုးသမီးဇာတ်ဆောင် 1- ငါ အသက်မရှင်ချင်တော့ဘူး၊ ဘယ်သူ့ကိုမှလည်း မမြင်ချင်ဘူး၊ရှက်လွန်းလို့ သတ်သေတော့မယ်...

စုရွေ့ : ငါတို့ ရှောင်ဝမ်က ဒီလောက် မမိုက်မဲဘူး~

အမျိုးသမီးဇာတ်ဆောင် 2- ရှင်က တကယ်ပဲ ကျွန်မကို အလိုမတူဘဲ ဒီလိုမျိုး ဆက်ဆံရဲသလား၊ကျွန်မ ရှက်တယ်၊ရှင့်ကိုလည်း သတ်မယ်၊ကျွန်မကိုယ်ကျွန်မလည်း သတ်သေမယ်။

စုရွေ့ : ရှောင်ဝမ်ကတော့ ဒီလောက် စိတ်မမြန်တတ်တာသေချာတယ်။

အမျိုးသမီးဇာတ်ဆောင် 3 : ဟဲ ဟဲ ဟဲ ( ဟဲဟဲ ) လာပါ ၊ ရှင့်ဘောင်းဘီကို ချွတ်လိုက်ပါ၊ ရှင် ကျွန်မကို စော်ကားတဲ့အတွက် ရှင့်ကို သင်းကွပ်ပစ်မယ်။

စုရွေ့ : …….

ရှောင်ဝမ်ကတော့ ဒီလောက်ထိ မရက်စက်တာ သေချာတယ်မလား...

မည်သို့ပင်ဖြစ်စေ၊ ကောင်းကင်ဘုံမှာရော၊‌ကမ္ဘာမြေကြီးပေါ်မှာပါ ဘာကိုမှ မကြောက်သည့် စစ်သူကြီးစုမှာ၊ဤအဖြစ်မှန်ကို ရင်ဆိုင်ဖို့ ငြင်းဆန်နေပြီး တိုက်ရိုက် ကိုင်တွယ်ဖြေရှင်းဖို့ မဝံ့မရဲ ဖြစ်နေရသည်မှာ ပထမဆုံးအကြိမ်ပင်။

ရှောင်ဝမ် ကသာ သူ့ကို တစ်ကယ်မုန်းသွားရင် ဘာလုပ်ရမလဲ။

သူ့ကို သတ်သည်ဖြစ်စေ မသတ်သည်ဖြစ်စေ အရေးမကြီး၊ သင်းကွပ်တာကကျတော့....အင်း~

ဟာ...စစ်သူကြီးစု အတွေးလွန်နေပြီပဲ...

ထို့ကြောင့် စုရွေ့သည် လွန်ခဲ့သော ရက်အနည်းငယ်က၊ သွား၍မျက်နှာမပြဝံ့ခြင်းပင်။ သို့သော် စုဝမ်၏ လှုပ်ရှားမှုတိုင်းကို စောင့်ကြည့်ရန် သူ့လူများကို နေ့စဉ် စေလွှတ်ခဲ့သည်။ သူနှင့် စုဝမ် နှစ်ယောက်စလုံးသည် အလုပ်ဇာတ်လမ်းဇာတ်ကြောင်းကို ရင်းနှီးခဲ့ကြပြီး ရက်အနည်းငယ်ကြာသောအခါတွင်၊ အမျိုးသားဇာတ်ဆောင်နှင့် အမျိုးသမီးဇာတ်ဆောင်ကြားမှာ အမဲလိုက်ကွင်းတွင် မည်သို့ ဖြစ်ပျက်လာမည်ကို သိရှိခဲ့သည်။ ထိုမြင်ကွင်းမျိုးကို စုဝမ် နှင့်သူ အတူ ကြည့်ခွင့်ရမည်ဟု ယူဆရသည်။

ဖူရှန်း အမဲလိုက်ကွင်းသည် မူလက သူ့ကို ဧကရာဇ်မင်းမြတ် ပေးသနားခဲ့ခြင်းဖြစ်သည်။ ထို့ကြောင့် အားလပ်ချိန်မှာ သူ့အမဲလိုက်ကွင်းထဲကို လမ်းလျှောက်သွားမည်ဟု ဆိုပြီး စုဝမ်နှင့် တွေ့၍ရနိုင်၏။

____

🚩

Prev Next