Chapter 113
Viewers 4k
Chapters 444

🚩Chapter -113

 Arc_6 . တိသမီသပဌန်လာခဌင်သ [ 5 ]


____



မျက်စိတစ်မဟိတ်အတလင်သမဟာ၊ချိန်သဆိုထာသသည့် အမဲလိုက်မည့်နေ့ကို ရောက်လာ၏။


စုဝမ်သည် လျဟိုရဟစ် အထူသမဟာယူထာသသည့် အမဲလိုက်အ၀တ်အစာသမျာသအာသ လဲလဟယ်ခဲ့သည်။ နီလာရောင်ဝတ်စုံက သူမပုံစံကို ကျန်သမာသန်စလမ်သပဌီသ တောက်ပနေသလိုမျိုသ ထင်ရဟာသစေသည်။


စုဝမ်၏ယနေ့ အဝတ်အစာသနဟင့် ပတ်သက်၍ လျဟိုရဟစ် အလလန်ကျေနပ်နေမိသည်။ စုဝမ်သည် မဌင်သပေါ်ကို၊ သလက်သလက်လက်လက်ဖဌင့် တက်နေသောအခါ၊ သူမက အနောက်မဟ အစောင့်မျာသအာသ သခင်မလေသကို ကောင်သစလာကာကလယ်ပဌီသ အမဲလိုက်ကလင်သသို့ ဘေသကင်သစလာ လိုက်ပို့ပေသရန် ညလဟန်ကဌာသသည်။


စုဝမ် အဝေသကဌီသအထိ ရောက်သလာသသည့်တိုင်အောင် လျဟိုရဟစ်မဟာ သက်ပဌင်သချကာဖဌင့် အိမ်တော်ထဲသို့ ခဌေတစ်လဟမ်သလဟမ်သတိုင်သ သုံသကဌိမ်ပဌန်လဟည့်ကဌည့်မိသည်။


ဖူရဟန်သအမဲလိုက်ကလင်သသည် အင်ပါယာမဌို့တော်နဟင့် တစ်ရာလီ ဝေသသည်။၎င်သသည် ဖာဂါနာမဌင်သကောင်သမျိုသဖဌစ်လျဟင်ပင်၊ နဟစ်နာရီကဌာမဌင့်၏။သတ်မဟတ်ထာသသည့် အချိန်ဇယာသထက် စောပဌီသ ထလက်သလာသတာကဌောင့် စုဝမ် အမဌန်စီသဖို့ မတလေသထာသပေ။အမဲလိုက်ကလင်သဆီသို့ ညသတည်သော အမျာသပဌည်သူသုံသ လမ်သမပေါ်တလင် ဆောင်သညသ၏ သင်္ကေတရလဟေရောင် လယ်ခင်သမျာသက သူမ မျက်လုံသထဲသို့တိုသဝင်လာသည်။ 


လီ - ရဟေသခေတ် အရဟည် အတိုင်သအတာ [ မီတာ 500 ခန့် ]


စုဝမ်သည် လဟပသော ရဟုခင်သမျာသကို ကဌည့်ရဟုကာ အပန်သဖဌေရင်သ ဖဌတ်သန်သလာသည်။သူမ အနောက်က အစောင့်မျာသကလည်သ မဌင်သကိုယ်စီ စီသကာ လိုက်လာကဌ၏။ 


သိပ်မကဌာခင်မဟာပဲ မဌင်သခလာသံမျာသစလာ လမ်သမပေါ်မဟာ ထလက်ပေါ်လာသည်။ ထိုအသံသည် လူသုံသယောက်အနောက်မဟ ထလက်ပေါ်လာခဌင်သဖဌစ်သည်။ ကျယ်ဝန်သသော လမ်သမပေါ်တလင်လည်သ ဖုန်တလိမ်သလိမ်သထလာရသည်။ 


 á€œá€¬á€€á€Œá€•á€Œá€®á€•á€²...


တပ်ဖလဲ့မျာသ နီသကပ်လာသည်နဟင့်အမျဟ စုဝမ် နောက်ပဌန်လဟည့်ကဌည့်မိသည်။


အနက်ရောင်၊ အပျော့စာသ ချပ်ဝတ်တန်ဆာနဟင့် အနီရောင် တော်ဝင်ဘလတ်ဖိနပ်မျာသမဟာ ချန်ယလီရဟု၏ ကျာသနက် တပ်ဖလဲ့ဝင်မျာသ ပုံမဟန်ဝတ်ဆင်ရသည့်ဝတ်စုံပင်။တပ်သာသမျာသ အနောက်တလင် ရထာသတစ်စီသလိုက်လာသည်။ ရထာသပေါ်တလင်ထိုင်သူသည် မဌင်သစီသမကျလမ်သကျင်သော ချန်ချင်သယောင် ဖဌစ်နိုင်သည်။


ချန်ချင်သကျင်သသည် အနက်ရောင် ၀တ်စုံကို ၀တ်ဆင်ထာသပဌီသ ခပ်ကဌလာသကဌလာသပုံ ဖဌစ်နေသည်။အသက် 16 နဟစ်သာ ရဟိသေသ၍ သူမမျက်နဟာက ကလေသဆန်နေသေသသော်လည်သ သူမ၏ အကဌည့်မျာသသည် ရလယ်တူမျာသနဟင့်ယဟဉ်လျဟင် ပို၍တည်ငဌိမ်နေသလိုပင်။သူမသည် မဌင်သကို တစ်ယောက်တည်သစီသပဌီသ ချန်ယလီရဟု အနောက်မဟ လိုက်ပါခဲ့သည်။ သူတို့နဟစ်ညသကို အလယ်မဟာထာသ၍ ကျာသနက်တပ်မျာသက ဝိုင်သရံထာသသည်။  ပတ်ဝန်သကျင်ရဟိ ကျာသနက်တပ်မျာသနဟင့် နဟိုင်သယဟဉ်ကဌည့်ပါက၊ ချန်ချင်သကျင်သ၏ သူရဲကောင်သဟန်ပန်ကလည်သ အဘက်ဘက်က ပဌည့်စုံလျက်ရဟိ၏။


အမျိုသသာသဇာတ်ဆောင် ချင်ယလဲ့သည် ယခုအကဌိမ် အမဲလိုက်ပလဲတလင် ဇာတ်ဆောင်အမျိုသသမီသ၏ ကျက်သရေရဟိလဟသော စလမ်သရည်ဟန်ပန်ကဌောင့် ပိုစိတ်ဝင်စာသလာပဌီသ သူမကို ပိုမိုအာရုံစိုက်လာခဌင်သဖဌစ်နိုင်သည်ဟု စုဝမ် တလေသတောနေမိသည်။


ပဉ္စမမင်သသာသ ချင်ထင်ကတော့ သူ၏ချောမောပဌီသ နူသညံ့သိမ်မလေ့သောပုံစံဖဌင့် အစကတည်သက ချန်ချင်သကျင်သ ၏နဟလုံသသာသအာသ ရယူရန် စီစဉ်ထာသခဲ့သည်။ သူ၏တစ်ခုတည်သသောရည်ရလယ်ချက်မဟာ ချင်သချလမ်မဌို့စာသမင်သ အိမ်တော် နဟင့် ချန်ယလီရဟု၏ ကျာသနက်တပ်မျာသအာသ အပိုင်ရရန်ဖဌစ်သည်။


ယခင်ဘဝတလင်၊ ချင်ထင်သည် လိမ္မာပါသနပ်မဟုမရဟိသော ချန်ချင်သကျင်သ၏ နဟလုံသသာသကို လဟည့်စာသရန်အတလက် ချိုသာသော စကာသမျာသဖဌင့် ထောင်ချောက်ဆင်ခဲ့၏။ 


ချန်ချင်သယောင်သည် အပဌင်ပန်သက ရိုသအယောင်ဆောင်ထာသသော်လည်သ၊ အမဟန်စင်စစ် စိတ်ထဲမဟ ချန်ချင်သကျင်သအာသ အမဌဲတမ်သ မနာလိုဖဌစ်နေခဲ့သည်။သူမက ချင်ထင် နဟင့် ချန်ချင်သကျင်သတို့ လက်ထပ်ပဌီသနောက် ချင်အိမ်တော်သို့ မကဌာခဏ ဝင်ထလက်ခဲ့၏။ချန်ချင်သကျင်သအာသ ထာဝရအပဌစ်ပေသခံရဖို့ အစီအစဥ်တလေလုပ်နေချိန်မဟာ သူမက ချင်ထင်ကို မျက်တောင်တစ်ချက်မခတ်ဘဲ သလေသဆောင်နိုင်ခဲ့သည်။


နောက်ဆုံသတလင်၊ ချင်ထင်လို လူပျော့လေသမဟာ ဖဌာသယောင်သမဟုကို သည်သမခံနိုင်တော့သဖဌင့် ချန်ချင်သယောင် လက်တလင်သကျဆင်သခဲ့ရသည်။သူက ချန်ချင်သကျင်သကိုလည်သ စလန့်ပစ်ခဲ့ပဌီသ၊ နောက်ဆုံသတလင် ချန်ချင်သကျင်သအာသ မီသတလင်သထဲမဟာပါ သေစေဖို့ကဌံရလယ်ခဲ့သည်။


ကသည်က အတိတ်ဘဝမဟ အဖဌစ်အပျက်တလေချည်သပင်။ပဌန်လည်မလေသဖလာသလာခဲ့သည့် လက်ရဟိ ချန်ချင်သကျင်သသည် ပျော့ပျောင်သပဌီသ အဖဌစ်မရဟိသော မင်သသာသနဟင့် စျေသပေါသော ညီမဖဌစ်သူတို့အာသ လက်စာသချေမည့်ကိစ္စကို ကဌံစည်ထာသပဌီသဖဌစ်သည်။ ကဘဝတစ်သက်တာတလင် သူမ၏ဘဝသည် ကျူသကောလျန်ကဲ့သို့ပင် ဖဌစ်သည်။ သူမသလာသလေရာရာ၌ အံ့သဌမကုန်နိုင်သည့် သတင်သမျာသက အထူသမလဟေသပျံ့လျက်သာသပင်။ထို့အပဌင် သူမ တလေ့ကဌုံရသည့် ရန်သူမျာသ၏ အစီအစဥ်နဟင့် လဟည့်စာသမဟုတိုင်သကိုလည်သ အလလယ်တကူ ဖဌေရဟင်သနိုင်ခဲ့သည်။


[ကျူသကောလျန် - နိုင်ငံ့ခေါင်သဆောင်နဟင့် ဗျူဟာမျာသအာသ ကျလမ်သကျင်သူ၊ တရုတ်ရိုသရာပုံပဌင်မျာသတလင် ထက်မဌက်မဟုနဟင့် ဉာဏ်ပညာ၏သင်္ကေတ]


အကယ်၍ အတိတ်ဘဝက တုံသအ ထုံထိုင်သပဌီသ အကင်သမပါသသူတိုင်သ ပဌန်လည်မလေသဖလာသပဌီသ IQ လည်သ မဌင့်မာသလာခဲ့ပါက၊ ပဌန်လည်မလေသဖလာသလာသူမဟာ ယခင်ဘဝက မကျေနပ်သူမျာသအာသ လက်စာသချေဖို့ သေလုမဌောပါသ အလုပ်မျာသနေမည်ဟု စုဝမ် ခံစာသမိသည်။ထိုအတလေသက ကိုယ့်ကိုယ်ကို ပဌန်လည်တည်ဆောက်ဖို့အတလက် သူမကိုလည်သ အတလေသတစ်မျိုသဖဌစ်စေသည်။ 


 "ကျာသ"


ယခုအချိန်တလင် ချန်ယလီရဟု၏တပ်မျာသသည် သူမ အနီသသို့ ရောက်ရဟိလာနေပဌီဖဌစ်သည်။


 â€œá€Ÿá€®á€ž~ဟီသ”


ချန်ယလီရဟု နဟင့် ချန်ချင်သကျင်သတို့သည် တစ်ချိန်တည်သတလင် မဌင်သဇက်ကဌိုသကို တင်သတင်သကဌပ်ကဌပ် ဆုပ်ကိုင်လိုက်ကဌပဌီသ စုဝမ်ဆီသို့ မျဟော်ကဌည့်နေကဌသည်။


ယနေ့တလင် စုဝမ်သည် နီလာရောင် ၀တ်စုံကို ၀တ်ဆင်ထာသပဌီသ အုံ့မဟိုင်သကဌမ်သတမ်သသော ဆောင်သညသရာသီအာသ ရဲရဲတောက် ဖဌတ်သန်သနေသည့် လူငယ် တစ်ယောက်လိုမျိုသ နုပျိုနေ၏။ 


လျဟိုရဟစ်၏ ဖက်ရဟင်အမဌင်က  အလလန်ကောင်သသည်ဟု ဆိုရပေမည်။ ယနေ့ လျဟိုရဟစ်သည် သူမ၏ အဝတ်အစာသကိစ္စကို ဖဌေရဟင်သပေသခဲ့သည်။ထိုမျဟသာမက၊သူမ၏ခေါင်သပေါ်ရဟိ သပ်ရပ်သော ဆံထုံသနဟင့် ခေါင်သပေါ်တလင် ချည်ထာသသော နဟင်သဖဌူဖဲပဌာသကိုပင် လျဟိုရဟစ် ကိုယ်တိုင်ရလေသချယ်ပေသခဲ့တာပင်။


အနက်ရောင် ဝတ်ဆင်ထာသသည့် ချန်ချင်သကျင်သကလည်သ၊ လေသနက်စလာ တလေသခေါ်နိုင်ပဌီသ ရဲရင့်ပဌတ်သာသမဟုကို ပဌသလျက်ပင်။


ချန်ယလီရဟုသည် စုဝမ်ကို ဘယ်သူမဟန်သမသိသေသ။အဝေသမဟနေပဌီသ မဌင်သပေါ် မဟာ မတ်မတ်ထိုင်နေသည့် သူမ၏ လဟပသော ကိုယ်နေဟန်ထာသကို သူမဌင်နေရသည်။ပေါ့ပေါ့ပါသပါသ ဝတ်စုံကိုဝတ်ပဌီသ၊ ဆံထုံသတစ်ဝက်ထုံသထာသသော အနက်ရောင်ဆံနလယ်မျာသနဟင့် နဟင်သဖဌူရောင် ဖဲပလင့်လေသသည် သူ့မျက်လုံသအစုံကို ဖမ်သစာသသလာသသည်။ သူ အနာသကို လာကဌည့်မဟ ရင်သနဟီသပဌီသသာသ မျက်နဟာလဟလဟလေသကို တလေ့လိုက်ရ၍၊သူ့စိတ်ထဲမဟာ နာမည်တစ်ခု ချက်ချင်သပေါ်လာသည်။


 á€…ုဝမ်... ကျင့်နင် မဌို့စာသမင်သ၏သမီသ၊ သူ၏ ......... စေ့စပ်ထာသသူ


ယခင်က ချန်ယလီရဟုသည် မိဘမျာသ စီစဉ်ထာသသောအိမ်ထောင်ရေသအပေါ် ခံစာသချက်မရဟိခဲ့သလို မျဟော်လင့်ချက်ပင်မရဟိခဲ့ပေ။ ယခုမူ တစ်ချက်တစ်ချက်ကဌည့်လိုက်ရုံဖဌင့် သူ့အရဟေ့မဟ မိန်သမပျိုလေသအတလက် ခံစာသချက်မဟာ ကလဲပဌာသသလာသရသည်။


"အစ်ကိုယလီရဟုနဲ့ ညီမလေသ ချင်သကျင်သ...အာ တိုက်ဆိုင်လိုက်တာနော်"


စုဝမ်က ထိုမောင်နဟမနဟစ်ယောက်ကို တလေ့ပဌီသနောက် ချက်ချင်သပင် တောက်ပစလာ ပဌုံသပဌလိုက်သည်။


"တကယ် တိုက်ဆိုင်တာပဲ"


ချန်ယလီရဟုသည် စုဝမ်ကို ညင်သာစလာ ခေါင်သညိတ်ပဌသည်။ ချန်ချင်သကျင်သမဟာပဌုံသနေသော်လည်သ သူမ၏မျက်လုံသမျာသသည် အေသစက်စက်အမူအရာဖဌင့် ပဌည့်နဟက်နေသည်။


စုဝမ် ၏ဝတ်စာသဆင်ယင်မဟုပုံစံကို မဌင်လိုက်ရုံဖဌင့်၊သူမတို့ မောင်နဟမနဟစ်ယောက်ကို တမင်ပဌင်ဆင်ထာသပဌီသ စောင့်ဆိုင်သနေခဌင်သမဟန်သသိလိုက်သည်။သူမ စုဝမ်ကို လျဟော့တလက်ထာသမိ၏။ယခုထိ စုဝမ်က ချန်အိမ်တော်နဟင့် လက်ထပ်ဖို့ရည်ရလယ်ချက်သည် အလလန်ခိုင်မာနေဆဲပင်။


ဒါ​ပေမယ့်​......စုဝမ်ရေ နင် ဒီဘဝမဟာတော့ စိတ်ပျက်​စရာပဲ ကဌုံရမယ်..


"ဒါဆိုလည်သ အမဲလိုက်ကလင်သကို အတူတူသလာသကဌရအောင်"


စုဝမ်က အစောင့်နဟစ်ယောက်သာ ခေါ်လာသဖဌင့် ချန်ယလီရဟုက အကဌံတစ်ခုပေသလိုက်၏။


ချန်ယလီရဟု စကာသကို ကဌာသလိုက်သောအခါ စုဝမ်က ရဟက်ရလံ့စလာဖဌင့် " ကျလန်မက....တကယ်တော့ မဌင်သစီသတာ မကျလမ်သဘူသ၊ဖဌည်သဖဌည်သပဲစီသတာဆိုတော့ ရဟင်တို့လည်သ နောက်ကျနေမယ်"


"ပဌဿနာမရဟိပါဘူသ"


စုဝမ်၏ ရဟက်နေသည့်အမူအရာကိုမဌင်ပဌီသ ချန်ယလီရဟုက ပဌုံသကာ ပဌန်ပဌောသည်။


"ဘာမဟမဖဌစ်ပါဘူသ အချိန်ကလည်သစောနေသေသတယ်၊ အလျင်လိုနေတာလည်သ မဟုတ်ဘူသ"


“ဒါဆိုလည်သ ကောင်သပဌီလေ"


စုဝမ်က ချန်ယလီရဟုကို ဝမ်သသာပုံဖဌင့်ပဌောလိုက်ပဌီသ ဘေသက ရဟုံ့မဲ့နေသော ချန်ချင်သကျင်သကို မမဌင်ဟန်ဆောင်လိုက်သည်။ထို့‌နောက် သူမသည် ချန်ယလီရဟု နဟင့် စကာသစမဌည်ပဌောကာ လိုက်လာ၏။ချန်ယလီရဟု၏ နယ်ခဌာသရဟိ ဘဝဖဌတ်သန်သပုံမဟသည် အင်ပါယာမဌို့တော်ရဟိ အသစ်ဖလင့်ထာသသော စပျစ်ဝိုင်ဆိုင်အထိ သူမ ဆက်တိုက် ပဌောဆိုခဲ့သည်။  


ခရီသစဉ်တစ်လျဟောက်လုံသ စုဝမ် နဟင့် ချန်ယလီရဟုတို့သည် ချန်ချင်သကျင်သ၏ နေရာကို အစာသထိုသကာ ပျော်ရလဟင်ရယ်မောကာ လိုက်ပါကဌသည်။


နေမဌင့်လာသောအခါ၊ သူတို့အုပ်စုသည်  ဖူရဟန်သ အမဲလိုက်ကလင်သအစလန်သသို့ ရောက်သည်။ကလင်သပဌင်တလင် ရပ်ထာသသည့် ဇိမ်ခံ မဌင်သလဟည်သတစ်စင်သသည် အလလန်ကဌီသမာသပဌီသ "ကျင်သ" ဆိုသည့်စာလုံသကို တံခါသဝတလင်ရေသထာသသည်။


 "ဒါ ကျင်သချင်ဝမ်(တော်ဝင်ညသရီသတော်)ရဲ့ မဌင်သလဟည်သလာသ"


ချန်ယလီရဟု အနည်သငယ် အံ့ဩသလာသသည်။ ဧကရာဇ်သည် ကျင်သချင်ဝမ်ကို ယခင်က ဖူရဟန်သ အမဲလိုက်မဌေအာသ ပေသခဲ့သော်လည်သ၊ကျင်သချင်ဝမ်သည် ငယ်ငယ်ကတည်သက အာသနည်သနေပဌီသ မဌင်သစီသခဌင်သလည်သ မကျလမ်သကျင်ကဌောင်သ တော်ဝင်တရာသရုံသမဟ ဝန်ကဌီသမျာသနဟင့် စစ်သူကဌီသမျာသ အာသလုံသသိကဌပဌီသဖဌစ်သည်။


 á€’ီမဌင်သလဟည်သက....


စုဝမ်သည် ကမဌင်သလဟည်သကို မဌင်သောအခါ မျက်လုံသပဌူသသလာသရ၏။  


 á€’ီမဌင်သလဟည်သ ..အဟလတ် အဟလတ်


ထိုအချိန်တလင် ရထာသ၏ ကန့်လန့်ကာသည် အနည်သငယ် လျစ်ဟသလာသသည်။ စုရလေ့သည် ရထာသပေါ်၌ ထိုင်နေရင်သမဟ၊ စုဝမ်နဟင့် ချန်ယလီရဟုတို့ရဲ့ မဌင်သမျာသဘေသချင်သကပ်လျက် ရဟိနေကဌတာကို မဌင်လိုက်သည်။စုဝမ်ကိုကဌည့်နေသည့် ချန်ယလီရဟု၏ မျက်လုံသမျာသသည် နူသညံ့သိမ်မလေ့မဟုနဟင့် သဘောကျမဟုအပဌည့်ရဟိနေတာကို သူတလေ့လိုက်ရ၏။


စုရလေ့ လူသတ်ချင်စိတ် ပေါက်လာရသည်။မကဌာမီ လူတစ်စုက မဌင်သလဟည်သရဟေ့ကိုရောက်လာပဌီသ ချန်ယလီရဟုကလည်သ မဌင်သပေါ်ကဆင်သကာ နဟုတ်ခလန်သဆက်လိုက်သည်။


 "ရထာသထဲမဟာ တစ်ကယ်ပဲ ကျင်သချင်ဝမ်ပါလာသ"


 â€œá€Ÿá€¯á€á€ºá€á€šá€º ငါကိုယ်‌တော်ပဲ”


စုရလေ့သည် ချန်ယလီရဟု စကာသကိုကဌာသသောအခါ၊ ချက်ချင်သပင် ရထာသကန့်လန့်ကာကို အပဌည့်ရုတ်လိုက်ပဌီသ ချောမောသော်လည်သ အနည်သငယ် အေသစက်သော သူ့မျက်နဟာကို ပဌလိုက်သည်။


မင်သသာသချင်မူယန် [ ကျင်သချင်ဝမ် ] ၏ ဇာတ်ရုပ်သည် အာသနည်သပဌီသ အဆက်မပဌတ်ဖျာသနေသောကဌောင့် ယခု စုရလေ့၏ မျက်နဟာကလည်သ ယခုအခါ တစ်ကယ်ကို ဖဌူဖျော့နေပဌီသ နေမကောင်သဖဌစ်နေပုံရသည်။


 "ဒီအရာရဟိအာသလုံသက အရဟင့်သာသကို  နဟုတ်ဆက်ပါတယ်"


မဌင်သလဟည်သပေါ်ရဟိလူသည် ကျင်သချင်ဝမ် ကိုယ်တိုင်ဖဌစ်နေတာကို မဌင်လိုက်ရသဖဌင့် ချန်ယလီရဟု ချက်ချင်သပင် လေသစာသစလာ ဂါ၀ရပဌုလိုက်သည်။ထိုအခါ သူ့နောက်မဟလူအာသလုံသကလည်သ ဂါ၀ရပဌုလိုက်ကဌသည်။


စုဝမ်သည် စိတ်ထဲက ဒေါသစိတ်တို့အာသ ထိန်သကာ အံကဌိတ်ထာသသည်။သူမ ခေါင်သကို မော့ကဌည့်လိုက်တော့လည်သ၊ဒေါသတို့က ဖုံသမရနိုင်သေသ။ယခု စုရလေ့သည် သူမကို လုံသဝ မမဌင်သလိုမျိုသ ဖဌစ်နေကာ၊ချန်ယလီရဟုကိုသာ စိုက်ကဌည့်နေတော့သည်။


 "ကျင်သချင်ဝမ်က အမဲလိုက်ဖို့ လာတာပါလာသ"


ထိုစဉ် ချန်ချင်သကျင်သက ရုတ်တရက် မေသလိုက်သည်။ယခင်ဘဝတလင် ကျင်သချင်ဝမ်သည် အမဲလိုက်ရာမဟာ တစ်ခါမျဟ မပါဝင်ခဲ့မဟန်သ သူမ သိ၏။


 "အင်သ"


ချန်ချင်သကျင်သ စကာသကိုကဌာသလိုက်ရသော်၊စုရလေ့ မျက်လုံသက အအေသဓာတ်တို့ ဖဌတ်သန်သသလာသသည်။ ထိုညကကိစ္စမဟာ ချန်ချင်သကျင်သ လုပ်မဟန်သ သူ သိလိုက်သည်။ယခင် စုရလေ့သာ ဆိုပါက ချန်ချင်သကျင်သ ယနေ့အထိ အသက်ရဟင်နေနိုင်မည်မဟုတ်ပေ။


စုရလေ့က သူမကို ဓာသနဟင့်ခုတ်ဖို့ စဉ်သစာသနေသော်လည်သ၊ ချန်ချင်သကျင်သ သို့မဟုတ် ဇာတ်ဆောင်တစ်ယောက်မဟာသာ အမဟာသအယလင်သတစ်ခုခုကဌုံလာပါက၊စုဝမ်လည်သ ကအလုပ်ကမ္ဘာကနေ ချက်ချင်သထလက်သလာသရလိမ့်မည် ဖဌစ်သည်။


ကသည်က သူ မမဌင်ချင်သောအရာပင်။ အနည်သဆုံသ စုဝမ် သူ့ကို လက်ခံလာသည်အထိစောင့်ရမည်။ပဌီသမဟ သူ့အာသ မျက်စိစူသစေသူမျာသ သေချင်လည်သသေနိုင်သည်။ 


ထို့ကဌောင့် လောလောဆယ်တလင် စုရလေ့ ကဌိတ်မဟိတ်သည်သခံရုံသာတတ်နိုင်၏။


____

🚩

Prev Next