MM Story Teller

Chapter230

Viewers 32k

🌍Chapter 230

နေရောင်မှာ လုံး၀ပျောက်ကွယ်သွားလျက် မိုးကုပ်စက်၀ိုင်းမှ တဆင့်အမှောင်ထုတို့ စတင်ပျံ့နှံ့လာခဲ့သည်။

ထန်မော့ လှုပ်ရှားမှုမှန်သမျှကို ရပ်တန့်လိုက်ပြီး ဂျက်သည်လည်း သူ၏ပါးစပ်ကို ဖွင့်လာခဲ့သည်။

လူများကိုမြင်ပြီးနောက် ထန်မော့ ထီးကလေးကိုဖယ်လိုက်သည်။ သူသည် ဂျက်နှင့် ချန်ရှန်းရှန်းကို ပေကျင်းတွင်တွေ့ရလိမ့်မည်ဟု လုံး၀ထင်မထားခဲ့ချေ။ အံ့အားသင့်ပြီးနောက် သူ ချန်ရှန်းရှန်းကိုကြည့်ကာ စကားပြောရန် နေရာတစ်နေရာရှာရတော့မည်ဟုတွေးလိုက်သည်။ သူ၏ပါးစပ်ကို မဖွင့်နိုင်ခင်မှာပင် ချန်ရှန်းရှန်းကဆိုလာသည်။

"ဒီကအရင်ထွက်သွားရမယ်..ဒီနေရာက ပီကင်းတက္ကသိုလ်ရဲ့ အစစ်အမှန်ဂိမ်းနဲ့ တအားနီးနေတယ် မှောင်လည်းမှောင်နေတော့မလုံခြုံဘူး"

ဂျက်ကခေါင်းညိတ်လာစဥ် ထန်မော့အနည်းငယ် တန့်သွားမိသည်။

ခတ္တမျှကြာပြီးနောက် လူသုံးယောက်မှာ လမ်းကြားလေးမှ ပျောက်ကွယ်သွားတော့သည်။

ထန်မော့သည်လည်း စိတ်ချရသော နေရာတစ်ခုကိုရှာတွေ့လျှင် ၃ယောက်သား အိမ်ထဲသို့၀င်လိုက်သည်။

ဂျက်သည် ဘတ်ထရီချွေတာသော ဓါတ်မီးတစ်ခုကိုဖွင့်လိုက်သည်။ မှိန်ဖျော့သော အလင်းရောင်က အခန်းကိုအနည်းငယ် လင်းသွားစေသည်။ ထိုအလင်းကြောင့်ပင် ထန်မော့ အပြင်ဘက်တွင် သေချာမမြင်နိုင်ခဲ့သော မျက်နှာများကို မြင်တွေ့လိုက်ရသည်။

ထန်မော့သည် ဗလတောင့်တောင့် နိုင်ငံခြားသားနှင့် ကလေးမလေးကိုကြည့်လိုက်သည်။ သူ၏အကြည့်တို့မှာ ချန်ရှန်းရှန်းထံတွင် မြဲမြံနေလျက် နောက်ဆုံးတွင် မေးလာခဲ့သည်။

"မင်းတို့...ဒီကိုဘယ်လိုရောက်နေတာလဲ"

ဂျက်နှင့် ချန်ရှန်းရှန်းကို စမြင်စဥ်က ထန်မော့မှာ ၄င်းသည် ရန်သူ၏သတိထားမှုကိုလျော့ချပေးနိုင်သော မျက်နှာပြောင်းလဲနိုင်သော စွမ်းရည်များလားဟုပင် ထင်မိခဲ့သည်။ ဥပမာ ထန်မော့ကို တိုက်ခိုက်မည်ဆိုလျှင် ထန်မော့ကလည်း ကျိန်းသေပြန်တိုက်ခိုက်မည်ဖြစ်သည်။ ထိုစဥ် သူသည်ဂျက်နှင့် ချန်ရှန်းရှန်းကို မြင်လျှင် အနည်းငယ်တော့တွန့်ဆုတ်သွားမည်ပင်။ တစ်ဖက်ကလည်း ထိုအခွင့်အရေးကို အမိအရယူလျက် သူ့အား ရှင်းပစ်မည်ဖြစ်သည်။ သို့သော် ထန်မော့ထိုဖြစ်နိုင်ချေကို ငြင်းဆန်လိုက်သည်။

ထိုသို့စွမ်းရည်မျိုးသာရှိပါက ဂျက်နှင့် ချန်ရှန်းရှန်းအဖြစ် အဘယ်ကြောင့် ပြောင်းလိမ့်မည်နည်း။

ထန်မော့သည် လောလောဆယ် ဖူ၀မ်သော်၊ဖူ၀မ်ရှန်းနှင့် ပိုင်ရို့ယောင်တို့၏မျက်နှာနှင့် အရင်းနှီးဆုံးဖြစ်သည်။ ထိုစွမ်းရည်ဖြင့် ဤမျက်နှာများအဖြစ်သာ ပြောင်းသင့်သည်။

ဤလူ၂ယောက်သည် ရှန်ဟိုင်းမှ ပေကျင်းသို့ မည်သို့ရောက်နေသည်ကို မသိ၍သာ သူထိုကဲ့သို့ရှုပ်ထွေးသော အတွေးများ၀င်မိခြင်းဖြစ်သည်။

ဂျက်ကခေါင်းကိုကုတ်လျက် ဖြေလာသည်။

"တကယ်တော့ ငါ့အကြံမဟုတ်ဘူး..ရှန်းရှန်းက ငါတို့မင်းတို့ကို ပီကင်းတက္ကသိုလ်နားမှာလာရှာသင့်တယ်ဆိုလို့ ..သူပြောတာက မင်းက မျှော်စင်ကို ဇန်န၀ါရီမှာ တိုက်ခိုက်ထားတော့ လောလောဆယ် မျှော်စင်တိုက်ခိုက်ဂိမ်းထဲဆွဲသွင်းခံရမှာမဟုတ်ဘူးလေ..ပြီးတော့မင်းက ၃ထပ်မြောက်ကိုလည်းရှင်းထားသေးတယ်..အဲဒါကြောင့် မင်းကိုပေကျင်းမှာပဲရှိနေမယ်လို့တွေးလိုက်တာ..ဒါပေမယ့် အခုတလောအများကြီးဖြစ်ပျက်နေတာ..မင်းလည်း ဒီတိုင်းထိုင်မနေလောက်ပဲ မင်းရဲ့ခွန်အားကိုတိုးမြှင့်ဖို့ ဂိမ်းတစ်ခုခုကိုစိန်ခေါ်နေမှာပဲ ရှန်းရှန်းကမင်း ဒီဂိမ်းကိုစိန်ခေါ်ဖို့ ၃၀ရာခိုင်နှုန်းသေချာတယ်တဲ့လေ..ငါတို့ဒီမှာစောင့်နေရင် မင်းကိုတွေ့လောက်တယ်ဆိုတာနဲ့"

ဂျက်သည် ကလေးမလေးကိုလှည့်ကြည့်လိုက်သည်။

"ရှန်းရှန်း မင်း ၃၀ရာခိုင်နှုန်းလို့ပြောခဲ့တာမလား"

ရှန်းရှန်းကအကူအညီမဲ့စွာဆိုလိုက်သည်။

"၃၀ရာခိုင်နှုန်းလို့မပြောခဲ့ပါဘူး ပြီးတော့ အစ်ကိုထန်ကလည်းဒါကိုမေးနေတာမဟုတ်ဘူး"

ဂျက်မှာ ရှုပ်ထွေးသွားခဲ့သည်။

"ထန်မော့ပဲ ငါတို့ဒီကိုဘယ်လိုရောက်နေလဲ မေးတာမဟုတ်ဘူးလား"

"ဒီကိုဆိုတာ ပေကျင်းကိုပြောနေတာ"

ဂျက် ထိုအခါမှနားလည်သွားခဲ့သည်။

သူတို့၁ဦးနှင့် ၁ဦး နောက်ဆုံးတွေ့ခဲ့သည်မှာ လအနည်းငယ်ရှိပြီးဖြစ်သည်။ ချန်ရှန်းရှန်းမှာ ဂျက်၏အမှားကိုထောက်ပြနေသည်ကို ကြည့်ပြီး ထန်မော့မပြုံးပဲမနေနိုင်ခဲ့ချေ။ သူ၏အပြုံးကြောင့် လူ၂ယောက်အား လှည့်ကြည့်လာစေသည်။ ထန်မော့ရှင်းပြလိုက်သည်။

"ပြောင်းလဲသွားပုံပဲ"

ဂျက်ကအံ့အားသင့်စွာဆိုလာသည်။

"ထန် မင်းသတိထားမိတယ်လား..ငါပိုသန်မာလာပြီ..ပြီးခဲ့တဲ့လက အနက်ရောင်မျှော်စင် ဒုတိယထပ်ကိုရှင်းတော့ ခွန်အားပိုပြီးသန်မာစေတဲ့ဆုကိုရခဲ့တယ်လေ..ရှန်းရှန်းကတော့ပြောင်းလဲမသွားဘူး...ထူးဆန်းတယ်..သူဂိမ်းတွေအများကြီးလည်းဆော့တယ် မျှော်စင်ဒုတိယထပ်လည်းရှင်းပြီးတာကို သူ့ရဲ့ကိုယ်ခွန်အားက နည်းနည်းမှ တိုးမလာဘူး"

ထန်မော့မှာ အဘယ်ကြောင့်ဆိုသည်ကို သိသော်လည်း ထုတ်မပြောခဲ့ချေ။

"ချန်ရှန်းရှန်းရဲ့ဆံပင်က ပိုရှည်လာတာမဟုတ်ဘူးလား"

ချန်ရှန်းရှန်းပင်လျှင် ထိုပြောင်းလဲမှုကို သတိမထားမိချေ။ သူမ၏ ပုခုံးထိရှည်နေသော ဆံပင်ကို ထိကာ ရေရွတ်လိုက်သည်။

"ရှည်လာတယ်ထင်တယ်"

၃ယောက်သားပြုံးလိုက်မိကြသည်။

ကမ္ဘာကြီးအွန်လိုင်းပေါ်တက်လာသည်မှစ၍ ကစားသမားများအတွက် နေ့ရက်တိုင်းမှာ တစ်နှစ်မျှကြာသလိုပင်။ လူတိုင်းအတွက် ၃လမှာ ၃နှစ်တမျှ။

ထန်မော့ ဂျက်နှင့် ချန်ရှန်းရှန်းတို့မှာ ၃လမျှသာ မတွေ့ဖြစ်ကြသော်လည်း အချိန်အကြာကြီးကဲ့သို့ ခံစားရသည်။ ဂျက်၏အရွှန်းဖောက်မှုကြောင့် ၃ယောက်သား ထပ်မံအနေခက်မနေကြတော့ချေ။

ချန်ရှန်းရှန်းက ရှင်းပြသည်။

"ဆရာက ကျွန်မကို ရှင့်ကိုသွားရှာခိုင်းတာပါ"

ထန်မော့မျက်မှောင်ကျုံ့လိုက်မိသည်။

"လော့ဖုန်းချန်းကလား"

ကလေးမလေးကခေါင်းညိတ်သည်။

"အင်း ဂျက်နဲ့ကျွန်မ ရှန်ဟိုင်းကထွက်လာတော့ ထျန်းကျင်းမှာ ဂိမ်းတစ်ခုထဲ မတော်တဆ၀င်မိသွားတယ်လေ..အဲဒါနဲ့နောက်ကျသွားတာ..ကျွန်မတို့ပေကျင်းကိုရောက်တော့ ထျန်းရွှမ်အဖွဲ့အစည်းက ရှင်နဲ့ဗိုလ်ချုပ်ဖူနောက်လိုက်နေတယ်လို့ကြားတယ်..ထျန်းရွှမ်ကတကယ်သန်မာတဲ့အဖွဲ့လေ..ဒီတော့ကျွန်မတို့၂ယောက်လည်း ပုန်းနေပြီး ရှင်တို့ကြားကကိစ္စဖြေရှင်းပြီးတဲ့အထိစောင့်နေရတာ"

ထန်မော့မှာ ဤကလေးမအား ပေကျင်းသို့ဤမျှအစောကြီးရောက်ရှိလာရန် မျှော်လင့်မထားခဲ့ချေ။ သူကဆိုသည်။

"ထျန်းရွှမ်နဲ့ကိစ္စတွေကရှုပ်တယ် အခုမပြောနိုင်သေးဘူး...လော့ဖုန်းချန်းက မင်းတို့ကို ဒီကိုဘာအတွက် လာခိုင်းတာလဲ"

သူသည်ချန်ရှန်းရှန်းကိုသာပြောလိုက်ခြင်းဖြစ်သည်။

ချန်ရှန်းရှန်းမှာ လက်ချောင်းများကိုတင်းတင်းဆုပ်လျက် ထန်မော့ကို လေးနက်စွာကြည့်လာခဲ့သည်။

"ကိုယ်ပျောက်လူသားတွေ"

ထန်မော့၏ မျက်လုံးတို့ ပြူးကျယ်သွားပြီးတော့ ပြန်လည်တည်ငြိမ်သွားခဲ့သည်။

"လော့ဖုန်းချန်းဆီက ဘာသတင်းတွေများယူလာတာလဲ"

အပိုတွေပြောမနေပဲ သူလိုရင်းကိုသာ တိုက်ရိုက်မေးလိုက်သည်။ အဘယ်ကြောင့်မူ လော့ဖုန်းချန်း၏အတွေးကို သူနားလည်၍ပင်။ လော့ဖုန်းချန်းမှာ ကိုယ်ပျောက်လူသားများနှင့်ပတ်သက်၍ အရေးကြီးသော အချက်အလက်တစ်ခုကိုရှာတွေ့ပြီး ချန်ရှန်းရှန်းကို ဤသို့ပို့လိုက်ခြင်းဖြစ်နိုင်သည်။ ၄င်းမှာ အလွန်အရေးကြီးသောအချက်အလက်ဖြစ်ကာ အခြေအနေမှာလည်း အလျင်လိုနေပုံရသည်။ တိုက်အဖွဲ့အစည်းမှ ၄င်းကိုမကိုက်တွယ်နိုင်၍ ထန်မော့နှင့် ဖူ၀မ်သော်ထံပို့လိုက်ခြင်းဖြစ်သည်။

ဂျက်၏ခေါင်းမှာ မြူများဖုံးနေသည့်နှယ်။ သူသည် ထန်မော့နှင့် ချန်ရှန်းရှန်းမှာ ဆံပင်ပုခုံးအထိရှည်လာသောအကြောင်းပြောနေရာမှ ရုတ်တရက်ဤအကြောင်းအရာသို့ မည်သို့ရောက်ရှိသွားသည်ကို နားမလည်ခဲ့ချေ။

ချန်ရှန်းရှန်းက ထန်မော့၏ အတွေးကိုလိုက်မီနိုင်သည်။ သူမသယ်လာသော အိတ်လေးထဲမှ ဖိုင်လ်တစ်ထပ်လိုက်ကြီးကိုထုတ်ယူလာခဲ့သည်။ ချန်ရှန်းရှန်း၏ အိတ်မှာ အလွန်သေးငယ်သော်ငြား အတွင်းမှ ဖိုင်လ်များမှာမူ ၅စင်တီမီတာခန့်ပင် ထူသည်ကို ထန်မော့တွေ့လိုက်ရသည်။

ချန်ရှန်းရှန်းက ၄င်းကိုထန်မော့ဆီသို့ကမ်းပေးလိုက်သည်။

"ဒါတွေက ဆရာ ကျွန်မကိုယူလာခိုင်းတဲ့ဟာတွေ..ဒါပေမယ့် ဒါတွေကစာရွက်တွေသက်သက်ပဲ သူ တကယ်ရှင့်ဆီပို့ချင်တာက ကျွန်မပဲ အစ်ကိုထန်...ကျွန်မကဒီစာရွက်တွေထဲမှာ ရေးထားတာတွေထက်ပိုသိတယ်"

ထန်မော့မှာ ဖိုင်လ်ကိုဖွင့်ကြည့်ရန်ပြင်လိုက်စဥ် ၄င်းကိုကြားလိုက်ရသည်။ ကလေးမလေး၏ အတည်အတန့်အမူအယာကိုမြင်သော် သူပြုံးလိုက်မိလေသည်။ ထို့နောက် ဖိုင်လ်များကို ဘေးဖယ်လျက် မေးလိုက်သည်။

"လော့ဖုန်းချန်း ဘာကိုရှာတွေ့ခဲ့တာလဲ"

ချန်ရှန်းရှန်းမှာ ခိုင်မာစွာဆိုလာသည်။

"ကိုယ်ပျောက်လူသားတွေက လွန်ခဲ့တဲ့၆လကပျောက်သွားတဲ့ လူပေါင်း ၆ဘီလျံပဲ"

ထို့နောက် ချန်ရှန်းရှန်းမှာ တိုက်အဖွဲ့အစည်းမှရရှိထားသော သတင်းမှန်သမျှကိုပြောပြပြီးထန်မော့ဆီမှ သတင်းများနှင့် လဲလှယ်လိုက်သည်။ သူမက ထန်မော့၄င်းတို့ကို မသိလောက်ဟုထင်၍ မည်သည်တစ်ခုကိုမှချန်မထားခဲ့ချေ။ ထို့နောက် သူမတကယ်တမ်းပြောပြပြီးသောအခါတွင် ထန်မော့ ၄င်းတို့ကို သိနေပြီးဖြစ်ကြောင်း သိလိုက်ရလေသည်။

"ကိုယ်ပျောက်လူသားတွေက ကမ္ဘာကြီးအွန်လိုင်းပေါ်တက်လာတုန်းကပျောက်သွားတဲ့လူတွေ ပြီးတော့သူတို့မှာ အချိန်အဆင့်ဇယားရှိတယ်"

ထန်မော့သည် စာရွက်အလွတ်တစ်ခုကိုယူလျက် ချရေးလိုက်သည်။

"ငါသိပြီးပြီ ဒါပေမယ့် အဆင့်ဇယားထဲက နံပါတ်၁ကစားသမား မူဟွေ့ရွှယ်ကိုပဲ သိတယ်..မင်းပြောတဲ့ တခြားကစားသမားတွေကိုတော့ မကြားမိသေးဘူး"

မူဟွေ့ရွှယ်..အဲလက်စ်ဂျိုးနာ့..ရစ်ချက်မန်ဒေး..

ထန်မော့ထိုနာမည်များကိုချရေးလိုက်သည်။ သူရေးပြီးသည်နှင့် ကစားသမားအရေအတွက်မှာ ၄၀မျှရှိသည်ကိုတွေ့လိုက်ရသည်။ ၄င်းတွင် တရုတ်လူမျိုး ၁၁ယောက် ဥရောပလူမျိုး ၂၀နှင့် အမေရိကန်နှင့် အရှေ့တောင်အာရှအမည်တချို့လည်းပါ၀င်သည်။

ထန်မော့ဘော့ပင်တစ်ချောင်းကိုကိုင်လျက် သူ၏လက်ချောင်းများကြားထဲ လှည့်ကစားနေခဲ့သည်။ သူ၏အကြည့်တို့က ထူးဆန်းသော တရုတ်အမည်၁၁ခုထံဖြတ်ပြေးသွားလျက် မူဟွေ့ရွှယ်ထံတွင်ရပ်သွားခဲ့သည်။ ထန်မော့ချန်ရှန်းရှန်းကိုကြည့်လိုက်သည်။

"မင်းဒီအမည်စာရင်းကို ထူးဆန်းတယ်လို့ခံစားရလား"

ချန်ရှန်းရှန်းကဆိုလာသည်။

"တရုတ်ကစားသမားတွေများနေတာ"

ထန်မော့၏ နှုတ်ခမ်းတို့ တွန့်ကွေးသွားခဲ့သည်။

"အမှန်ပဲ တရုတ်ကစားသမားတွေ အရမ်းများနေတယ်"

ပိုင်ရို့ယောင်၏ စကားအရ အချိန်အဆင့်ဇယားတွင် လူပေါင်း၁၀၀ရှိသည်။ တိုက်အဖွဲ့အစည်းတွင် လူ၅၀၏ စာရင်းရှိကာ ထိုထဲမှ ၁၁ယောက်မှာ တရုတ်ကစားသမားများဖြစ်နေခဲ့သည်။

"ဒါတွေကကျိန်းသေ တရုတ်နာမည်တွေပဲ အရှေ့တောင်အာရှကနာမည်နည်းနည်းပါတယ်ဆိုရင်တောင် တရုတ်ကစားသမားတွေများလွန်းနေတယ်"

တရုတ်ကစားသမားများမှာ အဆင့်ဇယား၏ လေးပုံတစ်ပုံကိုနေရာယူထားခဲ့သည်။ ထန်မော့၏ ဦးနှောက်မှာ လျင်မြန်စွာအလုပ်လုပ်လျက် ဖြစ်နိုင်ချေများကို စဥ်းစားနေခဲ့သည်။ ရုတ်တရက်သူမေးလိုက်သည်။

"ဒီအချိုးက ကမ္ဘာပေါ်က တရုတ်လူဦးရေအချိုးနဲ့အတူတူပဲလား"

ဂျက်မှာတန့်သွားလျက် ချန်ရှန်းရှန်း၏မျက်လုံးများမှာ တောက်ပသွားခဲ့သည်။ သူမကထန်မော့၏ အတွေးလမ်းကြောင်းအတိုင်း လိုက်လာခဲ့သည်။

"နီးစပ်တယ် အစ်ကိုထန်...ထပ်ပြောရရင် အချိန်အဆင့်ဇယားက လူသတ်အဆင့်ဇယားပဲ...လူတစ်ယောက်ကိုသတ်ရင် ၁၀မိနစ်ရမယ်.. အချိန်ကိုပိုင်ထားတဲ့ ကစားသမားတစ်ယောက်ကို သတ်ရင် သူပိုင်တဲ့အချိန်တ၀က်နဲ့ ၁၀မိနစ်ရမယ်..ဒါပေမယ့် ဆိုင်မနေပြန်ဘူး"

ချန်ရှန်းရှန်းသည် စက္ကူပေါ်တွင် စက်၀ိုင်းတစ်ခုကိုဆွဲလိုက်ပြီး ၄င်းထဲတွင် စက်၀ိုင်းကလေး၂ခုကိုဆွဲလိုက်သည်။ စက်၀ိုင်းအသေးထဲတွင် ၁၀မိနစ်ဟုရေးပြီး ကျန်တစ်ခုတွင် ၁၀မိနစ်+ Xမိနစ်ဟုရေးလိုက်သည်။

"လူတစ်ယောက်ကိုသတ်ရင် ၁၀မိနစ်ရမယ်...အချိန်ပိုင်တဲ့သူတစ်ယောက်ကိုသတ်ရင် ၁၀မိနစ်+Xမိနစ်ကိုရမယ်..ဒါပေမယ့် Xမိနစ်ကိုရထားတဲ့ကစားသမားက လူတွေအများကြီးသတ်ထားလို့ပဲ...ဒီတော့ ကစားသမားတစ်ယောက်ပိုင်တဲ့အချိန်က သူလူဘယ်လောက် သတ်ထားသလဲပေါ်မူတည်တယ်..."

ချန်ရှန်းရှန်းကဆိုလာသည်။

"ဘယ်လိုလူမျိုးမှာ အချိန်အများကြီးရှိမလဲ"

ဂျက်က၄င်းကိုနားလည်ခဲ့သည်။

"သန်မာတဲ့သူတွေပေါ့..သန်မာတဲ့သူတွေပဲ တခြားကစားသမားတွေကို သတ်နိုင်မှာ"

မမျှော်လင့်စွာ ထန်မော့ကသူ့ကိုငြင်းဆန်လာခဲ့သည်။

"သန်မာတာက အရေးအကြီးဆုံးအချက်မဟုတ်ဘူး"

ဂျက်မှာတန့်သွားခဲ့သည်။

"ဘယ်လို...ဒါဆို ဘာကအရေးအကြီးဆုံးလိုအပ်ချက်လဲ"

ထန်မော့ချန်ရှန်းရှန်းကို ကြည့်လိုက်လျှင် ကလေးမလေးမှာလည်း သူ့ကိုကြည့်နေခဲ့သည်။ ချန်ရှန်းရှန်းမှာ သက်ပြင်းချလျက် လေးကန်စွာဆိုလိုက်သည်။

"သတ်ရမယ့်သူတွေအနီးအနားမှာ အလုံအလောက်ရှိနေသ၍ ခွန်အားက အချိန်ဇယားပေါ်ရောက်ဖို့ အရေးအကြီးဆုံး အချက်မဟုတ်ဘူး"

ဂျက်၏ဦးနှောက်နှင့် ချန်ရှန်းရှန်းစကား၏ ဆိုလိုရင်းကို နားမလည်ချေ။ သို့သော် ဤနေရာတွင် ထန်မော့နှင့် ချန်ရှန်းရှန်းရှိနေသ၍ အရေးမကြီးတော့။

ထန်မော့ရှင်းပြလိုက်သည်။

"လွန်ခဲ့တဲ့ နှစ်၀က်ကပျောက်သွားတဲ့လူတွေက ကမ္ဘာ့လူဦးရေရဲ့ ၉၀ရာခိုင်နှုန်းလောက်ရှိတယ်..သူတို့နဲ့ယှဥ်ရင် ရှင်ကျန်ခဲ့တဲ့ ကျွန်တော်တို့ဆို မပြောပလောက်ဘူး...အဲဒီအဆင့်ဇယားပေါ်မှာ တရုတ်ကစားသမားတွေအများကြီးရှိနေတယ်ဆိုတာ အချိန်အမှတ်တွေရဖို့ အရင်းအမြစ်ကြီးရှိနေလို့ပဲ..အဲဒါက.."

ထန်မော့မပြောခင် ခတ္တရပ်သွားခဲ့သည်။

"သတ်လို့ရတဲ့ လူဦးရေ... ၄ပုံ၁ပုံအချိုးအရဆို..သူတို့တရုတ်မှာပဲ ရှိနေလောက်ဦးမယ်ထင်တယ်"

"နေပါဦး...တရုတ်မှာဟုတ်လား"

ဂျက်ကအံ့သြတကြီးဆိုလာသည်။

"အင်း...သူတို့တရုတ်မှာရှိနေတုန်းပဲ..လွန်ခဲ့တဲ့လ၀က်က ကျွန်တော်တို့တွေ အဲဒီကိုယ်ပျောက်လူသားတွေကိုစတွေ့လာရတယ် ရှန်ဟိုင်းမှာလည်း သူတို့ရှိတယ်...ထျန်ကျင်းမှာလည်း သူတို့ရှိတယ်..နောက် ပေကျင်း...ဒီလိုဆို ကိုယ်ပျောက်လူသားတွေ ကမ္ဘာအနှံ့မှာ စပြီးပေါ်လာနေပြီဆိုတာ ခန့်မှန်းလို့ရတယ်.. သေချာတာတစ်ခုကတော့ လွန်ခဲ့တဲ့လ၀က်မတိုင်ခင်က အဲဒီကိုယ်ပျောက်လူသားတွေဆီက အသတ်ခံရတဲ့ ကစားသမားတွေ မရှိခဲ့ဘူးဆိုတာပဲ..မဟုတ်ရင် တိုက်ပဲ ဖြစ်ဖြစ် ဖူ၀မ်သော်ပဲဖြစ်ဖြစ် သတိထားမိတာကြာလောက်ပြီ"

🌍

Prev Next