Chapter 52

🐯Chapter 52

ပထမဆုံး တစ်ချက်မှာပင် ထိုအရာက လှပသော မြင်ကွင်းတစ်ခုဖြစ်သည်။ 

[တရုတ်ပြည်တောင်ဘက်က ကျားက ဘယ်တော့မှ ချိန်းမတွေ့ဘူး : အယ် ဒါ အရင်က တာ့ခ်မှာ လုပ်ခဲ့ဖူးတဲ့ ဘာဘီကျူးလား… အဲဒီ့နောက်ပိုင်းမှာ ငါ တစ်ချိန်လုံး လုပ်စားခဲ့ပေမယ့် တစ်ခါမှ အကြိုက်မတွေ့ခဲ့ဘူး… စောင့်မျှော်နေပါတယ်…]

[ဗီဗီယန် : အရင်က တာ့ခ်မှာ ဘာတွေလုပ်ခဲ့တာလဲ… ငါမနာလိုဖြစ်သွားပြီ… ကြယ်တာရာမြို့တော် မရောက်ခင်က တင်ဆက်သူရဲ့ ဗီဒီယိုတွေကို ငါ ရှာမတွေ့ဘူး…] 

"အသားကင်(ဘာဘီကျူး)နဲ့ ကိုရီးယားအသားကင်က အရသာနဲ့ လုပ်ထုံးလုပ်နည်း မတူဘူး…" 

ကုယွီမြန်က ခေါင်းညိတ်လိုက်သည်။ 

"ဒါပေမယ့် သူတို့က နည်းနည်းဆင်တူတယ်…လုပ်ရတာလည်း လွယ်တယ်…မင်းတို့ အိမ်မှာ စမ်းကြည့်လို့ရတယ်…" 

နှင်းကျားသစ်လေးက ဝါးခြင်းတောင်းလေးကို သူ့ခြေသည်းလေးများနှင့် တွန်းလိုက်သည်။ ခြင်းတောင်းထဲတွင် လတ်လတ်ဆတ်ဆတ် ဆလတ်ရွက်များ ရှိသည်။သူက ဂုဏ်ယူဝင့်ကြွားစွာဖြင့် နေရာတွင် ပြန်ထိုင်ကာ ခေါင်းလေးမော့ပြီး သူ့လူသားက သူ့ကို ချီးမွမ်းမည်ကို စောင့်မျှော်နေသည်။ 

ပန်ဒါလေးက သူ့ချိုလိန်လေးကိုစုပ်ကာ တောင်းကို စူးစူးစိုက်စိုက်ကြည့်နေသည်။ ကုယွီမြန်က သူ့ခေါင်းကို ပွတ်လိုက်ပြီး မျက်လုံးများကိုကွေးကာ ပြုံးလိုက်သည်။

"ထွမ်ထွမ်က အရမ်းတော်တယ်…"

နှင်းကျားသစ်လေး၏ ရှည်လျားသော အမြီးက ရွေ့လျားသွားပြီး သူ့မျက်လုံးများကို ပျင်းရိစွာ မှိတ်ထားကာ အနည်းငယ် ကျေနပ်နေပုံပေါ်သည်။ 

ပန်ဒါကလေး :  "အီ….." 

ကုယွီမြန်က ရေတစ်ပန်းကန်ဖြည့်ကာ သူ့ခေါင်းကိုလည်း အနမ်းပေးလိုက်သည်။

 "ယွမ်ယွမ်လည်း အရမ်းတော်တယ်… အိမ်မှာဆိုရင် အရမ်းလိမ္မာတယ်…" 

နှင်းကျားသစ်လေး၏ မျက်နှာက တဖြည်းဖြည်း မည်းမှောင်လာသည်။

“…” 

ပန်ဒါလေး၏ အမြင်မှ ကြည့်ရှူသူများ “…….”

[လင်းရှန်းက သမင်ကိုတွေ့လိုက်တယ် : သေစမ်း... မြန်မြန်က ငါ့ကို ချီးကျူးပြီး နဖူးကိုလည်း နမ်းတယ်… ငါတော့ သေပါပြီ…]

 [အဖြူရောင် သစ်တော်ပန်းပွင့် လီလီ : ငါက အသစ်လေးပါ...ဘာလို့ အရမ်းစိတ်လှုပ်ရှားနေကြတာ… အားးးး ငါ ဖန်သားပြင်ကိုဖွင့်လိုက်တာနဲ့ HP လျော့သွားတဲ့အထိ ပြင်းပြင်းထန်ထန် အပစ်ခံလိုက်ရတယ်…]

[Schrodinger ရဲ့ခွေး :  တင်ဆက်သူက ငါ့ကို ပြုံးပြီးကြည့်လိုက်တဲ့အချိန်မှာပဲ ကောင်းကင်ပေါ်က ကြယ်တွေအားလုံးကို သူ့အတွက် ဖြုတ်ပေးချင်မိသွားတယ်…] 

ကုယွီမြန်က ယနေ့ညနေပိုင်းတွင် အနည်းငယ် နောက်ကျသည့်အချိန်မှ စတင်ထုတ်လွှင့်ခဲ့သည်။ နှစ်ရက်အတွင်း သူ၏ အလုံးစုံကျော်ကြားမှုကြောင့် လူသစ်ပြိုင်ပွဲတွင် ပထမနေရာရခဲ့သည်မှာ သံသယဖြစ်စရာမရှိသော်လည်း ယနေ့တွင် ယခင်နှင့် မတူတော့ပေ။ ထုတ်လွှင့်ပြီး နာရီဝက်အကြာတွင် သူနှင့် ယနေ့၏ ပထမနေရာကြားရှိ အကွာအဝေးက ကျဉ်းမြောင်းသွားခဲ့သည်။ ယခုအချိန်တွင် ကြည့်ရှူသူဦးရေ သုံးသန်းကျော် ရောက်ရှိလာပြီး ပထမနေရာကိုပင် ကျော်လွန်သွားတော့မည်ဖြစ်သည်။

သူ၏ နေ့လယ်ပိုင်း တစ်နာရီနှင့် ညပိုင်း နာရီဝက် တိုက်ရိုက်ထုတ်လွှင့်မှုက ရေပန်းစားလာစေရန် ဆုများမဲဖောက်ပေးနေသည့် ဒုတိယနေရာမှ RMB(ပိုက်ဆံရှိ)တိုက်ရိုက်ထုတ်လွှင့်သူအား ဖိနှိပ်နိုင်ခဲ့သည်။ 

လူသစ်ပြိုင်ပွဲ မဟုတ်လျှင်ပင် သူက သာမာန်ထိပ်တန်း တင်ဆက်သူများထက် သာလွန်နေပြီဖြစ်သည်။ စနေနေ့တွင် အွန်လိုင်းပေါ်ရှိ ဖြတ်သွားဖြတ်လာ အများအပြားကို အသုံးချနိုင်ခြင်းသည်လည်း ရလဒ်ကောင်းတစ်ခုဖြစ်သည်။ 

ကုယွီမြန်က ပါဝင်ပစ္စည်းများကို အမျိုးအစားအမျိုးမျိုးခွဲပြီးနောက် ပြောလိုက်သည်။ 

"ဒါက အခြေခံအားဖြင့်တော့ ဘာမှမဆိုင်ပါဘူး… နှပ်ထားတဲ့ ဝက်ဗိုက်သားနဲ့ ခိုဘီအမဲသားကို လှီးလိုက်ကြရအောင်..." 

သူက ဝက်သားကို အချပ်လေးများအဖြစ် လှီးဖြတ်သည်။ကုယွီမြန် လှီးဖြတ်ထားသော အချပ်များက သာမန်ထက် အနည်းငယ်ပိုထူသောကြောင့် ၎င်းတို့အား ကင်လိုက်သောအခါ နူးညံ့ပြီး ဝါးရလွယ်သည်။ အဆင့်မြင့် ခိုဘီ အမဲသားကို အကြောများနှင့် အခြားမစားနိုင်သော အဆီများကို ဖယ်ရှားပစ်ရန် ဦးစွာလှီးဖြတ်လိုက်ပြီး ထင်ထားသည်နှင့် ဆန့်ကျင်ပြီး လက်တစ်ချောင်းစာခန့် ထူအောင် လှီးဖြတ်ကာ အသားပျော့သွားစေရန် ဓားနှောင့်နှင့် ဖြည်းဖြည်းချင်း ထုလိုက်သည်။ ထုံးစံအတိုင်း ပုစွန်ကို အခွံခွာပြီး အညစ်အကြေးများ ဖြတ်ထုတ်သည်။ အခြားအသီးအရွက်များကိုလည်း ရေဖြင့်ဆေးကြောသန့်စင်သည်။ 

"အသားကို ခဏလောက်ကြာအောင် နှပ်ထားရမယ်…" 

နှင်းကျားသစ်လေးနှင့် ပန်ဒါဝက်ဝံလေးက ကုယွီမြန် ကို နေ့လည်အချိန်အများစုတွင် မတွေ့ခဲ့ရပေ။ ယခု သူတို့က သူ့အား အလွန်ကပ်နေသည် ။

ထန်ယွမ်လေး၏ အပြုအမူက ပို၍ တိုက်ရိုက်ကျကာ ရင်းနှီးပြီး နှင်းကျားသစ်လေးက သူ့ပိုင်သည့် နေရာကို အမှတ်မထင် သူ့အမြီးလေးနှင့် ရစ်ပတ်ထားသည်။ ကုယွီမြန်က သူတို့ လှည့်ပတ်ပြေးပြီး ပါဝင်ပစ္စည်းများ သို့မဟုတ် ဆော့များကို တိုက်မိပြီး သူတို့၏ ခြေသည်းလေးများ ပေသွားမည်ကို ကြောက်နေခဲ့သည်။ သူက ပန်ဒါလေးကို ရိုးရိုးပင် ကောက်ချီလိုက်ပြီး ဒူးကြားထဲတွင် ထားလိုက်သည်။ ထို့နောက် သူက နှင်းကျားသစ်လေးကို ချီလိုက်ပြီး သူ့ ဆွယ်တာအင်္ကျီကော်လာထဲသို့ ထည့်လိုက်သည်။ နှင်းကျားသစ်လေး၏ ဦးခေါင်းလေးကို သူ့မေးစေ့နှင့် အသာအယာ ဖိထားလိုက်သည်။

 "နှပ်ထားတဲ့ အသားရဲ့ အဓိက အရသာက ပဲငံပြာရည်ဖြစ်ပြီး အဲ့ဒီဆော့စ်က ငန်တယ် စပ်တယ် စားရလွယ်တယ်…”

ကုယွီမြန်က အရသာပေါ့သည့် ရုတ်နှစ်ကို စျေးကွက်တွင် တွေ့ခဲ့သည်။ တစ်ချိန်တည်းမှာပင် သူက ဟင်းချက်ဝိုင်နှင့် ပဲငံပြာရည်တို့ကို ရောစပ်လိုက်သည်။ ထို့နောက် သကြားအနည်းငယ်ထည့်ကာ နှမ်းဆီအနည်းငယ်နှင့် ရောပြီး ပါးပါးလှီးထားသော ခိုဘီအမဲသားကို ထည့်လိုက်သည်။ ထို့နောက် ၎င်းကို အထူးလေဟာနယ် ဖိအားမြင့်ကိရိယာတစ်ခုတွင် ထည့်သွင်းကာ ချက်ပြုတ်ချိန်ကို တိုစေပြီး အသားများကို တိုက်ရိုက် ချက်ပြုတ်လိုက်သည်။

အချဉ်ရည်အဖြစ် ငရုတ်သီး နှင့် ပဲငံပြာရည်အကြည်ကို သုံးထားသည်။ ကုယွီမြန်က နုပ်နုပ်စဉ်းထားသော ဂျင်း၊ကြက်သွန်ဖြူတို့နှင့် နှမ်းဆီကို ပဲငံပြာရည်ထဲသို့ ထည့်ကာ နောက်ဆုံးတွင် အရသာအတွက် သကြားသုံးဇွန်းထည့်လိုက်သည်။

ဤနည်းဖြင့် ပဲငံပြာရည်၏ အရောင်က တောက်ပြောင်လာကာ ကြည့်ရှူသူများက ဆိုဒါအရည်၊ ဂျင်းမွှေကြော်နှင့် ပူပူနွေးနွေး ပဲငံပြာရည်တို့၏ မွှေးရနံ့ကို ရရှိသွားကြသည်။ 

[အလှကုန်ပစ္စည်းတွေကို လွှင့်ပစ်မယ်: အိုး… ဒီအချဉ်ရည်က ကြည့်ကောင်းပြီး အနံ့လည်း ကောင်းတယ်…] 

[အသုံးပြုသူ 187874: ငါက ဒီမှာ အသစ်လေးပါ… တင်ဆက်သူက ဘာလို့များ အချဉ်ရည်လုပ်ဖို့ အချိန်အကြာကြီးယူနေရတာလဲ… စောစော စလို့ရော မရဘူးလား…] 

ကုယွီမြန်က ပြုံးရုံသာပြုံးပြီး မေးခွန်းကို မဖြေလိုက်ပေ။ ကိုရီးယားအသားကင်၏စိတ်ဝိညာဉ်က အချဉ်ရည် ဖြစ်သည်။ ၄င်း၏ အသွင်အပြင်ကောင်းခြင်း သို့မဟုတ် အနံ့မွှေးခြင်း ဟူသည့် ထိုစကားလုံးများက ရိုးရှင်းသော်လည်း ထိုမျှ ရိုးရှင်သည် မဟုတ်ပေ။ နှပ်ထားသည့် အမဲသားချက်ပြုတ်နေသည့် မိနစ်အနည်းငယ်အတွင်း ကုယွီမြန်က ဘာမှမလုပ်ဘဲ မနေခဲ့ပေ။ သူက စားပွဲအောက်ရှိ မီးဖိုကိုမီးညှိပြီး အိုးပူထဲသို့ ဆီထည့်ကာ အသားကင်သည့် ဆန်ခါကို အစားထိုးရန် ရှာတွေ့ခဲ့သည့် ခြံစည်းရိုးသုံး စတီးဝိုင်ယာ အကွက်အချို့ကို ဖြန့်ခင်းကာ ၎င်း၏ မျက်နှာပြင်ပေါ်တွင် သံလွင်ဆီများ ဖြန်းလိုက်သည်။ 

သူက မီးဖိုကို မီးညှိကာ ကြီးကြီးမားမား လှုပ်ရှားလိုက်သောကြောင့် ကုယွီမြန်၏ လည်တိုင်က အနည်းငယ် ကွေးတက်သွားပြီး သူ၏ ညှပ်ရိုးအပေါ်ရှိ နှင်းဆီနီနက်ကို ပေါ်လွင်သွားစေသည်။ မကြာမီမှာပင် သူက ကော်လံကို ဆွဲတင်လိုက်သည်။ 

[မိုင်းတွင်းထဲမှာ မိသားစုတစ်ခုရှိတယ် : ဟင် ငါ ဘာကို မြင်လိုက်တာလဲ... မြန်မြန့်မှာ တက်တူးရှိတာလား…]

[အလှကုန်ပစ္စည်းတွေကို လွှင့်ပစ်မယ်: ငါလည်း မြင်လ်ိုက်တယ်… နည်းနည်းနီနေသေးတယ်ဆိုတော့ အသစ်ပဲ… နှင်းဆီပန်းနဲ့ တူတယ်…ထူးဆန်းပေမယ့် မြန်မြန်နဲ့ လိုက်ဖက်ပါတယ်…]

နှင်းကျားသစ်လေးသည် ကျေနပ်စွာဖြင့် သူ့ မေးစေ့ကို မြှောက်လိုက်သည်။ အသားကို နှပ်ထားကာ အိုးက ပူနေချိန်တွင် သူ့တက်တူးအကြောင်း လူပိုသိမလာစဉ် အချိန်လေးတွင် ကုယွီမြန်က နှစ်ကြိမ်ခန့်ချောင်းဆိုးပြီး လူတိုင်း၏ အာရုံစိုက်မှုကို ပြန်လည် ဆွဲဆောင်လိုက်သည်။

 "အင်း ကျွန်တော်တို့ ချက်လို့ရပြီ..."

ကုယွီမြန်က သူ့တူများကို ကောက်ကိုင်လိုက်ပြီး အသားကင်သည့် ဆန်ခါပေါ်တွင် အမဲသားအပိုင်းအစများကို ဖြန့်လိုက်သည်။ အနီရောင်အသားပေါ်တွင် မာဘယ်ကျောက်၏ သွေးကြောများနှင့်တူသည့် အဖြူရောင် အဆီများဖြင့် ယှက်ဖြာနေသည့် ခိုဘီအမဲသားကို အသင့်ဖြစ်သည်အထိ နှပ်ထားခြင်းဖြစ်သည်။ ကုယွီမြန်က အမဲသားကိုဖြန့်ပြီး ဆီ၊အသားကင်ဆော့စ်တို့ဖြင့် သုတ်ကာ တစ်ဖက်သို့လှန်ပြီး နောက်တစ်ကြိမ် သုတ်လိုက်သည်။

ဒယ်အိုးကို အနည်းငယ်စောင်းထား၍ ဆီအလွန်များပြီး မအီစေရန် အသားပေါ်ရှိဆီများ လျှောကျသွားစေသည့် အပေါက်များပါရှိသည်။ အမဲသားကင်ခြင်းက အလွန်မြန်ပြီး တစ်မိနစ်ခန့်သာ ကြာမြင့်သည်။ ကင်ထားသော ခိုဘီအမဲသား၏ ဘေးနှစ်ဖက်က အနည်းငယ် ရွှေရောင်သန်းနေပြီး ဗန်းထဲမှ ဆီမြည်သံများ ထွက်လာသည်။ ဆော့စ်က အရောင်အသွေးကို လှပစေပြီး အသား၏ မျက်နှာပြင်ပေါ်တွင် အလွန်ဆွဲဆောင်မှုရှိသော တောက်ပြောင်မှု ရှိသည်။ 

စွဲမက်ဖွယ်ကောင်းသော အနံ့က လျင်မြန်စွာ ပျံ့နှံ့သွားသည်။ ကုယွီမြန်က အမဲသားကင်ကို ပန်းကန်ပြားပေါ်သို့ တစ်ခုပြီးတစ်ခု ချထားသည်ကို ကြည့်နေစဉ်အချိန်တွင် ကြည့်ရှူသူများ မနေနိုင်ဘဲ တွံတွေးမျိုချမိသွားကြပြီး မှတ်ချက်များ နှင့် ကြည့်ရှူသူ အရေအတွက်များလည်း လျင်မြန်စွာ တိုးမြင့်လာခဲ့သည်။ နှင်းကျားသစ်လေး၏အမြီးက ကုယွီမြန် လက်ကောက်ဝတ်တစ်ဝိုက်တွင် လှုပ်ယမ်းနေပြီး သူ၏ ချက်ချင်းစားချင်သည့် မျှော်လင့်ချက်ကို တိတ်တဆိတ်ဖော်ပြနေသည်။ ပန်ဒါလေး၏ မျက်လုံးများသည် တောက်ပနေကာ သူ၏ ညည်းတွားသံကိုပင် မထိန်းနိုင်တော့ပေ။

ကုယွီမြန်မှာ မူလက စစ်မှန်သော အစားအသောက်အစုံအလင်ကို ပြုလုပ်လိုခဲ့သည်။ ရှီတာကီမှိုကို ကင်ပြီးသောအခါ သူက ထိုမှိုကို ငရုတ်သီး အကွင်းလေးများ၊ အမဲသားကင်တို့နှင့်အတူ ဆလတ်ရွက်ဖြင့် ထုပ်ထားသည်။ ယခုကဲ့သို့သော အချိန်မျိုးတွင် သူက ကလေးများ၏ ပူဆာမှုကို တောင့်ခံမထားနိုင်တော့ပေ။ ပထမဦးစွာ  အအေးခံရန် အသားနှစ်ပိုင်းကို ယူလိုက်သည်။ ထို့နောက် ၎င်းတို့ကို ဆော့စ်ထဲတွင်နှစ်ပြီး နှင်းကျားသစ်လေးနှင့် ပန်ဒါကလေးတို့အား အပိုင်းအစလေးများ ကျွေးသည်။ 

လေထုက ဆယ်စက္ကန့်နီးပါး ငြိမ်သက်သွားသည်။ ကုယွီမြန် အနည်းငယ် စိတ်မသက်မသာဖြစ်သွားသကဲ့သို့ ခံစားလာရသည်။

အရသာက မကောင်းဘူးလား….

သူက ထိုကဲ့သို့သာ ပုံမှန်စားနေကျ ဖြစ်သည်။ 

အဲလူတွေက ဒီအရသာကို အသားမကျကြဘူးလား… 

အချိန်အတော်ကြာပြီးနောက်။ 

အချိန်အတော်ကြာ ထုံထိုင်းနေပြီးနောက် ပန်ဒါလေးက ကုယွီမြန်၏ ရင်ခွင်ထဲတွင် တွန်းထိုးနေပြီး အံဩနေသည့် အသံလေးထွက်လာကာ နှင်းကျားသစ်လေးကလည်း ကုယွီမြန်၏ လက်ကောက်ဝတ်ကို သူ၏ ခြေသည်းတစ်ချောင်းနှင့် ဖိလိုက်ပြီး သူ့ခေါင်းကို ကုယွီမြန်၏ လက်ဖဝါးဆီသို့တိုးကာ ပွတ်သပ်နေပြီး သူ့အား နောက်တစ်ကြိမ် ထပ်ကျွေးရန် တိုက်တွန်းလိုက်သည်။

အစပိုင်းတွင် ချိုချဉ်ပြီးစပ်သော အရသာရှိသည့် ဆော့စ်ဖြင့် တို့ထားသည့် အပြင်ပိုင်းကို နူးညံ့နေအောင် ကင်ထားကာ ချိုမြပြီး အရသာသည့် ခိုဘီအမဲသား၏ အရသာကို သူတို့ ရရှိလိုက်ကြသည်။

တစ်ကြိမ်ကိုက်ပြီးနောက် တစ်ကိုယ်လုံးအပြည့် အရသာရှိပြီး အခြားပြုလုပ်သည့် နည်းလမ်းများနှင့်မတူဘဲ ကြွပ်ရွပြီး ဝါးရလွယ်ကူသည်။ 

နောက်ဆုံးရသည့် အရသာကမူ အရသာစူးခြင်း သို့မဟုတ် မွှန်ခြင်းမရှိသော ပါဝင်ပစ္စည်းများကို နှပ်ထားသည့် အရသာမျိုးဖြစ်သည်။ ချိုသော ဆိုဒါရေက သကြားမပါသော အရသာကို ထုတ်ပေးပြီး သေးငယ်သော ပူဖောင်းများက သူတို့၏ လျှာဖျားတွင် ခုန်နေကာ အရသာခံဖုများကို ထိမိစေပြီး အသား၏မျက်နှာပြင်ပေါ်ရှိအဆီ အနည်းငယ်နှင့် နူးညံ့သော အမဲသား၏ အနံ့အရသာကို ပိုမိုကောင်းမွန်စေသည်။ 

ဤကင်ထားသော အသားတွင် အလွန်ထူးခြားပြီး အစမှအဆုံးအထိ အရသာရှိစေသော ခံစားချက်မျိုး ရှိသည်။ အရသာခံရန် အချိန်အတော်လေး ယူရသည်။ လူတိုင်း အေးခဲသွားသည်မှာ မဆန်းပေ။

ထိုအချိန်တွင်ပင် မှတ်ချက်များ အရူးအမူး ပေါ်ထွက်လာသည်။

 [ဂျူနီယာ ဘီ: အားးးးးဂျပန်ရိုးရာလား…အရသာရှိလိုက်တာ ..ငါသေသွားပြီ… ဒီအသားကင်နဲ့ ဆော့စ်က လုံးဝလိုက်ဖက်တယ်၊ အဆင့်တွေက အရမ်းရိုးရှင်းတယ်...] 

[မိုင်းတွငိးထဲမှာ မိသားစုတစ်ခုရှိတယ်: ပထမတော့ နည်းနည်းချိုပြီး စပ်တယ်... ထူးဆန်းတယ် နှစ်စက္ကန့်ကြာတော့ အဆင်ပြေသေးတယ်... သုံးစက္ကန့်လဲရောက်ရော ဝှက်သယ်ဖတ်… အားးးးမသေမျိုးဟင်းချက်စကေးပဲ… မြန်မြန်လေးး ငါပိုစားမှဖြစ်မယ်… ငါ့ အိမ်နီးနားချင်းတွေကိုတောင် ခေါ်ပြီး ကျိန်စာတိုက်ချင်သွားတယ်…ငါအကြိုက်ဆုံး မြန်မြန် အတွက် မီးရှူးမီးပန်းငါးပွင့်...] 

[တိမ်လေးတစ်ခုရှိတယ်: အသားက ချိုတယ် စပ်ပြီး အဆုံးမရှိနိုင်တဲ့ အရသာနဲ့တူတယ်…အမဲသားကင်ကလည်း အရမ်းအရသာရှိပြီး အရမ်းကောင်းတယ်… မီးရှူးမီးပန်းတွေ ပို့လိုက်ပါပြီ…]

[အဖြူရောင် သစ်တော်ပန်းပွင့် လီလီ : ငါ့လျှာကို မျိုချလုနီးပါးပဲ… အရသာရှိတယ်။ အာားးးး…] 

ဖန်သားပြင်ပေါ်တွင် မရေမတွက်နိုင်သော လက်ဆောင်ပေးပို့မှုများ ပေါက်ကွဲထွက်သွားသည်။ မီးရှူးမီးပန်းများ များပြားလွန်းသဖြင့် ပလက်ဖောင်းအနှံ့ မဲဖောက်ခြင်းများစွာကို အစပြုခဲ့သည်။ သူက မိနစ်လေးဆယ်သာ ထုတ်လွှင့်ခဲ့သေးသော်လည်း ကြည့်ရှုသူ အရေအတွက်က မယုံနိုင်လောက်စရာ ငါးသန်းအထိ ရောက်ရှိခဲ့သွားကာ မူရင်းလူသစ်ပြိုင်ပွဲ၏ လူကြိုက်များမှုတွင် ပထမနေရာကိုရရှိရုံသာမက တစ်ဖက်လူများကိုလည်း နောက်ကောက်ချန်ထားနိုင်သည်မှာ အံ့ဩစရာမဟုတ်ပေ။

ကုယွီမြန်၏ တိုက်ရိုက်ထုတ်လွှင့်မှု စတူဒီယိုကလည်း ဤအခွင့်အရေးကိုယူကာ အချိန်နှင့်တစ်ပြေးညီ တိုက်ရိုက်ထုတ်လွှင့်မှု ထိပ်တန်းအဆင့်သုံးခု အတွင်းသို့ ဝင်သွားနိုင်ခဲ့ပြီး ၎င်းက ပလပ်ဖောင်း၏ အထွေထွေစာရင်းတွင် ရောက်လုနီးပါး ဖြစ်လာသည်။ ၎င်းမှာ ယေဘုယျစာရင်းတွင် ပါ၀င်ပြီးပါက လူကြိုက်များမှုမှာ အခြားလူများထံသို့ ဦးတည်သွားနိုင်မည်ဖြစ်သည်။

"ဝက်သားနဲ့ အသီးအရွက်တွေကို ကင်စားကြမယ်…" 

ကုယွီမြန်က နှင်းကျားသစ်လေး၏မျက်နှာကို လက်ဖြင့် ညှစ်လိုက်သည်။

"ကိုရီးယားရိုးရာစားနည်းကို စမ်းစားကြည့်ရအောင်…" 

ကုယွီမြန်က အဆီနှင့်အသား ညီမျှသည့် ပမာဏ ရှိသော ဝက်ဗိုက်သား၏ ပါးလွှာသောအပိုင်းများကို ရွေးချယ်ခဲ့သည်။ သူက အမဲသားကင်ရာတွင် အသုံးပြုဖူးသော အသားကင်ပန်းကန်ကို မသုံးဘဲ အသစ်တစ်ခုပြောင်းပြီး လှီးထားသော ဝက်ဗိုက်သားကို အသားကင်ပန်းကန်ပေါ်တွင် တစ်ခုပြီးတစ်ခု ချထားပြီးနောက် ဝက်သားဘေးတွင် စိန့်ဂျော့ရှ်မှို နှင့် အီနိုကီမှိုများကို စက်ဝိုင်းပုံ ဝိုင်းထားလိုက်သည်။

ဝက်ဗိုက်သားကို ကင်ရသည်မှာ ပျော်စရာကောင်းလှသည်။ ပန်ဒါလေးက တူကိုကိုင်ရန် သူ၏ခြေသည်းသေးသေးလေးကို အသုံးပြုကာ ကိုးရိုးကားရားဖြင့် ကြိုးစားခဲ့သည်။ နှင်းကျားသစ်ငယ်လေးက ပူနေသည်ကိုပင် ဂရုမစိုက်ပေ။ ကုယွီမြန်က သူ့ကို စမ်းသုံးကြည့်စေချင်သောကြောင့် သူ့လက်ထဲသို့ တူကိုပေးခဲ့သည်။

ယခုတစ်ခေါက်တွင် ကုယွီမြန်က ဆီများစွာ မထည့်ထားပေ။ "ဘာကြောင့်လဲ"ဟု ပရိသတ်က အံ့ဩနေကြသည်။ မကြာမီမှာပဲ ဝက်ဗိုက်သားကို ရွှေအိုရောင်သန်းသည်အထိ ကင်ပြီးနောက်တွင် ၎င်းက အသံထွက်လာသည်။ ပိုအံ့သြစရာကောင်းသည်မှာ ဝက်ဗိုက်သားမှ ထွက်လာသည့် ဆီ များက ဝက်သားကိုကင်၍ရပြီး ထိုဆီများက အနားတွင် ရှိသည့် စိန့်ဂျော့ရှ်မှိုများဆီသို့ စီးဆင်းသွား၍ဖြစ်သည်။ အဖြူရောင် စိန့်ဂျော့ရှ်မှိုက ဝက်ဗိုက်သားနှင့် ကပ်နေပြီး တဖြည်းဖြည်း အဝါရောင်ပြောင်းကာ မွှေးလာခဲ့သည်။ ကုယွီမြန်က အသားအပိုင်းအစများကို ဇွန်းဖြင့် ကောက်ယူပြီး အေးသွားအောင် မှုတ်လိုက်ကာ နှင်းကျားသစ်လေးကို တစ်ခုကျွေးပြီး တစ်ခုကို ထန်ယွမ်အား ကျွေးလိုက်သည်။ 

🐯🐯🐯