Chapter 51

🐯Chapter 51

ထိုသူက ပုန်ကန်တတ်သောကာလတွင်ရှိနေသည့် သာမန်ထက် အနည်းငယ်သာလွန်သော အကျင့်စရိုက်ရှိသည့် ချမ်းသာသော ဒုတိယမျိုးဆက်ဖြစ်နိုင်သည်။ ကြယ်တာရာမြို့တော်တွင် သြဇာကြီးမားသော မိသားစုများစွာရှိသောကြောင့် သူ၏နောက်ဆုံးထင်မြင်ချက်က အဓိပ္ပါယ်ရှိလာခဲ့သည်။ 

"ရပါတယ်… နောက်ဆို ကိုယ့်ကိုကိုယ် အာရုံစိုက်သင့်တယ်… အန္တရာယ်များတဲ့ အရာတွေကို မလုပ်နဲ့… သူငယ်ချင်းဖွဲ့တာကိုလည်း သတိထားပါ…"

ငယ်ရွယ်သူအများစုက သူငယ်ချင်းဆိုးများ ဖွဲ့ခြင်းကြောင့် လမ်းလွဲသွားတတ်ကြသည်။ ကုယွီမြန်က ခဏလောက်စဉ်းစားပြီး ပြောလိုက်သည်။

 "စကားမစပ် ငါ မင်းစားဖို့ တစ်ခုခု ဝယ်ပေးမယ်… ခဏ စောင့်ပေးပါဦး…" 

ရှို့ဟန်က ရုတ်​တရက်​ သူ့လက်​​ကောက်​ဝတ်​ကို ကိုင်​လိုက်​ပြီး သူ့အသားအရည်​က အလွန်အေးစက်​နေသည်​။ သူ့လက်ကိုထိလိုက်သည်နှင့် ရေခဲတုံးကို ထိမိလိုက်သလိုပင်။ သူ၏ ကျယ်ပြန့်ပြီး ရှည်လျားသောလက်က ကုယွီမြန်၏ လက်ကောက်ဝတ်တစ်ခုလုံးကို သူ၏လက်ဖဝါးနှင့် ဆုပ်ကိုင်ထားသည်။ သူက ကုယွီမြန်ကို မော့ကြည့်ပြီး "မင်း ဘယ်လို သူငယ်ချင်းဖွဲ့လဲ" ဟု မေးလိုက်သည်။ 

ကူယွီမြန် “…”

ကုယွီမြန် ခဏစဉ်းစားပြီးနောက် ဖြေလိုက်သည်။

"မင်းသူငယ်ချင်းကိုရွေးတဲ့အခါ ပိုပြီး အာရုံစိုက်သင့်တယ်၊ မှန်ကန်တဲ့သူကိုရွေးချယ်ရမယ်..."

ရှို့ဟန်က သူ့ကို သေသေချာချာစိုက်ကြည့်နေသည်။ ညနေစောင်းခါနီးတွင် ရွှေရောင်အလင်းတန်းက ရပ်ကွက်ထဲသို့ ဝင်လာပြီး ထိုလူ၏ မျက်ဆံပေါ်သို့ ကျရောက်လာသည်။ သူက ဂရုတစိုက် နားထောင်နေသကဲ့သို့ ကုယွီမြန်ကို ကြည့်နေပြီး သူ့ မျက်ခုံးကို အနည်းငယ် ပင့်တင်ကာ မျက်လုံးများကလည်း ညှို့ယူနေသည်။ 

ကုယွီမြန်၏ စကားအဆုံးတွင် နှုတ်ဆိတ်နေသော ရှို့ဟန်က နောက်ဆုံးတွင် ပြောခဲ့သည်။

"မင်း ငါ့သူငယ်ချင်း ဖြစ်ပေးနိုင်မလား…"

ကုယွီမြန်က တစ်စက္ကန့်လောက် မတုံ့ပြန်ဘဲ ဖြစ်သွားသည်။

"ဘယ်လို…"

ရှို့ဟန်က သူ့ကိုကြည့်ကာ မျက်လွှာချလိုက်ပြီး ဂရုတစိုက်နှင့် တစ်လုံးချင်း ပြန်ပြောလိုက်သည်။

"မင်းငါ့အပိုင် ဖြစ်ပေးနိုင်မလား…"

ညနေခင်း၏ လေပြေလေးက အဖြူရောင် ဖန်သားပြင်ကို တိုက်ခတ်လာပြီး ကုတင်ခေါင်းရင်းရှိ ပန်းစည်းလေးက လေထဲတွင် အနည်းငယ် ယိမ်းယိုင်သွားသည်။ 

ကုယွီမြန် အံ့ဩသွားရသည်။ 

"..." 

မေးခွန်းက ငါက သူ့သူငယ်ချင်းဖြစ်နိုင်ပါ့မလား မဟုတ်ဘူးလား… ဘာလို့ သူက 'သူငယ်ချင်း' ဆိုတဲ့ စကားလုံးကို ချန်ထားခဲ့ရတာလဲ…

ထိုစကားက အလွန်ထူးဆန်းနေသည်။

"ဟုတ်ပါပြီ… ငါမင်းရဲ့သူငယ်ချင်း ဖြစ်ပေးနိုင်တယ်…" 

ကုယွီမြန် ပြုံးလိုက်သည်။

"ကောင်းပြီ ဒါဆို မင်းစားဖို့ တစ်ခုခုသွား ဝယ်လိုက်မယ်…" 

ရှို့ဟန်က ကျေနပ်နေပုံမပေါ်ပေ။ သူက ကုယွီမြန်ကို ခဏလောက်ကြည့်ရင်း နှုတ်ခမ်းကို အနည်းငယ်ဖိထားလိုက်ကာ ခေါင်းညိတ်လိုက်သည်။

ကုယွီမြန် အဆောင်ထဲမှ ထွက်လာသော်လည်း သူ့စိတ်ထဲတွင် သံသယများ ရှိနေသည်။ နှင်းကျားသစ်လေးနှင့် ထန်ယွမ်လေးတို့ ဘာလုပ်နေသည်ကိုကြည့်ရန် အိမ်ရှိ စောင့်ကြည့်ရေးစနစ်ကို သူဖွင့်ခဲ့သည်။ နှင်းကျားသစ်လေးက ကုယွီမြန်၏ခေါင်းအုံးပေါ်တွင် ပုံမှန်အတိုင်း အိပ်စက်နေချိန်တွင် ပန်ဒါလေးကမူ အိမ်ထဲတွင် ပုလင်းတစ်လုံးကို ကိုင်ထားသော စက်ရုပ်လေးနှင့်အတူ ဆော့ကစားနေပြီး တံခါးကို ရံဖန်ရံခါ ကြည့်နေသည်။ 

ကုယွီမြန်၏ နှလုံးသားလည်း တည်ငြိမ်သွားသည်။ အဆင့်မြင့်ဂြိုလ်၏ ဆေးဘက်ဆိုင်ရာ ကုသမှုများကြောင့် ကုသမှုခန်းအတွင်း တစ်နာရီ သို့မဟုတ် နှစ်နာရီကြာ အိပ်ပြီးနောက် ပြင်းထန်သော လက္ခဏာများ ပျောက်ကင်းသွားသည်။ နောက်ဆုံးတွင် ကုယွီမြန်လည်း ခြောက်နာရီမထိုးခင် အိမ်ပြန်ရောက်သွားသည်။ တစ်ချိန်တည်းမှာပင် သူ့လက်ထဲတွင် ရှို့ဟန် ပေးထားသည့် နောက်ထပ်အရာတစ်ခုရှိနေသည်။ ယနေ့ လာရောက်ကူညီပေးခဲ့သည့်အတွက် ကျေးဇူးတင်ကြောင်းလည်း ရှို့ဟန်က ပြောကြားခဲ့သေးသည်။ 

ကုယွီမြန်က ထိုပစ္စည်းကိုကြည့်ကာ တန်ဖိုးအလွန်မများဟု ခံစားမိလိုက်သောကြောင့် ယူလာခဲ့သည်။ ခြောက်နာရီထိုးခါနီးတွင် ကုယွီမြန် အိမ်ပြန်ရောက်လာသည်။ 

"အမ်… "

ရေချိုးခန်းထဲတွင် ရပ်နေပြီး ရှို့ဟန်ပေးသည့် ပစ္စည်းကို ကိုင်ကာ မှန်ထဲသို့ လက်ပြရင်း ကုယွီမြန်က မေးလိုက်သည်။

"ထွမ်ထွမ် ဒါက ဘာလို့ထင်လဲ…"

နှင်းကျားသစ်ငယ်လေးက သူ့ပခုံးပေါ်တွင် လှဲလျောင်းနေပြီး အိပ်ချင်မူးတူးနှင့် မျက်ခွံများကို မော့ကာ မှန်ကိုကြည့်လိုက်သည်။ ပန်ဒါလေးက ဖြည်းညှင်းစွာ လှုပ်ရှားဝင်ရောက်လာကာ ကုယွီမြန်၏ ခြေသလုံးသားလေးကို ပွေ့ဖက်ပြီး သူ့ကို ချီပေးရန် အသံလေးများ ပြုနေသည်။ 

ကုယွီမြန်က ထွားကြိုင်းသော ပန်ဒါဝက်ဝံကလေးကို လျင်မြန်စွာ ကောက်ယူပြီး သူ့ခေါင်းကိုတို့ကာ အခန်းတိုင်းတွင်ပြင်ဆင်ထားသော ပုခက်ထဲတွင်ထည့်ကာ မှန်ထဲသို့ ဆက်ကြည့်နေသည်။

 "တက်တူးစတစ်ကာနဲ့တူတယ်… ဒါက အခုခေတ်စားနေတာနဲ့ နည်းနည်းကွာနေတယ်…"

ရှို့ဟန် သူ့ကို ပေးခဲ့သည့်အရာက ဖောက်ထွင်းမြင်ရပြီး မာကျောသော ပစ္စည်းတစ်ခုပင်။ ကုယွီမြန်  အတိတ်အကြောင်းကို ပြန်တွေးနေမိသည်။ 

ယောက်ျားလေးတစ်ယောက်နဲ့တစ်ယောက် သူငယ်ချင်းဖွဲ့တဲ့ ပုန်ကန်တာနဲ့တူတဲ့ ဖြစ်စဉ်က ဘာများလဲ...

ရေးထွင်းထားသည့် ပုံစံက အလွန်လှသည်။ထိုပုံသဏ္ဍာန်က နှင်းဆီနှင့် ဓားဖြစ်ပြီး၊ ရှုပ်ထွေးမှု၊ မြင့်မြတ်မှုနှင့် မောက်မာမှုဟူသည့် ခံစားချက်တို့ကို ပေးစွမ်းနိုင်သည်။ 

နှင်းကျားသစ်လေး “…” 

တက်တူးစတစ်ကာတဲ့လား… 

ပန်ဒါလေးက ကုယွီမြန်၏ လက်ကို ကိုင်ထားပြီး ရုပ်ရှင်ကိုသာ ထူးထူးခြားခြား ကြည့်နေခဲ့သည်။ နှင်းကျားသစ်လေးကမူ အိပ်ပျော်ခါနီးဖြစ်နေသည်။ သို့သော် ထိုအချိန်တွင်မူ သူ့မျက်လုံးကို ဖွင့်လိုက်ပြီး ကုယွီမြန်၏ပခုံးပေါ် တွင် လေးလေးနက်နက် ထိုင်ချလိုက်ကာ သူ့ခြေသည်းများကို ထုတ်လိုက်ပြီး မကျေနပ်မှုများကို ဖော်ပြရန် ကုယွီမြန်၏ ခေါင်းကို တွန်းလိုက်သည်။ 

ဧကရာဇ်တိုင်းတွင် သူတစ်ပါးအား မပေးခဲ့ဖူးသော ကိုယ်ပိုင်တံဆိပ်များရှိကာ သူဧကရာဇ်ဖြစ်သည့်အခါတွင်လည်း သူ့တံဆိပ်ကို ရခဲ့ပြီး ထိုအရာက သူ့တစ်သက်တွင် တစ်ကြိမ်သာ ရှိသည်။ ထိုအရာက ဖန်းနစ်ခ် သူ့ကို နောက်ဆုံးအချိန်က သတိပေးခဲ့သည့်အရာပင်ဖြစ်သည်။

ဒါကို ကုယွီမြန်က တက်တူးလို့ ပြောလိုက်တာလား… ဘယ်လောက်တောင် အဓိပ္ပါယ်မဲ့လိုက်လဲ…

ကုယွီမြန်ကမူ ပိုကြည့်လေ၊ တက်တူးစတစ်ကာဟု ပိုပြီး ခံစားရလေလေဖြစ်သည်။ အခြားဖြစ်နိုင်ခြေကို သူ မစဉ်းစားနိုင်တော့ပေ။ အင်တာနက်ရှာဖွေမှုတွင်လည်း သက်ဆိုင်ရာအချက်အလက်များကို ရှာမတွေ့ခဲ့ပေ။

"ဒါက တက်တူးစတစ်ကာဆိုတော့ ဘယ်နေရာမှာမဆို ကပ်လို့ရမှာပေါ့… သိပ်ပြီးတော့ သိသာတာမျိုးတော့ မဖြစ်သင့်ဘူး… ငါက အသက်ကြီးနေပြီလေ… ဘယ်မှာ ကပ်သင့်တယ်ထင်လဲ…"

ကုယွီမြန်က ပြောလိုက်သည်။

သူ့လက်ညိုးကို ထိုပုံစံပေါ်သို့ ကုတ်လိုက်သည်။ နောက်တစ်စက္ကန့်တွင်၊ ဖောက်ထွင်းမြင်ရသောပုံစံမှ လွင့်ထွက်လာသည့် ပုံစံပေါ်တွင် အပြာရောင်အလင်းတန်းတစ်ခု ပေါ်လာသည်။ 

ကုယွီမြန်နှင့်ပန်ဒါလေး "..."

ဒါက အဆင့်မြင့် ဖန်တမ်(မြင်ရပြီးထိ၍မရသည့်)ပြကွက်တစ်ခု ဖြစ်နေတာလား… တက်တူးစတစ်ကာက ဘာလို့များ ဒီလောက်အထိ ရှုပ်ထွေးနေရတာလဲ…

လူတစ်​​ယောက်​နှင့်​ ပန်​ဒါတစ်​​ကောင်က 'တက်​တူးစတစ်​ကာ'ကို ကြောင်​စီစီဖြင့် ​တစ်ပြိုင်တည်း ကြည့်​​နေသည်​။

နှင်းကျားသစ်လေးက ကုယွီမြန်ကို ကြည့်ကာ လေထဲမှ ပုံစံကိုဖိရန် လက်သည်းများကို ဆန့်လိုက်သည်။ ကုယွီမြန်က သူလဲကျသွားမည်ကို ကြောက်ပြီး သူ့ကို ပွေ့ဖက်လိုက်သည်။

နှင်းကျားသစ်က ထိုပုံစံကို အမှန်တကယ်တွန်းလိုက်မိလိမ့်မည်ဟု သူ မထင်ခဲ့သော်လည်း ခြေသည်းလေးကမူ ရုတ်တရက် ဘေးဘက်ကို လှည့်သွားသည်။ ထိုပုံစံက ကုယွီမြန်၏ ညှပ်ရိုးပေါ်တွင် နေရာကျသွားသည်။

( မြန်မြန်က ဒါကို တံဆိပ်မှန်းမသိသေးတာမို့ ပုံစံလို့ပဲ ရေးလိုက်တာပါ )

နှင်းကျားသစ်လေး "..." 

ကုယွီမြန် “…..”

ရှုပ်ထွေးသောပုံစံများဖြင့် နှင်းဆီနှင့် ဓားတို့က နီညိုရောင်ပြောင်းသွားသည်။ ကုယွီမြန်၏ အရေပြားက ဖြူဖွေးနေပြီး အပြာရောင်သွေးကြောများ ရှိနေသည်။ သူ၏ ညှပ်ရိုးက ကြည်လင်ပြီး လှပသောကြောင့် နားမလည်နိုင်သော အရောင်၊ အငွေ့အသက် နှင့် အလှတစ်မျိုးရှိနေသည်။ ကုယွီမြန်မှာ သူ့ညှပ်ရိုးက အနည်းငယ်ပူနေပြီး သွေးကြောထဲကို သိမ်မွေ့သည့်အရာတစ်ခု ထိုးသွင်းခံလိုက်ရပြီး ဦးနှောက်အထိ ပျံ့နှံ့သွားသလို ခံစားလိုက်ရ​သော်လည်း ထိုခံစားချက်က အလွန်သန်မာခြင်းမရှိသောကြောင့်များများစားစား တွေးတောမနေတော့ပေ။

နှင်းကျားသစ်လေးက ၎င်းကိုကြည့်ကာ ရုတ်တရက် မျက်လွှာချလိုက်ပြီး သူ့နားရွက်ဖျားများပင် အနည်းငယ် ပူလာသည်။ ကုယွီမြန်က ကျားသစ်ပေါက်လေးကို အချိန်အတော်ကြာကြည့်ပြီး ကျေနပ်စွာ ခေါင်းညိတ်လိုက်သည်။

 "အဆင်ပြေပါတယ်…" 

ထိုအရာက အနည်းငယ်ပင် ဆွဲဆောင်မှုရှိသွားစေသည်။ 

သူ့အင်္ကျီကော်လံကို ဆွဲယူကာ ပုံစံကို ဖုံးလိုက်ပြီး စိတ်မကောင်းဖြစ်နေပုံရသည့် နှင်းကျားသစ်လေးကို ပွေ့ဖက်ကာပျော်ရွှင်နေသော ပန်ဒါလေးကိုလည်း ပွေ့ဖက်၍ ရေချိုးခန်းထဲမှ ထွက်လာခဲ့သည်။ 

ည ခုနှစ်နာရီ ထိုးနေပြီဖြစ်သည်။

ကုယွီမြန်က တိုက်ရိုက်ထုတ်လွှင့်မှုမပြုလုပ်မီ စာသားမက်ဆေ့ချ်တစ်စောင် ကို လက်ခံရရှိခဲ့သည်။

[မင်္ဂလာပါ၊ 4365 နံပါတ်ပါသော အကောင့်က 'အဲလ်ဘတ် စားသောက်ဆိုင်' ၏ ပိုင်ဆိုင်ခွင့်ကို ခြွင်းချက်မရှိ သင့်ထံ လွှဲပြောင်းရန် ရွေးချယ်ထားပါသည်။ ကျေးဇူးပြု၍ လွှဲပြောင်းမှုကို လက်ခံပါသလား။] 

ကုယွီမြန် အဆုံးထိ မဖတ်ရသေးမီမှာပင် ပိတ်ချလိုက်သည်။ 

ဒါက လိမ်လည်တဲ့ မက်ဆေ့ချ်တစ်ခုပဲ မလား… အကြောင်းပြချက်မရှိဘဲ စျေးကွက်တန်ဖိုး သန်း ၁၀၀ ကျော်ရှိတဲ့ စားသောက်ဆိုင်ကို ဘယ်သူက ပေးမှာလဲ…

သူက တိုက်ရိုက်ထုတ်လွှင့်မှု စတင်ရန်နှင့် ချက်ပြုတ်ရန် အလျင်လိုနေသောကြောင့် ထိုအကြောင်းကို မစဉ်းစားတော့ပေ။

 "လူသစ်ပြိုင်ပွဲ ပထမအကျော့ပြီးဖို့က ဘယ်လောက်ကြာဦးမှာလဲ…ကြာလွန်းတယ်…"

ကုယွီမြန်က ရက်သတ္တပတ် လေးပတ်ကြာသည့် လုပ်ငန်းစဉ်အကြောင်း တွေးနေမိသည်။ 

သူက တိုက်ရိုက်ထုတ်လွှင့်ရန်အတွက် အဆင်သင့်ဖြစ်နေပြီ ဖြစ်သည်။ သူက အိမ်တွင် ကလေးလေးများကို ချီထားပြီး ထုတ်လွှင့်မှုမတိုင်မှီ သူ့ကွန်ပြူတာနောက်ခံကို ကြည့်လိုက်သည်။ အွန်လိုင်းတက်ပြီးသည်နှင့် တရားဝင်စာတိုတစ်စောင်ကို လက်ခံရရှိမည်ဟု သူ မမျှော်လင့်ထားခဲ့ပေ။

[ကြယ်တာရာကောင်းကင် လူသစ်ပြိုင်ပွဲ အဖွဲ့အစည်းV- မစ္စတာကုယွီမြန် မင်းဘယ်လိုများလုပ်တာလဲ… လူသစ်ပြိုင်ပွဲ ပထမအချီမှာ မင်းရဲ့စွမ်းဆောင်ရည်က အရမ်းကောင်းတာကြောင့် ပလပ်ဖောင်းရဲ့ လူကြိုက်များမှု စာရင်းထိပ်တန်း 10 ယောက်ထဲကို ဝင်သွားတယ်... ဒါ့ကြောင့် နောက်တစ်ဆင့်ကို တိုက်ရိုက်​ဝင်နိုင်မယ့် အဆင့်အရေးကို ပေးပါမယ်​…] 

ကုယွီမြန် ရှိနေခြင်းကြောင့် ပြိုင်ပွဲ၏ ချိန်ခွင်လျှာကို အကြီးအကျယ် ထိခိုက်ခဲ့သည်။ ဒုတိယနေရာမှလူက သူ့ကျော်ကြားမှုကို မြှင့်တင်ရန် အမျိုးမျိုးသောနည်းများဖြင့် လက်ဆောင်များ မဲဖောက်ပေးရန် ကြိုးစားခဲ့သော်လည်း နေ့လယ်တွင် ကုယွီမြန်၏ တိုက်ရိုက်ထုတ်လွှင့်မှု ရုတ်တရက်ထွက်ပေါ်လာပြီးနောက် ကွာဟချက်အား ထပ်မံကျယ်ပြန့်သွားစေသည်။ ထိုသည်ကပင် အခြားတင်ဆက်သူများ၏ စိတ်အားထက်သန်မှုကို ထိုးနှက်ချက်ဖြစ်စေပြီး ဒုတိယနေရာမှ တင်ဆက်သူ ရူးသွပ်သွားသည်ကို တွေ့လိုက်ရသဖြင့် အခြားသူများ အားလျော့သွားကြသည်။ 

သူတို့လည်း ဆွေးနွေးပြီးနောက်တွင် သူ့အား တိုက်ရိုက်ပင် အဆင့်တိုးပေးရန် နည်းလမ်းတစ်ခု ထွက်လာခဲ့သည်။

 ကုယွီမြန် " ...... " 

သို့သော်လည်း တိုက်ရိုက် အဆင့်မြှင့်တင်ပေးသည့် အခြေအနေများကို ရရှိရန် မလွယ်ကူလှပေ။ ကုယွီမြန်မှာ သူ၏ပထမဆုံးထုတ်လွှင့်မှုနှစ်ခုက ကံကောင်းခြင်းအပေါ်အခြေခံသည်ဟု ခံစားမိသည်။ ယနေ့တွင် သူ၏ အကြီးအကျယ် ရေပန်းစားလာမှုကို ကြည့်ပြီး အံ့အားသင့်သွားသည်။ ယနေ့ နေ့လည်တွင် သူက တစ်နာရီကျော်ခန့်သာ တိုက်ရိုက်ထုတ်လွှင့်မှုလုပ်ခဲ့သည်။

အဲ့ဒီအချိန်က ဒေတာတွေ အများကြီးလည်း မတွေ့ခဲ့ရပါဘူး... ဘာလို့ ဒီလောက်မြင့်နေတာလဲ…

အွန်လိုင်းပေါ်ရှိ ပျမ်းမျှလူဦးရေက ငါးသန်းဖြစ်ပြီး၊ ဆိုလိုသည်မှာ တစ်နေ့တာကုန်ဆုံးချိန်တွင် ကြည့်ရှူသူအရေအတွက်က 4သန်းအထိ တိုးလာမည်ဖြစ်သည်။ 

ကြည့်ရှုသူ ဆယ်သန်းကျော်ဖြစ်လာရန်အတွက်ကမူ တင်ဆက်သူတိုင်းအတွက် ပြဿနာတစ်ခုပင် ဖြစ်သည်။ 

ယမန်နေ့က တိုက်ရိုက်ထုတ်လွှင့်မှုအဆုံးတွင် ကုယွီမြန်က အတားအဆီးသန်းပေါင်းများစွာကို ကျော်ဖြတ်ခဲ့ပြီး တစ်နေ့တာ၏ ထိပ်တန်းဆယ်ယောက်ထဲသို့ ဝင်ရောက်ခဲ့သော်လည်း ထိုအရာက သူ့ထုတ်လွှင့်မှုစတင်ပြီးနောက် သုံးလေးနာရီအကြာတွင်မှ ဖြစ်လာခြင်းဖြစ်သည်။ ပထမ တစ်နာရီ အတွင်းတွင်မူ ယခုလောက် ဒရမ်မာဆန်မနေခဲ့ပေ။

ကြယ်တာရာမြို့တော် ၏ ကြောက်မက်ဖွယ်ကောင်းလောက်သည့် (ကြယ်ကွန်ရက်ပေါ်ရှိ)အသွားအလာများကြောင့် ကုယွီမြန်လည်း အံ့ဩမနေတော့ပေ။

ညခုနှစ်နာရီထိုးသောအခါ ကုယွီမြန် တိုက်ရိုက်ထုတ်လွှင့်မှုစတင်ရန် အဆင်သင့်ဖြစ်နေပြီ ဖြစ်သည်။

“အားလုံးပဲ မင်္ဂလာပါ... ကျွန်တော်ကတော့ တင်ဆက်သူ ကုယွီမြန်ပါ…”

ထုတ်လွှင့်မှုစတင်သည်နှင့်တစ်ပြိုင်နက်၊ မှတ်ချက်များ အများအပြားရောက်ရှိလာသည်။ နေ့လယ်က တိုက်ရိုက်ထုတ်လွှင့်မှုမှာ တစ်နာရီသာ ကြာမြင့်ခဲ့သောကြောင့် လူအများက စိတ်ခံစားချက် ပြင်းထန်နေဆဲဖြစ်ပြီး ညနေ ၅ နာရီ(သို့မဟုတ်)၆နာရီတွင် တိုက်ရိုက်ထုတ်လွှင့်မှုပြုလုပ်ပေးရန် ဝပ်တွားခယနေကြသည်။

[မနေ့က ကြည်လင်နေသော ကောင်းကင်: ဒီနေ့ ကွန်ပေါင်ကြက်သားနဲ့ ကြည်လင်နေတဲ့ ပုဇွန်ဖက်ထုပ်က တစ်ချက်ကြည့်လိုက်ရုံနဲ့ ငါ တကယ်ကို အံ့သြသွားတယ်... ငါ နည်းနည်းပဲ မြည်းလိုက်ရလို့ နောက်တစ်ခါ ထပ်လုပ်ပေးဖို့ ပြင်းပြင်းထန်ထန် တောင်းဆိုပါတယ်…] 

[မိုင်းတွင်းထဲမှာ မိသားစုတစ်စုရှိတယ်: တစ်နေ့ကို နှစ်ကြိမ်တောင် ကြည့်ရတာ ငါအရမ်းပျော်တယ်…မြန်မြန်သာ တစ်နေ့ နှစ်ကြိမ်လောက် တိုက်ရိုက်ထုတ်လွှင့်နိုင်ရင် ကောင်းမယ်… ]

ဤတစ်ကြိမ်တွင်၊ ခါတိုင်းကဲ့သို့ပင် သူတို့က ပန်ဒါလေး၏ ရှုထောင့်မှကြည့်နေပြီး ကုယွီမြန်က ကိုယ်ရေးကိုယ်တာကာကွယ်မှုဆက်တင်များကိုလည်း ထည့်သွင်းထားသည်။ ကုယွီမြန်က လျင်မြန်စွာ မြင့်တက်နေသော လူအရေအတွက်နှင့် မှတ်ချက်များကိုကြည့်ကာ အလွန်ကျေးဇူးတင်နေသည်။ သူ့နှုတ်ခမ်းကို ကွေးကာ ပြုံးလိုက်သည်။

"ကျွန်တော်တို့ ဒီနေ့ နေ့လည်က အပြင်ထွက်လည်တာ... ကျွန်တော်လည်း ပြန်ရောက်လာတာ နောက်ကျတယ်... ကလေးတွေ ဗိုက်မဆာအောင် ဒီည တစ်ခုခု ချက်ပေးမလို့ သိပ်မကြာခင်ပဲ စားလို့ ရပါပြီ… အဲဒါကို ကိုရီးယား အသားကင်လို့ခေါ်တယ်… ပြီးရင် ထွမ်ထွမ်နဲ့ ယွမ်ယွမ်အတွက် အချိုပွဲ လုပ်ပါမယ်…" 

ကုယွီမြန်က ယွမ်ယွမ် ကို နို့အနည်းငယ်တိုက်ခဲ့သည်။ ထိုအချိန်တွင် ထွားကြိုင်းသောပန်ဒါလေးက ကုယွီမြန်၏ ဒူးပေါ်တွင် လှဲလျောင်းနေပြီး သူ၏ နှင်းကဲ့သို့ ဖြူဖွေးနေသော ဝမ်းဗိုက်ကိုထိကာ ပါးစပ်ထောင့်တွင် ပေနေသည့် နို့များကို ပြန်သပ်လိုက်ပြီး ကျေနပ်စွာ အော်ဟစ်နေသည်။ 

နှင်းကျားသစ်လေးက ထန်ယွမ်လေး၏ ဦးခေါင်းကို တွန်းထုတ်လိုက်ပြီး အစားအသောက်များ ထည့်ထားသည့်ဘူးကို ယူလာသော ကုယွီမြန်အား မကူညီမီ ပျင်းရိစွာ မေးစေ့ကို မြှောက်လိုက်သည်။ သူ့မျက်လုံးထဲတွင် ဤအရာက သူ အိမ်ထောင်ဦးစီးဖြစ်ကြောင်းကို ပြသနေသည်။ 

ကုယွီမြန်က ကလေးနှစ်ယောက်၏ ဦးခေါင်းလေးများကို တစ်ယောက်ပြီးတစ်ယောက် ပွတ်ပေးလိုက်ပြီး သူ့နှလုံးသားလေးပင် အရည်ပျော်သွားသည်။ 

"ကဲ စကားမ​ပြောဘဲ စလိုက်ကြ​ရ​အောင်​…" 

သူတို့အားလုံး သစ်သားကြမ်းပြင်ပေါ်တွင် ကူရှင်ပျော့လေးများဖြင့် ထိုင်နိုင်စေရန် ကုယွီမြန်က အသားကင်ပန်းကန်များ၊ ခရီးဆောင်မီးဖိုနှင့် စားပွဲလေးတို့ကို နေပူဆာလှုံခန်းဆီသို့ ရွှေ့လိုက်သည်။

သစ်သားကြမ်းပြင်ပေါ်တွင် အစားအစာကုန်ကြမ်း အမျိုးအစားများစွာ ရှိနေသည်ကို ပရိသတ်က မြင်နိုင်သည်။ အဆီနည်းနည်းသာ ပါသည့် ဝက်ဗိုက်သားတု ၊ ခိုဘီအမဲသားတု၊ ပန်းကန်အသေးလေး တစ်လုံးနှင့် ပုစွန်များ၊ ဟင်းရွက်မှို၊ အပ်မှို၊ ကြက်သွန်နီ၊ ဂျင်း၊ ကြက်သွန်ဖြူ၊ သခွားသီး တို့အပြင် ပေါင်မုန့်ချပ်များနှင့် အဖြူရောင်၊ ကောက်ညှင်းများတို့ဖြစ်သည်။

🐯🐯🐯