Chapter 50

🐯Chapter 50

ကုယွီမြန်က ထိုအချိန်လေးတွင် ပျော်ရွှင်မှုကို ခံစားခဲ့ရသည်။ 

၎င်းက အားလပ်ရက်ကို ကုန်ဆုံးရန်နည်းလမ်းပင် ဖြစ်သည်။ မိသားစုအတူတူ စားသောက်ဆိုင်ကို သွားပြီး လမ်းလျှောက်ကာ လျှောက်လည်ကြမည်။ အစားအသောက်များ ကုန်သွားခြင်းကပင် အလှတရားတစ်ခုဖြစ်သည်။ ကုယွီမြန်က နှင်းကျားသစ်လေးနှင့် ပန်ဒါလေးတို့ ဆော့ကစားနိုင်ရန် မည်သည့်နေရာသို့ ခေါ်သွားရမည်ဟု စဉ်းစားနေစဉ်မှာပင် ရုတ်တရက် သူ့ လက်ပတ်ကွန်ပြူတာသို့ စာဝင်လာသည်။

 [ရှို့ဟန် : ကိုယ့်ကို တစ်ခု လုပ်ပေးနိုင်မလား…] 

ကုယွီမြန်  "...."

ကုယွီမြန်က နှင်းကျားသစ်လေးအား ကြယ်တာရာကောင်းကင်အဆောက်အဦးသို့ ပို့ဆောင်ထားစဉ်က မစ္စတာရှို့၏ ကြယ်ကွန်ရက် ဆက်သွယ်ရေးအကောင့်ကို ပြီးခဲ့သည့် အကြိမ်က သိမ်းထားခဲ့ခြင်းဖြစ်သော်လည်း ယခုအကြိမ်က ပထမဆုံးအကြိမ်အဖြစ် ဆက်သွယ်လာခြင်းဖြစ်သည်။

ထန်ယွမ်လေးက သူ့လက်သည်းနှစ်ချောင်းထဲရှိ ကြည်လင်သောပုဇွန်ဖက်ထုပ်ကို ကိုက်ဝါးနေသည်။ သူက ကုယွီမြန်ကို စောင်းကြည့်လိုက်သည်။ နှင်းကျားသစ်လေးက သူ့ပခုံးပေါ်တွင် ပျင်းရိစွာ လှဲလျောင်းနေပြီး မှိန်းနေသည်။ 

တစ်ဖက်မှ စာတိုပေးပို့သောကြောင့် ဖုန်းခေါ်ဆိုရန် သို့မဟုတ် ဗီဒီယိုခေါ်ဆိုရန် အဆင်မပြေဟုသာ သူထင်ခဲ့သည်။ ကုယွီမြန်လည်း ထိုသို့ စဉ်းစားပြီးနောက် ပြန်ပြောလိုက်သည်။

[ကုယွီမြန် : တစ်ဆိတ်လောက် ဘာများဖြစ်လို့လဲ မသိဘူး…] 

ရှို့ဟန်က အဘယ်ကြောင့် သူ့ကို အကူအညီတောင်းရန်ရွေးချယ်ခဲ့သည်ကိုတွေးလျက် ရှုပ်ထွေးနေမိသော်လည်း သူက အခြားသူတစ်ဦးကိုလည်း ကောင်းစွာသိပုံမပေါ်ပေ။ သို့သော်လည်း ရှို့ဟန်က သူ့ကို နှစ်ကြိမ်ကူညီခဲ့ဖူးသည်။ သူ၏မေတ္တာနှင့် အကြောင်းပြချက်များကြောင့် ကုယွီမြန်လည်း သူလိုအပ်နေသောအချိန်တွင် သူ့ကို ကူညီချင်ခဲ့သည်။ 

တစ်မိနစ်ခွဲအကြာတွင် ပြန်ဖြေသည့်စာ ရောက်လာသည်။

 [ဧရိယာစီရဲ့ မြောက်ဘက် လက်ဝါးကပ်တိုင်အောက် ၊ အရေးပေါ်…] 

ကုယွီမြန် “…….”

ကောင်းပြီလေ ကြည့်ရတာတော့ အဲဒါက စကားပြောရမဲ့ ကိစ္စလို့ ထင်ရတာပါပဲ…

သို့သော်လည်း သူက ဧရိယာ D တွင် နေသည့်အတွက် ဧရိယာ Aက ဝေးလွန်းသည်။ အခုချိန်ဥ ဧရိယာ A မှာ စားသောက်နေခြငိးဖြစ်ပြီး ဧရိယာ D နှင့်ဧရိယာ A က တစ်ခုနှင့်တစ်ခု အနီးဆုံးဖြစ်ကာ ၎င်းတို့ကို ဧရိယာ C မှ ဧရိယာ B ဖြင့် ပိုင်းခြားထားပြီး၊ အောက်ပိုင်းမြို့ပြခရိုင်၏ ထက်ဝက်နီးပါးရှိသည်။

(ပြောချင်တာက Aနဲ့D က ကပ်နေပြီး Bနဲ့C ကလဲ ကပ်နေတာမျိုးပါ )

ထို့အပြင် သူ့တွင် နောက်ထပ်ပြဿနာတစ်ခုရှိနေသေးသည်။

[ကုယွီမြန် : အန္တရာယ်ရှိလား…]

ကလေးများကို ခေါ်သွားရမည်လား၊ထားခဲ့ရမည်လားဆိုသည်ကို သူ ဆုံးဖြတ်ရဦးပေမည်။

သူက နှင်းကျားသစ်လေးနှင့် ပန်ဒါလေးတို့ကို အိမ်တွင် အကြာကြီး မထားခဲ့ချင်ပေ။ လုံခြုံရေးစနစ်ရှိသော်လည်း ကုယွီမြန်က ၎င်း၏ လုပ်ဆောင်ချက်ကို စိတ်မချပေ။ တာယာကို ပြင်ပြီး ပိုက်ဆံချေးသလိုကိစ္စမျိုး ဆိုရင်တော့ ကလေးတွေကို သူနဲ့အတူ ခေါ်သွားရန် အဆင်ပြေသော်လည်း ထိုအရာက ဧရိယာ C ကိုသွားရခြင်းဖြစ်နေသည်။ 

သို့သော်လည်း တစ်ဖက်လူ၏တုံ့ပြန်မှုက ကုယွီမြန် မျှော်လင့်ထားသည်နှင့် တူမနေခဲ့ပေ။ 

[ရှို့ဟန် : အန္တရာယ်ရှိတယ်...]

ကုယွီမြန်၏ ဦးနှောက်ထဲတွင် မက်တာဒေါလူ့အဖွဲ့အစည်းရှိ တိုက်ခိုက်နေသော လူငယ်များစွာ၏ မြင်ကွင်းများနှင့် ပြည်သွားသည်။ ရှို့ဟန် ၏ စိတ်နေစိတ်ထားနှင့် လိုက်လျောညီထွေဖြစ်နေသော ထိုပုံရိပ်ကို ဦးနှောက်ထဲမှ ဖယ်ရှားရန် သူ ခက်ခက်ခဲခဲ ကြိုးစားခဲ့ရသည်။ အန္တရာယ်ရှိသည်ဆိုကတည်းက ကလေးများကို အိမ်ပြန်ပို့ပြီး ဆုံးဖြတ်ချက်အမြန်ချရန် ကြိုးစားသည်က ပိုကောင်းသည်။

တစ်နာရီခွဲခန့်အကြာတွင်…

ကုယွီမြန်သည် နှင်းကျားသစ်လေးနှင့် ပန်ဒါလေးတို့ကို အိမ်သို့ ဦးစွာစေလွှတ်ကာ လုံခြုံရေးစနစ်ကိုဖွင့်ပြီးနောက် လေပေါ်ဝဲကိရိယာကိုယူကာ ဧရိယာ C သို့ သွားခဲ့သည်။ယနေ့တွင် သူက ကြယ်တာရာခေတ်၏ ယာဉ်ကြောပိတ်ဆို့မှုကို ပထမဆုံးအကြိမ်တွေ့ဖူးခြင်းဖြစ်သည်။ အားလပ်ရက် ခရီးသွားကြခြင်းများကြောင့် အများသူငှာ လေပေါ်ဝဲကိရိယာများကို ကန့်သတ်ထားသည့် ဧရိယာC က သာမာန်လူတန်းစားများ၏ မြို့ပြနယ်မြေတွင် တွင် အချမ်းသာဆုံးသော ဧရိယာလည်း ဖြစ်သည်။ 

မိနစ်နှစ်ဆယ်အကြာတွင် သူရောက်လောက်မည်ဟု ယူဆခဲ့သော်လည်း တစ်နာရီခန့်ကြာသွားသည်။ သို့သော်လည်း လေပေါ်ဝဲကိရိယာပေါ်တွင် ထိုင်နေရသည်က တော်သေးသည်။ သူက သတင်းဆော့ဖ်ဝဲကိုဖွင့်ပြီး သတင်းများကို စတင်ကြည့်ရှုခဲ့သည်။ ဤသည်ကပင် သူ့အား ယနေ့ခေတ်၏ အချက်အလက်များကို သိရှိစေနိုင်မည့် နည်းလမ်းတစ်ခုပင်။

[နာမည်ကြီးကြယ်ပွင့်ဟာ အိပ်ရာထဲမှာ အပြင်းဖျားနေတာ ဘာကြောင့်လဲ...]

၎င်းက ကောအာရှစ်စစ်၏ အကြောင်းပင်။ကုယွီမြန် ထိုအကြောင်းအား သိသည်။ ဤခေါင်းစဉ်က UC သတင်းဌာန၏ ပုံစံပင်ဖြစ်သည်။ 

[သဘာဝအစားအစာများ ဈေးတက်မည်။] 

[အတွင်းရေးမှူးချုပ်၏ ကြေညာချက်အရ ဧကရာဇ်မင်းမြတ်က နောင်ဆယ်စုနှစ်များအတွင်း ဖွံ့ဖြိုးတိုးတက်မှုကို စောင့်ကြည့်ရန် အထက်တန်းလွှာမြို့ပြခရိုင်တွင် သုံးလကြာ နေထိုင်မည်ဖြစ်သည်။] 

ဧကရာဇ်က အထက်တန်းလွှာ မြို့ပြခရိုင်မှာတဲ့လား…

ကုယွီမြန်က ဤဖွဲ့စည်းပုံ အခြေခံဥပဒေဆိုင်ရာ ဘုရင်စနစ်တွင် ကြာရှည်စွာ နေထိုင်ခဲ့သော်လည်း ၎င်း၏ ထိပ်တန်းဖွဲ့စည်းပုံအကြောင်း အနည်းငယ်မျှပင် မသိသေးကြောင်း သူ သတိရမိသွားသည်။ ကုယွီမြန်က ကြယ်ကွန်ရက်၏ ရှာဖွေမှုကို ဖွင့်ခဲ့သည်။

မထင်မှတ်စွာပင် ဧကရာဇ်မင်း၏ဓာတ်ပုံများကို အင်တာနက်တွင်မတွေ့ခဲ့ရဘဲ ၎င်း၏မျိုးရိုးအမည်ကိုပင် ဖော်ပြခြင်းမရှိသော တရားဝင်သတင်းအနည်းငယ်ကိုသာတွေ့ခဲ့ရသည်။ -

Hall IVက အသက်နှစ်ဆယ်တွင် စွမ်းရည်ကို နိုးထနိုင်ခဲ့ပြီး အသက်ဆယ့်ရှစ်နှစ်တွင် မြို့တော်ရှိ ပထမစစ်သင်တန်းကျောင်းမှ ဘွဲ့ရရှိခဲ့သည်။ ရုပ်ပိုင်းဆိုင်ရာ စံနှုန်း SSS (အမြင့်ဆုံးဟု လူသိများသည်)။ 

"အသက်နှစ်ဆယ်မှာ စွမ်းရည်နိုးထပြီး ဆယ့်ရှစ်နှစ်မှာဘွဲ့ရတယ်ပေါ့…" 

ကုယွီမြန်က ရေရွတ်လိုက်သည်။

"ကျောင်းဆင်းပွဲမတိုင်ခင်အထိ သူ့စွမ်းရည် နိုးထမလာနိုင်သေးဘူးလား…" 

ကြယ်တာရာခေတ်တွင် နေထိုင်သူများ၏ စွမ်းရည်နိုးထမှုပျမ်းမျှအသက်မှာ ဆယ့်ငါးနှစ်ဖြစ်ပြီး အသက်နှစ်ဆယ်က စွမ်းရည်နိုးထမှု၏ နောက်ဆုံးအသက်ဖြစ်သည်။ အသက်ဆယ့်ရှစ်နှစ်အထိ မနိုးထနိုင်ပါက 'နိုးထရန် အလွန်ခက်ခဲသည်' ဟု အကဲဖြတ်ခံရမည်ဖြစ်သည်။ 

ကုယွီမြန်က အခြားသတင်းများကို ရှာဖွေကြည့်လိုက်ရာ ဧကရာဇ်၏ ပထမသက်တမ်း အနှစ်သုံးဆယ်က အလွန်ကောင်းမွန်ပြီး ဧကရာဇ်ကို ရိုသေသည့် မရေတွက်နိုင်သော လူများစွာ ရှိနေကြောင်း တွေ့ရှိခဲ့သည်။ 

သူက ငယ်စဉ်ကလေးဘဝတွင် များစွာခံစားခဲ့ရပြီး ရွံစရာကောင်းသည့် "အဖေကိုသတ်သည့် ဆက်ခံသူ" ဟူသော အမည်ဖြင့် အခြားလူများနှင့် တိုက်ခိုက်ခဲ့ရသည်။ သူက ခုနစ်နှစ်ကြာ ရှေ့တန်းတွင် တိုက်ပွဲဝင်ခဲ့သည်။ အောင်ပွဲရပြီးနောက်တွင် ကြယ်တာရာမြို့တော်ကို မက်မောသော အင်အားစုအမျိုးမျိုးနှင့် ရင်ဆိုင်ခဲ့ရသည်။ အွန်လိုင်းတွင် တွေ့နိုင်သည့် သူ၏ တစ်ခုတည်းသော ဓာတ်ပုံက သူ့နောက်ကျောပုံသာဖြစ်သည်။

အရပ်ရှည်ရှည်နှင့် ခန္ဓာကိုယ်တောင့်သော ဧကရာဇ်က ကင်မရာကိုကျောပေးကာ ပန်းစည်းများ ကိုင်ဆောင်၍ အားပေးနေသူများနှင့် ဝန်းရံနေပြီး ဝန်ကြီးများက သူ့ကို ဦးညွှတ်လျက် ရှိကြသည်။ တရားဝင် ဝန်ထမ်းများနှင့် ချာ့ခ်ျမှလူများက သူ့နောက် ခပ်ဝေးဝေးမှ လိုက်ပါလာကာ လူတိုင်းပျော်ရွှင်နေပုံရသည်။ 

ပုံအလယ်ရှိလူကသာ ပတ်ဝန်းကျင်လေထုနှင့် လုံးဝကွဲထွက်နေသည်။ 

လူအားလုံးက အရောင်အသွေးစုံကြပြီး သူကမူ လုံးဝမီးခိုးရောင်သန်းနေသော သူဖြစ်သည်။

ထိုလူက သူ၏ သန်မာသောစစ်ဝတ်စုံနှင့် တော်ဝင်ဝတ်ရုံကြီးကိုဝတ်ဆင်၍ မောက်မာစွာနှင့် တစ်ယောက်တည်း မတ်တပ်ရပ်နေကာ အမြင့်ဆုံးသို့ တစ်လှမ်းပြီးတစ်လှမ်းတက်ခဲ့သည်။

ကုယွီမြန်က ဓာတ်ပုံ၏အချက်အလက်များကို စစ်ဆေးခဲ့သည်။ ဤဓာတ်ပုံကို အသစ်တည်ဆောက်ထားသည့် သက္ကရာဇ် 232 ခုနှစ်တွင် ရိုက်ကူးခဲ့သည်။ ဇာ့ဂ်နှင့် အနှစ်တစ်ရာစစ်ပွဲက ဧကရာဇ်ငယ်လေးကြောင့် ပြီးဆုံးသွားခဲ့ပြီး နယ်စပ်မှ ကြယ်တာရာမြို့တော်သို့ ပြန်လာခဲ့သည်။ ၎င်းက ကြိုဆိုသည့် အခမ်းအနားတစ်ခုဖြစ်သောကြောင့် လူများ အလွန်ပျော်နေပုံရသည်က အံ့ဩစရာ မရှိပေ။ ထိုအချိန်မှစ၍ ငြိမ်းချမ်းသည့်ခေတ်သို့ ရောက်လာခဲ့သည်။

ထိုပုံကိုကြည့်ပြီးနောက် ကုယွီမြန် ထိတ်လန့်သွားသည်။ ထို့နောက်တွင် သူ့စိတ်ထဲ၌ နားမလည်နိုင်ကာ ရှင်းပြ၍မရသော ခါးသီးမှုအချို့ ရှိခဲ့သည်။ ပုံထဲရှိ လူ၏ အထီးကျန်မှုက သူ့နှလုံးသားထဲတွင် ပဲ့တင်ထပ်နေခြင်းမျိုး ဖြစ်နိုင်သည်။ ကုယွီမြန် ထပ်ပြီး စစ်ဆေးကြည့်ချင်သော်လည်း လေပေါ်ဝဲကိရိယာက ဘူတာရုံကို ရောက်ပြီဖြစ်ကြောင်း အသံပြုလာသောကြောင့် သူ၏ လက်ပတ်ကွန်ပြူတာကို ပိတ်ကာ လေပေါ်ဝဲကိရိယာကို အောက်သို့ ဆင်းသက်လိုက်ရသည်။ မြောက်ပိုင်း လက်ဝါးကပ်တိုင်က ဧရိယာC ရှိ အကြီးဆုံးစီးပွားရေးခရိုင်၏ ရင်ပြင်ပေါ်မှ ပန်းပုရုပ်တုဖြစ်သည်။ 

ကြယ်တာရာမြို့တော်က အမှန်တကယ် ကြွယ်ဝချမ်းသာသည်။အနည်းဆုံး တာ့ခ်၏ လမ်းမများပေါ်တွင် ထိုသို့သော မြင်ကွင်းမျိုးကို သူ တစ်ခါမှ မတွေ့ခဲ့ဖူးပေ။ အွန်လိုင်း ရောင်စုံနည်းပညာက အလွန်ဖွံ့ဖြိုးလာမှူကြောင့် ကုယွီမြန်၏ မှန်းဆချက်အရ လမ်းများကို စွန့်ပယ်သင့်သော်လည်း ထိုသို့ ဖြစ်မနေပေ။ 

အစပိုင်းတွင် ကုယွီမြန်က သူ့ကို ရှာမတွေ့မည်ကို စိုးရိမ်သော်လည်း ရှို့ဟန်က လူစုလူဝေးကြားထဲတွင် အမှန်တကယ်ကို မျက်စိဖမ်းစားစရာ ဖြစ်နေသည်။ ယနေ့တွင် သူက ယူနီဖောင်း မဝတ်ထားခဲ့ဘဲ လက်ရှည်ဆွယ်တာအင်္ကျီနှင့် ဂျင်းကို ၀တ်ထားသည်။ ရှို့ဟန်၏ ခြေတံရှည်များတွင် Doc Martin ဖိနပ်တစ်ရံကို ၀တ်ထားပြီး အိတ်ကပ်ထဲတွင် လိုလီပေါ့တစ်ခုနှင့် သူ့ကိုစောင့်နေသည်။

သူ့မျက်​နှာတစ်​ခုတည်း​နှင့်ပင် မျက်​စိဖမ်းစားနိုင်ရန် လုံ​လောက်​သည်​။ ထို့အပြင် သူက ပျင်းရိပုံပေါက်နေသော်လည်း မာနကြီးလွန်းလှသည်။ သူ့ပတ်ဝန်းကျင်တွင် လူတွေများစွာရှိနေသော်လည်း သူ့နှင့် သုံးမီတာပတ်လည်အကွာအဝေးတွင် ဖြတ်သန်းသွားလာနေသည့် လူဟူ၍ မရှိပေ။ ရံဖန်ရံခါ လူအချို့က အံ့အားသင့်သွားကြပြီး သူ့အသွင်အပြင်၏ ဆွဲဆောင်မှုကိုခံရသည့် မိန်းကလေးများစွာရှိသော်လည်း မည်သူမျှ သူ့ကို ချဉ်းကပ်ဝံ့ခြင်းမရှိပေ။ 

ကုယွီမြန်က ရင်ပြင်ထဲသို့ လှမ်းဝင်လာသည့်အခါ ရှို့ဟန်က ရုတ်တရက် မျက်လုံးကိုပင့်၍ညဝေးကွာလှသည့် အကွာအဝေးနှင့် လူအုပ်ကြီးကို ကျော်ဖြတ်ကာ သူ့ကို ကြည့်လိုက်သည်။ သူ၏ ပျင်းရိနေပုံရသည့် ခဲပြာရောင် မျက်လုံးများတွင် ဒေါသနှင့်ရီဝေနေပုံရသည့် အလွှာတစ်ခု ရှိနေသည်။ ဒုတိယအကြိမ် မျက်လုံးကို ပင့်ကြည့်ပြီး သူ့ကို မြင်လိုက်သောအခါ ထို အခိုးအငွေ့များ ပျောက်ကွယ်သွားသည်။

ကုယွီမြန် အံ့ဩသွားသည်။ 

တစ်ဖက်လူက သူ့ကိုတွေ့ရန် စောင့်နေခြင်းဖြစ်သည်။ ကုယွီမြန်၏ စိတ်ထဲတွင် ထိုအတွေးဖြင့် ပြည့်နှက်သွားသည်။

ရှို့ဟန်က ကုယွီမြန် ချဉ်းကပ်လာသည်ကို သေသေချာချာကြည့်လိုက်သည်။

 "မစ္စတာ ရှို့…အဆင်ပြေရဲ့လား၊ ဘာအရေးပေါ်ကိစ္စရှိလို့လဲ…"

ကုယွီမြန်က သူ့ဆီလာရင်း ခပ်တိုးတိုးလေး ချောင်းဟန့်လိုက်သည်။

ထိုလူက သူ့မျက်လုံးများကိုငုံ့ကာ ကြာမြင့်စွာ စိုက်ကြည့်နေသည်။ ရုတ်တရက် ညာလက်၏ လက်ချောင်းများ အနည်းငယ်ဖြန့်ကာ လက်ဖဝါးကို အပေါ်သို့ ဆန့်ထုတ်လိုက်သည်။ 

ကုယွီမြန် "..." 

လက်ဆွဲနှုတ်ဆက်မည်ဟု သူထင်ခဲ့သည်။

ဟုတ်တယ်မလား…

ကုယွီမြန်က သူ၏လူမှုရေးယဉ်ကျေးမှုကြောင့် သူ့လက်ကို လှမ်းကိုင်ရန် တုံ့ဆိုင်းနေခဲ့သည်။ ထိုသူ၏လက်ဖဝါးကို ထိတွေ့ခါနီးတွင် ရှို့ဟန်က ပထမဆုံးလှမ်းထိလိုက်ပြီး ကုယွီမြန်၏လက်ချောင်းများကို အမှတ်တမဲ့ဆုပ်ကိုင်လိုက်ကာ ကုယွီမြန်ကို သူ့ဦးတည်ရာဆီသို့ ဆွဲခေါ်ရန် အားစိုက်ထုတ်လိုက်သည်။ 

ရှို့ဟန်၏မျက်နှာက အနည်းငယ်ဖြူဖျော့နေပြီး မျက်မှောင်ကြုတ်နေသည်ကို ကုယွီမြန်တွေ့လိုက်ရသည်။

"နာတယ်…"

သူ့အသံက ကုယွီမြန်၏နားထဲတွင် မကြားရသလောက်နီးပါး အသံနိမ့်လေး ဖြစ်သည်။

"ကိုယ့်ကိုလာခေါ်ပါ…" 

အခြေအနေက မည်သို့ဖြစ်နေသည်ကို ကုယွီမြန်မသိသေးပေ။ နောက်တစ်စက္ကန့်တွင် အရပ်ရှည်ရှည်နှင့် အားကောင်းမောင်းသန် လူကြီး၏ ခန္ဓာကိုယ်က လဲကျသွားသည်။သစ်သားရနံ့တွင် ဆေးရွက်ကြီးအနံ့အနည်းငယ် ရောနှောနေပြီး သူ့နှာခေါင်းထဲသို့ ပြင်းထန်သော အရက်နံ့တစ်ခု ဝင်လာသည်။ ကုယွီမြန် အလွန်ထိတ်လန့်သွားသည်။ 

ရှို့ဟန်က ကုယွီမြန်ထက် အရပ်ပိုမြင့်ကာ ခန္ဓာကိုယ်တည်ဆောက်ပုံလည်း ပိုကြီး၍ ကုယွီမြန်က သူ့ကို တွဲထားရန် အခက်တွေ့နေသည်။ ခပ်ဝေးဝေးမှ ကြည့်လျှင် ရှို့ဟန်က ကုယွီမြန်ကို သူ့လက်မောင်းများကြားတွင် ပွေ့ဖက်ထားပြီး နားထဲသို့ တစ်စုံတစ်ခုကို တီးတိုးပြောနေသလိုပင်။ သူတို့ကိုယ်သူတို့ မထိန်းနိုင်ကြသည့် ချစ်သူစုံတွဲများကဲ့သို့ပင်။

လမ်းသွားလမ်းလာများ၏ မျက်လုံးများက မရေမရာဖြစ်နေကြသည်။ 

ထိုကြောင့် ကုယွီမြန် ရှက်သွားသည်။

ကုယွီမြန် :"...မစ္စတာရှို့ မစ္စတာရှို့…ရှို့ဟန်..."

တစ်ဖက်လူက ပြန်မဖြေခဲ့ပေ။ ရှို့ဟန် သူ့ကို ထိုနေရာတွင် ရပ်ပြီး စောင့်နေသည်က တော်သေးသည်။

-----

တစ်နာရီခန့်အကြာ ဧရိယာC ရှိ ပုဂ္ဂလိက ဆေးရုံတွင်…

ဆရာဝန်ပြောသည်ကိုကြားပြီးနောက် ကုယွီမြန် နောက်ဆုံး၌ ဇာတ်လမ်းတစ်ခုလုံးကို သိရှိသွားခဲ့သည်။ ရှို့ဟန်က ရုတ်တရက် ပင်ပန်းနွမ်းနယ်ခြင်း၊ သတိလစ်မေ့မြောခြင်း အစရှိသည်တို့ အပါအဝင် အရက်အလွန်အကျွံသောက်ခြင်းကြောင့် မူးမေ့လဲသွားခြင်းဖြစ်သည်ဟု ဆရာဝန်မှ ပြောကြားခဲ့သည်။

မတူညီသောမျိုးစိတ်များ၏ အရက်အပေါ် တုံ့ပြန်မှုမှာ မတူညီကြပေ။ သီအိုရီအရ အရာအားလုံး ဖြစ်နိုင်သည်။

ရှို့ဟန်၏ID ကတ်က သူ့အသက်ကို ၂၅ နှစ်အောက်ဟု ဆိုသည်။ အသက် ၃ဝ နှင့် အထက်ရှိသောသူများအား အရက်အလွန်အကျွံသောက်ခြင်းအတွက် အပြစ်ပေးနိုင်ပြီး လူငယ်များကမူ အရက်သောက်ခြင်းကို အရှက်ရစရာဟု မှတ်ယူကြသည်။ အခြားသူငယ်ချင်းများ၊ လက်အောက်ငယ်သားများနှင့် ရဲစစ်ဆေးရေးမှူးများကိုမေးမြန်းမည့်အစား ရှို့ဟန်က သူ့ကို စောင့်နေသည်မှာ အံ့ဩစရာမရှိတော့ပေ။ 

"တောင်းပန်ပါတယ်…" 

ရှို့ဟန်က သူ့နှုတ်ခမ်းကိုဖိလိုက်ပြီး သူ့မျက်ခုံးများကို လက်တစ်ဖက်ဖြင့် ပွတ်သပ်ကာ သူ့အမှားအတွက် စိတ်အနှောင့်အယှက်ဖြစ်နေပုံရသည်။

ကုယွီမြန် ခေါင်းခါပြလိုက်သည်။ ဆေးရုံခုတင်သေးသေးလေးပေါ်တွင် ခြေတံရှည်များနှင့် ကွေးနေရသည့် ထိုလူကို ကြည့်လိုက်ရင်း သူ့စိတ်များ ပင်ပန်းနေသော်လည်း သူ အနည်းငယ် အားကိုးရာမဲ့သွားသော်လည်း ရယ်ချင်နေသလို ခံစားလိုက်ရသည်။ 

ကြယ်တာရာခေတ်တွင် အသက် ၂၅ နှစ် အရွယ်နှင့် သူက အရွယ်ရောက်ပြီးသူအဖြစ် သတ်မှတ်ခံခဲ့ရပြီး ဖြစ်သည်။ ရှို့ဟန်နှင့် ပထမဆုံးစတွေ့စဉ်ကမူ ထိုသူက အလွန်ကို အစွမ်းထက်သည်ဟု ခံစားမိခဲ့သော်လည်း သူနှင့်နှစ်ကြိမ်ခန့် တွေ့ပြီးနောက်တွင်မူ အတူတူဟု မထင်မိတော့ပေ။

🐯🐯🐯

ထွမ်ထွမ်တို့ ဘာတွေကြံနေလဲမသိ🤣