Chapter 58

🐯Chapter 58

စားသောက်ဆိုင်၏ ယခင်သူဌေးဟောင်းတွင် ဘီယာဗိုက်ကြီးရှိပြီး စားဖိုမှူးများ၊ အကြီးတန်းမန်နေဂျာများနှင့် ဝန်ထမ်းများက စင်္ကြန်၏ တစ်ဖက်တစ်ချက်စီတွင် တန်းစီနေကြကာ ကုယွီမြန် ဝင်လာချိန်တွင် အလွန်လေးနက် သောပုံစံဖြင့် ဦးညွှတ်လိုက်ကြသည်။

လွန်ခဲ့သည့် နာရီဝက်ခန့်တွင်က အဓိကအကြောင်းအရာနှစ်ခုကို ထပ်ခါတလဲလဲ ပြောခဲ့ကြသည်။ ပထမဦးစွာ သူတို့၏ နားရွက်နှင့်အမြီးကို ထုတ်ဖော်မပြရဘဲ သူဌေးအသစ်နှင့် အလွန်အကျွံရင်းနှီးဟန် မပြရပေ။ ဒုတိယအနေနှင့် သူဌေးအသစ်ကိုလေးစားပြီး သူ့ကို အထူးလူသားအဖြစ် မဆက်ဆံရန် ဖြစ်သည်။

ကုယွီမြန် ရောက်မလာခင်အချိန်က လူတိုင်းမှာ ဒုတိယအချက်က ပို၍ ခက်သည်ဟု ထင်နေကြသည်။ အခုအချိန်တွင်မူ ပထမတစ်ချက်က ဒုတိယတစ်ချက်ထက် အဆပေါင်း များစွာ ပို၍ခက်ခဲနေသည်။

ဝန်ထမ်းအများအပြားက သူတို့၏ နားရွက်နှင့်အမြီးများကို ဖုံးကွယ်ရန် ကြိုးစားနေကြပြီး ၉၀ ဒီဂရီ ဦးညွှတ်ခဲ့ကြသည်။

ကုယွီမြန် "......" 

ဘာဖြစ်နေကြတာလဲ… ငါက မာဖီးယားသူဌေး လား…

"ကျေးဇူးတင်ပါတယ်… သိပ်ပြီး မယဉ်ကျေးနေပါနဲ့…"

ကုယွီမြန်က ချောင်းဟန့်လိုက်သည်။

"အားလုံး ပြန်သွားပြီး ကိုယ့်အလုပ်ကိုယ်လုပ်ကြပါ... ကျွန်တော် မစ္စတာ ဂျေးလ် နဲ့ စကားပြောလိုက်ပါဦးမယ်…"

ဂျေးလ်က မူလသူဌေးဖြစ်သည်။ သူဌေးက ချွေးများသုတ်ပြီး လှမ်းလာလိုက်ကာ ကုယွီမြန်အား အတွင်းဘက်သို့ ခေါ်ဆောင်သွားသည်။ အခြားသူများက သူတို့တာဝန်ကို ထမ်းဆောင်ရန် ပြန်သွားကြသည်။

"ကျွန်တော်တို့ရဲ့ စားသောက်ဆိုင်မှာရှိတဲ့ ဟင်းပွဲအားလုံးကို စားဖိုမှူးကိုယ်တိုင် ချက်ဖို့ လိုတာလား… နောက်ပြီး အစားအသောက် အချိန်မီ မချပေးနိုင်ဘဲ မတော်တဆ ဖြစ်ခဲ့ရင် စားသုံးသူတွေအတွက် လျော်ကြေးငွေ ဘယ်လိုပြန်ပေးလဲ… အနည်းဆုံးတော့ အချိုပွဲ ဖြစ်ဖြစ် ဟင်းပွဲ အသေးစားဟင်းပွဲတွေပဲဖြစ်ဖြစ် ပေးသင့်တယ်…"

ထိုအရာများ အားလုံးမှာ ကုယွီမြန် ဖောက်သည်တစ်ယောက်အနေနှင့် နောက်ဆုံးရောက်လာစဉ်က ပဟေဋိဖြစ်ခဲ့ရသည့် ပြဿနာများဖြစ်သည်။

ဂျေးလ်က ရှင်းပြသည်။

“ဟုတ်ကဲ့… ဟင်းချက်တာက အရမ်းအဖိုးတန်တဲ့ ကျွမ်းကျင်မှုတစ်ခုဖြစ်ပြီး လူသားတွေရဲ့ အမွေအနှစ်ကနေ ဆင်းသက်လာတာပါ… အခု လူသားတွေက ထပ်မရှိတော့ပါဘူး…”

မိသားစုအများစုက အစားအစာကို ချက်ပြုတ်ရုံမျှသာ တတ်နိုင်သည့် ကန့်သတ်ချက်ရှိနေပြီး အချို့သော မိသားစု များက အာဟာရအရည်ကိုပင် အတူတူသောက်ကြသည်။ စားဖိုမှူးများက အလွန်နည်းပါးလှသည်။ ဂျေးလ်က သူ့ဘေးရှိ လူသားပြောသည့်အထဲမှတစ်ချက်ကို သတိရသွားသည်။

 “ဒါပေမဲ့ စားဖိုမှူး နည်းနည်းတော့ ရှိနေပါသေးတယ်... ကျွန်တော်တို့ရဲ့ စားသောက်ဆိုင်မှာ လုပ်ငန်းနယ်ပယ်က ထိပ်တန်းစားဖိုမှူး ဆယ့်လေးဦး ငှားထားပါတယ်…"

ထို့ကြောင့် စားဖိုမှူးများအားလုံး မတော်တဆ ဖြစ်ခဲ့လျှင် ပြဿနာဖြစ်လာစေသည်။

"အဲ့လိုလား"…"

ကုယွီမြန် အံ့အားသင့်သွားသည်။ သူက နှင်းကျားသစ်လေးကို သူ့ရင်ခွင်ထဲတွင် ပွေ့ဖက်ထားလျက် မသိစိတ်မှ တွေးတောနေမိသည်။

"ကျွန်တော်က စီမံခန့်ခွဲရေးမှာ အတွေ့အကြုံ သိပ်မရှိ ပါဘူး ဒါပေမယ့် အဲ့ဒီအကြောင်းကိုတော့ နောက်မှ ဆက်မေးတော့မယ်… ဟင်းချက်နည်းနဲ့ ဝန်ဆောင်မှုပေးတဲ့ အပိုင်းတွေမှာတော့ အနာဂတ်မှာ ကျွန်တော်စိတ်ကူးတွေအတိုင်း အကောင်အထည်ဖော်ပေးမယ်လို့ မျှော်လင့်ပါတယ်…"

စကားပြောဆိုနေချိန်၌ပင် သူတို့က  မီးဖိုချောင်သို့ ရောက်လာကြသည်။

ဂျေးလ်က မေးလိုက်သည်။

"မင်းမှာ အဲ့ဒီအတွက် ဥပမာပေးဖို့ တစ်ခုခုရှိလား…"

ကုယွီမြန်က နှင်းကျားသစ်လေးကို သူ့ပခုံးပေါ်တင်၍ အိပ်ခိုင်းလိုက်ပြီး မီးဖိုချောင်တံခါးဝနံရံပေါ်မှ အသစ်စက်စက် အေပရွန်ကိုယူကာ ခေါင်းညိတ်ပြပြီးပြောလိုက်သည်။

 "ခင်ဗျား မြင်ရမှာပါ…"

သူက မီးဖိုချောင်တံခါးဝတွင်ရပ်ပြီး ပတ်ပတ်လည် ကို လှမ်းကြည့်လိုက်သည်။ ထို့နောက် ပုဇွန်တုများကို မည်သို့ ကိုင်တွယ်ရမည်ကို မသိသောကြောင့် သူ့နားရွက်များအား ကုတ်နေသော အလုပ်သင်တစ်ဦးထံမှ ဓားကို လှမ်းယူလိုက်သည်။ ဓားက သူ့လက်ချောင်းများအောက်သို့ ရောက်သွားသည်။ သူက ပုဇွန်တုများ၏ အခွံကိုခွာပြီး အကြောများကိုဖယ်ရှားရန် ပုဇွန်တု၏ နောက်ကျောကို ဖွင့်လိုက်သည်။ ထို့နောက် မီးဖိုချောင်သုံးဓားကိုလှန်ကာ ပုဇွန်ကို အတုံးသေးသေးလေးဖြစ်အောင်လှီးလိုက်ပြီး ပုစွန်များ၏ အမြီးနှင့် ခေါင်းများကို ဓားဖြင့် ဖယ်ရှားလိုက်သည်။ 

"ချိစ် ရှိလား…"

ဂျေးလ်အပါအဝင် ပတ်ဝန်းကျင်ရှိ အလုပ်သင်အများအပြားက ကုယွီမြန်၏ ဆက်တိုက်လှုပ်ရှားမှုများကို ကြည့်ရှု့ခဲ့ပြီး အံ့အားသင့်သွားကြသည်။ အလုပ်သင် တစ်ယောက်က ချိစ်ကိုယူရန် ပါဝင်ပစ္စည်းများထည့်ထားသည့် ပုံးဆီသို့ အမြန်သွားခဲ့သည်။ ကုယွီမြန်က ချိစ်ကို အနံ့ ခံကြည့်ပြီးနောက် ထိုအနံ့က မကောင်းသေးဟု ထင်ကာချိစ်ကို အတုံးသေးသေးလေးများဖြစ်အောင် လှီးပြီး ပုဇွန်နှင့် ရော မွှေလိုက်သည်။

ဆား ဇွန်းတစ်ဝက်ခန့်ကိုထည့်ကာ ဝိုင်ပုံးထဲမှ ဝိုင်ဖြူကို ယူခိုင်းပြီး ခွက်သေးသေးလေးတစ်ဝက်စာခန့် ထိုအထဲသို့ လောင်းထည့်ခိုင်းလိုက်သည်။ ထို့နောက် ၎င်းတို့အားလုံး ကို ရောနယ်ကာ တစ်ခါသုံးလက်အိတ်ကို ဝတ်ဆင်၍ သေးငယ်၍ နူးညံ့သော ပုဇွန်လုံးများအဖြစ် လုံးလိုက်သည်။

ဤလှုပ်ရှားမှုများအားလုံးက ရပ်တန့်ခြင်းမရှိဘဲ ချောမွေ့ သပ်ရပ်နေပေသည်။

မီးဖိုချောင်ရှိ စားဖိုမှူးများနှင့် အလုပ်သင်များ အားလုံး ရပ်တန့်သွားပြီး ကုယွီမြန်၏ လှုပ်ရှားမှုများက အလိုအလျောက် သူတို့၏ မျက်လုံးများအား ဆွဲဆောင်သွားခဲ့သည်။ သူ၏လုပ်ဆောင်ပုံက ဆန်းသစ်ခြင်း သို့မဟုတ် ကျွမ်းကျင်နေခြင်းမဟုတ်သော်လည်း သင့်လျော်သောခွန်အားဖြင့် စနစ်တကျနှင့် လိုက်လျောညီထွေဖြစ်စေသောခံစားချက်ကိုပေးကာ သူတို့ကို သက်တောင့်သက်သာဖြစ်စေသည်။

သူတို့ အားလုံးဝိုင်းပြီး တိုးတိုးလေးပြောလိုက်ကြသည်။

"သူဌေးအသစ်က ဘာလုပ်နေတာလဲ… သူ့ကို အင်တာနက်မှာ တိုက်ရိုက်ထုတ်လွှင့်မှုမှာ မြင်ဖူးတယ်… သူလုပ်ထားတဲ့ စားစရာတွေက တကယ်ကို အရသာရှိတယ်… အယ်၊ ဒါက တော်တော် ရိုးရှင်းပုံရတယ်…"

"ချိစ် ...ပုဇွန်နဲ့ ဝိုင်ဖြူရောပဲ… စွပ်ပြုတ်အိုး လုပ်မှာလား…"

"ရှူးး လူအိုကြီးယွီရေ … သူဌေးအသစ်ကို မျက်နှာသာ ပေးပါဦး…"

စားဖိုမှူးဆယ့်လေးယောက်တွင် အသက်အကြီးဆုံး နှင့် လက်မှတ်ရ စီနီယာစားဖိုမှူးလည်းဖြစ်သူကို လူအိုကြီးယွီ ဟုခေါ်သည်။ ကုယွီမြန် သူဌေး ဖြစ်လာခြင်းက သူ့အတွက် ပြဿနာမရှိသော်လည်း သူက ချက်ပြုတ်ခြင်းနည်းစနစ်ကို ပြောင်းလဲလိုသော လူငယ်တစ်ယောက်ဖြစ်လာသောအခါတွင်မူ သူ့အတွက် ပြဿနာများစွာ ရှိခဲ့သည်။

ဟင်းချက်ရန် နှစ်ပေါင်းများစွာ လေ့ကျင့်ရန် လိုအပ် သည်။ 

ဒီကလေးက ဘာသိလို့လဲ…

နှင်းကျားသစ်လေးက ကုယွီမြန်၏ ပခုံးပေါ်လှဲကာ လူအုပ်ကို တိတ်တဆိတ် စိုက်ကြည့်နေသည်။

ကုယွီမြန်က အခြားသူများ ပြောနေသည်ကို ဂရုမစိုက်ဘဲ သူ့လှုပ်ရှားမှုများကိုသာ ဆက်လုပ်နေခဲ့သည်။

သူက ပုဇွန်လုံးများကို ကိုင်တွယ်ပြီးနောက် ကြက်ဥတစ်လုံးကို အမြှုပ်ထလာသည်အထိ တူဖြင့်မွှေကာ ကော်မှုန့်အနည်းငယ်ထည့်၍ လုံးလုံးစေးကပ်သွားသည်အထိ မွှေပြီး ပုစွန်လုံးတစ်လုံးစီကို ၎င်းအနှစ်ထဲသို့ အပေါ်ယံ ဖုံးအုပ်သွားသည်အထိ နှစ်ထည့်လိုက်သည်။ 

"ဒါကို အကြော်နှစ် ( တန်ပူရာ)လို့ ခေါ်တယ်ဒီ အကြော်နှစ်ကို ပိုများအောင် ပြင်ဆင်ပြီး အချိန်မရွေး အသုံးပြုနိုင်တယ်…"

ထို့နောက် ကုယွီမြန်က ဆီထည့်ထားသည့် အိုးကို တိုက်ရိုက်အပူပေးလိုက်သည်။ ဆီ ခုနစ်ဆယ်ရာခိုင်နှုန်း လောက်အထိ ပူလာလျှင် ပုဇွန်လုံးများကို အိုးထဲသို့ထည့်ကာ စတင်ကြော်လိုက်သည်။ ပုစွန်လုံး၏မျက်နှာပြင်ကို ကြော်ထားသော မုန့်နှစ်များဖြင့် ညီညီညာညာ ဝန်းရံထားသည်။ ဆီပူပူနှင့် အိုးပူထဲမှာ ပုစွန်လုံးကို ညင်သာစွာ စက်ဝိုင်းပုံစံမွှေကြော်ပြီး မကြာမီမှာပင် ရွှေရောင်အပြည့်နှင့် ပုံမှန်မဟုတ်သည့် ကြွပ်ရွသော အသွင်အပြင် ပေါ်လာသည်။

သို့သော် ရွှေရောင်မျက်နှာပြင်မှတစ်ဆင့် အတွင်းပုစွန်အသား၏ ကြည်လင်ပြီး အနည်းငယ် နို့နှစ်ရောင်သန်းနေသည်ကို မြင်နိုင်သေးသည်။ ချိစ်၏ ပြင်းထန်သော အရသာကို နူးညံ့သော ဝိုင်ဖြူဖြင့် ဖိနှိပ်ထားပြီး ပုဇွန်လုံး၏ ချောမွေ့သောအရသာနှင့် ရောစပ်ထားသည်။

လူအိုကြီးယွီ အပါအဝင် ကုယွီမြန်ကို မယုံကြည်သော စားဖိုမှူးများစွာနှင့်တကွ လူတိုင်း တံတွေးမျိုချလိုက်သည်။

တကယ်ကို မွှေးနေတာပဲ…

မွှေးနေတာပဲ...

ထိုအချိန်တွင် နှင်းကျားသစ်လေး နိုးလာသည်။ သူ့နှာသီးဖျားက လှုပ်သွားပြီး သူ့အမြီးရှည်က ကုယွီမြန်၏ လက်ကောက်ဝတ်ကို ဖမ်းလိုက်သည်။

ပုဇွန်လုံးကြော်ပြီးပါက ဆီစစ်ပြီးသည်နှင့် ပန်းကန်တစ်လုံးပေါ်တွင် တင်ထားလိုက်သည်။ ကုယွီမြန်က ပန်းကန် အသေးတစ်ခုထဲသို့ ပုဇွန်လုံးလေးလုံးထည့်ကာ အခြားအလားတူပန်းကန်ထဲသို့ ခြောက်လုံးထည့်လိုက်သည်။ ထို့နောက် သကြား၊ ဆား၊ ရှာလကာရည်၊ ခရမ်းချဉ်သီးအနှစ်၊ ကော်မှုန့်ကို ဆီကျန်ထဲသို့ထည့်ကာ ကျိုချက်လိုက်သည်။ သူက သံပုရာသီး အနည်းငယ်ကိုညှစ်ပြီး မကြာမီမှာပင် ကြည်လင်သည့် သကြားနှင့် ရောစပ်သွားပြီး အုတ်ကျိုးရောင် ဖြစ်သွားသည်။ မူလက အိုးအောက်ခြေတွင် စီးဆင်းနေသောအရည်က တဖြည်းဖြည်း လိမ္မော်နီရောင်ဆော့စ် ဖြစ်လာသည်။ 

“ဒါကို ချိုချဉ်ဆော့စ်လို့ခေါ်တယ်… များများ ပြင်ဆင်ထားလို့လည်းရတယ်… အသုံးမပြုခင် အပူပေးလိုက်ရုံပဲ…”

ချိုချဉ်ဆော့စ်ကို အိုးထဲမှ သွန်ချကာ ရွှေရောင်သန်းကာ ကြွပ်ရွနေသည့် ပုဇွန်လုံး၏မျက်နှာပြင်ပေါ်သို့ အညီအမျှ ဖြန့်ပေးလိုက်ခြင်းဖြင့် ချိစ်ပုဇွန်လုံးချိုချဉ်တစ်ပန်းကန် ပြီးသွားပေသည်။ သဘာဝအလင်းရောင်အောက်တွင် မျက်နှာပြင်ပေါ်ရှိ ချိုချဉ်ချဉ်ဆော့စ်က တောက်ပြောင်ပြီး အရောင်အသွေးစုံကာ ချစ်စရာ ကောင်းလှသည်။ မွှေးကြိုင်သောရနံ့ကြောင့် အခန်းတွင်းရှိ လူများကို သွားရည်ကျစေသည်။

လူအများက တွေဝေနေကြပြီး အချို့သူများ၏ ဗိုက်ထဲမှ ထိန်းမနိုင်သိမ်းမရ အော်ဟစ် နေကြသည်။

နှင်းကျားသစ်လေး၏ လက်ဖဝါးက ကုယွီမြန်၏ လက်ကောက်ဝတ်ကို ဖမ်းကိုင်လိုက်ပြီး အစာကျွေးရန် တိုက်တွန်းလိုက်သည်။

ကုယွီမြန်လည်း ပန်ဒါလေး အိပ်နေသေးသောကြောင့် သူက ထိုကလေးအတွက် အစိတ်အပိုင်းတစ်ခု ချန်ထားခဲ့သည်။ ကုယွီမြန်က ပန်းကန်များထဲမှ အကြော်တစ်ခုကို ခွဲထုတ်ပြီး နှင်းကျားသစ်လေး အရသာခံရန် သေးငယ်သော အပိုင်းတစ်ခုကို ကောက်ယူလိုက်သည်။

ခဏအကြာတွင် နှင်းကျားသစ်လေးက ကျေနပ်စွာ ဖြင့် ခေါင်းစောင်းလိုက်ကာ သူ၏ ပျော့ပျောင်းသော နားရွက်များက ကုယွီမြန်၏ မေးစေ့ကို ပွတ်တိုက်သွားသည်။

လူတိုင်း: ”……”

ဒါဇင်ပေါင်းများစွာသော မနာလိုနေသည့် မျက်လုံးများက ကုယွီမြန်၏ပခုံးပေါ်ရှိ ကလေးဆီသို့ လှည့်ကြည့်လိုက် သည်။ ပုဇွန်လုံးများကို စားနိုင်ရုံသာမက ကုယွီမြန်နှင့်လည်း အလွန်နီးကပ်စွာနေနိုင်သောကြောင့် သားပေါက်လေးကို သူတို့ မနာလိုဖြစ်နေကြသည်။

လူအိုကြီးယွီက မယုံနိုင်သေးပေ။ သူက ရှေ့သို့ တက်လာပြီး ကုယွီမြန်အား သူ အရသာခံနိုင်မလားဟု မေးလိုက်သည်။  အပြုသဘောဆောင်သောအဖြေကို ရရှိပြီးနောက် ပန်းကန်ပြား တစ်ချပ်ကိုပြန်ယူကာ ထပ်တူသံသယရှိနေကြသော စားဖိုမှူးအချို့အား ပေးခဲ့သည်။ လူတိုင်း ထိုအရာအား အရသာမြည်းစမ်းနိုင်သွားသည်။

ခဏအကြာတွင်…

စားဖိုမှူးများ - "….."

ကြွပ်ရွနေသောအသားအား ချဉ်ချိုချဉ်ချဉ်အနှစ် ဖြင့် ဖုံးအုပ်ထားပြီး လုံးဝ မအီပေ။ အပြင်ဘက်မျက်နှာပြင်ကို ရွှေဝါရောင်သန်းသည်အထိ ကြော်ထားသော်လည်း ပုဇွန်လုံး၏အတွင်းပိုင်းက အရသာရှိကာ နူးညံ့ပြီး အရည်ရွှမ်းနေသေး သည်။ ကိုက်လိုက်သည်နှင့် အရည်ပူပူလေးများ ထွက်လာသည်။ 

ဝိုင်ဖြူတွင် စိမ်ထားသောချိစ်က နို့အနံ့ကို သန့်စင်စေပြီး ချိုသောဝိုင်နှင့်ရောစပ်ကာ လတ်ဆတ်သောပုဇွန်များနှင့် ချောမွေ့သော ပေါင်းစပ်မှုကို ဖန်တီးထားသည်။ ပုဇွန်၏ အရသာက နူးညံ့ပြီး လတ်ဆတ်သည်။ ချိုချိုချဉ်ချဉ်အရသာက အလွန်ပင် စား၍ကောင်းလှသည်။ ထိုဟင်းလျာက သူတို့၏ ဆာလောင်မှုကို အနည်းငယ် ဖြည့်ဆည်းပေးနိုင်သည်သာမက နောက်တစ်ပန်းကန်ပင် စားနိုင်သေးသည်။

"အရသာရှိတယ်… " 

လူအိုကြီးယွီက ရေရွတ်လိုက်သည်။

"အရသာကောင်းတယ်… လုံးဝမဆိုးဘူး…"

"ဒါက တကယ်ပဲ ချိစ် လား…လုံးဝကို မတူဘူးနော် ချိုတယ်…"

ထို့အပြင် လုပ်ငန်းစဉ်တစ်ခုလုံးကို လူတိုင်း၏မျက်စိအောက်တွင် ပြုလုပ်ခဲ့ခြင်းဖြစ်သည်။ ကုယွီမြန်က ထိုနည်းပညာကို လုံးဝ ဖုံးကွယ်မထား၍ လူတိုင်းက ဖြစ်စဉ်ကို ရှင်းရှင်းလင်းလင်း မြင်လိုက်ကြရသည်။ 

ရိုးရှင်းကာ ထုတ်လုပ်မှုအချိန်တိုတောင်းပြီး နောက်ဆုံး အကျိုးသက်ရောက်မှုသည်လည်း အံ့သြဖွယ်ဖြစ်သည်။

ထို့အပြင် 'အကြော်နှစ် နှင့် 'ချိုချဉ်ဆော့စ်' တို့လည်း ပါသေးသည်။ ကုယွီမြန်က ၎င်းတို့ကို အနာဂတ်တွင် ကြိုတင်ပြင်ဆင်ထားရန် ပြုလုပ်နည်းအား ပုဇွန်လုံးများ ပြုလုပ်နည်းနှင့်အတူ ပြသခဲ့ပြီး ဟင်းလျာတစ်ပွဲလုံးကို အပြီးသတ်ရန် မိနစ်အနည်းငယ်သာ ကြာမည်ဖြစ်သည်။

စားဖိုမှူးများက ဗဟုသုတရှိပြီး အကျိုးကျေးဇူးများ ကို လျင်မြန်စွာ ရှာဖွေတွေ့ရှိခဲ့ကြသည်။ အနည်းငယ် ခေါင်းမာပြီး အကြောတင်းသည့် လူအိုကြီးယွီပင် မနေနိုင်ဘဲ ကုယွီမြန်အား အထင်ကြီးသွားခဲ့သည်။

ပညာရှင်များ၏ နှစ်သက်ခြင်းနှင့် မနှစ်သက်ခြင်းတို့က စင်ကြယ် သည်။

"ကောင်းပြီ…အခု ခင်ဗျားတို့ ကျွန်တော့် စကားကို နားထောင်မှာလား…"

ကုယွီမြန်က ပြုံးလိုက်သည်။

"ဟုတ်ကဲ့..."

သူတို့က တစ်ပြိုက်နက်တည်း ပြန်ဖြေကြသည်။

စားသောက်ဆိုင်တွင် တစ်နေ့တာလုံး ကိုင်တွယ်ဖြေ ရှင်းပြီးနောက် ညနေပိုင်းတွင် ကုယွီမြန်က ကလေးများနှင့်အတူ အိမ်သို့ပြန်လာခဲ့သည်။ သူ၏ ကျောက နာနေသောကြောင့် ဆိုဖာပေါ်၌ လှဲလျောင်းနေလိုက်သည်။ ပန်ဒါလေးလည်း နိုးလာပြီး ကုယွီမြန်၏ရင်ခွင်ထဲသို့ တိုးဝင်လာသည်။ နှင်းကျားသစ်လေးက တစ်နေ့တာလုံး အိပ်ပျော်နေ၍ ယခုချိန်တွင် လုံးဝ အိပ်မငိုက်တော့ပေ။ သူ့လက်သည်းလေးများဖြင့် ကုယွီမြန်၏ ဗိုက်နှင့် ပုခုံးများပေါ်သို့ တက်လာသည်။

ကုယွီမြန်က နို့ညှစ်နေသည်လားဟုပင် သူ့ကိုယ်သူ တွေးနေမိသည်။

သို့သော်လည်း ထိုအရာက အလွန် သက်တောင့်သက်သာရှိလှပြီး နှိပ်နယ်နေသကဲ့သို့ပင်။ သူ မောပန်းနွမ်းနယ် နေစဉ်မှာပင် ကြယ်တာရာကောင်းကင် တိုက်ရိုက်ထုတ်လွှင်မှု ပလက်ဖောင်း နောက်ကွယ်သို့ (live မလွှင့်ဘဲ လိုင်းပေါ်တက်တာပါ)တက်လိုက်ပြီး မကြာမီတွင် သတင်းကောင်းနှင့် သတင်းဆိုးကို ရရှိခဲ့သည်။

[ကြယ်တာရာကောင်းကင် ပလက်ဖောင်း လူသစ် အဖွဲ့အစည်း V: မစ္စတာကု၊ လူ သစ်ပြိုင်ပွဲ ဒုတိယအကျော့မှာ  ရာထူးတိုးသွားခြင်းအတွက် ဂုဏ်ယူပါတယ်…]

ဤသည်မှာ သတင်းကောင်းဖြစ်သည်။ ဆိုလိုသည်မှာ သူ၏ တိုက်ရိုက်ထုတ်လွှင့်မှုကို နောက်အပတ်အထိ အနည်းငယ် အနားယူနိုင်မည်ဖြစ်သည်။

[ကြယ်တာရာကောင်းကင် ပလက်ဖောင်း လူသစ် အဖွဲ့အစည်း V: ပြီးတော့ မင်းရဲ့ ပြောင်မြောက်တဲ့ စွမ်းဆောင်ရည်ကြောင့် မင်း လျှို့ဝှက်စမ်းသပ်ချက်တစ်ခုကို ဖွင့်လိုက်ပါနိုင်ပြီ… ပါဝင်မလား မပါဝင်ဘူးလားဆိုတာ ရွေးချယ်နိုင်ပါတယ်… ဆုလာဘ်များနှင့် လျှော့စျေးများစွာရှိမည်ဖြစ်ပြီး လူသစ်ယှဉ်ပြိုင်မှုရဲ့ ထိပ်တန်း 20 သို့ တိုက်ရိုက်တက်ရောက်နိုင်မှာ ဖြစ်ပါတယ်…]

အမှန်တွင် ပရောဂျက်အဖွဲ့အနေနှင့် ယခင်က ဆွေးနွေးခဲ့သည့်အရာမှာ ကုယွီမြန်က ထိပ်တန်းဆယ်ယောက်တွင် ပါ၀င်နေသောကြောင့် သူ့အား ချန်ပီယံဆု တိုက်ရိုက်ပေးရမည်လားဟူသည့် အကြောင်းအရာဖြစ်သည်။ သို့သော် အကယ်၍ သူသာ ပါဝင်ခဲ့လျှင် သံသယရှိစရာ မလိုဘဲ ထိုပြိုင်ပွဲက အဓိပ္ပါယ်မဲ့သွားပေလိမ့်မည်။

ကုယွီမြန် "လျှို့ဝှက်စမ်းသပ်ချက်လား…အဲဒါဘာလဲ…."

[ကြယ်တာရာကောင်းကင် ပလက်ဖောင်း လူသစ် အဖွဲ့အစည်း V- တိုက်ရိုက်ထုတ်လွှင့်မှုအတွက် ကျပန်းရွေးချယ်ထားသောနေရာကို သွားရောက်ရမှာဖြစ်ပြီး သင့်ရဲ့ရေပန်းစားမှုက ယခုတစ်ပတ်ရဲ့ ထိပ်တန်း 10 စာရင်းတွင် ပါဝင်ရမှာဖြစ်ပါတယ်… သွားရမယ့်နေရာက အန္တရာယ်ရှိတဲ့ သို့မဟုတ် တရားမဝင်တဲ့ နေရာတစ်ခု မဟုတ်ပါဘူး…  မိုးလုံလေလုံနဲ့ ပြင်ပဘေးကင်းသောနေရာများပါရှိတဲ့ ကြယ်တာရာကောင်းကင် မိတ်ဖက်အဖွဲ့အစည်းနေရာများဖြစ်ပါတယ်…]

ကုယွီမြန် :  " ကျွန်တော် အရင်ဆုံး မဲနှိုက်ပြီးမှ သွား မသွားဆုံးဖြတ်လို့ မရဘူးလား…"

ပရောဂျက်အဖွဲ့အဖွဲ့ဝင်များ - " ..." 

[ဟုတ်ကဲ့…]

ကုယွီမြန်က တစ်ဖက်မှပေးပို့သော ပရိုဂရမ်လေးကို ပေါ့ပေါ့ဆဆ နှိပ်လိုက်ပြီး စက္ကန့်အနည်းငယ်ကြာပြီးနောက်၊ အပေါ်မှ စာကြောင်းက ပြောင်းသွားသည်-

"အထက်တန်းလွှာနယ်မြေ သိပ္ပံအကယ်ဒမီ…"

ကုယွီမြန်က ထိုစကားစုကို ထပ်ခါတလဲလဲ ရေရွတ်လိုက်သည် ။

သူ အလွန် မခံစားလိုက်မိသော်လည်း 'အထက်တန်းလွှာနယ်မြေ' ဟူသည့် စာသားကြောင့် သူ အံ့သြသွားသည်။

သူ့လက်ထဲ၌ ရှိနေသည့် ပန်ဒါဝက်ဝံလေးက သူ့ နားရွက်ကို လှုပ်လိုက်ပြီး နှင်းကျားသစ်လေးက ထိုနားရွက်အား ရပ်စေကာ သူ၏ မျက်လုံးများက အနည်းငယ် ကျဉ်းမြောင်းသွားသည်။ 

သိပ္ပံအကယ်ဒမီက အထက်တန်းလွှာနယ်မြေတွင်ရှိသည့် တစ်ခုတည်းသောအရာမဟုတ်ပေ။

ထိုနေရာတွင် ကောမိသားစု၏ အိမ်ဟောင်းလည်းရှိကာ တော်ဝင်နန်းတော်လည်း ရှိနေသည်။

🐯🐯🐯