Chapter 40

👾Chapter 40

[ငယ်ရွယ်စဉ်မှာ အရာအားလုံးက အလားအလာရှိတယ် ]

လင်းဟန်က ကျောကို မတ်မတ် ရပ်​နေပြီး သွက်သွက်လက်လက် ရှိပုံရသည့် မေဂျာအဆင့် အရာရှိငယ်​​လေးကို ကြည့်လိုက်သည်။ နှုတ်ခမ်း​ပေါ်တွင် အပြုံးစတစ်ခုနှင့် ဟယ့်ယွင်ထင်အား အနည်းငယ် ကြောက်ရွံ့​လေးစားပုံရသည်။ 

“နယ်နိမိတ်စည်းက လတ်တ​လောမှာ တည်ငြိမ်တဲ့ အပူချိန် ရှိပါတယ်... ကျွန်​တော်တို့ ဆင်းသက်နိုင်မှာ ဖြစ်ပြီး​တော့ ကြယ်တာရာဓါးပြ​တွေကိုလည်း မ​တွေ့ရပါဘူး.. ပြီး​တော့ ဇီဝမျိုးကွဲများ ပေါင်းစည်းစနစ်ကို လှမ်းပြီး ဆက်သွယ်ပြီးပါပြီ... တစ်ဖက်ကလည်း လွန်ခဲ့တဲ့ နှစ်​တွေကလိုပဲ လေ့ကျင့်​ရေး​တွေကို ကြားဝင်စွက်ဖက်မှာ မဟုတ်ဘူးလို့ ပြောပါတယ်... ဒါ​ကြောင့် ဗိုလ်ချုပ် စိတ်ချထားလို့ ရပါတယ်... သင်္ဘော​ပေါ်က မောင်းနှင်သူ အားလုံးကလည်း ရုပ်ပိုင်းဆိုင်ရာ အ​​ခြေအ​နေ ကောင်းမွန်ကြပါတယ်... လေ့ကျင့်​ရေးအတွက် လက်နက်​တွေကိုလည်း တပ်ဆင်​ပေးပြီးပါပြီ" 

ဇီဝမျိုးကွဲများ ပေါင်းစည်းစနစ်မှာ နယ်နိမိတ်မျဥ်း၏ အနီးအနားတွင် တည်ရှိပြီး ပုံမှန် မဟုတ်သည့် ဇီဝမျိုးကွဲသတ္တဝါများစွာ နေထိုင်ကြသည်။ အလိုအ​​​လျောက် အသိစိတ်ရှိသည့် အဆင်နိမ့် သတ္တဝါများအပြင် လူသားများနှင့် ဆက်သွယ်နိုင်သည့် အဆင့်မြင့်သတ္တဝါများလည်း ရှိကြသည်။ ထိုသတ္တဝါများမှာ နေထိုင်ရာဂြိုလ်၏ ခက်ခဲကြမ်းတမ်း​​​​သော ရာသီဥတုဒဏ်ကို အလိုက်သင့်​နေထိုင်နိုင်ကြသည်။ ထူးခြားဇီဝမျိုးကွဲများ ပေါင်းစည်းမှု ဂလက်ဆီက ကြမ်းတမ်းခက်ခဲလှပြီး ပျမ်းမျှ​​နေ့စဥ် အပူချိန်က  60 ဒီဂရီ ဆဲစီးယပ် (140F) ရှိပြီး လေထုကလည်း ပါးလွှာသည်။ 

ထိုသတ္တဝါအချို့မှာ အမြီးနှင့် နားရွက်များ ရှိကြပြီး အချို့က တွားသွားရုံသာ တွားသွားနိုင်ကြပြီး အချို့က ခြေလက်များပင်မရှိကြသဖြင့် ထူးဆန်း​သော အလုံးကြီးတစ်လုံးကဲ့သို့ လှိမ့်သွားရ​လေသည်။ 

သူတို့၏ စား​သောက်ပုံနှင့် နေထိုင်မှုအကျင့်များက လူသားများနှင့် အ​တော်​လေး ကွဲပြားပြီး ၎င်းတို့အကြား အဆင့်မြင့်နှင့် အဆင့်နိမ့် သတ္တဝါများကလည်း မတူညီ​သော အမူအကျင့်များ ရှိကြသည်။ 

သို့​သော်ငြား သူတို့၏ ထူးဆန်း​သော ပုံစံများကို ဖယ်ထားလိုက်ပါက ထိုပုံစံကွဲ သတ္တဝါများမှာ သဘာဝအရ နူးညံ့ကြပြီး အာကာသတွင်း ကိစ္စများကို ဝင်​ရောက်စွက်ဖက်ကြ​လေ့ မရှိ​ပေ။ ထို့ကြောင့် စတုတ္ထအဆင့် ရွေးချယ်ပွဲကို ဂြိုလ်နှစ်ခုအကြား ဟင်းလင်းပြင်တွင် လုပ်ဆောင်ရန် ရွေးချယ်ထားပြီး ထိုနည်းဖြင့် အင်ပါယာအတွက်လည်း အဆင်​ပြေကာ အင်ပါယာဘက်မှလည်း သူတို့အား ကြယ်တာရာဓါးပြများ၏ ရန်မှ အတိုင်းအတာတစ်ခုအထိ ကာကွယ်​​ပေးသွားမည်ဟု သ​ဘောတူညီချက် ရရှိထားသည်။

သူက အကြမ်းဖျဥ်းအချက်အလက်အချို့ကို သတင်းပို့လိုက်ပြီး​နောက် ဟယ့်ယွင်ထင်ဘက်က တစ်ခုချင်းစီ နား​​ထောင်ကာ ထူးခြားဖြစ်ရပ်များ မရှိ​ကြောင်း အတည်ပြုပြီးမှ ခွင့်ပြုချက် အလင်းမျက်နှာပြင်ကို ဖွင့်၍ လက်​ဗွေနှိပ်​ပေးလိုက်သည်။ 

"ကောင်းပါပြီ" 

အရာရှိ​လေး၏ မျက်လုံးများက မျှော်လင့်ချက်များဖြင့် ဝင်းလက်သွားပြီး အနည်းငယ် ရှက်​သွေးဖြာသွားကာ စိတ်ထက်သန်စွာဖြင့် ပြောလိုက်သည်။ 

"ကြိုတင်ချိန်းဆိုမှု ရခဲ့ပါပြီ... မစ်ရှင်ကို အောင်မြင်​​အောင် ထမ်းရွက်မယ်လို့ ကတိပေးပါတယ်" 

ဟယ့်ယွင်ထင် ခေါင်းငြိမ့်ပြလိုက်ပြီး​နောက် ထပ်မ​ပြော​တော့​ပေ။ 

တစ်ခဏအကြာ ညွှန်ကြား​ရေးအခန်းထဲတွင် အ​ကြောင်းကိစ္စတချို့ ရှိလာသည်​ကြောင့် ဖြစ်မည်၊ ဟယ့်ယွင်ထင်က ထိုင်ခုံမှ ထရပ်ကာ ညွှန်ကြား​ရေးအခန်းဆီသို့ ထွက်သွား​လေသည်။ 

အဆုံးတွင် သူက ရာထူးအမြင့်ဆုံးဖြစ်၍ သူ ရှိ​နေစဥ် အခန်းထဲမှ အပူချိန်က ပို၍ နိမ့်ကျ​နေ၏။ တံခါးပိတ်ပြီးသွား​သောအခါ လုအန်းဟယ်က အရာရှိငယ်​လေးအား ချက်ချင်း လက်ယမ်းပြလိုက်သည်။ 

"လောင်ကျီ... လောင်ကျီ ဒီကိုလာ​လေ" 

ဒုတိယ ကပ္ပတိန် ရဲ့လင်သည်လည်း လူငယ်​​လေးကို ပြုံးပြလာသည်။

 "တစ်နှစ်​တောင် ရှိသွားပြီ... မင်းက ပိုပြီး တက်ကြွလာတာပဲကွ" 

"ဟုတ်တယ်" 

လုအန်းဟယ် ကြားဖြတ်​ပြောလိုက်သည်။ 

"ကြည့်စမ်းပါဦး... မင်းက ရာထူး​ကောင်း​ကောင်း​လေး တိုးသွားတာပဲကွ" သူက အရာရှိငယ်​လေး၏ ပုခုံးကို ပုတ်လိုက်သည်။

 "စကားမစပ်... မိတ်ဆက်​ပေးရဦးမယ်... ဒါက" 

"ဟယ်လို မစ္စတာလင်း"

 လုအန်းဟယ် စကားမဆုံးခင်မှာပင် လူငယ်​လေး ကိုယ်တိုင်က လင်းဟန်ကို အရင်နှုတ်ဆက်လာကာ မျက်လုံး​လေးများက တောက်​ပ​​နေပြီး ပြုံးလိုက်သည့်အခါ သွားစွယ်​လေးများ ပေါ်လာခဲ့သည်။

 "ကျွန်​တော် ဒီ​နေရာကို လာကတည်းက နာမည် ကြားဖူး​နေတာ.. ပထမဆုံး​တွေ့ဆုံခြင်းပါ... ကျွန်​တော် နည်းနည်း​လောက် စိတ်လှုပ်ရှား​နေလို့" 

သူရပ်သွားပြီး​နောက် သူ့ကိုယ်သူ မမိတ်​​ဆက်ရ​သေး​​ကြောင်း နားလည်သွားချိန်တွင် ခေါင်းကုတ်မိလိုက်သည်။ 

"ကျွန်​တော့်နာမည် ကျီမုန့်ပါ... ကျွန်​တော်က လက်​တွေ့​လေ့ကျင့်မှု စတုတ္ထအဆင့်အတွက် ညွှန်ကြားမှု​တွေ စီစဥ်မှု​တွေကို ပူး​ပေါင်း​ဆောင်ရွက်ဖို့ ရောက်လာတာပါ" 

လုအန်းဟယ်က သူ၏ နာမည်​ပြောင်ကို ထူးဆန်းသည်ဟု လင်းဟန် ထင်သွားမည် စိုးနေသည်။ 

"မစ္စတာလင်း... 'လောင်ကျီ'ဆိုတဲ့ နာမည်က တော်​တော်​လေး လူသိများတယ်​လေ... မစ္စတာလင်း စိတ်မရှိပါနဲ့" 

ဟယ့်ယွင်ထင် မရှိသဖြင့် လူတိုင်းက စိတ်​​အေးလက်​အေး ဖြစ်​နေကြသည်။ ရဲ့လင်သည်ပင် စကားတစ်လုံး နှစ်လုံး ဝင်​ပြောလာသည်။

 "ကျီမုန့်နဲ့ လောင်လုက စစ်သင်တန်း​ကျောင်းမှာတုန်းက အိပ်စင်တစ်ခုတည်းကို မျှသုံးခဲ့တာလေ... ဒါ​ကြောင့် အရမ်းခင်တဲ့ သူငယ်ချင်း​တွေ ဖြစ်လာကြတာ... နောက်ပိုင်း နေရာ​တွေကွဲပြီး တာဝန်ချခံရ​တော့ တစ်နှစ်တစ်ခါပဲ တွေ့နိုင်ကြတယ်" 

လင်းဟန်က သူ့​ရှေမှ လူငယ်​လေးကို ကြည့်ကာ နာမည်နှင့်လူက အ​တော်​လေး လိုက်ဖက်သည်ဟု မထင်မှတ်ဘဲ ခံစားလိုက်ရသည်။ လင်းဟန်အား တွေ့လိုက်ရသည့်အတွက် စိတ်လှုပ်ရှား​နေခြင်း ဖြစ်မည်၊ကျီမုန့်၏ မျက်နှာက နီရဲ​နေပြီး အသံက ရှင်းလင်း​နေသည်။

 "ဟုတ်တယ်... ကျွန်​တော် အခုသုံး​နေတဲ့ မက်ခါက မစ္စတာလင်း လုပ်တဲ့ မက်ခါ​တွေနဲ့ တစ်သုတ်တည်းပါ... ဒါ​ကြောင့် အခုလို လူကိုယ်တိုင် တွေ့လိုက်ရ​တော့ အရမ်းပျော်​မိသွားတာ... တောင်းပန်ပါတယ်" 

သူ၏ စိတ်အားထက်သန်မှုက လင်းဟန်ကိုပါ ကူးစက်သွားပြီး ပြုံးမိသွား​လေကာ သူ့အား ပြန်နှုတ်ဆက်လိုက်သည်။ 

လင်းဟန်က ဤရက်များအတွင်း လက်အိတ်မဝတ်ထားမိဘဲ ကျီမုန့် လက်ဆန့်ထုတ်လာ​သောအခါတွင်လည်း ပြန်၍ လက်ဆွဲနှုတ်ဆက်လိုက်သဖြင့် အရာရှိငယ်​လေး၏ လေးစားမှုများ ယိုဖိတ်​နေသည့် အ​တွေးများကို ကြားလိုက်ရ​လေသည်။ 

【အား... မစ္စတာလင်းနဲ့ တကယ်ကြီး တွေ့ခဲ့ရပြီ】 

【စိတ်လှုပ်ရှားလိုက်တာ】 

"ကျွန်​တော်က နှစ်တိုင်း ပြိုင်ပွဲရဲ့ တာဝန်ရှိသူ ဖြစ်လာတာ... ဒီနှစ်က​တော့ မစ္စတာလင်း ပထမဆုံး ရောက်လာတဲ့ နှစ်ပဲ" ကျီမုန့်က လက်ကို ပြန်ရုတ်ကာ စိတ်လှုပ်ရှားမှုများ မထိန်းနိုင်​တော့​ပေ။ 

"တောင်းပန်ပါတယ် မစ္စတာလင်း... ဒီ​နေ့ သူငယ်ချင်း​ဟောင်း​တွေနဲ့ ဆုံရတာရယ် မစ္စတာလင်းကို တွေ့ရတာရယ် အရမ်း​ပျော်တာပဲ" 

ကျီမုန့်က လန်းဆန်းတက်ကြွ​နေ​သော ခံစားချက် ပေးနိုင်သဖြင့် လင်းဟန်ကလည်း အမှုမထားဘဲ လက်ယမ်းပြလိုက်သည်။

 "ရပါတယ်" 

ကျီမုန့်မှာ ဟယ့်ယွင်ထင် ပြန်မလာခင်အထိ လုအန်းဟယ်နှင့် ပွဲကျ​နေသည်။ နှစ်​ယောက်သား အမှန်ပင် နှစ်​ပေါင်းများစွာတိုင် သူငယ်ချင်းများ ဖြစ်လာကြပြီး အချင်းချင်းအ​ပေါ် လေးနက်​သော ခံစားချက်များ ရှိပုံရသည်။ နောက်တွင် ကျီမုန့်မှာ ထပ်ပြီး ပျာယာခတ်သွား​လေပြီး​နောက် စကားသိပ်မ​ပြော​တော့​ပေ။ 

လုအန်းဟယ်က ဟယ့်ယွင်ထင်​နောက်သို့ အချိန်အ​တော်ကြာ လိုက်ခဲ့ရသဖြင့် မည်သည့်စကားမဆို ပြောရဲ​သော်လည်း ကျီမုန့်မှာ ဟယ့်ယွင်ထင်အား ရံဖန်ရံခါမှ တွေ့ဖူးသည်ဖြစ်ရာ လွန်စွာ ကြည်ညို​လေးစားမှုများနှင့် ဆက်ဆံ​နေသည်။ သူပြန်လာသည်ကို မြင်​သောအခါ အ​လေးပြုလိုက်ပြီး​နောက် တာဝန်ကျရာ နေရာသို့ ပြန်သွား​လေသည်။ 

ဟယ့်ယွင်ထင်က စကားတစ်ခွန်းမှ မ​ပြောဘဲ လင်းဟန်ကိုသာ ကြည့်၍ ထိုင်ခုံ​နေရာသို့ ပြန်သွားထိုင်လိုက်သည်။

အရာရာတိုင်းက အစီအစဥ်အတိုင်း ဖြစ်​နေပြီး ဝမ်ထျန်းယောင်သည်လည်း လှည့်ပတ်ကြည့်ရှုခဲ့လာပြီး​နောက် မကြာခင် ပြန်ထွက်သွား​လေသည်။ 

နေ့တစ်ဝက်ခန့်အကြာ ဆူညံသံများနှင့်အတူ သင်္ဘောကြီးက အရှိန်​​နှေးလာ​လေသည်။ 

၎င်းက ဦးတည်ရာ​နေရာသို့ တဖြည်းဖြည်း ရွက်လွှင့်လာခဲ့ပြီး နယ်နိမိတ်မျဥ်း​နေရာရှိ အထူးသီးသန့် ဆင်းသက်ရာ​နေရာတွင် ဆိုက်ကပ်လိုက်လေသည်။ 

နှစ်စဥ် ကျင်းပမြဲ ကွင်းဆင်း​လေ့ကျင့်မှု စတင်​တော့မည်ပင်။ 

*****

စတုတ္ထအကြိမ် လက်တွေ့လေ့ကျင့်မှု ပုံစံကား မရှုပ်ထွေးချေ။

ပိုင်း‌လော့(မောင်းနှင်သူ)အားလုံးကို အုပ်စုနှစ်ဖွဲ့ခွဲကာ လေ့ကျင့်မှုအား အပိုင်းနှစ်ပိုင်းခွဲထားသည်။ ပထမအပိုင်းမှာ စစ်ရေးလေ့ကျင့်မှုပြုလုပ်ရန် ခဲယမ်းများ ဖြည့်သွင်းထားသောမက်ခါများဖြင့် စစ်ရေးလေ့ကျင့်မှုဖြစ်ပြီး ပုံမှန်စစ်ရေးလေ့ကျင့်မှုများနှင့် ဆင်တူသည်။ နှစ်ဘက်စလုံးက တစ်ဖက်နှင့်တစ်ဖက် ယှဉ်ပြိုင်တိုက်ခိုက်ကြပြီး နောက်ဆုံး ဆုံးဖြတ်ချက်မှာ ခဲယမ်းမီးကျောက်များ ဖုံးလွှမ်းသည့်ဧရိယာနှင့် ကျန်ရှိသည့်‌မောင်းနှင်သူအရေအတွက် ဖြစ်သည်။

ထူးထူးချွန်ချွန်စွမ်း‌ဆောင်နိုင်ခဲ့သူများမှလွဲ၍ ရှုံးနိမ့်သည့်ဘက်မှသူများမှာ ဖယ်ထုတ်ခံရမည်။

အနိုင်ရရှိသောအုပ်စုအတွက်မူ အခြေအနေပေါ်မူတည်၍ တစ်နှစ်နှင့်တစ်နှစ်ကွဲပြားသည့် စမ်းသပ်မှုအသစ်တစ်ခုရှိသည်။ လေ့ကျင့်ရေးအားလုံးအား အောင်မြင်ပြီးသူများသာ အခြေစိုက်စခန်း၏ အစိတ်အပိုင်း ဖြစ်လာပြီး ၎င်းတို့၏ ကိုယ်ပိုင်မက်ခါများရှိကြလေမည်။

သင်္ဘောသည် ကမ်းနားတွင် ဆိုက်ကပ်ခဲ့ပြီး ရေတွက်ပြီးသည့်နောက် မက်ခါများကိုအမှတ်စဉ်တပ်၍ အုပ်စုများခွဲကာ နောက်ဆုံးအကြိမ်စစ်ဆေးမှုများကို စတင်သည်။

လင်းဟန်မှာ ထွက်ခွာချိန် နောက်ကျခဲ့သောကြောင့် သူ၏မက်ခါကို မစစ်ဆေးရသေးသော်လည်း တရားဝင်မစတင်မီတွင် လင်းဟန်က ၎င်း၏နံပါတ်ကို လက်ခံရရှိခဲ့သည်။ အာမခံဆိုင်ရာရည်ရွယ်ချက်အတွက် ကျီမုန့်၏မက်ခါဆီသို့ သွားလိုက်သည်။

လင်းဟန် ကျီမုန့်၏မက်ခါခန်းထဲသို့ ဝင်သွားသည့်အခါ တစ်ဖက်လူမှာ တစ်စုံတစ်ခုကို နူးညံ့စွာ ဆိုညည်းနေသည်။ သိသာထင်ရှားစွာ သူသည် ရာထူးအဆင့်တွင် ဗိုလ်တစ်ယောက်ဖြစ်နေပြီဖြစ်သော်လည်း ကျီမုန့်၏အသံမှာ သူ၏နာမည်ကဲ့သို့ ငယ်ရွယ်သည့်ခံစားမှုကို ပေးလေသည်။ သူ တီးတိုးဆိုညည်းနေလျက်ရှိသည့် တေးသံစဥ်သည်  ရှေးရိုးရာသီချင်းတစ်ပုဒ်ကဲ့သို့ တေးသွားများရှိကာ အမှတ်တရများနှင့် ပုံပြင်များကို သတိရစေသည်။

 (" တောအုပ်အပြင်မှာ လမ်းလျှောက်နေတဲ့ လူငယ်လေး ....

....ဒီလူငယ်ကို ပထမဆုံးအကြိမ် တွေ့ဖူးခြင်းဖြစ်တယ်၊ တိမ်တွေအရိပ်တွေနဲ့အတူ လှည့်လည်သွားလာနေခဲ့တယ် ....

…သူ ချစ်မိသွားခဲ့တယ်…...)

ကျီမုန့်ရပ်တန့်ကာ ရှက်ကိုးရှက်ကန်းဖြင့် ခေါင်းညိတ်မပြလာမီ လင်းဟန်သည် စာသားအနည်းငယ်ကို ယောင်ဝါးဝါးဖြင့် ကြားရုံမျှသာ ကြားခဲ့သည်။

" မစ္စတာလင်း တောင်းပန်ပါတယ် "

လင်းဟန်က ပြုံးပြလိုက်သည်။ " အဲ့ဒါက အရမ်းကောင်းပါတယ် "

" တကယ်လား "

ကျီမုန့်က သွားစွယ်လေးများကိုပြသသည်အထိ ပြုံးပြလာသည်။

" ကျောင်းတက်တုန်းက သီချင်းကို ကြားခဲ့ဖူးတာပါ။ အဲ့ဒါရဲ့နာမည်ကိုတောင် မမှတ်မိတော့ဘူး။ ဟိုးရှေးရှေးတုန်းကနေ  ဆင်းသက်လာခဲ့တာလို့ ကျွန်တော်ကြားခဲ့တယ်။ အရမ်းကြိုက်သွားတာနဲ့ မက်ခါ သီချင်းဖွင့်စက်ထဲ ထည့်ထားခဲ့တာ "

လင်းဟန်က " တကယ် " ဟု ပြောလိုက်ပြီး တစ်ဖက်လူထံမှ တောက်ပသည့်အကြည့်ကို ရရှိပြီးနောက်မှာ သူ၏ မက်ခါဆီသွားကာ debugging(error စစ်) လုပ်ရန် ကူညီပေးလိုက်သည်။

လွန်ခဲ့သည့် နှစ် နှစ်ခန့်က လုပ်ဖော်ကိုင်ဖက်တစ်ဦးနှင့်အတူ လင်းဟန်တီထွင်ခဲ့သော ကျီမုန့်၏အဆင့်မြင့်မက်ခါတွင် အနီးကပ်တိုက်ခိုက်မှု အတွက် အလင်းအလျင်ဒုန်းအမြောက်နှင့် တာဝေးပစ်တိုက်ခိုက်မှု‌အတွက် တိုတောင်းသည့်စွမ်းအင်သိုလှောင်မှုအတွင်း အသုံးပြုနိုင်သည့်  ကလပ်စ်တာ လေဆာအမြောက်များ တပ်ဆင်ထားသည်။ ကာကွယ်ရေးစနစ်မှာလည်း တာတိုနှင့် တာဝေးကာကွယ်ရေးအတွက် ဇုစ်နတ်ဘုရားဒိုင်းကာကဲ့သို့ မကျော်ကြားသော်လည်း အခြားအလားတူ မက်ခါများနှင့် နှိုင်းယှဉ်လျှင် ထိပ်ဆုံး၌ရှိနေဆဲပင်။

လင်းဟန်က သိချင်စွာဖြင့်  ရုတ်တရက်  မေးလိုက်သည်။ 

" ခင်များရဲ့ မက်ခါက နာမည်ရှိလား "

ကျီမုန့်သည်  " ရှိတယ် " ဟု ပြန်မပြောမီ ခေတ္တခန့် အေးခဲသွားပုံရလေသည်။ သူက တစ်ခုခုကို ပြန်တွေးမိသွား‌သည်။ 

" ကျွန်တော်အရင်က အရယ်ခံခဲ့ရဖူးတယ် ။ ကျွန်တော့်မက်ခါက ကျွန်တော့်နာမည်လို မိန်းမဆန်တယ်ဆိုပြီးတော့လေ "

ကျီမုန့်၏နာမည်သည် သူ့အား အမှန်တကယ်ပင် အတင်းအဖျင်းများရှိစေခဲ့သည်မှာ ဖြစ်ကောင်းဖြစ်နိုင်သောကြောင့် လင်းဟန်က ရပ်တန့်သွားသည်။

" ကျွန်တော့်ကို မပြောပြလဲ အဆင်ပြေပါတယ်။ တောင်းပန်ပါတယ် "

" ဘယ်ရီသီးနီ " 

သို့သော် ကျီမုန့်က လက်ဦးမှုယူကာ ပြောလိုက်သည်။

" သူ့နာမည်က ဘယ်ရီသီးနီပါ " 

ကျီမုန့်က အလာသုံးဆယ် မေးလာသည်။ 

" ဒါက ထူးဆန်းနေလား "

" မဟုတ်ဘူး " 

လင်းဟန်က သူ့အသံကို ပျော့ပျောင်းလိုက်သည်။

" အဲ့ဒါက နာမည်ကောင်းပါ။ အဲ့ဒါက အဓိပ္ပါယ်တစ်ခုခု ကျိန်းသေရှိရမယ် "

လင်းဟန်သည် ခလုတ်ကို ညင်သာစွာ နှိပ်လိုက်ရာ မက်ခါ AI စနစ်မှ နူးညံ့သောအမျိုးသမီးအသံကို ကြားလိုက်ရသည်။

" မင်္ဂလာပါ ဂျူနီယာ "

" ဘယ်ရီသီးနီ K1 ၊ ကိုယ်တိုင်စမ်းသပ်မှု ပရိုဂရမ် စတင်ပါပြီ "

အချို့သော AI အသံပရိုဂရမ်များကို  တုပဖန်တီးကာ သတ်မှတ်ထားသောကြောင့် ကျီမုန့်သည် လင်းဟန်ကို ထိတ်လန့်စွာ ကြည့်လိုက်မိသည်။ တစ်ဖက်သူသည် သူ၏အသံစနစ်အား မည်သို့မျှ စိတ်မ၀င်စားကြောင်း တွေ့ရှိလိုက်ရကာ စိတ်သက်သာရာရသွားသည်။ ၎င်းသည် လေ့ကျင့်ရေးဖြစ်သောကြောင့် ဝန်ကို လှုံ့ဆော်၍ ခုခံကာကွယ်ရေးအပိုင်းမှာ အထူးတလည် မွမ်းမံထားခြင်းမရှိကာ ပုံမှန်စက်ပစ္စည်းများကိုသာလျှင် ဆက်လက်အသုံးပြုထားသော်လည်း ထိုသည်က လုံလောက်လေသည်။

လင်းဟန်သည် ထိန်းချုပ်မှုခလုတ်နှင့် အတွင်းပိုင်းစနစ်များကို စစ်ဆေးပြီး မမျှော်လင့်ထားသည့်အရာများမရှိကြောင်း အတည်ပြုပြီးနောက် မက်ခါခန်းမှ ထွက်သွားကာ စစ်သင်္ဘောကုန်းပတ်ဆီသို့ ပြန်သွားလိုက်သည်။

ပိုင်းလော့အသစ်များ၏ ချိန်ညှိခြင်းနှင့်ပတ်သက်၍အတွက်မူကား လေးလံသောအလုပ်၀န်များကြောင့် ၎င်းတို့အား အခြေစိုက်စခန်းမှ ဦးစွာစစ်ဆေးလေ့ရှိကာ မတော်တဆမှု တစ်စုံတစ်ရာရှိမှသာလျှင် အထူးငှားရမ်းထားသော မက်ခါပြုပြင်သူထံ သတင်းပို့ကြမည်ဖြစ်သည်။ လင်းဟန်က ပုံမှန်မဟုတ်သောအစီရင်ခံစာများကို လက်ခံမရရှိခဲ့‌ချေ။ ထွက်ခွာသည့်လုပ်ငန်းစဉ်တစ်ခုလုံးကို စောင့်ကြပ်ထားပြီး အရာအားလုံးမှာ လုပ်ငန်းစဉ်အတိုင်း ပြီးဆုံးသွားခဲ့သည်။

စစ်ဆေးမှုအလွန်အမင်းလိုအပ်နေသောပိုင်းလော့လောင်းများအပြင် စစ်သင်္ဘောတွင်လည်း အခြေစိုက်စခန်းတပ်ကြပ်ကြီးအချို့ပါ၀င်သည်။ ထက်၀က်ပမာဏသည် လက်ရွေးစင်အဖွဲ့မှဖြစ်ကာ မမျှော်လင့်ထားသည့်အခြေအနေများအတွက် ဖြစ်ပေသည်။ ထို့အပြင် အရှင့်သား ၀မ်ထျန်းယောင်သည်လည်း စစ်သင်္ဘောနှင့်အတူ သူ၏ကိုယ်ပိုင်လက်‌ရွေးစင်များကို ခေါ်ယူလာခဲ့သည်။

မကြာခင်မှာပင် ကျီမုန့်သည်လည်း သူ၏မက်ခါပေါ်မှ ဆင်းသက်လာသည်။

လုအန်းဟယ်က သူ့ကို နှုတ်ဆက်လိုက်ပြီး နောက်ဆုံးတော့ သူတို့နှစ်ဦးသည် တစ်နှစ်မှာ တစ်ကြိမ်သာ တွေ့ဆုံကြရသဖြင့် ပြောစရာစကားများ အလွန်များလေသည်။

  လုအန်းဟယ်သည် အပူအပင်ကင်းကာ သွက်လက်သောလူတစ်ယောက်ဖြစ်သောကြောင့် ကျီမုန့်၏ပခုံးကို မှီလျက် စကားစမြည်ပြောနေသည်။ ၎င်းတို့သည် လုအန်းဟယ် မကြာသေးမီက စုဆောင်းထားသည့် သရေစာများကဲ့သို့‌ အသေးအမွှားအကြောင်းအရာများမှသည် ဇုစ်နတ်ဘုရားဒိုင်းကာ နောက်ဆုံးပေါ် လေ့ကျင့်ရေးလုပ်စဥ်များအထိ အဆုံးမရှိပြောနေလေသည်။

ကျီမုန့်က ဆက်လက်ပြုံးကာ နားထောင်နေပြီး နှောင့်ယှက်ခြင်းမရှိရုံသာမက ရံဖန်ရံခါ တုံ့ပြန်ပေးရန်လိုအပ်သည့်အခါတွင်လည်း သူက အလွန်ပူးပေါင်းလုပ်ဆောင်ပေးကာ စကားလုံးအနည်းငယ် ဖြည့်သွင်းပေးသည်။

" တကယ်တော့ ငါ့အတွက် အရမ်းခက်ခဲတယ် " 

လုအန်းဟယ်က ကျီမုန့်ရှေ့မှာ ငိုယိုဟန်လုပ်သည်။

 " ဒီတစ်ခါ ငါ့မိန်းမကို နှစ်ကြိမ်မြောက် ဆုံးရှုံးရလုနီးပါး..."

ကျီမုန့်သည် လုအန်းဟယ်ပြောနေသည့် 'မိန်းမ'ဟူသည်မှာ မည်သူဖြစ်သည်ကို သဘာ၀အလျောက် သိရှိပေသည်။

" ဘာဖြစ်တာလဲ "

လုအန်းဟယ်က အော်ငိုလေသည်။

" သူမ  တစ်စစီဖြစ်လုနီးပါးပဲကွ "

ကျီမုန့်မှာ အကြောင်းရင်းကို မသိရှိ‌ သော်လည်း သဘာ၀ကျစွာ ပြောလိုက်သည်။

" ဒါပေမယ့် မစ္စတာလင်းက ဒီမှာ ရှိတယ်လေ။ ဒါကြောင့် တကယ်လို့ ပြဿနာရှိရင် သူ့ကို ပြင်ခိုင်းလို့ရတယ် "

".…" ဒုဗိုလ်မှူးလုသည် မည်သို့မျှ မပြောနိုင်တော့ချေ။ နောက်ဆုံးတွင် သူက မည်မျှပင် ထိန်းမနိုင်သိမ်းမရဖြစ်နေပါ‌စေ မစ္စတာလင်းကြောင့် သူ့ဇနီးသည် ကျားခံတွင်းထဲသို့ နှစ်ကြိမ် ပြုတ်ကျခဲ့ခြင်းဖြစ်သည်ဟူ၍ပြောကာ သူ့ဘော့စ်၏ဇာတ်ခုံကို မဖျက်ဆီးနိုင်ပေ။ 

ထို့ကြောင့် သူက " နောက်တစ်ခါ ပြောလိုက်မယ် " ဟုသာ ပြောလိုက်ရတော့သည်။

ကျီမုန့်က လုအန်းဟယ်မှာ အလွန်စိတ်ဝင်စားဖွယ်ကောင်းသည်ဟုထင်၍ သူ့ကိုကြည့်ကာ ရယ်နေတော့သည်။

လုအန်းဟယ်က သူ့ကို စိုက်ကြည့်နေသော်လည်း အမှန်တကယ် ဒေါသမထွက်နိုင်သောကြောင့် သူက ကူကယ်ရာမဲ့စွာဖြင့်  ကျီမုန့်၏ကျောပြင်ကို လက်နှင့်ပုတ်၍ ဒေါသများကို ပုံချသကဲ့သို့ဟန်ဆောင်လိုက်ရသည်။

" လာစမ်း၊ လောင်ကျီ၊ မင်းက ငါ့ကို ဘယ်လိုလှောင်ရမလဲပဲသိတယ် "

" ဒီလောက်နှစ်တွေကြာတာ မင်းက ဒီအတိုင်းပဲ "

သို့သော် သူတို့နှစ်ယောက် ကြာကြာစကားမပြောဖြစ်ကြချေ။ ရေတွက်ပြီးသည့်နောက် မကြာခင်မှာပဲ ဟယ့်ယွင်ထင်က ကပ္ပတိန်အခန်းထဲမှ ထွက်လာရာ ကျီမုန့်က သူ့ကို အလေးပြုလိုက်ပြီး သူ၏တာ၀န်‌ကျရာနေရာဆီသို့  ပြန်သွားတော့သည်။

*****

စာ​ရေးသူမှာ ပြောစရာရှိပါတယ်: 

QAQ ငါလာပြီ ငါလာပြီ... ဇာတ်​ကြောင်းချတာက တကယ်​တော့ ငါ့အတွက် အားနည်းချက်ပဲ... ငါလည်း အသည်းအသန် ဖြစ်​နေရတာပါ​နော်... တကယ်ပါ (ဒူး​ထောက်လျက်)

ပြီး​တော့​လေ အ​ချော​လေးတစ်​ယောက်က angst warning ထည့်​ပေးသင့်တယ်လို့ ပြောထားတယ်... ငါလည်း စိတ်ခံစားမှုများတဲ့ ဒရာမာတစ်ခုက ဇာတ်​ကောင်တစ်ခုကို တွေ့ထားတယ်... အရမ်း ဝမ်းနည်းစရာ မ​ကောင်းသင့်ဘူး​နော်... ဇာတ်​ကြောင်းက မကြာမီ တိုးတက်လာ​တော့မှာပါ... ငါ့ကို ယုံလိုက်ကြ​နော်...

👾