MM Story Teller

Chapter 68

Viewers 4k

🐯Chapter 68

ပရိသတ်က အလှည့်ကျလာနေသော အရသာရှိသည့်အစားအသောက်များကြောင့် မှင်သက်နေသည်။ သူတို့က တိုက်ရိုက်ထုတ်လွှင့်မှုမျက်နှာပြင်အပြည့် မှတ်ချက်များနှင့် လက်ဆောင်များပေးပို့နေကြ၍ တိုက်ရိုက်ထုတ်လွှင့်မှု၏ ကျော်ကြားမှုက အရှိန်အဟုန်ဖြင့် မြင့်တက်နေခဲ့သည်။ ထိုအချိန်တွင် ထုတ်လွှင့်မှု၏ ကျော်ကြားမှာအဆင့်က ဒုတိယနေရာသို့ ရောက်ရှိသွားသည်။

မတူညီသောပါဝင်ပစ္စည်းများတွင် မတူညီသောအရသာများရှိကြသည်။ သို့ရာတွင် ၎င်းတို့အားလုံးကို ချိစ်အနှစ်၏ မွှေးပျံ့သော နို့ရနံ့၊ ဝိုင်ရနံ့များဖြင့် တွဲဖက်ထားသည်။ ၎င်းကား ချိစ်ဖွန်ဒူး၏ ဆွဲဆောင်မှုဖြစ်သည်။

မြေခွေးလေးက ကုယွီမြန်၏ပွေ့ဖက်မှုထဲတွင် အစာစားနေကာ ကုယွီမြန်အား မျက်လုံးရွဲကြီးများဖြင့်မော့ကြည့်လာသည်။ နွေးထွေးလုံခြုံသော ပတ်ဝန်းကျင်ကြောင့် ပန်ဒါငယ်လေး၏ လုံးဝန်းသောခေါင်းလေးက ကုယွီမြန်၏ လက်ဖဝါးကို ပွတ်သပ်နေသည်။

ကုယွီမြန် : "..."

သူတို့အားလုံး ဘာလို့ အရမ်းချစ်ဖို့ ကောင်းနေရတာလဲ...

ယခုကဲ့သို့ ဆောင်းတွင်းနေ့လယ်ခင်းတွင် ချိစ်ဖွန်ဒူးစား၍ မိသားစုနှင့် စကားစမြည်ပြောဆိုလိုက်သောအခါ သက်သောင့်သက်သာရှိလှ၍ ကုယွီမြန် အိပ်ချင်လာသည်။

" ငါတို့ နှုတ်ဆက်စကားပြောပြီးရင် အိမ်ပြန်ပြီး တစ်ရေးတစ်မော အိပ်ကြရအောင်..."

ကုယွီမြန်က နှင်းကျားသစ်လေး၏ လက်ဖဝါးကိုကိုင်ကာ နူးညံ့သောလက်ဖဝါးလေးကို တို့ဆိတ်နေသည်။ ထို့နောက်မြေခွေးလေး၏ အမြှီးပွပွကို ကူညီပြုပြင်ပေးရင်း မေးလိုက်သည်။

" ချိုးချိုးကရော သိပ္ပံအကယ်ဒမီမှာနေမလား ချိုးချိုးအိမ်က ဘယ်မှာလဲ..."

ကုယွီမြန်က အနည်းငယ်တွန့်ဆုတ်နေမိ၏။ ထို့ကြောင့်ခေါင်းစဥ်ကို အလျင်အမြန်ပြောင်းလဲလိုက်သည်။ သူက သူ၏ပေါင်ပေါ်တွင် လဲလျောင်းနေသော ပန်ဒါလေး၏ ဝမ်းဗိုက်ကို ပွတ်သပ်ပေးလိုက်သည်။

" ယွမ်ယွမ် ဗိုက်ဝရဲ့လား စားချင်သေးလား..."

ပန်ဒါလေးက ပျော်ရွှင်သောအသံလေးများ ထုတ်လွှတ်လာသည်။ သူက အနည်းငယ် ထပ်စားချင်နေသေးသော်လည်း အိပ်ချင်စိတ်ကို မလွန်ဆန်နိုင်ချေ။ ကုယွီမြန်၏ မျက်လုံးများ ကွေးညွတ်သွားရသည်။

သူတို့ထိုင်ခုံက ပြူတင်းပေါက်အနီးတွင်ရှိပြီး အပြင်ဘက်တွင် နှင်းများကျဆင်းနေသည်ကို မြင်တွေ့နိုင်သည်။ ကျဆင်းနေသောနှင်းများက ပတ်ဝန်းကျင်ကို တစ်လွှာပြီးတစ်လွှာဖုံးအုပ်သွား၏။

ခုံနံဘေးတွင် မီးလင်းဖိုတစ်ခုရှိပြီး မီးသွေးကွဲသံတစ်ချောက်ချောက်ကို ရံဖန်ရံခါကြားနိုင်လေ၏။ တိုက်ရိုက်ထုတ်လွှင့်မှုက နဂိုစိတ်လှုပ်ရှား ပွက်လောရိုက်နေသည့်အခြေအနေမှ အေးဆေးငြိမ်သက်မှုကို ပြန်လည်ရရှိသွားသည်။ အရာအားလုံးက ကုယွီမြန်၏ အပြုအမူများနောက်တွင် အလိုက်တသင့်ကပ်ပါလာ၏။

မွှေးပျံ့သော ချိစ်ဖွန်ဒူးရနံ့နှင့်အတူ လေထုထဲတွင် မီးသွေးနံ့ သစ်ကြံပိုးခေါက်နံ့တို့ ဝဲလွင့်နေသည်။

နှင်းကျားသစ်လေးက ကုယွီမြန်၏ ပခုံးပေါ်တွင်ပျင်းရိစွာ လှဲလျောင်းနေပြီး ပန်ဒါလေးနှင့် မြေခွေးလေးတို့က ကုယွီမြန်၏ ပွေ့ဖက်မှုအတွင်း အိပ်ချင်မူးတူးရှိနေကြသည်။ ကုယွီမြန်က လူတို့အား အိမ်၏ အငွေ့အသက်ကို မြင်ယောင်လာအောင်ပေးစွမ်းနိုင်သူဖြစ်လေသည်။

သူ၏ကိုယ်ပေါ်မှ လျှံထွက်နေသော နူးညံ့သိမ်မွေ့သည့် ဆွဲငင်အားကို ဖုံးကွယ်ထား၍မရပေ။ လူအချို့က ဤသို့ဆောင်းရာသီမျိုးကို စိတ်ကူးယဥ်ရုံမျှသာ တတ်နိုင်ကြ၏။

မီးဖိုကို ပတ်လည်ရံ၍ မိသားစုစုံစုံညီညီထိုင်ကာ စကားစမြည်များပြောကြပြီး နွေးထွေးသောအငွေ့အသက်အောက်တွင် တရေးတမောအနားယူကြမည်။ အိပ်ရာနိုးချိန်တွင် နှင်းများကျဆင်းခြင်း ရပ်တန့်သွားပါက နှင်းလူသားများပြုလုပ်နိုင်ပြီး နှင်းမစဲပါကလည်း ဆက်လက်၍ အနားယူရနိုင်သည်။

မှတ်ချက်ကဏ္ဍက ထူးထူးခြားခြား ငြိမ်းချမ်း၍နေသည်။

[သစ်တော်ပွင့်ဖြူလေး လီလီ : မြန်မြန် ခေါ်လာပေးတဲ့ ဆောင်းရာသီကို အရမ်းသဘောကျတာပဲ… ငါတို့ရဲ့ သာမန်လူတန်းစားနယ်မြေကိုရော ဘယ်တော့လာမှာပါလိမ့်…]

[မွေးရပ်မြေက နွေဦးနဲ့ဆောင်းဦး : နှင်းတွေကြည့်ချင်လိုက်တာ အိမ်ကိုလွမ်းတယ်…]

လေထုက မည်မျှပင် ငြိမ်သက်အေးချမ်းနေပါသော်လည်း တိုက်ရိုက်ထုတ်လွှင့်ခန်းအပေါ် အကြံပြုချက်များနှင့် ဆောင်းပါးများက အရှိန်အဟုန်ဖြင့်တိုးနေဆဲဖြစ်သည်။ ပရိသတ်များ၏ အားမာန်အပြည့်ဖြင့် အကြုပြုကြသည့်အတွက် နောက်ဆုံးရလဒ်ကား အံ့အားသင့်ဖွယ်ဖြစ်လာသည်။

တိုက်ရိုက်ထုတ်လွှင့်မှု၏ ကျော်ကြားမှာနှင့် ကြည့်ရှုသူအရေအတွက်က ဆက်လက်မြင့်တက်နေဆဲဖြစ်သည်။

ဤသို့ဖြင့် ကုယွီမြန်၏ တိုက်ရိုက်ထုတ်လွှင့်မှုက ကျော်ကြားမှုအဆင့်တွင် ပထမနေရာသို့ရောက်ရှိသွားတော့၏။

ပထမနေရာဖြစ်သည်။

ဆိုလိုသည်မှာ ယခုအချိန်တွင် ကြယ်တာရာကောင်းကင်မြို့ အင်တာနက်ပလတ်ဖောင်းတစ်ခုလုံးတွင် ကုယွီမြန်၏ တိုက်ရိုက်ထုတ်လွှင့်မှုက အကျော်ကြားဆုံးဖြစ်သည်။ သူက မည်သည့် ထိပ်တန်းတင်ဆက်သူထက်မဆိုပင် ကျော်လွန်သွားသည့်အဓိပ္ပာယ်ပင်။

တစ်ချိန်တည်းတွင် ကုယွီမြန် တိုက်ရိုက်ထုတ်လွှင့်ခန်း၏ တစ်နေ့တာကျော်ကြားမှုသာမက တစ်ပါတ်စာကျော်ကြားမှုကပါ မယုံနိုင်လောက်အောင် မြင့်တက်သွား၏။ သုတေသီများ၏ တုံ့ပြန်မှုသာမက စခရင်ကိုဖြတ်၍ မြင်ရသော ပရိသတ်များ၏ မှတ်ချက်များကပင် အလွန်ကောင်းမွန်နေခဲ့သည်။

ဤအလုပ်သရဲအုပ်စုက သူတို့၏အချိန်ကို နေ့မရွေးညမရွေး သုတေသနစမ်းသပ်ချက်များလုပ်၍ ကုန်ဆုံးကြရသည်။ အလုပ်မပြီးပါက စိတ်ချလက်ချကျောခင်းရန်ပင် မလွယ်ကူချေ။ ယခုမူ နွေးထွေးသောချိစ်ဖွန်ဒူးကို အရသာရှိရှိ စားသောက်ပြီးနောက် အိပ်ချင်စိတ်၏ တိုက်ခိုက်မှုကို မတွန်းလှန်နိုင်ဖြစ်လာကြရ၏။

သို့ရာတွင် ဆောင်းတွင်း၌ သုံးလွှာရှိ ထမင်းစားဆောင်က အနည်းငယ်အအေးဓာတ်ပိုကာ မိမိအိမ်မဟုတ်သည့်အလျောက် အိပ်ပျော်ရန်လုံလောက်သည့် စိတ်လုံခြုံမှုမရရှိနိုင်ပေ။

အခန်းထောင့်ရှိ လေထုကသာ တမူထူးခြားနေခဲ့သည်။

မြေခွေးလေးနှင့် ပန်ဒါလေးက ကုယွီမြန်၏ လက်မောင်းကြားတွင် အိပ်မောကျနေကြပြီး စိတ်မပျော်ရွှင်သော နှင်းကျားသစ်လေးကသာ ကုယွီမြန်၏ ပခုံးကိုမောင်ပိုင်စီးထားပြီး အိပ်မပျော်နိုင်သူဖြစ်လေသည်။

ကုယွီမြန်က နှင်းကျားသစ်လေးကို သူ့ပခုံးပေါ်တွင်နားနေစေပြီး စားပွဲရှင်းရန် ရည်ရွယ်ချက်ဖြင့် ထရပ်လိုက်သည်။

ထို့နောက် မထင်မှတ်ထားသောအရာနှင့် ကြုံတွေ့လိုက်ရ၏။ တစ်စုံတစ်ရာက သူ၏ခြေထောက်နားတွင်ကပ်နေသည့်အတွက် ကုယွီမြန်ကငုံ့ကြည့်လိုက်သည်။

၎င်းမှာ ငြိမ်ငြိမ်လေး အိပ်မောကျနေသော ယုန်တစ်ကောင်ဖြစ်သည်။ ၎င်း၏ဘေးတွင် ရှီဘာခွေးလေးတစ်ကောင်အိပ်နေ၏။ ထို့နောက်တွင် ရက်ဒေါကြောင်လေးတစ်ကောင်ကလည်း ခွေးလေးကို ကုပ်တွယ်၍ အိပ်ပျော်နေပြန်၏။

ကြီးကြီးငယ်ငယ်တိရစ္ဆာန်လေးများက ကုယွီမြန်ကို ပတ်လည်ဝိုင်း၍ ငြိမ်သက်စွာအိပ်ပျော်နေကြသည်။

အခြား ခုံနေရာများက လစ်လပ်နေကာ သုတေသီတစ်ဦးတစ်ယောက်ကိုပင်မတွေ့ရချေ။ ၎င်းမှာ အလွန်ထူးဆန်းသော လူသားသံလိုက်စက်ကွင်းကြီးကဲ့သို့ပင်။

ကုယွီမြန်က ဖြစ်ပျက်နေသည့်အရာများကိုသဘောပေါက်သွားသောအခါ အနည်းငယ်ရှက်ရွံ့သွားသည်။ သို့သော်လည်း သူက ဤအမွေးပွအုပ်စုကြီးကို မချစ်ခင်ဘဲမနေနိုင်ချေ။

နှင်းကျားသစ်လေး : "..."

[တောက်ပတဲ့ အနီရောင်မြောင်: သောက်ကျိုးနည်း ဟားဟားဟား… တင်ဆက်သူနဲ့သားပေါက်တွေရဲ့ပုံကိုကြည့်ရတာ ရင်ထဲထိတယ်ကွာ...]

[ကြောင်လေးရဲ့မြောင်: ချဥ်စူးနေတာပဲ အားးးး… ဘယ်သူက မြန်မြန့်ဘေးမှာ မအိပ်ချင်ဘဲနေမှာလဲ နေ့တိုင်းစခရင်ပေါ်ကနေပဲမြင်နေရတယ် အပြင်မှာလည်းတွေ့ချင်တာပေါ့လို့… ]

[ဖြတ်လျှောက် အေ: သံလိုက်လူသား ပါရမီလား…]

[ဆိုဒါ နံပါတ်တစ်: စာဖတ်တာက ဘဝကိုပြောင်းလဲစေနိုင်တယ်ဆိုတာအမှန်ပဲ… ဒီလူတွေက ၉၀ရာခိုင်နှုန်းသောလူတွေ မလုပ်နိုင်တဲ့ အရာတစ်ခုကို လုပ်လိုက်နိုင်ပြီလေ ငါသာအမှတ်နည်းနည်းပိုရခဲ့ရင် အဲအုပ်စုထဲရောက်နေလောက်ပါပြီ…]

ကုယွီမြန်က ပြတင်းပေါက်နားရှိ အပူပေးမီးဖိုအနီးတွင် ထိုင်နေသည်။ ပြတင်းပေါက်တွင် နှင်းခဲများတင်ရှိနေပြီး တောက်ပသော မိုးပြာရောင်ကောင်းကင်က ဆောင်းတွင်းနေ့လယ်ခင်းတစ်ခုကို ပြသနေသည်။ အခန်းတွင်း၌ အိုးအချို့မှ အငွေ့များထွက်ပေါ်နေဆဲဖြစ်သည်။

ကုယွီမြန်က ခပ်ပါးပါးပြုံးလိုက်သောအခါ လူငယ်လေး၏ ဆွဲဆောင်မှုရှိသော နှုတ်ခမ်းဘေးတွင် ပါးချိုင့်သေးသေးလေးတစ်ခု ပေါ်ထွက်လာသည်။ သူ၏ ပခုံးပေါ် လက်မောင်းကြားနှင့် ခြေထောက်ဘေးနေရာအနှံ့တွင် အမွေးလုံးလေးများစွာ ပြည့်နှက်နေသည်။ ၎င်းက တစ်နည်းတစ်ဖုံ နူးညံ့သိမ်မွေ့ပြီး နွေးထွေးသောအငွေ့အသက်တို့ ရရှိနိုင်လေသည်။

၎င်းဓာတ်ပုံက နူးနူးညံ့ညံ့ဂျပန်ရုပ်ရှင်တစ်ခုနှင့်တူသည်။

ပရိသတ်များသည် ကင်မရာမှတစ်ဆင့် နူးညံ့သောဝမ်းဗိုက်များကို လှန်၍ သတိကင်းကင်းနှစ်ခြိုက်စွာအိပ်ပျော်နေသော သားရဲပေါက်များကိုမြင်နေရသည်။ ထိုအခါ ရုပ်မြင်သံကြားနှင့် သတင်းအစီအစဥ်များတွင် မြင်တွေ့ရလေ့ရှိသော သိပ္ပံအကယ်ဒမီမှ တသီးတသန့်ဆန်သည့် သုတေသီများကို မြင်ယောင်မိသွားကြသည်။

ပရိသတ်များ၏ စေတနာပါသော မှတ်ချက်များဖြင့် ပြုပြင်ထားခြင်းမရှိသော ဓာတ်ပုံများက သူငယ်ချင်းအသိုင်းအဝိုင်းများထံသို့ ပျံ့နှံ့သွားသည်။ ထို့နောက် အမှန်တရားကို မသိသော လူထုမှတစ်ဆင့် ကိုယ်ပိုင်ဘလော့အငယ်စားများဆီသို့ ပျံ့နှံ့သွားပြန်သည်။

[ ဒါရုပ်ရှင်ပိုစတာလား… ကောင်ချောလေးနဲ့ သားပေါက်လေးတွေက အရမ်းချစ်ဖို့ကောင်းတာပဲ… မျက်ရည်ဝဲနေပါပြီ ထွက်တာနဲ့ ငါတော့ကြည့်ပြီပဲ… ]

ဓာတ်ပုံက အင်တာနက်ပေါ်သို့ရောက်ရှိသွားသောအခါ သိပ္ပံအကယ်ဒမီနှင့် သက်ဆိုင်သော စကားလုံးများပင်မလိုအပ်ဘဲ ပြန်လည်ဝေမျှသူဦးရေက သန်းချီရောက်ရှိသွားသည်။ ကိုယ်ပိုင်ဘလော့ငယ်များ သက်ဝင်လှုပ်ရှားသော နေ့လယ်ခင်းအချိန်တွင် ထိုဓာတ်ပုံက ထိပ်တန်းရှာဖွေမှုစာရင်းသို့ ရောက်ရှိသွားလေ၏။

ဤအဖြစ်အပျက်က ကျော်ကြားနှင့်ပြီးဖြစ်သော ကုယွီမြန်၏ စတူဒီယိုကို အရှိန်ထပ်မံမြှင့်တင်ပေးလိုက်ပြန်သည်။ မီဒီယာ ပလက်ဖောင်းမျိုးစုံမှ ပရိသတ်များသည်လည်း အရူးအမူးဖြစ်သွားခဲ့ရ၏။

တစ်ဖက်တွင် ကုယွီမြန်က တိရစ္ဆာန်သေးသေးလေးများကို ချစ်မြတ်နိုးသူဖြစ်သည့်အလျောက် အလွန်ပျော်ရွှင်နေသည်။ ဤမြင်ကွင်းက သူ့အား အိပ်မက်မက်နေသူတစ်ဦးကဲ့သို့ ထင်မှတ်စေသည်။

သို့သော် မကြာမီတွင် ကြယ်တာရာမြို့တော်၏ ရှာလကာရည်အိုးထံမှ ချောင်းဟန့်သံထွက်ပေါ်လာသည်။ ကုယွီမြန်သာ သူ့ကိုမနှစ်သိမ့်နိုင်ပါက တစ်ဖန်စိတ်ဆိုးစိတ်ကောက် ခံရနိုင်သည်ပင်။

ကုယွီမြန်က ကိုယ်ကိုကိုင်းလိုက်ပြီး နားရွက်ရှည်ယုန်လေးအား တစ်ဖက်တွင် သက်သောင့်သက်သာအိပ်နိုင်ရန်ပြုလုပ်ပေးလိုက်သည်။ တစ်ဖန် ခြေထောက်နှစ်ဖက်ကို မိုးပေါ်သို့ထောင်၍ အိပ်ပျော်နေသော ရှီဘာခွေးကလေးကို ကူရှင်ပေါ်သို့ တင်ပေးလိုက်သည်။ ဤသို့ဖြင့် ကုယွီမြန်က နှင်းကျားသစ်လေးအတွက် လမ်းရှင်းပေးလိုက်သည်။

နှင်းကျားသစ်လေးက ထိုအပြုအမူအားလုံးကို အေးစက်စွာကြည့်ရှုနေသည်။

" ထွမ်ထွမ်..."

ကုယွီမြန်က နှင်းကျားသစ်လေးကိုချီမလိုက်သည်။ သူ၏ အပြုအမူများက သက်ရောက်မှုအနည်းငယ်ရှိသည်ကို သတိထားမိသောအခါ ကုယွီမြန်က နှင်းကျားသစ်လေး၏ နဖူးနှင့် ကျောကုန်းလေးကို ထိတွေ့ပေးနေသည်။ ထို့နောက် နှင်းကျားသစ်လေး၏ နူးညံ့သော လက်ဖဝါးများကို နမ်းရှုံ့ရင်း စိတ်ပြေအောင်ချော့မော့နေသည်။

" အားလုံးလည်းပင်ပန်းနေမှာပဲ အခုက နေ့လယ်စာစားပြီး၂နာရီထိုးနေပြီလေ အနားယူကြရအောင် ..."

သိပ္ပံအကယ်ဒမီရှိ သုတေသီများက ညဥ့်နက်ချိန်ထိ အလုပ်ဆင်းတတ်ကြသည်။ ထို့ကြောင့် နေ့လယ်ခင်း တရေးတမောအနားယူ၍ အလုပ်ပြန်တက်ခြင်းက သူတို့အတွက် အလွန်အဆင်ပြေစေမည်။

နှင်းကျားသစ်လေးက မလှုပ်ရှားချေ။ သူက သူ့အမြှီးကို ထောင်လွှားသောအမူအရာဖြင့် ယမ်းခါလိုက်သည်။ တုံးအသော ပန်ဒါဝက်ဝံဝဝနှင့် နောက်ထပ်ငတုံးမြေခွေးတစ်ကောင်နှင့်အတူအိပ်ရမည် ဟူသောအသိက သူ့အားတွန့်ဆုတ်စေသည်။

ကြမ်းပြင်ပေါ်မှာ ဘာလို့အိပ်ရမှာလဲ...

အဲဒါလူသားတွေလုပ်တာလေ ငါက နည်းနည်းပိုထူးထူးခြားခြားနေလို့မရဘူးလား...

မင်းကရော ငါ့ကိုပဲကြိုက်လို့မရဘူးလား...

" ထွမ်ထွမ်..."

ကုယွီမြန်က နူးနူးညံ့ညံ့ခေါ်ကာ နှင်းကျားသစ်လေး၏ အမွေးပွပွဦးခေါင်းလေးကို သူ့နဖူးနှင့်တိုးဝှေ့နေသည်။

" ငါမင်းကို အချစ်ဆုံးပါ..."

အချစ်ဆုံးတဲ့လား...

နှင်းကျားသစ်လေး၏ လှုပ်ရှားမှုများက နှေးကွေးသွားသည်။

ရွှယ်ထွမ်က သူ့အတွက် တစ်မူထူးခြားသည်။ သူ့ကြောင်သာ ကုယွီမြန်တစ်ယောက် အနာဂါတ်ကမ္ဘာတွင် အခြေချနိုင်ရသည့် အကြောင်းအရင်းဖြစ်သည်။ သူက ရွှယ်ထွမ်အတွက် အိမ်ဖြစ်ပေးခဲ့သလို ရွှယ်ထွမ်သည်လည်း သူ့အတွက်အိမ်ဖြစ်သည်။

နောက်ပိုင်းတွင် ကုယွီမြန်က တိုက်ရိုက်ထုတ်လွှင့်မှု ပြုလုပ်ရန် စိတ်ခွန်အားများရရှိခဲ့ပြီး ချိုးချိုးနှင့် ယွမ်ယွမ်တို့နှင့် ထပ်မံတွေ့ဆုံကာ လူပေါင်းများစွာ၏ နှစ်သက်သဘောကျမှုများကို လက်ခံရရှိခဲ့သည်။

လူငယ်လေး၏ အသံက နူးညံ့ကာ ကြည်လင်နေပြီး သူ၏အသက်ရှုသံက တိုးဖျော့ဖျော့ဖြင့် ငြိမ်သက်လှသည်။ ရွှယ်ထွမ်က ကုယွီမြန်၏ စကားလုံးများကိုကြားသောအခါ ကမ္ဘာပေါ်တွင် အချိုဆုံးသကြားခဲလေးကို ကောက်ယူမိသကဲ့သို့ ခံစားလိုက်ရသည်။

အလွန်ချိုမြိန်သည့်အတွက် မစားဝံ့ဘဲ သူ့လက်ဖဝါးထဲတွင် ဆုပ်ကိုင်သိမ်းဆည်းထားချင်မိသော်လည်း အရည်ပျော်သွားမည်ကို ကြောက်ရွံ့နေရပြန်သည်။ သူက သကြားခဲကို မည်သူမျှ လာရောက်လုယူနိုင်ခြင်းမရှိအောင် သိုဝှက်ထားလိုသော်လည်း တစ်ချိန်တည်းတွင် တစ်လောကလုံးအား သူပိုင်ဆိုင်သည့် အချိုဆုံးသကြားခဲလေးကို ကြွားဝါလိုပြန်သည်။ သူ၏ဦးနှောက်က ရပ်တန့်သွားကာ သူ့နှလုံးခုန်သံက ကျယ်လောင်မြန်ဆန်နေသည်။ သူက ထိုလူငယ်လေးအတွက် ကောင်းကင်ပေါ်ရှိ ကြယ်နှင့်လကိုလည်း ဆွတ်ခူးပေးလို၏။

တစ်ဖန် သူက ဤကဲ့သို့ပင် လွယ်ကူစွာ ချော့မြှူခြင်းခံလိုက်ရပြန်သည်။

နှင်းကျားသစ်လေးက သူ၏ ခဲပြာရောင်မျက်ဝန်းများကိုမှိတ်ကာ အမြှီးကိုခေါက်သိမ်း၍ ကုယွီမြန်၏ ရင်ဘတ်ထဲသို့ တိုးဝှေ့လိုက်သည်။ သူ၏ထောင်မတ်နေလေ့ရှိသော နားရွက်များက ဝပ်ကျနေကာ အနည်းငယ် စိတ်မရှည် စိုးရိမ်ပူပန်သော ဟန်ပန်ရှိ၏။

"..."

ပန်ဒါလေးနှင့် မြေခွေးလေး အိပ်ပျော်သွားပြီးနောက်တွင် ပရိသတ်က မြင်ကွင်းများစွာဖြင့် တိုက်ခိုက်ခံခဲ့ရသည့်အတွက် အံ့သြမှင်သက်နေကြရာ ကင်မရာမြင်ကွင်းက နှင်းကျားသစ်လေး၏ ရှုထောင့်သို့ ပြန်ရောက်သွားသည်ကိုပင် မသိရှိလိုက်ကြချေ။

[ သစ်တော်ပွင့်ဖြူလေး လီလီ : နှင်းမြေခွေးအော်သံ အားးးး… ]

[ အလှကုန်တွေကို လွှင့်ပစ်မယ် : မြန်မြန့်ကို ကြည့်ရတာ ငါ့ကိုအချစ်ဆုံးလို့ ပြောနေသလိုပဲ ခံနိုင်ရည်မရှိတော့ဘူး… အောက်ဆီဂျင်ပြတ်ပြီး ခေါင်းတွေပါမူးသွားသလိုပဲ…]

[အေဒီယူ အိတ်ချ်ယူအိတ်ခ်စ် : အရှိန်နဲ့ဝင်ဆောင့်ခံလိုက်ရသလိုပဲ နှာခေါင်းထဲမှာ ပူထူသွားတယ်… ]

[ သရဖူ : သေရောပဲ ထိချက်ကြီးက ငါ့မျက်နှာက တိုက်ရိုက်ထုတ်လွှင့်တာကြည့်ရင်းနီရဲနေလို့ ထိုင်ခုံဖော်က ငါ့ကိုချစ်မိနေတာလားလို့ မေးကုန်ပြီ…]

🐯🐯🐯

Prev Next