MM Story Teller

Chapter 69

Viewers 4k

🐯Chapter 69

မှန်ကန်သောလေထုကြောင့် ရေဆူမှတ်အတိအကျတွင် ရေနွေးပွက်ပွက်ဆူလာသကဲ့သို့ ကြည့်ရှုသူတို့၏ စိတ်အတွင်း ရီဝေဝေခံစားချက်တို့ ပျံ့နှံ့သွားလေသည်။ တစ်မူထူးခြားသော စိတ်ကျေနပ်မှုနှင့် ချိန်မြိန်သောအရသာက လူတိုင်းအား မီးရှူးမီးပန်းများကဲ့သို့ ပေါက်ကွဲသွားမယောင် ခံစားရစေသည်။

မှတ်ချက်များက ပေါက်ကွဲထွက်သွားသည်။

ကုယွီမြန်က မှတ်ချက်မျက်နှာပြင်ကိုကြည့်ကာ ညင်ညင်သာသာပြုံးလိုက်ပြီး နွေးနွေးထွေးထွေးလေထုကို ပြေလျော့စေသည်။ သူက နှင်းကျားသစ်လေးကို လက်မောင်းများအတွင်း သယ်ပိုးထားကာ စက်ရုပ်အား စားပွဲခုံကိုဖယ်ရှားစေသည်။ အခန်းတွင်းရှိမီးများကိုလည်း မှိတ်လိုက်ကာ လိုက်ကာတို့ကိုစေ့၍ အပူပေးစက်ကို အနည်းငယ်မြှင့်တင်လိုက်သည်။

သူက အိပ်ပျော်နေသော အမွေးပွလုံးများကို သက်သောင့်သက်သာရှိမည့် အနေအထားရောက်အောင် တစ်ဦးချင်းစီလုပ်ကိုင်ပေးသည်။ အေးနေသော သားပေါက်များကို စောင်ဖြင့်ထွေးပွေ့ပေးကာ အကောင်ကြီးကြီးများကို နူးညံ့သော ကူရှင်များဖြင့်အိပ်စေသည်။

ထို့နောက် သူ၏မူလနေရာတွင် တင်ပျဥ်ခွေထိုင်ကာ နှင်းကျားသစ်လေး၊ မြေခွေးလေးနှင့် ပန်ဒါလေးတို့ကို အိမ်တွင်ပွေ့သည့်အတိုင်း ထွေးပွေ့ပေးထားသည်။

မြေခွေးလေးက ကုယွီမြန်၏ လက်မောင်းကြားတွင် နေရာတစ်နေရာတွေ့၍ ငြိမ်းချမ်းစွာအိပ်ပျော်နေသည်။ ပန်ဒါလေးက ကုယွီမြန်၏ ဝမ်းဗိုက်ပေါ်တွင် လှဲလျောင်းနေပြီး ကုယွီမြန်အား ဖက်တွယ်ထားသည်။

အခန်းတွင်း၌ တိရစ္ဆာန်ငယ်လေးများ၏ အသက်ရှူသံနှင့် မီးလင်းဖိုမှ တဖျောက်ဖျောက်မြည်သံမှအပ ပကတိတိတ်ဆိတ်နေသည်။ ဆောင်းတွင်းနေရောင်က နှင်းများမှရောင်ပြန်ဟပ်၍ လိုက်ကာအဟများမှတစ်ဆင့် ကျိုးတို့ကျဲတဲကျရောက်နေသည်။

ကုယွီမြန်၏ အေးဆေးသော လှုပ်ရှားမှုများနှင့်ပေါင်းစပ်လိုက်သောအခါ ပရိသတ်သည်လည်း နွေးထွေးသွားသလိုခံစားလိုက်ရသည်။

ရှေ့တွင် ယောက်ယက်ခတ် အသက်ဝင်လှုပ်ရှားနေခဲ့သော မှတ်ချက်များက တဖြည်းဖြည်းချင်း တိတ်ဆိတ် ငြိမ်သက်လာသည်။

ပရိသတ်က ရွယ်ထွမ်၏ ရှု့ထောင့်မှကြည့်ရှုနေရခြင်းဖြစ်ကာ နှင်းကျားသစ်လေး၏ အာရုံခံစားမှုအားလုံးက သူတို့နှင့် ထပ်တူကျနေသည်။ ဤအခိုက်အတန့်တွင် သူတို့အားလုံး၏ နှလုံးသားက နူးညံ့မှုအတွင်း နစ်မြုပ်နေသည်။

ထို့နောက်တွင် မြင်ကွင်းက အမှောင်ကျသွား၏။

ထိုအချိန် အကြားအာရုံက ကြည်လင်သထက် ကြည်လင်ပြတ်သားလာသည်။ လူငယ်လေး၏ စည်းချက်မှန်မှန်အသက်ရှူသံနှင့် လုံခြုံသောခံစားချက်ပေးစွမ်းသည့် နှလုံးခုန်သံကိုလည်း ကြားနေရသည်။ လေထုထဲ၌ နှစ်လိုဖွယ် အသံများပြည့်နှက်နေသကဲ့သို့ပင်။ နောက်ဆုံးတွင်မူ ပတ်ဝန်းကျင်ရှိ အသံဗလံအားလုံးက တိတ်ဆိတ်သွား၏။

ကုယွီမြန်၏လက်က နှင်းကျားသစ်လေး၏ မျက်လုံးပေါ်သို့ အုပ်မိုးလိုက်ကာ သူ၏အသံက နူးနူးညံ့ညံ့ဖြင့် ပြုံးရိပ်သန်းနေသည်။

" ခုက နေ့လယ်စာစားချိန်မို့ စိတ်မပူပါနဲ့ ထရမယ့်အချိန်ရောက်ရင် မင်းကိုနှိုးလိုက်မယ်..."

နှင်းကျားသစ်လေးက သူ့နားရွက်ကို ကုယွီမြန်၏ မေးရိုးတစ်လျှောက်ပွတ်သပ်လိုက်ကာ သူ့အမြှီးကို ကုယွီမြန်၏ လက်ကောက်ဝတ်တွင် ရစ်ပတ်လိုက်သည်။

[ မိုင်းတွင်းထဲမှာ မိသားစုတစ်စုရှိတယ် : မြန်မြန့်ကိုအရမ်းချစ်တာပဲ… ငါ့တစ်ဘဝလုံးကို ဒီလိုလေထုလေးထဲနေဖို့ ဘာတွေများပေးဆပ်ရမလဲ… ]

[ ကျား : မီးတွေပိတ် စောင်ခြုံပြီး မင်းကိုယ်မင်း တင်ဆက်သူဘေးရောက်နေတယ်စိတ်ကူးယဥ်လိုက် ပြီးရင်အိပ်တော့…]

ကုယွီမြန်က လေထုကို သက်သောင့်သက်သာရှိအောင် ပြုလုပ်ပေးခဲ့ရုံသာဖြစ်သည်။ ပြင်ပကမ္ဘာမှ ဖြစ်နိုင်ချေရှိသော အနှောင့်အယှက်အားလုံးက ဖယ်ရှားခံလိုက်ရသည်။ မည်သည့်ဆူညံ့မှုမှလည်း မရှိသလို အနှောင့်အယှက်ပေးမည့်သူလည်းမရှိချေ။ ဤပတ်ဝန်းကျင်က တိတ်ဆိတ်ကာ လုံခြုံနေသည်။

အိပ်ရန် သင့်တော်ပေသည်။

မှတ်ချက်များက လျော့ပါးသွားပြီး အားလုံးက တိတ်ဆိတ်ငြိမ်သက်သွားသည်။

မည်သို့ပင်ဖြစ်စေ ကျော်ကြားမှုကို အနည်းငယ်ပင်သက်ရောက်မှုမရှိဘဲ မလျော့ကျသောအရှိန်ဖြင့် ဆက်လက်မြင့်တက်နေ၏။

ကြည့်ရှုသူအရေအတွက်က သန်းတစ်ရာ့နှစ်ဆယ်အထိပင် ရောက်ရှိသွားပြီဖြစ်သည်။

၎င်းက ကုယွီမြန်၏ ကိုယ်ပိုင်ဒေတာများကို ပြောင်းလဲသွားစေရုံသာမက အခြားကိုးဆယ်ရာခိုင်နှုန်းသော တင်ဆက်သူများကိုလည်း ကျော်တက်သွားခဲ့သည်။

မူလတွင် ကုယွီမြန်က နောက်ဆုံးနေရာမှစတင်ခဲ့ပြီး တစ်ဆင့်ခြင်းဖြင့် အကျော်ကြားဆုံး တတိယနေရာနှင့် ဒုတိယနေရာတို့ကို ကျော်ဖြတ်လာခဲ့ပြီး အဆုံးတွင် တစ်နေ့တာ၏ အကျော်ကြားဆုံး ထိပ်ဆုံးအဆင့်သို့ ရောက်ရှိသွား၏။

ညနေ ၄ နာရီဖြစ်သည်။

ကုယွီမြန်၏ သိပ္ပံအကယ်ဒမီသို့ လည်ပတ်ချိန်ကလည်း ပြီးဆုံးသွားခဲ့သည်။ သုတေသီများက ကုယွီမြန်ကို နှုတ်မဆက်လိုကြသော်လည်း ကုယွီမြန်က လူတိုင်းအတွက် ပြင်ဆင်ထားသော လက်ဆောင်အသေးစားလေးများကို ပေး၍ နှုတ်ဆက်ရလေသည်။

လက်တွေ့တွင် ကုယွီမြန်ကိုယ်တိုင်လည်း မြေခွေးလေးနှင့် ခွဲခွာရန် တွန့်ဆုတ်နေခဲ့သည်။ တစ်ဖက်တွင် သိပ္ပံအကယ်ဒမီရှိလူများက မြေခွေးလေးမှာ သိပ္ပံအကယ်ဒမီ၏ ကိုယ်စားပြုအမှတ်သညာဖြစ်သည်ဟု ထပ်တလဲလဲအထူးပြု ပြောဆိုနေကြသည်။ ကုယွီမြန်ကိုယ်တိုင်ကလည်း သူစိမ်းတရံဖြစ်နေသည့်အလျောက် မြေခွေးလေးကို သူ့နံဘေးတွင် ခေါ်ထားရန်မှာ ကျိုးကြောင်းမသင့်လှချေ။

အဆုံးတွင် ကုယွီမြန်က နှုတ်ဆက်စကား ဆိုခဲ့ရသည်။

အဆင်မပြေနှောင့်နှေးမှုများ အနည်းငယ်ရှိခဲ့သော်လည်း သူက လည်ပတ်မှုကိုပျော်ရွှင်ခဲ့ရသည်။ ဤတစ်ကြိမ် ထုတ်လွှင့်မှုက ကုယွီမြန်၏ ကျော်ကြားမှုကို မြှင့်တင်ပေးရုံသာမက လူထုနှင့် သိပ္ပံပညာကို ထိတွေ့စေလိုသော ရည်ရွယ်ချက်လည်း အောင်မြင်ခဲ့သည်။

နေ့လယ်ခင်းတွင် သိပ္ပံအကယ်ဒမီက ကိုယ်ရေးအကျဥ်းနှင့် လျှောက်လွှာများစွာကို လက်ခံရရှိခဲ့၏။ ထိုမျှသာမက လူထုအတွင်း ဆွေးနွေးမှုအတိုင်းအတာများလည်း မြင့်တက်လာသည်။ အေးစက်သော အလုပ်သရဲများ အဖြစ်မှ နူးညံ့အမွေးပွ ချစ်စရာကောင်းသည့်အပြင် ကြင်နာတတ်သော သုတေသီများ ဟူသည့်အခြေအနေထိ အမြင်ပြောင်းလဲသွားကြခြင်းမှာ များပြားသော သက်ရောက်မှုဖြစ်သည်။ ၎င်းမှာ ကုယွီမြန်၏ တိုက်ရိုက်ထုတ်လွှင့်မှုမှ ပျံ့နှံ့သွားသော ရုပ်ရှင်ပိုစတာနှင့်တူသည့် ဓာတ်ပုံကြောင့်ဖြစ်သည်။

၎င်းက အချိန်နှင့်အမျှ ဆက်လက်ပျံ့နှံ့နေပြီး မည်သည့်အချိန် ထုတ်လွှင့်မည်ကို အဆက်မပြတ် မေးမြန်းခံနေရသည်။ မှတ်ချက်များကလည်း စည်ကားနေ၏။

[ ငါတော့ ဝူး ဝူး ဝူးပဲ… မသေမျိုးလူငယ်လေး…]

[ ဟိုလိုဂရက်ဖစ် ရုပ်ရှင်ဆိုရင်တော့ effect တွေက တော်တော်ကောင်းမယ့်ပုံပဲ… ]

[ ထိုင်ထ ထိုင်ထ… ]

[ အဲဒါသိပ္ပံအကယ်ဒမီလားး တာ့တာအားလုံးပဲ ငါတော့ ကိုယ်ရေးအကျဥ်း သွားတင်ပြီ… ]

" တင်ဆက်သူကြောင့်ချည်းပဲတော့ မဟုတ်ဘူးပဲ..."

သိပ္ပံအကယ်ဒမီ၏ လက်ထောက်အကြီးအကဲက လျှောက်လွှာ ကိုယ်ရေးအကျဥ်း များကို ကြည့်ရှုနေသည်။

" ကောင်းလိုက်တာ..."

တိုက်ရိုက်ထုတ်လွှင့်မှုအပြီးတွင် ရောက်ရှိလာသော အလုပ်လျှောက်လွှာများက သာမန်ပမာဏမဟုတ်ချေ။ အများစုက အလွန်စိတ်ဝင်စားနေကြခြင်းဖြစ်သလို အချို့က တိုက်ရိုက်ထုတ်လွှင့်မှုမှတစ်ဆင့် သိပ္ပံအကယ်ဒမီရှိ သိပ္ပံပညာကို တိုက်ရိုက်မြင်တွေ့နားလည်သွားရခြင်းကြောင့်ဖြစ်သည်။

သူတို့၏ အဓိကအာရုံကို လက်တွေ့စမ်းသပ်ချက်များတွင်သာ မြှုပ်နှံထားကြသော်လည်း လုပ်ဖော်ကိုင်ဖက် အချင်းချင်းကြားရှိလေထုက သက်သောင့်သက်သာရှိသည်။ သူတို့၏ အမူအကျင့်များက ထိုင်းထိုင်းမှိုင်းမှိုင်းရှိသော်လည်း မိုင်ပေါင်းများစွာဝေးလံခေါက်ခိုက်နေခြင်းတော့ မရှိချေ။ ထို့အပြင် ကုယွီမြန်၏ ချိစ်ဖွန်ဒူးကို စားပွဲများတွင် စောင့်ဆိုင်းနေကြစဥ်က ၎င်းတို့၏ အမူအရာများက တစ်ညီတညာတည်းဖြစ်နေကြသည်က ချစ်စဖွယ်ပင်။

"..."

မြေခွေးလေးက သူ့လက်ထောက်၏ စားပွဲပေါ်တွင် လှဲလျောင်းနေပြီး ပျင်းရိအားလျော့သော အသံများပြုလုပ်နေသည်။ သူက ကုယွီမြန်ထွက်ခွာသွားပြီးနောက်တွင် အတော်စိတ်ဓာတ်ကျနေ၏။ လက်ထောက်က နှစ်သိမ့်ပေးနေသည်။

" အကြီးအကဲ စိတ်မညစ်ပါနဲ့ တင်ဆက်သူက အထက်တန်းလွှာနယ်မြေမှာ ရှိနေဦးမှာလေ နောက်အပတ်ထဲသွားလည်လို့ရတာပဲ..."

အာတိတ်နှင်းမြေခွေးဖြူလေး : "ကျီ..."

" အယ် အကြီးအကဲ ပုံမပြောင်းရသေးဘူးလား..."

ဖြတ်သွားသော လုပ်ဖော်ကိုင်ဘက်တစ်ဦးက မေးလာသည်။

" ခဏနေရင် လက်တွေ့စမ်းသပ်ချက်တစ်ခု ရှိသေးတယ်နော်… မနေ့က မပြီးပြတ်သေးတဲ့အလုပ်တွေ ဒီနေ့လုပ်ရမှာ..."

မြေခွေးလေးက တစ်ပတ်လှိမ့်ကာ ထရပ်လိုက်သည်။ သူကဤတစ်ကြိမ်တွင် ပို၍လေးနက်သော အသံကိုပြုလုပ်လိုက်၏။

သုတေသီများနှင့် အလုပ်သမားများ : "ဘာကြီး..."

နာရီဝက်ခန့်ကြာသွားသည်။

အဖွဲ့ခေါင်းဆောင်က စမ်းသပ်စစ်ဆေးသော ကိရိယာကို ဘေးသို့ချပြီးနောက် စကားတစ်ခွန်း အတိုချုပ်ပြောလာသည်။

" ခဏလောက်တော့ ပြန်ပြောင်းလို့ရဦးမှာမဟုတ်ဘူး..."

အခန်းတွင်းရှိ လူတိုင်း၏ အကြည့်များက ပြောင်းလဲသွားသည်။

လေထုအလယ်တွင် အလင်းမျက်နှာပြင်က အာတိတ်မြေခွေးလေး၏ ပင်မဦးနှောက်ကို ပြသထားသည်။ ပင်မဦးနှောက်၏ အလုပ်လုပ်ပုံက ရှုပ်ထွေးသော်လည်း ဖိအားဖယ်ရှားမှု ယန္တရားက သာမန်လူများလို အဆင့်မမြင့်ပေ။ အာတိတ်မြေခွေးလေး၏ အထူးဦးနှောက်က အသက်ငါးနှစ်မှ စတင်ကာ မနားတမ်းအလုပ်လုပ်ခဲ့ပြီး နားရက်တစ်ရက်ပင်မရှိခဲ့ချေ။

ကုယွီမြန်နှင့် တွေ့ဆုံခြင်းက အခွင့်အလမ်းတစ်ခုဖြစ်သော်လည်း ကောင်းသည် ဆိုးသည်ကိုမူ အတိအကျပြောနိုင်ခြင်းမရှိချေ။

မျိုးနွယ်စုအရေအတွက် နည်းပါးမှုအပြင် အများစုသော သားပေါက်များ၏ ဦးနှောက်နှင့် စိတ်ပိုင်းဆိုင်ရာစွမ်းရည်က အသက်နှစ်ဆယ်မတိုင်မီတွင် အလွန်အားနည်းတတ်သည်။ ၎င်းမှာ ကြယ်တာရာခေတ်ပေါ်ရှိပုဂ္ဂိုလ်များမှာ လူသားများကို မနှစ်သက်သော်လည်း လူသားအသွင်ဖြင့်နေထိုင်ရသည့် အကြောင်းအရင်းဖြစ်သည်။

ဆိုလိုသည်မှာ ယခုအချိန်တွင် မြေခွေးလေး၏ ဦးနှောက်စွမ်းရည်က သုညနှင့်ညီမျှသည်။ သူက အခြားလုပ်ဖော်ကိုင်ဖက်များနှင့်တန်းတူ လက်တွေ့စမ်းသပ်ချက်များကိုလည်း မပြုလုပ်နိုင်သလို သုတေသနအလုပ်များကိုပင် အချိန်ကြာကြာလုပ်ဆောင်နိုင်မည်မဟုတ်ချေ။

လူတိုင်းက အလယ်ဗဟိုရှိ သားပေါက်လေးအတွက် ဂရုဏာသက်သွားကြသည်။

မြေခွေးလေးက လမ်းပျောက်သလို ခံစားလိုက်ရ၏။

"..."

၎င်းက လူတိုင်း၏ အတွေးတော့မဟုတ်ချေ။

ပထမတွင် မြေခွေးလေးက လမ်းပျောက်သလို ခံစားရသော်လည်း နောက်ဆက်တွဲလိုက်ပါလာသည်က ဝမ်းနည်းမှုနှင့် နောင်တတို့မဟုတ်ဘဲ လျှို့ဝှက်သော ပျော်ရွှင်မှုလေးဖြစ်၏။ သို့သော် သူက ၎င်းကို ထုတ်ဖော်ပြသခြင်းမရှိဘဲ ဆိတ်ဆိတ်နေလိုက်သည်။ ဆယ်နှစ်ကျော်မျှ ကြိုးစားပမ်းစားအလုပ်လုပ်ပြီးနောက်တွင် သူသိရှိလိုက်ရသည်မှာ သူက လူတိုင်းနှစ်သက်လေးစားသော သိပ္ပံအကယ်ဒမီ၏ အကြီးအကဲ မဖြစ်လိုခြင်းပင်။ သူက ကလေးတစ်ဦးသာဖြစ်လိုသည်။

ကုယွီမြန်၏ ကလေးဖြစ်လိုသည်။

ဇီဝဗေဒ သုတေသနအဖွဲ့အစည်း၏ ခေါင်းဆောင်က သူ၏အလုပ်တွင် ကျွမ်းကျင်ပိုင်နိုင်သူဖြစ်သည်။ သူက မြေခွေးလေးကို လက်တလောတွင် ပုံစံမပြောင်းနိုင်ဟု မှတ်ချက်ချလိုက်၏။

" သူက တကယ်လူသားလား စိတ်စွမ်းအင်တွေမရှိဘဲလေ..."

ခေါင်းဆောင်ဖြစ်သူက အလင်းမျက်နှာပြင်ကို ကြည့်ကာ ထူးဆန်းသည်ဟု ခံစားနေရသည်။ အကြီးအကဲ၏ စိတ်ပိုင်းဆိုင်ရာအခြေအနေက စွမ်းအင်တစ်ခုခုဖြင့် သက်ရောက်ခံလိုက်ရသကဲ့သို့ရှိသည်။ သို့သော် မှတ်တမ်းတင်ထားခဲ့သည့် ထောင်သောင်းချီသော စိတ်စွမ်းအင်များအနက် ၎င်းနှင့်အသွင်တူသော စွမ်းအင်ဟူ၍မရှိချေ။

မည်သူကမျှလည်း စိတ်စွမ်းအင်နှိုးထနိုင်သော လူသားဟူ၍ မကြားဖူးကြချေ။

သို့သော် ထိုတင်ဆက်သူက ထူးခြားသည်မှာ အမှန်ပင်။ ထိုလူသားက သဘာဝကိုကျော်လွန်၍ စိတ်စွမ်းအင်နိုးထခဲ့လျှင်ပင် ခေါင်းဆောင်က အံ့အားသင့်မည်ဟု မခံစားရပေ။ သူ့တွင်လည်း ထိုသို့ ထိုးထွင်းသိမြင်နိုင်စွမ်းမရှိချေ။

သို့ရာတွင် ကုယွီမြန်၏ ချိစ်ဖွန်ဒူးကို စားသုံးခဲ့စဥ်က အလုပ်တိုင်းတွင် စိတ်ဝိညာဥ်စွမ်းအားများ ပါဝင်နေသည်ဟု ခံစားရ၏။

လူတိုင်းက ကိုယ်ပိုင်အတွေးများဖြင့် တိတ်ဆိတ်နေကြပြီး အကြီးအကဲ မည်သို့ဖြစ်မည်ကို ထုတ်မဆွေးနွေးဖြစ်ကြချေ။ မဆွေးနွေးဝံ့ခြင်းလည်း ဖြစ်မည်။

အကြီးအကဲက ရွေးကောက်ခံထားရသည်မှာ မကြာမြင့်သေးချေ။

ထပ်ပြောင်းဖို့တော့ မလိုဘူးမလား...

" အခု ဘယ်လိုဖြစ်သွားမှာလဲ..."

ပြဿနာက တံခါးခေါက်လာသော် အားလုံးက ရုတ်ချည်းတိတ်ဆိတ်သွားကြ၏။

-----

တည်းခိုရာသို့ ပြန်ရောက်သောအခါ ပန်ဒါလေးက သူ၏ ခေါင်းကို ဘေးဘီဝေ့ယမ်းကာ လိုက်ရှာနေသည်။ သူက မြေခွေးလေး ပိုင်ချိုးကို ရှာမတွေ့ဖြစ်နေ၏။

သူက မြေခွေးလေးကို ပျောက်ဆုံးသွားပြီထင်ရာ သူ့လက်တစ်ဖက်ကို ဝမ်းဗိုက်ပေါ်သို့ ညှိုးငယ်စွာတင်လိုက်ပြီး တစ်ဖက်က ကုယွီမြန်ကို ဆွဲကိုင်ကာ အသံပြုလိုက်သည်။

" ဘာဖြစ်လို့လဲ..."

ကုယွီမြန်က ပန်ဒါလေးပြောချင်သည့် အဓိပ္ပာယ်ကို လျင်မြန်စွာ သဘောပေါက်လိုက်သည်။ သူတို့က တစ်ရက်ကျော်ခန့်သာ အချိန်ဖြုန်းလိုက်ရသော်လည်း ကလေးနှစ်ဦးအကြားရှိ ဆက်ဆံရေးက အတော်အတန်ကောင်းမွန်သည်။ နှင်းကျားသစ်လေးက မာနကြီးသည့်အလျောက် အခြားသားပေါက်များနှင့် ကောင်းစွာဆော့ကစားခြင်းမရှိချေ။ မြေခွေးလေးရောက်ရှိလာပြီးနောက်တွင် ပန်ဒါလေးက မိမိတွင် ရွယ်တူကစားဖော်ရှိပြီဟု မှတ်ယူခဲ့၏။

" ချိုးချိုးက အိမ်ပြန်သွားပြီ..."

ကုယွီမြန်က ပန်ဒါလေး၏ ဦးခေါင်းကို ထိတွေ့ပေးနေသည်။

" ဒီမှာ ရက်နည်းနည်းလောက်ထပ်နေပြီးရင် သူ့ကိုအိမ်မှာလာကစားဖို့ခေါ်ကြမယ်လေနော်..."

ပန်ဒါလေးက အံ့အားသင့်သွားသည်။ သူ့စိတ်ထဲ မှားယွင်းနေသလိုခံစားရကာ သူ့ဦးခေါင်းကို ကုယွီမြန်၏ လက်မောင်းကြားထဲသို့ မြှုပ်နှံလိုက်ပြီး ခေါင်းညိတ်ပြလိုက်သည်။ ပန်ဒါလေးက မပျော်မရွှင်ဖြစ်ခဲ၏။

ကုယွီမြန်တွင်လည်း ရွေးချယ်စရာမရှိချေ။

ဒယ်အိုးနှစ်ဆယ့်လေး(ကောအာရှစ်စစ်)၏ ကိစ္စက အခြေမကျသေးသည့်အလျောက် ကုယွီမြန်က ဤနေရာတွင် ရက်အနည်းငယ်မျှ ဆက်လက်နေထိုင်ဦးမည်ဖြစ်သည်။ သူ့မူလကိုယ်၏ဆွေမျိုးများက အထက်တန်းလွှာနယ်မြေတွင်ရှိသော်လည်း ဤနေရာတွင် မည်သို့ရှာဖွေရမည်ကို မစဥ်းစားတတ်ချေ။ ထို့အပြင် ကုယွီမြန်က ရှို့ဟန်ကိုလည်း ဂရုစိုက်မိနေ၏။

ရက်အနည်းငယ်အတွင်း ရှို့ဟန်နှင့်တွေ့ရန် အကြောင်းဖန်လာနိုင်မည်လားကို ကုယွီမြန် မသိချေ။

မည်သို့ပင်ဖြစ်စေ နေထိုင်ခွင့်သက်တမ်းက တစ်ပတ်ဖြစ်၍ ကုယွီမြန်က ရက်အနည်းငယ် ဆက်လက်နေထိုင်ရန် ဆုံးဖြတ်ထား၏။

နှင်းကျားသစ်လေးက ကုယွီမြန်ကို ကြည့်ရှူနေပြီး ဤတစ်ကြိမ်တွင်မူ သဝန်တိုခြင်းများမရှိချေ။ သူက ကုယွီမြန်၏ ပခုံးထက်တွင် ပျင်းရိစွာ လှဲလျောင်းနေ၏။

ကုယွီမြန်က နာရီကို စစ်ဆေးလိုက်သည်။ ညခုနစ်နာရီတွင်သူက အထက်တန်းလွှာနယ်မြေကို လှည့်လည်ကြည့်ရှုရန် စဥ်းစားထား၏။ ယခုမူ အချိန်ကား လေးနာရီခွဲဖြစ်ပြီး ညစာအတွက် အနည်းငယ်စောနေသေးသည်။

ထိုအချိန်တွင် အယ်လ်ဘတ်စားသောက်ဆိုင်မှ ဖုန်းဝင်လာ၏။

" မစ္စတာကု လွန်ခဲ့တဲ့ရက်တွေတုန်းက ဆိုင်ရဲ့စီးပွားရေးအခြေအနေကို သတင်းပို့ထားပါတယ် စစ်ပေးပါဦး..."

ကုယွီမြန်က အစီအရင်ခံစာကို ကြည့်ရှုပြီးနောက် ပျော်ရွှင်သွားသည်။ နိမ့်ကျခဲ့သော ကာလများနှင့် နှိုင်းယှဥ်ပါက ယခုအချိန်တွင် အယ်လ်ဘတ်စားသောက်ဆိုင်၏ စီးပွားရေးလည်ပတ်မှုက ကောင်းစွာမြင့်တက်သွားသည်။ ၎င်းမှာ ထပ်ဖန်တလဲလဲ လာရောက်ကြသော စားသုံးသူများကြောင့်ဖြစ်သည်။ အချို့စားသုံးသူများက သုံးနပ်စာကို ရက်ဆက် လာရောက်စားသောက်ကြ၏။ ထို့အပြင် ရင်းနှင်းမြှုပ်နှံလိုသူများလည်း ရှိလာသည်။

တုန်းဖိုအသား၏ရောင်းအားကလည်း အလွန်ကောင်းမွန်နေရာ ဤအခြေအနေကို အခွင့်ကောင်းယူ၍ ဟင်းပွဲအသစ်များမိတ်ဆက်ရန် အချိန်ကောင်းဖြစ်သည်။

" အသစ်တစ်ခုခုလုပ်ချင်လား အချိန်လည်းရှိသေးတယ်ဆိုတော့..."

ကုယွီမြန်က နှင်းကျားသစ်လေး၏ အမွေးပွပွလည်ပင်းတွင် မျက်နှာအပ်၍ အသက်တဝကြီး ရှူသွင်းလိုက်ပြီးနောက်တွင် ဆုံးဖြတ်ချက်ချလိုက်သည်။

အားလပ်နေခြင်းက မကောင်းလှချေ။ သူက မြေခွေးလေး အဆင်ပြေမပြေကို အဆက်မပြတ် တွေးနေမိသည်။ ဤပုံအတိုင်းဆိုလျှင် ညလယ်ခေါင်၌ သူများမိသားစု၏ ကလေးကို သွား၍ခိုးယူမိမည်ကိုပင် စိုးရိမ်ရသည်။ ကုယွီမြန်က မိမိကိုယ်ကိုယ် အာရုံလွှဲရမည်ဟု ဆုံးဖြတ်လိုက်သည်။

" ရန်ကျိုး ထမင်းကြော် ... ဝက်သားပြားပြုတ်နဲ့ ကြက်သွန်ဖြူဆော့စ် နံရိုးထမင်းနဲ့ ဟင်းအနှစ်..."

ကုယွီမြန်က သူ့ဟင်းလျာများအကြောင်းစဥ်းစားကာ ပါဝင်ပစ္စည်းများကို ထုတ်ယူ၍ သပ်သပ်ရပ်ရပ်စီစဥ်ထားလိုက်သည်။

ကောက်ညှင်းနံရိုးများက အရသာရှိ၏။

၎င်းတို့က ကြွပ်ရွပြီး အဆီအနှစ်နှင့် ပြည့်ဝသော အရသာရှိသည်။ ဝက်သားပြားပြုတ်လောက်ပင် ပြုလုပ်ရန်မခက်ခဲချေ။ တုန်းဖိုအသားကဲ့သို့ပင် ကောင်ညှင်းနံရိုးကို ပြင်ဆင်ရာတွင် ကနဦး အဆင့်များက အလွန်အရေးပါပြီး နောက်ပိုင်းတွင် ပေါင်းခံသည့် အပူချိန်ကိုသာ ထိန်းညှိရန်လို၏။

ကောက်ညှင်းဆန်များမှာ သိပ္ပံအကယ်ဒမီသို့ သွားရောက်ပြီးနောက် ကုယွီမြန်ရရှိလာသောအရာများ ဖြစ်သည်။ ထိုနေရာတွင် မတူညီသော ကောက်ညှင်းဆန်အမျိုးအစား ငါးမျိုးခန့်စိုက်ပျိုးထားပြီး ချက်ပြုတ်ရေးတွင် မည်သို့အသုံးပြုသင့်သည်ကိုမူ ကုယွီမြန်ကိုယ်တိုင်လည်း မသိရှိသေးချေ။

ကုယွီမြန်က တွေးတောပြီးနောက် ကောက်ညှင်းဆန်ကို ရေအေးဖြင့်စိမ်လိုက်သည်။ ထို့နောက် ဂျင်းနှင့် ငရုတ်ကောင်းစိမ်းတို့ကို ပါးပါးလှီး၍ ဓားနှောင့်ဖြင့် ကြိတ်ချေလိုက်၏။ ထို့နောက် ပြုပြင်ထားသော နံရိုးကို အပိုင်းအပိုင်းများခုတ်ပိုင်းလိုက်ကာ ဆားနှင့် ပဲငံပြာရည်ကို ရောနယ်လိုက်သည်။ ထို့နောက် ကောင်ညှင်းဆန်ဂျုံ့မှုန့်နှင့် ငရုပ်ကောင်းဖြူး၍ နာရီဝက်ခန့် နှပ်ထားလိုက်၏။

ကုယွီမြန်က နူးညံ့သော ကောက်ညှင်းဆန်နှင့် ငရုပ်ပွစိမ်းကို ဖိအားသုံးအထူးကိရိယာထဲသို့ထည့်၍ နှမ်းဆီဖြင့် ရောနယ်လိုက်၏။

ကုယွီမြန်က တိုက်ရိုက်ထုတ်လွှင့်ခြင်းမရှိသော အခါမျိုး၌ မြန်ဆန်စွာချက်ပြုတ်လေ့ရှိသည်။ သူက သူ့ကလေးများကို ဆာလောင်မနေစေချင်ပေ။ သို့ရာတွင် ယခုတစ်ခေါက်၌ အနည်းငယ်နှေးကွေးနေခဲ့၏။

သူက အလုပ်လုပ်ရင်း အတွေးများနေကာ ရံဖန်ရံခါတွင် သက်ပြင်းများချနေမိ၏။ ကုယွီမြန်က နှင်းကျားသစ်လေး၏ ဦးခေါင်းကို သူ့မေးစေ့ဖြင့် ပွတ်သပ်လိုက်ပြီး ပန်ဒါလေးကိုလည်း သူ့လက်မောင်းများကြား တွဲခိုခွင့်ပြုထားသည်။

ကုယွီမြန်က လက်အိတ်စွပ်ပြီးနောက် ကြာရွက်တစ်ရွက်ကိုယူလိုက်သည်။ ကောက်ညှင်းထမင်းကို ကြာရွက်ပေါ်တွင် ညီညီညာညာဖြန့်ပြီးနောက် နှပ်ထားသော နံရိုးကို ဌာပနာတင်၍ သေသပ်စွာထုပ်လိုက်၏။

ထိုအချိန်တွင် ကုယွီမြန်က တံခါးဝမှ အသံသဲ့သဲ့ကြားလိုက်ရသည်။

ကုယွီမြန် ပခုံးပေါ်ရှိ နှင်းကျားသစ်လေးက သူ၏ခဲပြာရောင်မျက်လုံးများကို တံခါးရှိရာသို့ ရွေ့လျားလိုက်သည်။ ပန်ဒါလေးကလည်း ကုယွီမြန်၏ လက်ကိုဆွဲ၍ အဓိပ္ပာယ်ဖော်ရခက်သော အသံများပြုလာ၏။

တံခါးမှာ တစ်ယောက်ယောက်ရှိနေတာလား...

ကုယွီမြန်က ခေတ္တမျှတုံ့ဆိုင်းသွားပြီးနောက် အတွေးတစ်ခုက လင်းခနဲဝင်ရောက်လာသည်။ သူက ကလေးနှစ်ဦးကို နေရာတွင် ထားရှိခဲ့ပြီးနောက် တံခါးရှိရာသို့ အလျင်အမြန်ရောက်ရှိသွား၏။

သစ်သားတံခါးပွင့်သွားသောအခါ နှင်းဖြူရောင်အမွေးအစွန်းတွင် ခဲရောင်များရှိသော အမြှီးတစ်ချောင်းက တင့်တယ်စွာရှိနေသည်။ မြေခွေးလေးက အနည်းငယ်ရှက့်ရွံကာ တည်ကြည်သော အမူအရာဖြင့် သူ့အမြှီးကို ဝှေ့ယမ်းနေ၏။

ကျွန်တော် ခင်ဗျားရဲ့ လာဘ်ကောင်လေး ဖြစ်လို့ရမလား...

🐯🐯🐯

Prev Next