MM Story Teller

Chapter 51

Viewers 3k

👾Chapter 51

စကြဝဠာထဲက ဖုန်မှုန့်တွေအားလုံးကို ခြေရာခံနိုင်ခဲ့ရင်...

လင်းဟန်မှာ ရယ်ချင်ပက်ကျိ ဖြစ်သွားလေသည်။ ယခင်က ထိုကဲ့သို့သော ဟန်ဆောင်ပန်ဆောင် စိတ်ထားမျိုး မရှိဖူးခဲ့ပေ။ မသေမချာဖြစ်နေသည်ဟု ခံစားနေရဆဲ ဖြစ်သော်ငြား တစ်ဖက်လူ၏ အတွေးများကို ရှင်းရှင်းလင်းလင်းကြားနိုင်သည် ဟူသည့်အချက်ကား ထည့်ပြောရန်ပင် မလိုခဲ့။

သို့သော်ငြား ဟယ့်ယွင်ထင်ကမူ ယခုကဲ့သို့ပင် အကြိမ်တိုင်းတွင် သူ့အနားသို့ နာနာခံခံ ချဥ်းကပ်လာနေဆဲပင်။

သူက လင်းဟန်အား တစ်ခါမှ မငြင်းဆန်ဖူးဘဲ "အင်း"ဟုသာ တိတ်တဆိတ် ဆိုတတ်သည်။

လင်းဟန်က မျက်လုံး ပိတ်ထားပြီးနောက် နှစ်မိနစ်အတွင်း အထိအတွေ့အာရုံခံဆဲလ်များအားလုံး နှစ်ဆထက်ပို ကြီးမားလာသည်။

ပို၍ ရှင်းလင်းလာသော အကြံအချို့ ရှိနေပါသော်လည်း လက်ရှိမှာ တိတ်တဆိတ်ထိုင်ချကာ အတွေးများနေရမည့် အချိန် မဟုတ်သေးပေ။ သူသည်လည်း အမှန်ပင် ပင်ပန်းနေပြီ ဖြစ်၍ မျက်လုံးမှိတ်လိုက်သည့် အခိုက်တွင် တစ်ကိုယ်လုံးက မှောင်မိုက်နက်နဲလှသော အိမ်မက်တစ်ခုအတွင်း ကျရောက်သွားသလို ခံစားလိုက်ရပြီး နှက်နှက်ခြိုက်ခြိုက် အိပ်မောကျချင်မိသွားသည်။

သို့သော်ငြား သူ၏ အရေပြား တစ်လက်မချင်းစီတွင် ဟယ့်ယွင်ထင်၏ လက်ဖဝါးမှ အနွေးဓါတ်ကို ခံစားနေရဆဲ ဖြစ်သည်။

လင်းဟန်မှာ အစပထမ မယုံကြည်ခြင်းများမှ လက်ရှိတွင် လှည့်စားမှုလေးများ သုံးရသည်အထိ ထိုလက်များကို အကြိမ်ပေါင်းများစွာ ထိတွေ့ခဲ့ဖူးပြီးသော်လည်း ယင်းက လအနည်းငယ်သာ ရှိသေးပေသည်။ ထိုလက်များ၏ သွေးကြောရာများ၊ အသားမာများ၏ တည်နေရာနှင့် သွေးကြောများ၏ တစ်လက်မချင်းစီတိုင်းနှင့် ရင်းနှီးခဲ့သည်မှာ ကြာလေပြီ။

မည်သို့ပင်ဆိုစေကာမူ ၎င်းက သူ၏ လျှို့ဝှက်ချက်လေးသာ ဖြစ်၍ မည်သူကမှ ယူဆောင်သွား၍ မရနိုင်ပေ။

လင်းဟန်က နှစ်မိနစ်ကာလတိုလေးအတွင်း အမှန်တကယ်ပင် အိပ်ပျော်လုနီးပါး ဖြစ်ခဲ့ပြီး အတွေးများ လွင့်မျောလာကာ အိပ်ချင်နေပါသော်လည်း မအိပ်ရဲပေ။

အိပ်ပျော်တစ်ဝက် နိုးတစ်ဝက်ဖြင့် နှစ်မိနစ် ကုန်ဆုံးကာနီးလာသောအခါ ဟယ်ယွင်ထင်၏ အခြား လက်တစ်ဖက် လှုပ်ရှားသွားပြီး အဆုံးတွင် သူ့မျက်နှာကို ငြင်ငြင်သာသာ ထိတွေ့လာကာ ခပ်ဖွဖွ ပွတ်သပ်လာသည်ကို လင်းဟန် ခံစားလိုက်ရသည်။

【မစ္စတာလင်းက ဘာလို့ အရမ်းချစ်စရာကောင်းနေရတာလဲ】

ချစ်စရာကောင်းသော မစ္စတာလင်း၏ မျက်နှာတစ်ခုလုံး နီရဲသွားသော်ငြား ကံအားလျော်စွာဖြင့် လက်ရှိတွင် သူ့မျက်နှာက ပေလူးနေသဖြင့် ဟယ့်ယွင်ထင်လည်း တွေ့မသွားခဲ့ပေ။

ထို့နောက် သူက မသိဟန်ဆောင်၍ထလာကာ သက်ပြင်းတစ်ချက်ချလိုက်ပြီး သူပြောလိုသည့် စကားကို ပြောလိုက်သည်။

"ကျွန်တော် မက်ခါရဲ့ ပျက်စီးမှု အတိအကျကို သွားစစ်ဆေးဦးမယ်" သူက ထိုအခိုက်တွင် သူ၏ သဘာဝသိပ်မကျသော မျက်နှာကို ဟယ့်ယွင်ထင် မြင်သွားမည်စိုးသဖြင့် ထိုသူအား မကြည့်ခဲ့ပေ။

ဟယ့်ယွင်ထင် ပြန်ဖြေကာ လင်းဟန်နောက်မှ လိုက်လာပြီး လင်းဟန် အလုပ်စလုပ်နေချိန်တွင် သူသည်လည်း အနီးအနားကို လေ့လာကြည့်ရှု၍ ကြယ်တာရာ မြေပုံကို ထုတ်ကာ စစ်သင်္ဘောကြီးနှင့် ဆက်လက်ဆက်သွယ်နေခဲ့သည်။

လင်းဟန်၏ ပါဝင်မှုကြောင့် ဇာဂ့်များကို ဖြေရှင်းရသည့်အချိန်က ထင်ထားသည်ထက် ပိုမိုမြန်ဆန်ခဲ့သည်။ လက်ရှိတွင် မက်ခါ၏ အခြေအနေကသာ မိုင်ကုန်တင်၍ သွားနိုင်ပါက စစ်သင်္ဘောကို အမှီလိုက်နိုင်ကာ အင်ပါယာထံ အတူတကွ ခုန်ကူး၍ ပြန်သွားနိုင်ပေမည်။

လင်းဟန်က သဲပိုးကောင်ကြီးထံမှ ထိုးဖောက်ခံထားရသော နေရာကို လျှောက်လာခဲ့ပြီးနောက် လတ်တလောကျန်ရှိနေသော စွမ်းအင်ကို ပေါင်းစပ်ကာ သေသေချာချာ တွက်ချက်ပြီးနောက် ဟယ့်ယွင်ထင်အား ပြောပြလိုက်သည်။

"ပျက်စီးမှုက သိပ်မပြင်းပါဘူး ပြင်လို့ရတယ်... ဒါပေမယ့် ဒါက အဓိက ပြဿနာ မဟုတ်သေးဘူး" လင်းဟန် ပြောလိုက်သည်။

"ခုနတုန်းက တိုက်ပွဲမှာ စွမ်းအင် ကုန်ဆုံးမှု တော်တော်လေး မြင့်သွားတယ်... ကျွန်တော် တွက်ချက်ပြီးပြီ... မိုင်ကုန်တင်လိုက်ရင် ခုန်ကူးမှတ်ရောက်ဖို့ နှစ်နာရီလောက် ကြာလိမ့်မယ်"

ဟယ့်ယွင်ထင်က သူ့စကားကို တိတ်တဆိတ် နားထောင်ပေးနေသည်။

"ဒါပေမယ့် မိုင်ကုန်တင်တဲ့အခါ စွမ်းအင်ကုန်ဆုံးမှုက အရမ်းမြင့်တာကို သတိပြုရလိမ့်မယ်... ခုန်ကူးအမှတ်ကို ရောက်သည်အထိ စွမ်းအင်ကို လုံလုံလောက်လောက် ထောက်ပံ့ပေးနိုင်ဖို့ သေချာနေမှ ဖြစ်မယ်... မဟုတ်ရင် စွမ်းအင်တွေ လုံးဝကျန်ခဲ့မှာ မဟုတ်ဘူး... တခြားစကားနဲ့ ပြောရရင် သင်္ဘောကြီးကလည်း အဲ့နေရာမှာ ရှိနေသလို ခုန်ကူးမှတ်လည်း ရှိနေမှပဲရမယ်... တစ်ခုခုကိုလွဲချော်စေပြီး လွတ်သွားရင် အားလုံးအချည်းနှီး ဖြစ်သွားစေတော့မယ်"

လင်းဟန် စကားစဖြတ်လိုက်ပြီးနောက် ဟယ့်ယွင်ထင်အား ပူပန်မှုအချို့ဖြင့် မေးလိုက်သည်။

"စစ်သင်္ဘောကြီးနဲ့ ဆက်သွယ်လို့ ရနိုင်မလား"

ဟယ့်ယွင်ထင်၏ ဆက်သွယ်ရေးစက်က အနီရောင် တောက်တောက် ဖြစ်လာကာ တဝီဝီ မြည်လာလေသည်။

တစ်ဖက်လူက သူ့အား အပြုသဘောဆောင်သည့် အဖြေတစ်ခု ပေးရန် ကျဆုံးသွားလေသည်။

"ဒါဆိုရင် အရင်ဆုံး မက်ခါကို ပြင်နိုင်မလား သွားကြည့်လိုက်ဦးမယ်" လင်းဟန်က ထပ်မမေးတော့ပေ။

"အဆုံးကျတော့ ဒါက အခု ပျက်နေပြီးတော့ အပြင်ဘက် ရာသီဥတုကလည်း ပြင်းထန်နေတာ... ဒီလိုမျိုး အချိန်အကြာကြီး နေလို့ မဖြစ်ဘူး"

"ကောင်းပြီလေ" ဟယ့်ယွင်ထင် ပြောလိုက်သည်။

လင်းဟန်က ပထမမောင်းနှင်ခုံထံ သွားကာ ဟယ့်ယွင်ထင် အပေါက်ကို ပိတ်ရန် သုံးထားသော ဂျာကင်ကို ခွာလိုက်သည်။ လင်းဟန်တစ်ယောက် ပြင်းထန်လှသော အပူလှိုင်းလုံးကြီးနှင့် တိုက်ရိုက်ထိတွေ့လိုက်ရသည့်အခါ မသိစိတ်အရ ခိုလှုံရာနေရာ ရှာမိသွားသည်။

အဆုံးတွင် အဖွဲ့အစည်း၌ ရှိနေသည်လည်း မဟုတ်သလို လက်ထဲတွင်လည်း မည်သည့်ပစ္စည်းမှ မရှိသဖြင့် တိုက်ပွဲမတိုင်မီက အခြေအနေတိုင်း ပြန်လည်ပြင်ဆင်ရန် အလွန် ခက်ခဲနေဆဲသာပင်။ သူ ခေါင်းငုံ့ချလိုက်ပြီးနောက် တစ်ခဏမျှ တွေးတောကာ ပျက်စီးမှုကို အကဲဖြတ်ပြီးနောက် အစီအစဥ်တစ်ခုကို စတင်တွက်ချက်လေတော့သည်။

လင်းဟန်က ဖန်သားပြင်မှတဆင့် ပြင်ပရှိ ဇာဂ့်အလောင်းကောင်ကြီးများနှင့် ပျံ့ကြဲနေသော သတ္တုအပိုင်းအစများကို ကြည့်နေသည်။

အရင်းအမြစ် နည်းပါးသော နယ်ခြားစည်းဒေသတွင် တစ်ခုတည်းသော အရေးကြီးကိစ္စမှာ ခုန်ကူးမှတ်သို့ တတ်နိုင်သမျှ မြန်မြန် ရောက်ရှိရန် ဖြစ်သည်။

ထိုမှသာ သူတို့ လုပ်နိုင်သမျှ အရာအားလုံးကို လုပ်ဆောင်နိုင်ပေလိမ့်မည်။

ထို့နောက် ဟယ့်ယွင်ထင်၏ ဆက်သွယ်ရေးစက် လင်းလာသည့်အခိုက်တွင် လုအန်းဟယ်၏ စိတ်ပူပန်နေသော အသံကို လင်းဟန် ကြားလိုက်ရသည်။

"ဘောစ့်တို့ဘက်မှာ အခြေအနေ ဘယ်လိုလဲ... ဒဏ်ရာရသွားသေးလား" လုအန်းဟယ်ဘက်၌ နောက်ခံအသံများ ဆူညံနေပြီး သူက စကားသွက်သွက် ပြောနေရ၏။

"အဆင်ပြေတယ်... အားလုံး နေရာတကျ ဖြစ်သွားပြီ" ဟယ့်ယွင်ထင် ပြန်ဖြေလိုက်သည်။

"ငါတို့တွေ ခုန်ကူးမှတ်ကို သွားဖို့ ပြင်နေတယ်"

ထိုစကားသုံးလုံးကို ကြားလိုက်ရသောအခါ လုအန်းဟယ်၏ တုံ့ပြန်မှုက အလောတကြီး ဖြစ်သွားသည်။

"မလာနဲ့... ခုန်ကူးမှတ်ကို မလာခဲ့နဲ့" လုအန်းဟယ် အမောတကော ပြောလိုက်သည်။

"ဘောစ့် ပြောတာမှန်တယ်... ခုန်ကူးမှတ်မှာ ဇာဂ့်တွေ ဝိုင်းနေတာ ကြာလှပြီ... ဒီနေရာမှာ အနည်းဆုံး အကောင်သုံးဆယ်လောက် ရှိတယ်"

လင်းဟန်၏ လက်များ လှုပ်ရှားမှု ရပ်သွားလေသည်။ သူက ဟယ့်ယွင်ထင်၏ အလေးအနက် အမူအယာကို တွေ့နေရပြီး လုအန်းဟယ်ကို စကားဖြတ်ပြောခြင်း မရှိပေ။

"အခု မက်ခါပါတဲ့ ဆာဂျင်တွေအားလုံး ထွက်သွားကြပြီ... ဇာဂ့်တွေက ကျွန်တော်တို့ ဒီခုန်ကူးမှတ်ကနေ ပြန်ကြမယ်ဆိုတာကို အချိန်အတော်ကြာကတည်းက သိပြီးသား ဖြစ်မယ်... သူတို့တွေ ဒီနေရာမှာ စောင့်နေတာ ဘယ်လောက်တောင် ကြာနေပြီလဲ မသိဘူး"

"သေဆုံး ထိခိုက်အခြေအနေကရော" ဟယ့်ယွင်ထင်၏ လေသံက အေးသည်ထက် အေးစက်လာခဲ့သည်။

လင်းဟန်မှာ လုအန်းဟယ်တစ်ယောက် အသက်ပြင်းပြင်းရှူကာ စိတ်ငြိမ်သွားစေရန် ကြိုးပမ်းနေသည်ကို ကြားလိုက်ရသည်။

"လက်ရှိမှာ... ပြိုင်ပွဲကို လာပြိုင်တဲ့ သီးသန့်မောင်းနှင်သူ နှစ်ယောက် အသတ်ခံလိုက်ရပြီး တစ်ယောက်က အပြင်းအထန် ဒဏ်ရာရနေပါတယ်... ကျန်တဲ့သူတွေကိုတော့... အခုထိ မစုစည်းရသေးပါဘူး"

“အဲ့ဒီအိုမီဂါက ဘယ်မှာလဲ"

"ချီကျားမူရဲ့ ညီကို ပြောတာလား... ဘောစ့် သူ့ကို သေနတ်နဲ့ သုံးကြိမ် ပစ်လိုက်တာတောင် သေမသွားဘူးဗျ... သူ့ရဲ့ ပြန်လည်သက်သာလာနိုင်စွမ်းက အံ့မခန်းပဲ... အပေါက်တွေတောင် စေ့သလောက်နီးပါး ဖြစ်နေပြီ... စစ်ဆေးကြည့်လိုက်တော့ သူ့မှာ အစောပိုင်းဇာဂ့်တွေရဲ့ မျိုးရိုးဗီဇ အမူအကျင့်တွေ ရှိနေတယ်... ဒါပေမယ့် ဒါကို နားလည်အောင် လုပ်ဖို့ အချိန် မရှိသေးဘူးလေ... ပြန်သွားပြီးမှပဲ အဆင်ဆင့် စစ်ဆေးကြည့်ရမှာ... အခု ချီကျားမူက သူ့ကို ထိန်းပေးထားတော့ ပြဿနာကြီးကြီးမားမား မလုပ်လာသေးဘူး"

"အင်း" အခြေခံ အခြေအနေများကို နားလည်နေသည့် ဟယ့်ယွင်ထင် ပြောလိုက်လေသည်။ လုအန်းဟယ်မှ ထိုကဲ့သို့ ပြင်းထန်လှသော တိုက်ပွဲအတွင်း ဆက်သွယ်ရေးစက်မှ ဆက်သွယ်လာရခြင်းအကြောင်းအရင်းကိုလည်း သိရသလောက် ဖြစ်နေ၏။

သေချာပေါက်ပင် နောက်တစ်စက္ကန့်၌ လုအန်းဟယ်က တုန်ရီနေသော လေသံဖြင့် ပြောလာခဲ့သည်။

"အခု ကျွန်တော်တို့ P-1 နျူကလီးယားဒြပ်မှုန်အလင်းတန်းအမြှောက်ကို သုံးဖို့ ပြင်နေပြီးတော့ တိုက်ခိုက်နိုင်နေသေးတဲ့ မောင်းနှင်သူအားလုံးကို ပြန်ခေါ်ပြီး ဇာဂ့်တွေကို တစ်နေရာတည်းမှာ စုစည်းစေဖို့ ပြင်နေတယ်... ပြီးရင် ကျန်နေသေးတဲ့ စွမ်းအင်နဲ့ ခုန်ကူးလိုက်မယ်..."

လုအန်းဟယ်က အသံကို တတ်နိင်သမျှ တည်ငြိမ်နေစေရန် ကြိုးစားနေပုံရသည်။

"ကျွန်တော်တို့ ခုန်ကူးမှတ်ကို ဖောက်ခွဲပစ်ရမယ်"

ထို့ကြောင့် လင်းဟန် တွေးထားခဲ့သော ဖြစ်နိုင်ချေ နှစ်ခုမှာ ပျောက်ကွယ်သွားလေပြီ။ လူအများစု ပြန်သွားနိုင်ရေးအတွက် ခုန်ကူးမှတ်က ဇာဂ့်များနှင့်အတူ ပျောက်ကွယ်သွားမှ ဖြစ်ပေမည်။ စစ်သင်္ဘောကြီးက လက်ကျန် စွမ်းအင်များဖြင့် ထွက်သွားမည်ဖြစ်ပြီး စွမ်းအင်များအဆက်မပြတ် ထုတ်လွှတ်နေသည့် ခုန်ကူးမှတ်သည်ကား ပူဖောင်းတန်းတစ်ခုသာ ဖြစ်လာပေတော့မည်။

လုအန်းဟယ် တစ်ခဏမျှ တိတ်ဆိတ်သွားပြီး လင်းဟန်သည်ကား ဆက်သွယ်ရေးစက်မှတဆင့် ပေါက်ကွဲသံများ သေနတ်သံများ ကြားနေရသည်။

"ဘောစ့်... ဘောစ့်နဲ့ မစ္စတာလင်း... အလျင်စလို လုပ်ဖို မလိုပါဘူး"

သို့သော်ငြား ဟယ့်ယွင်ထင်မှာ ပုံမှန်ထက် ပို၍ တည်ငြိမ်နေခဲ့သည်။

"သိပြီ"

လုအန်းဟယ်မှာ စစ်ကူများ ထွက်ခွာလာမည့် အသုတ်နှင့် အချိန် အပါအဝင် တစ်စုံတစ်ခုအတွက် ဟယ့်ယွင်ထင်အပေါ် ယုံကြည်အားထားနေဆဲ ဖြစ်သည်။

နှစ်ယောက်သားက အပြန်အလှန် နားလည်မှုတစ်ခု ရှိနေပြီး ရံဖန်ရံခါတွင် ဟယ့်ယွင်ထင်မှာ မေးခွန်းများ မေးရန်ပင် မလိုအပ်... လုအန်းဟယ်မှာ အရာအားလုံးကို အလိုလို ရှင်းပြလာခဲ့သည်။

"တပ်ကူတွေကတော့ အကြောင်းကြားစာ ရောက်လောက်ပေမယ့် လိုက်စရာ အခြားဇာဂ့်တွေ မရှိရင် သူတို့ကို ခေါ်ဖို့ စစ်သင်္ဘောတွေ မပို့လောက်ဘူး... ဒါကြောင့် ပိုပြီး နှေးလောက်တယ်" လုအန်းဟယ် အဆုံးသတ် ပြောလိုက်သည်။

"ဒါပေမယ့် သိပ်တော့ မကြာလောက်ပါဘူး... ဘောစ့်တို့တွေ..."

လုအန်းဟယ် နှောက်ယှက်ခံလိုက်ရသည်။

တိုက်ပွဲအတွင်းသို့ ပြန်လည်ဝင်ရောက်နေရသည်ကြောင့် ဖြစ်မည်။ ဂရုစိုက်ကြပါဟု ပြောမည့် စကားလုံးများပင် အဆုံးမသတ်လိုက်ပေ။

ဟယ့်ယွင်ထင်၏ အသံအနေအထားမှာ အရိုးအရှင်းဆုံးသော လေ့ကျင့်ရေးအစီရင်ခံစာများကို သတင်းပို့နေသည့်အလား မပြောင်းမလဲ ရှိနေဆဲပင်။ လင်းဟန်မှာ ဤဆက်သွယ်မှုပြီးနောက် အချိန်အတော်ကြာ တည်ရှိခဲ့သော ခုန်ကူးမှတ်တစ်ခု ဖျက်စီးခံလိုက်ရတော့မည် ဖြစ်ကြောင်း သိလိုက်ရသည်။

အံ့အားသင့်ဖွယ်ကောင်းစွာပင် သူကိုယ်တိုင်သည်လည်း ဟယ့်ယွင်ထင်ကဲ့သို့ တည်ငြိမ်နေကြောင်း သိလိုက်ရသည်။

အခြေအနေများမှာ သူတို့က ပျက်စီးနေသော M2742 ဖြင့်သာ နယ်စပ်ဒေသတွင် ယာယီ တောင့်ခံထားရပေမည်ဟု နားလည်ရသည်။

ဆက်သွယ်ရေးများက မည်သည့်နည်းနှင့်မဆို ပြတ်တောက်သွားနိုင်သည်။ အခု သူတို့ မည်သည့်နေရာသို့ သွားရမည်... သူတို့သာ စွမ်အင်အခြွေတာဆုံး ကုန်ဆုံးမှုဖြင့် အချိန်မည်မျှလောက် တောင့်ခံထားနိုင်လိမ့်မည် ဟူသည်ကား...

သူက ရှေ့မှ အပျက်အစီးများကို တိတ်တဆိတ် ကြည့်နေမိသည်။

ကောင်းကင်ယံကြီးက တဖြည်းဖြည်း နက်မှောင်လာပြီး အရာအားလုံး ပြီးဆုံးသွားပြီးနောက် ငြိမ်းချမ်းလာလေသည်။ သေဆုံးခြင်းနှင့် မီးခိုးများက ယခင်က မတည်ရှိခဲ့ဖူးသည့်အလား... လင်းဟန်က မေးခွန်းများ ထပ်မမေးတော့ဘဲ ပြင်ဆင်မှုများ ဆက်လုပ်နေတော့သည်။

“မစ္စတာလင်း" တစ်ခဏအကြာ ဟယ့်ယွင်ထင်တစ်ယောက် သူ့နာမည်ကို ရုတ်တရက် ခေါ်လာလေသည်။

လင်းဟန်မှာ မက်ခါ၏ စွမ်းအင် ကုန်ဆုံးမှုကို တတ်နိုင်သမျှ အနည်းဆုံး ဖြစ်အောင် မည်သို့ လျှော့ချရမည်ဟု တွေးတောနေဆဲ ဖြစ်ပြီး ဟယ့်ယွင်ထင်၏ အသံကို ကြားလိုက်ရချိန်တွင် မက်ခါ၏ စနစ်နှင့် ပရိုဂရမ်အား ကြည့်နေရာမှ လှည့်ကြည့်လာခဲ့သည်။

"ဘာများလဲ ဗိုလ်ချုပ်"

ဟယ့်ယွင်ထင်က ချက်ချင်း ပြန်ဖြေရမည့်အစား ရှားရှားပါးပါး မေးခွန်း ပြန်မေးလာခဲ့သည်။

"ကိုယ် မင်းကို ဒီကို မလာခင်က အယ်အင်နာအုန်း နက်ဗျူလာ အကြောင်း ပြောတာ မှတ်မိသေလား"

လင်းဟန် မစဥ်းစားဘဲ ခေါင်းငြိမ့်ပြလိုက်သည်။ "ဟုတ်တယ် နယ်စပ်ဒေသကို ရောက်တုန်းက မတွေ့ခဲ့ရဘူး နှမျောစရာပဲ"

သူက ယင်းမှာ နယ်စပ်ဒေသတွင်သာ မြင်နိုင်သည့် မြင်ကွင်းတစ်ခုဟု ပြောခဲ့ဖူးပေသည်။

"နောင်တရစရာ မရှိပါဘူး" ဟယ့်ယွင်ထင်မှာ တိုက်ရိုက်ဆန်ပြီး ကသိကအောက် ဖြစ်ရသော လေသံမျိုးဖြင့် ပြောနေဆဲ ဖြသ်သော်ငြား လင်းဟန်အား အမှန်တရားကို ပြောနေဆဲပင်။

"ခေါင်းလေးမော့ကြည့်လိုက်"

လင်းဟန်က မသိစိတ်အရ နာခံမိသွားပြီး ခေါင်းမော့ကြည့်လိုက်ရာ ယခင်က တစ်ခါမှ မမြင်ခဲ့ဖူးသည့် တောက်ပပြီး ရိုမန့်တစ်ဆန်လှသော ခရမ်းရောင် ကြယ်စုံကောင်းကင်ကြီးကို တွေ့လိုက်ရလေသည်၊

“——ဒါက အယ်အင်နာအုန်း နက်ဗျူလာပဲ”

👾

Prev Next