MM Story Teller

Chapter 161

Viewers 8k

🚩Chapter -161

Arc_7.နေရာလွဲမှားနေသောသမီး [ 27 ]

_____

နွေဦးပွဲတော်က မိသားစုများ အတူတကွ ပျော်ရွှင်စွာကုန်ဆုံးဖြတ်သန်းရသည့်အချိန်ဖြစ်သော်လည်း စုမိသားစုအိမ်တွင် ပြဿနာကြီးကြီးမားမားက ဖြစ်ထားလေသည်။ နွေဦးပွဲတော်သို့ ရောက်လာသည့်တိုင် ဗီလာထဲတွင် ပျော်ရွှင်မှု တစိုးတစိမျှ ရှိမနေပေ။

အခန်းထဲတွင်သာနေနေခဲ့သည့် ကျန်းယိုက နှစ်သစ်ကူးည၏ သန်းခေါင်ယံတွင် ရုတ်တရက်ငိုခဲ့၏။ သူမက ဝမ်ရှူးကျယ်အား တောင်းပန်တိုးလျှိုးကာ အသည်းအသန်ငိုသည်။ တစ်ချိန်တည်းမှာပင် သူမက အရာအားလုံးကို လွှတ်ချ၍ အစမှပြန်စမည်ဖြစ်ကြောင်းလည်းပြောခဲ့သည်။ ထို့အပြင် အတိတ်ကသူမနှင့် သူမ၏ညီမကြားမှ အမုန်းတရား၊ ပဋိပက္ခများကို အကုန်ပယ်ဖျောက်၍ အလွန်ချစ်ကြသည့် ညီအစ်မများ ဖြစ်လာရန် မျှော်လင့်ကြောင်းကိုလည်း ပြောခဲ့သေး၏။

သူမသာ အတိတ်မှ ကျန်းယိုဆိုလျှင် စုဝမ်က မယုံချင်ယုံချင်နှင့် သူမ၏စကားများက စိတ်ရင်းအမှန်များဖြစ်ကြောင်းကို ယုံကြည်ပေးလိုက်မည်။ သို့သော် ယခုတွင်တော့ ကျန်းယိုက သူမနှင့်အတူ ပြန်လည်သင့်မြတ်ချင်သည့် စကားကို တစ္ဆေသရဲများသာ ယုံလိမ့်မည်။

သို့သော်လည်း အမျိုးသမီးဇာတ်လိုက်၏ ကြိုးကြိုးစားစားလုပ်ဆောင်မှုကြောင့် သူမ၏မျက်လုံးများက နီရဲကာ ဖောင်းမို့နေတော့သည်။ စုဝမ်မှာ သူမ၏ မနာလိုမုန်းတီးမှုများကို မမြင်ချင်ယောင်သာ ဆောင်နေရတော့သည်။

နွေဦးပွဲတော်ပြီးသည်နှင့် ကျောင်းပြန်ဖွင့်လိမ့်မည်။ စုဝမ် များများစားစား ပြင်ဆင်စရာမရှိချေ။ သို့သော် လင်ရှန်းက စျေးကွက်ကို ထိုးဖောက်ရန်ပြင်ဆင်နေပြီဖြစ်သောကြောင့် စုရွေ့၏နေ့စဥ်ဘဝက အလုပ်ရှုပ်နေလေသည်။ သူက မကြာခဏ အချိန်ပို အလုပ်လုပ်နေရသောကြောင့် စုဝမ်က စုရွေ့နှင့် သေချာမတွေ့နိုင်ပေ။

မျက်စိတစ်မှိတ်ကလေးအတွင်း၌ မီးပုံးပွဲတော်သို့ရောက်လာခဲ့သည်။ ကျန်းယိုက ပြဿနာဖြစ်ပြီးနောက် ပထမဆုံးအကြိမ်အဖြစ် စုဝမ်အား အတူအပြင်ထွက်ရန် ပြောဆိုလာ၏။

“ရှောင်ဝမ် ‘ဧကရာဇ်မြို့တော်၏ အရှုပ်အရှင်းများ’က ဒီညဆယ်နာရီမှာ ရုံတင်မှာ အစ်ကိုကြီးရှောင်းလည်း ဒီမှာမရှိဘူးဆိုတော့ ငါတို့ အတူသွားကြည့်ကြရအောင်”

“ဧကရာဇ်မြို့တော်၏ အရှုပ်အရှင်းများ” က ရှောင်းယွင်ရိ ပါဝင်သရုပ်ဆောင်ထားသည့် ရုပ်ရှင်ဖြစ်သည်။ ကံကြမ္မာဆိုသည့်အရာက အချို့လူများအတွက်ပြောင်းလဲနိုင်သော်လည်း အချို့အတွက်ကတော့ မှတ်ကျောက်တင် ရေးထိုးထားပြီးသားဖြစ်သည်။

စုရွေ့၏သတိပေးချက်နှင့် လမ်းညွှန်ချက်များမရှိဘဲ ရှောင်းယွင်ရိက နောက်ဆုံးတွင် ရုပ်ရှင်၌ ပါဝင်နိုင်ခဲ့၏။ စုဝမ်သိထားသည့် ဇာတ်ကြောင်းအတိုင်းပင် သူက တတိယအမျိုးသားဇာတ်ကောင်၊ ဆဌမမင်းသားနေရာ၌ ပါဝင်သရုပ်ဆောင်ထားသည်။

စုဝမ်က ထိုရုပ်ရှင်အပေါ် အတော်လေးစိတ်ဝင်စားမိသည်။ ကျန်းယိုက သူမကို မျှော်လင့်တကြီးနှင့်ကြည့်နေသောအခါ စုဝမ်က လေးလေးနက်နက်ပြုံးလိုက်သည်။

“ကောင်းပြီလေ ငါလည်း ယွင်ရိကို သွားအားပေးမလို့ လုပ်ထားတာ”

စုဝမ်က လွယ်လွယ်ကူကူနှင့် သဘောတူလာသည်ကို တွေ့သောအခါ ကျန်းယို၏မျက်လုံးများတွင် ပျော်ရွှင်မှုများ ဖြတ်ပြေးသွား၏။

“ကောင်းပြီ သွားကြတာပေါ့”

စုဝမ်၏အခန်းထဲမှ ထွက်လာပြီးနောက် ကျန်းယိုက မဲ့ပြုံးပြုံး၍ ဝမ့်ဝမ်ဟောက်ဆီသို့ စာထပ်ပို့လိုက်သည်။

“ဒီညဆယ်နာရီ၊ ကျွန်မစာပို့မှာကိုစောင့်နေ”

ညနေခြောက်နာရီတွင် ညစာစားပြီးနောက် ကျန်းယိုက ဝတ်စားဆင်ယင်ပြီး ဆိုဖာပေါ်တွင်ထိုင်နေကာ နံရံပေါ်ရှိ ဥရောပစတိုင် နာရီကြီးကိုကြည့်၍ အချိန်အတော်ကြာအောင် စိတ်အတွေးများ ပျံ့လွင့်နေသည်။

သိပ်မကြာတော့မည့်အချိန်မှာပင် စုဝမ်ဖျက်ဆီးခံရတော့မည်ကိုတွေးရင်း သူမ၏ခန္ဓာကိုယ်ထဲမှ ဆဲလ်တစ်ခုချင်းစီတိုင်းက ဆူပွက်လာသလို ခံစားနေရသည်။ သို့သော်လည်း သူမက အချိန်ကုန်နှေးနေသလို ခံစားနေရသေး၏။

“တီ…တီ”

ကျန်းယို၏ဖုန်းသို့ စာတစ်စောင်ဝင်လာသည်။ ပထမတွင် ကျန်းယိုက သာမန်ကာလျှံကာကြည့်လိုက်သည်။ ယနေ့က အားလပ်ရက်ဖြစ်သောကြောင့် လုပ်ငန်းများမှ သူတို့၏ကာစတန်မာများအား သာကြောင်းမာကြောင်း ဆုတောင်းပေးထားသည့် စာများဝင်လာတတ်သည်။ သို့သော် ကျန်းယိုက ဖုန်းမျက်နှာပြင်ပေါ်မှ ဝမ့်ဝမ်ဟောက်၏ အမည်ကို မြင်လိုက်သောအခါ တောင့်ခဲသွားပြီး ချက်ချင်း ပထမထပ်ရှိ ရေချိုးခန်းသို့ လူတိုင်းသတိမထားအောင် အလျင်စလိုပြေးသွားလိုက်သည်။

ဝမ့်ဝမ်ဟောက်၏စာက အလွန်တို၏။ သူက ကျန်းယိုကို အရေးတကြီးပြောစရာရှိကြောင်းပြောထားသည်။ လိပ်စာလည်း ထည့်ပေးထားသေးသည်။ ၎င်းက ဝမ့်ဝမ်ဟောက်၏ သီးသန့်ဗီလာဖြစ်ကြောင်း ကျန်းယိုသိလိုက်သည်။ ထိုနေရာသို့ သူမနှစ်ကြိမ်တိုင်တိုင်ရောက်ဖူး၏။

သိပ်မကြာခင်မှာပင် သူမ၏ လက်စားချေသည့်အစီအစဥ်က အထမြောက်တော့မည်။

ဒီအချိန်မှ ဝမ့်ဝမ်ဟောက်က နောက်ဆုတ်တော့မလို့လား…ဒါမှမဟုတ် သူမဆီကနေအရင် “အကျိုးအမြတ်” ယူမလို့လား…။

ကျန်းယို၏ မျက်လုံးများလက်သွားသည်။ ဝမ့်ဝမ်ဟောက်၏ဗီလာက စုမိသားစုအိမ်နှင့် သိပ်မဝေးပေ။ ယခုအချိန်သွားမည်ဆိုပါက သူမကိုးနာရီမတိုင်ခင်ပြန်ရောက်ရန်လိုသည်။ အကယ်၍ ဝမ့်ဝမ်ဟောက်၌ ဆိုးယုတ်သော အကြံတစ်ခုခုရှိနေလျှင်…။

ကျန်းယိုက လက်သီးဆုပ်လိုက်၏။ သူမက ယခင်ကသူမ မဟုတ်တော့သလို လုံးဝအနိုင်ကျင့်ခံတော့မည် မဟုတ်ချေ။

ကျန်းယို အလောတကြီးနှင့်ထွက်သွားသည်ကိုမြင်လိုက်သော်လည်း စုဝမ်ဂရုမစိုက်လိုက်ပေ။ သူမက စုရွေ့ကို စာပို့ရင်း ပျင်းရိစွာနှင့် တီဗီဆက်ကြည့်နေသည်။

ဗိုလ်ချုပ်ကြီးစု : ဟိုရူးနေတဲ့မိန်းမ ထွက်သွားပြီလား

စုဝမ် : အင်း ရှင်ဘာတွေလုပ်နေပြန်တာလဲ

ဗိုလ်ချုပ်ကြီးစု : လျှို့ဝှက်ချက်…

စုဝမ် : ဒီည ရုပ်ရှင်အတူသွားကြည့်ကြမလား

ဗိုလ်ချုပ်ကြီးစု : ယွင်ရိကကိုယ့်ကို VIP လက်မှတ်နှစ်စောင်ပေးထားတယ် ဆယ်နာရီကျရင် ကိုယ်မင်းကိုစောင့်နေမယ်လေ

စုဝမ် : ကောင်းပြီ

စုရွေ့နှင့် စာပို့ပြီးနောက် စုဝမ်သည် နေ့လည်က ကျန်းယို သူမကိုပေးထားသည့် ရုပ်ရှင်လက်မှတ်နှစ်စောင်ကို သတိရသွားသည်။ သူမကမနေနိုင်ဘဲ လော့ယွီထံစာပို့လိုက်၏။

“ဧကရာဇ်မြို့တော်၏ အရှုပ်အရှင်းများ ကိုကြည့်ချင်လား ဒီညဆယ်နာရီ ရှင်းထျန်းတိက ငါးလွှာ ရုပ်ရှင်ရုံကိုသွားလိုက် စင်ဒရဲလားရဲ့အစ်မမှာလည်း လက်မှတ်တစ်စောင်ရှိတယ်”

စာပို့လိုက်ပြီးနောက် စုဝမ်က ရွှီနော့ကို တစ်ဖန်ခေါ်လိုက်ပြီး ရုပ်ရှင်ရုံအရှေ့တွင် ညကိုးနာရီလေးဆယ်၌ ဆုံကြရန်ပြောလိုက်သည်။

အားလုံးအောင်မြင်စွာ စီစဥ်ပြီးနောက် စုဝမ်က သက်တောင့်သက်သာနှင့် အကြောဆန့်လိုက်၏။

တကယ်တမ်းတွင် လူနှစ်ယောက်ကြားမှ ကံကြမ္မာက အလွန်ဆန်းကြယ်သည်ပင်။

ရွှီနော့က လော့ယွီကို တိတ်တဆိတ်သဘောကျနေသကဲ့သို့ပင် လော့ယွီကလည်း ကပွဲမှ စင်ဒရဲလား၏အစ်မအကြောင်းကို တွေးမိနေသည်။

သူတို့နှစ်ယောက် တကယ်ပဲ တစ်ယောက်ကိုတစ်ယောက် သဘောကျနေကြတာလား…

တစ်စုံတစ်ယောက်ကို တိတ်တခိုးသဘောကျနေရခြင်းက နိုးထမလာနိုင်သည့် အိပ်မက်တစ်ခုလိုပင်။ ထိုအိပ်မက်ထဲတွင်သာ နစ်မျောနေလိမ့်မည်။ သို့သော် တစ်နေ့တွင် ထိုအိပ်မက်က တစ်စုံတစ်ယောက်၏ ဝင်ရောက်နှောင့်ယှက်ခြင်းကို ခံရလိမ့်မည်။ အိပ်မက်မှ လက်တွေ့သို့ နိုးထလာပြီး အချိန်အတော်ကြာအောင် တိတ်တခိုးသ‌ဘောကျနေရသည့်သူကို အမှန်တကယ်ထိတွေ့နိုင်၍ သူနှင့် နီးကပ်နေနိုင်ပြီး သူ့ကိုနားလည်လာချိန်တွင် သူကအိပ်မက်ထဲမှ တစ်ယောက်ဖြစ်နေဆဲလား ဟူ၍ မေးခွန်းထုတ်လာနိုင်၏။

ပထမဆုံးမြင်မြင်ချင်း၌ သဘောကျသွားခြင်းက အလွန်ကို လှပသောအရာဖြစ်သည်။

စိတ်ထဲတွင် အဆက်မပြတ် ပဲ့တင်ထပ်နေသည့် အရာအားလုံးက ထိုအခိုက်အတန့်လေး၏ ခံစားချက်များသာဖြစ်သည်။

သူတို့နှစ်ယောက်ကို ကူညီရန် စုဝမ်မရည်ရွယ်ပေ။ သူမက လော့ယွီနှင့် ရွှီနော့တို့ တစ်ယောက်နှင့်တစ်ယောက် လွဲမသွားစေရန်သာ ပြုလုပ်ပေးလိုက်ခြင်းဖြစ်၏။ သူတို့နှစ်ယောက် အတူရှိသွားနိုင်၊ မသွားနိုင်ကတော့ သူတို့၏ခံစားချက်နှင့် ဘဝအပေါ်သာမူတည်သည်။

စုဝမ်သည် ဘယ်တုန်းကမှ အခြားသူများ၏ကိစ္စများကိုလိုက်၍ ဝင်ရောက်စွက်ဖက်တတ်သူမဟုတ်ပေ။ ယခုတစ်ခေါက် သူမက လော့ယွီနှင့်ရွှီနော့တို့ကို ကျေးဇူးပြန်ဆပ်ခြင်းသာဖြစ်၏။

စုဝမ်ထိုအရာများကိုလုပ်နေချိန်တွင် အလောတကြီးထွက်သွားသော ကျန်းယိုက ကားနှင့် ဝမ့်ဝမ်ဟောက်၏ အိမ်သို့ ရောက်လာခဲ့သည်။ ဗီလာဟောခန်းထဲမှ မီးများထိတ်လင်းနေသည်ကိုကြည့်ရင်း ကျန်းယိုက အသက်ပြင်းပြင်းရှူလိုက်၍ တံခါးဆီသို့သွားကာ လူခေါ်ဘဲလ်ကိုနှိပ်လိုက်သည်။

မည်သူမှပြန်ဖြေမလာခဲ့ချေ။ ကျန်းယိုခဏကြာအောင်စောင့်ပြီးနောက် ဝမ့်ဝမ်ဟောက်၏နံပါတ်ကိုခေါ်လိုက်သည်။ သို့သော် ဖုန်းလည်းပြန်မဖြေပေ။

ဒါက……

ကျန်းယိုက တွ့န်ဆုတ်နေပြီးနောက် ဗီလာတံခါးကို ဖွင့်လိုက်သည်။ သူမအရှေ့ရှိ ဗီလာတံခါးက ထင်မှတ်မထားဘဲ ပွင့်သွားလေသည်။

တံခါးက လော့ချမထားဘူး…။

ဤကဲ့သို့ ထူးဆန်းသည့်အခြေအနေတွင် သာမန်လူများက တွန့်ဆုတ်နေပြီး ရဲခေါ်ခြင်း၊ သို့မဟုတ် လှည့်ထွက်သွားခြင်းတို့ကိုသာ လုပ်ကြလိမ့်မည်။

သို့သော် အမျိုးသမီးဇာတ်လိုက်တစ်ယောက်အနေနှင့် ကျန်းယိုက လှည့်ထွက်မသွားနိုင်ပေ။

အမျိုးသမီးဇာတ်လိုက် စည်မျဥ်းတစ် : အခက်အခဲများတွေ့ကြုံလျှင် ရှေ့ဆက်တိုးရမည်။ အခက်အခဲမရှိလျှင် ရှိအောင်ဖန်တီးရမည်။ ရှောင်ဖယ်မသွားဘဲ အရှေ့သို့သာဆက်တိုးသွားရမည်။

ကျန်းယိုက ဗီလာထဲသို့မဝင်ခင် တစ်စက္ကန့်လောက်ကြာအောင် တွ့န်ဆုတ်နေခဲ့သည်။ ဗီလာထဲတွင် မီးများထွန်းထားသော်ငြား ဧည့်ခန်းထဲတွင် လူမရှိချေ။

ဗီလာ၏ ဒုတိယထပ်မှ သွေးနံ့ဖျော့ဖျော့လေးက ပျံ့လွင့်လာသည်။ ကျန်းယို၏အမူအရာများက ပြောင်းလဲသွားပြီး အပေါ်ထပ်သို့ လျင်မြန်စွာ တက်သွားလိုက်သည်။

သွေးနံ့က ဒုတိယထပ်ရှိ အခန်းတစ်ခန်းမှ ထွက်လာနေခြင်းဖြစ်သည်။ ထိုအခန်းက ဝမ့်ဝမ်ဟောက်၏ အိပ်ခန်းဖြစ်ကြောင်း ကျန်းယိုမှတ်မိသွားသည်။

သူတစ်ခုခုဖြစ်နေတာလား…။

ချက်ချင်းပင် ကျန်းယိုက စိတ်မရှည်စွာနှင့် တံခါးကိုဖွင့်၍ အသိပေးချက်တစ်ခုတလေမှမရှိဘဲ ဝင်ရောက်သွားလိုက်သည်။ သူမဝင်သွားသည်နှင့် တစ်ယောက်ယောက်က ရုတ်တရက် သူမကို ဖမ်းချုပ်လာပြီး သူမ၏ပါးစပ်နှင့်နှာခေါင်းများကို တစ်ခုခုဖြင့် ဖုံးအုပ်လာသည်။ ထူးဆန်းသည့်အနံ့တစ်မျိုးကိုရလိုက်ပြီးနောက် ကျန်းယို၏အမြင်များဝေဝါးလာသည်။ သူမ သတိလွတ်မသွားခင်တွင် ရုန်းကန်လိုက်ရာ သူမအနောက်မှ ပုံပျက်နေသောဝမ့်ဝမ်ဟောက်၏ မျက်နှာကို တွေ့လိုက်ရသည်။

ညဆယ်နာရီ၌ “ဧကရာဇ်မြို့တော်၏ အရှုပ်အရှင်းများ” ကအချိန်ကိုက်ပြသလာ၏။ ရုပ်ရှင်ရုံက မှောင်မည်းနေကာ ရုံတင်သည်ကို လာကြည့်ကြသည့်သူများနှင့်ပြည့်လျှံနေသည်။

စုဝမ်နှင့် စုရွေ့က VIPခုံတွင် သက်တောင့်သက်သာထိုင်၍ ရှောင်းယွင်ရိ၏ အမည်တစ်ခုရအောင် စွမ်းဆောင်နေမှုများကို သေချာကြည့်နေကြသည်။ ရုပ်ရှင်ပြီးသွားပြီး ရုပ်ရှင်ရုံထဲမှ ပြန်ထွက်လာကြသောအခါ အမျိုးသမီးပရိသတ်များက မျက်လုံးများနီရဲနေအောင် ငိုထားကြသည်ကို စုဝမ်တွေ့လိုက်သည်။

“ဟေး အဲ့ဒါ လော့ယွီမလား”

ရုပ်ရှင်ရုံထဲမှ ထွက်လာချိန်၌ စုရွေ့က သူ၏ပြိုင်ဘက်ဟောင်းကို လူအုပ်ကြားထဲတွင် တစ်ချက်ကြည့်ရုံနှင့် မြင်လိုက်၏။

“သူနဲ့အတူရှိနေတဲ့တစ်ယောက်က…ရွှီနော့လား”

စုရွေ့က ရွှီနော့နှင့် မရင်းနှီးပေ။ သို့သော် စုဝမ်က သူ့အား လော့ယွီနှင့် ရွှီနော့အကြောင်းအား တစ်ခါပြောပြဖူးသောကြောင့် လော့ယွီဘေးနားတွင်ရှိနေသူမှာ ရွှီနော့ပင် ဖြစ်လိမ့်မည်ဟု စုရွေ့သိလိုက်သည်။

ထိုအချိန်တွင် ရွှီနော့က ရုပ်ရှင်ဇာတ်ကြောင်းကြောင့် ဝမ်းနည်းနေပုံရသည်။ သူမ၏မျက်မှန်ကိုချွတ်ကာ တစ်ဖက်ကိုလှည့်၍ မျက်ရည်များကို သုတ်နေသည်။

“အင်း ကျွန်မသူတို့ကိုလာခိုင်းလိုက်တာ ကျန်းယိုရဲ့ လက်မှတ်နှစ်စောင်ကို မဖြုန်းတီးသင့်ဘူးလေ”

စုရွေ့၏မေးခွန်းကိုကြားသောအခါ စုဝမ်က သူတို့နှစ်ယောက်လည်း ရုပ်ရှင်လာကြည့်ကြောင်း ပြောပြလိုက်သည်။

လော့ယွီသာ စင်ဒရဲလား၏အစ်မကို တကယ်မမေ့နိုင်ပါက လူအုပ်ကြီးထဲတွင် သူနှင့်ရင်းနှီးနေသည့် ထိုပုံရိပ်လေးကို သေချာပေါက်လိုက်ရှာလိမ့်မည်ဟု စုဝမ် ယုံကြည်သည်။

စုရွေ့ကပြုံးလိုက်ပြီး သူမ၏ ပခုံးကို ဖက်လာသည်။

“ကိုယ့်ဇနီးလေးက ဘယ်တုန်းက ကြိုးနီလေးတွေကိုင်တဲ့ ထိမ်းမြားရေး နတ်ဘုရားဖြစ်သွားတာလဲ”

စုရှောင်ဝမ် မင်းက စုံတွဲတွေကို လိုက်ဖြတ်ရမယ့်တာဝန်နဲ့ ယာဥ်ဖျက်ဆီးရေးသမားတစ်ယောက်ဆိုတာ မေ့သွားတာလား…။

စုရွေ့၏စနောက်နေသည့်အကြည့်များကို တစ်ချက်ကြည့်လိုက်ပြီးနောက် စုဝမ်က လူအုပ်ထဲမှ လော့ယွီနှင့် ရွှီနော့ကိုကြည့်လိုက်သည်။

“တချို့လူတွေက နှလုံးသားထဲမှာ နေနိုင်ကြပြီးတော့ တချို့လူတွေကတော့ အမှတ်တရတွေထဲမှာသာ နေနိုင်ကြတယ် တစ်ခါတလေကျ စုံတွဲတစ်တွဲက ကဏ္ဍအမျိုးမျိုးမှာ လိုက်ဖက်ညီနေပေမယ့်လည်း အဲ့ဒါက တစ်သက်လုံးတည်မြဲသွားလိမ့်မယ်လို့ မသေချာဘူး တကယ်တမ်း သူတို့နှစ်ယောက်နဲ့ပတ်သက်ပြီး ကျွန်မအများကြီး မှန်းမထားပါဘူး”

ဤကမ္ဘာမှ လူနည်းစုလေးသည် ထိုတစ်စုံတစ်ယောက်အား တစ်သက်လုံး ချစ်မိသွားလိမ့်မည်။

ချစ်ပေးချင်ပါက အကောင်းဆုံးကြိုးစား၍ချစ်ပေးလိုက်ခြင်းကကောင်းသည်။ အဆုံးတွင် လိုက်ဖက်မညီ၍ ပြတ်စဲခဲ့လျှင်တောင် အနည်းဆုံးတော့ နောင်တတို့မရှိဘဲချစ်ပေးခဲ့သည်ပင်။

စုဝမ် ချစ်ပေးခဲ့ဖူးသည်။ မုန်းလည်းမုန်းခဲ့ဖူးသည်။ ထို့အပြင် နက်နက်ရှိုင်းရှိုင်းလည်း စိတ်ပျက်အားလျော့ခဲ့ဖူးသည်။ ကံကောင်းထောက်မစွာဖြင့် သူမ စုရွေ့နှင့်တွေ့ဆုံခဲ့၏။

ထိုကဲ့သို့ကောင်းမွန်သည့်သူတစ်‌ယောက်နှင့်တွေ့ဆုံလာပါက တွန့်ဆုတ်နေလျှင် တစ်ဖက်လူကို ဆုံးရှုံးရလိမ့်မည်ပင်။

အကယ်၍ ရဲရဲဝံ့ဝံ့နှင့်ရှေ့တိုးလိုက်ပါက မိမိတစ်ယောက်တည်းအတွက်သာဖြစ်သည့် ဗိုလ်ချုပ်ကြီးစုကဲ့သို့ လူမျိုးရကောင်းရနိုင်လိမ့်မည်။

Translated By IQ-Team.🚩

Prev Next