Chapter 56

👾Chapter 56

[ လူငယ်လေး၏လက်ဖမိုးပေါ်  နူးညံ့လျင်မြန်သည့်အနမ်းတစ်ခုပေးလိုက်သည် ]

" သူက ဒီလိုမျိုး အရေအတွက် အလွန်အမင်းရှားပါးတဲ့ အိုမီဂါမျိုးစိတ် တွေကို ' မီးလျှံသွေး ' ဆိုပြီး နာမည်တစ်ခုပေးခဲ့တယ် "

လင်းဟန် အနည်းငယ် အံ့သြသွား လေ၏။ သူသည် ကြင်နာသော မျက်လုံး၊ ဖော်ရွေသော အေးဆေးတည်ငြိမ်မှု နှင့် မြင့်မားသော အသိပညာအရည်အချင်းရှိသည့် ပညာရှင် ရူကျစ်ဟန်၏ နာမည်ကို ကြားဖူးသည်။ အင်ပါယာစစ်တက္ကသိုလ်တွင် ဟောပြောပွဲများစွာကို သင်ကြားပို့ချရန် ဧည့်ပါမောက္ခအဖြစ် ရောက်ရှိလာသောအခါတွင် ၎င်းတို့သည် မတူညီသည့်နယ်ပယ်အသီးသီးတွင် လုပ်ကိုင်ကြသော်လည်း လင်းဟန်သည် ထိုသူ၏ ပညာရှင်ပီသမှုကို သဘောကျကာ ဟောပြောပွဲတိုင်း သွားရောက်နားထောင်ခဲ့သည်။

ဟယ့်ယွင်ထင်က ဆက်ပြောသည်။

" သူက ဒီအိုမီဂါအမျိုးအစားက ကျန်တာတွေနဲ့ တခါတလေမှာ ကွဲ‌ပြားနေတတ်တာကို ရှာတွေခဲ့တယ်။ သာမန်ထက် နည်းနည်း ပိန်ပေမဲ့ မကြာခဏဆိုသလို စိတ်စွမ်းအင်စွမ်းအား အလွန်မြင့်မားနေတတ်တာကို ရှာတွေ့သွားခဲ့တယ် "

လင်းဟန်က ဂရုတစိုက် နားထောင်နေပြီး  ' မီးလျှံသွေး ' ဟု ခေါ်ဆိုသည့်အရာ၏ မူလဇာစ်မြစ်ကို တဖြည်းဖြည်း နားလည်သွားတော့သည်။

ရူကျစ်ဟန်မှ ဤကဲ့သို့ အိုမီဂါအား ရှာဖွေ့တွေ့နိုင်ခဲ့သည်မှာ ကောင်းသည့်အရာတစ်ခုဖြစ်ပေသည်။

သို့သော် နောက်ဆုံးတွင် အိုမီဂါများမှာ ကန့်သတ်ချက် အများအပြား ထားရှိခံကြ‌ရသည်။ သို့ရာတွင် ပါမောက္ခရူ၏သုတေသနတစ်ခုတွင် သူက ထိုကဲ့သို့အိုမီဂါများသည် ၎င်းတို့၏ဂလင်းများ ပျက်စီးသွားပြီးနောက် သာမန်လူများနှင့် မတူညီတော့သည်ကို ရှာတွေ့သွားခဲ့သည်။

ယောင်္ကျား၊မိန်းမ နှစ်မျိုးလုံးသည် ၎င်းတို့၏ခန္ဓာကိုယ်က အလွန်ပိန်ပါးနေလျှင်တောင်မှ လှုံ့ဆော်ဆေးအလုံးတစ်ရာ ထိုးသွင်းခံထားရသကဲ့သို့ ပင်ပန်းမှုကို ခံစားကြရခြင်းမရှိဘဲ အယ်လ်ဖာအချို့ထက်ပင် အတိုင်းအတာတစ်ခုခန့် ပြင်းထန်သည့်လေ့ကျင့်ရေးများကို တောင့်ခံနိုင်ကြသည်။

" ဂလင်းတွေဖယ်ထုတ်လိုက်တာနဲ့သူတို့တွေက ....  သဘာ၀အလျောက်ဖြစ်‌ ပေါက်ဖွားလာတဲ့လက်နက်တွေလို ဖြစ်သွားကြတယ် "

ဟယ့်ယွင်ထင်ကပြောသည်။

၎င်းတို့၏လိင်အမျိုးအစားကို မေ့ထားလိုက်ပြီး အသိစိတ်ကို ဘေးဖယ်ထားကာ ဂလင်းများကို ဖျက်ဆီးလိုက်လျှင် သာမန်လူထက် အဆရာပေါင်းများစွာ သန်မာသည့် တိုက်ခိုက်ရေးစက်ကို ပိုင်ဆိုင်နိုင်လိမ့်မည်ဖြစ်ကာ လေ့ကျင့်သင်ကြားပေးလျှင် အကောင်းဆုံးပိုင်းလော့များပင် ဖြစ်လာနိုင်သည်။

" ဒါပေမဲ့ ပါမောက္ခရူက ဒီကိစ္စကို ရပ်တန့်ဖို့ အလောတကြီး တောင်းဆိုခဲ့တယ် "

ရူကျစ်ဟန်သည် သဘာ၀အလျောက် သဘောထားပျော့ပျောင်းသူဖြစ်သည့်အပြင် စစ်ပွဲများလည်း မဖြစ်ပွားစေလိုချေ။ ဤသည်က လူ့အခွင့်‌အရေးကို ဆန့်ကျင်နေသည့်အပြင် ဤရှာဖွေတွေ့ရှိချက်သည်လည်းမတော်တဆ သက်သက်သာဖြစ်သည်။ သူက ထိုဖြစ်ရပ်ကို အတုအယောင်ဟုသတ်မှတ်ခဲ့ပြီး အဖြစ်ဆိုးကို ဆက်လက်မလုပ်ဆောင်နိုင်ပေ။ ထိုအဖြစ်ဆိုးမှာ ကြီးကျယ်လှသည့်အကြောင်းပြချက်ဖြင့် ဘောင်ခတ်ထားလျှင်တောင်မှ ဤအချက်မှာ ဖုံးကွယ်၍ မရနိုင်ပေ။

သို့သော် အချို့သောအစွန်းရောက်များက ဤအရာသည် အင်ပါယာ၏ဓားသွားများကို လေ့ကျင့်ပေးရန် အကောင်းဆုံးဖြတ်လမ်းတစ်ခုဟူ၍ တွေးထင်ခဲ့ကြသည်။ ရူကျစ်ဟန်သည် ၎င်းကို ဟန့်တားရန် အစွမ်းကုန် ကြိုးပမ်းခဲ့သော်လည်း အချို့သောအိုမီဂါများမှာ ၎င်းတို့၏ဂလင်းများ ဖျက်ဆီးခံကြရကာ 'လက်နက်များ'ဟု ၎င်းတို့ခေါ်ဆိုကြသည့်အရာများဖြစ်လာခဲ့ကြသည်။

မီးလျှံသွေးအိုမီဂါများမှာ အမှန်ပင် သန်မာလွန်းကြသည်။ ၎င်းတို့ထဲမှ အချို့သည် မဖြစ်နိုင်‌သည့်တာ၀န်များ ပြီးမြောက်ရန်အတွက် လူသားများဟူသည့်ကန့်သတ်ချက်ကို ကျော်လွန်လုနီး ပင် ဖြစ်ခဲ့ကြသည်။

ရူကျစ်ဟန် ကိုယ်တိုင်သည် ၎င်းကို သည်းမခံနိုင်တော့သဖြင့် သူ့ သူငယ်ချင်းဖြစ်သူ ကျန်းလျန်အပါအ၀င် လူများစွာကို ဆက်သွယ်ခဲ့ပြီး နောက်ဆုံးတွင် ဗီတိုအာဏာကို အသုံးပြု၍ သုတေသနအား ကောင်စီတွင် ပယ်ချခဲ့သည်။မည်သူကမှ အပြစ်ကင်းစင်သည့်အိုမီဂါ၏ ဂလင်းများကို ဤနည်းအားဖြင့် ဖျက်စီးရန် ခွင့်မပြုခဲ့ပေ။

သုတေသနမှာ နောက်ဆုံးတွင် အရှုပ်တော်ပုံတစ်ခုဖြစ်သောကြောင့် နှစ်ဖက်လုံးမှာ ထိုကိစ္စကို လူပိုသိမည်ကို မလိုချင်ကြသောကြောင့် အဆုံးတွင် စစ်တပ်၏၀င်ရောက်စွက်ဖက်မှု‌ဖြင့် ' စစ်တပ်လျှို့ဝှက်ချက် ' ဟု ခေါ်ဆိုသည့်အရာ ဖြစ်သွားခဲ့သည်။

ပါ၀င်မပတ်သက်သော်လည်း ဟယ့်ယွင်ထင်သည် သဘာ၀အလျောက် ထိုကိစ္စအား သိလေသည်။

အဖက်ဖက်မှ ၀င်ရောက်စွက်ဖက်မှုများအပြီးတွင် အဆိုပါကိစ္စရပ်ကို အလုံးစုံဖုံးကွယ်လိုက်ကြပြီး ပါ၀င်ခဲ့သည့်သူများမှာ ၎င်းသည် ဘယ်တုန်းကမှ မတည်ရှိခဲ့သကဲ့သို့ လျှို့ဝှက်ခဲ့ကြသည်။

သို့သော် ထိုအရာအားလုံးသည် လွန်ခဲ့သည့်နှစ်ပေါင်းများစွာတွင် ဖြစ်ပျက်ခဲ့ခြင်းဖြစ်ပေသည်။

" အဲ့ဒါက နှစ်အတော်ကြာ ‌ငြိမ်သက်သွားခဲ့ပြီး လူအတော်များများ မသိခဲ့ကြဘူး။ ထိပ်ဆုံးကလူတွေတောင် အဲ့ဒီ‌အကြောင်း တကယ် မေ့ပျောက်လုနီးပါးဖြစ်တဲ့အထိတောင် ရောက်နေခဲ့ပြီ "

ဟယ့်ယွင်ထင်က ပြောသည်။

" အဲ့ဒီကိစ္စ ပြန်ပေါ်ပေါက်လာမယ်လို့ မထင်ခဲ့ဘူး။ တားမြစ်ချက်ကို ဆန့်ကျင်ပြီး အဲ့အချိန်က အဖြစ်မှန်ကို သိရှိတဲ့လူတွေက နောက်ကွယ်မှာ တိတ်တဆိတ် သုတေသနလုပ်နေခဲ့ကြတယ် ။ ဒီကိစ္စက နှိမ်နှင်းလို့ မရတော့ဘူးလို့ ခံစားမိတဲ့အတွက် မစ္စတာလင်းကို ပြောပြ‌ပေးတာပါ " 

ဟယ့်ယွင်ထင်က အေးစက်စွာ ပြောသည်။

လင်းဟန်မှာ ရရှိလာသည့် အချက်အလက်များက အလွန်များပြားနေသည့်အတွက် ပြန်လည်မတုံ့ပြန်မီ အချိန်ခဏ ယူလိုက်ရသည်။

" ကျွန်တော် နားလည်ပြီ "

သုတေသနကို မည်သူက ပြန်လည်စတင်ကာ အချိန်မည်မျှ ကြာမြင့်နေခဲ့သည်ကို မသိရှိရသေးသော်လည်း  မည်သို့ စတင်‌ခဲ့စေကာမူ ၎င်းမှာ စိုးရိမ်ထိတ်လန့်ဖွယ်ရာဖြစ်လေ၏။ ဤအကြိမ်တွင် အိုမီဂါ မည်မျှ ထိခိုက်ဒဏ်ရာရရှိကာ ထိန်းချုပ်ခံခဲ့ရမည်နည်း။

ဟယ့်ယွင်ထင်သည် အချိန်အတော်ကြာပြီးသည့်နောက်တွင် သူ့အသံသည် မမြင်တွေ့နိုင်သည့်ခြောက်တွေ့မှု တစ်စွန်းတစ်စဖြင့် အေးစက်နေသည်။

" ကျွန်တော် မစ္စတာလင်းအကြောင်း တွေးနေတာ "

လင်းဟန်၏အခြေအနေမှာ အထက်ဖော်ပြပါ အခြေအနေများနှင့် ကိုက်ညီလုနီးပါးဖြစ်နေပြီး ထိခိုက်ပျက်စီးမှုအနည်းငယ်နှင့်သူသည် သုတ်သင်ခံရမည့်'လက်နက်' ဖြစ်လာပေလိမ့်မည်။

" အဲ့လိုဆိုမှ " လင်းဟန်က ချီကျားဇယ်ကို သတိရမိလိုက်သည်။ " သူကလည်း ခင်များပြောတဲ့ အိုမီဂါအမျိုးအစားဖြစ် နေလောက်တယ်။ ဒါပေမဲ့..."

သူက အနည်းငယ် ထူးခြားသည့်ပုံဖြစ်လေသည်။

ထို့အပြင် အကယ်၍ ထိုကဲ့သို့ အိုမီဂါသည် ဟယ့်ယွင်ထင်နှင့် တစ်နည်းတစ်ဖုံ ကွဲပြားနေလျှင် ထိုအခါ ဝှက်ဖဲဟု ယူဆနိုင်သည့်ချီကျားဇယ်မှလွဲ၍ ဟယ့်ယွင်ထင်အား လုပ်ကြံရန် နှစ်ကြိမ်တိုင်တိုင် ကြိုးပမ်းခဲ့သည့်အိုမီဂါသည် အလွန်ရှင်းရှင်းလင်းလင်း သေဆုံးသွားခဲ့သည်။ ထို့အပြင် သူက စစ်သင်္ဘောပေါ်သို့ မည်သို့ ရောက်ရှိလာသည်ကို မည်သူမှ မသိကြရသေးချေ။

ဟယ့်ယွင်ထင်သည် လင်းဟန်၏စကားများကို နားထောင်ပြီးနောက် အတော်ကြာ တွေးတောနေခဲ့သည်။

 " ဖြစ်နိုင်တာက...သူတို့တွေရဲ့ သုတေသနက ထင်ထားတာထက် ပိုပြီး နက်ရှိုင်းနေလိမ့်မယ် "

နှစ်ယောက်သား စကားပြောပြီးနောက် လင်းဟန်သည် နောက်ဆုံးတွင် အိပ်ငိုက်လာကာ မတတ်သာဘဲ အိပ်ပျော်သွားတော့သည်။

ကူးလုလုသည် ဟယ့်ယွင်ထင်အား အာရုံစိုက်ရန် အလွန်ပျင်းရိနေပြီး သူ့အမွှေးများကို ခါလိုက်ကာ လင်းဟန်ပေါ်သို့ ပစ်လှဲလိုက်သည်။ ဟယ့်ယွင်ထင်က ၎င်းကို အချိန်တစ်ခုကြာစိုက်ကြည့်လိုက်ပြီး ဗိုက်လေးအား လက်ညှိုးဖြင့် ထိုးလိုက်သည်။ 

" မနက်ဖြန် မစ္စတာလင်းကို မင်းလာခဲ့တဲ့ နေရာဆီခေါ်သွားဖို့ မမေ့နဲ့။ ဟုတ်ပြီလား "

ကူးလုလု၏အမြီးက အနည်းငယ် လှုပ်ယမ်းသွားသော်လည်း သူက အသံမပြုလာပေ။

ဟယ့်ယွင်ထင်သည်လည်း ၎င်းကို ဖိအားမပေးဘဲ ထပ်မံပြောလိုက်သည်။

" တကယ်လို့ စားနပ်ရိက္ခာ မရှိတော့ရင် မစ္စတာလင်းက အရမ်းသနားစရာဖြစ်သွားလိမ့်မယ် "

ကူးလုလုသည် သေသေချာချာ နားမထောင် သို့မဟုတ် သနားစရာဟူသည်ကိုပင် နားမလည်နိုင်လောက်ပေ။

" အဲ့ဒါဆို သူက မင်းကို ဂရုစိုက်မှာ မဟုတ်တော့ဘူး။ မင်း အမွှေးတွေကို ပွတ်သပ်ပေးဖို့လည်း အားရှိမှာ မဟုတ်တော့ဘူး "

ဟယ့်ယွင်ထင်က ရက်စက်စွာ ထပ်ပေါင်းထည့်ပြောသည်။

သူက ကူးလုလု၏အမွှးများ ထောင်သွားသည်ကို ကြည့်လိုက်သည်။

ဟယ့်ယွင်ထင်သည် သူ စီစဉ်ထားသည့်အတိုင်း ဖြစ်သွားသဖြင့် ကျေနပ်သွားပုံရကာ အိပ်စက်ရန်အတွက် အခြားအခန်းဆီသို့ သွားလိုက်သည်။

မည်သည့်အရာက ရှေ့တွင် စောင့်ကြိုနေပါစေ မနက်ဖြန်သည် နေ့သစ်တစ်ရက် ဖြစ်နေဆဲပင်။

နောက်တစ်နေ့တွင် ဟယ့်ယွင်ထင်သည် လင်းဟန် အိပ်ရာမနိုးမီ သိုလှောင်ခန်းလေးထဲတွင် လေ့ကျင့်ရေးဆင်းစဉ်က လုအန်းဟယ်၏လက်ထဲမှ လျှောကျခဲ့သည့်မုန့်ထုပ်တစ်ထုပ်ကို ရှာတွေ့သည်။

သူက သူ၏ကိုယ်ပိုင်လေယာဥ်လေးအား သတိရမိသွားတော့သည်။

နှစ်ယောက်သား အလွန်အမင်း နှောင့်နှေးကြန့်ကြနေ၍မဖြစ်ပေ။ နေ အပြည့်အ၀မထွက်သဖြင့် အပူချိန် အလွန်အမင်း မမြင့်မားသောကြောင့် ၎င်းတို့သည် မြေပြင်ပေါ်၌ လမ်းလျှောက်သွားနိုင်သည်။ အကယ်၍ ပိုမိုပူပြင်းလာပါက ပြင်းထန်လောင်ကျွမ်းစေသည့်ခရမ်းလွန်ရောင်ခြည်များသည် ၎င်းတို့အား ဆွဲဖြဲပစ်မည်ဖြစ်ကာ တောင့်ခံနိုင်မည်မဟုတ်ပေ။

လင်းဟန်သည်လည်း စောစောနိုးလာပြီး မျက်လုံးများကို ပွတ်သပ်ရင်း ဘေးဘက်ရှိ မုန့်ထုပ်ကို မြင်လိုက်သည်။ သူက ဗိုက်ဆာနေပြီး ခြေလက်များက အားနည်းနေသည်။

" နောက်ဆုံးအထုပ် "

သူ နိုးလာသည်ကိုမြင်သည့်အခါ ဟယ့်ယွင်ထင်က ရှင်းပြသည်။ 

" ကနေ့ သူ့ကို လမ်းပြခိုင်းမှ ဖြစ်မယ်"

လင်းဟန်က ခေါင်းငြိမ့်လိုက်ပြီး လက်မောင်းထဲတွင် ရှိနေသည့် အ  ကောင်လေးကို ကြည့်ကာ နူးညံ့စွာဖြင့် သားမွှေးများကို ပွတ်သပ်ပေးလျက် အကြံဉာဏ်တောင်းသည့်အသံဖြင့် မေးလိုက်သည်။

" ငါတို့ကို အဲ့နေရာဆီ ခေါ်သွားပေးမှာလား  ""

အကောင်ငယ်လေးက တုံ့ဆိုင်းခြင်းမရှိဘဲ လင်းဟန်အား လှည့်ပတ်နေသည်။

လင်းဟန် သိုလှောင်ထားသည့်ရေဖြင့် ရိုးရိုးရှင်းရှင်း သန့်စင်လိုက်ပြီး မတ်တတ်ရပ်ကာ ဟယ့်ယွင်ထင်အား ပြောလိုက်သည်။ 

"သွားကြစို့"

၎င်းတို့သည် မက်ခါအတွက် စွမ်းအင်စုဆောင်းထားရမည်ဖြစ်သည့်အပြင် ကူးလုလုသည် ဟယ့်ယွင်ထင် သို့မဟုတ် မက်ခါကို မဟုတ်ဘဲ လင်းဟန်ကိုသာ အသိအမှတ်ပြုသောကြောင့်

၎င်းတို့သည် နယ်မြေဆီသို့ ဦးဆုံး လမ်းလျှောက်သွားရန် ရွေးချယ်လိုက်သည်။ ကူးလုလုသည် မြေပြင်ပေါ်သို့ ဆင်းသက်သည်နှင့် စိတ်လှုပ်ရှားစွာ လူးလိမ့်လိုက်ပြီး လင်းဟန်မှ သူ့အား မှီသည်၊မမှီသည်ကို သိရန်  မကြာခဏ ရပ်တန့်၍ နောက်လှည့်ကြည့်တတ်သည်။

ယခုအချိန်တွင် အပူချိန်အလွန်မြင့်မားမနေသော်လည်း လင်းဟန်မှာ အလွန်နှေးကွေးစွာဖြင့် လမ်းလျှောက်နေဆဲဖြစ်ပေသည်။

သူ အနည်းငယ် စားသောက်ခဲ့လျှင်တောင်မှ အာဟာရဓာတ်စာများမရှိလျှင်  အလွန်ပင်ပန်းသည်ဟု ခံစားရဆဲဖြစ်ပေသည်။

သူသည် "မီးလျှံသွေး"အကြောင်း ယမန်နေ့ညက ဟယ့်ယွင်ထင်ပြောခဲ့သည့်စကားများကို ပြန်လည်မစဉ်းစားဘဲ မနေနိုင်ပေ။

အကယ်၍ သူ့ကိုယ်လုံးကိုယ်ပေါက်မှာ ထိုလူများ တူးဖော်တွေ့ရှိသည်နှင့် တူညီနေလျှင် ယခုအချိန်တွင် သူကား လမ်းလျှောက်နေသည့်အလောင်းကောင် ဖြစ်သွားလိမ့်မလား၊ သို့မဟုတ် အခြားတစ်ခုခု ဖြစ်သွားလိမ့်မလား။ ထို့အပြင် သည်လူများက ဤကဲ့သို့အိုမီဂါအမျိုးအစားကို မည်မျှ အတိအကျ ရှာဖွေနေကြသနည်း။ သူက အဘယ့်ကြောင့် ဘေးဥပဒ်မှ လွတ်‌မြောက်ခဲ့သနည်း။  လင်းဟန်သည် ခေတ္တကြာ မည်သည်ကိုမျှ မသိတော့ပေ။

အင်ပါယာသို့ ၎င်းတို့ ပြန်ရောက်သည်အထိ စောင့်ဆိုင်းနေမည့်အရာများစွာ ရှိနေသောကြောင့် ထိုအခါမှ ယင်းကိစ္စကို တွေးကြည့်နိုင်‌ကာ ယခုအချိန်၌ ၎င်းတို့၏လက်ရှိဦးစားပေးအရာမှာ အစာရှာရန်သာ ဖြစ်ပေသည်။

လင်းဟန် သူ့ခြေထောက်များ အားနည်းလာပြီး ဒူးခေါင်းများပေါ် လက်ထောက်ကာ  အသက်၀၀မရှုမီ ကူးလုလု၏အနောက်သို့ ဆယ်မိနစ်ကျော် လိုက်လာခဲ့ရသည်။

ကူးလုလုသည် မူလက ရှေ့သို့ အလျင်စလို ဆက်သွားချင်သော်လည်း လှည့်ကြည့်သည့်အချိန်တွင် လင်းဟန်  မရွေ့လျားသည်ကို တွေ့လိုက်ရပြီး  သူ့ကိုယ်ပေါ်ရှိ သဲများကို ဂရုတစိုက် ခါချကာ သန့်ရှင်းကြောင်း အတည်ပြုပြီးနောက် လင်းဟန်၏ခြေထောက်ကို ပွတ်သပ်ရန် ပြေးလွှားလာသည်။

လင်းဟန်က သူ့ခွန်အားများ မကြာခင် ကုန်ဆုံးသွားမည်ဟု တွေးထင်ခဲ့သော်လည်း ဤမျှမြန်မြန်ဖြစ်လိမ့်မည်ဟု မမျှော်လင့်ခဲ့ချေ။

သွားများကြိတ်ရင်း ရုပ်ခန္ဓာနှင့်ပက်သက်၍ ၀မ်းနည်းနေချိန်မှာပဲ ဟယ့်ယွင်ထင်၏အသံက သူ့နားထဲသို့ တိုး၀င်လာသည်။

" မင်းကို ကျောပိုးသယ်ပေးမယ် "

" ဒါပေမဲ့ ..." 

လင်းဟန်က ထိုသို့ပြောရန်သာ အချိန်ရှိလိုက်ပြီး သူ့ခန္ဓာကိုယ်မှာ အလွန်အားနည်းနေသောကြောင့် မြေပြင်ပေါ်သို့ ချော်လဲလုနီးပါးဖြစ်သွားတော့သည်။

ထို့ကြောင့် ဟယ့်ယွင်ထင်က သူ့အဖြေကို မစောင့်တော့ဘဲ လင်းဟန်၏ ခွင့်ပြုချက်မရှိသည့် ပထမဆုံး အကြိမ်အနေဖြင့် သူ့ဆီလှမ်းလာကာ ခြေထောက်များကို လက်နှစ်ဖက်ဖြင့် ကိုင်လျက် ကျောပေါ်သို့ ချီတင်လိုက်သည်။

ကူးလုလုသည် 'မကူညီ'နိုင်သဖြင့် ကြည့်ရုံသာလျှင် ကြည့်နေရပြီး နောက်ဆုံးတွင် အရှုံးပေးကာ ငြီးတွားလျက် ဆက်လက် လမ်းပြဦးဆောင်သည်။

လင်းဟန်က သူ လမ်းလျှောက်စရာ မလိုတော့သဖြင့် အနည်းငယ် ကြာမြင့်စွာ တောင့်ခံနိုင်တော့မည်ဟု တွေးလိုက်သည်။

ဟယ့်ယွင်ထင်သည် စကားအနည်းငယ်သာပြောတတ်ပြီး ဖြေးဖြေးမှန်မှန်လမ်းလျှောက်နေသောကြောင့် လင်းဟန်က သူ့လည်ပင်းပေါ် လက်နှစ်ဖက်တင်ကာ အလွန်ညင်သာသော ခြေလှမ်းများကြောင့် ငိုက်မျဉ်းလာပြီး နောက်ဆုံးတွင် နာရီဝက်မျှသာ ကြာမြင့်ပြီးနောက် ဟယ့်ယွင်ထင်၏ကျောပြင်ပေါ်တွင် အိပ်ပျော်သွားတော့သည်။

ဟယ့်ယွင်ထင် ၎င်းကို ချက်ချင်းနီးပါး သတိပြုမိလိုက်ပြီး သူ့နောက်ကျောမှ ထွက်ပေါ်လာသော ညင်သာသည့်အသက်ရှုသံကို ကြားလိုက်သောအခါတွင် မသိစိတ်ဖြင့် ရပ်တန့်သွားကာ ပို၍ ဖြည်းညင်းစွာ လမ်းလျှောက်သည်။

ဟယ့်ယွင်ထင်သည် အရပ်ရှည်လွန်းပြီး ကူးလုလုမှာ လင်းဟန် လက်နှစ်ဖက် အတူချိတ်ထားသည့်အရွယ်မျှသာ ကြီးမားပြီး သူ တွေးနေသော လူသား အိပ်ပျော်သွားသည်ကိုပင် မသိဘဲ မြေပြင်ပေါ်တွင် လူးလိမ့်နေဆဲဖြစ်ကာ  သဲများထဲသို့ ခေါင်းစိုက်ထားလျက် ပြေးလွှားနေဆဲဖြစ်လေသည်။

ဟယ့်ယွင်ထင်၏ခန့်မှန်းချက် မှန်ကန်ခဲ့ပြီး တစ်နာရီခန့် လမ်းလျှောက်ပြီးနောက် ၎င်းသည် လူသားနှစ်ယောက် မတ်တပ်ပင် မရပ်နိုင်သည့်လှိုဏ်ဂူငယ်တစ်ခုဆီသို့ ခေါ်ဆောင်သွားခဲ့သည်။

သို့သော် သတ္တဝါများ၏နေထိုင်မှု အလေ့အထအရ ယခု ဤနေရာတွင် သတ္တဝါအသစ်များ မရှိသောကြောင့်  တိတ်ဆိတ်ငြိမ်သက်နေသည်။ ကူးလုလုက လင်းဟန် ဘာလုပ်နေသည်ကို ကြည့်ရှုရန်အတွက် ခုန်ပေါက်ရန် ကြိုးပမ်းသော်လည်း ဟယ့်ယွင်ထင်မှ အောက်ချမပေးလိုသောကြောင့် မအောင်မြင်လိုက်ပေ။

ကူးလုလုသည် ဟယ့်ယွင်ထင်ကို လှိုဏ်ဂူ၏ထောင့်တစ်နေရာဆီသို့ ခေါ်ဆောင်သွားပြီး သူ့လက်နှင့် ဒူးများတွင် သဲများပေကျံသည်အထိ စတင်တူးဖော်တော့သည်။ နောက်ဆုံးတွင် အပေါက်ငယ်တစ်ခုမှ အစာအချို့ ထုတ်ယူလာသည်။  ၎င်းက ပစ္စည်းများကို စိုက်ကြည့်ကာ ဟယ့်ယွင်ထင်ရှေ့သို့ တွန်းထုတ်ပြီး‌နောက် ခြေသည်းများကို ပြန်သိမ်းကာ  ဘောလုံးတစ်ခုကဲဲ့သို့ ပြန်ကျုံ့သွားလျက် ပဲစေ့အနက်ကဲ့သို့မျက်လုံးများဖြင့်  စူးစူးဝါးဝါး စိုက်ကြည့်နေသည်။

အဓိပ္ပါယ်မှာ သိသာထင်ရှားလှသည်။ အစားအစာအတွက် အလဲအလှယ်အနေဖြင့် ပွတ်သပ်ရန်အတွက် သူ့ကျောပေါ်မှလူသားအား ၎င်းဆီသို့ ချေးငှားပေးရန်ပင်။

ဇီ၀မျိုးကွဲများ၏နယ်နိမိတ်သို့ မရောက်သေးသောနယ်စပ်ဒေသတွင် ဤ ရွှေရောင်လင်ဂိုအပင်သေးလေးသည် ဤနေရာတွင် ပေါက်ရောက်နိုင်သော တစ်ခုတည်းသောအပင်ဖြစ်သည်။  ၎င်းတွင် ရေပါဝင်မှု အလွန်နည်းသော်လည်း သဘာဝအတိုင်း အကြမ်းခံနိုင်ပြီး ဗိုက်ပြည့်စေနိုင်ကာ အချို့သောမျိုးနွယ်များအတွက် အစားအစာဖြစ်သည့်အပြင် လူသားများလည်း  စားသုံးနိုင်သည်။

ဟယ့်ယွင်ထင် မယုံကြည်သည်မှာ သိသာထင်ရှားလှသည်။ သဘော၀ကျစွာ သူက လင်းဟန်ကို အောက်ချမပေးဘဲ သစ်သီးဆီမှ  ဝေးရာသို့ လှိမ့်သွားရင်း မတ်တပ်ရပ်လာသည့် အကောင်လေးကို တစ်ချက်‌ကြည့်သည်။ အပူချိန်က စတင်မြင့်တက်လာသည့်အတွက် အနည်းငယ် နှောင်းနှေးကြန့်ကြာ‌ နေပါက ထွက်ခွာနိုင်မည်မဟုတ်ပေ။ာ၎င်းတို့‌၌ လှည့်ပတ်ရန် အချိန်အနည်းငယ်သာရှိပြီး တတ်နိုင်သမျှ မက်ခါဆီသို့ အမြန်ဆုံး ပြန်သွားရမည်ဖြစ်သည်။

လင်းဟန်၏ပွတ်သပ်ခြင်းကို မခံရမီ အစာများသိမ်းခံလိုက်ရသည့်ကူးလုလု : ???

၎င်း၏တုံ့ပြန်မှုသည် အနည်းငယ်မျှ ကြာမြင့်ကာ ဘာဖြစ်ပျက်ခဲ့သည်ကို နားလည်ရန် သုံးမိနစ်ပင် ကြာခဲ့၏။ ၎င်းက ဒေါသတကြီး အော်ဟစ်ကာ ဟယ့်ယွင်ထင်အား တိုက်ခိုက်ရန် ပြေးလွှားလာပြီး စကားမတည်ခဲ့သည့် ဤလူသားကို ကိုက်ဖြတ်ရန် ချွန်ထက်သည့်သွားများကို အသုံးပြုရန်ကိုပင် ကြိုးပမ်းလိုက်သည်။

သို့သော် ဟယ့်ယွင်ထင်က ငုတ်တုတ်ထိုင်ချလာပြီး လင်းဟန်၏ အိပ်ပျော်နေသောမျက်နှာက သူ့ရှေ့မှောက်တွင် ပေါ်လာလေသည်။

ဟယ့်ယွင်ထင်၏ အသံသည် ကျယ်လောင်ခြင်းမရှိ၊ ပုံမှန်အတိုင်း အေးစက်မှုဖြင့် " မင်း သူ့ကို နိုးသွားစေချင်တာလား "

"...."   ဘယ်ဟုတ်မလဲ။

" ပြန်ကြမယ် "  ဟယ့်ယွင်ထင်က တိုတိုတုတ်တုတ် ပြောလိုက်သည်။

ကူးလုလုသည် အလွန်ရှုပ်ပွနေသောပုံစံဖြင့် မြေပြင်ပေါ်သို့ လှိမ့်ကာသွားသော်လည်း နောက်ဆုံးတွင် သားမွေးများကို ခါယမ်းကာ လင်းဟန်၏ပခုံးပေါ်သို့ ခုန်တက်ပြီးနောက် ပျော်ရွှင်စွာ သူ့ဘာသာသူ နေရာယူကာ ဘောလုံးလေးအဖြစ်မှ  နူးညံ့သောပန်ကိတ်အဖြစ်သို့ ပြောင်းလဲသွားသည်။

သဘောတူညီချက်သည် ကြီးမားသော ဆုံးရှုံးမှုမဟုတ်ပေ။

နောက်ဆုံးတွင် ကူးလုလုသည် ပေါင်းသင်းရ အလွန်လွယ်ကူသည့်သတ္တဝါပင်ဖြစ်လေသည်။

ဟယ့်ယွင်ထင်သည် အလျင်အမြန်ပြန်သွားကာ အပူချိန်မြင့်လာသဖြင့် လူကို အန္တရာယ်ဖြစ်စေမည်အား စိုးရိမ်နေသည်။  သူက အရှိန်မြှင့်ကာ သွားနေသော်လည်း လင်းဟန်မှာ နှောင့်ယှက်ခံရသည့်လက္ခဏာ လုံးဝမရှိဘဲ အိပ်ပျော်နေဆဲဖြစ်ပေသည်။

လူနှစ်ယောက်နှင့် သားရဲတစ်ကောင် မက်ခါထဲသို့ ပြန်ဝင်ရောက်ပြီး တံခါးပိတ်ပြီးသည့်အခါမှသာ ဟယ့်ယွင်ထင်က  စိတ်သက်သာရာရသွားသည့်သက်ပြင်းတစ်ချက်ချလိုက်သည်။  သူက လင်းဟန်ကို အတော်လေးကျယ်ဝန်းသည့်မောင်းနှင်ခန်းပထမတစ်ခုထဲတွင်  ဂရုတစိုက်ချကာ ထိုင်ခုံကို ပြင်ပေးပြီးနောက် သူ့ဂျာကင်ဖြင့် လွှမ်းခြုံပေးသည်။

ထိုနေရာ၌ရှိစဉ် သူက  စစ်သင်္ဘောနှင့် အဆက်အသွယ်ရရန် မျှော်လင့်ချက်ဖြင့် ဆက်သွယ်ရေးစက်ကို ဖွင့်လိုက်သည်။

ဂျစ်၊ဂျစ်၊ဂျစ်...

သို့သော် ဆယ်မိနစ်ခန့် စောင့်သော်လည်း ရရှိလာသည့်တုံ့ပြန်မှုမှာ လိုင်းကြပ်နေသည့်စင်ဂနယ်သာလျှင်ဖြစ်နေသည်။

အောင်မြင်စွာ ခုန်ကျော်ပြီးသည့်နောက် စစ်သင်္ဘောသည် အင်ပါယာဆီသို့ တစ်ဖန် ရွက်လွှင့်ရန် နှစ်ရက်မျှ ကြာမြင့်နိုင်ပြီး ထိုနေရာ၌ တစ်စုံတစ်ရာဖြစ်‌ပျက်နေနိုင်သောကြောင့် သူက တုံ့ပြန်မှုတစ်စုံတစ်ရာ လက်ခံမရရှိခဲ့ပေ။

နာရီဝက်ကျော်ကြာပြီးသည့်နောက် ဟယ့်ယွင်ထင်က ဆက်သွယ်ရေးအား ပိတ်ချလိုက်သည်။

‌

နောက်ဆုံးတွင် မည်သို့ပင်ဖြစ်စေ  စွမ်းအင်ချွေတာရမည်ဖြစ်သည်။ မဟုတ်ပါက ဤသတ္တုအခွံသည် ကြာရှည်ခံနိုင်မည်မဟုတ်ချေ။ သူက အိပ်ပျော်နေဆဲဖြစ်သည့် လင်းဟန်ကို ကြည့်ရန် ခေါင်းစောင်းလိုက်သည်။ လူငယ်လေး၏အိပ်စက်ပုံအနေအထားမှာ ဌာနချုပ်၌ ပထမဆုံးအိပ်ခဲ့စဉ်ကအတိုင်း ကောင်းမွန်နေသည်။  ခြေထောက်များကို မသိစိတ်ဖြင့် ကွေးထားကာ တစ်ဖက်စောင်းလျက် လက်များကိုမူ အတူတကွ ချိတ်ထားသည်။

ဟယ့်ယွင်ထင်က  ထိုလက်များကို ကြည့်လိုက်သည်။  လူငယ်၏လက်များသည် သေးသွယ် ဖြူဖွေးပြီး လက်ဖမိုး‌ပေါ်မှအရေပြားသည် ပါးလွှာကာ သွေးအနည်းငယ်ထွက်နေသည်။

မစ္စတာလင်းသည် ထိုအတိုင်းပင်ဖြစ်လေသည်။

ကျိုးနွံသည်။ သိမ်မွေ့သည်။ သို့သော် စိတ်ဓာတ်မာသည်။

ဟယ့်ယွင်ထင် သူ့အား အချိန်ကြာကြာ ကြည့်နေမိသည်။

ယမန့်နေ့ကတည်းက  တပ်မက်မှုကို ခံစားနေရမှန်း နားလည်သည်။ ကံဆိုးစွာဖြင့် သူက ယုံကြည်မှုလွန်ကဲနေခြင်းမဟုတ်သော်လည်း ဤကိစ္စတွင် ဆုံးဖြတ်ချက် မချနိုင်ဖြစ်နေပြီး မည်သည့်နေရာမှ စတင်ရန်ပင် မသိတော့ချေ။ သူက ယမန်နေ့မှ သူ့အပြုအမူနှင့်ပတ်သက်၍ နောင်တရနေသော်ငြား မနှစ်မြို့ဖွယ်အတွေးများကိုလည်း ချန်ရစ်မထားခဲ့လိုဆဲဖြစ်နေသည်။

သို့သော် မစ္စတာလင်းမှာ ချိုမြိန်ကာ နှစ်သက်ဖွယ်ကောင်းနေသည်။

တပ်မက်ခြင်းနှင့် မြတ်နိုးခြင်းမှာ  တူညီခြင်းရှိ၊မရှိကို ဟယ့်ယွင်ထင် မသိပေ။

သို့သော် သူ့အား တွန်းအားပေးနေသည့် တွန်းအားတချို့ရှိနေပြီး တဖြည်းဖြည်းနှင့် လူငယ်လေးဆီသို့ သူ ချဉ်းကပ်သွားမိသည်။ ယခုအချိန်တွင် ထိုသူက အမှန်တကယ် အိပ်မောကျနေပြီး သူက တစ်ခုခုကို တိတ်တဆိတ်ပြုလုပ်နိုင်သည်။

ဟယ့်ယွင်ထင်သည် အခြားသူအား အခွင့်အရေးယူသည့် ဤကဲ့သို့အပြုအမူမျိုး ဘယ်တုန်းကမှ မလုပ်ခဲ့‌ဖူးသဖြင့် သူ့နှလုံးသားသည် ရှားရှားပါးပါး စိုးရိမ်ကြောက်ရွံ့နေတော့သည်။

နည်းနည်းလောက်၊နည်းနည်းလောက်ပါပဲ။

သူ့ကိုယ်သူ ပြောလိုက်၏။

တခြားဘာမှမလုပ်ဘူး။

သူ နှေးကွေးစွာ ချဉ်းကပ်ကာ ထိုင်ချလိုက်လေသည်။

👾