MM Story Teller

Chapter 66

Viewers 11k

💘Chapter 66

ဘေးပို့ခံထားရ

ချန်လီက ဝေ့ချန်ကို စိတ်ပူနေ၏။ဝေ့ချန် နေမကောင်းဖြစ်သည့်နေ့မှာ ချန်လီက သူ့ဘေးမှာနေပြီး သူ့ကိုတချိန်လုံးအဖော်ပြုပေးခဲ့သည်။တစ်ခါတရံ ဝေ့ချန် အလုပ်ထဲမှာစိတ်ရောက်ပြီး ဆေးသောက်ရန်မေ့နေပါက ချန်လီကသူ့လက်ကိုကိုင်ပြီး သူ့ကိုစူးစူးစိုက်စိုက်ကြည့်ကာ ဆေးသောက်ရန်သတိပေးတတ်သည်။

ချန်လီ၏ကြီးကြပ်မှုကြောင့် နောက်တစ်နေ့ ဝေ့ချန် အလုပ်သွားချိန်မှာ သူ အခြေခံအားဖြင့် ပြန်ကောင်းနေခဲ့ပြီဖြစ်လေသည်။

တနင်္လာနေ့မနက်မှာ ဝေ့ချန် အိပ်ရာ နိုးလာပြီး သူ့စိတ်က လန်းဆန်းတက်ကြွနေခဲ့သည်။သူက ချန်လီ၏နဖူးပေါ် အနမ်းတစ်ပွင့်ပျိုးကာ ပြောလိုက်၏။

"ကျေးဇူးပါလီလီ"

ချန်လီက နိုးခါစဖြစ်၍ အနည်းငယ်အိပ်ချင်မူးတူးဖြစ်နေဆဲဖြစ်ကာ အခြေအနေကို အပြည့်အဝနားမလည်သေးပေ။သူ့ခေါင်းပေါ်မှာ ဆံပင်စုတ်ဖွားလေးက ထိုးထိုးထောင်ထောင်ဖြစ်နေသေးသည်။

မထိန်းနိုင်ဘဲ ဝေ့ချန် ချန်လီ၏ဆံပင်ကိုလှမ်း၍ဆွဲဖွလိုက်ပြီးမှ အိပ်ရာထဲကထွက်ပြီး ကိုယ်လက်သန့်စင်ရန်ရေချိုးခန်းဆီဦးတည်လိုက်သည်။

ချန်လီက အချိန်အတော်ကြာထိုင်နေခဲ့ပြီး တဖြည်းဖြည်း အသိစိတ်များပြန်လည်းရှင်းလင်းလာသည်။၎င်းနောက် သူက လျင်မြန်သောလှုပ်ရှားမှုတစ်ခုဖြင့် ထရပ်ကာ ဖိနပ်စီးပြီး ရေချိုးခန်းဆီလျှောက်သွားခဲ့လေသည်။

ကိုယ်လက်သန့်စက်ပြီးနောက် ဝေ့ချန်က ချန်လီကိုရပ်ကွက်ထဲကပန်းခြံမှာ ပြေးရန်ခေါ်သွားပြီးမှ နှစ်ယောက်သားကုမ္ပဏီကိုဦးတည်ခဲ့လေသည်။

အခုနောက်ပိုင်း မားကတ်တင်းဌာနကဝန်ထမ်းများက အလွန်စိတ်အားတက်ကြွနေကြသည်။အလုပ်စရန်မိနစ်အနည်းငယ်လိုသေးသော်လည်း ဝန်ထမ်းအကုန်လုံးနီးပါးရောက်နေပြီဖြစ်ကာ ကိုယ်စီအလုပ်များထဲတွင် စျာန်ဝင်နေကြသည်။

ဝေ့ချန်ကိုမြင်လျှင် သူတို့က သူ့ကို"မောနင်း"ဟုနှုတ်ဆက်လိုက်ကြပြီး သူ့ဘေးမှာ ချန်လီကို မြင်ရသည်အား သူတို့ ကျင့်သားရလာနေပြီဖြစ်သည်။

ရက်အနည်းငယ် အပြန်အလှန်ဆက်ဆံပြီးနောက် အနှီဝန်ထမ်းများက ဝေ့ချန်၏လုပ်ရည်ကိုင်ရည်နှင့်ဩဇာအရှိန်အဝါကို သဘောကျလာကြသည်။သူတို့ခက်ခဲသည်ဟုထင်သောပြဿနာများကို ဝေ့ချန်ကအလွယ်တကူဖြေရှင်းပေးနိုင်ပြီး သူဆီကနေ သူတို့အများကြီးသင်ယူနိုင်ခဲ့၏။

ယခုလိုခေါင်းဆောင်တစ်ယောက်၏လက်အောက်မှာ အလုပ်လုပ်ရသည့်အခါ ယခင်က ခိုကပ်နေကြသူများပင် ဆက်ပြီးဥပေက္ခာပြုထားရန်ခက်ခဲလာကြပြီး အတူတူဝိုင်းအလုပ်ကြိုးစားကြလေသည်။

ဝေ့ချန်နှင့်ချန်လီ ရုံးခန်းတံခါးနောက်မှာပျောက်ကွယ်သွားသည်နှင့် ဝန်ထမ်းတစ်ယောက်က သူ့ဘေးက လူဘက်လှည့်ပြီးပြောလိုက်သည်။

"ခုနက ငါရဲ့စာအဝင်ပုံးထဲမှာ အီးမေးလ်တစ်ခုတွေ့လိုက်တယ်...ကြည့်လိုက်တော့ ငါ အရင်တစ်ခေါက်က ဒါရိုက်တာဝေ့ဆီကို ပို့ထားတဲ့ အစီအစဥ်အဆိုပြုချက်ကို သူကပြန်ပို့ထားတာဖြစ်နေတယ်... ငါလိုအပ်တဲ့နေရာတွေ ကောင်းတဲ့အချက်တွေကို ထောက်ပြထားတဲ့မှတ်ချက်တွေ အများကြီးပါတယ်...ဒါရိုက်တာဝေ့က တကယ်လေးနက်တာပဲ...အဲဒီအဆိုပြုချက်ကို သူကြည့်တောင်ကြည့်မှာမဟုတ်ဘူးလို့ငါထင်တာ...သူကဖတ်ကြည့်ရုံတင်မကဘူး ပြန်လည်ပြင်ဆင်မှုပါလုပ်ပေးလိုက်သေးတယ်"

"တကယ်လား ငါလည်း ငါ့စာအဝင်ပုံးကို စစ်ဆေးကြည့်ရမယ်"

ထိုသူက သူ၏အီးမေးလ်ကိုဖွင့်လိုက်ရာ မဖတ်ရသေးသောဖိုင်တစ်ခုကို အမှန်တကယ်တွေ့လိုက်ရလေသည်။ယင်းက ထိုနေ့ကသူတို့တင်ပြခဲ့သောအဆိုပြုချက်၏ ပြန်လည်ပြင်ဆင်ထားသောဗားရှင်းဖြစ်၏။

ထိုနှစ်ယောက်တင်သာမက မားကတ်တင်းဌာနက သူတို့၏လုပ်ဖော်ကိုင်ဖက်များလည်း ၎င်းတို့၏အီးမေးလ်ကိုဖွင့်လိုက်ရာ မှတ်ချက်များပါသည့်အဆိုပြုချက်များကိုတွေ့လိုက်ရပြီး အကုန်လုံးက သူတို့ယခင်ကတင်ပြခဲ့သောဟာများ ဖြစ်လေသည်။

သူတို့၏ကြိုးစားမှုက အထက်လူကြီးဆီက အလေးအနက်ထားခံရသဖြင့် သူတို့အလွန်ကျေနပ်သွားကြသည်မှာသဘာဝဖြစ်ပေသည်။ထို့အပြင် သူတို့၏အထက်လူကြီးဆီက မှတ်ချက်များက လုပ်ရိုးလုပ်စဥ်စကားမျှသာတင်မဟုတ်ဘဲ သူတို့အတွက်များစွာအသုံးဝင်သဖြင့် ယင်းက ၎င်းကို ပို၍ပင် ပြီးပြည့်စုံသွားစေလေသည်။

လေးစားမှုဆိုသည်က အပြန်အလှန်သက်ရောက်မှုရှိ၏။ယနေ့မှာ သူတို့၏အောင်မြင်မှုများကို ထိုသို့လေးစားမှုပေးလိုက်သဖြင့် ဝေ့ချန်သည် သဘာဝအတိုင်း သူ၏လက်အောက်ငယ်သားများဆီက လေးစားမှုများရရှိခဲ့လေသည်။

သူ၏ဤအကျင့်က မားကတ်ဌာနကဝန်ထမ်းများ၏စိတ်နှလုံးကို အပြည့်အဝ သိမ်းပိုက်နိုင်သွားခဲ့ပြီး သူ့ကို သူတို့၏ဒါရိုက်တာအသစ်အဖြစ်လက်ခံလိုက်ကြကြောင်းကို ဝေ့ချန်မသိခဲ့ပေ။

ဟဲခယ်ချမ်း ရုံးကိုအချိန်မီရောက်လာခဲ့လေသည်။ရုံးနောက်ကျမှုအတွက် ဒဏ်ကြေးများရှိသော်ငြား နေ့တိုင်း အကြောင်းပြချက်တစ်ခုမဟုတ်တစ်ခုနှင့် နောက်ကျကြသည့်လူတချို့က အမြဲရှိသဖြင့် သူကနောက်ဆုံးတစ်ယောက်မဖြစ်လောက်ဟု သူတွေးလိုက်သည်။

သို့သော်လည်း အမှန်တရားက ဟဲခယ်ချမ်းကို သူက သည်ကနေ့ ရုံးကိုနောက်ဆုံးမှရောက်လာသူဟုပြောနေခဲ့၏။သူရုံးထဲဝင်လိုက်သည်နှင့် အလုပ်ရှုပ်နေသောမြင်ကွင်းတစ်ခု၏ ဆီးကြိုနှုတ်ဆက်ခြင်းခံလိုက်ရသည်။ဝန်ထမ်းတိုင်းက ကိုယ့်အလုပ်ကိုယ် တက်တက်ကြွကြွ လုပ်နေကြပြီး ပုံမှန်အလုပ်လုပ်သည့်အခြေအနေထဲကိုဝင်ရောက်ရန် နာရီဝက်ပင်မကြာခဲ့ပေ။

အကုန်လုံး စိတ်ကြွဆေးတွေများသောက်ထားကြတာလား...ဟဲခယ်ချမ်းက စိတ်ထဲမှာ ရေရွတ်လိုက်ပြီး သူ၏ကိုယ်ပိုင်ရုံးခန်းဆီ စိမ်ပြေနပြေလျှောက်လာခဲ့သည်။ဝေ့ချန်၏ရုံးခန်းနားက သူဖြတ်သွားချိန်မှာ ဟဲခယ်ချင်းပြတင်းပေါက်ကနေချောင်းကြည့်လိုက်၏။ဝေ့ချန်က သူ့ကွန်ပြူတာဖြင့်အလုပ်လုပ်နေပြီး သူ၏အော်တစ်ဇင်ဇနီးက ပုံဆွဲပျဥ်ပြားတစ်ခုနှင့်အတူ ပြတင်းပေါက်ဘေးမှာထိုင်နေပြီး တစ်ခုခုဆွဲနေသည်။

ဟဲခယ်ချမ်း နှာခေါင်းရှုံ့ကာ သူရုံးခန်းဆီ ခြေလှမ်းကျဲကျဲဖြင့် ပြန်လျှောက်လာပြီး ကွန်ပြူတာကိုဖွင့်၍ စခရင်ပေါ်က ချန်ဖုန်းအုပ်စု၏လိုဂိုကို ကြည့်လိုက်သည်။ဤသည်က သူ့အား သူ့ကိုချဥ်းကပ်လာသည့် မားကတ်တင်းဌာန၏ဒါရိုက်တာဟောင်းကိုအမှတ်ရသွားစေသည်။

"30%တိုးအောင်လုပ်မယ်ပေါ့...ဟား မွေးခါစနွားသားပေါက်က ကျားကိုကြောက်ရကောင်းမှန်းမသိဘူးပဲ"

ဟဲခယ်ချမ်း သရော်လိုက်၏။မားကတ်တင်းဌာန၏မန်နေဂျာတစ်ယောက်အနေဖြင့် လက်ရှိစျေးကွက်ကိုသူ တချို့တလေလောက်နားလည်လေသည်။လက်ရှိစျေးကွက်က ပြည့်ဝအခြေအနေကိုရောက်နေပြီဖြစ်ကာ ဘာမှတိုးအောင်မလုပ်ဘဲ လက်ရှိအခြေအနေကိုပဲထိန်းသိမ်းရသည်ကတင် ခက်ခဲနေပြီဖြစ်သည်။30%တိုးအောင်လုပ်ရန်က တကယ်ကို ရူးနှမ်းနှမ်းအိပ်မက်ပင်။

သို့ပေမဲ့ ယင်းက ပိုတောင်ကောင်းသေးသည်။ဒါရိုက်တာဟောင်းက ဝေ့ချန် သူ့ရာထူးကနေ ဖယ်ရှားခံရသည်နှင့် မားကတ်တင်းဌာနက သူဟဲခယ်ချမ်း၏လက်ထဲရောက်လာလိမ့်မည်ဟု သူ့ကို ကတိပေးထားသည်။

30%တိုးအောင်လုပ်ရန်ကတင်ခက်ခဲနေပြီဖြစ်သော်လည်း ဟဲခယ်ချမ်းက ခက်ခဲမှုလယ်ဗယ်ကို ပို၍မြင့်အောင် မြှင့်ရန် စိတ်မရှိပါချေ။သူ့အထက်ကလူများကလည်း သူလိုပဲတွေးကြလိမ့်မည်ဟု ဟဲခယ်ချမ်း ယုံကြည်သည်။(ပိုမြင့်အောင်လုပ်မယ်)

သူ၏နေ့ခင်းအိပ်မက်များ(စိတ်ကူးယဥ်အိပ်မက်များ)ထဲမှာနစ်မြုပ်နေရင်း သူက အလုပ်ထဲမှာ ဝင်စွက်ဖက်ရန်ကြိုးစားနေချိန်မှာ ဝေ့ချန်က သူ့ကိုဘေးပို့ထားသည်ကို ဟဲခယ်ချမ်းသတိပြုမိသွားသည်။သူ မားကတ်တင်းဌာန၏လက်ရှိသွားနေသောဦးတည်ရာကို မသိသလို လာမည့်အစီအစဥ်များကိုလည်းသိမနေပေ။အပြင်ဘက်က သူ၏လုပ်ဖော်ကိုင်ဖက်များ ဘာနှင့်အလုပ်ရှုပ်နေသည်ကိုလည်း သူမသိပါချေ။

ဤသည်ကိုသိလိုက်ချိန်မှာ ဟဲခယ်ချမ်း သူ၏ထိုင်ခုံပေါ်မှာ ပစ်လဲသွားသည်။ဝေ့ချန်က မားကတ်တင်းဌာနကိုရောက်တာမှရက်နည်းနည်းပဲရှိသေးတာကို ဘယ်လိုလုပ် ဒီလောက် မောက်မာနေရတာလဲ...

ထိုအကြောင်းကို သူတွေးလေလေ ဟဲခယ်ချမ်း ပိုပိုဒေါသပုန်ထလာလေဖြစ်သည်။နေ့လယ်စာစားနားချိန်အပြီးမှာ ဟဲခယ်းချမ်း ဝေ့ချန်နှင့်ထိပ်တိုက်ရင်ဆိုင်ရန် ဝေ့ချန်၏ရုံးခန်းထဲကို ဒေါနှင့်မောနှင့်ဝင်သွားခဲ့၏။

ဝေ့ချန်၏ရုံခန်းထဲကို သူရောက်ချိန်မှာ

ဝေ့ချန်ကဖုန်းပြော၍ပြီးခါစဖြစ်ပြီး ဟဲခယ်ချမ်း သူဝင်သွားချိန်မှာ" ပျော်ရွှင်စရာ ပူးပေါင်းဆောင်ရွက်မှုပါ"ဟူသော စကားလေးလုံးကိုပဲ ကြားလိုက်ရသည်။

ဝေ့ချန် ခေါင်းလှည့်လိုက်ချိန်မှာ တံခါးဝမှာရပ်ပြီး သူ့ကိုရန်လိုသောအကြည့်ဖြင့် စိုက်ကြည့်နေသော ဟဲခယ်ချမ်းကိုမြင်လိုက်ရ၏။ဝေ့ချန်က သူ၏ဒေါသထွက်နေသောပုံစံကြောင့် အံ့ဩမသွားဘဲ ချန်လီဆီကိုလျှောက်သွားကာ ချန်လီ၏ဘေးမှာရပ်ပြီး အေးစက်စွာပြောလိုက်သည်။

"မန်နေဂျာဟဲ တစ်ခုခုအလိုရှိလို့လား"

"ဒါရိုက်တာဝေ့ ဒါကဘာကိုဆိုလိုတာလဲ"

ဟဲခယ်ချမ်းက ဝေ့ချန်ကိုစိုက်ကြည့်ကာမေးခွန်းထုတ်လိုက်၏။

ဝေ့ချန်က ဟဲခယ်ချမ်း၏အကြည့်ကိုမရှောင်ဘဲ ပွင့်ပွင့်လင်းလင်းပြောလိုက်သည်။

"မန်နေဂျာဟဲဘာကိုပြောနေတာမှန်းကျွန်တော် နားမလည်ဘူး"

"ဝေ့ချန် မင်းကိုယ်မင်းဒါရိုက်တာဖြစ်တာနဲ့ပဲဟုတ်လှပြီမထင်နဲ့...ငါက ချန်ဖုန်းမားကတ်တင်းဌာနမှာ လူဟောင်းတစ်ယောက်...ငါမပါဘဲ မင်းချန်ဖုန်းမှာဘာတိုးတက်မှုမှမလုပ်နိုင်ဘူး"

ဟဲခယ်ချမ်းက သူ၏ရည်ရွယ်ချက်များကို တန်းပြီးမဖော်ပြခဲ့ပေ။သူ ဝေ့ချန်ကိုအရင်ဆုံးခြိမ်းခြောက်ချင်နေသည်။

အမှန်တကယ်တွင် ဟဲခယ်ချမ်း ချန်ဖုန်းမှာ ရှိနေသည်မှာနှစ်ပေါင်းများစွာရှိနေပြီဖြစ်၍ သူက ကုမ္ပဏီထဲမှာ ဧရာမအဆက်အသွယ်ကွန်ယက်တစ်ခုကိုပိုင်ဆိုင်ထားလေသည်။ကုမ္ပဏီ၏စွမ်းဆောင်ရည်ကို တိုးအောင်လုပ်ရသည်က မားကတ်တင်းဌာနတစ်ခုတည်းကြိုးစား၍ရနိုင်သည့်အရာတစ်ခုမဟုတ်ပေ။အချိန်ကျလာလျှင် ဟဲခယ်ချမ်းက တခြားဌာနကလူများကို ဝေ့ချန်ကို နှောက်ယှက်ဟန့်တားခိုင်း၍ရပြီး ယင်းကဝေ့ချန်အတွက် အတော်လေးဒုက္ခများစေမှာဖြစ်သည်။

ဤသည်က ဟဲခယ်ချမ်း ယုံကြည်မှုရှိနေရသည့်အကြောင်းအရင်းလည်းဖြစ်၏။

ဆိုရိုးစကားအတိုင်းပြောရလျှင် တန်းခိုးကြီးသောနဂါးတစ်ကောင်က ဒေသခံမြွေကိုမဖိနှိပ်နိုင်ပေ။ဟဲခယ်ချမ်း ချန်ဖုန်းကိုစီမံခန့်ခွဲနေသည်မှာ နှစ်ပေါင်းများစွာရှိပြီဖြစ်၍ ဝေ့ချန်အတွက် သူ့ကိုဖြုတ်ချရန်မလွယ်ပေ။

ဤအရာများကိုပြောလိုက်လျှင် ဝေ့ချန်အနည်းဆုံး နောက်ဆုတ်သွားလိမ့်မည်ဟုဟဲခယ်ချမ်းထင်ခဲ့သည်။သို့သော်လည်း ဝေ့ချန်က သူ့ကိုအေးစက်စက်အကြည့်တစ်ချက်ပဲပေးပြီး ပြောလာသည်။

"ကြိုက်သလိုလုပ်ပါ"

ဟဲခယ်ချမ်း၏လက်သီက ဝါဂွမ်းကိုပဲထိုးမိသွားသည်။

သူတို့နှစ်ဦး ကြားက စကားဝိုင်းက မသာမယာဖြင့် အဆုံးသတ်သွားခဲ့သည်။ဟဲခယ်ချမ်း ဝေ့ချန်က ဤမျှခေါင်းမာလိမ့်မည်ဟု မမျှော်လင့်ထားပေ။ဟဲခယ်ချမ်း ဒေါသအပြည့်နှင့် လှည့်ထွက်သွားခဲ့ပြီး ဗိုက်အပြည့်ဒေါသများကိုသယ်ဆောင်သွားခဲ့လေသည်။

ဟဲခယ်ချမ်း ဝေ့ချန်၏ရုံခန်းထဲမှ ထွက်လာချိန်တွင် သူ့မျက်နှာက ဒေါသကြောင့် မည်းမှောင်နေ၏။တံခါးပိတ်ပြီးနောက် သူက ရုံးခန်းတံခါးဆီကို ခက်ထန်သောအကြည့်တစ်ချက်ပစ်လွှတ်လိုက်သည်။

"ယုံကိုမယုံနိုင်ဘူး...သူ့ကိုယ်သူဘယ်သူထင်နေလဲမသိ...သူ ငါ့ကိုလာရှုပ်ပြီး ငါ့ကို ချန်ဖုန်းမှာ မနေနိုင်အောင် လုပ်နိုင်မယ်လို့ တကယ်ကြီးထင်နေတာလား"

ဟဲခယ်ချမ်းက ဒေါသတကြီးရေရွတ်ရင်း သူ့ရုံးခန်းဆီပြန်သွားကာ တံခါးကိုဆောင့်ပိတ်လိုက်လေသည်။

ဟဲခယ်ချမ်း၏ ရုံးခန်းတံခါးပိတ်သွားသည်နှင့် အပြင်ဘက်ရှိ ဝန်ထမ်းများက

စပြီး တီးတိုးသဖန်းပိုးထိုးကြတော့သည်။

သူတို့ ဟဲခယ်ချမ်းကိုမကျေနပ်သည်မှာကြာပြီဖြစ်သည်။သို့ပေမဲ့ ကုမ္ပဏီကိုနှစ်ပေါင်းများစွာစံမံခန့်ခွဲလာပြီးနောက်မှာ သူ့မှာ သူ့ကိုယ်ပိုင်အဆက်အသွယ်ကွန်ယက်တစ်ခုသေချာပေါက်ရှိမှန်းလည်း သူတို့သိကြသည်။ဝေ့ချန်နှင့်ဟဲခယ်ချမ်း တိုက်ခိုက်လျှင် သူတို့ ထိုကနေအကျိုးအမြတ်ရပါ့မလားဆိုသည်ကိုလည်း သူတို့စိတ်ပူနေကြသည်။

သူတို့ နောက်ဆုံးမှာ ယခုလိုလုပ်ရည်ကိုင်ရည်ရှိသောခေါင်းဆောင်တစ်ယောက်နှင့်တွေ့ခဲ့ရပြီဖြစ်၍ သူတို့

သူ့ကို မလိုတမာသူများ၏အနှောက်အယှက်ပေးခြင်းခံရသည်အား မမြင်ချင်ကြပေ။

"ဟဲခယ်ချမ်း ဘာလို့ဒီလောက်ဒေါသထွက်နေတယ်လို့ထင်လဲ"

လုပ်ဖော်ကိုင်ဖက်တစ်ယောက်က တခြားတစ်ယောက်၏ အဝတ်အစားကိုတို့ပြီး အတင်းပြောလိုက်သည်။

"ဒေါသထွက်မှာပေါ့...သူ ငါတို့ကုမ္ပဏီမှာ အလုပ် ကြိုးစားနေတာ နှစ်တွေအများကြီးရှိပြီလေ...အရင်ငါတို့ဒါရိုက်တာဟောင်းက ရာထူးတိုးသွားတော့ သူလည်း ဒါရိုက်တာရာထူးကို တိုးမယ်ထင်တာ...ဒါပေမဲ့ ငါတို့ဒါရိုက်တာဝေ့ရောက်လာတာနဲ့ သူ့ပါးစပ်ထဲရောက်ခါနီးဘဲက ပျံ့ပြေးသွားတယ်လေ...သူဘယ်လိုလုပ်ဒေါသမထွက်ဘဲနေမလဲ"

လုပ်ဖော်ကိုင်ဖက်တစ်ယောက်က တည်တည်ငြိမ်ငြိမ် ရှင်းပြလိုက်၏။

လူတိုင်းက အကြောင်းပြချက်ကိုနားလည်သွားကြပေမဲ့ ဟဲခယ်ချမ်း၏အပြုအမူက လက်မခံနိုင်စရာဟု ခံစားနေကြရဆဲဖြစ်သည်။

"ဟဲခယ်ချမ်းရဲ့ခေါင်းက ပြဿနာတချို့ရှိပုံရတယ်"

တစ်ခြားလုပ်ဖော်ကိုင်ဖက်က ဝင်ပြီး ထူးခြားဆန်းကြယ်စွာ ပြောလာသည်။

အနှီစကားက တခြားသူများ၏အာရုံစိုက်မှုကို အောင်အောင်မြင်ဆွဲဆောင်လိုက်နိုင်ပြီး သူတို့၏အကြည့်များကို သူ့ဆီပို့လာကြသည်။

ထိုလူက လည်ချောင်းရှင်းပြီး ဆက်ပြောလေသည်။

"စဥ်းစားကြည့် ငါတို့ ဒါရိုက်တာဝေ့က ဒီနှစ်မှာအသက်ဘယ်လောက်လဲ...24 ပဲရှိသေးတာလေ ငါးကောင်တို့...သူက ဒီမှာထိုင်နေတဲ့ငါတို့အကုန်လုံးထက်ငယ်တယ်...သူက ဒီလိုအသက်ငယ်ငယ်လေးနဲ့Fortune Global 500စာရင်းဝင်ကုမ္ပဏီမှာ မားကတ်တင်းဌာနရဲ့ဒါရိုက်တာဖြစ်လာတယ်...သူက အရည်အချင်းရှိရင်တောင် သူ့မှာလွှမ်းမိုးနိုင်တဲ့နောက်ခံတချို့ရှိကိုရှိရမယ်လို့ မင်းတို့မထင်မိကြဘူးလား...ဟဲခယ်ချမ်းက ကုမ္ပဏီမှာ နှစ်တွေအများကြီးလုပ်ပြီး အောက်ခြေကနေ တစ်ဆင့်ချင်းတက်လာတာ...သူ့ရဲ့အဆက်အသွယ်ကွန်ယက်က ငါတို့ဒါရိုက်တာဝေ့နဲ့ယှဥ်နိုင်မယ်လို့မင်းတို့ထင်လား...ဆိုတော့ ငါ့အမြင်အရ ဟဲခယ်ချမ်းသာ ဒါရိုက်တာဝေ့နဲ့တိုက်ခိုက်မယ်ဆိုရင် ဘယ်သူအထိနာမလဲဆိုတာမသေချာဘူး"

အမှန်တွင် ဝေ့ချန်မှာ ဘာနောက်ခံမှမရှိလျှင် သူ မည်မျှပဲ တော်နေပါစေ တောက်ပရန် အချိန်တချို့လိုလေသည်။ရုတ်တရတ်ကြီး တစ်ခါတည်း ယခုလို ရာထူးမြင့်မြင့်ကို ရာထူးတိုးပေးခံလိုက်ရသည်မျိုးကမဖြစ်နိုင်ပေ။

"ဒါပေမဲ့ အထက်ကလူတစ်ယောက်က ငါတို့ဒါရိုက်တာဝေ့ကို ပစ်မှတ်ထားချင်နေတယ်လို့ငါကြားတယ်"

"ဘာရယ်...မဖြစ်နိုင်တာ"

"ဟုတ်တယ်...ငါတို့ဒါရိုက်တာဝေ့က ဒီလောက်ထူးချွန်တာ...သူ့ကိုပစ်မှတ်ထားချင်ရအောင် အဲဒီအကောင်ကြီးကြီးပုဂ္ဂိုလ်က ရူးနေလို့ဖြစ်ရမယ်"

တခြားသူများက မယုံနိုင်သည့်အမူအရာများဖော်ပြလာကြသည်။

"စဥ်းစားကြည့် ဒါရိုက်တာဝေ့ ငါတို့ကုမ္ပဏီကို ပထမဆုံးလာတဲ့နေ့မှာ ဘယ်သူကိုယ်တိုင် သူ့ကိုလာကြိုဆိုလဲ"

ထိုလူကမေးလိုက်သည်။

သေသေချာချာစဥ်းစားပြီးနောက် တစ်ခြားသူများ ရုတ်တရတ်သဘောပေါက်သွားကြသည်။

ဟုတ်သည်၊ဒါရိုက်တာဝေ့ ပထမဆုံးအလုပ်ဆင်းသည့်နေ့မှာ အထွေထွေမန်မေဂျာကိုယ်တိုင် သူ့ကိုလာကြိုဆိုခြင်းဖြစ်သည်။ယင်းက ဒါရိုက်တာဝေ့က အထွေထွေမန်နေဂျာ၏အုပ်စုနှင့်ပူးပေါင်းလိုက်သည်ဟူသော အဓိပ္ပါယ်ကလွဲ၍ တခြားမဟုတ်ပေ။

သူတို့သည် ချန်ဖုန်းက အောက်ခြေဝန်ထမ်းများသာဖြစ်ကြသည့်တိုင် ကုမ္ပဏီ အတွင်းက ပြင်းထန်သော အုပ်စုကွဲမှုပြဿနာများကို ကောင်းကောင်းသိလေသည်။ဆန့်ကျင်ဘက်အုပ်စုက အထွေထွေမန်နေဂျာတို့အုပ်စုက ယခုလို ထူးချွန်သော သူတစ်ယောက်ရသွားသည်ကို ဘယ်သောအခါမှ ခွင့်ပြုလိမ့်မည်မဟုတ်ဘဲ ဒါရိုက်တာဝေ့ကိုဆွဲချရန် အစွမ်းကုန် ကြိုးစားကြပေလိမ့်မည်။

ဤလူများက အခြေအနေကိုနားလည်ပြီး ကုမ္ပဏီ၏အုပ်စုကွဲမှုပြဿနာများထဲဝင်မပါရန်ဆုံးဖြတ်ထားကြသည်။လောလောဆယ်အတွက်တော့ သူတို့ ဘာမှမသိချင်ယောင်ဆောင်ပြီး ဝေ့ချန်၏အလုပ်မှာ အကောင်းဆုံးပူးပေါင်းဆောင်ရွက်ပေးကာ ဒါရိုက်တာဝေ့ကို အထက်ကလူများကဆွဲမချနိုင်အောင်ကာကွယ်ပေးရန်ကြိုးစားကြရုံတတ်နိုင်လေသည်။

<< >>

💘

Prev Next