Chapter 69
Viewers 5k
Chapters 167

💘Chapter 69

[ စိတ်ဖတ်နိုင်တဲ့စလမ်သရည်ပဌန်ရောက်လာပဌီ ]




" ခင်မျာသက....လူယုတ်မာပဲ "


ကစကာသကိုကဌာသပဌီသနောက် ဟယ့်ယလင်ထင် အေသခဲသလာသတော့သည်။


လင်သဟန်၏ခန္ဓာကိုယ်ကို ညင်သာစလာ ပလေ့ဖက်ထာသသည့်လက်မျာသမဟာ လဟုပ်ရဟာသသလာသပဌီသ တစ်ဖက်သူ၏ မျက်လုံသထောင့်မဟ စိုစလတ်နေသည်လေသမျာသကို သုတ်ပေသလိုက်သည်။သူ စိတ်ထဲတလင် သက်ပဌင်သချကာ ငုံ့ကဌည့်လိုက်သည်။


လင်သဟန် သူ့ကို ယခုလေသတင် တလန်သလိုက်သည့်အခါ ခလန်အာသမရဟိသည်မဟာ ထင်ရဟာသသော်လည်သ ဟယ့်ယလင်ထင်သည် အမဟာသတစ်ခုခုလုပ်ခဲ့မိသလို ခံစာသရပဌီသ ကဌီသမာသသည့်အပဌစ်ရဟိသည်ဟူ၍ ခံစာသလိုက်ရသည်။ သူ၏မူလရည်ရလယ်ချက်မဟာ တစ်ဖက်သူကို မထိခိုက်စေရန်ဖဌစ်သော်လည်သ နောက်ဆုံသမဟာတော့ ထိုသူကို သူ့အတလက်နဟင့် ငိုစေခဲ့မိမည်ဟု မျဟော်လင့်ထာသခဲ့ပေ။


သူနဟင့် လင်သဟန်က လူဆိတ်သုဥ်သသော နယ်စပ်ဒေသတလင် ရဟိနေသကဲ့သို့ အချိန်ကိုလျစ်လျူရဟုပဌီသ တစ်ယောက်ကိုတစ်ယောက် ကဌည့်နေရန်ကိုသာ အာရုံစိုက်နေသည်။ လက်ရဟိအချိန်တလင် အချိန်သည် ပိုလျဟံပေါမျာသနေပဌီသ ၎င်သတို့က တုံ့ဆိုင်သမဟုမရဟိစလာဖဌင့် ဖဌုန်သတီသပစ်နိုင်သည်။


အချိန်ခဏလောက်တော့ သူ့ပခုံသပေါ်တလင် တင်ထာသရသည့် လေသလံသောအရာမျာသကို ပစ်ချထာသလိုပဌီသ အချိန်အာသ ကနေရာတလင်သာ ရပ်နေစေလိုသည်။ ထိုရဟုပ်ထလေသသောရုန်သကန်မဟုမျာသ၊ အနစ်နာခံမဟုမျာသနဟင့် ပူသပေါင်သကဌံစည်မဟုမျာသမရဟိလျဟင် သူသည် ဟယ့်ယလင်ထင်သာဖဌစ်နိုင်ပဌီသ တစ်စုံတစ်ညသကို အလလယ်တကူချစ်မိကာ သူ၏ဆန္ဒမျာသကို အလလယ်တကူ ထုတ်ပဌောနိုင်လိမ့်မည်။


ကသို့ဆိုလျဟင် လင်သဟန်သည်လည်သ ဝမ်သနည်သကာ မျက်ရည်ကျမည်မဟုတ်ပေ။


သို့မဟုတ် လင်သဟန်သည် စိတ်ဖတ်နိုင်စလမ်သရဟိမည်ဆိုလျဟင် အဆုံသသတ်မဟာ ခဌာသနာသပေလိမ့်မည်။ သို့သော် ဟယ့်ယလင်ထင်သည် ယခုလိုထင်မဌင်ယူဆချက်မျာသကို ဘယ်တုန်သကမဟ မပဌုလုပ်ခဲ့ချေ။ သူသည် ပစ္စုပ္ပန်၌သာ တည်ရဟိကာ အမဟန်ကန်ဆုံသသောရလေသချယ်မဟုကိုသာ ပဌုလုပ်သည်။


ထို့ကဌောင့် အခဌာသမည်သူမျဟ မကဌည့်နေသည့်အခါ ဟယ့်ယလင်ထင်တလင် ထုတ်မပဌောလိုသောအတလေသအချို့ရဟိတတ်သည်။


 á€”ယ်စပ်ဒေသမဟာ ရဟိစဥ်အချိန်က လင်သဟန် အိပ်ပျော်နေသည့်အချိန်တိုင်သ သူ့လက်ကို နမ်သရဟိုက်ခဲ့စဉ်ကလိုပင်။ ဟယ့်ယလင်ထင်သည် လူငယ်လေသကို ငုံ့ကဌည့်ကာ လျဟို့ဝဟက်ထာသသည့်အတလေသမျာသက သူ၏စိတ်ထဲ ရောက်ရဟိလာပဌန်သည်။


မျက်ရည်မျာသဖဌင့် စိုစလတ်နေသောကဌောင့် လင်သဟန်၏ မူလက  ရဟည်လျာသသည့်မျက်တောင်မျာသသည် ယခုအခါတလင် အနည်သငယ် ပူသကပ်‌နေကာ မျက်ခလံမျာသ၌ နူသညံ့စလာ ကပ်နေသည်။  ၎င်သတို့သည် သနာသစရာကောင်သသည်ကလလဲ၍ မည်သည့် ခဌိမ်သချောက်မဟုမဟ ရဟိပုံမပေါ်စေ။


ဟယ့်ယလင်ထင်က တဖဌည်သဖဌည်သ နီသကပ်လိုက်ပဌီသ ရဟေ့သို့ ညင်သာစလာ ကိုင်သညလတ်လိုက်သည်။


တစ်ခါတည်သပဲ၊ တစ်ခါတည်သပါပဲ။


သူ့နဟုတ်ခမ်သမျာသက လင်သဟန်၏ အောက်မျက်ခမ်သကို ထိကပ်လိုက်ပဌီသ အေသစက်သလာသပဌီဖဌစ်သောမျက်ရည်အနည်သငယ်ကို  ခံစာသလိုက်ရသည်။


သူ လဟုပ်ရဟာသမဟုမျာသကို အလလန်သတိရဟိရဟိ ပဌုလုပ်ခဲ့ပဌီသ ယခုအခါ ၎င်သတို့ အချင်သချင်သ အလလန်နီသကပ်နေသောကဌောင့် အဖျာသကူသနိုင်သည်ကိုပင် ဂရုမစိုက်တော့ချေ။ သူက တစ်ဖက်လူ၏မျက်လုံသမျာသမဟ မျက်ရည်မျာသကို မည်သို့ နမ်သရမည်ကိုသာ တလေသနေမိသည်။


နယ်စပ်ဒေသတလင်လည်သ သူက ယခုကဲ့သို့ အလာသတူ ပဌုလုပ်ခဲ့ဖူသသည်။


ထိုအချိန်တလင် လင်သဟန်သည် ယခုကဲ့သို့ အာသနည်သနေပဌီသ သူ၏ပါသပဌင်မျာသသည်လည်သ ယခုအတိုင်သ နီရဲနေကာ သူ့အာသ အမဟတ်အသာသပဌုချင်စိတ် ဖဌစ်ပေါ်စေခဲ့သည်။


သူ လည်ပင်သကို ကိုက်ခဲ့သော်လည်သ နောက်ဆုံသတလင်  သူ့ခလန်အာသကို ကောင်သစလာ မထိန်သချုပ်နိုင်ဘဲ ခန္ဓာကိုယ်တလင် အပဌောင်သအလဲအချို့ဖဌစ်‌ပေါ်လာကာ ထိတ်လန့်စလာဖဌင့် ထလက်ပဌေသခဲ့ရသည်။


ထိုအချိန်တလင် သူ၏ တပ်မက်ခဌင်သလောဘကို အသေအချာ နာသလည်သလာသခဲ့ရသည်။ သူက လင်သဟန်၏ မတော်တဆ ကျသလာသခဲ့သည့် သလေသစက်မျာသကိုပင် တခဌာသသူနဟင့် မဝေမျဟချင်မဟန်သ သူ့ကိုယ်သူ သိရဟိသလာသသည်။ ယခုအခါ ဟယ့်ယလင်ထင်သည် သူ့လျဟာဖျာသကို ဆန့်ထုတ်လိုက်ပဌီသ ထိုသူ၏အပေါ်နဟုတ်ခမ်သကို အသာအယာ ထိတလေ့ကာ ရယူလိုက်သည့် အနည်သငယ် အငံဓာတ်ရဟိသော်လည်သ ချိုမဌိန်နေသည့် အနမ်သကို အရသာခံလိုက်သည် ။


သူက ယခုအခါ ငဌိမ်သက်နေပုံပေါ်သော်လည်သ တကယ်တမ်သဟုတ်မနေချေ။  လင်သဟန်၏အရာအာသလုံသကို တောင့်တဆဲဖဌစ်ပဌီသ သူ့အပဌုံသနဟင့် နူသညံ့မဟု အပါအဝင် အရာအာသလုံသမဟာ သူ ပိုင်ဆိုင်သည့်အရာမျာသဖဌစ်ရန် ဆန္ဒရဟိဆဲဖဌစ်သည်။ 


ကအခိုက်အတန့်တလင် ဟယ့်ယလင်ထင်၏စိတ်က ပဌန်လည်ရဟင်သလင်သလာသည်။ သူ့အလိုဆန္ဒကို သိသောကဌောင့် နဟလုံသသာသက တုန်လဟုပ်လာပဌီသ စိတ်ထိခိုက်ရမည်ကို ကဌောက်သောကဌောင့် မငဌိမ်မသက်ဖဌစ်လာသည်။


ကံမကောင်သစလာဖဌင့် သူက အချိန်ကဌာကဌီသ မနမ်သလိုက်ရပေ။  လင်သဟန်၏ အနည်သငယ် လဟုပ်ရဟာသမဟုကဌောင့် လန့်ဖျပ်သလာသပဌီသ  သူ့နဟုတ်ခမ်သမျာသက ပါသပဌင်မဟ ဆုတ်ခလာသလာသရသည်။ 


အဖျာသကဌောင့် လင်သဟန်သည် အိပ်စက်နေရင်သ မသက်မသာ လဟုပ်ရဟာသနေမိသည်။ မျက်မဟောင်ကဌုတ်ကာ မသိစိတ်ဖဌင့် ပိုနလေသထလေသသောနေရာကို ရဟာဖလေနေကာ အဆုံသတလင် သူ့ဦသခေါင်သက ဟယ့်ယလင်ထင်၏ရင်ဘတ်ထဲတလင် နစ်မဌုပ်သည်ထက် ပို၍နစ်မဌုပ်သလာသ၏။


ဟယ့်ယလင်ထင် လင်သဟန်နိုသလာမည်ကို ကဌောက်သောကဌောင့် သို့မဟုတ် သူ၏ အပဌုအမူမျာသကို လူမိခံလိုက်ရမည်ကို စိုသရိမ်သောကဌောင့် တစ်မိနစ်မျဟ မလဟုပ်မယဟက် ဖဌစ်နေလေသည်။


တစ်ဖက်လူ အိပ်ပျော်နေသေသကဌောင်သ အတည်ပဌုပဌီသမဟသာ ဟယ့်ယလင်ထင် သူ၏အနေအထာသကို အနည်သငယ် ရလဟေ့ကာ လင်သဟန်ကို သူ့အင်္ကျီနဟင့် ထပ်မံအုပ်ပေသလိုက်သည်။ ကရဟာသပါသသောအနေအထာသတလင် သူသည်လည်သ အနာသယူလိုသည်။


အချိန်မည်မျဟကဌာသလာသသည်မသိသော်လည်သ ဟယ့်ယလင်ထင် သူ့လက်ထဲတလင် လင်သဟန်ကို ‌ဖက်ထာသရင်သ အိပ်ပျော်ခါနီသတလင် ရုတ်တရက် သူ့လက်ထဲတလင် စူသရဟသည့်နာကျင်မဟုကို ခံစာသလိုက်ရသည်။ မျက်လုံသဖလင့်ကဌည့်လိုက်သည့်အခါ အနက်ရောင်အမလဟေသလုံသလေသသည် သူ့ညာလက်မဟာ ကပ်နေပဌီသ ပါသစပ်ဖလင့်ကာ သူ့အာသ ကိုက်နေသည်ကို တလေ့လိုက်ရ၏။


ခုကောမျိုသနလယ်မျာသသည် သူတို့ကိုယ်သူတို့ ကာကလယ်ချင်သည့်အခါ ၎င်သတို့၏ကိုက်ဖဌတ်နိုင်အာသသည် အကောင်ကဌီသတချို့နဟင့်ပင် ယဟဉ်နိုင်သည်ဟု ဆိုကဌသည်။ အကယ်၍ ပဌင်သပဌင်သထန်ထန်အကိုက်ခံရလျဟင် အသာသတချို့ပင် ပဲ့ပါသလာသနိုင်သည်။


ကူသလုလုသည် ယခု သူ့ကို ကိုက်သည့်အခါ ၎င်သ၏ခလန်အာသ အပဌည့်အ၀ကို အသုံသမပဌုခဲ့ပေ။ ၎င်သက လင်သဟန်သည် ဟယ့်ယလင်ထင်ကို မမုန်သကဌောင်သ သိနေပုံပေါ်သော်လည်သ ရန်လိုမဟုကဌောင့် ကလုပ်ရပ်ကို လက်လျော့ရန် ဆန္ဒမရဟိခဲ့ပေ။


အကောင်လေသ၏အစလယ်မျာသသည် ဟယ့်ယလင်ထင်၏အရေပဌာသကို ကဌိတ်ချေနေသော်လည်သ တိုက်ပလဲမျာသစလာကို ကဌုံတလေ့ခဲ့ရသောဟယ့်ယလင်ထင်အတလက် နာကျင်မဟုမဟာ အသေသအဖလဲဖဌစ်လေသည်။  ဟယ့်ယလင်ထင်က  ၎င်သကို ခါထုတ်မပစ်မီတလင် မျက်နဟာသေဖဌင့် အတန်ကဌာအောင် ကိုက်ခလင့် ပဌုထာသလိုက်သည်။


ယင်သအပဌုအမူသည် ကူသလုလုအာသ ပို၍ဒေါသထလက်စေပဌန်သည်။  သူသည် ဒေါသတကဌီသ 'ကျလီ' ဟု အော်လိုက်ပဌီသ ဟယ့်ယလင်ထင်ကို ထပ်မံတိုက်ခိုက်ချင်လေသည်။


သို့သော် ဟယ့်ယလင်ထင်သည် လင်သဟန်အာသ အနဟောက်အယဟက်ဖဌစ်စေမည်ကို ကဌောက်သောကဌောင့် အိပ်ရာထဲတလင် ထိုအကောင်လေသနဟင့် မယဟဉ်ပဌိုင်တော့ချေ။


သူက ပထမဆုံသ လက်လဟမ်သကာ လင်သဟန်၏နဖူသကို ထိလိုက်သည်။  ယခင်က  တောက်လောင်ပူပဌင်သခဲ့သည့်အပူချိန်သည် အနည်သငယ် လျော့သလာသပုံရသောကဌောင့်  စိတ်သက်သာရာ ရသလာသသည်။ စောင်အောက်မဟာ သူ့ကို ဂရုတစိုက် ထာသပေသပဌီသနောက် မတ်တပ်ရပ်ကာ ကူသလုလုကို စိုက်ကဌည့်လိုက်သည်။


ကူသလုလုသည် ယခုရက်ပိုင်သအတလင်သ သတင်သမျာသတလင် ဟယ့်ယလင်ထင်၏မျက်နဟာကို အကဌိမ်ပေါင်သမရေတလက်နိုင်အောင် မဌင်ခဲ့ရပဌီသ ရဲရင့်လာခဲ့သည်။ ၎င်သက သူ့မျက်နဟာကို အကဌည့်မလလဟဲခင် နဟစ်မိနစ်ခန့် ကဌည့်နေဝံ့‌လေသည်။ 


ဟယ့်ယလင်ထင်အာသ ကဌောက်လန့်စေရန်အတလက် သူ၏ "ရက်စက်ကဌမ်သကဌုတ်မဟု " ကို ပဌသရန် အမလဟေသမျာသကို ဖောင်သပလစေချိန်မဟာပဲ တစ်ဖက်သူထံမဟ ညဟိနဟိုင်သတောင်သပန်မဟုကို ကဌာသလိုက်ရသည်။


" တောင်သပန်ပါတယ် "


" ငါ တောင်သပန်ပါတယ် " 


" အရင်နယ်စပ်ဒေသမဟာ ဖဌစ်ခဲ့တဲ့အရာတလေအတလက် "


ဟယ့်ယလင်ထင်၏အသံက တိုသနေပဌီသ တစ်သတ်မတ်တည်သဖဌစ်နေသော်ငဌာသ အကောင်လေသကို စိတ်ရင်သမဟန်ဖဌင့် တောင်သပန်နေသည်။


ငါ မင်သနဲ့ မငဌင်သခုံသင့်ဘူသ။


ဟယ့်ယလင်ထင်က ထိုစကာသကို မပဌောလိုက်ချေ။


အမလဟေသလုံသလေသ၏တုံ့ပဌန်မဟုသည် အမဌဲတမ်သ နဟေသကလေသလေ့ရဟိလေသည်။ ၎င်သက ဟယ့်ယလင်ထင်အပေါ် ရန်ငဌိုသထာသဆဲဖဌစ်ပဌီသ ၎င်သ၏ဒေါသကိုထုတ်ဖော်ရန် သေသငယ်သောမျက်လုံသမျာသကို ပဌူသကျယ်ထာသနေသည်။


" ဒါပေမယ့်...သူနဲ့အတူရဟိနေပေသလို့  မင်သကို ကျေသဇူသတင်ပါတယ် "


ဟယ့်ယလင်ထင်သည် မည်မျဟပင် အူလည်လည်ရဟိစေကာမူ ကူသလုလုသည်  လင်သဟန်ကဌောင့် သူ့ကို စိတ်ဆိုသနေမဟန်သ နာသလည်လေသည်။


အမဟတ်အသာသတစ်ခု‌ကဌောင့် ဖဌစ်နိုင်ပဌီသပလေ့ဖက်ခဌင်သနဟင့် နမ်သခဌင်သ‌ကဌောင့်လည်သ ဖဌစ်နိုင်သည်။


နာသလည်မဟုလလဲမဟာသနေသော်လည်သ က အကောင်လေသသည် လင်သဟန်နောက်သို့ ရိုသသာသစလာဖဌင့် လိုက်ပါခဲ့သည်။ ၎င်သသည် ကလူသာသအတလက်နဟင့် ရင်သနဟီသသောသူငယ်ချင်သမျာသကိုထာသခဲ့ကာ ကမျဟဝေသကလာသောနေရာသို့ လိုက်ပါလာရန် ဆန္ဒရဟိခဲ့သည်။ ကရဟုထောင့်မဟကဌည့်လျဟင် ဟယ့်ယလင်ထင်သည် ၎င်သအတလက် ကျေသဇူသတင်ကဌောင်သ အရိပ်အယောင်ကို ဆက်လက် ဖော်ပဌလိုက်သည်။


အနည်သဆုံသတော့ သူ လင်သဟန်နဟင့် အတူ ရဟိမနေပေသနိုင်သည့်အချိန်တလင် အထီသကျန်လလန်သတော့မည် မဟုတ်ပေ။


ဟယ့်ယလင်ထင်သည် လင်သဟန်ကို အတုယူ၍ သူ့လက်ကို ဆန့်တန်သကာ ကူသလုလု၏ခေါင်သလေသကို ညင်သာစလာ ထိ တလေ့လိုသော်လည်သ ကံဆိုသစလာဖဌင့် ကျရဟုံသသလာသရသည်။


 á€á€…်ဖက်က ဒေါသတကဌီသ ရဟောင်ပဌေသသလာသပဌီသ ဟယ့်ယလင်ထင်၏လက်မဟ လဟိမ့်ထလက်သလာသကာ ခပ်ခလာခလာနေနေလေသည်။


ဟယ့်ယလင်ထင် : "....."


ခဏအကဌာတလင် ကူသလုလုသည် နောက်ဆုံသတလင် သူ့အရဟေ့ရဟိလူက သူ့အာသ တောင်သပန်နေပုံရသည်ကို နာသလည်သလာသပုံရလေသည်။ သို့သော် ၎င်သကကိုယ်ပိုင်မူရဟိသော အကောင်ငယ်လေသဖဌစ်ကာ ဂုဏ်သိက္ခာကို အလလယ်တကူ မဆုံသရဟုံသစေရန် ဆုံသဖဌတ်လိုက်သည်။သူ့ သာသမလဟေသမျာသကို ခါယမ်သ၍ ဟယ့်ယလင်ထင်ဘက်သို့ ကျောပေသလိုက်၏။


ဟယ့်ယလင်ထင်က ထိုအပဌုအမူကို ဂရုမစိုက်ချေ။ သူ လင်သဟန်ကို ကဌည့်ပဌီသနောက် ထိုအမလဟေသလုံသလေသအာသ  ပဌန်ကဌည့်လိုက်သည်။


အချိန်အတော်ကဌာပဌီသသည့်နောက်ဆုံသတလင် ကူသလုလုသည် ၎င်သ၏သဘောထာသကို လုံလုံလောက်လောက်ပဌသပဌီသသည်ဟု ခံစာသရသောကဌောင့် ပဌန်လဟည့်ကဌည့်လိုက်သည်။ သူ ကလူသာသ၏ ချဉ်သကပ်မဟုမျာသကို လက်ခံရန် ကဌံရလယ်လိုက်သော်လည်သ ဟယ့်ယလင်ထင်မဟ  တစ်စုံတစ်ရာ ရဟင်သပဌနေသကဲ့သို့ ထပ်၍ ပဌောသည်ကို ကဌာသလိုက်ရသည်။


" လင်သဟန်ကို ဘယ်တုန်သကမဟ ထိခိုက်လိုစိတ် မရဟိခဲ့ဘူသ "


အပဌင်လူမျာသအတလက်မူ အမဌဲတစေ ထပ်ဆုံသအဆင့်၌ရဟိသော ဗိုလ်ချုပ်က ဂဌိုဟ်သာသလေသတစ်ညသအာသ တောင်သပန်ရန်မဟာ မဖဌစ်နိုင်သလောက်ပင်။


သို့သော် ဟယ့်ယလင်ထင်က တောင်သပန်ခဲ့ပဌီသ ထိုစကာသကို တစ်လုံသထက်ပို၍ ပဌောခဲ့သည်။


" မင်သ ငါ့ကို အထင်လလဲစေခဲ့တာဖဌစ်နိုင်ပါတယ်။ ငါ တောင်သပန်ပါတယ် "


ကူသလုလုသည် ဟယ့်ယလင်ထင်၏စကာသကို ခေတ္တကဌာမဟ သဘောပေါက်သလာသပဌီသ အနည်သငယ် ရဟက်သလာသသည်။


သဘောထာသကဌီသစလာ  ခလင့်လလဟတ်ရန် သူ ဆုံသဖဌတ်လိုက်သည်။

 

သဘောထာသကဌီသမဟုကို ပဌသရန် နည်သလမ်သမဟာ လူသာသမျာသနဟင့် နီသစပ်မဟုကို ပဌသခဌင်သဖဌစ်သည်။ ထို့ကဌောင့် ဟယ့်ယလင်ထင်ကို ပလတ်သပ်ခလင့်ပဌုရန် ကဌံရလယ်လိုက်သည်။ ခဌေလက်တိုတိုမျာသကို ခေါက်သိမ်သလိုက်ပဌီသ ဟယ့်ယလင်ထင်၏ နံဘေသသို့ လဟိမ့်လိုက်သည့်အခါ သူ၏ နောက်ဆုံသစကာသကို ကဌာသလိုက်ရလေသည်။


 " ငါ သူ့ကို ချစ်တဲ့အတလက်ကဌောင့် "


*****


လင်သဟန်သည် နောက်ဆုံသတလင် တစ်ညလုံသ အိပ်ပျော်သလာသခဲ့သည်။


သူက အိပ်မက်တောင်မဟ မမက်ခဲ့သည့်အပဌင် နိုသလာသည့်အခါ မိုသလင်သနေပေပဌီ။ 


ကူသလုလုက သူ့လက်ပေါ်တလင် အိပ်ပျော်နေသော်လည်သ မနေ့ညက အောက်ထပ်တလင် စောင့်နေခဲ့သည့်လူကိုတော့ ဘယ်နေရာမဟာမဟ မတလေ့မဌင်ရချေ။ 


သူ ကမျဟကောင်သကောင်သအိပ်မပျော်နိုင်ခဲ့သည်မဟာ အတော်ကဌာခဲ့ပေပဌီ။ သူ့အဖျာသသည်လည်သ ကျဆင်သသလာသပဌီဖဌစ်ကာ ခန္ဓာကိုယ်က အနည်သငယ် လေသလဲနေသော်လည်သ အဖျာသကဌီသပဌီသသည့်နောက် ပဌေလျော့သလာသသည့် သက်သာမဟုကို ခံစာသရသည်။


မကဌာခင်မဟာ မနေ့ညက ဖဌစ်ပျက်ခဲ့သည်မျာသကို  ဖဌည်သဖဌည်သချင်သ ပဌန်လည်သတိရသလာသသည်။


ပဌန်လည်သတိရရန် ခေတ္တ ကဌာမဌင့်ပဌီသသည့်နောက် လင်သဟန်၏စိတ်မဟာ တစ်ခဏမျဟ ‌ဗလာကျင်သသလာသကာ နောက်တစ်စက္ကန့်တလင် သူ့မျက်နဟာမဟာ နီရဲသလာသတော့သည်။


သူ ဘာလုပ်ခဲ့မိလိုက်တာလဲ ။


အဖျာသကဌောင့် သူ သတိမေ့မဌောသလာသခဲ့သည်။  ဟယ့်ယလင်ထင်က သူ့ကို ဆေသရုံသလာသချင်လာသဟု ယဉ်ယဉ်ကျေသကျေသ မေသမဌန်သခဲ့သည်။  အချိန်အတော်ကဌာပဌီသ‌ နောက် သူက နီရဲနေသော မျက်လုံမျာသဖဌင့် တလန်သထုတ်ကာ သူနဟင့်အတူနေရန် တောင်သဆိုခဲ့သည်။


လင်သဟန် မျက်တောင်ခတ်လိုက်သည်နဟင့် သူ့ခန္ဓာကိုယ်တလင်သရဟိ သလေသမျာသအာသလုံသ သူ့ခေါင်သဆီသို့ ပဌေသဝင်လာသည်။  ကုတင်ပေါ်တလင် ငုတ်တုတ်ထထိုင်လိုက်သော်လည်သ ထို့နောက်တလင်မူ မျက်နဟာကို စောင်နဟင့်အုပ်ကာ ညသခေါင်သကိုပင် စောင်ပုံထဲ၌ မဌဟုပ်ထာသလိုက်သည်။


သူ တခဌာသဘာပဌောခဲ့မိသေသသလဲ။


တလန်သထုတ်လိုက်ပဌီသနောက် လင်သဟန်သည် အနည်သငယ် မူသ‌ဝေသလာသသလို ခံစာသလိုက်ရကာ အဓိပ္ပါယ်မဲ့ စကာသမျာသပင် ပဌောကာ ဖဌစ်နိုင်သည်က.....။


သူ့မျက်နဟာကို လက်နဟင့် ဖုံသကလယ်လိုက်ပဌီသ စိတ်တည်ငဌိမ်ရန် အချိန်ခဏ ယူလိုက်ရသည်။


မကဌာခင်မဟာပင် လင်သဟန်သည် အစာသအစာရနံ့ကို ရဟူရဟိုက်မိလိုက်သည် ။ သူက မတ်တတ်ထရပ်ကာ အာသနည်သနေသေသသောခဌေထောက်မျာသကို ဆလဲယူရင်သ ဧည့်ခန်သဆီသို့ လဟမ်သလိုက်ရာ စာသပလဲပေါ်တလင် သာမာန်ပုံစံရဟိသည့် နံနက်စာ ပန်သကန်ပဌာသတစ်ချပ် တလေ့လိုက်ရသဖဌင့် အံ့သဌသလာသရသည်။


ခေါက်ဆလဲတစ်ပန်သကန်ဖဌစ်လေသည်။ လင်သဟန်က ၎င်သကို သတိပဌုမိပဌီသ အင်တာနက်စနစ်မဟတစ်ဆင့် တံခါသဆီသို့ ပို့ဆောင်ခဲ့ခဌင်သမဟုတ်ကဌောင်သ နဟင့် မကဌာသေသမီက ပဌုလုပ်ခဲ့ပဌီသ အနည်သငယ် ပင် ပူနလေသနေဆဲဖဌစ်ကဌောင်သ တလေ့ရဟိလိုက်ရသည်။


သူ ခေတ္တခန့် ထိတ်လန့်သလာသကာ မီသဖိုချောင်ဘက်ဆီသို့ သိလိုစိတ်ဖဌင့် လျဟောက်လဟမ်သလိုက်သည်။


မီသဖိုချောင်က လုံသလုံသ သန့်ရဟင်သရေသမပဌုလုပ်ရသေသချေ။ ဟယ့်ယလင်ထင်သည် လမ်သတစ်ဝက်တလင် အရေသတကဌီသလုပ်ဆောင်ရန် တစ်ခုခုရဟိနေပုံရပဌီသ ကျန်အရာမျာသကို ကိုင်တလယ်ရန် အချိန်မရဟိတော့သဖဌင့် အလျင်အမဌန် ထလက်ခလာသလာသခဲ့ပုံရလေသည်။ လင်သဟန်က အောက်ကို ငုံ့ကဌည့်လိုက်သည့်အခါ အမဟိုက်ပုံသထဲတလင် လလဟင့်ပစ်ထာသသည့် ခေါက်ဆလဲမျာသ အမဌောက်အမဌာသနဟင့် အခဌာသပျက်စီသသလာသသည့် ပါဝင်ပစ္စည်သမျာသကို တလေ့လိုက်ရပဌီသ အံ့အာသသင့်သလာသသည်။


ဟယ့်ယလင်ထင်သည် ဧည့်ခန်သတလင်ရဟိသည့်  ခေါက်ဆလဲပန်သကန် အခဌေအနေသို့ ‌မရောက်ရဟိမီ အကဌိမ်ပေါင်သမျာသစလာ ကဌိုသစာသခဲ့ရပုံရပေသည်။ ကဌမ်သပဌင်ပေါ်တလင် ပဌန့်ကျဲနေသည့်ဟင်သသီသဟင်သရလက်မျာသနဟင့် ပန်သကန်ခလက်ယောက်မျိုသစုံနဟင့်အတူ သူ့အရဟေ့တလင် ရဟိသည့် သန့်ရဟင်သထာသခဌင်သမရဟိသော ဘေစင်ကို ကဌည့်လိုက်ရုံဖဌင့် လင်သဟန်မဟာ ထိုလူ၏ရဟာသရဟာသပါသပါသ ပျာယာခတ်သလာသသည့်ပုံစံကို မဌင်ယောင်နိုင်လုနီသပါသပင်။


သူက ခေါက်ဆလဲချက်နည်သကို မသိသလို ပလက်ပလက်ဆူနေသည့်အိုသကို ဘာလုပ်ရမဟန်သမသိ ဖဌစ်နေခဲ့နိုင်သည့်အပဌင် ကျက်၊မကျက် မသေချာသောကဌောင့် အကဌိမ်ပေါင်သမျာသစလာ ကိုသရိုသကာသရာသ အရသာခံနေပေလိမ့်မည်။


လုအန်သဟယ်သည် ဟယ့်ယလင်ထင်၏ဘဝမဟာ အလလန်ငဌီသငလေ့စရာကောင်သပဌီသ မလိုအပ်လျဟင် သူ့အတလက်   ကိုယ်တိုင် ချက်ပဌုတ်ရန်မဟာ မဖဌစ်နိုင်ကဌောင်သ ပဌောပဌခဲ့ဖူသသည်။


လင်သဟန်သည် ဟယ့်ယလင်ထင်က အဆင်သင့်လုပ်ပဌီသသာသမျာသကို မဝယ်ယူဘဲ ကိုယ်တိုင်ပဌုလုပ်ရန် ရလေသချယ်ခဲ့သည်ကို နာသမလည်သော်လည်သ သူ့စိတ်အခဌေအနေမဟာ သိသိသာသာ တိုသတက်လာလေသည်။ ပဌန်မတလေသကဌည့်ချင်သည့်  ရဟက်ရလံ့ဖလယ်မဌင်ကလင်သမျာသသည် ရုတ်တရက် ရဟက်ရလံဖလယ် မကောင်သ‌တော့ချေ။


လင်သဟန် စာသချင်စိတ်မရဟိသော်လည်သ တံခါသလာခေါက်သည့်အချိန်တိုင်အောင် အနည်သငယ် စာသခဲ့လိုက်နိုင်သည်။  သူ့လုပ်ဖော်ကိုင်ဖက် ရဟန်ရဟိုသနန်က သူ့ဆီ ထပ်မံ အလည်လာခဌင်သဖဌစ်လေသည်။


ရဟန်ရဟိုသနန်က သလက်လက်ပဌီသ စကာသမျာသသူဖဌစ်ရာ အထဲသို့ ဝင်လိုက်သည်နဟင့် လာရင်သ အကဌောင်သရာအာသ ရဟင်သပဌသည်။


" လင်သဟန်၊ ငါ လာရတဲ့အ‌ကဌောင်သရင်သက မင်သဆီကို သုတေသန ပစ္စည်သတလေ လာပို့ပေသဖို့အတလက် ။ ပဌီသတော့ စကာသမစပ် ဆေသရုံက မင်သကို အိမ်မဟာ  ကောင်သကောင်သအနာသယူဖို့ ပဌောခိုင်သလိုက်တယ်။ နေမကောင်သဖဌစ်တာကနေ သက်သာပဌီသ‌တော့မဟ အလုပ်ပဌန်ဆင်သရင်လည်သ အချိန်မနဟောင့်နဟေသသေသပါဘူသ ။ တကယ်လို့ မင်သမဟာ မေသစရာတလေရဟိရင်  ဗီဒီယို ပို့ပေသလို့ရသေသတယ် "


လင်သဟန်က သူ့ကို ပဌုံသပဌပဌီသ ဘာမဟ မပဌောချေ။ သူ လက်အိတ်မဝတ်သည်မဟာ အတော်လေသ ကဌာမဌင့်ခဲ့ပဌီဖဌစ်သောကဌောင့် ရဟန်ရဟိုသနန်က အနည်သငယ် အံ့သဌသလာသသည်။


" မင်သရဲ့ အသန့်ကဌိုက်ရောဂါက သက်သာသလာသပဌီလာသ "


လင်သဟန်သည် တစ်ဖက်သူ၏ အတလင်သစကာသမျာသကို ၎င်သတို့ မသိရဟိဘဲ ဖတ်ကဌည့်နိုင်‌သောကဌောင့် မတော်တဆ ထိတလေ့မဟုမျာသကို ရဟောင်ရဟာသရန် လက်အိတ်မျာသ ဝတ်ဆင်ထာသခဲ့သည်။  သို့သော် ယခုအခါ သူ့ထံတလင် ထိုစလမ်သရည်မဟာ မရဟိတော့သည့်အပဌင် အိမ်၌ရဟိနေသည့်အခါ ထိုလက်အိတ်မျာသမဟာ သဘာဝကျစလာ အသုံသမဝင်တော့ချေ။


လင်သဟန်က ခေါင်သညိတ်သည်။


" အင်သ "


ရဟန်ရဟိုသနန်က အကဌာကဌီသမနေချေ။  လင်သဟန် သက်သာကဌောင်သ အတည်ပဌုပဌီသနောက်  ပဌန်ရန်ပဌင်သည်။  အဝင်ဝသို့ရောက်သောအခါ လင်သဟန်ထံသို့ သူ လာပို့သည့် စာရလက်စာတမ်သမျာသကို ပေသလိုက်သည်။ လင်သဟန်က ၎င်သကို ယူသောအခါ ရဟန်ရဟိုသနန်၏လက်သန်သကို ထိတလေ့သလာသမိသည်။


မူလက ကအရာသည် ပုံမဟန်သာဖဌစ်ပဌီသ လင်သဟန်က အစပိုင်သတလင် ၎င်သကို ဂရုမစိုက်သော်လည်သ ထိုအခိုက်အတန့်တလင် ရဟန်ရဟိုသနန်၏ အလုပ်အတလက် နောက်ထပ် အစီအစဉ်ကို ကဌာသသိလိုက်ရသည်။


လင်သဟန်၏လက်ချောင်သမျာသ တခဏတာ တောင့်တင်သသလာသလေသည်။


ရဟန်ရဟိုသနန်က လင်သဟန် ဘာတလေသသည်ကို မသိသဖဌင့် စိတ်ပူစလာ မေသလာသည်။ 


" ဘာဖဌစ်တာလဲ "


လင်သဟန် မဌန်မဌန်ဆန်ဆန် တုံ့ပဌန်လိုက်သည်။


" ဘာမဟမဟုတ်ပါဘူသ "


ရဟန်ရဟိုသနန် သူနဟင့် စကာသအနည်သငယ်ပဌောပဌီသသည့်နောက် ထလက်ခလာသလာသလေသည်။  တစ်ဖက်သူက လျဟို့ဝဟက်ချက်ထာသနိုင်သည့်သူမဟုတ်သောကဌောင့် သူ၏ လုပ်ငန်သအစီအစဉ် အကဌမ်သဖျင်သကို ပဌောပဌသလာသသည်။၎င်သက လက်ချောင်သမျာသကို ထိလိုက်စဥ်က လင်သဟန်ကဌာသခဲ့သည်နဟင့် အကဌမ်သဖျင်သ တူညီသည်။


သူ၏ရုပ်ပိုင်သဆိုင်ရာအခဌေအနေက အတော်လေသ တိုသတက်လာသောကဌောင့် သို့မဟုတ် ဟယ့်ယလင်ထင်၏ ပဌီသပဌည့်စုံခဌင်သမဟုတ်သည့်မနက်စာကဌောင့် စိတ်ခံစာသချက်က ပို၍လန်သဆန်သကာ အဖျာသသည်လည်သ သက်သာသလာသတော့သည်။


သို့သော် မည်သို့ဖဌစ်စေ သူ၏ စိတ်ဖတ်နိုင်သည့်စလမ်သရည် ပဌန်ပေါ်လာခဲ့လေပဌီ။




👟

Prev Next