MM Story Teller

Chapter 194

Viewers 20k

🚩Chapter - 194

Arc_9. ဘီလီယံနာ၏ဇနီး [ 9.2 ]

_____

" လင်းချီယွဲ့ နင့်ရဲ့အလှလောက်နဲ့ သခင်လေးတုရဲ့ မျက်စိထဲဝင်နိုင်မယ်များ ထင်နေတာလား ။တကယ်လို့ နင်က သခင်လေးတုရဲ့ ချစ်သူနဲ့ နည်းနည်းဆင်တူနေလို့သာမဟုတ်ရင် နင့်ကို သခင်လေးတု ရဲ့အိပ်ယာပေါ်တင်ပေးဖို့ ငါက ဒုက္ခခံနေမှာမဟုတ်ဘူး ။ "

သူ၏ ညီမဖြစ်သူက ကောင်းခြင်း ၊ ဆိုးခြင်း နားမလည်တာကို တွေ့ရသောအခါ လင်းယီကျိုး သူ၏ တစ်ကိုယ်ကောင်းဆန်ပြီး အေးစက်သောအမူအရာကို မပြဘဲမနေနိုင်တော့ချေ ။

ဤအချိန်တွင် လင်းချီယွဲ့ ထုံထိုင်းနေလေ၏ ။ သူမက မိသားစု၏ အသုံးချပစ္စည်းတစ်ခုဖြစ်နေရုံသာမက တုချန်၏ မျက်လုံးထဲတွင်လည်း သူ့မိဘများကို တွန်းလှန်ဖို့ ရပ်တည်နေသည့်အရာတစ်ခုသာဖြစ်ကြောင်း နားလည်လိုက်သည်။

ဘယ်လောက်တောင် ရယ်စရာကောင်းလိုက်သလဲ။

မိသားစုကို လုံးဝစိတ်ပျက်သွားသော လင်းချီယွဲ့က ရီဝေနေသောခံစားချက်တို့ဖြင့် ကားမောင်းပြီး ထွက်လာကာ လမ်းပေါ်တွင် ယာဥ်မတော်တဆမှုတစ်ခုဖြင့်င့် ကြုံတွေ့ခဲ့၏ ။ သူမက ထိခိုက်ဒဏ်ရာမရသွားသော်လည်း ဆေးရုံရှိ ဆရာဝန်က သူမကိုယ်ဝန်ရှိနေပြီဖြစ်ကြောင်း ပြောခဲ့သည် ။

ဤကလေးက ကံမကောင်းသော်လည်း ယခုတွင် လင်းချီယွဲ့အတွက်တော့ အနီးကပ်ဆုံးသူပင်။ ယခုတွင် လင်းမိသားစု ကိုရော တုမိသားစုကိုပါ သူမ ပြန်မသွားနိုင်တော့မှန်း သိလိုက်သည် ။

တုချန်က သူမအား ဤကလေးကို မွေးခွင့်ပြုမည်မဟုတ်ပေ ။ သူမဝမ်းဗိုက်ထဲမှ ဘဝငယ်လေးအတွက် သူမ၏ ဘဝတစ်လျှောက်လုံးတွင် အရူးမိုက်ဆုံးသော လုပ်ရပ်ကို လင်းချီယွဲ့လုပ်ခဲ့သည် ။သူမ စုဆောင်းထားသမျှ အရာအားလုံးကို ထုတ်ပြီး လေယာဥ်ပေါ်သို့ တစ်ယောက်ထဲတက်သွားကာ သူမကြီးပြင်းခဲ့သော မြို့ကို စွန့်ခွာခဲ့သည် ။

လင်းချီယွဲ့ ထွက်သွားပြီးနောက်တွင် တုချန် နည်းနည်းလေးတောင် မခံစားခဲ့ရပေ ။ အဆုံးတွင် ထိုအရာကသူ့အတွက် မထင်မရှားမိန်းမတစ်ယောက်က ထွက်သွားခြင်းမျှသာ ။

ငါးနှစ်ကြာပြီးနောက်တွင် လေယာဥ်ပျက်ကျမှုကြောင့် တုချန်၏ မိဘများ မမျှော်လင့်ထားစွာသေဆုံးသွားခဲ့ကြသည် ။ တုချန် တရားဝင် တုမိသားစုကို လွှဲယူလိုက်ပြီး တစ်ကမ္ဘာလုံးတွင် အချမ်းသာဆုံး ငယ်ရွယ်သောအမျိုးသားတစ်ယောက်ဖြစ်လာ၏ ။

တုချန်၏ သတင်းများကို သတင်းစာနှင့် မဂ္ဂဇင်းများတွင် တွေ့ရသောအခါ စုဝမ်၏ မိဘများဖြစ်သော စုကျန်းကျွင့် နှင့် လီမေ့ကျွမ်းတို့က နောက်ထပ်စတင်ပြီး အကွက်ချတော့သည် ။

တုမိသားစု၏ လူအိုစုံတွဲမရှိတော့ကတည်းက တုမိသားစုထဲတွင် တုချန်က ပြောရေးဆိုခွင့်အရှိဆုံးသူပင် ၊အကယ်၍ သူတို့မိသားစု၏ သမီးသာ ယခု တုချန် နှင့်ပြန်ပေါင်းဖို့ သွားခဲ့လျှင် သူတို့နှစ်ယောက်စလုံး နောက်ဘဝအထိတစ်ဟုန်ထိုးချမ်းသာနိုင်မည် မဟုတ်လား။

ထိုတစ်ကိုယ်ကောင်းဆန်သော လူနှစ်ယောက်၏ တွက်ချက်မှုမှာအရမ်းတော်သည်ဟု ပြောရမည် ။ သို့သော် တုချန်က အ,အမဟုတ်သောကြောင့် ထိုသူနှစ်ယောက်က သူ့မိဘများ လမ်းခွဲဖို့ပေးလိုက်သော ပိုက်ဆံများထုတ်ယူသွားပြီး ထိုနှစ်က ထွက်သွားတာကို ရှာတွေ့ခဲ့သည် ။ အဆုံးတွင် လီမေ့ကျွမ်းက ဖြေရှင်းနိုင်မည့် နည်းလမ်းကို ရှာတွေ့ခဲ့သည် ။

သူမက စုဝမ်ကို သူမတို့ အစီစဥ်အတိုင်းလိုက်လုပ်ရန် တွန်းအားပေးခဲ့ပြီး တုချန်၏ ရှေ့တွင် ထိခိုက်ဒဏ်ရာရထားသော တိရစ္ဆာန်တစ်ကောင်လို သရုပ်ဆောင်ခိုင်းကာ သူတို့နှစ်ယောက်၏ ငွေမက်သောသူများဖြစ်နေသည့် ဇာတ်လမ်းကို ဤသို့ပြောင်းလဲခဲ့သည် ။ သူ့မိသားစုက သူတို့ကို ခြိမ်းခြောက်ကာ သေဖို့အထိတွန်းအားပေးခံရပြီး သူတို့ဆန္ဒကို ဆန့်ကျင့်ကာ တုမိသားစုစိတ်တိုင်းကျထွက်သွားပေးခဲ့ရသလို သရုပ်ဆောင်ခိုင်းခဲ့သည် ။

စုဝမ်က သူမ စိတ်တိုင်းကျ မဆုံးဖြတ်တတ်သော နှလုံးသားနူးညံ့သောသူဖြစ်ပြီး သူမမိဘများပြောတာကို လိုက်နာခဲ့သည် ။ ထို့အပြင် ဤနှစ်များအတွင်း၌ တုချန်ကို သူမလုံးဝမမေ့နိုင်ဘဲ ထိုသူနှင့်သူမတို့ဆက်ဆံရေးကို ရှေ့ဆက်နေသည့်အိပ်မက်ကိုပင် သူမတစ်ခါမက်ခဲ့ဖူးသည် ။ ယခု ထိုအခွင့်အရေးက သူမ အရှေ့တွင် ရှိနေပြီး သူမဘယ်လိုလုပ် လက်လျှော့နိုင်ပါမည်နည်း ။

တစ်နှစ်ကြာပြီးသောအခါ စုဝမ် သူမ၏ မိသားစုနှင့်အတူ ယန်ကျင်းကိုပြန်ခဲ့သည် ။ဤအချိန်တွင် တုမိသားစုက ပေးခဲ့သော ပိုက်ဆံများက လင်မယားနှစ်ယောက်ဖြုန်းတီးခဲ့ပြီးဖြစ်၏ ။မိသားစုသုံးယောက်က ပျက်စီးနေသောအိမ်တွင်သာ ငှားနေနိုင်တော့သည် ။စုဝမ်က သူမအမေဆွဲထားသော အစီစဥ်အတိုင်း လိုက်လုပ်ခဲ့ပြီး နောက်ဆုံးတွင် တုချန်နှင့် နောက်တစ်ခါ တွေ့ဆုံခဲ့သည် ။

ယောကျ်ားတိုင်းတွင် သူတို့၏ နှလုံးသားထဲ၌ လရောင်ဖြူလေး ရှိတတ်ကြသည် ။

နှစ်များကြာခဲ့ပြီးနောက် တုချန်က သူ၏ အချစ်စစ်နှင့် ထပ်မံတွေ့ဆုံသောအခါ သူ မလှုပ်ရှားဘဲ မနေနိုင်တော့ချေ ။

တုချန်တွင် သံသယအနည်းငယ်ရှိနေသော်လည်း ထိုနှစ်က စုဝမ် ထားသွားခဲ့ရသည့် အကြောင်းအရင်းကို စုမိသားစုဆင်းဆင်းရဲရဲနေနေရတာကို တွေ့ပြီးနောက် သူသိပ်မစဥ်းစားခဲ့တော့ပေ ။တုချန်က ပုံမှန်အတိုင်းပဲ စုမိသားစုကို တုအိမ်တော်သို့ ခေါ်သွားခဲ့သည် ။

ဤအချိန်တွင် တုဟန်က ဓါတ်ခွဲခန်းတွင်သာ အမြဲရှိနေတတ်ပြီး အိမ်ပြန်လာတာရှား၏ ။ထို့ကြောင့် တုမိသားစုတွင် တုချန် တစ်ယောက်ထဲသာ ရှိတော့သည် ။

တုအိမ်တော်တွင် နေပြီးနောက်၌ စုကျန်းကျွင့်နှင့် သူ့ဇနီးတို့က သူတို့သမီးကို တုချန်နှင့်အတူ ကိုယ်ဝန်ရအောင်လုပ်ဖို့ တိုက်တွန်းပြီး တုချန်ဆီက ပိုက်ဆံကို အနည်းငယ်စီခိုးထုတ်ဖို့ နည်းလမ်းကိုစဥ်းစားနေခဲ့သည် ။

သို့သော် တုချန်က အလွန်အလုပ်များပြီး အိမ်ကိုပြန်လာခဲသူပင် ။ သူရံဖန်ရံခါ ပြန်လာခဲ့လျှင်တောင် မနက်အစောပိုင်းအချိန်များမှသာ ဖြစ်သည် ။

တုအိမ်တောင်တွင် စုဝမ်နှစ်ဝက်ကျော်ကြာအောင်နေခဲ့ပြီး သုချန်နှင့် သူမကြားရှိ ဆက်ဆံရေးကို ပိုခရီးရောက်အောင်လုပ်ဖို့ အခွင့်အရေးလုံးဝမရခဲ့ပေ ။ အဆုံးတွင် တုချန်၏ မွေးနေ့အထိ သူမစောင့်ခဲ့သည် ။ စုဝမ်က ထိုနေ့တွင် တုချန်ထံ၌ သူမကိုယ်သူနှစ်မြှုပ်ထားဖို့ အဆင်သင့်ဖြစ်နေခဲ့သော်လည်း ရုတ်တရက် မဖိတ်ခေါ်ထားသော ဧည့်သည်က တုအိမ်တော်ထဲသို့ ကျူးကျော်လာခဲ့သည် ။

ထိုမဖိတ်ခေါ်ထားသော ဧည့်သည်မှာ တုချန်၏ မျက်နှာနှင့် ချွတ်စွပ်တူသော ငါးနှစ်အရွယ်ကောင်လေးဖြစ်ပြီး အိမ်ထဲသို့ ဝင်ဝင်ချင်း တုချန်ကို အဖေဟု ခေါ်ခဲ့သည် ။

အမှန်ပါပဲ ။ ဤကလေးက တုချန်အတွက် လင်းချီယွဲ့မွေးပေးခဲ့သောကလေးဖြစ်ပြီး ထျန်းထျန်ဟု နာမည်ပြောင်ရှိသော လင်းလီပင် ။

နိုင်ငံခြားတွင်နေခဲ့သော လင်းချီယွဲ့က လွန်ခဲ့သော နှစ်လခန့်က ပြန်ရောက်လာခြင်းဖြစ်၏ ။ဤအချိန်တွင် သူမ တုချန်နှင့် ကွာရှင်းဖို့ လုပ်ငန်းစဥ်ကို စီစဥ်ထားကာ နိုင်ငံခြားတွင်ပြန်အခြေချပြီး သူမ ကလေးကို ကျောင်းပို့ဖို့ စီစဥ်ခဲ့သည် ။

သို့သော် ကောင်ငယ်လေးထျန်းထျန်က အမေဖြစ်သူ၏ ဆုံးဖြတ်ချက်ကို သိပြီးသောအခါ တုမိသားစုအိမ်တော်သို့ သူအရင်လာခဲ့ပြီး သူ၏ အကျင့်ယုတ်အဖေနှင့် အရင်တွေ့ဖို့ စီစဥ်လိုက်သည် ။

အမှန်ပဲ ။ ထျန်းထျန်က အသက်ငါးနှစ်ပဲရှိသေးတယ်ဆိုတာကို ကြည့်မနေနဲ့ ၊ သူက ဉာဏ်ကြီးရှင်ပေါက်စလေးပဲ...

သူက အသက်ငါးနှစ်နှင့် ဘာသားစကားဆယ့်ရှစ်မျိုးကို ပြောတတ်နေပြီး စတော့စျေးကွက်ဘက်ကိုပင် လှည့်နိုင်သူဖြစ်သည် ။ ထိုကလေးက ကွန်ပြူတာဟက်ကင်းနည်းပညာပိုင်းတွင်လည်း ထူးချွန်ပြီး အတားအဆီးကို တိုက်ရိုက်ကျူးကျော်ကာ အခြားနိုင်ငံများအတွက် အတုအပတိုက်ထုတ်ခြင်းကို လုပ်ဆောင်နိုင်သလို နိုင်ငံတကာလူမိုက်ဘော့စ်နှင့်လည်း ညီအစ်ကိုလိုမျိုး ရင်းနှီးကြ၏ ။

၎င်းက ဇာတ်လိုက်အတွက် ဇာတ်လိုက်မက မွေးပေးလိုက်သော ဉာဏ်ကြီးရှင်ကလေးပင် ။

ထိုအရာကို ဘာမှ မနာလိုနေစရာမရှိပေ ။ မနာလိုခြင်းက အသုံးမဝင်သောအရာမျှသာ ။ ဘယ်သူကများ မိခင်ဗိုက်ထဲမှာရှိနေကတည်းက ထိုကဲ့သို့ဖြစ်လာဖို့ ကြိုတင်ကြံစည်ထားလို့ရမည်နည်း ။

ထျန်းထျန်လေး၏ ပေါ်ထွက်လာမှုက တုချန်ကို အံ့အားသင့်စေကာ သင်္ကာမကင်းဖြစ်စေပြီး တုချန်နှင့် စုဝမ်အကြားတွင် ပထမဆုံးအက်ကွဲကြောင်းဖြစ်လာစေ၏ ။

တုချန်တွင် ထိုကဲ့သို့ သားကြီးရှိနေပြီဖြစ်တာကို စုဝမ်လက်မခံနိုင်ပေ။ ထျန်းထျန်ကို သူ၏ သားအဖြစ်သတ်မှတ်ပြီးသွားသောအခါ စုဝမ်မနာလိုလောက်အောင် ထျန်းထျန်ကို တုချန်က အလွန်ချစ်ပေးခဲ့သည် ။

သေချာပေါက် ဤအချိန်တွင်တော့ စုဝမ်က မနာလိုမှုကြောင့် သူမ မျက်နှာပျက်ရမည့်အလုပ်မျိုးကို လုပ်မည်မဟုတ်ပေ ။ သူမက ထျန်းထျန်နှင့် စကားပြောဖို့လည်း ကြိုးစားခဲ့ပြီး သူ၏အမေဖြစ်သူအကြောင်းကို သွယ်ဝိုက်ပြီး မေးမြန်းဖို့လည်း ကြိုးစားခဲ့သည် ။

သို့သော် ဇာတ်လိုက်မရဲ့ ဉာဏ်ကြီးရှင်ကလေးကို သာမန်လူတစ်ယောက်က ဘယ်လိုလုပ်ယှဥ်နိုင်ပါမည်နည်း ။

ထျန်းထျန်ငယ်လေးက တုချန်၏ အရှေ့တွင် ချစ်ဖို့ကောင်းပြီး သနားစရာပုံပေါက်အောင် သရုပ်ဆောင်နေခဲ့သော်လည်း စုဝမ်၏အရှေ့တွင်တော့ သူက သူမကို အမြဲလှောင်ပြောင်လေ့ရှိပြီး ရည်ရွယ်ချက်ရှိရှိ သူမကို ဒေါသထွက်အောင် လုပ်လေ့ရှိသည် ။ ထို့နောက် သူမ ဒေါသထွက်နေတာကို တုချန်တွေ့သွားတိုင်း စုဝမ်က သူမကိုယ်သူမအတွက် ကာကွယ်မပြောဆိုနိုင်တော့ပေ ။

ဤနည်းလမ်းဖြင့် ထျန်းထျန်ငယ်လေး၏ အကြံအစည်အောက်တွင် သူ၏ 'အချစ်စစ်ဖြစ်သောမမလေး'မှ ဆိုးသွမ်းသောမိန်းမအဖြစ် မှတ်ယူခံလိုက်ရပြီး တုချန်၏ နှလုံးသားကို တစ်ဆင့်ပြီးတစ်ဆင့် ဆုံးရှုံးသွားခဲ့သည် ။ ထျန်းထျန်လေး၏ အစီစဥ်အောက်တွင် စုကျန်းကျွင့်နှင့် ဇနီးတို့က လောင်းကစားဖြင့် ငွေအမြောက်အများဆုံးရှုံးသွား၏ ။တကယ်တမ်းတွင် သူတို့က တုမိသားစုအိမ်တော်မှ လက်ရေးလှစုတ်ချက်များနှင့် ပန်းချီကားများကို ခိုးထုတ်ပြီး ရောင်းချဖို့ ကြံစည်ထားသည် ။သဘာဝကျကျပဲ ဇာတ်သိမ်းတွင် နှစ်ယောက်စလုံး အရင်နှစ်က ကိစ္စများကို တစ်ပါတည်း ဖော်ထုတ်ခံရကာ ဖမ်းဆီးခံလိုက်ရသည် ။

ထို့နောက်တွင် တုချန် နှင့် စုဝမ်တို့ လမ်းခွဲခဲ့ပြီး စုမိသားစုသုံးယောက်လုံး တုအိမ်တော်မှ ကန်ထုတ်ခံခဲ့ရသည် ။ နောက်ပိုင်း စုဝမ်လည်း အပြင်းအထန်ဖျားနာမှုဖြစ်၏ ။ သူမ သက်သာလာသောအခါတွင် မျက်တွင်းများချောင်ကျကာ စိုးရိမ်နေသာပုံစံဖြင့် တုချန်ကို သွားရှာခဲ့သည် ။ သို့သော်လည်း တုချန် ၊ လင်းချီယွဲ့နှင့် ထျန်းထျန်ငယ်လေးတို့ မိသားစုသုံးယောက် လိုက်လျောညီထွေဖြစ်နေတာကိုသာ သူမတွေ့ခဲ့ရ၏။

ထိုမြင်ကွင်းကို ရပ်မကြည့်နိုင်သော စုဝမ်က ရှေ့သို့တိုးသွားကာ လင်းချီယွဲ့ကို မေးခွန်းထုတ်ခဲ့သည် ။

ဤအချိန်တွင် လင်းချီယွဲ့က လင်းမိသားစုမှထွက်လာပြီးနောက် ရိုးသားသောမမလေးမဟုတ်တော့ပေ ။ ကျိုးကြောင်းမဆီလျော်သော ပြိုင်ဘက်၏ ပြဿနာများနှင့် ရင်ဆိုင်ရပြီးသောအခါ သူမက ဂရုမစိုက်သလိုဘဲ သူမ၏ လက်ထပ်လက်စွပ်ကိုသာ ထုတ်ပြလာခဲ့သည် ။

" တုချန်နဲ့ငါက တရားဝင် လင်မယားတွေပဲ ။ မမလေးစု ၊ နောက်ဆုံးထိ ဒီနေရာမှာ သခင်မက ဘယ်သူလဲဆိုတာ ရှင့်ကို ကျွန်မပြောပြနေစရာလိုသေးလား ။ "

ထိုအချိန်၌ စုဝမ်အေးခဲသွားခဲ့သည် ။ တုချန်နှင့် သူမခွဲခွာခဲ့ရသော နေ့ရက်များတွင် စုကျန်းကျွင့်နှင့် သူ၏ဇနီးက သူမဒေါသထွက်မည်စိုးသောကြောင့် တုချန်၏ လက်ထပ်မှုအကြောင်း သူမကို ဖုံးကွယ်ထားခဲ့သည် ။

ထို့ကြောင့် ဤအခိုက်အတန့်မတိုင်ခင်အထိ သူတို့ခွဲခွာနေခဲ့ရသော ကာလများတွင် တုချန်က လက်ထပ်ထားပြီးဖြစ်တာကို စုဝမ် မသိခဲ့ရပေ ။ ထို့နောက် သူမအရှေ့တွင်ရှိနေသော ကလေးက တရားဝင်ကလေးဖြစ်ပြီး သူမထင်ထားသလို အပျော်မယားက မွေးထားသော တရားမဝင်ကလေးမဟုတ်ပေ ။

ကလေး၏ အသက်အရွယ်ကို တွက်ကြည့်လိုက်သောအခါ ထိုကလေးက သူမယန်ကျင်းက ထွက်ခွာသွားသောအချိန်တွင် ရခဲ့တာမှန်း သိလိုက်၏ ။

ဒါကဘာအဓိပ္ပါယ်လဲ ။

စုဝမ် သူမကိုယ်သူမ အားလုံးထံမှ လှည့်စားခံလိုက်ရသလို ခံစားလိုက်ရရုံသာမက နောက်ဆုံးတွေ စိတ်ဓာတ်ကျသွားခဲ့ပြီး အဆုံး၌ ပြန်လမ်းမရှိသော လမ်းကို လျှောက်လှမ်းခဲ့သည် ။

စုဝမ်၏ သေဆုံးမှုက တုချန်ကို ကြာကြာဝမ်းမနည်းစေခဲ့ပေ ။ဤထက်မြက်ပြီး ချစ်စရာကောင်းသော သားလေးနှင့် တဖြည်းဖြည်း လီချင်းယွဲ့၏ ကောင်းသောအချက်များကို ရှာတွေ့လာခဲ့သည် ။ ထို့ကြောင့် လီချင်းယွဲ့က သူ့ကို ကွာရှင်းစာချုပ်ပေးလာသောအခါတွင် အဖေ နှင့် သားက သဘာ၀ကျကျပဲ သူမကို တားဖို့ အစွမ်းကုန်ကြိုးစားတော့၏ ။

နောက်ပိုင်းတွင် သားဖြစ်သူ၏ ပါးနပ်သော ထောက်ပံ့ပေးမှုကြောင့် တုချန်က နောက်ဆုံးတွင် သူ၏ ဘီလီယံနာဂုဏ်ပုဒ်ကို အသုံးပြုကာ သူ၏ ဇနီးကို ပြန်လည် လက်ထပ်နိုင်ခဲ့သည် ။ ထို့နောက် မိသားစုသုံးယောက်က ပြန်ပေါင်းစည်းကာ အမြဲပျော်ရွှင်စွာနေသွားကြလေသည်...။

၎င်းက အမှန်ပင် ရင်ထဲထိစေသော ဇာတ်လမ်းကောင်းတစ်ပုဒ်ပင် ။

အကယ်၍ စုဝမ်သာ အရင်လူ အမြှောက်စာခံဇာတ်ကောင် မဟုတ်ခဲ့လျှင်...

ဤအချိန်တွင် အခန်းထဲရှိ စုကျန်းကျွင့်နှင့် လီမေ့ကျွမ်း၏ အငြင်းပွားမှုက ပိုပြင်းထန်လာကာ စတင်ပြီး လက်ပါပါလာကြတော့သည် ။

" ရှင်တို့နှစ်ယောက် တော်လိုက်တော့ "

စုဝမ် ရုတ်တရက် အိပ်ယာမှ ထလာကာ အခန်းထဲရှိ ထိုလူနှစ်ယောက်ကို ကြည့်လိုက်၏ ။

" ရှင်တို့နှစ်ယောက်အခု တတ်နိုင်နေကြတယ်မလား ။ ကျွန်မတို့ တုမိသားစုက ကန်ထုတ်ခံရတုန်းက ရှင်တို့နှစ်ယောက်ဘာလို့ ဒီလိုမတက်ကြွနေကြတာလဲ "

" ရှောင်ဝမ် "

စုကျန်းကျွင့်ရော လီမေ့ကျွမ်းပါ လှုပ်ရှားနေတာကို ရပ်လိုက်ကြပြီး ရုတ်တရက်ဒေါသထွက်လာသော သူတို့၏သမီးကို လင်မယားနှစ်ယောက်စလုံး လှည့်ကြည့်လာကြ၏ ။

ဘာတွေဖြစ်ကုန်တာလဲ ။

ဘာလို့ ရှောင်ဝမ်က လုံးဝပြောင်းလဲသွားတဲ့ပုံပေါ်နေတာလဲ ။

နှစ်ယောက်စလုံး သူမကို ကြည့်နေတာမြင်လိုက်ရသောအခါ စုဝမ် မျက်ခုံးအနည်းငယ်ပင့်လိုက်သည် ။

" ရှင်တို့ တုအိမ်တော်ကို ပြန်သွားချင်သေးတယ်မလား ။"

" ရှောင်ဝမ် ၊ သမီးမှာ အစီစဥ်ရှိလို့လား "

စုဝမ်၏ စကားကိုကြားသောအခါ စုကျန်းကျွင့်ရော လီမေ့ကျွမ်းပါ ရုတ်တရက်စိတ်လှုပ်ရှားလာကြသည် ။ ဤအချိန်တွင် သူတို့သမီး၏ စရိုက်ပြောင်းလဲသွားမှု မေးဖို့ နှစ်ယောက်စလုံး စိတ်ဝင်စားမနေတော့ချေ ။ သူတို့ ချမ်းချမ်းသာသာဘဝနှင့် ထပ်ပြီး နေနိုင်နေသ၍ ထိုအရာကို သူတို့သိပ်ဂရုစိုက်နေမည် မဟုတ်ပေ ။

" သေချာပေါက် ကျွန်မမှာ နည်းလမ်းရှိတာပေါ့ ။ဒါပေမဲ့ ရှင်တို့ ကျွန်မအတွက် ပြဿနာထပ်ရှာတာ ရပ်မှရမယ် ။ ကျွန်မ အခွင့်ကောင်းကို စောင့်ဖို့လိုသေးတယ် ။ "

လင်မယားနှစ်ယောက်၏ လောဘတက်နေသော အကြည့်အောက်တွင် စုဝမ်က အလွန်တည်ငြိမ်စွာ ဖြေလိုက်သည် ။

သူမ တစ်စုံတစ်ယောက်ကို စောင့်ဖို့လိုပြီး သဘာဝကျစွာပင် ထိုလူက တုဟန် ဖြစ်၏ ။

နောက်တစ်ကြိမ် ငါတုအိမ်တော်ကိုပြန်ရောက်မှ ဘယ်သူက အိမ်ရှင်လည်း ဘယ်သူက ဧည့်သည်လည်းဆိုတာ ကြည့်ကြသေးတာပေါ့ ။

_🚩

Prev Next