MM Story Teller

Chapter 4

Viewers 1k

🌌 Chapter 4

အမျိုးသားအများစုက နေ့စဥ် လုပ်ငန်းဆောင်တာအနေဖြင့် နေပူဆာလှုံ၍ လေပြေလေညင်းကို ခံစားကာ ထိုနေရာတွင် လှဲလှောင်းလျက် သူတို့အားပြုစုခစားမည့် အမျိုးသမီးကို စောင့်ဆိုင်းကြသည်။

တိတိကျကျပြောရလျှင် အဆင့်နိမ့်အမျိုးသမီးများက အမျိုးသမီးများထက် ကိုင်တွယ်ရသည်မှာ ပို၍ စိတ်ကျေနပ်စရာကောင်းပြီး များစွာသောအမျိုးသားများက အိမ်၌ထိန်းသိမ်းရန် အဆင့်နိမ့်အမျိုးသမီး တစ်ယောက်စ နှစ်ယောက်စကို လက်ထပ်ကြလေသည်။

သို့သော် အဆင့်နိမ့်အမျိုးသမီးများ၏ အသုံးဝင်မှု လုပ်ငန်းဆောင်တာများက အကန့်အသတ်ရှိလေသည်။ သူတို့၏အရည်အချင်း စွမ်းဆောင်ရည်များက အမျိုးသမီးဇာ့ဂ်များထက် အလွန်နိမ့်ကျလှပြီး အဆင့်နိမ့်အမျိုးသားများကိုပင် မယှဥ်နိုင်ပေ။ သဘာဝအားဖြင့် ထိုကဲ့သို့သော ဇာ့ဂ်များက ဇာ့ဂ်အဖွဲ့အစည်းပတ်ဝန်းကျင်တွင် လုံလောက်သည့် ဝင်ငွေလစာများမရကြပေ။

အမျိုးသမီးဇာ့ဂ်များက ချမ်းသာကြွယ်ဝမှုနှင့် ဆက်ခံသူများကို ဆောင်ယူပေးနိုင်သော်လည်း အဆင့်နိမ့်အမျိုးသမီးများကမူ ကစားစရာမျှသာ ဖြစ်လေသည်။

ကံကောင်းသည့် အနည်းငယ်မျှသော အဆင့်နိမ့်အမျိုးသမီးကသာလျှင် အမျိုးသားတစ်ယောက်၏ ရွေးချယ်ခြင်းခံရချိန်တွင် နှစ်သက်မှုမခံရသော ကျန်သူများက လုံလောက်သည့် ဝင်ငွေမရရှိဘဲ အရွယ်ရောက်လာချိန်တွင်လည်း မှီခိုအားထားမည့်သူ မည်သူမှလည်း မရှိချေ။ ဤသည်ကပင် ဇာ့ဂ်အဖွဲ့အစည်းတွင် သူတို့အား မကောင်းသည့်အခြေအနေသို့ တစ်စတစ်စရောက်သွားစေသည့် အဓိအချက်ဖြစ်သည်။

သူတို့၏ ဝန်ထုတ်ဝန်ပိုးများကို သယ်ဆောင်လျက် ဂြိုလ်တစ်ခုမှ အခြားဂြိုလ်သို့ ခြေဦးတည့်ရာ လှည့်လည်သွားလာနေကြရပေသည်။

လုမော့နေထိုင်သည့် ဂြိုလ်က အလွန်အမင်း ခေတ်နောက်ကျနေသော ဂြိုလ်တစ်ခုဟု ဖော်ပြသင့်ပေသည်။

တစ်ချိန်တစ်ခါက နုပျိုလတ်ဆတ်သည့် ဂြိုလ်တစ်ခုဖြစ်ခဲ့ပြီး လေထုက သန့်ရှင်းလတ်ဆတ်ကာ ရေများက ကြည်လင်သန့်ရှင်းပေသည်။ လေ၏ကူညီထောက်ပံ့မှုဖြင့် တေးသီဆိုသည့် ငှက်ငယ်လေးများက တောတောင်မြစ်ချောင်းများကို ဖြတ်ကျော်ကာ အရိုးသားအစစ်မှန်ဆုံး ဘုရားသခင်၏ကောင်းချီးကိုပို့ဆောင်ပေးကြလေသည်။

သို့သော် ယခုတွင် ယင်းဂြိုလ်က အိုမင်းဟောင်းနွမ်းနေခဲ့လေ၏။

ကောင်းကင်၏ တစ်ဝက်ခန့်ကို ဖုန်မှုန့်များက ဖုံးလွှမ်းနေပြီး သံချေးနီရောင် လေထုထဲတွင် ခရမ်းလွန် ဓာတ်ရောင်ခြည်များနှင့် ပြည့်နှက်နေပေသည်။

ကောင်းကင်က ညှိုးနွမ်းခြောက်သွေ့နေပြီး မြေကြီးက အက်ကွဲကာ မည်သည့်အပင်မှ မဖြစ်ထွန်းသော ကျက်တီးမြေဖြစ်သည်။ ၎င်းဂြိုလ်က ဂြိုလ်သေကြီးတစ်ခုပင် ဖြစ်၍နေလေသည်။

တစ်ချိန်တစ်ခါက စည်ပင်သာယာပြီး ပြစ်မျိုးမှဲ့မထင်သောမြို့က ယိုယွင်းပျက်စီးနေပြီဖြစ်သည်။ အနီးရှိအထီးကျန်နေသော ဆိပ်ကမ်းတွင် ယနေ့၏နောက်ဆုံးကြယ်သင်္ဘောအား ဆိုက်ကပ်လာပြီဖြစ်သည်။

ကြယ်သင်္ဘော၏တံခါးပွင့်ပွင့်သွားချင်းပင် ပင်ပန်းနွမ်းနယ်နေသော အမူအရာများဖြင့် ဟောင်းနွမ်းစုတ်ပြတ်နေသာ အဝန်အစားများကို ဝတ်ဆင်ထားသည့်အဆင့်နိမ့်အမျိုးသမီးအုပ်စုလိုက် ထွက်လာကြသည်။ သူတို့၏မျက်ဝန်းများတွင် မျှော်လင့်ချက်မီးတောက်သေးသေး ကျန်ရှိနေဆဲ ဖြစ်သော်လည်း သူတို့တစ်ယောက်ချင်းစီက ဤဂြိုလ်သေပေါ်တွင် နေထိုင်ရန် ကံစီမံပြီးဖြစ်လေသည်။

လုမော့က တည်ငြိမ်စွာ ပြတင်းပေါက်ကို မှီလိုက်ပြီး မြို့ကို ကြည့်ရှုလိုက်သည်။ သူရှိနေသည့် အထပ်မြင့်အဆောက်အဦးမှာ မြို့လယ်ခေါင်တွင် တည်ရှိသည်။ ညရောက်လာသောအခါတွင် အလွန်ထည်ဝါတောက်ပလှပြီး မြို့တစ်ခုလုံးတွင် တစ်ခုတည်းသော အလင်းရောင်ရှိရာ နေရာဖြစ်လာလိမ့်မည်ဖြစ်သည်။

ခြေလှမ်းအနည်းငယ်အကွာတွင်မူ ဆင်းရဲသားရပ်ကွက်များတည်ရှိပြီး နေရာတိုင်းနီးပါးတွင် အကြမ်းဖက်မှုများ၊ လောင်းကစားသမားများနှင့် လူသတ်သမားများဖြင့် ပြည့်နှက်နေပေသည်။

၎င်းက မြို့တော်၏ စွမ်းအားပင်။

လုမော့ မူးဝေလုနီးပါးတွေးနေခဲ့သည်။

ဘယ်လောက် အံ့သြစရာကောင်းလိုက်တဲ့ မြင်ကွင်းတစ်ခုလဲ...

ထိုကဲ့သို့ စိတ်ကူးတစ်ခု ပေါ်လာသည့်အတွက် သူ့ကိုယ်သူ မလေးစားဘဲမနေနိုင်ပေ။

ဆင်းရဲသားရပ်ကွက်များက လေလွင့်ဇာ့ဂ်များအတွက် နားခိုစရာနေရာတစ်ခု ဖြစ်သည်။ သူက ထိုလေလွင့်ဇာ့ဂ်များအား သူ့အမြတ်ကြီးစားလုပ်ငန်းထဲသို့ စုဆောင်းကာ အိပ်ခွင့်မပြုဘဲ နေ့ရောညပါ သူတို့ကိုယ်တိုင်သူတို့ အလုပ်လုပ်ခွင့်ပြုလိုက်မည်ပင်။

996 က အမှန်တကယ်တွင် ကိစ္စကြီးတစ်ခုမဟုတ်ပေ။ ထို့ကြောင့် နာရီတစ်ပတ် ပြည့်အောင် အလုပ်ကြိုးစားရမည်ဖြစ်ပြီး တဖြည်းဖြည်း အသားကျသွားလိမ့်မည်ပင်။

မင်းတို့ ပိုပိုကြိုးစားလေ လုမော့က ပိုပိုချမ်းသာလာလေပဲ....

(TN- 996ဆိုတာ မနက် 9 နာရီကနေ ည 9 နာရီထိ တစ်ပတ် 6 ရက်အလုပ်လုပ်ရတာပါ...တရုတ်မှာတော့ တရားမဝင်ဘူးလို့ သတ်မှတ်ထားပါတယ်...)

"အာ...ဒီဝိုင်ဖန်ခွက်ကိုကြည့်လိုက်စမ်း.."

လုမော့က ဖန်ခွက်ကိုမြှောက်ကာ အိပ်မက်ဆန်ဆန်အသံနှင့်ပြောလိုက်သည်။

"နတ်ဆိုးခေါင်းဆောင်တွေကို သတ်ပစ်တဲ့ ခေါင်းဖြတ်စက်တစ်ခုနဲ့ မတူဘူးလား..."

စနစ်၏ အသံကပို၍ပင် အိပ်မက်ဆန်သေးသည်။

[ဘုရင်မမာရီရဲ့ ခေါင်းဖြတ်စက်နဲ့ ထပ်တူညီလုနီးနီးပါပဲ...]

"အလုပ်ကြိုးစားတဲ့ လူတစ်ယောက်အတွက် ကမ္ဘာပေါ်က ဘယ်အရာမှ မခက်ခဲဘူး..."

လုမော့က ပန်းကန်ထဲမှ ကြက်စွပ်ပြုတ်ကို တစ်လုတ်တည်းနှင့် အကုန်သောက်ပစ်လိုက်သည်။

"မှောင်မိုက်နေတဲ့လမ်းကို အလင်းရောင်ထွန်းပေးနိုင်မယ့် ငါ့ရဲ့နေ့ရက်တွေ မကြာခင်ရောက်လာတော့မယ်..."

စနစ်က စိတ်လှုပ်ရှားလာခဲ့သည်။

[အကြံဥာဏ်တွေ လူတွေအကြောင်းတွေကို နားလည်အောင်လုပ်ပြီး အသုံးချရမယ်...]

လုမော့ မျက်ရည်ကျလုမတတ် ရင်ထဲထိသွားသည်။

အရာအားလုံး ပိုပိုကောင်းလာတော့မယ်...

သို့သော်ငြား သူတို့မျှော်လင့်စောင့်စားနေသည့်အနာဂတ်က မည်မျှပင် လှပနေပါစေ လက်တွေ့ရောက်ရှိရန် အချိန်များစွာ ကြာမြင့်ဦးမည်ဖြစ်သည်။ ထို့ကြောင့် ယခုလတ်တလောတွင် ရရှိထားသည့် အမှိုက်ဆန်မှုပွိုင့်များကို လက်လွှတ်ခံ၍ မဖြစ်ပေ။

ယခုလတ်တလောထိ ရထားသည့် အမှိုက်ဆန်မှုပွိုင့်များက သဘာဝကျကျပင် ရန်လိုတတ်သည့် အမျိုးသမီးဇာ့ဂ်ထံမှပင် ဖြစ်သည်။

ထိုအမျိုးသမီးဇာ့ဂ်ပေါ်လာသည်နှင့် ချက်ချင်းပင် သုံးနှစ်လုံးလုံးရပ်တန့်နေခဲ့သည့် အမှိုက်ဆန်မှုအဆင့်ကို လုမော့က ထိုးဖောက်ကျော်ဖြတ်သွားခဲ့ပြီး ရှည်လျားလှသော အခြေခံဆုလာဘ်များကိုပင် အလုံးအရင်း ရရှိခဲ့သေးသည်။

လုမော့ မျက်လုံးမှိတ်လိုက်သည့်အခါ နူးညံ့သိမ်မွေ့သော အပြာရောင်အထုပ်ကလေးတစ်ခုက စိတ်စွမ်းအင်ပင်လယ်ထဲတွင် ငြိမ်သက်စွာ တည်ရှိနေသည်။

စိတ်စွမ်းအင်နှင့် ညင်ညင်သာသာတစ်ချက် ထိလိုက်သည်နှင့် ရွှင်လန်းတက်ကြွနေသည့် ပွဲတော်သီချင်းသံများနှင့်အတူ အရောင်ကာလာစုံသည့် ဆုလာဘ်များက နေရာအနှံ့ပျံ့ကြဲကြဲသွားကြသည်။

အဖြူရောင် အိုင်တမ်ပစ္စည်းများ :

[အလယ်အလတ် စိတ်ပိုင်းဆိုင်ရာ ပြန်လည်မွန်းမံခြင်း] ×99

[အခြေခံ ကိုယ်ခံအား မြှင့်တင်ပေးခြင်း] ×99

[အခြေခံ လျှင်မြန်မှု မြှင့်တင်ပေးခြင်း] ×99

အပြာရောင် အိုင်တမ်ပစ္စည်းများ :

[ဂြိုလ်တု ပထဝီဝင်နေရာဒေသ ရုပ်ပုံစာအုပ်] ×1

[မျိုးစိတ်များ၏ စွယ်စုံကြမ်း ရုပ်ပုံစာအုပ်] ×1

ခရမ်းရောင် အိုင်တမ်ပစ္စည်းများ :

[ဇာတ်လမ်း ဇာတ်ကောငိ သတင်းအချက်အလက်] ×1

လုမော့ : "ဒါပဲလား..."

စနစ် : [...]

[ငါပေးဖူးသမျှထဲမှာ ဒါက အရက်ရောဆုံးဆုကြေးပဲ...မင်းအရင်တုန်းက ငါ့ကိုသာ မြင်ဖူးမယ်ဆိုရင် အခုသေချာပေါက် ငိုသွားလိမ့်မယ်...]

စနစ်က တည်ငြိမ်စွာ ပြောလိုက်သည်။

ထိုရုပ်ပုံစာအုပ်နှစ်အုပ်က မည်မျှ စွမ်းအားဖီဆန်သည့် တည်ရှိမှုများ ဖြစ်သည်ကို မပြောသေးနှင့်၊ မြှင့်တင်ရေးပစ္စည်းတစ်ခုတည်းကပင် ဤကမ္ဘာတွင် မရှိသော ပစ္စည်းများဖြစ်ပေသည်။ ဤငတုံးလုမော့က ၎င်းကို သဘောမပေါက်သည်မှာ သနားစရာကောင်းလှသည်။

သူအရေးမစိုက်စွာဖြင့် ပခုံးတွန့်လျက် ခရမ်းရောင်အလင်းများ တလက်လက်တောက်ပနေသည့် [ဇာတ်လမ်း ဇာတ်ကောင် သတင်းအချက်အလက်] ကို ပုတ်လိုက်သည်။

များစွာသော အဖြူအမည်း ဇာတ်ကောင်ပုံရိပ်များထဲတွင် ပုံရိပ်တစ်ခုတည်းကသာ လင်းနေပေသည်။ အနီရောင်မျက်လုံး၊ ငွေရောင်ဆံပင်နှင့် အမျိုးသမီးဇာ့ဂ်က လက်ထဲတွင် ဓားရှည်တစ်ချောင်းကို ကိုင်ထားလျှက် ရှေ့တည့်တည့်သို့ အေးစက်စွာ စိုက်ကြည့်နေသည့်ပုံ တစ်ပုံဖြစ်သည်။

လုမော့ လေချွန်လိုက်သည်။

"မိုက်တယ်..."

စနစ်က တိတ်ဆိတ်နေခဲ့သည်။ အကယ်၍ ၎င်းတွင် အမူအရာသာရှိပါက စိုးရိမ်ကြောင့်ကြနေမည့်ပုံ ဖြစ်လိမ့်မည်ပင်။

ဤကမ္ဘာ၏ဇာတ်လိုက်က အခြားဇာ့ဂ်ဝတ္ထုများအားလုံးနီးပါးတွင် ဖော်ပြထားသည့် တူညီသည့် နည်းလမ်းများဖြင့် ဖွံ့ဖြိုးတိုးတက်လာသည့် စုန့်ကျန်းရှူးဟု အမည်ရသည့် ကူးပြောင်းသူတစ်ယောက်ပင်။ သူ လိုက်နာသည့် လွတ်လပ်မှု၊ တန်းတူညီမျှမှုနှင့်လေးစားမှုဟူသည့် အယူအဆများကို ဤနေရာရှိ မူရင်းဒေသခံ အမျိုးသားဇာ့ဂ်များက နားမလည်နိုင်ပေ။

သူ၏ဆွဲဆောင်မှုရှိသည့် ညှို့ဓာတ်နှင့် မရေမတွက်နိုင်သည့် အမျိုးသမီးများကို ဖမ်စားခဲ့ပြီ ထူးချွန်ထက်မြက်သည့် အမျိုးသမီးများကိုလည်း လက်ထပ်ခဲ့ပေသည်။

လင်းက ထိုအမျိုးသမီးများထဲမှ တစ်ယောက်ဖြစ်လေသည်။ မဝေးလှသောအနာဂတ်တွင် စုန့်ကျန်းရှူး၏ ဆွဲဆောင်မှုဖြင့် လုံးဝအနိုင်ယူခံလ်ိုက်ရမည် ဖြစ်ကာ သူ၏အမျိုးသမီးအဖော် ဖြစ်လာလိမ့်မည်ပင်။

ထိုအကြောင်းကြောင့်ပင် စနစ်က သူ့အား အခြေခံ ဆုကြေးပစ္စည်းများ ရက်ရက်ရောရော ပေးခဲ့ခြင်းဖြစ်သည်။

ပိုင်ရှင်များစွာက ကိုးကြိမ်သေဆုံးနိုင်ပြီး တစ်ကြိမ်သာ အသက်ရှင်နိုင်ချေရှိသည့် အန္တရယ်များကို မကြောက်ရုံသာမက ယင်းအစား အလွန်အမင်းပင် စိတ်လှုပ်ရှားလာခဲ့ကြသည်။ ဟုတ်ပေသည်။အကယ်၍ သူတို့စိတ်ကူးယဥ်ခဲ့သည့်အရာများကို သူတို့ အမှန်တကယ် မပိုင်ဆိုင်ကြောင်းသိသွားခဲ့သည့်အခါ အချို့သော လူကောင်းများက မကျေနပ်၍ တိုင်ကြားရုံသာတိုင်ကြားသည့် အသေးအဖွဲကိစ္စ ဖြစ်သွားချိန်တွင် အချို့သူများက ထိုအတွက်နှင့် သူတို့၏စနစ်နှင့်ပင် ရန်ဖြစ်ကြပေသည်။

စနစ်က လုမော့ ပြဿနာမရှာနိုင်ရန် ထိုဆုလာဘ်များက သူ့ပါးစပ်ကိုပိတ်ထားနိုင်ရန်သာ မျှော်လင့်ပေသည်။

လုမော့က စနစ်၏မူမမှန်သော တိတ်ဆိတ်နေမှုကို လုံးဝသတိမပြုမိဘဲ အချက်အလက်များကို ကြည့်ကာ အတွေးနယ်ချဲ့လျှက် ပြောလိုက်သည်။

"အဲ့တော့ သူက စုန့်ကျန်းရှူးကို နက်နက်ရှိုင်းရှိုင်း ချစ်တာပေါ့..."

စနစ် : [အင်း...]

လုမော့ : [သေခြင်းတရားနဲ့ မျက်နှာချင်းဆိုင်ရင်တောင် သူ့အချစ်ကနည်းနည်းမှ ယိမ်းယိုင်မသွားဘူးပေါ့...]

စနစ် စတင်ပြီး ထိတ်ထိတ်ပျာပျာ ဖြစ်လာခဲ့သည်။

[အင်း...]

လုမော့အသံက ကြောက်စရာကောင်းလောက် အောင်နိမ့်ဆင်းသွားသည်

"ဒါဆို သူ ငါ့ကို လုံးဝချစ်မိသွားမှာ မဟုတ်ဘူးမလား..."

စနစ်က သူ့မျက်လုံးများအား စိတ်ပျက်လက်ပျက်ဖြင့်

မှိတ်လိုက်သည်။

[ဟုတ်တယ်...]

လုမော့က စာအုပ်ကိုဘေးဖယ်လိုက်ကာ အသက်ပြင်းပြင်းရှူလိုက်သည်။

"F*** အကောင်းဆုံးပဲ..."

[.....]

စနစ် နားကြားမှားသည်ဟု ထင်လိုက်သည်။

[ဘာပြောတယ်...]

"မဟုတ်ဘူးလား..."

လုမော့ တက်ကြွစွာ ပြောလိုက်သည်။

"စဥ်စားကြည့်...သူချစ်တဲ့သူက ကမ္ဘာပေါ်မှာ အကြင်နာဆုံး၊ အချောမောဆုံးနဲ့ စွမ်းအားအကြီးဆုံး အမျိုးသား...သူက အဲ့အမျိုးသားကို သေတဲ့အထိသစ္စာရှိပေမဲ့ အသုံးမကျတဲ့ယောက်ျားတစ်ယောက်ကို လက်ထပ်ဖို့ ဖိအားပေးခံလိုက်ရတယ်...ဟုတ်တယ် အဲ့ယောက်ကျ်ားက ငါ လုမော့ပဲ..."

စနစ်က လေးလေးနက်နက် စဥ်းစားကြည့်လိုက်သည်။

[မင်းဆိုလိုတာက...]

"သေချာပေါက် သူငါ့ကို မကျေမချမ်းတာထက်ကို ပိုပြီးတော့ ပိုးစိုးပက်စက်ကို မုန်းနေလောက်တယ်...ငါ့ကို သတ်ဖို့စောင့်တောင် မစောင့်နိုင်လောက်ဘူး..."

လုမော့ လက်ကိုယမ်းကာ အံ့သြထိတ်လန့်ဖွယ်ကောင်းသည့် အသံနေအသံထားနှင့် ပြောလိုက်သည်။

"ဘာမှ လျှောက်စဥ်းစားမနေနဲ့တော့...သူ့ကို အဲ့လိုလုပ်ဖို့ တွန်းအားပေးကြတာပေါ့..."

သူ့ဘဝ တစ်လျှောက်တွင် အကြမ်းတမ်းအပြင်းထန်ဆုံး မုန်တိုင်းများကို မြင်ဖူးသော်ငြား လုမော့၏ အရှက်ကင်းမဲ့မှုကြောင့် မလေးစားဘဲ မနေနိုင်ပေ။

စနစ်က စိတ်ရင်းဖြင့် ချီးကျူးလိုက်သည်။

[ငါဦးဆောင်ဖူးခဲ့ဖူးသမျှ ပိုင်ရှင်တွေထဲမှာမှ မင်းရဲ့ယုတ်မာကောက်ကျစ်မှုနဲ့ အရှက်ကင်းမဲ့ချက်က ဒုတိယဆိုရင် ပထမလို့ပြောရဲတဲ့သူ ဘယ်သူမှ မရှိဘူး ..]

လုမော့ အနည်းငယ် ပြုံးလိုက်သည်။

"ကျေးဇူးတင်ပါတယ်...ကျေးဇူးတင်ပါတယ်..."

-----------

လင်းက နူးညံ့သော မွေ့ယာထက်တွင် လှဲလျောင်းနေလျက် ခေါင်းအထက်မှ ပြန်လည်ပြုပြင်ထားသော မျက်နှာကျက်ကို ကြည့်နေသည်။ ဤဂြိုလ်၌ရှိသော ပစ္စည်းပြုပြင်သူများက ကျွမ်းကျင်မှု မရှိကြ၍ ပြုပြင်ထားသည့် မျက်နှာကျက်အပိုင်းက မပြေပြစ်လှပေ။

ဤနေရာ၌ ပေါ်လာသော သူကိုယ်တိုင်ကဲ့သို့ပင် ရုတ်တရက်ဆန်ကာ အဆက်စပ်မရှိချေ။

အိပ်ရာပေါ်ရှိ စျေးကြီးလှသော ဆက်သွယ်ရေးစက်တစ်ခုက မက်ဆေ့ချ်များ ဝင်လာသောကြောင့် အဆက်မပြတ် သတိပေးသံများ ထွက်ပေါ်နေသည်။

[လင်း မင်းဘယ်မှာလဲ...ကိုယ်မင်းကို အရမ်းစိိတ်ပူနေတယ်...]

[ကိုယ်မင်းကို လစ်လျူရှုမိလို့ တောင်းပန်ပါတယ်...ဒါပေမဲ့ ကိုယ်မင်းကို မထားခဲ့နိုင်ဘူး...]

[ကိုယ်အခု မင်းဆီလာနေပြီ...]

လင်းက မက်ဆေ့ချ်များကို အေးစက်သည့် အမူအရာနှင့် ကြည့်လိုက်သည်။

စုန့်ကျန်းရှူး၏ပတ်ပတ်လည်ရှိ အမျိုးသမီးများစွာထဲတွင် သူက အသက်အကြီးဆုံးပင် ဖြစ်သည်။

သူက မည်သို့ ကြင်နာရမည်ကိုမသိဘဲ မာနကြီးလွန်းကာ အခြားအမျိုးသမီးဇာ့ဂ်များနှင့်မတူစွာပင် စုန့်ကျန်းရှူးအား ကျေနပ်နှစ်သိမ့်ရန် သူ့ကိုယ်သူ ဘယ်သောအခါမှ မနှိမ့်ချသည်ကို စုန်းကျန်းရှူးက မကြာခဏ မကျေမနပ် ညည်းညူလေ့ရှိပေသည်။

ပထမတွင် လင်းက အနည်းငယ် စိတ်ထိခိုက်သွားလိမ့်မည်ဖြစ်သော်လည်း နောက်တစ်စက္ကန့်တွင် စုန့်ကျန်းရှူးက တင်းတိမ်ရောင့်ရဲစွာ ပြုံးလိုက်ပြီး နူးနူးညံ့ညံ့ တီးတိုးပြောလိမ့်မည် ဖြစ်သည်။

"ငါ့အပြင် နောက်ထပ် ဘယ်သူကများ မင်းကိုကြိုက်လိမ့်မလဲ..."

ပြန်ပြောင်းတွေးကြည့်လိုက်သည့်အခါ ယခုမှသာလျှင် ထိုအပြုံးတွင် ပါဝင်သည့် မလိုမုန်းထားများကို လင်း သတိပြုခဲ့မိသည်။

လင်းအား စိတ်မချမ်းမြေ့ဖြစ်အောင် ပြုလုပ်ရသည်မှာ စုန့်ကျန်းရှူးအတွက် အပျင်းပြေနေသည့်အလားပင်။

အချိန်ကြာလာသည့်အခါ လင်းက စုန့်ကျန်းရှူး၏ ညည်းညူမှုများကို အသားကျလာကာ နောက်ထပ် အလေးအနက်မထားတော့ချေ။ စုန့်ကျန်းရှူး အခြားအမျိုးသမီးများနှင့် ပရောပရည်လုပ်သောအခါ၌ပင် ကလိန်းဇာ့ဂ်တစ်ကောင်အဖြစ် သဘာဝကို ဆန့်ကျင်ကာ အခြားအမျ်ိုးသမီးများကို သတ်ပစ်လိုသည့် ဆန္ဒများကို ပြင်းပြင်းထန်ထန်ဖိနှိပ်ခဲ့ပေသည်။

အကယ်၍ လွန်ခဲ့သည့်တစ်ရက်က ဖြစ်ခဲ့ပါက ထိုမက်ဆေ့ချ်များကို မြင်ပြီး သူအလွန် ပျော်ရွှင်သွားလိမ့်မည် ဖြစ်သည်။

အဆုံးတွင် စုန့်ကျန်းရှူးမှ သူ့အပေါ် အာရုံစိုက်ဖူးသည်မှာ ယခုက ပထမဆုံးပင် ဖြစ်သည်။

သို့သော် ယခုမူ သူ့နှလုံးသားထဲတွင် မည်သို့သော အတက်အကျ၊ လှုပ်ရှားမှုမှ မရှိသည်ကို လင်းက ရှင်းရှင်းလင်းလင်းပင် သတိပြုမိသည်။ ထိုသူမှာ မရင်းနှီးသော သူစိမ်းအမျိုးသားဇာ့ဂ်တစ်ယောက်အလား စက်ဆုပ်ရွံရှာမှုကိုပင် မခံစားရချေ။

[လင်း မင်းကိုယ်ပို့တာတွေမြင်ရင် ကျေးဇူးပြုပြီး စာပြန်ပေးနိုင်မလား...]

လင်းက ဆက်သွယ်ရေးစက်ကို ခံစားချက်မရှိစွာ ကောက်ယူလိုက်ပြီး လက်ညှိုးနှင့်လက်ခလယ်တွင် အားအနည်းငယ်မျှသာထည့်၍ ဆက်သွယ်ရေးစက်အား ပြင်းပြင်းထန်ထန် ခြေမွပစ်လိုက်သည်။

တစ်စစီ ကွဲကြေသွားသည့်အသံတစ်သံနှင့်အတူ တံခါးဖွင့်သံအား ကြားလိုက်ရသည်။

လင်း မျက်လုံးပင့်ကြည့်လိုက်ရာ တံခါးဝတွင်ပေါ်လာသည့် သွယ်လျလျခန္ဓာကိုယ်နှင့် ကွက်တိကျသည့် ဝတ်ရုံကို ဝတ်ဆင်ထားသော အနက်ရောင်ဆံပင်၊ မြစိမ်းရောင်မျက်လုံးများနှင့် အမျိုးသားကို မြင်လိုက်ရသည်။

အမျိုးသားက အေးစက်စွာ မေးလိုက်သည်။

"မင်း ဘာလုပ်နေတာလဲ..."

"....."

အမျိုးသားအားမြင်လိုက်သည့်အခိုက် ရုတ်တရက် လျှပ်စီးကြောင်းတစ်ခုက တစ်စက္ကန့်၏ တစ်သန်းပုံတစ်ပုံအတွင်းတွင် လင်း၏ခြေဖဝါးမှ တစ်ဆင့် သူ့ခန္ဓာကိုယ်တစ်ခုလုံးကို ဖြတ်ကာ ခေါင်းထိပ်ထိ တက်သွားလေသည်။

သူ့နှလုံးက မည်သည့်အခါကမှ ထိုမျှမြန်နေအောင် မခုန်ခဲ့ဖူးချေ။ သူ့လက်သူကြွယ်မှ တဒုတ်ဒုတ် ခုန်မြည်နေသည့် သွေးကြောကိုပင် ခံစားနိုင်ပြီး သူ့ပါးပြင်များပင် တဟုန်ထိုး ပူပြင်းလာခဲ့သည်။

အမျိုးသား၏ မျက်ဝန်းထောင့်နှင့် မျက်ခုံးထောင့်များက အေးစက်ကာ အထက်စီးဆန်သော်လည်း လင်းက ထိုအမျိုးသားမှာ သည်းမခံနိုင်လောက်အောင်ပင် ဆွဲဆောင်မှုရှိသည်ဟု ခံစားလိုက်ရသည်။

ဇာ့ဂ်များ၏ အလှရသခံစားမှုအရ အမျိုးသား၏မျက်နှာက ဆွဲဆောင်မှုရှိသည်ဟု သတ်မှတ်၍ မရသည်ကို လင်း မငြင်းနိုင်ပေ။ စုန့်ကျန်းရှူး၏ ရှားပါးသည့် အနက်ရောင်နှစ်ခုဖြစ်သည့် အနက်ရောင်ဆံပင်၊ အနက်ရောင်မျက်လုံးများနှင့် နှိုင်းယှဥ်ကြည့်လျှင် အမျိုးသားက အလင်းရောင်အား နောက်ကျောပေးထားလျှင် မြင်ရသည့် ဝိုင်နီရောင်တောက်နေသည့် အနက်ရောင်ဆံပင်ကောက်ကောက်လေးများကိုသာ ပိုင်ဆိုင်ပေသည်။

သူ့မျက်ဝန်းများက လုံလုံလောက်လောက် လုံးဝိုင်းမနေဘဲ ယင်းအစား ကျဥ်းမြောင်းရှည်လျားပြီး ချွန်ထက်နေကာ မျက်ဆံများက မြစိမ်းရောင်ရင့်ရင့်များ ဖြစ်ကြသည်။ ထိုမျက်ဝန်းများက အေးစက်ပြီး စဥ်းလဲသည့် မြွေတစ်ကောင်ကိုပင် အမှတ်ရသွားစေသည်။

သူ့နှာတံကလည်း လုံလုံလောက်လောက် မသေးသွယ်ကာ သူ့ပါးလွှာသော နှုတ်ခမ်းများကလည်း စုန့်ကျန်းရှုးနှင့်မတူပေ။ ထိုနှုတ်ခမ်းလွှာများက ပန်းပွင့်ဖက်များကဲ့သို့ ပန်းနုရောင်သန်းနေကာ နှုတ်ခမ်းလွှာများကို ဖိကပ်လိုက်သည့်အခါတွင် သူ့အား ပို၍ပင် ချဥ်းကပ်ရမလွယ်ကူစေသည့်ပုံ ပေါက်သွားစေပေသည်။

သို့သော် ဤမျက်နှာအား ကြည့်လိုက်လျက် ထိုအမျိုးသားက သူ့အား အလွန်ဆွဲဆောင်နိုင်သည်ကို လင်း မငြင်းနိုင်ချေ။

--------------

သူ့မျက်လုံးများက သူ၏ဝံပုလွေနှင့်တူသော အတွေးများကို ဖော်ထုတ်လိုက်မည်အား စိုးရိမ်ကာ ခေါင်းကို အနည်းငယ် လွှဲဖယ်လိုက်သည်။

တစ်ဖက်လူ၏မျက်နှာမှ အံ့အားသင့်မှုနှင့် ကျီစယ်မှုများကို တွေးဆမိသောအခါတွင် လင်းက ညဘက်၌ ဂြိုလ်ပေါ်မှ ထွက်ပြေးသည်ကပိုကောင်းမည်ဟု ခံစားလိုက်ရသည်။

အရွယ်ရောက် အမျိုးသမီးဇာ့ဂ်တစ်ယောက်၏ သီးသန့်ဆန်မှုနှင့် တည်ငြိမ်သော စရိုက်လက္ခဏာများက ထိုသည်းမခံနိုင်စရာ မြင်ကွင်းမျိုးကို စိတ်ကူးကြည့်ရန် မဖြစ်နိုင်အောင် ပြုလုပ်ပေးနေသည်။

သူ နူးညံ့စွာ တုံ့ပြန်လိုက်သည်။

"ဘာမှမလုပ်ပါဘူး..."

"အိုး...အဲ့လိုလား..."

အမျိုးသားက ခုတင်နားသို့ ခြေသုံးလှမ်း လှမ်းလိုက်ရာ သူတို့နှစ်ဦးကြားမှ အကွာအဝေးက ရုတ်တရက် နီးကပ်သွားသည်။ လင်းက ရုတ်တရက် ထူးထူးကဲကဲ ဖိအားတစ်ခုကို ခံစားလိုက်ရသလို ထင်ရကာ သူ့အတောင်ပံများအား လျင်မြန်စွာဖြန့်၍ အဝေးသို့ ထွက်ပြေးချင်လုနီးပါးပင် ဖြစ်သွားသည်။

သို့သော် အမျိုးသား နောက်ထပ်ပြောလိုက်သည့်စကားက သူ့ခန္ဓာကိုယ်အား ရေခဲဂူထဲသို့ ကျသွားစေသည်။

"မင်းက စုန့်ကျန်းရှူးရဲ့အမျိုးသမီးပဲ...မှန်လား..."

🌌🌌🌌

( Male Zergတွေက အမြီးပါပြီးတော့ Female Zergတွေက အတောင်ပံ ပါကြပါတယ်တဲ့ )

Prev Next