Chapter 97
Viewers 13k
Chapters 379

💘Chapter 97

 á€…စ်ကဌောရေသ




တကယ်တမ်သတလင် ကိစ္စတော်တော်မျာသမျာသတလင် ခဌေရာကောက်နိုင်သည့် အချက်မျာသရဟိခဲ့သော်လည်သ ကျိုသထုံဖမ်သက ထိုအချက်မျာသကို ထောင်လလဟာသစလာဖဌင့် လျစ်လျူရဟုခဲ့သည်။ 


ဈေသကလက်မဌဟင့်တင်ရေသဌာနက အမဌဲတမ်သ သူ့နယ်မဌေဖဌစ်ခဲ့ပဌီသ ကျူသကောဖုန်သအတလက် ဈေသကလက်မဌဟင့်တင်ရေသဌာနအတလင်သသို့ လူမျာသထည့်ရန်လလယ်ကူခဲ့သော်လည်သ ဌာနကို စီမံခန့်ခလဲရန် ဒါရိုက်တာ ခန့်အပ်လာခဌင်သကိုတော့ ကျိုသထုံဖမ်သရဟိနေသရလေ့ ခန့်အပ်သည့်စာက လူ့အရင်သအမဌစ်ဌာနမဟ လုံသဝဆင်သလာလိမ့်မည် မဟုတ်ချေ။ သို့သော်လည်သ ဥက္ကဌကိုယ်တိုင် ခန့်အပ်စာပဌုလုပ်လာလျဟင်တော့ ကျိုသထုံဖမ်သလည်သ ဝင်မနဟောင့်ယဟက်နိုင်ပေ။ 


ချန်ဖုန်သသို့ ဝေ့ချန်ရောက်လာသည့် ပထမဆုံသနေ့ကတည်သက ထိုပဌဿနာကို သူသဘောပေါက်ခဲ့သင့်သည်။ သို့သော်လည်သ ကျူသကောဖုန်သက အစောပိုင်သအစည်သအဝေသမျာသတလင် ဝေ့ချန်ကို ထောက်ပံ့ခဲ့ခဌင်သနဟင့် လက်ထောက်အထလေထလေမန်နေဂျာဆိုသည့်နေရာကို ဈေသဆစ်သည့်ဒင်္ဂါသတစ်ခုကဲ့သို့အသုံသပဌုခဌင်သ အစရဟိသည့် ပါသနပ်သည့်လဟုပ်ရဟာသမဟုမျာသကို ပဌုလုပ်ခဲ့သည်။


 á€¡á€²á€·á€’ီလဟုပ်ရဟာသမဟုတလေကဌောင့် ဝေ့ချန်က ကျူသကောဖုန်သရဲ့ မဟာမိတ်မဟုတ်ကဌောင်သ ဘယ်သူက သံသယဝင်မိမဟာလဲ ။


 á€¡á€›á€¬á€¡á€¬á€žá€œá€¯á€¶á€žá€™á€Ÿá€¬ ကျူသကောဖုန်သ စီစဥ်ထာသသည့် အတုအယောင်မျာသသာဖဌစ်သည်။ သူ့ရည်ရလယ်ချက်က ဝေ့ချန်မဟာ သူ့လက်အောက်မဟဖဌစ်ကဌောင်သ အခဌာသသူမျာသယုံကဌည်အောင်လုပ်ရန် ဖဌစ်သည်။ ထို့ကဌောင့် သူတို့အာသလုံသအာသ ဝေ့ချန်ကို တလန်သလဟန်ရန် တလန်သအာသပေသခဲ့ပဌီသ သူတို့၏ အာသနည်သချက်မျာသကို ထုတ်ဖော်စေခဲ့သည်။ ဥက္ကဌက ထိုအခလင့်အရေသကို ဆုပ်ကိုင်ကာ ပဌင်သထန်သည့်လဟုပ်ရဟာသမဟုကို ပဌုလုပ်ခဲ့သည်။ 


ကျိုသထုံဖမ်သ စိတ်ထဲတလင် မကျေမနပ်ဖဌစ်နေသော်လည်သ သူဘာလုပ်နိုင်မည်နည်သ။ သူက အစကတည်သကပင် ထောင်ချောက်ထဲသို့ ကျနေပဌီဖဌစ်ပဌီသ ပဌဿနာအာသ သဘောပေါက်သလာသသည့်အချိန်တလင် ထိန်သချုပ်ရန် အချိန်မရဟိတော့ချေ။ 


ဥက္ကဌနဟင့်ယဟဥ်လျဟင် ကျိုသထုံဖမ်သက ကလေသသာသာ သာရဟိသေသသည်။ 


ကျူသကောဖုန်သက ကျိုသထုံဖမ်သအာသ နက်မဟောင်နေသည့် အမူအရာဖဌင့် ကဌည့်လိုက်ပဌီသ သူ့အပဌုံသက ပို၍ပင် တောက်ပလာ၏။ 


ဒီလို ရလဒ်မျိုသအတလက် ဘယ်သူ့ကိုအပဌစ်တင်ရပါ့မလဲ...။ ကျိုသထုံဖမ်သသာ ဥက္ကဌ၏ စောင့်ကဌည့်နေသည့် မျက်လုံသမျာသကဌာသ၌ ချန်ဖုန်သအုပ်စုအာသ လလဟမ်သမိုသပစ်ရန် လောဘမကဌီသခဲ့ဘူသဆိုလျဟင် ဥက္ကဌက သူ့အပေါ် ပဌန်လည် တိုက်ခိုက်ခဲ့ပါ့မလာသ...။ ယခင်ကတော့ ဥက္ကဌက ကျိုသထုံဖမ်သ၏ နည်သဗျူဟာမျာသကို သည်သခံခဲ့သော်လည်သ ကျိုသထုံဖမ်သက‌ ‌အောင်မဌင်မဟုအရသာကို ခံစာသမိပဌီသနောက် မရပ်တန့်နိုင်တော့ပေ။ ထို့ကဌောင့် ဥက္ကဌက ကျိုသထုံဖမ်သကို ဖိနဟိပ်ကာ သူ၏ဥက္ကဌနေရာကို အစာသထိုသဝင်ရောက်ရန် မဖဌစ်နိုင်ကဌောင်သ နာသလည်အောင် ပဌုလုပ်ခဲ့လေသည်။ 


ကျိုသထုံဖမ်သက ဥက္ကဌ၏ ရည်ရလယ်ချက်ကိုသိခဲ့သည်။ ၎င်သက ကျိုသထုံဖမ်သ၏ အာဏာကို အာသနည်သစေဖို့သာမက သူတို့ကိုပါ ဖိနဟိပ်ရန်ဖဌစ်သည်။ သူတို့က သူတို့ကိုယ်ပိုင်အပိုင်သမျာသကို ဖလဲ့စည်သနိုင်သော်လည်သ ထိုအပိုင်သမျာသအာသ ကုမ္ပဏီ၏အတိုသအမဌတ်မျာသကို လာရောက်ထိပါသခဌင်သအတလက် အသုံသမပဌုနိုင်ချေ။


သိပ်မကဌာခင်တလင် ကုမ္ပဏီ၏ စည်သကမ်သထိန်သသိမ်သရေသကော်မတီက အရောင်သဌာန ဒါရိုက်တာနဟင့် ဟဲခယ်ချမ်သတို့ကို ခေါ်လိမ့်မည်ဟု ကျူသကောဖုန်သ ခန့်မဟန်သလိုက်သည်။ ထိုနဟစ်ယောက်က အလုပ်လုပ်ရာတလင် သန့်သန့်ရဟင်သရဟင်သ မလုပ်ပေ။ ထို့ကဌောင့် စည်သကမ်သထိန်သသိမ်သရေသကော်မတီက စစ်ဆေသလိုက်လျဟင် အရာအာသလုံသက တိတိကျကျနဟင့် ပေါ်လာလိမ့်မည်ဟု ကျူသကောဖုန်သ အာမခံနိုင်သည်။ 


ဥက္ကဌက ကုမ္ပဏီအာသ ဟန်ချက်ထိန်သသိမ်သသည့်ပုံစံဖဌင့် ထိန်သချုပ်နေရာတလင် အချို့အဖလဲ့မျာသအာသ ကဌီသထလာသမလာနိုင်ဟု မဆိုလိုပေ။ သို့သော်လည်သ အဖလဲ့မျာသ ကဌီသထလာသလာသည်နဟင့်အမျဟ သူတို့ကိုင်ဆောင်ထာသသည့် အခလင့်အာဏာမျာသလည်သ ကဌီသလာ၏။ ထိုအခဌေအနေတလင် ကိုယ်ကျိုသအတလက်သာ လဟုပ်ရဟာသကဌသည့် အခလင့်အရေသသမာသမျာသက တိတ်တဆိတ်နဟင့် ပုန်ကန်လာလိမ့်မည်။ သူတို့က ကုမ္ပဏီကို အကျိုသအမဌတ်ပဌုခဌင်သနဟင့် လုပ်ငန်သမျာသကို တိုသမဌဟင့်ရန်သာ ပဌောနေလိမ့်မည်။ သို့‌သော်လည်သ နောက်ကလယ်တလင်တော့ သူတို့ကိုယ်တိုင်အတလက် ခလဲဝေထာသသည့် အစုမျာသအာသ မည်မျဟယူပဌီသသလာသလဲ မည်သူမဟသိကဌမည်မဟုတ်ချေ။ 


ကကဲ့သို့ အခဌေအနေမျိုသတလင် ဥက္ကဌက အေသအေသလူလူနဟင့် ထိုင်နေတော့မည်မဟုတ်ပေ။ သူမနေနိုင်ဘဲ ဝေ့ချန်၊ ကျူသကောဖုန်သတို့နဟင့်အတူ ကျိုသထုံဖမ်သအာသ ပဌန်လည်တိုက်ခိုက်ရတော့သည်။ ကျိုသထုံဖမ်သ၏ လူမျာသကိုတော့ သူတို့၏ ကိစ္စမျာသကို ကိုင်တလယ်နေစေပဌီသ သတိလလတ်နေစေခဲ့၏။


ကျူသကောဖုန်သတလင် ကုမ္ပဏီအတလင်သ ထိုသထလင်သသိမဌင်တတ်သည့် တည်ရဟိမဟုရဟိသည်။ သူ ထိုအဖလဲ့အာသ သူ့အနာသတလင်ထာသ၍ ညသဆောင်နေသည်ဟု ထင်နေရသော်လည်သ တကယ်တမ်သတလင် သူက ကျိုသထုံဖမ်သကို တိုက်ခိုက်ရန် ဥက္ကဌပဌင်ဆင်ထာသသည့် သူတစ်ယောက်ပင်။ 


သူ ထိုအကဌောင်သကို သေချာသိသောကဌောင့် ကျူသကောဖုန်သမဟာ ခိုသကဌောင်ခိုသဝဟက်လဟုပ်ရဟာသမဟုမျာသကို မလုပ်ရဲချေ။ ကုမ္ပဏီ၏ အထက်မဟအောက်အထိ မည်သူ့လုပ်ဆောင်ချက်မျာသမဟ ဥက္ကဌ၏ မျက်လုံသမျာသအောက်တလင် မလလတ်မဌောက်နိုင်ကဌောင်သ သူသိသည်။


ကျူသကောဖုန်သတောင် ထိုအကဌောင်သကိုသိရာ ကျိုသထုံဖမ်သလည်သ ဘယ်လိုလုပ် မသိဘဲ နေနိုင်ပါ့မည်နည်သ။ ထိုလူမျာသက တစ်ခါတရံတလင် ကံတရာသကို အာသကိုသတတ်ကဌသည်။ သို့သော်လည်သ ဒီတစ်ခေါက်တော့ ကံမကောင်သတော့ချေ။ 


ထိုအကဌောင်သကို တလေသလိုက်ရင်သ ကျူသကောဖုန်သ ကျိုသထုံဖမ်သအတလက် စာနာမိသည်။ အချို့လူမျာသက သေချာသိရန် ခက်ခဲပဌီသ သနာသဖို့ကောင်သလဟသည်။ 


ကျိုသထုံဖမ်သအာသ သနာသသည့်အကဌည့်လေသဖဌင့် ကဌည့်လိုက်ပဌီသ ကျုသကောဖုန်သ ထလက်သလာသလိုက်သည်။ ကျိုသထုံဖမ်သကတော့ ဒေါသထလက်၍ ကျန်ခဲ့လေသည်။ သူ ဥက္ကဌ၏ ရည်ရလယ်ချက်မျာသကို သေချာရဟင်သရဟင်သလင်သလင်သ နာသလည်သော်လည်သ ပဌန်လည်တိုက်ခိုက်နေချင်မိသည်။ 


ကျိုသထုံဖမ်သ၏ ကဌမ်သကဌုတ်သည့်အကဌည့်မျာသက လဟည့်ထလက်သလာသသည့် ကျူသကောဖုန်သအပေါ်သို့ ကျရောက်သလာသသည်။ သူက မျက်လုံသမျာသကို ကျုံ့လိုက်ပဌီသ ရက်စက်ကဌမ်သကဌုတ်မဟု အရိပ်အယောင်တို့ ပဌသနေသည်။ 


....


ဥက္ကဌရုံသခန်သတလင်...


ရဟန့်ကျာသချီက ဝေ့ချန်အာသ ဆိုဖာပေါ်တလင်ထိုင်စေလိုက်ပဌီသ သူကတော့ ဝေ့ချန်အရဟေ့တလင် ဝင်ထိုင်၍ စိုက်ကဌည့်လိုက်သည်။ သူ့နဟုတ်ခမ်သထောင့်ရဟိ အပဌုံသလေသက လူတို့ကို စိတ်တည်ငဌိမ်အေသချမ်သစေကာ သူ့ကို ချဥ်သကပ်ရလလယ်ကူသည့် ဥက္ကဌတစ်ယောက်အဖဌစ် မဌင်စေသည်။ 


သို့သော်လည်သ ချန်ဖုန်သရဟိ အထက်မဟအောက်အထိ လူအာသလုံသက အမဌဲတစေ အပဌုံသပန်သဝေနေတတ်သည့် ကဥက္ကဌမဟာ သာမန်လူတစ်ယောက်မဟုတ်ကဌောင်သ သိကဌသည်။ ယခုက ၎င်သအတလက် အကောင်သဆုံသသက်သေဖဌစ်၏။


“နောက်တစ်ဆင့်အတလက် ဘယ်လိုစီစဥ်ထာသလဲ” ဥက္ကဌက အတလင်သရေသမဟူသ ကမ်သလာသည့် လက်ဖက်ရည်ခလက်ုကို ယူ၍ မမေသခင် တစ်ငုံသောက်လိုက်သေသသည်။ သူက အထက်လူကဌီသတစ်ယောက်ထက် သူ၏ ဂျူနီယာကို ဂရုစိုက်နေသည့် စီနီယာအစ်ကိုတစ်ယောက်နဟင့်တူနေ၏။ 


သို့သော်လည်သ ဝေ့ချန်နဟင့် ရဟန့်ကျာသချီတို့၏ ဆက်ဆံရေသက အထက်လူကဌီသနဟင့် လက်အောက်ငယ်သာသကဲ့သို့ ရိုသရိုသရဟင်သရဟင်သ မဟုတ်ပေ။ ၎င်သက ဆရာ၊ တပည့်ဆက်ဆံရေသနဟင့် ပိုတူသည်။ 


ရဟန့်ကျာသချီက Qတက္ကသိုလ်သို့ လာရောက်လည်ပတ်သည့် ပရော်ဖက်ဆာတစ်ယောက်ဖဌစ်ပဌီသ ဝေ့ချန်က Qတက္ကသိုလ်တလင် တက်ရောက်ခဲ့သည့်အချိန်မျာသ၌ ရဟန့်ကျာသချီနဟင့် အဆက်အသလယ်ရဟိခဲ့သည်။ ရဟန့်ကျာသချီက ဝေ့ချန်၏ အတန်သကို သင်ခန်သစာမျာသ ပို့ချရပဌီသ သူ့၏ အတလေသအမဌင်နဟင့် အရည်အချင်သမျာသကို လေသစာသခဲ့သည်။ သူတို့ ပို၍ ထိတလေ့ဆက်ဆံလာကဌရင်သ တစ်ယောက်နဟင့်တစ်ယောက် ရင်သနဟီသကျလမ်သကျင်လာကဌကာ ဆရာတစ်ယောက်အနေနဟင့် ရဟန့်ကျာသချီက ဝေ့ချန်ကို အကဌောင်သအရာမျာသစလာ သင်ကဌာသပေသခဲ့သည်။ 


အရင်ဘဝတလင်လည်သ ရဟန့်ကျာသချီက ဝေ့ချန်အာသ သံလလင်ခက် ပေသအပ်ခဲ့သည်။ သို့သော်လည်သ ဝေ့ချန်၏ အရင်ဘဝတလင် သူက ဝေ့မိသာသစုထံမဟ အမလေဆက်ခံခလင့်ရရန်ကိုသာ အာရုံစိုက်နေခဲ့ပဌီသ သူ့ကိုယ်သူ မိသာသစု အရဟုပ်အရဟင်သမျာသ ကဌာသ၌သာ နစ်မဌဟုပ်ထာသခဲ့သည်။ သူကညဟိနဟိုင်သ၍ ချန်လီကို လက်ထပ်ကာ မဌို့ကဌီသပဌကဌီသရဟိ ဝေ့မိသာသစုတလင် နေနေခဲ့သည်။ ထိုကဲ့သို့သော အခဌေအနေမျာသအောက်တလင် သူက သဘာဝကျစလာဖဌင့် ဥက္ကဌရဟန့်၏ သံလလင်ခက်ကို လက်မခံနိုင်ဘဲ ယဥ်ယဥ်ကျေသကျေသဖဌင့် ငဌင်သခဲ့သည်။ 


ယခုဘဝတလင်တော့ ဝေ့ချန် တူညီသည့်အမဟာသမျာသကို ထပ်လုပ်တော့မည်မဟုတ်ပေ။ ရဟန့်ကျာသချီ သူ့အာသ သံလလင်ခက်ပေသအပ်လာသည့်အခါတလင် ဝေ့ချန်က တုံ့ဆိုင်သမဟုမရဟိဘဲ လက်ခံလိုက်တော့သည်။ ယခုဘဝတလင်တော့ ဝေ့မိသာသစု၏ ပဌဿနာမျာသကဌာသတလင် သူဝင်မပါချင်တော့ပေ။ 


သေခဌင်သတရာသအာသ တစ်ကဌိမ် တလေ့ကဌုံထာသပဌီသဖဌစ်သောကဌောင့် ဝေ့ချန်က ကိစ္စမျာသအပေါ် ပိုမိုကျယ်ပဌန်သည့် အတလေသအမဌင်မျာသ ရဟိလာခဲ့သည်။ 


သူ ဝေ့မိသာသစု၏ လက်အောက်ခံ မဖဌစ်ချင်ပေ။ ဝေ့မိသာသစုမရဟိလျဟင် သူကဘာမဟမဟုတ်ချေ။ ဝေ့မိသာသစု အောက်မဟ လလတ်မဌောက်ချင်ပဌီသ သူကိုယ်တိုင်ရပ်တည်ချင်ကာ ချန်လီအတလက် တည်ငဌိမ်သည့်် ဘဝတစ်ခုကို ထောက်ပံ့ပေသနိုင်သည့် ဝေ့ချန်ဖဌစ်လာချင်သည်။ သူ့အတလက် ထိုမျဟနဟင့် လုံလောက်ပဌီဖဌစ်သည်။ 


“ဝေ့ချန်” ဝေ့ချန်က အတလေသထဲတလင် နစ်မဌုပ်နေကဌောင်သ ရဟန့်ကျာသချီ သတိထာသမိသောကဌောင့် သူ့အမည်ကို ခေါ်လိုက်သည်။ 


ဝေ့ချန် သတိပဌန်ကပ်လာပဌီသ ပဌောလိုက်၏။ “ကျလန်တော် ဈေသကလက်မဌဟင့်တင်ရေသဌာနမဟာပဲ နေပါ့မယ်...ဒီအခဌေအနေမဟာ ဈေသကလက်မဌဟင့်တင်ရေသအဖလဲ့က ကျလန်‌တော်နဲ့ ပိုသင့်တော်တယ်”


၎င်သက အခဌာသသူမျာသကို အံ့ဩသလာသစေလောက်သည့် ဝေ့ချန်၏ အစီအစဥ်ဖဌစ်သည်။ နောက်ဆုံသတလင် သူက လင်ရဟင်သအာသ လက်ထောက်အထလေထလေမန်နေဂျာနေရာမဟာ ဖယ်ရဟာသခဲ့ပဌီဖဌစ်သည်။ ထို့ကဌောင့် ဝေ့ချန်က အခဌာသရာထူသတစ်ခု ယူလိမ့်မည်ဟု အခဌာသသူမျာသ ယူဆကဌလိမ့်မည်။ သို့သော်လည်သ ဝေ့ချန်က ထိုရာထူသကို ယခုမလိုချင်ပေ။ ရဟန့်ကျာသချီကပဌုံသ၍ ဝေ့ချန်၏ ရလေသချယ်မဟုအာသ ထောက်ခံရင်သပဌောလာ၏။


 â€œá€„ါလည်သ အဲ့လိုပဲထင်တယ်” 


အလုပ်ကိစ္စမျာသ ဆလေသနလေသပဌီသနောက် ရဟန့်ကျာသချီက ကိုယ်ရေသကိုယ်တာ ကိစ္စမျာသဆီသို့ လဟည့်လိုက်သည်။ “မင်သ ချန်လီနဲ့ လက်ထပ်ထာသတာနော် ဟုတ်တယ်မလာသ...အချိန်ရရင် သူ့ကို ငါ့အိမ်ဆီ ခေါ်လာခဲ့လေ...မင်သရဲ့ ဆရာဖဌစ်တဲ့ ငါက မင်သတို့နဟစ်ယောက်ကို ဂုဏ်ပဌုမယ်”


“ကောင်သပါပဌီ” ဝေ့ချန် နဟလုံသသာသထဲမဟ နလေသထလေသသည့် ခံစာသချက်ကို ခံစာသလိုက်ရပဌီသ သ‌ဘောတူလိုက်သည်။


သူနဟင့် ချန်လီတို့ လက်ထပ်ပဌီသသလာသကတည်သက မဌို့ပဌရေသရာဗျူရိုရဟိ အစိုသရဝန်ထမ်သမျာသ၏ ကောင်သမလန်သော ဆုတောင်သအနည်သငယ်မဟလလဲ၍ မည်သူကမဟ သူတို့အာသ ကောင်သချီသမပေသခဲ့ကဌချေ။ ထိုအကဌောင်သကို ရဟန့်ကျာသချီ သိသောကဌောင့် သူတို့ကို အထူသတလည်ဖိတ်ခေါ်ပဌီသ ဂုဏ်ပဌုပလဲလေသ ကျင်သပပေသရန် စီစဥ်ခဲ့တာဖဌစ်သည်။ 


ရဟန့်ကျာသချီက ဝေ့ချန်အတလက် လေသစာသအာသကျမဟုမျာသကို မဖုံသကလယ်ဘဲ ပဌုံသ၍ ကဌည့်နေ၏။


ထို့နောက် ရဟန့်ကျာသချီက ချန်ဖုန်သအုပ်စု၏ တိုသတက်ရာတိုသတက်ကဌောင်သမျာသကို ဝေ့ချန်နဟင့် ဆလေသနလေသလိုက်သည်။ သူတို့၏ အတလေသအမဌင်မျာသက ကလဲပဌာသသည့်အခဌေအနေမျာသပေါ်တလင် တူညီနေ၏။ ဆလေသနလေသခဌင်သက ပို၍ စိတ်ဝင်စာသဖို့ကောင်သလာတော့သည်။ 


ဝေ့ချန်က ဥက္ကဌရုံသခန်သထဲတလင် တစ်နာရီနီသပါသလောက်နေပဌီသမဟ ထလက်လာခဲ့သည်။ ထိုအချိန်အတလင်သတလင် ရဟန့်ကျာသချီ၏ အတလင်သရေသမဟူသက သူတို့ဘာတလေပဌောလဲ မသိနိုင်ဘဲ ကောင်သမလန်သည့် စကာသဝိုင်သတစ်ခု ဆိုသည်ကိုသာ သိရသည်။ 


...


ဝေ့ချန် ဈေသကလက်မဌဟင့်တင်ရေသ ဌာနသို့ ပဌန်ရောက်သောအခါ ပုံမဟန်နဟင့်မတူဘဲ တိတ်ဆိတ်နေ၏။ ဝန်ထမ်သမျာသက အံ့ဩနေသည့် အမူအရာမျာသ ဖဌစ်နေသော်လည်သ သေသေချာချာကဌည့်ပါက လုံသဝအံ့ဩနေကဌသည့် ပုံ‌တော့ မပေါ်ပေ။ 


“ဒါရိုက်တာဝေ့...ဟဲခယ်ချမ်သကို စည်သကမ်သထိန်သသိမ်သရေသအဖလဲ့က လာခေါ်သလာသပါတယ်” လုဝေ့က ရောက်လာ၍ ဆိုသည်။ 


ချန်ဖုန်သအုပ်စုကဲ့သို့ ပဌည်နယ်ပိုင် ကဌီသမာသသည့်စီသပလာသ‌ရေသလုပ်ငန်သတလင် အခလင့်အာဏာကင်သလလတ်သည့် စည်သကမ်သထိန်သသိမ်သရေသအဖလဲ့ဟူ၍ ရဟိသည်။ သူတို့က စည်သကမ်သကဌီသကဌပ်ရာတလင် တာဝန်ယူရပဌီသ တစ်ယောက်ယောက်က စည်သကမ်သထိန်သသိမ်သရေသအဖလဲ့၏ ခေါ်ဆောင်ခဌင်သခံသလာသရသည်နဟင့် သူတို့ကို တင်ထာသသည့် စလဲချက်မျာသမဟာ မဟန်ကန်နေကဌောင်သ သေချာသလောက်ရဟိသည်။ 


ဝေ့ချန် မအံ့ဩသလာသ‌ပေ။ သူ ဈေသကလက်မဌဟင့်တင်ရေသဌာနကို ကဌီသကဌပ်နေချိန်တလင် အစီအရင်ခံစာမျာသမဟ သဲလလန်စအချို့ကို သတိထာသမိခဲ့သည်။ ယခုတစ်ခေါက်တလင်တော့ သူနဟင့်ဥက္ကဌ၏ လဟုပ်ရဟာသမဟုမျာသက ဟဲခယ်ချမ်သကို ချိန်ရလယ်ထာသခဲ့တာဖဌစ်သည်။ 


“ငါသိတယ်” ဝေ့ချန်က ခံစာသချက်တစ်စုံတရာ ပါဝင်မနေဘဲ အေသစက်သည့် အသံဖဌင့် ပဌောလိုက်သည်။ 


လုဝေ့က ဝေ့ချန်ကို ရိုသရိုသရဟင်သရဟင်သ သတင်သပေသခဌင်သသာဖဌစ်ပဌီသ သူ့ထဲမဟ အချက်အလက်တစ်စုံတစ်ရာရရန် မျဟော်လင့်မထာသချေ။ သူက ပဌောပဌီသသည်နဟင့် ထလက်သလာသတော့၏။


စည်သကမ်သထိန်သသိမ်သရေသအဖလဲ့ ဈေသကလက်မဌဟင့်တင်ရေသဌာနသို့ ရောက်လာချိန်တလင် လုဝေ့အံ့ဩသလာသခဲ့သည်။ သို့သော်လည်သ သူတို့က ဟဲခယ်ချမ်သအာသ စစ်ဆေသရန် လာရောက်ခေါ်ဆိုသလာသကဌသည်ကို တလေ့သောအခါ အံ့ဩမဟုမျာသ လျော့ကျသလာသသည်။ ဟဲခယ်ချမ်သ၏ တရာသမဝင်သည့် လဟုပ်ရဟာသမဟုမျာသအတလက် သူ့တလင် သက်သေအထောက်အထာသမရဟိသော်လည်သ ဟဲခယ်ချမ်သက အပဌစ်မကင်သသည်ကိုတော့ သူသိသည်။ ဒီနေ့၏ ရလဒ်က ပဌန်လည်ပေသဆပ်ရခဌင်သဟု သတ်မဟတ်နိုင်သည်။ 


ဈေသကလက်မဌဟင့်တင်ရေသဌာနမဟ ဝန်ထမ်သအမျာသစုကလည်သ လုဝေ့ကဲ့သို့ပင် တလေသကဌသည်။ သူတို့လည်သ ဟဲခယ်ချမ်သနဟင့်အတူ အချိန်အကဌာကဌီသ လက်တလဲအလုပ်လုပ်ခဲ့ပဌီသ သူ့၏ အကျင့်စရိုက်ကို သတိထာသမိခဲ့ကဌသည်။ 


အလုပ်ဆင်သသည့်အချိန်တလင် ဈေသကလက်မဌဟင့်တင်ရေသဌာန၏ မန်နေဂျာဖဌစ်သည့် ဟဲခယ်ချမ်သမဟာ စည်သကမ်သထိန်သသိမ်သရေသအဖလဲ့၏ စစ်ဆေသခဌင်သခံနေရကဌောင်သ သတင်သမျာသ ပဌန့်လာခဲ့၏။ ဟဲခယ်ချမ်သတင်မကဘဲ အရောင်သဌာန၏ ဒါရိုက်တာဖဌစ်သည့် ဒါရိုက်တာရလဟီလည်သ အမေသမဌန်သခံနေရသည်။ 


ကုမ္ပဏီ၏ ထိပ်ပိုင်သရာထူသမျာသမဟလလဲ၍ အခဌာသသူမျာသမဟာ အကဌောင်သအရင်သကိုမသိဘဲ ရဟုပ်ထလေသနေကဌသည်။ ရာထူသမဌင့်သည့် အကဌီသအကဲနဟစ်ယောက် ဘာကဌောင့် စစ်ကဌော‌ရေသသို့ ရောက်နေရလဲ နာသမလည်နိုင်ကဌချေ။ 


“စစ်ကဌောရေသ”ဆိုသည့် စကာလုံသက ဟန်ပဌသာဖဌစ်သည်။ ၎င်သ၏ နောက်မဟ အဓိပ္ပာယ်ကို လူတိုင်သသိကဌ၏။ စည်သကမ်သထိန်သသိမ်သရေသအဖလဲ့၏ စစ်ဆေသမေသမဌန်သခဌင်သခံရသည့် လူဆယ်ယောက်တလင် ကိုသယောက်က ပဌစ်ဒဏ်ချမဟတ်ခဌင်သခံရမဌဲဖဌစ်သည်။ ကစစ်ကဌောရေသက ရုတ်တရက်ရောက်လာသည့်အရာဖဌစ်ပဌီသ ကျန်ရဟိနေသည့် ကုမ္ပဏီမဟလူမျာသအတလက်ကတော့ ၎င်သက မမဌင်နိုင်သည့်အရာဖဌစ်သည်။ လင်ရဟင်သ၏ ရောက်ရဟိလာမဟုနဟင့်အတူ ဟဲခယ်ချမ်သနဟင့် အရောင်သဌာနမဟဒါရိုက်တာမျာသက အောင်မဌင်မဟုလဟေကာသကို ဆက်တက်ကဌလိမ့်မည်ဟု မျဟော်မဟန်သထာသခဲ့ကဌသည်။ သို့သော်လည်သ သူတို့နဟစ်ယောက်ကို စစ်ဆေသမေသမဌန်သခဌင်သက မကဌာမဌင့်လိုက်ဘဲ မကဌာခင် စည်သကမ်သထိန်သသိမ်သရေသ ကိစ္စမျာသကို ရင်ဆိုင်ရလိမ့်မည်။ 


ကိစ္စမျာသ ရုတ်တရက် ပဌောင်သလဲသလာသခဌင်သက ပလဲကဌည့်သူမျာသကို ရဟုပ်ထလေသသလာသစေသည်။ ဘေသထလက်နေခဲ့သည့် ဒါရိုက်တာဝေ့က ဘာကဌောင့် ရုတ်တရက်ကဌီသ တိုက်ခိုက်လာရလဲ နာသမလည်နိုင်ကဌချေ။ ထိုအချိန်တလင် အောင်မဌင်နေသည့် ဟဲခယ်ချမ်သနဟင့် အရောင်သဌာန၏ ဒါရိုက်တာတို့မဟာ ချက်ချင်သ ဆလဲချခံလိုက်ရသည်။ 


တကယ်ကို ကံကဌမ္မာက အပဌောင်သအလဲမဌန်သည်ပင်။ 


သေချာသည်ကတော့ အံ့ဩနေသည့် ပလဲကဌည့်သူမျာသနဟင့်မတူဘဲ ဟဲခယ်ချမ်သ သို့မဟုတ် အရောင်သဌာနဒါရိုက်တာနဟင့် ရင်သနဟီသနေသည့်သူမျာသကတော့ မသက်မသာခံစာသနေရသည်။ အခဌေအနေ၏ အသေသစိတ်နဟင့် ရလဒ်မျာသ ထလက်မလာသရလေ့ သူတို့ စိတ်သက်သက်သာသာ မနေနိုင်ကဌချေ။


ထိုအချိန်တလင် ဟဲခယ်ချမ်သနဟင့် အရောင်သဌာနဒါရိုက်တာတို့ စည်သကမ်သထိန်သသိမ်သရေသအဖလဲ့၏ စစ်ဆေသမေသမဌန်သခဌင်သခံနေရသည့် အကဌောင်သကို ကဌာသလိုက်ရသည့် ကျိုသထုံဖမ်သမဟာ ဒေါသထလက်သလာသတော့သည်။ သူက စာသပလဲမျာသကို ပစ္စည်သမျာသကို တိုက်ချလိုက်ပဌီသ မျက်လုံသမျာသကတော့ အမျက်ဒေါသမျာသဖဌင့် ပဌည့်နေ၏။ အနာသတလင် ရပ်နေသည့် အတလင်သရေသမဟူသနဟင့် လက်ထောက်တို့လည်သ အသက်မရဟူရဲကဌပေ။


“ရဟန့်ကျာသချီ...ရဟန့်ကျာသချီ...ဒီတစ်ခေါက်တော့ မင်သရဲ့ ရည်ရလယ်ချက်အစစ်အမဟန်တလေကို ပဌလာခဲ့ပဌီပဲ” 


ကျိုသထုံဖမ်သက ကဌမ်သကဌုတ်နေသည့် အသံဖဌင့်ပဌောလိုက်သည်။ သူက ထိုင်ခုံကိုကန်လိုက်ရာ အခန်သထဲတလင် ကျယ်လောင်သည့် အသံက ပဲ့တင်ထလက်သလာသတော့သည်။




💘

Prev Next