MM Story Teller

Chapter 114

Viewers 18k

💘Chapter 114

အမှန်တရားပေါ်ထွက်လာ

ညက ပို၍မှောင်လာပြီး ခါးသက်သက်လေအေးက ညတစ်ခွင်လုံး တဝီးဝီး မြည်နေသည်။သစ်ရွက်များပြောင်ရှင်းကာ ကတုံးဖြစ်နေသော သစ်ကိုင်းသစ်ခက်များသည် အေးစက်သောလေထဲတွင် ရုန်းကန်နေရသဖြင့် နှင်းများမြေပြင်ပေါ်သို့ ကျလာပြီး အောက်ရှိနှင်းများနှင့်ရောကာ လမ်းသွားလမ်းလာများ၏ ခြေရာများကို ဖုံးကွယ်လိုက်လေသည်။

သန်းခေါင်ယံအချိန်၌ နှင်းများနှင့် လေများ ငြိမ်သက်သွားကာ ကမ္ဘာကြီးတစ်ခုလုံး တိတ်ဆိတ်ငြိမ်သက်သွားခဲ့သည်။ သစ်ကိုင်းသစ်ခက်များက သူတို့၏ရုန်းကန်မှုကို ရပ်တန့်လိုက်ပြီး လရောင်က ထွက်ပေါ်လာကာ ငွေဖြူရောင်အဆင်းဖြင့် ကမ္ဘာကြီးကို လွှမ်းခြုံပစ်လိုက်သည်။ မိုးလေဝသခန့်မှန်းချက်က မနက်ဖြန်အတွက် အရိုးခိုက်အောင်အေးသောအအေးဒဏ်ကို ပြေပျောက်စေမည့် ဆောင်းနေသာမည့် ကောင်းသောနေ့ဖြစ်မည်ဟု ခန့်မှန်းထားသည်။

အိမ်များစွာရှိ မီးများ မှိတ်သွားချိန်တွင် ဝေ့ချန်၏အိမ်၏ဧည့်ခန်းက တောက်ပစွာလင်းလျက်ရှိနေခဲ့သည်။

ချန်လီက အိပ်ခန်းထဲတွင် နှစ်နှစ်ခြိုက်ခြိုက် အိပ်ပျော်နေပြီဖြစ်ပြီး ဝေ့ချန်က နားကြပ်တပ်ကာ ဖုန်းပြောမှတ်တမ်းများကို အသေအချာ စစ်ထုတ်နေသည်။အရေးကြီးသော အထောက်အထားများပါရှိသော အသံဖိုင်များကို သူ၏ကွန်ပြူတာထဲသို့ လွှဲပြောင်းပေးပြီး တစ်ခုချင်းစီကို အစမှအဆုံး တစ်ခုချင်း ဂရုတစိုက်နှင့် မမောမပန်း နားထောင်ကာ ဘာအသေးစိတ်အချက်အလက်များကိုမှ မလွတ်စေခဲ့ပေ။

လုရှို့ရန်သည် ဟက်ကာတစ်ယောက်က သူ အသံသွင်းထားသော ဖုန်းပြောဆိုမှုမှတ်တမ်းများကို ဖော်ထုတ်နိုင်လိမ့်မည်ဟု ဘယ်တုန်းကမှ မမျှော်လင့်ထားခဲ့ခြင်းမျိုးဖြစ်နိုင်သည်။အရှေ့တောင်ဘက်ပြည်နယ်က လူနှင့် စကားပြောသည့်အခါမှာလည်း သူက သူ့ကိုယ်ပိုင်ဖုန်းကိုပဲ သုံးခဲ့သည်။

ဝေ့ချန်က ခေတ္တတန့်သွားပြီးနောက်တွင် အရေးကြီးသောအထောက်အထားကို သူရှာတွေ့သွားပြီဖြစ်သည်။ယင်းက ချန်လီကို ပစ်မှတ်ထား ကြံစည်မှုတစ်ခုဖြစ်ပြီး ချန်လီ၏ ပန်းချီကားများကို ကူးချ၍ ချန်လီ၏ ပန်းချီကားများကို ချန်လီရှေ့မှောက်တွင် တင်သွင်းကာ ချန်လီအား ပြောစရာစကားမဲ့ကာ သူ၏ နစ်နာမှုကို မဖော်ပြနိုင်ဖြစ်စေခဲ့သည်။

ဤပူးပေါင်းကြံစည်မှု၏ စိတ်ကူးရင်းနှင့် အကောင်အထည်ခြင်း လုပ်ငန်းစဉ်တစ်ခုလုံး လုရှို့ရန်၏ အသံသွင်းထားသော ဖုန်းပြောဆိုမှုမှတ်တမ်းများတွင် ပါဝင်ပြီး အသေးစိတ်အချက်အလက်တစ်ခုမှကျော်မသွားခဲ့ပေ။ထိုအသံသွင်းထားသော စကားဝိုင်းများတွင် ၎င်းတို့ မည်သို့ချန်လီကို ချောက်ချပုံ၊ ကျူးကောယွီ၏ ဂုဏ်သိက္ခာကို ညှိုးနွမ်းအောင်လုပ်ပုံတို့နှင့် အရာအားလုံး ရှိနေသည်။

အစောပိုင်းတွင် ဝေ့ချန် သံသယရှိခဲ့သည်။ချန်လီနှင့် လုရှို့ရန်က တစ်ယောက်နှင့်တစ်ယောက် အငြိုးမရှိခဲ့ပါဘဲ လုရှို့ရန်က မနာလိုမှုသက်သက်ကြောင့်နှင့် အဘယ်ကြောင့် ဤအတိုင်းအတာထိလုပ်ရသနည်း။

လုရှို့ရန်က သူရင်းနှီးနေသောနံပါတ်တစ်ခုနှင့် စကားပြောနေသည့် အသံသွင်းချက်ကို နားထောင်လိုက်ရသောအခါ ဝေ့ချန် ဤမေးခွန်းအတွက် အဖြေကို ထုတ်ဖော်နိုင်ခဲ့သည်။

ဤဖုန်းနံပါတ်ကို ဝေချန်၏ အတိတ်ဘဝက သူ့နှလုံးသားထဲမှာ ရေးထွင်းထားခဲ့သည်။ ထိုဂဏန်း ဆယ့်တစ်လုံးကို နောက်ကနေပင်(ပြောင်းပြန်) သူ ရွတ်နိုင်သည်။ သို့သော် ဤဘဝတွင် ဝေ့ချန် ပြန်လည်မွေးဖွားလာခဲ့ပြီး ရှင်းရှင်းလင်းလင်း သိလာကာ အရာများစွာကို စွန့်လွှတ်ခဲ့သည်။ ထို့ကြောင့် သူ ဤဖုန်းနံပါတ်ကို လျစ်လျူရှုခဲ့သည်။သို့ပေမဲ့ ယခုမြင်လိုက်သည်နှင့် ချန်ချင်း၏ဖုန်းနံပါတ်မှန်း ဝေ့ချန် တန်းသိလိုက်သည်။

ချန်ချင်းက လုရှို့ရန်နဲ့ သိနေတယ်...

ဝေ့ချန်၏ စိတ်ထဲတွင် ဤအတွေးဝင်လာသည်နှင့် တပြိုင်နက် သူ့လက်က အသံသွင်းမှတ်တမ်းအပေါ် အလိုလို နှိပ်လိုက်သည်။

ချန်ချင်း: "မင်းတို့အတန်းထဲမှာ ဧည့်ကျောင်းသားအသစ်တစ်ယောက်ရောက်နေတယ်လို့ ငါကြားတယ်...စိတ်ကစဥ့်ကလျားရောဂါရှိတဲ့ လူငယ်တစ်ယောက်လား"

သူ့အသံနေအသံထားထဲတွင် ဘာသွေးဆောင်မှုမှ မပါသလို ဤဧည့်ကျောင်းသားကို ရည်ညွှန်းသည့်အခါမှာလည်း အထင်အမြင်သေးမှုအရိပ်အယောင်ကိုဖုံးကွယ်၍မထားပေ။

လုရှို့ရန်: "မင်းရဲ့ သတင်းအချက်အလက်တွေက အမြဲတမ်းup-to-dateဖြစ်နေတာပဲ အကယ်ဒမီရဲ့ ပါမောက္ခကျူးကောက ဒီကျောင်းသားကို အနောက်ပေါက်ကနေ ခေါ်လာခဲ့တာလေ"

ချန်ချင်း:"ဒီဧည့်ကျောင်းသားကို မင်းဘယ်လိုမြင်လဲ"

"သူက ငတုံး အရူးတစ်ယောက်လိုပဲ... တခြားဘာဖြစ်နိုင်ဦးမှာလဲ"

ချန်လီက ကျူးကောယွီ၏ကျောင်းသားဖြစ်ကြောင်း သူသိသောကြောင့် လုရှို့ရန်၏လေသံတွင် မနာလိုသံစွက်နေ၏။သူက သူ့အဖေ၏ အဆက်အသွယ်ရှိသော်လည်း ကျူးကောယွီ၏ကျောင်းသားဖြစ်မလာနိုင်ခဲ့ပေ။

"သူက တကယ်လည်းအရူးလေ"

ချန်ချင်းက နှာမှုတ်ကာ သူ၏လှောင်ပြောင်မှုကို ပိုထင်ရှားစေလိုက်၏။

ဤအချိန်တွင် လုရှို့ရန်က အရေးကြီးသောအချက်ကို ဖမ်းဆုပ်ပြီး မေးလိုက်သည်။

"ဒီဧည့်ကျောင်းသားကို မင်းဘာလို့ဒီလောက်ဂရုစိုက်နေတာလဲ"

ချန်ချင်းက ပြန်မဖြေပေမဲ့ လုရှို့ရန်က ရုတ်တရက် သဘောပေါက်သွားသည်။ "မင်းရဲ့ မျိုးရိုးနာမည်က ချန် ဒီဧည့်ကျောင်းသားရဲ့ မျိုးရိုးကလည်းချန်ပဲ...မင်းတို့နှစ်ယောက် ဆွေမျိုးတော့မတော်ပါဘူးနော်"

"သူလို အရူးနဲ့ ငါက ဘယ်လိုလုပ် အမျိုးတော်မှာလဲ"

ချန်ချင်းက ငြင်းသည်။ သူနှင့် ချန်လီအကြားက တော်စပ်မှုကို သူဘယ်တုန်းကမှ အသိအမှတ်မပြုခဲ့ပေ။တစ်ဖက်လူက သူ့မျက်လုံးထဲမှာ မိမစစ်ဖမစစ်တစ်ယောက်သာဖြစ်၏။

လုရှို့ရန်က ချန်ချင်းဆိုလိုသည်ကို နားလည်ပြီး ရယ်လိုက်သည်။

"မင်းဘာကိုဆိုလိုတယ်ဆိုတာ ငါနားလည်ပါတယ်... စိတ်မပူပါနဲ့ ဒီမိမစစ်ဖမစစ်ကို ငါကောင်းကောင်း ဂရုစိုက်လိုက်ပါ့မယ်"

ချန်ချင်းက ပြုံးလိုက်သည်။

သူတို့၏ နောက်ဆက်တွဲ စကားဝိုင်းက သိပ်အရေးမပါတော့ဘဲ အသေးအဖွဲကိစ္စများသာဖြစ်လေသည်။

ဝေ့ချန် နားထောင်နေပေမဲ့ သူ့နားကြပ်ကို ဖြုတ်ပြီး ကွန်ပြူတာကို ပြတင်းပေါက်ကနေ လွှင့်ပစ်ချင်စိတ်ပေါက်နေသည်။သူ ဒေါသထွက်နေသည်၊ချန်လီကို ယခုလို ဆက်ဆံပြီး အရူး၊မိမစစ်ဖမစစ်ဟုခေါ်နေကြသည်အား သူဒေါသထွက်သည်။ဝေ့ချန်၏ရင်ထဲရှိ ဒေါသများက တရိပ်ရိပ် တိုးလာနေပြီး ချန်ချင်းဖြစ်စေ၊လုရှို့ရန်ဖြစ်စေ ယခုအချိန်တွင် သူ့ရှေ့မှာ ရှိနေပါက ဝေ့ချန် သူ့ကိုယ်သူ မထိန်းနိုင်ဘဲ နာကျင်စရာ သင်ခန်းစာတချို့ကို ပေးလိုက်မိမှာဖြစ်သည်။

ဝေ့ချန် မီးဖိုချောင်ထဲသို့ ဝင်ကာ ရေအေးတစ်ခွက်ကို ငှဲ့ပြီး သူ့နှလုံးသားထဲတွင် လောင်ကျွမ်းနေသော မီးကို ငြိမ်းသတ်လိုက်သည်။ရေသောက်ပြီးနောက် ဧည့်ခန်းသို့ ပြန်သွားပြီး ခွဲခြမ်းစိပ်ဖြာရန် လိုအပ်သော အထောက်အထားများကို စုစည်းလိုက်၏။သူ၏နက်မှောင်သော မျက်လုံးများက လေးနက်မှုအပြည့်နှင့် ရှိနေသည်။

ဝေ့ချန် သက်သေအထောက်အထားများစုစည်း၍ပြီးသွားချိန်မှာ

ညသန်းခေါင်ရောက်နေပြီဖြစ်သည်။အများစုမှာ အသံသွင်းမှတ်တမ်းများဖြစ်ပြီး လုရှို့ရန် နှင့် ထိုလူကြားက စကားပြောခန်း မှတ်တမ်းအချို့လည်း ပါဝင်လေသည်။ ဤအထောက်အထားများကို တင်ပြပြီးသည်နှင့် ချန်လီ၏ဖြူစင်မှုကိုချက်ချင်းပင် သက်သေပြပြီးသွားမည်ဖြစ်သည်။

ကျူးကောယွီ၏အီးမေးလ်သို့ အထောက်အထားများပေးပို့ပြီးနောက် ဝေ့ချန် ထရပ်ကာ ပြတင်းပေါက်အပြင်ဘက်ရှိ အမှောင်ထုကို ကြည့်လိုက်သည်။ အသက်ပြင်းပြင်းရှူလိုက်ရင်း သူ့မျက်လုံးများက အပြင်ရှိ အေးစက်နေသော လေအေးများလို အေးစက်နက်မှောင်သွားခဲ့၏။

နောက်တစ်နေ့တွင် မိုးလေဝသခန့်မှန်းချက်အတိုင်း ရာသီဥတုက အတိအကျပင်ဖြစ်လာခဲ့သည်။အမှောင်ထုထဲကို ရောင်ခြည်ဦးများ ထိုးဖောက်ဝင်ရောက်လာချိန်မှာ နေက အရှေ့အရပ်ကနေ တဖြည်းဖြည်း ထွက်လာသည်။

ဝေ့ချန် မနေ့ညက မိုးလင်းခါနီးအထိ အလုပ်ရှုပ်နေခဲ့ပေမဲ့ သူ၏တိကျသော ဇီဝနာရီက သူ့ကို အချိန်မှန် နှိုးခဲ့လေသည်။

ထိုအချိန်တွင် ချန်လီက အိပ်ပျော်နေဆဲဖြစ်ပြီး မျက်လုံးများကို မှိတ်ထားကာ အသက်မှန်မှန်ရှူ၍နေသည်။ချန်လီတွင် တကယ်ပင်ရှည်လျားသော မျက်တောင်များရှိပြီး လက်ရှိမှာ သူ့မျက်လုံးများကိုမှိတ်ထားသောကြောင့် ဝေ့ချန် ထူထဲပြီးကော့ညွှတ်သော မျက်တောင်များ အနည်းငယ် တုန်ယင်နေသည်ကို ရှင်းရှင်းလင်းလင်း မြင်နိုင်လေသည်။

ချန်လီ၏ မျက်လုံးများထဲရှိ မှုန်မှိုင်းမှုများ ပျောက်ကွယ်သွားပြီး ပျော်ရွှင်မှုဖြင့်သာ ထိုမျက်လုံးဝိုင်းကြီးများထဲတွင် ထင်ဟပ်စေမည်ဆိုပါက ချန်လီ၏ မျက်လုံးများက မည်မျှလှပပြီး စွဲမက်ဖွယ်ကောင်းလိမ့်မည်ကို ဝေ့ချန် တစ်ကြိမ်ထက်မက တွေးခဲ့ဖူးသည်။

သူဝေ့ချန်က အနှီမျက်လုံးဝိုင်းကြီးများထဲမှာ ပျော်ရွှင်မှုများ၊ကြည်နူးမှုများဖြည့်ရန် ခက်ခက်ခဲခဲကြိုးစားခဲ့သည်။သို့ပေမဲ့ ချန်လီ၏အတွင်းစိတ်ကမ္ဘာကိုဖျက်စီးပြီး ချန်လီကိုအမှောင်ထုထဲဆွဲနှစ်ကာ ရုန်းမထွက်နိုင်ဖြစ်အောင်လုပ်ချင်နေကြသည့်လူတချို့ရှိနေသည်။သူ ဝေ့ချန်က မည်သို့သဘောတူလက်ခံနိုင်ပါလိမ့်မည်နည်း။

ဝေ့ချန်၏မျက်လုံးများက နက်မှောင်ကာ အေးစက်လာပြီး သူ့နှလုံးသားထဲမှာတစ်စုံတစ်ခုအရှိန်ယူအစပျိူး၍လာသည်။ထိုစဥ် ချန်လီ၏မျက်တောင်များ အကြိမ်အနည်းငယ် တုန်ယင်သွားသည်ကို ဝေ့ချန်မြင်လိုက်ရသည်။ယင်းကချန်လီနိုးလာတော့မည့်လက္ခဏာဖြစ်၏။ဝေ့ချန်၏ကိုယ်တွင်းရှိ ရက်စက်ကြမ်းကြုတ်သော အရှိန်အဝါအားလုံး ထိုအခိုက်အတန့်မှာ ချက်ချင်းလက်ငင်း ထိန်းချုပ်ခြင်းခံလိုက်ရသည်။ချန်လီမျက်လုံးများပွင့်လာချိန်မှာ နူးညံ့ကြင်နာသော ဝေ့ချန်ကိုမြင်လိုက်ရပြီး သူ့ကမ္ဘာတစ်ခုလုံးမှာ ချန်လီဖြင့်ပြည့်နေသည့် ဝေ့ချန်ဖြစ်လေ၏။

"မောနင်း လီလီ"

ဝေ့ချန်က ချန်လီနဖူးကိုကုန်း၍ ညင်ညင်သာသာ နမ်းလိုက်ပြီး နူးညံ့စွာပြောလိုက်သည်။

"မောနင်း အားချန်"

ချန်လီက အနည်းငယ်အိပ်မှုန်စုံမွှားဖြစ်နေသေးပေမဲ့ မသိစိတ်၏စေ့ဆော်မှုအရ ဝေ့ချန်၏လက်ကို တင်းတင်းဆုပ်ကိုင်ကာ တိုးသဲ့သဲ့ပြောလိုက်မိ၏။

"အားချန် မပျော်မရွှင်မဖြစ်ပါနဲ့"

ခုနက ချန်လီက အိပ်ပျော်နေခြင်းဖြစ်ချင်ဖြစ်မည်၊သို့ပေမဲ့ဝေ့ချန်နှင့်ပတ်သက်လာလျှင် ချန်လီကအလွန်ကိုအကဲဆတ်သည်။ချန်လီမျက်လုံးပွင့်လာချိန်မှာ ဝေ့ချန်က အပျက်သဘောဆောင်သောခံစားချက်များအားလုံးကို ဖယ်ရှားလိုက်ပြီဖြစ်ပေငြား ချန်လီက ဝေ့ချန်ဖုံးကွယ်ထားသည့်ဒေါသနှင့်ရက်စက်ကြမ်းကြုတ်မှုတို့ကို ခံစားမိနိုင်ဆဲဖြစ်လေသည်။

ထိုခံစားချက်များက မည်သည့်များဖြစ်သည်ကို ချန်လီ အပြည့်အဝနားမလည်သော်လည်း သူ့နှလုံးသားထဲမှာယင်းတို့ကမပျော်ရွှင်မှုဟု သတ်မှတ်ထားသည်။

ပြီးလျှင် သူဝေ့ချန်ကို မပျော်မရွှင်ဖြစ်အောင်မလုပ်ချင်ပေ။

ဝေ့ချန် အနည်းငယ်ပြေားရာစကားမဲ့နေ၏။အနည်းငယ်အိပ်ချင်မူးတူးဖြစ်နေဆဲဖြစ်သည့်ချန်လီကိုကြည့်ပြီး သူ့နှလုံးသားထဲမှာ ချန်လီဖြင့်ပြည့်နေသည်။

သူက ချန်လီ၏နဖူးကို ထပ်၍ကုန်နမ်းလိုက်ပြီး အက်ကွဲနေသောအသံဖြင့်ပြောလိုက်၏။

"ကောင်းပြီး ကိုယ်မပျော်မရွှင်မဖြစ်တော့ဘူးနော်"

ချန်လီကခေါင်းညိတ်ကာဆိုသည်။

"အွန်း...အားချန်မပျော်မရွှင်ဖြစ်တာကိုမကြိုက်ဘူး"

"ကိုယ်သိပါပြီ"

ဝေ့ချန်က ချန်လီကိုသူ့ရင်ခွင်ထဲဆွဲသွင်းပြီး သူ့မေးစေ့ကို ချန်လီ၏ခေါင်းပေါ်မှာတင်ကာ နူးညံ့စွာပြောလိုက်သည်။

"ကိုယ်မပျော်မရွှင်ဖြစ်တာကို လီလီဘယ်တော့မှထပ်မမြင်စေရဘူးနော်"

"ကတိ"

ချန်လီက ဝေ့ချန်၏ရင်ခွင်ထဲမှာရောက်နေသဖြင့် သူ့အသံကအနည်းငယ်ဗလုံးဗထွေးဖြစ်နေ၏။ထိုသို့ဆိုပေမဲ့ မေးခွန်းထုတ်ရန်ခွင့်ပြုထားသည်မျိုးမဟုတ်ပေ။

"အင်း ကိုယ်ကတိပေးတယ်"

ဝေ့ချန်က ပြောလိုက်သည်။

အပြင်က နေရောင်ကပူသထက်ပူလာပြီး အနှီချမ်းအေးသောဆောင်းဆီသို့ နွေးထွေးမှုအနည်းငယ် ယူဆောင်၍လာသည်။ဝေ့ချန်၏ တံခါးအပြင်ကိုခြေချလိုက်ခါရှိသေးချိန်တွင် သူ့ဖုန်းကမြည်လာသည်။ဝေ့ချန် သူ့ဖုန်းကိုထုတ်ပြီး ကြည့်လိုက်၏။ကျူးကောယွီခေါ်နေခြင်းဖြစ်လေသည်။မနက်အစောက သူ့ပို့ခဲ့သောအီးမေးလ်ကြောင့် ကျူးကောယွီကသူ့ကိုဖုန်းခေါ်ခြင်းဖြစ်မည်။

သူခန့်မှန်းထားသလိုပါပင်၊အီးမေးလ်ကြောင့်ဖြစ်လေသည်။ဝေ့ချန် ဖုန်းကိုနားနားကပ်လိုက်သည်နှင့် ကျူးကောယွီ၏အံ့ဩဘနန်းဖြစ်နေသောအသံက သူ့နားထဲကိုဝင်လာသည်။

"ဝေ့ချန် မင်းဒါတွေကိုဘယ်လိုရတာလဲ...အရမ်းမိုက်တာပဲ"

အံ့ဩဘနန်းဖြစ်နေမှု၊မယုံနိုင်ဖြစ်နေမှုတို့က လေထုထဲမှာပြည့်နေသည်။

အမှန်တွင် ချန်လီ၏ကိစ္စကြောင့်ကျူးကောယွီမနေ့ကတစ်ညလုံးအိပ်မပျော်ခဲ့ပေ။အိပ်ရာထဲမှာ လူးလိမ့်ရင်း ချန်လီကိုကူညီနိုင်မည့်နည်းလမ်းကိုရှာတွေ့ရန်ကြိုးစားခဲ့သည်။သူ၏အဆက်အသွယ်များကိုသုံးပြီး ချန်လီတင်သွင်းသည့်ပန်းချီကားကိုဖယ်ရှားကာ အသစ်တစ်ခုဖြင့်အစားထိုးရန်ပင် သူကြံစည်မိသည်။

ဤနည်းလမ်းက ကျူးကောယွီတွေးကြည့်ပြီးသည်နှင့် တစ်ခါတည်းခြေရာလက်ရာမကျန်အောင်ပျောက်ကွယ်သွားခဲ့၏။ချန်လီ၏ပန်းချီကားက

အင်မတန်ကို ကောင်းလွန်းပြီးပြည့်စုံလွန်းသည်။ထိုကြောင့် ထိုကဲ့သို့ အဆက်ဆံမခံရသင့်ပေ။အနှီပန်းချီကားက အမြင့်မားဆုံးနှင့်အကောင်းဆုံး

ပန်းချီထောက်တိုင်ပေါ်မှာတလေးတစားတင်ပြီး ၎င်းနှင့်ထိုက်တန်သည့်ဂုဏ်သရေကိုပေးအပ်သင့်ပေသည်။မဟုတ်မမှန်ခိုးကူးမှုတစ်ခုအတွက်နှင့် ဖုန်အလူးလူးနှင့်ချောင်ထိုးခံထားရမည့်ပန်းချီကားမျိုးမဖြစ်သင့်ပေ။

မရသည့်အဆုံးဖြစ်လာလျှင် သူထိုသို့လုပ်ရရန်ရွေးချယ်မည်ဖြစ်ကြောင်းကို ကျူးကောယွီဝန်ခံပါသည်။သို့ပေမဲ့ ယခုနှစ်ရက်ကျန်သေးသည်ဖြစ်ရာ ချန်လီ၏ပန်းချီကားကို သူ လုံးဝလက်လျော့လိမ့်မည်မဟုတ်ပေ။

ချန်လီ၏ပြိုင်ပွဲဝင်ပန်းချီကားကိုထုတ်ပြလိုက်သည်နှင့် ပန်းချီလောကတစ်ခုလုံး အုတ်အော်သောင်းတင်းဖြစ်သွားမည်ဟု ကျူးကောယွီယုံကြည်သည်။

ချန်လီ၏ပန်းချီကားက လုံလောက်အောင်ထူးချွန်ပြောင်မြောက်သည့်လက်ရာဖြစ်သည့်အတွက်လည်း အမြဲတစေ အဖြူနှင့်အမည်းကို ရှင်းရှင်းလင်းလင်းသိခဲ့သော အိပ်မက်ဖလားပြိုင်ပွဲကျင်းပရေးကော်မတီက ကျူးကောယွီကို ဆင်တူနေသည့်ပန်းချီကားပေါ်လာသည့်အကြောင်းကိုအသိပေးပြီး အနှီပန်းချီကား၏မူရင်းစစ်မှန်မှုကိုသက်သေပြရန် သူ့ကို သက်သေရှာခိုင်းခြင်းဖြစ်လေသည်။

ဤနှစ်များတလျှောက်မှာ အိပ်မက်ဖလားက စည်းမျဥ်းများကိုချိုးဖောက်သည်မှာ ယခုကပထမဆုံးအကြိမ်ဖြစ်၏။ယင်းက ချန်လီ၏လက်ရာကို ပြသနိုင်မည့်အခွင့်အရေးတစ်ခုပေးရန်နှင့် ကမ္ဘာကြီးကို အံ့ဩတုန်လှုပ်အောင်လုပ်နိုင်မည့် အခွင့်အရေးတစ်ခုပေးရန်အတွက်ဖြစ်လေသည်။ကျူးကောယွီ ဤကိစ္စ၏နောက်ကွယ်ကအကြောင်းအရင်းကို သိပေသည်။

စိုးရိမ်လွန်း၍ သူ့မှာအိပ်မပျော်နိုင်ခဲ့။ထို့ကြောင့် ဝေ့ချန်ဆီကအီးမေးလ်ရောက်လာပြီး အသံဖိုင်ကိုနားထောင်ပြီး စကားပြောမှတ်တမ်းစခရင်ရှော့ များကိုကြည့်ပြီးသောအခါ ကျူးကောယွီ အမှောင်ကမ္ဘာထဲတွင် မရေမတွက်နိုင်သောအလင်းရောင်များ ရုတ်တရက် ထွက်ပေါ်လာပြီး ခေါင်းမူးသွားသလို ခံစားရသည်။

ဝေ့ချန်ကို ဖုန်းခေါ်ချင်သည့်စိတ်ကို ထိန်းချုပ်ရန် ကျူးကောယွီ မည်မျှ ကြိုစား အားထုတ်ခဲ့ရသည်ကို ဘုရားသခင်သာ သိတော်မူ၏။ သူသည် တစ်ညလုံး ပျော်ရွှင်စွာ အိပ်ယာထဲတွင် လူးလိမ့်နေခဲ့ပြီး မိုးလင်းသောအခါ ဝေချန်နိုးလောက်ပြီဟု ခန့်မှန်းကာ သူ မစောင့်နိုင်တော့ဘဲ ဖုန်းဆက်လိုက်သည်။ဝေ့ချန် ထိုကဲ့သို့သော အထောက်အထားများကို မည်သို့စုဆောင်းခဲ့သည်ကို သူသိလိုနေ၏။

ယခုအချိန်တွင် ကျူးကောယွီက အသက်ငါးဆယ်အရွယ်ကလေးတစ်ယောက်လို ပျော်နေသည်။

ထုံးစံအတိုင်း ဝေ့ချန်က ကျူးကောယွီကို ကွတ်ကီးတည်ရှိမှုကို မဖော်ပြခဲ့ပေ။ မလိုအပ်ဘူးဟု သူထင်သည်။ သို့သော် ဤအခိုက်အတန့်တွင် ကျူးကောယွီ၏ဖုန်ခေါ်ဆိုမှုက ဝေ့ချန်၏ ရည်ရွယ်ချက်များနှင့်(ဝေ့ချန်ဖြစ်စေချင်သည်နှင့်) လုံးဝကိုက်ညီသည်။

ဝေ့ချန်က လသာဆောင်သို့ လျှောက်သွားပြီး သူ၏ အစီအစဉ်များကို ကျူးကောယွီအား တစ်ခုပြီးတစ်ခု ရှင်းပြလိုက်သည်။

ကျူးကောယွီတစ်ယောက် နားထောင်နေစဉ်တွင် အံ့အားသင့်သွားသော်လည်း ဤအစီအစဥ်များကို အကောင်အထည် ဖော်ပြီးနောက် အလွန်ပင် ကျေနပ်အားရစရာ ကောင်းလိမ့်မည် ဟု သူခံစားရသည်။သိပ်ကောင်းတယ်...

"ဝေ့ချန် ငါ မင်းကို လျှော့တွက်မိခဲ့တယ်"

ကျူးကောယွီက ပြောလိုက်၏။

"မာနထောင်လွှားပြီး စက်ဆုပ်စရာနည်းလမ်းတွေကို သုံးတဲ့သူတွေကို သင်ခန်းစာပေးမှရမယ်"

ဝေ့ချန်က ကျူးကောယွီ၏ ချီးကျူးမှုကို လျစ်လျူရှုပြီး တိုက်ရိုက် ပြောလိုက်သည်။သူ့မျက်နှာက လေးနက်နေပြီး သူ့မျက်လုံးများကအေးစက်နေခဲ့လေသည်။

<< >>

💘

Prev Next