MM Story Teller

Chapter 121

Viewers 19k

👾Chapter 121

လုအန်းဟယ်၏ မက်ခါပျက်သွားသည့်အချိန်တုန်းက သူ့ကို မြေပြင်ပေါ်ဆင်းလာရန် ဖိတ်ခေါ်ခဲ့သည့်လူ သူနှင့်အတူ ကို့ရို့ကားယားတွဲကခဲ့သည့်လူနှင့် ယခု ဟယ့်ယွင်ထင်က အတော်လေး ခြားနား ပြောင်းလဲသွားခဲ့သည်။

တစ်ဖက်လူကို လင်းဟန် မျက်လွှာ

ပင့်ရင်း ကြည့်လိုက်မိသည်။

သူတို့နှစ်ယောက်သာ ထိုအချိန်ကတည်းက အတူတွဲဖြစ်ခဲ့ကြလျှင် ဟယ့်ယွင်ထင်လည်း ထိုကဲ့သို့ တုံ့ပြန်လာစရာအကြောင်းမရှိပေ။

ဟယ့်ယွင်ထင်က သူထိတွေ့ရန်မဝံ့ရဲခဲ့ သည့် ချိုမြိန်မှုလေးဖြစ်ပြီး ပျောက်ဆုံးသွားခဲ့သလို တစ်ဖန်ပြန်လည်ရှာတွေ့ခဲ့သည်။

ဆုံးရှုံးသွားသော အချိန်များအတွက် ရုတ်တရက်ဆိုသလို လင်းဟန် စိတ်မကောင်းမဖြစ်မိပေ။

စိတ်အဖတ်ခံလိုက်ရမှန်းသိသွားသော ဟယ့်ယွင်ထင်က တစ်စုံတစ်ခုကို ဖုံးကွယ်ချင်နေသည်လား မသိပေ။ တည်တံ့နေသော မျက်နှာနှင့် လင်းဟန်ကို အကြည့်လွှဲသွားသည်။

ဟယ့်ယွင်ထင်၏ ထိုပုံစံကြောင့် လင်းဟန်လည်း ကျီစယ်ဟန်ဖြင့်ပြုံးလိုက်ပြီး တမင်တကာ ရှေ့တိုးကာ ဟယ့်ယွင်ထင်၏မျက်နှာကို လက်နှင့်အုပ်ကိုင်လိုက်ရာ အကြည့်ချင်းမဆုံဘဲမနေတော့ပေ။ လင်းဟန်၏ မျက်ဝန်းများထဲတွင် ခပ်ညစ်ညစ်စနောက် ကျီစယ်လိုသည့် အရိပ်အယောင်များဖြင့်ပြည့်နှက်နေသည်။

"ဗိုလ်ချုပ်....နောက်တစ်ခါ ကျွန်တော့်ကိုနမ်းချင်တယ်ဆိုရင် ဘာဆင်ခြေမှပေးစရာမလိုပါဘူး"

ဤတစ်ခေါက်တွင် လင်းဟန်က

ဟယ့်ယွင်ထင်ကို နာမည်အပြည့်အစုံမခေါ်ဘဲ ဗိုလ်ချုပ်ဟုသာခေါ်လိုက်သည်။

ကြီးကျယ်မြင့်မြတ်သော အင်ပါယာဗိုလ်ချုပ်ကြီးက ထိုအခြင်းအရာကြောင့် တောင့်မခံထားနိုင်တော့ဘဲ ရဲတင်းလှသည့် အိုမီဂါ၏ လက်ချောင်းလေးများကို ကိုက်ပစ်သည်။

သို့သော် သူတို့နှစ်ဦး ထိုသို့ ကလူကျီစယ်ရင်း အချိန်မဖြုန်းဖြစ်ပေ။ ဟယ့်ယွင်ထင်က အခြားအကြောင်းရင်းတစ်ခုကြောင့် သူ့ကို ဤနေရာသို့ခေါ်လိုက်မှန်း လင်းဟန်သိသည်။ ဟယ့်ယွင်ထင်၏ လည်ပင်းကိုဖက်တွယ်ထားရင်း ပေါင်ပေါ်တွင်ထိုင်ကာ အနည်းငယ်ရှုပ်ပွနေသည့် အင်္ကျီကော်လံကို ပြင်ပေးလိုက်သည်။

"အိုခေ....ဗိုလ်ချုပ်ကြီး...ကျွန်တော်တို့အခု အလုပ်ကိစ္စအကြောင်းပြောလို့ရပြီလား"

ထိုအခါ ဟယ့်ယွင်ထင်က စားပွဲပေါ်တွင် ကြိုတင်ပြင်ဆင်ထားသည့် စာရွက်စာတမ်းအချို့ကို သူ့အားကမ်းပေးလာသည်။

"ဒါကကိုယ်စီစဥ်ထားတဲ့ဟာ....အစကတော့ မင်းကိုမပြောဘူးလုပ်ထားတာ...ဒါပေမဲ့ အဲဒီတုန်းက အဖြစ်အပျက်တွေကိုတောင် မင်းသိပြီးပြီပဲ...ထပ်ပြီးဖုံးကွယ်ထားစရာ အကြောင်းမရှိတော့ဘူးလေ"

လင်းဟန် သူ့ကိုနားလည်ပေးလိမ့်မည်ဟု ယုံကြည်ထားသောကြောင့်

ဟယ့်ယွင်ထင် သဘာဝကျကျပြောလိုက်သည်။

ထိုစာရွက်စာတမ်းများကို လင်းဟန်ယူလိုက်သည်။ သူ့နှုတ်ခမ်းထက်ရှိ အပြုံးတို့မှာ တဖြေးဖြေးပျောက်ကွယ်သွားပြီး မျက်နှာအမူအရာမှာလည်း တည်တင်းသွား၏။

ဤရက်ပိုင်းအတွင်း ဟယ့်ယွင်ထင်က ဌာနချုပ်တွင် လေ့ကျင့်ရေးများနှင့် အလုပ်ရှုပ်နေသဖြင့် လင်းဟန်မှာ ကူးလုလုကို သူ့တိုက်ခန်းသို့ ရက်အနည်းငယ်မျှ ပြန်ခေါ်သွားရသည်။

ကူးလုလုက လင်းဟန်၏ တိုက်ခန်းနှင့် ပို၍ သဟဇာတဖြစ်ကာ နေသားကျနေပုံပေါ်သည်။ အဘယ်ကြောင့်ဆိုသော် အခန်းများလွန်း၍ ခဏခဏလမ်းပျောက်မလို ဖြစ်တတ်သော အိမ်ကြီးနှင့်မတူဘဲ တိုက်ခန်း၏ အတွင်းပိုင်းတွင် ကူးလုလုအတွက် လင်းဟန်ကိုယ်တိုင် ပြင်ဆင်ပေးထားသော ထောင့်တစ်နေရာလေးရှိနေသောကြောင့်ပင်။

ပိတ်ရက်မဟုတ်သဖြင့် လင်းဟန်လည်း ခါတိုင်းလိုပင် အလုပ်လုပ်နေရသည်။ သို့သော် ထိုအရာက ကူးလုလုအပေါ် အကျိုးသက်ရောက်မှုမရှိပေ။ ကူးလုလု အိမ်တွင် တစ်ယောက်တည်းရှိနေသည့်အချိန်နှင့် ဘာမှမကွာခြားချေ။ အိပ်လိုက် စားလိုက် ၊ တီဗွီကြည့်လိုက် ၊ ပင်ပန်းလာလျှင် လင်းဟန်၏ ဆိုဖာခုံအနားတွင် လေကျင့်ခန်းလေးလုပ်လိုက်နှင့် သာယာနေသည်။

လင်းဟန်က သိပ်မကြာခင် အိမ်ပြန်ရောက်လောက်မည်ဖြစ်သည်။ ကူးလုလုမှာ သူ့အကြိုက်ဆုံး ဇာတ်လမ်းတွဲကို အချိန်အတော်ကြာအောင် ထိုင်ကြည့်နေသည်။ သို့သော် ဇာတ်လမ်း၏ အဆုံးသတ်ကိုတော့ သူမကြိုက်ပေ။ အဆုံးတွင်အိုမီဂါက သူ့အပေါ်ဆိုးရွားလွန်း

သည့် အယ်လ်ဖာကောင်ကို ခွင့်လွှတ်ပေးလိုက်ပြီး ငြိမ်းငြိမ်းချမ်းချမ်း အတူပြန်နေသွားကြသည်။ ထို့အပြင် အိုမီဂါက အချိုးပြောင်းသွားသော ထိုအယ်လ်ဖာကောင်အတွက် နောက်ထပ် ကလေးတစ်ယောက်ပင် မွေးပေးလိုက်သေးသည်။ ဇာတ်လမ်းဆုံးသွားသောအခါ ကူးလုလုမှာ စိတ်ဆိုးဒေါသထွက်ရင်းသာ ကျန်ရစ်ခဲ့သည်။

ဇာတ်လမ်းတွဲကြောင့် နာကျင်ခံစားရ၍ အင်ပါယာသတင်းကို ပြောင်းပြီး ဖွင့်ကြည့်လိုက်သည်။

သတင်းအကြောင်းအရာများကို ကူးလုလု နားမလည်သော်လည်း စာတန်းထိုးများနှင့် လူများ၏ အမျိုးမျိုးသော ပုံရိပ်အရွယ်အစားများက သူ့ကိုဆွဲဆောင်နေသည်။ယခင်နေ့ကမှ သူနှင့်ပြန်ပြေလည်သွားခဲ့သော အယ်လ်ဖာကိုလည်း သတင်းထဲတွင် မကြာခဏတွေ့ရသည်။

ယခုလည်း သတင်းကြည့်နေရင်း

ဟယ့်ယွင်ထင်ကို တွေ့ရပြန်သည်။

ဟယ့်ယွင်ထင်ဘေးတွင် ဆံပင်ဖြူဖြူနှင့် သက်လတ်ပိုင်းအရွယ်အမျိုးသားတစ်ဦး၏ပုံကပါ တွဲပါလာသည်။

ကူးလုလု ခြေလက်ဆန့်လိုက်ပြီး အနီးအနားရှိ ကော်ဇော်ကိုကုတ်ခြစ်ရင်း တီဗွီဖန်သားပြင်ပေါ်တွင် ရေးထားသည့် ပြွတ်သိပ်နေသော စာတန်းများကို စိတ်ရှုပ်ထွေးစွာဖြင့် ကြည့်လိုက်သည်။ သူစာမဖတ်နိုင်သော်လည်း သတင်းတင်ဆက်နေသည့်အသံကိုမူ စိတ်အားထက်သန်စွာ နားထောင်နေမိသည်။

တီဗွီပေါ်တွင် ကူးလုလုက အင်ပါယာ၏ လွှမ်းမိုးမှုအရှိဆုံး တရားဝင်မီဒီယာဖြစ်သည့် ရုပ်သံလိုင်းကို ဖွင့်ထားခြင်းဖြစ်သည်။ သူ့မျက်လုံးများတွင် ကျောချမ်းဖွယ် အရိပ်အယောင်များ ဖြတ်ပြေးနေကာ သူ့ပါးစပ်ကလည်း တစ်ခုခုပြောနေသကဲ့သို့ သို့မဟုတ် ဒီအတိုင်း အဓိပ္ပါယ်မရှိသည့် အသံတစ်ခုပြုနေသကဲ့သို့ ခပ်ဟဟဖြစ်နေ၏။

သတင်းခေါင်းစဥ်မှာ "ပဋိဇီဝကျဆုံးပြီး ဗွီပရိုတွန်ဂြိုလ်တွင် မျိုးရိုးဗီဇဆိုင်ရာရောဂါ ပြန်လည်ပေါ်ပေါက်လာသည်" ဟူ၍ဖြစ်သည်။

****

တရားဝင်မီဒီယာမှ သတင်းထွက်လာသည်နှင့် သူအလုပ်မဆင်းခင်အချိန်တွင်ပင် သူ့ဘေးပတ်ဝန်းကျင်ရှိ လုပ်ဖော်ကိုင်ဖက်များ၏ သဘောထားများနှင့်အခြေအနေများ ပြောင်းလဲသွားသည်ကို လင်းဟန်ခံစားမိသည်။

မည်သို့ပင်ဆိုစေ ယခင် သတင်းခေါင်းစဥ်များက မည်သို့ပင်ကြောက်စရာကောင်းနေပါစေ သက်သေမရှိသဖြင့် တရားဝင်သတင်းမီဒီယာက ထည့်သွင်းဖော်ပြထားခြင်းမရှိပေ။ အချို့လူများက ထိုကိစ္စအပေါ် သံသယရှိနေကြဆဲဖြစ်ပြီး အချို့ကမူ ဆက်လက်စောင့်ကြည့်နေကြသည်။

တရားဝင်သတင်းက သူတို့တစ်ကြိမ်တစ်ခါမှ မမြင်ဖူးခဲ့သည့် ပုံတစ်ပုံကို တိုက်ရိုက် ပို့စ်တင်ခဲ့သည်။ ဌာနချုပ်တပ်ကြပ်ကြီးနှင့် ရှုကျစ်ဟန်အပြင် အခြားမည်သူမှ ထိုဆယ်ကျော်သက်လေးကိုမသိကြချေ။ အခြေအနေကို သိဖို့ဆိုလျှင် ဝေးလာဝေးစွ။ သို့သော် သိပ်မကြာခင်တွင် သတင်း၌ပါလာသော ဗွီဒီယို ၊ ဓာတ်ပုံတို့နှင့်အတူ လူတိုင်း အတွေးများကုန်တော့သည်။

ဆယ်ကျော်သက်ကောင်လေး၏ မျက်နှာက ဖြူဖပ်ဖြူရော်ဖြစ်နေပြီး သူ့နှုတ်ခမ်းက တွန့်လိမ်ကောက်ကွေးနေကာ လည်ချောင်းမှ အဓိပ္ပါယ်မဖော်နိုင်သည့် အသံတို့ ထွက်လာသည်။ သူ့အသွင်အပြင်က လူသားတစ်ယောက်နှင့်မတူတော့ဘဲ အသက်မဲ့နေသော မျက်လုံးများနှင့် သတ်ဖြတ်လို

သည့် အရှိန်အဝါနှင့်အကျင့်စရိုက်များက ဇာ့ဂ်တစ်ယောက်နှင့် အတော်လေးဆင်တူနေ၏။ ဗွီဒီယို

ကြည့်မိသူတိုင်း ထိုကောင်လေး၏ ပုံစံက သာမာန်မဟုတ်မှန်း ပြောနိုင်သည်။

သုတေသနအခြေစိုက်စခန်းရှိလူများ၏ စိတ်ပညာအရည်အသွေးက အတော်လေးကောင်းမွန်သည်။ ထိုသတင်းကိုကြားရသည့်တိုင် အထိတ်ထိတ်အလန့်လန့်ဖြစ်သွားခြင်းမရှိကြပေ။ လင်းဟန်ပင်လျှင် ထိုသတင်းကို ညနေဘက်လောက်ရောက်မှ ကြားသိရသည်။ သို့သော် သူအိမ်ပြန်ရောက်သောအခါ ထိုသတင်းက အဓိကနယ်မြေတင်မကဘဲ အင်ပါယာတစ်ခုလုံးအထိ ပြန့်နှံ့သွားကြောင်း သိလိုက်ရ၏။ ထို့ကြောင့် ဤတစ်ခေါက်တွင် လူတိုင်းနီးပါးက မမျှော်လင့်ထားသည့် ထိုဖြစ်ရပ်အပေါ် အာရုံစိုက်လာကြသည်။

အချို့လူများက ဗွီပရိုဂြိုလ်၏အခြေအနေကို စိုးရိမ်ပူပန်နေကြဆဲပင်။ ထိုရောဂါပြန့်နှံ့မှုက ရှားပါးအဖြစ်အပျက်တစ်ခုသက်သက်ဖြစ်ရုံလား သို့မဟုတ် လူတွေစသေကုန်ကြပြီလား စသဖြင့် စိုးရိမ်ပူပန်နေကြခြင်းဖြစ်သည်။ ဗွီပရိုတွန်ဂြိုလ်နှင့် ချိတ်ဆက်ထားသော သတင်းမီဒီယာ အဆက်အသွယ်များသည်လည်ယ အဖြတ်တောက်ခံလိုက်ရပြီဖြစ်ပြီး အခြားတရားဝင်အဖွဲ့အစည်းများပင်လျှင် ဗဟိုမြို့ကို မဆက်သွယ်နိုင်တော့ချေ။ ထို့ကြောင့် ဗွီပရိုတွန်ဂြိုလ်ပေါ်တွင် စခန်းချထားသော အင်ပါယာ၏ အဓိက တရားဝင်သတင်းမီဒီယာမှလွဲ၍ ထိုနေရာနှင့်ပတ်သတ်သည့် သတင်းအချက်အလက်များကို မည်သူမှမသိနိုင်တော့ပေ။

ထိုသို့သော အခြေအနေမျိုးတွင် ပြည်သူလူထုများ၏ အထင်အမြင်များကလည်း အမျိုးမျိုးကွဲလွဲလျက်ရှိသည်။

လင်းဟန်လည်း အိမ်အပြန်လမ်းတွင် အွန်လိုင်းမှဖြစ်စေ အပြင်တွင်ဖြစ်စေ ထိုအဖြစ်အပျက်နှင့်ပတ်သတ်ပြီး လူများပြောဆိုဆွေးနွေးနေကြသည်ကို နားထောင်နေမိသည်။ သူ အိမ်ပြန်ရောက်သောအခါ အင်တာနက်ပေါ်တွင် ကောမန့်များက နှင်းပွင့်များကဲ့သို့ အဆမတန်များပြားနေပြီဖြစ်သည်။ အချို့လူများက ထိုသတင်းမှာ မဟုတ်အမှန် အသိပေးမှုသာဖြစ်ပြီး

ထိုဗွီဒီယိုထဲရှိ ဆယ်ကျော်သက်ကောင်လေးမှာလည်း ပဋိဇီဝဆေးမရလိုက်သည့် သာမာန်လူတစ်ယောက်ဖြစ်နိုင်သောကြောင့် စနစ်တကျကုသလိုက်လျှင် အခြားလူများကဲ့သို့ ပြန်လည်ကောင်းမွန်သွားနိုင်သည်ဟု ပြောဆိုပြီး သူတို့၏ စိုးရိမ်သောကကို ဖြေဖျောက်နေကြသည်။

အဆိုးမြင်ဝါဒီလက်ကိုင်ထားသူများမှာမူ မျိုးရိုးဗီဇဆိုင်ရာရောဂါပျံ့နှံ့မှုကြောင့် ဗွီပရိုတွန်

ဂြိုလ်မှာ ၎င်း၏ကံကြမ္မာကို မလွတ်မြောက်နိုင်တော့ဘဲ ဗဟိုမြို့အပါအဝင် ထိုဂြိုလ်ပေါ်တွင် နေထိုင်သူများအားလုံးလည်း သန္ဓေပြောင်းပြီး နောက်ဆုံးတွင် သေဆုံးသွားကြရမည်ဟု ပြောဆိုနေကြသည်။ အချို့လူများမှာ ဗွီပရိုတွန်ဂြိုလ်မှ ပြန်လာသော ယာဥ်တစ်ခုလုံးလည်း မျိုးရိုးဗီဇဆိုင်ရာဗိုင်းရပ်စ်ပိုးအကူးစက်ခံထားရပြီး အင်ပါယာတစ်ခုလုံးကို ငရဲတိုက်သွင်းပစ်လိမ့်မည်ဟု တွေးတောထင်မှတ်ကာ အထိတ်တလန့်ဖြစ်နေကြ၏။ အင်တာနက်ပေါ်မှ အမျိုးမျိုးသော ထင်မြင်ချက်နှင့် ဝေဖန်ချက်များကို လင်းဟန်လိုက်ဖတ်နေလိုက်သည်။ ကူးလုလုမှာ လင်းဟန်ကဲ့သို့ စာမဖတ်တတ်သော်လည်း ယနေ့သတင်းလွှင့်အပြီးတွင် ယခင်နေ့များနှင့်မတူဘဲ ထူးထူးဆန်းဆန်း သူစိတ်လေးနေမိသည်။

လင်းဟန်က ပါးလျ ချောင်ချိသည့် ညအိပ်ဝတ် ဝတ်စုံလေးကို ဝတ်ထားသည်။ ထိုဝတ်စုံ၏ ရေခဲပိုးသားက ထူးဆန်းလွန်းသည်ဟု ကူးလုလုတွေးမိသည်။ ထို့အပြင် ဤသို့သော ရေခဲတမျှအေးစက်နေသည့် အဝတ်ကို ဝတ်ထားသည့် လူသားလည်း အေးနေလိမ့်မည်ကို စိုးရိမ်မိသဖြင့် ကူးလုလုမှာ စားပွဲပေါ်သို့ ကုန်းရုန်းခုန်တက်ကာ နူးညံ့ပြီး အမွေးပွသော ခန္ဓာကိုယ်လုံးလုံးလေးနှင့် လင်းဟန်ကို အနွေးဓာတ်ပေးနိုင်အောင် ရင်ခွင်ထဲသို့တိုးဝင်လိုက်သည်။

လင်းဟန်က အကောင်ပေါက်လေး၏ အပြုအမူကို နားလည်သောကြောင့် ခေါင်းလေးကိုသာ တိတ်တဆိတ် ပွတ်ပေးနေလိုက်သည်။

အင်တာနက်ပေါ်တွင် အမျိုးမျိုးသော ထင်မြင်ဝေဖန်ချက်များက တရှိန်ထိုး တက်လာသည်။

[တကယ်မဖြစ်ပါစေနဲ့...ငါဒီနှစ်မှ အဓိကနယ်မြေထဲရောက်လာတာလေ...ဒီမှာရှိနေတဲ့စီမံမှုတွေနဲ့ နည်းပညာတွေက အဲဒီလိုကြောက်စရာကောင်းတဲ့ ရောဂါကြီးကို တားနိုင်လောက်ပါတယ်]

[သူများယောင်တိုင်း လိုက်မယောင်ကြစမ်းပါနဲ့....စစ်တပ်က အဲဒီကနေ ပြန်ရောက်တာ ဘယ်လောက်ကြာပြီလဲ...အဲဒီကတည်းက ဒီကိစ္စစဖြစ်နေတာလား...အဲဒီဟာကြီးကို အဓိကနယ်မြေထဲဆွဲမသွင်းကြပါနဲ့ဟာ]

[ကူးစက်ခံရပြီဆိုရင် ဘယ့်နှယ့်လုပ်ကြမလဲ...ဒါပေမဲ့ ငါတို့နေတဲ့နေရာက ဗွီပရိုတွန်ဂြိုလ်နဲ့အဝေးကြီးပါ...ဘာမှဂရုစိုက်စရာမလိုဘူး]

[ဒါက အင်ပါယာရဲ့အုပ်ချုပ်မှုအောက်မှာရှိနေသေးတဲ့ ကိုယ့်တစ်ပြည်တည်းသားတွေကို ဆက်ဆံတဲ့ပုံစံလား]

[ဘာကိုတစ်ပြည်တည်းသားတွေလဲ...မင်းတို့ အဓိကနယ်မြေကကောင်တွေက ငါတို့ကို အထက်စီးဆန်ဆန် မာနတစ်ခွဲသားနဲ့ဆက်ဆံတာကျတော့ရော...မင်းပြောသလိုဆိုရင် တန်းတူညီမှုဆိုတာကြီးကို မေ့ထားလိုက်ပြီး အဓိကနယ်မြေကို အဲ့ရောဂါပိုးသုံးပြီးကျူးကျော်လိုက်တာက ပိုကောင်းဦးမယ်]

[အခြေခံလူတန်းစားနယ်မြေက မကောင်းဘူးလို့ ငါတို့အဓိကနယ်မြေကလူတွေ ပြောမိလို့လား....ငါတို့အသိုင်းအဝိုင်းထဲ မဝင်ဆံ့တော့ မင်းဘာသာမင်း သွားပုပ်လေလွင့်တွေလျှောက်ပြောနေတာ...အခြေခံလူတန်းစား နယ်မြေထဲက တချို့လောက်ကောင်တွေက ဒီလိုအဆင့်ပဲ ရှိကြတာကိုး]

[ဒါပေမဲ့ တချို့လူတွေပြောကြတော့ အဓိကနယ်မြေထဲက လူတွေကလတခြားသူတွေထက် နည်းနည်းပိုပြီးအဆင့်အတန်းမြင့်မြင့်မွေးလာရတာပဲရှိတယ်...စိတ်ဓာတ်ကတော့ အခြေခံလူတန်းစားနယ်မြေက ကလေးတွေလောက်တောင် မကောင်းဘူး]

[ငါတို့ ဗွီပရိုတွန်ဂြိုလ်အကြောင်းပြောနေကြတာမဟုတ်ဘူးလား...ဘယ်လိုလုပ်ပြီး ဒီအကြောင်းရောက်သွားပြန်တာလဲ]

[ဘယ်လိုပဲဖြစ်ဖြစ်...မေးခွန်းက ဗွီပရိုတွန်ဂြိုလ်ကြီး အခြေအနေပြန်ကောင်းလာနိုင်လား ဆိုတာပဲ]

[ငါထင်တာတော့ ပရော်ဖက်ဆာရှုရဲ့ ဖြေဆေးက အလုပ်လုပ်တာ အရမ်းမြန်လွန်းတယ်...ပြီးတော့ ဘယ်လိုမှဖြေရှင်းလို့မရတဲ့ကိစ္စတစ်ခုခုကိုဖုံးကွယ်ထားတာလားဆိုတာ စိုးရိမ်မိတယ်]

[အဲဒီလိုပြောလို့မရဘူးလေ...ဒီလိုဖြစ်သွားလိမ့်မယ်လို့ ဘယ်သူမှလည်းကြိုမသိနေဘူး...ပရော်ဖက်ဆာရှုသာ ရှေ့မထွက်လာဘူးဆိုရင်...အခုအချိန်လောက်ဆိုရင် ဗွီပရိုတွန်ဂြိုလ်လည်း...]

[ဒါပေမဲ့ အခုအချိန်အထိ မဖြေရှင်းနိုင်သေးဘူးဆိုတာလည်း အမှန်တရားပဲလေ...ပြီးတော့ ကိုယ်ချခဲ့တဲ့ဆုံးဖြတ်ချက်ရဲ့ အကျိုးဆက်ကို ရင်ဆိုင်ရမှာပဲမလား...]

[အဲဒီလိုပြောကြေးဆိုရင် အဲဒီကူးစက်ခံနေရတဲ့လူတွေကို ရှင်းပစ်လိုက်ရတဲ့ အကျိုးဆက်ကို မင်းရောခံစားဖူးလို့လား]

လင်းဟန် မျက်မှောင်ကြုတ်လိုက်ပြီး ဆက်မဖတ်ဖြစ်ပေ။ ယနေ့ သူအလုပ်စောစောဆင်းသောကြောင့် ဟယ့်ယွင်ထင်ကို ဆယ်သွယ်ချင်သော်လည်း သူ့ကြောင့် အနှောင့်အယှက်ဖြစ်သွားမည်စိုး၍ နောက်မှဆက်သွယ်ရန် သူဆုံးဖြတ်လိုက်သည်။

အဓိကနယ်မြေတွင် လုပ်ပိုင်ခွင့်အရှိဆုံး တရားဝင်သတင်းမီဒီယာက နေ့လည်ပိုင်းတွင် ထိုသတင်းကို ထုတ်လွှင့်လိုက်ပြီးနောက် မရှေးမနှောင်းအချိန်တွင် ထပ်လောင်းအစီရင်ခံတင်ပြမှုများနှင့် သတင်းအသစ်တစ်ပုဒ်ကပါ ထပ်ထွက်လာသည်။ ဤတစ်ခေါက်တွင် ဗွီဒီယိုက တစ်ပုဒ်ထက်မကတော့ဘဲ အဓိကပါဝင်လာသူမှာလည်း ဆယ်ကျော်သက်ကောင်လေးတစ်ယောက်တည်း မဟုတ်တော့ချေ။

ဂြိုလ်သားအချို့ကလည်း ထိုအခြေအနေကို သတိပြုမိသွားသောကြောင့် ဇွတ်တရွတ် ချင်းနင်းတိုက်ခိုက်မှုများပြုလာကြသည်။ အစပိုင်းတွင် လူတစ်ချို့က ၎င်းတို့၏ ချစ်ခင်ရသူများနှင့် ပုံမှန်အတိုင်း ဆက်သွယ်ပြောဆိုနိုင်ငြသည်အထိ ကံကောင်းကြသော်လည်း နောက်တစ်နေ့တွင်မူ ၎င်းတို့၏ လက်မောင်းများနှင့် လည်ချောင်းများမှာ အရှင်လတ်လတ် ကိုက်ဖြတ်ခံရကာ မျက်လုံးနှစ်လုံးဖွင့်လိုက်သည်နှင့် အသက်ပါသွားရတော့သည်။

ပိုမိုများပြားလာသော သက်သေများက ထိုကိစ္စများမှာ တိုက်ဆိုင်မှုသက်သက်မဟုတ်ကြောင်း သက်သေပြနေသည်။ ထို့အပြင် အဓိကနယ်မြေရှိ တရားဝင် သတင်းမီဒီယာက ဗဟိုမြို့၏အပြင်ဘက်တွင် ဂြိုလ်သားအုပ်စုများ စတင်စုစည်းနေကြောင်း ဗွီဒီယိုရိုက်ကူးရရှိသည်။ ယခုလက်ရှိအချိန်တွင် စီးနင်းဝင်ရောက်တိုက်ခိုက်မည့်ပုံမပေါ်သေးသော်လည်း ဂြိုလ်သားအုပ်စု၏ စောင့်ကြည့်ခြင်းခံနေရသဖြင့် လူတိုင်းစိုးထိတ်နေကြသည်။

နာရီအနည်းငယ်ကြာပြီးနောက် ပဋိဇီဝဆေးနှင့် အသက်ကယ်ထားရသော ဗွီပရိုတွန်ဂြိုလ်မှာ ထိန်းချုပ်၍မရနိုင်တော့ကြောင်းကို လူတိုင်းသတိပြုမိလာသည်။

အချို့လူများက ပဋိဇီဝဆေးထပ်တိုးထုတ်လုပ်မှုမှာ ဟန်ပြသက်သက်များလားဟု စတင်မေးခွန်းထုတ်လာကြသည်။ အချို့လူများကမူ ရှုကျစ်ဟန်၏ ရှေးရိုးဆန်လွန်းသည့် သဘောထားကို ဝေဖန်ပြစ်တင်ကြသည်။ အချို့ကမူ ဗိုလ်ချုပ်လည်း ဤသို့သောအခြေအနေမျိုးကို မြင်ချင်မည်မဟုတ်ကြောင်း သူ့အပေါ်အပြစ်မပုံချင်သင့်ကြောင်း ပြောဆို၍ ဟယ့်ယွင်ထင်ကို ကာကွယ်ပေးနေကြဆဲပင်။

ပြဿနာများ၏ ဦးတည်ချက်က မထင်မှတ်ထားစရာပင်။ သို့သော် သူ ဗွီပရိုတွန်ဂြိုလ်မှ ပြန်လာသည့်အချိန်တုန်းကနှင့် တစ်ထေရာတည်းတူညီနေသည့်အရာများလည်းရှိနေသည်။ ကွာခြားချက်တစ်ခုမှာ ယခင်တစ်ခေါက်က ပြည်သူလူထု၏ ပစ်မှတ်မှာ ဟယ့်

ယွင်ထင်ဖြစ်ခဲ့သော်လည်း ယခုပစ်မှတ်မှာ ရှုကျစ်ဟန်အဖြစ် အစားထိုးသွားခဲ့သည်။

👾

Prev Next