MM Story Teller

Chapter 121

Viewers 18k

💘Chapter 121

ဒီပန်းချီကားကို "အလင်းရောင်" လို့ နာမည်ပေးထားတယ်

လက်ရေးလှနှင့် ပန်းချီအသင်း ဥက္ကဋ္ဌက လူအုပ်၏ တုံ့ပြန်မှုကို အကဲခတ်ပြီးဆို၏။

"ဒီပန်းချီကားက အိပ်မက်ဖလား စတင်ချိန်ကတည်းက ရွှေတံဆိပ်ဆုရထားတဲ့ ပန်းချီကားတွေထဲမှာ ဒိုင်ဆယ်ယောက်လုံးရဲ့ ထောက်ခံမဲကိုရခဲ့တဲ့ တစ်ခုတည်းသော ပန်းချီကားပါ... ဒီပန်းချီကားဟာ အိပ်မက်ဖလားအတွက် သမိုင်းတစ်ပုဒ်ကို ဖန်တီးခဲ့တယ်လို့ ဆိုနိုင်ပါတယ်... အခု ဒီပန်းချီကားရဲ့ လျှို့ဝှက်ဆန်းကြယ်တဲ့ကန့်လန့်ကာကို ကျွန်တော်ဖယ်ရှားပါတော့မယ်...လူကြီးမင်းတို့ရဲ့မျှော်လင့်ချက်တွေကို ပြည့်မီပြီး အဲဒါတွေကိုတောင် ကျော်လွန်နိုင်မယ်လို့ ကျွန်တော်ယုံကြည်ပါတယ်"

ဥက္ကဋ္ဌ၏ စကားများ ထွက်ကျလာသည်နှင့်တပြိုင်နက် သူ့လက်က ရွှေရောင်ပိုးထည်ပေါ်မှာရောက်သွားကာ လူတိုင်း၏အာရုံက သူ၏လက်ဆီကို ရောက်သွားခဲ့သည်။

သူက ပိုးထည်စကို ဖြည်းညှင်းစွာ မလိုက်ပြီး အောက်တွင် စောင့်ကြိုနေခဲ့သည်မှာကြာပြီဖြစ်သော ပန်းချီကားကို လှစ်ဟပြလိုက်လေသည်။

ပရိတ်သတ်များက အသက်ရှုအောင့်ထားကြကာ သူတို့၏မျက်လုံးများက ပန်းချီကားပေါ်တွင် စွဲမြဲနေကြသည်။

ဤပန်းချီကားနှင့်ပတ်သက်သည့် သတင်းက နာမည်ကြီးအောင် စတန့်ထွင်ရုံသက်သက်သာဆိုလျှင် အတွေ့အကြုံအရှိဆုံး မီဒီယာသမားများပင် လက်မထောင်ရန်လိုအပ်ပါလိမ့်မည်။ဤလျှို့ဝှက်ဆန်းကြယ်သော မားကတ်တင်းဆင်းသည့်နည်းဗျူဟာက လူတိုင်း၏ စူးစမ်းလိုစိတ်ကို အောင်မြင်စွာ ဆွဲဆောင်နိုင်ခဲ့သည်။ ဤပန်းချီကားကို စိတ်ဝင်စားသူတိုင်းသည် ၎င်း၏အသွင်သဏ္ဍာန်အမှန်ကို မမြင်ရမချင်း ဂနာငြိမ်မည်မဟုတ်ပေ။

ထိုအချိန်တွင် အချိန်က နှေးကွေးသွားပုံရသည်။ ပိုးထည်ကို မရန် စက္ကန့်အနည်းငယ်သာ ကြာသင့်သော်လည်း ရာစုနှစ်တစ်ခု ကုန်သွားသလို ခံစားရသည်။

သို့သော်လည်း ပန်းချီကား၏ အသွင်သဏ္ဍာန်အစစ်အမှန်ကို လူတိုင်းရှေ့တွင် အပြည့်အ၀ ထုတ်ဖော်လိုက်သောအခါ ထိုခဏတာတွင် ပန်းချီကားကို မြင်လိုက်ရသူများသည် သူတို့ပတ်ဝန်းကျင် ကမ္ဘာကြီး ပြောင်းလဲသွားသလို ခံစားလိုက်ရသည်။ ကြီးမားသော ဖိအားတစ်ခုက သူတို့ကို လွှမ်းခြုံသွားပြီး အမှောင်ထုက သူတို့၏ အမြင်အာရုံကို ဖုံးလွှမ်းသွားသည်။ သို့တိုင်၊ ဤလွန်ကဲသော အမှောင်ထုနှင့် လွှမ်းခြုံထားသော ဖိနှိပ်မှုထဲတွင်၊သူတို့ကိုယ်တွင်းမှ တစ်စုံတစ်ရာက ချိုးဖောက်လွတ်မြောက်ပြီး အပြုသဘောဆောင်သော ရည်ရွယ်ချက်ဖြင့် အထက်သို့ ထိုးတက်၍နေသည်။

ဤအခိုက်အတန့်တွင် လူတိုင်းသည် သူတို့၏ မျက်လုံးများရှေ့တွင် တောက်ပသော အလင်းရောင်ကို ခံစားလိုက်ရပြီး ကြယ်များကပဲ သူတို့၏ ခေါင်းထက်တွင် မှိတ်တုတ်မှိတ်တုတ်လင်းနေသလိုလို။ ထိုအခိုက်အတန့်လေးတွင် သူတို့၏ကိုယ်တွင်၌ အဆုံးမဲ့သောဆန္ဒတစ်ခု ပေါ်လာသည်၊ သူတို့၏နှလုံးသားများကို အမှောင်ထုအပေါ် အပြုသဘောဆောင်သည့်ခံစားချက်များ ကြီးထွားလာစေပြီး ဖိနှိပ်မှုကို မကြောက်ဘဲ အပြင်ဘက်သို့ ကိုင်းဖြန့်ရန် ကြိုးပမ်းချင်စိတ်ပေါက်စေသောဆန္ဒဖြစ်၏။

ဤအချိန်မှာ ဘယ်သူကမှ သူတို့၏ဘဝကို ဤနေရာမှာ မရပ်တန့်စေချင်ကြပေ။အမှောင်ထုက အကန့်အသတ်မဲ့ပြီး မွန်းကြပ်ပုံပေါက်သော်လည်း လေးလံသောအမှောင်ထုကို ဖြတ်ကျော်နိုင်ရန် လူတိုင်းက တောင့်တကြသည်။ ဤအမှောင်ထု၏အဆုံးတွင် အလင်းတန်းတစ်ခုက သူတို့ကို စောင့်နေကြောင်းကို သူတို့သိသည်။

ဤအခိုက်အတန့်တွင် လူရာနှင့်ချီရှိသော ပြပွဲခန်းမအတွင်း တိတ်ဆိတ်ငြိမ်သက်သွားခဲ့သည်။ အားလုံး၏မျက်လုံးများသည် အလယ်ဗဟိုရှိပန်းချီကားပေါ်တွင် ရှိနေကြကာ ထိုမျက်ဝန်းများထဲတွင် ကိုယ့်ဘဝကို ချစ်မြတ်နိုးတန်ဖိုးထားမှုများဖြင့်ပြည့်နေသည်။

အလင်းရောင်နှင့်အတူ မွေးဖွားလာပြီး အလင်းရောင်နောက်ကိုလိုက်ရန် မွေးဖွားလာသူ။

"ဒီပန်းချီကားရဲ့နာမည်က 'အလင်းရောင်'...မျှော်လင့်ချက်အလင်းရောင်...ဘဝရဲ့အလင်းရောင်... အမှောင်ထုထဲကသူတွေ တမ်းတနေကြတဲ့ အလင်းရောင်"

လက်ရေးလှနှင့်ပန်းချီအသင်းဥက္ကဋ္ဌက ပြောလိုက်သည်။သူ့အသံက ခံစားချက်များနှင့်ဆို့နင်နေခဲ့သည်။ဤပန်းချီကားကိုပထမဆုံးမြင်ဖူးခြင်းမဟုတ်သည့်တိုင် ထိုသက်ရောက်မှုသည် ယခုအချိန်အထိ သူနှင့်အတူ ပဲ့တင်ထပ်နေဆဲဖြစ်သည်။

ဥက္ကဋ္ဌကပြောပြီးချိန်မှာတော့ ပရိသတ်ထဲက တစ်ယောက်ယောက်က စတင် လက်ခုပ်တီးလိုက်ပြီး မကြာခင်မှာပဲ လက်ခုပ်သြဘာပေးသံများ ပြပွဲခန်းမတစ်ခုလုံးမှာ ထွက်ပေါ်လာခဲ့လေသည်။ တစ်ချိန်တည်းမှာပင်၊ မရေမတွက်နိုင်သော တိုက်ရိုက်ထုတ်လွှင့်မှုကင်မရာများက ပန်းချီကားကို ချိန်ရွယ်ထားပြီး ၎င်းကို လူကိုယ်တိုင်မတက်ရောက်နိုင်သော သန်းနှင့်ချီသောလူများကို ကြည့်ခွင့်ရစေခဲ့သည်။

ဖန်သားပြင်များဖြင့် ခြားထားသော်လည်း ဤပန်းချီကား၏ မှော်ဆန်မှုသည် ဖန်သားပြင်များကိုဖြတ်၍ ပျံ့နှံ့သွားခဲ့သည်။ ပြပွဲခန်းမအတွင်း လက်ခုပ်သံများ ထွက်ပေါ်လာသောအခါ တိုက်ရိုက်ထုတ်လွှင့်မှုကို ကြည့်ရှုသူများလည်း မထိန်းနိုင်ဘဲ လက်ခုပ်လိုက်တီးမိကြသည်။ ယခုအချိန်တွင်၊ ၎င်းသည် အိပ်မက်ဖလားအတွက် နာမည်ကြီးအောင်စတန့်ထွင်ရုံသက်သက်မျှသာ ဖြစ်သည်ဟု မည်သူမျှ သံသယမဝင်ကြတော့ပေ။ ဤပန်းချီကားသည် အမှန်တကယ်ပင် အပြောင်မြောက်ဆုံးဟု ယူဆရမည့် တန်ဖိုးနှင့် အရည်အချင်းများ ရှိနေသည်။

ဤပန်းချီကား၏နောက်ကွယ်က ပန်းချီဆရာက ဘယ်သူလဲဆိုသည်ကို ဆေးလ်ဗတ်စ်တာ သိသည်။မနေ့ကပဲ ထိုပန်းချီပညာရှင်ကို သူချီးကျူးခဲ့ပြီး ဤအနုပညာလက်ရာ ထုတ်ဖော်ပြသမည်ကို စိတ်အားထက်သန်စွာ မျှော်လင့်နေခဲ့သည်။မျှော်လင့်ချက်များနှင့် ပြည့်နေရင်း သူ့မျှော်လင့်ချက်တွေက အရမ်းများမြင့်လွန်းနေလားဟု တွေးတောနေခဲ့သည်။မည်သို့ပင်ဖြစ်စေ သူက ချန်လီ၏အခြားလက်ရာများကို မြင်တွေ့ခဲ့ရပြီး ချန်လီ၏ ကျွမ်းကျင်မှုအချို့ကို နားလည်ခဲ့သည်။

သို့သော်၊ ကင်းဗတ်စကို ထုတ်ဖော်ပြသလိုက်သောအခါ ဤအနုပညာလက်ရာက သူ၏မျှော်လင့်ချက်ထက် ကျော်လွန်နေသည်ဟု ဆေးလ်ဗတ်စ်တာခံစားခဲ့ရသည်။ထိုပန်းချီကားအပေါ်ကို အကြည့်ပို့လိုက်ချိန်မှစ၍ သူ့အပေါ်လွှမ်းမိုး၍လာသော လေးလံသည့် ခံစားချက်နှင့်အတူ သူ့စိတ်ထဲတွင် ဆန္ဒများ တဟုန်ထိုး တက်လာကာ ဤပန်းချီကားက ကမ္ဘာကို အံ့အားသင့်စေမည့် လက်ရာတစ်ခု ဖြစ်လာလိမ့်မည်ဟု ပြောနေသည်။

ကျူးကောယွီက ချဲ့ကားမပြောခဲ့ပေ။ဤပန်းချီကားကို အဆုံးအထိ ဖုံးကွယ်ထားသည်က အိပ်မက်ဖလားအတွက် မှန်ကန်တဲ့ ဆုံးဖြတ်ချက်ဖြစ်လေသည်။ ပြပွဲခန်းမအတွင်းရှိ လက်ခုပ်သံများသည် အချိန်အတော်ကြာမှ ရပ်တန့်၍သွားခဲ့သည်။သို့သော်လည်း လူတိုင်း၏ အကြည့်များက ပန်းချီကားပေါ်တွင် မြဲမြံစွာစွဲမြဲနေခဲ့သည်။

ပန်းချီဆရာက မှော်အစွမ်းတစ်မျိုးမျိုး ပိုင်ဆိုင်ထားလောက်သည်၊ပန်းချီကားထဲရှိ အရောင်များက သိပ်ပြီး ထင်းထင်းလင်းလင်းမရှိလှပေ။သိပ်သည်းသောအနက်ရောင်အောက်တွင် အဝါရောင်မှိန်မှိန် ရှိသည်။ သွေ့ခြောက်နေသောအစေ့တစ်စေ့က ပက်ကြားအက်နေသော မြေလွှာထဲတွင် နက်ရှိုင်းစွာ နစ်မြုပ်နေခဲ့သည်၊ ၎င်းသည် ရှင်သန်နိုင်စွမ်းမရှိ၊ ရေ သို့မဟုတ် အလင်းရောင်မရှိ၊ အသက်မရှင်နိုင်၊ ကြီးထွားရန် မဖြစ်နိုင်သော အစေ့တစ်စေ့ဖြစ်သည်။

သို့ရာတွင် ထိုအစေ့၏ အက်ကွဲနေသည့်နေရာ၌ နူးညံ့သောအညှောက်လေးတစ်ခုပေါက်နေပြီး မာကျောသောမြေလွှာကိုထိုးဖောက်ပြီး ဘဝအလင်းရောင်ကို ရှာဖွေရန် ကြိုးပမ်းရင်း တိတ်တဆိတ် ကြီးထွားလာပုံရသည်။

အနှီအညှောက်ငယ်လေး၏အရွက်များက အထက်သို့မျက်နှာမူနေကြသည်။သူတို့က အရွက်များတလျှောက်မော့ကြည့်လိုက်သည့်အခါ သူတို့ အလင်းရောင်ကိုမြင်လိုက်ရသည်၊သေးငယ်သောအလင်းစက်လေးများ။

ဤပန်းချီကား၏ ပေါင်းစပ်ဖွဲ့စည်းမှုတစ်ခုလုံးသည် ရိုးရှင်းပုံပေါက်သော်လည်း စိတ်ဝိညာဉ်နှင့် တိုက်မိသွားသော ပြင်းပြသောဆန္ဒက ၎င်းတို့၏ အကြည့်များကို အခိုင်အမာ ဆုပ်ကိုင်ထားခဲ့သည်။

အသက်က နုနယ်သော်လည်း အကြမ်းခံသည်။နှလုံးသားထဲမှာ မျှော်လင့်ချက်ရှိနေသရွေ့ အဆုံးမဲ့အမှောင်ထဲကပင် သင်၏အသက်ရှင်သန်ချင်စိတ်ကို ပိတ်ပင်နိုင်လိမ့်မည်မဟုတ်ပေ။

ပြပွဲခန်းမသည် တိတ်ဆိတ်နေကာ အချို့လူများက စတင်၍ ငိုရှိုက်ကြပြီး အချို့မှာ မထိန်းနိုင်ဘဲ ပေါ်ပေါ်ထင်ထင် ငိုကြသည်။

လူတိုင်းသည် စိတ်ပျက်အားငယ်မှုနှင့် ဒုက္ခများကို တွေ့ကြုံဖူးကြသည်။ ဤပန်းချီကား၏ အသွင်သဏ္ဍာန်က သူတို့၏ စိတ်ဝိညာဉ်ထိ ထိသွားပြီး သူတို့ကိုယ်တွင်း၌ တောင့်တမှုမျိုးစေ့ကို စိုက်ပျိုးပေးလေသည်။

ဤမျိုးစေ့က အလင်းရောင်ကို တောင့်တပြီး ကြီးထွားရန် တောင့်တသည်၊သို့သော်လည်း လူတို့၏ စိတ်ဝိညာဉ်ကို ပို၍ပင် လှုံ့ဆော်ပေးသည်မှာ ဤမျိုးစေ့သည် အသက်ကို တန်ဖိုးထားသောကြောင့် ဖြစ်သည်။

ထိုအချိန်တွင် အချိန်က ရပ်တန့်နေပုံရသည်။အရှုံးမပေးလက်မလျှော့သော ဤမျိုးစေ့ကြောင့် လူတိုင်း ကူးစက်ခံခဲ့ရသည်။ တစ်ချို့က မျက်ရည်တွေကျ၊ တစ်ချို့က ရွှင်မြူးကြသည်၊ တစ်ချို့က တိတ်ဆိတ်နေကြပြီး တစ်ချို့က စိတ်လှုပ်ရှားမှုများနှင့် ပြည့်နေကြသည်။

ညအမှောင်ကျလာပြီး ပြပွဲ၏ ပထမနေ့ ပြီးဆုံးသွားသည်။ ပြပွဲခန်းမထဲက လူများ ထွက်လာတဲ့အခါ အများစုက တိတ်ဆိတ်နေကြသည်။ယနေ့ "အလင်းရောင်"၏ သက်ရောက်မှုက နက်နဲလွန်းလှသည်။ သူတို့သည် ပြပွဲခန်းမမှ ထွက်ခွာလာသော်လည်း အချိန်အတော်ကြာသည့်တိုင် လက်တွေ့ဘဝသို့ပြန်မရောက်နိုင်ဘဲ "အလင်းရောင်"နှင့်ပတ်သက်သည့် အတွေးများထဲမှာ သူတို့၏စိတ်များက နှစ်မြုပ်နေကြဆဲဖြစ်သည်။

တစ်ချိန်က အိပ်မက်ဖလားကို ပြင်းပြင်းထန်ထန် ဝေဖန်ခဲ့ဖူးသော ဝေဖန်ရေးဆရာက လူအုပ်ကြားတွင် လျှောက်နေရင်း သူ့မျက်နှာတွင် ပူလောင်သောခံစားချက်ကို ခံစားနေရသည်။

ယနေ့မှာ ဤပန်းချီကားက သူ့ကို အံံ့ဩတုန်လှုပ်စေရုံသာမကဘဲ သူ့ကို ပြင်းပြင်းထန်ထန် ပါးဖြတ်ရိုက်ခဲ့ပြီး အိပ်မက်ဖလားက သူတို့၏မူလရည်ရွယ်ချက်ကို မေ့မသွားဟု ပြောနေခဲ့သည်။သူတို့၏ အခြေခံမူများကို ဖော်ပြရန် ကွဲပြားသည့်ပုံစံကို ရွေးချယ်ခဲ့ရုံသာဖြစ်၏။

အိမ်ပြန်ရောက်သည်နှင့် ဝေဖန်ရေးဆရာ သူ့ရင်ထဲမှာ တစ်ခုခုလိုနေသလိုဖြစ်လာသည်။သူချက်ချင်းပဲ သူ့ကွန်ပြူတာကိုဖွင့်ပြီး ကီးဘုတ်ကို လျှပ်စီးအလျင်နှင့် နှိပ်လိုက်သည်။ သူ့ဆောင်းပါးထဲက စကားလုံးများအားလုံးက သူ့နှလုံးသား၏အောက်ခြေမှလာသော ခံစားချက်များဖြစ်လေသည်။

သူက အိပ်မက်ဖလားကော်မတီကို တောင်းပန်ပြီး "အလင်းရောင်" ဟူသော ပန်းချီကားကို ချီးကျူးရန်အတွက် သူ့တစ်သက်တာတွင် သင်ယူခဲ့သော ဝေါဟာရအားလုံးကို အသုံးပြုခဲ့သည်။ သို့သော် သူ၏ဆောင်းပါးများတွင် သူ့ကိုယ်သူ ဖော်ပြရန် ပြဿနာမရှိဖူးသော ဝေဖန်ရေးဆရာသည် ယခုအခါ သူ၏စကားများက လုံးလုံးလျားလျား မလုံလောက်ဟု ခံစားလာရသည်။ သူ မည်သို့သော စကားလုံးများကိုသုံးနေပါစေ သူပြောချင်သည်ကို အပြည့်အဝမဖော်ပြနိုင်သလို ခံစားနေရသည်။

ပုံမှန်အားဖြင့်၊ သူသည် နာရီဝက် သို့မဟုတ် တစ်နာရီအတွင်း အရေးပါသော ဆောင်းပါးတစ်ပုဒ်ကို ပြီးမြောက်နိုင်သော်လည်း၊ ဤတစ်ကြိမ်တွင်၊ တစ်ညနေလုံး စာရေးရန် ရုန်းကန်နေခဲ့ရသည်။ "send"ကို နှိပ်လိုက်သည်နှင့် အိပ်မက်ဖလားအပေါ် သူ၏လတ်တလော သံသယများကို ခွင့်လွှတ်လိမ့်မည်ဟု မျှော်လင့်ရင်း အသက်ရှုအောင့်ထားမိသည်။ ခက်ခက်ခဲခဲ ရေးထားသော သူ့ဆောင်းပါးကို လူများများမြင်ပြီး လူများများက ဤပန်းချီကားတစ်ချပ်ကနေတဆင့် အသက်ကိုတန်ဖိုးထားသည့်ခံစားချက်ကို တွေ့ကြုံခံစားခွင့်ရပြီး သူတို့ကို တစ်ဖန်ပြန်ထရန် လှုံ့ဆော်ပေးနိုင်မည်ဟုလည်း သူက မျှော်လင့်လေသည်။

ဝေဖန်ရေးဆရာက Weibo တွင် Follower အများအပြားရှိပြီး အများစုမှာ သူ၏ ပန်းချီကားတိုင်းကို လိမ်ညာပြောဆိုခြင်းမပြုဘဲ ဓမ္မဓိဋ္ဌာန်ကျကျ ဝေဖန်မှုကြောင့် သူ့ကို သဘောကျသူများဖြစ်လေသည်။အိပ်မက်ဖလား၏မြို့တော်ဌာနခွဲပြိုင်ပွဲစတင်သောအခါ၊ ဤဝေဖန်ရေးဆရာက ၎င်းကိုပထမဆုံးဝေဖန်ခဲ့ပြီးသူ၏နောက်လိုက်အများအပြားကသူ၏အမြင်များကိုသဘောတူခဲ့သည်။

မှန်ပေသည်၊ ပရိသတ်အတော်များများက မြို့တော်မှာရှိသည့် ပြပွဲကို တိုက်ရိုက်မလည်ပတ်နိုင်သည့်အတွက် ဝေဖန်ရေးဆရာများ၏ သုံးသပ်ချက်များကို မှီခိုအားထားရသေည်။သူတို့က အိပ်မက်ဖလားကို မှားကြောင်း သက်သေပြရန် စိတ်အားထက်သန်စွာ ဆန္ဒရှိနေကြသောကြောင့် ဝေဖန်ရေးဆရာက ၎င်း၏ သုံးသပ်ချက်ကို တင်သောအခါ ကလစ်နှိပ်၍ဝင်ဖတ်သူများက ချက်ချင်းဆိုသလို မြင့်တက်လာခဲ့သည်။

မိနစ်အနည်းငယ်အကြာတွင် ဝေဖန်ရေးဆရာက စာမျက်နှာကို ပြန်လည်စတင်လိုက်သောအခါ နောက်ဆုံးတွင် သူသည် စိတ်ရင်းမှန်ဖြင့် မှတ်ချက်တစ်ခုကို တွေ့လိုက်သည်–

[လုံးဝသဘောတူပါတယ်...အဲဒီတုန်းက ငါ အဲဒီမှာရှိခဲ့ပြီး ပန်းချီကားရဲ့ ငါအပေါ် သက်ရောက်မှုက အခုထိရှိနေပါသေးတုန်းပဲ...ပန်းချီကားမှာ မှော်အစွမ်းပါနေသလိုမျိုးပဲ... အခု တွေးကြည့်ရုံနဲ့ ဇိုးဇိုးဆတ်ဆတ်တုန်သွားတယ်... လွန်ခဲ့တဲ့ ရက်အနည်းငယ်အတွင်းမှာ ငါ အရမ်းကိုစိတ်ဓာတ်ကျနေတာ... အဲဒီပန်းချီကားကို မြင်လိုက်ရပြီးတဲ့နောက် ငါရဲ့စိတ်ဓာတ်ကျမှုတွေအားလုံး ပျောက်ကွယ်သွားခဲ့တာ်...ငါရှေ့က အခက်အခဲတွေက အခုဆို ဘာမှမဟုတ်တော့သလိုပဲ]

[အပေါ်ထပ်ကလူနဲ့ ဘလော့ဂါက ချဲ့ကားနေသလိုပဲ...ဒါက ပန်းချီကားတစ်ချပ်တင်လေ]

[ဘလော့ဂါ ခင်ဗျားအစား ပိုက်ဆံကို စကားပြောခိုင်းနေတာတော့မဟုတ်ပါဘူးနော်...ခင်ဗျားကအမှန်အတိုင်းပြောလို့ ကျွန်တော်တို့ ခင်ဗျားကိုfollowထားတာ... ခင်ဗျားလည်း အကျင့်ပျက်လာပြီဆိုရင် ကျွန်တော် ခင်ဗျားကို ချက်ချင်း unfollow လုပ်မယ်]

ဝေဖန်ရေးဆရာက စာမပြန်ပေ။ငြိမ်ငြိမ်လေးထိုင်ပြီး မှတ်ချက်များကိုပဲ ဆက်ဖတ်နေသည်။ ထို့နောက် မှတ်ချက်တစ်ခုက သူ့အာရုံကို ဖမ်းစားသွားသည်။

[ငါ့ကို တစ်ယောက်ယောက်က သေတွင်းနှုတ်ခမ်းဝကနေ ပြန်ဆွဲထုတ်ထားတာ... အမှန်တော့ ငါ ပြန်မလာချင်ဘူး... ငါတကယ် သေချင်ခဲ့တာ...တကယ်တကယ်ကိုသေချင်ခဲ့တာ... ဒါပေမဲ့ ဆေးရုံမှာ ဘလော့ဂါပြောနေတဲ့ ပန်းချီကားကို မြင်လိုက်ရတယ်... "အလင်းရောင်"ကို ကြည့်လိုက်တာနဲ့ အသက်ပြန်ရှင်လာသလို ခံစားရတယ်...အကန့်အသတ်မဲ့ အမှောင်ထုထဲကနေ ငါရှင်သန်လွတ်မြောက်လာခဲ့တယ်..."ဘဝဆိုတာ အလင်းရောင်နောက်ကို လိုက်ဖို့ပဲ" ငါဇွဲလုံ့လရှိသရွေ့ ငါ့အလင်းရောင်ကို ငါတွေ့လိမ့်မယ်ဆိုတာ ငါယုံကြည်တယ်...မနက်ဖြန် မြို့တော်ကို သွားပြီး ဒီပန်းချီကားကို ကိုယ့်မျက်စိနဲ့ တိုက်ရိုက်ကြည့်ပြီး နှလုံးသားကို တည့်တည့်ရိုက်ခတ်လာတဲ့ စွမ်းအားကို တွေ့ကြုံခံစားဖို့ စီစဥ်ထားတယ်... မှတ်ချက်: ငါကပြင်းထန်တဲ့ စိတ်ကျရောဂါကိုခံစားနေရတဲ့ လူနာတစ်ယောက်ပါ]

ဝေဖန်ရေးဆရာက ဤလူ၏ ကိုယ်ရေးအကျဉ်းကို နှိပ်လိုက်သည်နှင့် ဤလူက ဘဝနှင့် ပတ်သက်ပြီး အဆိုးမြင်စိတ်များ အမှန်တကယ် ရှိနေကြောင်း တွေ့ရှိခဲ့သည်။ပို့စ်တိုင်းက အဆိုးမြင်စိတ်နှင့် ဤလောကမှ ထွက်ခွာရန် စိတ်ပိုင်းဖြတ်မှုများဖြင့် ပြည့်နေသည်။သို့ပေမဲ့ နောက်ဆုံးပို့စ်က ဝေဖန်ရေးဆရာ၏ နှလုံးသားကို နွေးထွေးစေခဲ့သည်။

[ကံကောင်းပေလို့ ငါရဲ့အလင်းရောင်ကိုရှာတွေ့နိုင်ခဲ့တယ်]

ဝေဖန်ရေးဆရာက မှတ်ချက်မပေးဘဲ တိတ်တိတ်လေး လက်မထောင်ပြလိုက်သည်။

နောက်ပိုင်းတွင် ဝေဖန်ရေးဆရာက သူ၏ကိုယ်ရေးအကျဉ်းသို့ ပြန်သွားပြီး ပို့စ်အသစ်တစ်ခုတင်ခဲ့သည်။

"တကယ်ထူးချွန်ပြောင်မြောက်တဲ့လက်ရာတွေက လူတွေရဲ့နှလုံးသားကို ရိုက်ခတ်နိုင်ပြီး သူတို့ကို ဆွဲထူပေးပြီး မျှော်လင့်ချက်တွေဖြည့်ပေးနိုင်တယ်လို့ ငါ ယုံကြည်တယ်]

ကိုယ်ပိုင်သုံးသပ်ချက် ဆောင်းပါးများရေးရန် ရုန်းကန်နေရသည့် ပရော်ဖက်ရှင်နယ်ဝေဖန်ရေးဆရာများစွာအတွက် အိပ်ရေးပျက်သောညတစ်ညဖြစ်ခဲ့လေသည်။သူတို့ တွေးခေါ်နိုင်သော ချီးမွမ်းစကားအားလုံးကို သုံးခဲ့ပေမဲ့ သူတို့၏ဝေါဟာရက အားနည်းနေသလို ခံစားနေရတုန်းပါပင်။

ပန်းချီကားကို မြင်လိုက်ရသူများက သူတို့၏ဆောင်းပါးများမှာ အလားတူ မှတ်ချက်တွေ ရေးထားခဲ့ကြသည်။သူတို့က ပန်းချီကားအတွက် ငိုကြွေးကြ ရယ်မောခဲ့ကြပြီး ယင်းက သူတို့ကိုယ်တွင်း၌ လေးစားအံ့ဩမှုနှင့် မျှော်လင့်ချက်တို့ကို ဖြစ်ပေါ်စေခဲ့သည်။

"အလင်းရောင်" ၏ပုံများက မီဒီယာသို့ ပေါက်ကြားခြင်းမရှိသော်လည်း တိုက်ရိုက်ထုတ်လွှင့်မှုမှတစ်ဆင့် တစ်ကမ္ဘာလုံးက ပန်းချီကားကို မြင်တွေ့ခဲ့ရပြီး ဆိုရှယ်မီဒီယာတွင် "အလင်းရောင်" အကြောင်း ဆွေးနွေးမှုများ မရပ်မနား ဆက်တိုက်ဖြစ်ပေါ်နေကာ လေးစားအံ့ဩမှုနှင့် စိတ်လှုပ်ရှားမှုအပြည့်ရှိနေကြသည်။

သို့သော်လည်း ချီးကျူးမှုများကြားတွင် လူတိုင်း၏အမြင်တွင် ပို့စ်တစ်ခုပေါ်လာပြီး လူအများ၏အာရုံကို ဖမ်းစားသွားကာ နောက်ဆုံးတွင် လူထုကို ဆူညံပွက်လောရိုက်သွားစေခဲ့လေသည်။

<< >>

💘

Prev Next