Chapter 133

👾Chapter 133

(ရွှေရောင်အိမ်)

လင်းဟန်သည် မက်ခါအင်ဂျင်သံပင်လျှင် သူ့နှလုံးခုန်သံကို မမီနိုင်ဟု ခံစားလိုက်ရသည်။ သူက နှစ်ကြိမ်ခန့် ဖြည်းညှင်းစွာ မျက်တောင်ခတ်လိုက်၏။ 

ဟယ့်ယွင်ထင်၏ နှုတ်ခမ်းများ သူ့မျက်နှာထက်မှ ဖယ်ခွာသွားချိန်တွင် လင်းဟန်သည် သူ၏လက်ချောင်းလေးကို ကွေးကာ တစ်ဖက်လူ၏ နှုတ်ခမ်းထောင့်များကို မြင့်တက်လာစေရန် ထိတွေ့လိုက်၏။ သူက ဟယ့်ယွင်ထင်၏ မျက်နှာထက်၌ တိတ်ဆိတ်နူးညံ့သော အပြုံးတစ်ခု ဖြစ်ပေါ်လာစေချင်ခဲ့သည်။ 

လင်းဟန်က အလွန်ရှင်းလင်း၍ ရိုးရှင်းသည့် စကားသံတစ်ခု ကြားလိုက်ရ၏။ 

[ငါ သူ့ကို ချစ်တယ် … ငါသူ့ကို ပြန်ခေါ်လာချင်တယ်]

[ဒီလိုဆို ငါတို့ကျရှုံးမှာ မဟုတ်တော့ဘူး]

လင်းဟန်က ဟယ့်ယွင်ထင်၏ အေးစက်စက်နှုတ်ခမ်းများကို သူ့လက်ချောင်းထိပ်ကလေးဖြင့် ထိတွေ့လိုက်၏။ သူ၏ မျက်ဝန်းထောင့်များမှာလည်း ကွေးညွှတ်လာခဲ့သည်။ 

သမိုင်းပြုစုသည့် လူများသည် အပြည့်အဝ သမာသမတ်ကျသူများ မဟုတ်ကြချေ။ အေးစက်သော အာဏာရှင်များ၏ နောက်ကွယ်တွင် တိုင်းပြည်ကို ချစ်မြတ်နိုးသည့်တိုင် ပြည်သူများကို သတ်နိုင်သည့် တစ်စုံတစ်ဦး ရှိနေတတ်သည်။ သို့သော် မင်းဆက်တစ်ခု ကျဆုံးခန်း၊ ခေတ်တစ်ခု ပြောင်းလဲခြင်းတို့သည် လူပေါင်းများစွာ အဖြစ်အပျက်ပေါင်းများစွာနှင့် ဆက်စပ်နေကြသည့်တိုင် တစ်စုံတစ်ဦးအပေါ်၌ အပြစ်ပုံချလိုက်ပါက ထောင်နှင့်ချီသောလူများ အပြစ်လွတ်ကင်းသွားမည်ဖြစ်၏။ ကံကောင်းစွာဖြင့် ဟယ့်ယွင်ထင်သည် အာဏာရှင်တစ်ဦး မဟုတ်ခဲ့ချေ။ သူက တိုင်းပြည်နှင့် လူမျိုးကို အကြီးအကျယ် ပျက်စီးစေမည့် လူမျိုးမဟုတ်ပေ။ 

လင်းဟန်က ကိုယ်ကိုမတ်ကာ ဟယ့်ယွင်ထင်၏ ဦးထုပ်ကို ဆွဲယူလိုက်သည်။ ထို့နောက် ထိုသူ၏ ငွေရောင်ဆံစများကို အကြောက်အလန့်မရှိ ထိတွေ့လိုက်၏။ 

ဟယ့်ယွင်ထင်သည် လင်းဟန်၏ ရည်ရွယ်ချက်ကို မရှင်းလင်းဟန်ဖြင့် မေးလိုက်သည်။ 

“ဘာများဖြစ်လို့လဲ … မစ္စတာလင်း …” 

အလှလေးက အာဏာရှင်ကြီး၏ စစ်ဦးထုပ်ကို ပြန်လည်ဝတ်ဆင်ပေးလိုက်၏။ ထို့နောက် အပြုံးဖြင့် ပြောလိုက်သည်။

“ဘာမှမဟုတ်ပါဘူး …” 

လင်းဟန်က သူ့နှုတ်ခမ်းများကို လျက်လိုက်၏။ သူက သတိချွတ်ယွင်းသွားခြင်းအပေါ် မကျေမနပ် ဖြစ်နေမိ၏။ 

နံဘေးတွင် ရှိနေသော စောင်သေးသေးလေးက လှုပ်ရှားသွားခဲ့သည်။ ကူးလုလုသည်လည်း နိုးလာ၏။ သူက မက်ခါထဲတွင် အချိန်များများ မနေဖူး၍ထင့်၊ မက်ခါမူးဝေခြင်းများ ဖြစ်ပေါ်လျှက်ရှိသည်။ သူက နိုးလာသည်နှင့် အရှေ့ဘက်ရှိ လူနှစ်ဦးကို မျက်ဝန်းတစ်စုံဖြင့် ငေးကြည့်နေခဲ့သည်။ 

လင်းဟန်က လက်ကို ဆန့်တန်းကာ အကောင်ငယ်လေးအား သူ၏ လက်ထံသို့ ခေါင်းတိုးလာစေခဲ့သည်။ 

နူးညံ့သော အမွှေးပွပွလေးသည် လင်းဟန်၏ အဝတ်များကို ကုပ်တွယ်လျှက် အပေါ်သို့ တွယ်တက်လာ၏။ သို့သော် အဆုံးသတ်၌ ဟယ့်ယွင်ထင်၏ အေးစက်စက် အကြည့်ကြောင့် လင်းဟန်၏ ကော်လံထဲသို့ မသွားနိုင်တော့ပဲ သူ့ပခုံးပေါ်၌သာ ထိုင်ချလိုက်လေသည်။ 

လင်းဟန်က ဟားတိုက်ရယ်မောလိုက်၏။ 

ထိုအမျိုးသားသည် တစ်ခါတစ်ရံ ကျိုးကြောင်းမညီညွတ်စွာ ပြုမူတတ်လေသည်။ 

သူက တကယ့်ကို ပြောင်းလဲသွားတာပဲ … 

လင်းဟန် တွေးလိုက်၏။ 

သူက ငါ့ကြောင့် ပြောင်းလဲသွားခဲ့တာ .. 

ထို့ကြောင့် လင်းဟန်က ပြီးဆုံးသွားသည့် အချိန်များအား ဖက်တွယ်နေခြင်းကို ရပ်တန့်လိုက်၏။ ကြယ်မြစ်တစ်ခုလုံး ပုပ်သိုးသွားလျှင်ပင် သူတို့သည် ကြယ်မှုန်များကို ဖြတ်သန်းလျှက် အခြား အမည်မသိနေရာတစ်ခုတွင် တွေ့ဆုံနိုင်မည်သာ။ 

ဟယ့်ယွင်ထင်က လုအန်းဟယ်အား ဆက်သွယ်နေခဲ့သည်။ လင်းဟန်က ကူးလုလု၏ ဦးခေါင်းကို ပွတ်သပ်လျှက်  ခံတပ်သို့ ရောက်လာမည့် မက်ခါကို စောင့်နေခဲ့သည်။ ဟယ့်ယွင်ထင်သည် အာဏာရှင်များနှင့် လားလားမျှမဆိုင်တော့ချေ။ သို့သော် ယခုလေးတင် တွေ့ခဲ့ရသည့် ဘုရင်က လင်းဟန်အား သူ မကြာသေးခင်က တွေ့ခဲ့ရသည့် ဝမ်ကျောက်ကောကို သတိရသွားစေခဲ့သည်။ M ဂလက်စီရှိ ဧကရာဇ်သည် ပြောပြ၍မရသော ရက်စက်မှုတစ်ခု ပိုင်ဆိုင်ထားသည်ဟု အခြားကြယ်ဒေသများရှိ လူများက ဆိုလေ့ရှိကြ၏။ 

ထိုသူက ညီလာခံရှိ လူတိုင်းကို တစ်နေ့လုံး အငြင်းပွားခွင့်ပေးထားကာ သူကိုယ်တိုင်ကမူ ရံဖန်ရံခါသာ နားထောင်လေ့ရှိ၏။ စစ်အင်အားကိုမူ ဟယ့်ယွင်ထင်ထံသို့ ယုံယုံကြည်ကြည် အပ်နှင်းထား၏။ သို့သော် ဧကရာဇ်၏ ထိပ်တန်းသွေးနှင့် ဖယ်ရိုမုန်းတို့ကိုမူ မည်သူမှ သံသယမဝင်ရဲချေ။ ထိုသူသည် ငယ်စဉ်က ရေတပ်အား ဦးဆောင်လျှက် ဇာ့ဂ်အင်အား တစ်ဝက်ကျော်နီးပါး ဖျက်ဆီးပစ်ခဲ့ဖူးသည်။ ထို့အပြင် X ခံတပ်ကိုလည်း လက်ရှိအရွယ်အစားအထိ ကျယ်ပြန့်လာစေခဲ့၏။ 

အတိုချုံးဆိုရသော် ထိုသူသည် ပျင်းရိနေပြီး ချဉ်းကပ်ရလွယ်သည့်ပုံ ပေါ်နေသည့်တိုင် သွားမရှုပ်သင့်သည့် လူစားမျိုး ဖြစ်လေသည်။ 

ခံတပ်အနီးရှိ လေထုသည် အေးစက်၍ ပါးလွှာ၏။ လူများက တံခါးကို မဖွင့်သည့်တိုင် ဟယ့်ယွင်ထင်သည် မက်ခါအတွင်းရှိ အပူချိန်အား အနည်းငယ် မြှင့်တင်ပေးလိုက်သည်။ လင်းဟန်က ညီလာခံမှ ထွက်လာချိန်၌ ဝမ်ကျောက်ကောနှင့် တွေ့ခဲ့သည့် မြင်ကွင်းကို ပြန်လည်တွေးနေမိ၏။ ထိုစဉ်က ကြီးမြတ်လှသည့် ဧကရာဇ်သည် လက်ထဲတွင် စစ်တုရင်ရုပ်တစ်ခုကို ကိုင်ဆောင်လျှက် ရည်ရွယ်ချက်ရှိရှိ အသေးစိတ် ဆော့ကစားနေခဲ့သည်။

ထိုအရုပ်သည် ဘုရင်မအရုပ်ဖြစ်လေသည်။ သူက ကြယ်တာရာပြခန်းတွင် ဧကရီအပ်နှံထားခဲ့သည့် ရိုးရှင်းသော ဝတ်စုံကို တွေးလိုက်မိ၏။ သူမက ၎င်းဝတ်စုံအား ချစ်ခြင်း၏ သင်္ကေတဖြစ်ကြောင်း ဆိုခဲ့လေသည်။ 

ထို့ကြောင့် ဝမ်ကျောက်၏ အနောက်ဘက်တွင် ဤသို့သော လူစားမျိုး တစ်ဦးထဲသာ ရှိနိုင်၏။ 

လင်းဟန်က တော်ဝင်မိသားစု၏ လှုပ်ရှားမှုများကို အာရုံမရှိခဲ့ဖူးချေ။ ဧကရီသည် လူလုံးထွက်ပြလေ့ မရှိကြောင်းကိုသာ သူနားလည်ထား၏။ 

ထိုစဉ် လှုပ်ခါမှုတစ်ခုက လင်းဟန်အား အတွေးများထဲမှ ရုန်းထွက်လာစေခဲ့သည်။ 

“မြေပေါ်ကို လေစီးကြောင်းတွေ တိုက်မိတဲ့အခါ အဖုအထစ်လေးတွေ ရှိလာနိုင်တယ် …” 

ဟယ့်ယွင်ထင်က သူ့အား ကြည့်ကာ ရှင်းပြလိုက်သည်။ လင်းဟန်က ခေါင်းညိတ်လိုက်၏။ သူက တစ်ချိန်ထဲမှာပင် ကူးလုလုအား စိုးရိမ်သွားကာ ထိုအကောင်လေးအား သူ၏ အိတ်ကပ်အတွင်းသို့ ထည့်ပေးလိုက်သည်။ သူကိုယ်တိုင်ကမူ တစ်ဖက်လူအား သူ၏ လက်ကို ဆုပ်ကိုင်ထားစေလျှက် ထရပ်လိုက်၏။ ထို့နောက် စကြဝဠာအား ငေးကြည့်လိုက်သည်။ 

သူက X ခံတပ်အား ပထမဆုံးအကြိမ် မြင်ဖူးခြင်း ဖြစ်လေသည်။ 

M2742 သည် ကြီးမားသော မက်ခါတစ်ခုအဖြစ် မှတ်ယူ၍ရသည်။ သို့သော် ဤနေရာ၌မူ ထိုသို့မဟုတ်ခဲ့ချေ။ မြေပေါ်သို့ ဆင်းသက်ပြီးသည်နှင့် လင်းဟန်သည် ယာဉ်ပြတင်းမှတဆင့် အပြင်သို့ ကြည့်လိုက်၏။ 

အဆုံးသတ်တွင် X ခံတပ်သည် လွန်ခဲ့သော နှစ်သန်းပေါင်းများစွာက ကမ္ဘာမြေ၏ ကတုတ်ကျင်းများကို အသွင်ယူကာ အထင်ကြီးဖွယ် ဆောက်လုပ်ထားခြင်း ဖြစ်လေသည်။ ၎င်း၏ ဘယ်ဘက်တွင် အလင်းဖျော့ဖျော့များ ဝန်းရံလျက်ရှိသည့် ဧရာမ အာကာသစခန်းကြီးသည် အပေါ်မှအောက်အထိ စွမ်းအင်ကုန်ခမ်းခြင်းအတွက် လက်နက်များဖြင့် ပြည့်နှက်လျက်ရှိ၏။ ညာဘက်တွင်မူ ကြယ်သင်္ဘောများ ဆိုက်ကပ်ရန် နေရာထားရှိပေးထားလေသည်။ အဘယ့်ကြောင့်ဆိုသော် ဤတည်ဆောက်ပုံသည် မမျှော်လင့်ထားသော အခြေအနေများ ဖြစ်ပေါ်လာပါက ခံတပ်၏ လုံခြုံရေးအတွက် အထောက်အကူ ဖြစ်စေပေလိမ့်မည်။ ထို့အပြင် အကြီးမားဆုံး ကြယ်သင်္ဘောများအား တိုက်ရိုက်လက်ခံနိုင်မည်ဖြစ်ပြီး ဆက်သွယ်မှု ပြတ်တောက်ခြင်း ရှိတော့မည်မဟုတ်ပေ။ 

ခံတပ်၏ အလယ်၌မူ အလင်းတိုင်ကြီးတစ်ခုနှင့် ဝန်းရံထား၏။ ၎င်းက စွမ်းအင်ပမာဏ တစ်ခုလုံးကို သိုလှောင်ထားပြီး အပေါ်ဘက်လေဆာအမြောက် အားသွင်းရန် ဧရာမဓာတ်အားပေးစက်အဖြစ် ဆောင်ရွက်၏။ တစ်ချိန်ထဲမှာပင် ၎င်းက ခံတပ်အပေါ်ဘက်ရှိ အကြီးဆုံးသေနတ်ကြီးအား ထောက်ပံ့ပေးသော ဧရာမ FTL အမှုန်ခြေနင်းတို့အား စွမ်းအင် ပို့လွှတ်လျက်ရှိသည်။ 

အကျဉ်းချုပ်ဆိုရသော် ခံတပ်သည် ပြိုလဲမည်မဟုတ်သော အလံတစ်ခုဖြစ်ပြီး မှော်ဆန်သည့် ကြယ်ဂိတ်ဝတစ်ခုလည်း ဖြစ်၏။ 

ခံတပ် မကျိုးပေါက်သရွေ့၊ ကြယ်နယ်မြေခွဲများ၏ ခုန်မှတ်ကို ထိန်းထားနိုင်သရွေ့ လက်ရှိရင်ဆိုင်နေရသည့် အခက်အခဲအားလုံးသည် လျော့ပါးသွားမည်ဖြစ်၏။ M2742 သည် ခံတပ်၏ ရပ်နားစခန်းထံသို့ ပျံဝဲသွားခဲ့သည်။ ကြယ်သင်္ဘောကြီးသည်လည်း ခံတပ်၏ ညာဘက်အဆုံးပိုင်းတွင် ဆိုက်ကပ်လိုက်၏။ 

လင်းဟန်သည် တစ်ဖက်လူအား သူ့လက်ကို ဆုပ်ကိုင်ခွင့်ပေးလျက် နာခံမှုရှိစွာဖြင့် မတ်တပ်ရပ်လိုက်၏။ 

ခံတပ်သည် အလွန်ကြီးမားသော်လည်း မက်ခါနှင့် ကြယ်သင်္ဘောများအတွက်မူ လှုပ်ရှားရ မလွယ်ကူချေ။ အားလုံးက သင်္ဘောပေါ်၌ ဦးစွာ စုဝေးကြမည်ဖြစ်ပြီး ခံတပ်ထဲ၌နေမည်သော်လည်းကောင်း၊ မက်ခါနှင့်ရန်သူအား ရင်ဆိုင်မည်သော်လည်းကောင်း ရွေးချယ်ကြလေ့ရှိသည်။ ထိုနေရာ၌ လူအမြောက်အများရှိနေ၏။ လင်းဟန်သည် မည်သူ့ကိုမှ စိတ်မပျက်စေရချေ။ သူက ကူးလုလုအား မက်ခါပေါ် ထားခဲ့ကာ သူကိုယ်တိုင်ကမူ သံချပ်ကာကို ဝတ်ဆင်လျှက် ဟယ့်ယွင်ထင်နှင့်အတူ အပြင်သို့ ထွက်လာခဲ့၏။ 

မူလက လင်းဟန်သည် အဖွဲ့နှင့်အတူ သူ၏အသင်းထံသို့ ပြန်ချင်ခဲ့သည်။ သို့သော် ဟယ့်ယွင်ထင်သည် သူတို့၏ ဆက်ဆံရေးကို ချပြပြီးချိန်မှစ၍ မည်သည့်ဖုံးကွယ်မှုကိုမှ မပြုလုပ်တော့ချေ။ သူက လင်းဟန်၏ လက်ကို ဆုပ်ကိုင်လျက် ဆို၏။ 

“မင်း ကိုယ်နဲ့အတူ ဒီမှာနေလို့ရတယ် …” 

လင်းဟန်သည် သူ့မျက်ဝန်းများကို ကြည့်ကာ ရှက်သွေးဖြာသွားရသည်။ 

“ကောင်းပါပြီ …” 

လင်းဟန်က ဤမျှများပြားလှသည့် မက်ခါများကို ပထမဆုံးအကြိမ် တွေ့ဖူးခြင်းဖြစ်၏။ 

ရပ်နားစခန်းတွင် တာဝန်ရှိသော မက်ခါများနှင့် ပို့ဆောင်ရေးယာဉ်များအပြင် တစ်ချက်ကြည့်ရုံဖြင့် မြင်နိုင်မည်မဟုတ်သော မက်ခါများ၊ ခံစစ်အတွက် တာဝန်ယူရသည့် အဆင့်နိမ့်မက်ခါများ၊ အနီးကပ် မီးစွမ်းအင်တိုက်ခိုက်မှုအတွက် တာဝန်ယူရသော အဆင့်မြင့်မက်ခါများ၊ ခံတပ်၏စွမ်းအင်အား အသုံးပြုရန် လိုအပ်သည့် ဖွဲ့စည်းပုံများနှင့် ဓာတ်ငွေ့ခြေနင်း စွမ်းအင်သိုလှောင်စက်များ အစရှိသဖြင့် စီတန်းနေကြ၏။ 

သူက အဆိုပါ နယ်ပယ်၌ နှစ်ပေါင်းများစွာ ရှိခဲ့၏။ ဌာနသည် မက်ခါများ၏ ဖွံ့ဖြိုးမှုနှင့် ထိန်းသိမ်းရေးအတွက် တာဝန်အရှိဆုံးဖြစ်သည်။ ထို့အပြင် မက်ခါအသစ်များ ထုတ်လုပ်လျှင်လည်း သူတို့အနေဖြင့် အမြောက်အများ ထုတ်လုပ်ရာ၌ အနည်းငယ် အာရုံစိုက်ပေးရန်သာ လိုအပ်၏။ ထို့ကြောင့် လင်းဟန်သည် မက်ခါတိုင်း၏ အားနည်းချက်၊ အစိတ်အပိုင်းများကို အသေးစိတ် သိရှိနေသည့်တိုင် မိမိတို့၏ မက်ခါများအရှေ့၌ ရပ်နေသော စစ်သည်တော်များကို မြင်ရချိန်၌ စိတ်မလှုပ်ရှားပဲ မနေနိုင်ခဲ့ချေ။

နယ်စပ်တွင် လေ့ကျင့်ရေး ဆင်းရစဉ်ကဲ့သို့ပင် စစ်သည်များ၏ မျက်နှာများသည် လေးနက်နေ၏။ သို့သော် သူတို့က စိတ်ပိုင်းဖြတ်ထားမှုဖြင့် အလေးပြုကာ ကြွေးကြော်လိုက်သည်။ 

“ကျွန်ုပ်တို့ရဲ့ အသက်ကို တိုင်တည်ပြီး ကျိန်ဆိုပါတယ် … 

ဧကရာဇ်ကို အကြွင်းမဲ့ ယုံကြည်ပြီး သစ္စာရှိပါ့မယ် …” 

အလင်းရောင်သည် ဓားအဖြစ်၊ ကြယ်များသည် လှံအဖြစ်၊ သွေးများသည် ဓားသွားအဖြစ် …

ကြယ်စုတန်းကို ဖြတ်သန်း၍ … မီးလျှံနီတွင်းနက်အား ဖြတ်သန်း၍ … 

မိုက်မဲမှုနှင့် အပြစ်တို့သည် ပြာအဖြစ် ပြောင်းလဲပေလိမ့်မည်။  

“ဂုဏ်ကျက်သရေနှင့် အောင်ပွဲသည် ကျွန်ုပ်တို့အတွက်သာ ဖြစ်စေရမည် …” 

နယ်ခြားဒေသနှင့် မတူစွာပင် X  ခံတပ်သည် ပါးလွှာသောလေထုနှင့် ပြင်းထန်သည့် ရာသီဉတု ရှိနေသည့်တိုင် နေ့နှင့်ည ကွဲကွဲပြားပြားရှိ၏။ နေမဝင်ခင်မှာပင် စစ်သားအသစ်များသည် ဗိုလ်ချုပ်၏ အမိန့်အရ စစ်ပွဲအတွက် ကြိုတင်ပြင်ဆင်မှုများ ပြုလုပ်ပြီးစီးကြလေပြီ။

သူတို့ ခံတပ်သို့ ရောက်ပြီး ငါးရက်အတွင်း ဇာ့အချို့သည် ကျူးကျော်ရန် အခွင့်အလမ်းကို ချောင်းမြောင်းနေကြောင်းနှင့် စခန်းများကို ချိုးဖျက်၍ အင်ပါယာသို့ ဝင်ရောက်သွားနိုင်ခဲ့သည့် ဇာ့ဂ်တစ်ကောင် မရှိကြောင်း သတင်းပို့လာခဲ့ကြ၏။ 

အဓိကနယ်မြေ မီဒီယာသည် နိုင်ငံရေးပါတီများနှင့် လူထုထံသို့ သတင်းထုတ်ပြန်လေတိုင်း ဇာ့ဂ်တစ်ကောင်ကိုပင် ချိုးဖျက်ဝင်ရောက်နိုင်စွမ်း မရှိစေခဲ့သည့် တော်ဝင်တပ်မဟာ၏ ခိုင်ခံ့ပုံကို အသားပေး ချီးကျူးလေ့ရှိသည်။ ထို့ကြောင့် လူများက  မြို့တော်ခံတပ်အား ချိုးဖျက်လာမည်ကို စိုးရိမ်ရန် ကြောက်ရွံ့ရန် မလိုအပ်ဟု တွေးလိုက်ကြသည်။ အဆုံးသတ်တွင် ဇာ့ဂ်များသည် ဂိတ်ကိုပင် ကျော်ဖြတ်လာနိုင်စွမ်း မရှိရာ အလင်းနှစ်များစွာ ကွာဝေးသည့် နေရာရှိ ကွန်ရက်အကာအကွယ်ကို ချိုးဖျက်လာမည်ဟူသော အချက်သည် အားနည်းသူများ၏ လိမ်လည်မှုတစ်ခုသာ ဖြစ်နိုင်၏။ 

ထို့ကြောင့် အားလုံးက လက်ရှိအချိန်၌ ခံတပ်ကို စောင့်ကြည့်နေကြသည်။ 

အဆုံးသတ်တွင် ဗိုလ်ချုပ်ကိုယ်တိုင် မက်ခါအဖွဲ့များကို ဦးဆောင်လျက် ခံတပ်အား စောင့်ကြည့်နေသည်ဖြစ်ရာ အရေးအကြီးဆုံးတိုက်ပွဲ ဖြစ်လာမည်သာ။ ဇာ့ဂ်များ၌ အသိဉာဏ်ရှိနေသရွေ့ သူတို့က ခက်ခက်ခဲခဲ ရင်ဆိုင်လိုစိတ်ရှိကြမည်မဟုတ်ပေ။ ထိုသို့မဟုတ်ပဲ အင်ပါယာနှင့် တိုက်ခိုက်ရန် သူတို့၏ ခွန်အား အလုံးစုံကို ရင်းနှီးလိုက်လျှင်မူ နှစ်ဦးနှစ်ဖက် အထိနာပေလိမ့်မည်။ သို့သော် အများစုက ထိုစစ်ပွဲကို မစောင့်ကြည့်ကြတော့ချေ။ လူအချို့က စိတ်ပူနေကြဆဲဖြစ်သည့်တိုင် အဆုံးသတ်၌မူ သူတို့သည် ဟယ့်ယွင်ထင်ဟူသော အမည်ကြောင့် ယုံကြည်ရန်သာ ရွေးချယ်လိုက်ကြ၏။ 

ထို့အပြင် M2742 ၌ ယခုအခါ ပိုင်းလော့အသစ်တစ်ဦး ရှိနေသည်ပင်။ 

လူများ၏ အတင်းပြောလိုစိတ်က အရိုးထဲ၌ ထွင်းထားသကဲ့သို့ ရှိ၏။ လက်ရှိအချိန်သည် တည်ငြိမ်နေပြီဖြစ်ရာ လူများစွာက စတင်၍ တူးဆွလာကြသည်။ 

သူတို့ရဲ့ အေးစက်တဲ့ ဗိုလ်ချုပ်ကြီးမှာ တကယ်ပဲ အိုမီဂါ ရှိနေတယ်လေ … 

လူအချို့ဆိုပါက အဆိုပါ ဆက်ဆံရေးနှင့်ပတ်သက်၍ ယူဆချက်များကိုပင် ပြုလုပ်လာကြသည်။ လင်းဟန်သည် မူလက အရပ်သားနယ်မြေရှိ အိုမီဂါတစ်ဦးဖြစ်၏။ သို့သော် ဗိုလ်ချုပ်အား စစ်ပွဲတွင် တွေ့ခဲ့ရပြီးနောက် ချစ်ကျွမ်းဝင်သွားကာ ဗိုလ်ချုပ်ကို တွေ့ရန်အတွက် အဓိကနယ်မြေသို့ အစွမ်းကုန်ကြိုးစား၍ လာရောက်ခဲ့လေသည်။ 

ကံမကောင်းစွာဖြင့် ဗိုလ်ချုပ်သည် ချဉ်းကပ်ရန် မလွယ်ကူပဲ အေးစက်လှ၏။ ထို့အပြင် တက္ကသိုလ်ရှိ အိုမီဂါတိုင်းသည်လည်း ထိုသူ့အား မျက်နှာသာပေးကြလေသည်။ ထို့ကြောင့် လင်းဟန်သည် ဟယ့်ယွင်ထင်၏ အာရုံစိုက်မှုကို ရရှိရန် သုတေသနဌာနသို့ ဝင်ရောက်ခဲ့၏။ သူက နှစ်စဉ်နှစ်တိုင်း လေ့ကျင့်ရေးတွင် ပါဝင်ခဲ့ပြီး အလှည့်အပြောင်းတစ်ခုကို စတင်နိုင်ခဲ့၏။ 

ယခုအခါ လင်းဟန်၏ လုပ်ဖော်ကိုင်ဖက်များသည်လည်း “နောက်ကွယ်ကအစ်ကိုကြီး” မှာ မည်သူဖြစ်ကြောင်း ခန့်မှန်းနိုင်နေပြီဖြစ်၏။ 

ဘယ်က အချိန်အကြာကြီး မျက်နှာသာ အပေးမခံခဲ့ရတာလဲ … ဘယ်သူက လက်တွေ့လေ့ကျင့်ရေးကိုသွားဖို့ စိတ်ပျက်လက်ပျက်ဖြစ်နေတာလဲ ... လွန်ခဲ့တဲ့ နှစ်တွေတုန်းက လင်းဟန်က ဌာနကိုတောင် ပြေးမလာချင်ခဲ့တဲ့လူပါနော် … 

သူတို့က ယခင်အဖြစ်အပျက်များကို စဉ်းစားလျက် ဗိုလ်ချုပ်သာလျှင် လင်းဟန်အား လိုက်ခဲ့သူဖြစ်ကြောင်း ကောက်ချက်ချလိုက်ကြသည်။ သူက သူ၏ ယာဉ်ပျံကို နေ့စဉ် စေလွှတ်ခဲ့သည်။ သူ၏ မက်ခါကိုပင် ယူဆောင်ခဲ့ပြီးလင်းဟန်နှင့် ကိုယ်တိုင်ကိုယ်ကျ လာရောက်တွေ့ဆုံခဲ့၏။ 

အများစုက “ဗိုလ်ချုပ်ကြီးက သူ့ကိုလိုက်ခဲ့တာ” ဟူသည့် စကားနှင့်ပတ်သက်၍ စိတ်ကူးယဉ်ဆန်သည်ဟု တွေးနေကြဆဲဖြစ်သည်။ သို့သော် ပိန်ပါးသော အိုမီဂါသည် ထိုမျှကြီးမားသည့် မက်ခါအား မောင်းနှင်နိုင်ခြင်းရှိမရှိ မေးခွန်းထုတ်နေကြသူများလည်း ရှိနေ၏။ 

ဤတစ်ကြိမ်၌ လင်းဟန်၏ လုပ်ဖော်ကိုင်ဖက်များသည် အမှုမထားစွာဖြင့် ထိုသူတို့အား SSS အဆင့် စိတ်စွမ်းအားအကြောင်း သိမသိ မေးခွန်းထုတ်လိုက်ကြ၏။ ဌာနတစ်ခုလုံး၌ ထိုသို့သော အိုမီဂါမှာ လင်းဟန်တစ်ဦးသာ ရှိ၏။ ထိုမျှသန်မာသည့် အိုမီဂါသည် သူ၏အယ်လ်ဖာ၏ မက်ခါအား မောင်းနှင်ခြင်းသည် မထူးဆန်းချေ။

လက်ရှိအချိန်၌မူ မည်သူမှ မယုံကြည်ကြသေးချေ။ ကိစ္စများသည် အခြေတကျ မဖြစ်သေးသည့်တိုင် လူများကမူ တက်ကြွနေကြဆဲဖြစ်၏။ မည်သို့ပင်ဖြစ်စေ၊ ခံတပ်ရှိ ဆာဂျင်များကမူ ထိုသို့ အတင်းပြောရန် အချိန်မရှိချေ။ 

ဟယ့်ယွင်ထင်သည် ကြယ်သင်္ဘောပေါ်တွင် မျက်ခုံးများကို တွန့်ချိုးလျက် ရှိနေသည်။ သူက ဇာ့ဂ်တစ်ကောင်၏ ချိုးဖျက်ရန်ကြိုးစားမှုကို ဆဌမအကြိမ်မြောက် ကြားခဲ့ရ၏။ သူက ဝမ်ယွီ၏ ကြယ်ခွဲသို့ တစ်ချိန်ထဲ ရောက်ရှိခဲ့သည့် လုဟွိုက်အား ဆက်သွယ်ခဲ့သည်။ တစ်ဖက်လူက အရာအားလုံး ပုံမှန်ဖြစ်ကြောင်း တင်ပြလာ၏။ 

ကြယ်ခွဲ၌ လူအမြောက်အများ မရှိချေ။ ခုန်မှတ်သည် အလွန်ဝေးကွာသည့် တစ်နေရာ၌ ရှိ၏။ သို့သော် လုဟွိုက်သည် မတော်တဆမှု တစ်စုံတစ်ရာ ဖြစ်လာမည်ကို စိုးရိမ်စွာဖြင့် သေသေချာချာ စစ်ဆေးခဲ့လေသည်။ အပြင်ဘက်တွင် ဝန်းရံနေသည့် အကာအကွယ်များ၊ စွမ်းအင်သိုလှောင်မှု အမှတ်အသားအဖြစ် လင်းလက်နေသော ကြယ်များမှအပ ခံတပ်တစ်ခုလုံး တည်ငြိမ်လျက်ရှိလေသည်။ 

“ဘော့စ် …” 

လုအန်းဟယ်က ခြောက်ကြိမ်မြောက် တင်ပြချက်ကို ကမ်းပေးလိုက်သည်။ 

“K နယ်မြေက ရပ်နားစခန်းလည်း သေချာကာကွယ်ထားပါတယ် … ဇာ့ဂ်အနည်းငယ်က ကျူးကျော်ဖို့ ကြိုးစားခဲ့ပေမယ့် သုတ်သင်ခံခဲ့ရပါတယ် …” 

“အင်း ..” 

ဟယ့်ယွင်ထင်က ပြန်ဖြေလိုက်သည်။ 

ကူးလုလုသည် မက်ခါမှဆင်းရန် ငြင်းဆန်လျှက်ရှိ၏။ လင်းဟန်သည်လည်း ကူးလုလု တစ်ကောင်ထဲဖြစ်နေမည်ကို စိုးရိမ်သည့်အလျောက် မက်ခါပေါ်မှ မဆင်းခဲ့ချေ။ သူက လွန်ခဲ့သော တစ်ရက်အကြာက မက်ခါတစ်ခုလုံးကို စစ်ဆေး၍ တင်ပြခဲ့၏။ 

သူ မက်ခါပေါ်မှဆင်းကာ ဟဲလ်မက်ကို ချွတ်လိုက်သည့် မြင်ကွင်းကို ဆာဂျင်အားလုံး မှတ်မိနေကြဆဲဖြစ်၏။ ဆာဂျင်များက “ဗိုလ်ချုပ်ကတော်” အား ပို၍ မြင်လိုကြသော်လည်း ဟယ့်ယွင်ထင်သာလျှင် မက်ခါအတွင်းသို့ ဝင်ရောက်ကာ သူ့အား စကားပြောနိုင်လေသည်။ 

ထိုအရာက အိုမီဂါအား ဖွက်ထားနိုင်သည့် ရွှေရောင်အိမ် ဖြစ်ပုံရ၏။ 

လင်းဟန်သည် တံခါးပွတ်တိုက်သံကြောင့် မော့ကြည့်လိုက်၏။ ဟယ့်ယွင်ထင်က သူ့ထံသို့ လျှောက်လာလျက်ရှိသည်။ လင်းဟန်က အလင်းဖန်သားပြင်ကို အနည်းငယ် မှိန်ဖျော့စေလိုက်သည်။ သူက ဟယ့်ယွင်ထင် ထိုင်လိုက်သည်နှင့် တစ်ဖက်လူ၏ မျက်ခုံးတန်းများကို အသာအယာ နှိပ်ပေးလိုက်၏။ 

နောက်ထပ် ငါးရက်ကြာသည်အထိ ခံတပ်တစ်ခုလုံး တိတ်ဆိတ်နေခဲ့သည်။ စောင့်ကြည့်နေသည့် မက်ခါများသည်လည်း မည်သည့်လှုပ်ရှားမှုကိုမှ မတွေ့ခဲ့ရချေ။ သို့သော် ထိုသို့ဆိုလျှင်ပင် ဗိုလ်ချုပ်ကြီးသည် စွမ်းအင်သိုလှောင်စက်များ၊ စစ်ပွဲအတွက် ပြင်ဆင်ထားသည့်အရာများကို အထပ်ထပ်အခါခါ စစ်ဆေးလျက် မည်သည့်အရာမှ မှားယွင်းနေခြင်း မရှိကြောင်း အတည်ပြုနေခဲ့၏။ ထို့အပြင် အချက်အလက် အမျိုးမျိုးကိုလည်း စုစည်းလျက် ရှိသည်။ 

သာမန်ဆာဂျင်များသည် ကျန်းမာရေးနှင့် အိပ်စက်ချိန်အတွက် အစောင့်တာဝန်များ ခွဲဝေထားကြ၏။ သို့သော် ထိုသူကမူ ပင်ပန်းပုံမရချေ။ သူက အရာအားလုံးကို စီမံပြီးသည်နှင့် မက်ခါသို့ပြန်၍ ခဏသာ အနားယူလေ့ရှိ၏။ 

လင်းဟန်က ဟယ့်ယွင်ထင်၏ မျက်ခုံးများကို ကြည့်နေမိသည်။ သူက ဟယ့်ယွင်ထင်အား မည်မျှပင်ပန်းခဲ့ကြောင်း မမေးခဲ့သလို မည်သည့်အရာကိုမှလည်း မပြောခဲ့ချေ။ ဟယ့်ယွင်ထင်၏ လက်ချောင်းများကိုသာ သူ့လက်များဖြင့် ဆုပ်ကိုင်ထားခဲ့၏။ သူက ‘ခင်ဗျား ပင်ပန်းတာကို ကျွန်တော့်ရှေ့မှာ ဟန်ဆောင်စရာမလိုပါဘူး’ ဟူသည့် စကားကို အပြုအမူဖြင့်သာ ဖော်ပြခဲ့၏။ 

၎င်းက အလွန် တမူထူးနေသည်။ 

အားလုံးက ခံစစ်စတင်သည်နှင့် အလွန်ခက်ခဲသည့် တိုက်ပွဲဖြစ်မည်ဟု ထင်ခဲ့ကြသည်။ သို့သော် ပထမဆုံးတိုက်ပွဲမှအပ ကျန်တိုက်ပွဲများသည် အရှိန်လျော့လာခဲ့၏။ အားလုံးက ဇာ့ဂ်များသည် ဒီအတိုင်း ဆော့နေကြခြင်းဖြစ်သည်ဟု တွေးလာကြသည်။ သို့မဟုတ် ပထမဆုံးတိုက်ပွဲကြောင့် ဇာ့ဂ်များအားလုံး ဆုတ်ခွာသွားခဲ့ပြီး ဇာ့အနည်းငယ်သာလျှင် တောင့်ခံနေခြင်းဖြစ်သည်ဟု ယူဆလာကြ၏။ 

သို့သော် စစ်မြေပြင် အတွေ့အကြုံရှိသူတိုင်းသည် ထိုရက်စက်သော မျိုးနွယ်စုအကြောင်း ကောင်းစွာ နားလည်ကြသည်။ သူတို့က တိုက်ခိုက်ရန် ဆုံးဖြတ်ထားသရွေ့ မည်သည့်နည်းနှင့်မှ ဆုတ်ခွာမည်မဟုတ်ပေ။ သူတို့က မည်သူမှ မကျန်တော့သည်အထိ ဆက်လက်တိုက်ပွဲဝင်ကြပေလိမ့်မည်။ 

အဆင့်မြင့်ဇာ့ဂ်များ၏ အသိဉာဏ်သည် လူသားများနှင့် ယှဉ်နိုင်၏။ သူတို့က စစ်သည်များကို စုစည်းနိုင်ပြီး ဆက်သွယ်နိုင်သည့် နည်းလမ်းများစွာ ပိုင်ဆိုင်ထားကြသည်။ ထို့ကြောင့် လက်ရှိအခြေအနေသည် အလွန်ထူးဆန်း၏။ 

ဇာ့ဂ်များသည်လည်း အသိဉာဏ်ရှိကြသည်။ သူတို့က စစ်ကြေငြာရန် ရွေးချယ်လိုက်ပြီဖြစ်ရာ မြင့်မားသော အမိန့်ပေးစနစ်လည်း ရှိရပေမည်။ သို့သော် ယခုအခါ အဆိုပါ ကြိုကြားကြိုကြား တိုက်ခိုက်မှုသည် စခန်းစောင့်များအား ကျီစယ်နေသည်နှင့်တူ၏။ 

သူတို့က တူညီတဲ့ခံစစ်ကို ငါးခါတိတိ ရှုံးနိမ့်ခဲ့တယ်တဲ့လား … 

“ဒီတော့ …” 

လင်းဟန်က ဟယ့်ယွင်ထင်၏ အတွေးကို နားလည်သွားသည်။ 

“သူတို့က တစ်ခုခုကို စမ်းသပ်နေတာလား …”

ဒါမှမဟုတ် ပြိုင်ဘက်ကို အလဲထိုးဖို့ ချောင်းမြောင်းနေတာလား …

👾