Chapter 129

💘Chapter 129 

သူက ငယ်သေးတယ်

လူထုနေ့စဥ်က ဤ Weiboပို့စ်ကို တင်ပြီး မကြာခင်မှာပဲ ဤတစ်ခေါက်ဖမ်းဆီးခံရသည့် သံသယရှိသူ၏ Weibo အကောင့်က ချန်ဖုန်းအုပ်စု၏ရှေ့နေပေးစာမှာ ဖော်ပြထားသော အကောင့်နှင့်အတူတူပဲဆိုသည်ကို စောင့်ကြည့်လေ့လာသူများက တွေ့ရှိခဲ့ကြသည်။

မှတ်ချက်ဘားတန်းတစ်ခုလုံး ပေါက်ကွဲသွားခဲ့သည်။

ကောလာဟလတွေက တောမီးလို  ပြန့်နှံ့ကြတယ်ဟု လူများက မကြာခဏ ပြောကြပေမဲ့ ၎င်းတို့ကို ရှင်းလင်းရန်က အတော်ကို ခက်ခဲသည့် စိန်ခေါ်မှုကြီးပါပင်။သို့ပေမဲ့ ဝေ့ချန်၏ ကိစ္စမှာတော့ တရားဝင် Weibo အကောင့်တစ်ခုပြီးတစ်ခုက ကောလာဟလများကို ရှင်းလင်း​​ပေးရန် ထွက်လာခဲ့သည်။

ကောလဟာလကို စတင်ခဲ့သူတွေက အဆုံးမှာ ဒီလောက်ကြီးကျယ်ခမ်းနားတဲ့ ရှင်းလင်း​ရေးပွဲဖြစ်လာမယ်လို့ စိတ်ကူးဖူး​ကြရဲ့လား...

[ဟားဟားဟား ဝေ့ချန်ကို အသရေဖျက်ဖို့ ကြိုးစားခဲ့သူတွေက သူ့ရဲ့ အဆက်အသွယ်တွေ ဒီလောက်ကျယ်ပြန့်မယ်လို့ မမျှော်လင့်ထား​ကြဘူး...သူတို့က မားကတ်တင်းနည်းဗျူဟာမျိုးစုံကို သုံးခဲ့ပြီး သူ့ကို တိုက်ခိုက်ဖို့ ရေတပ်ကို ငှားခဲ့ကြပေမဲ့ အခု အဲဒီတရားဝင် အကောင့်ကြီးတွေအကုန်လုံးက ကောလာဟလ​တွေကို ရှင်းလင်းဖို့ ထွက်လာ​နေကြတယ်... ကောလဟာလကိုအစပျိုးသူတွေရဲ့မျက်နှာတွေက ပါးဖြတ်ရိုက်ခံရပြီး ​ဖောရောင်နေမလားလို့ သိချင်မိတယ်]

[ကောင်းလိုက်တာ... ဒီလို ကောလဟာလ​​ပြန်​ကြားရေးခွေးတွေက အရမ်းစိတ်အနှောက်အယှက်ဖြစ်စရာကောင်းတယ်... ဟားဟား ဒီတစ်ခါတော့ သူတို့ကိုယ်ဖော်တဲ့ဆေးကို ကိုယ်မြည်းလိုက်ရ​ပြီ...နောက်နောင် တစ်ယောက်ယောက်ကို ကောလာဟာလတွေနဲ့ ပစ်မှတ်ထားတဲ့အခါတိုင်း၊ သူတို့ကို မြန်မြန် ဖမ်းပြီး ကောလဟာလ​​ပြန်​ကြားရေးခွေး​တွေကို တရားခွင် ပို့ဆောင်နိုင်မယ်လို့ မျှော်လင့်တယ်...အွန်လိုင်းလေထုကို ရှင်းလင်းရေးလုပ်ဖို့ လိုတယ်]

[ငါဒီကောလဟာလ​​ပြန်​ကြားရေး​​ခွေးတွေကို သည်းမခံနိုင်ဘူး... ဟားဟားဟား ဒီတစ်ခါ သူတို့ သံပူပြားကို ကန်မိသွားကြတယ် မဟုတ်လား...နောက်နောင် ဘယ်သူမဆို မှားယွင်းစွပ်စွဲခံရတိုင်း ကောလာဟာလ​ပြန်​ကြားရေး ခွေးတွေကို ဖမ်းပြီး တရားခွင်ပို့ပြီး ဒီလို ထိထိရောက်ရောက် ကိုင်တွယ်ဖြေရှင်းနိုင်မယ်လို့ မျှော်လင့်တယ်]

အနှီရှင်းလင်းရေးပို့စ်များနှင့် ယနေ့ အိပ်မက်ဖလားသတင်းစာရှင်းလင်းပွဲကြောင့် အွန်လိုင်းလူထုသဘောထားက "အလင်းရောင်"၏ဘက်မှာပဲ အပြတ်အသတ်ရှိလာပြီး ဤအံ့အားသင့်ဖွယ်စိတ်အားလှုပ်ဆော်ပေးသောလက်ရာက နောက်ဆုံးတွင် ၎င်း၏အမည်ကို ရှင်းလင်းပြီး ၎င်း၏ပုံစံအမှန်ဖြင့် ကမ္ဘာရှေ့မှောက်တွင် ပေါ်လာနိုင်ခဲ့သည်။

သတင်းစာရှင်းလင်းပွဲလုပ်သည့်နေ့တွင် အိပ်မက်ဖလားဖိုင်နယ်ပွဲအတွက် ပြပွဲဧရိယာကို ပိတ်ထားခဲ့ပြီး ထိုအချိန်မှာ လူများစွာက အပြင်တွင် ရပ်ကာ ပြပွဲပြန်ဖွင့်မည့်အချိန်ကို စောင့်မျှော်နေခဲ့ကြသည်။

"အလင်းရောင်"က ခိုးကူးမဟုတ်ကြောင်း သူတို့ကအခိုင်အမာယုံကြည်ကြသည်။ မနေ့က ခဏတာ မြင်လိုက်ရသည့် အကျိုးသက်ရောက်မှုက သိသာထင်ရှားလွန်း၍ ယင်းကကော်ပီမျှသာ ဖြစ်နိုင်သည်ဟု သူတို့ မယုံကြည်နိုင်ခဲ့ပေ။ဒီလိုမျိုး နင့်နင့်သည်းသည်းရင်ထဲထိစေတဲ့ ပန်းချီကားက ကူးချရုံသက်သက်နဲ့ ဖန်တီးလို့ရပါ့မလား...

မဖြစ်နိုင်ဘူး...

"အလင်းရောင်" ကိုဖန်တီးသူသည် စိတ်ပျက်အားငယ်မှုမှ မျှော်လင့်ချက်အထိ လုပ်ငန်းစဉ်တစ်ခုကို ဖြတ်သန်းခဲ့ရပေမည်။ ဒီလိုမှမဟုတ်ရင် ဒီလိုမျိုး စိတ်ခံစားချက်တွေကို ပျော်ရွှင်စရာရော ရင်ကွဲစရာရောကောင်းအောင် ဘယ်လိုလုပ်ဖော်ပြနိုင်မှာလဲ...

"အလင်းရောင်"ကို ဆဲဆိုခြင်း၊ အသရေဖျက်ခြင်းများနှင့် ရင်ဆိုင်ရသောအခါတွင် သူတို့ များစွာတတ်နိုင်ခြင်းမရှိခဲ့ပေ။ထိုရိုးရှင်းသောလုပ်ရပ်များမှတစ်ဆင့် အနုပညာလက်ရာကို ထောက်ခံကြောင်း ပြသရုံတတ်နိုင်ခဲ့သည်။

သတင်းစာရှင်းလင်းပွဲပြီးဆုံးသောအခါ အိပ်မက်ဖလား ဝန်ထမ်းတစ်ဦးမှ ပြပွဲခန်းမအပြင်ဘက်ရှိ မြင်ကွင်းအကြောင်း ကျောက်လီယိုအား အသိပေးခဲ့သည်။ကျောက်လီယိုက အပေါ်ထပ်ဆီသို့ သွားမည့်သူ့ခြေလှမ်းများကို ရပ်တန့်လိုက်ပြီး ဒရိုက်ဘာကို သူ့အား အိပ်မက်ဖလားပြပွဲခန်းမသို့ ခေါ်သွားခိုင်းသည်။

ကျူးကောယွီလည်း ထိုအကြောင်းကိုကြားပြီး ကျောက်လီယို ထွက်သွားသည်ကိုမြင်သောအခါ အနည်းငယ်မှင်တက်နေခဲ့သည်။ဤရလဒ်က သူ့မျှော်လင့်ထားသည်ထက် ကျော်လွန်သွားခဲ့သညိ။ "အလင်းရောင်" ကိုပြသပြီးသည်နှင့်တစ်ပြိုင်နက် ၎င်းသည် ကြီးမားသောတုံ့ပြန်မှုကိုဖန်တီးလိမ့်မည်မှာသေချာသည်၊ သို့သော် "အလင်းရောင်" က တစ်နေ့တည်းတွင်ဤမျှလောက်အားပေးသူများနှင့်လေးစားသူများကို စုဆောင်းနိုင်လိမ့်မည်ဟုသူမျှော်လင့်မထားပေ။

ကျူးကောယွီက ကျောက်လီယို ၏နောက်သို့ လိုက်သွားပြီး ပြပွဲခန်းမဆီသို့ အပြေးသွားခဲ့သည်။ အပြင်မှာ ရပ်နေသည့်လူများက ပြွတ်သိပ်မတေပေမဲ့ ပြပွဲခန်းမပြန်ဖွင့်ပြီး "အလင်းရောင်" ကို သူတို့ရှေ့မှာ ထပ်မံပြသမည့်အချိန်ကို ချမ်းအေးလှသော ဆောင်းလေကို ပြတ်ပြတ်သားသား အံတုကာ ရပ်စောင့်နေကြသည်။

ကျောက်လီယိုက ဝန်ထမ်းဝင်ပေါက်မှ ဝင်သွားခဲ့ပြီး ပြပွဲခန်းမတံခါးပွင့်လာသည်နှင့် အပြင်ဘက်ကမျက်လုံးများအားလုံးက သူ့အပေါ်သို့ ကျရောက်လာသည်။

သူက အသက်ပြင်းပြင်းရှူလိုက်ပြီး လေးနက်ဟန်ရှိနေသည်။ခန်းမအပြင်ဘက်ရှိ လူများကမူ သတင်းစာရှင်းလင်းပွဲ ပြီးဆုံးသွားပြီဖြစ်ပြီး အငြင်းပွားမှုများ၏ ရလဒ်များ ထွက်ပေါ်လာပြီဖြစ်​ကြောင့် မှန်းဆမိသွားကြသည်။

ကျောက်လီယိုက ထိုမျှော်လင့်ချက်ပြည့်နေသော မျက်နှာများကို ကြည့်ကာ လေးလေးနက်နက် ဦးညွှတ်လိုက်သည်။ထို့နောက်သူက မတ်မတ်ရပ်ပြီး ဆိုလိုက်သည်။

"အိပ်မက်ဖလားက လူ​ကြီးမင်းတို့ကို စိတ်ပျက်စေမှာ မဟုတ်ပါဘူး... 'အလင်းရောင်'ကလည်းအတူတူပါပဲ"

ကျောက်လီယို၏စကားများ ထွက်ကျလာသောအခါတွင် လူအုပ်ကြီးက ဝမ်းသာအားရအော်ဟစ်အားပေးခဲ့ကြသည်။သူတို့၏​ထောက်ခံအားပေးမှုက အချည်းနှီးမဟုတ်ခဲ့၊ သူတို့၏ စောင့်ဆိုင်းခြင်းသည်လည်း အချည်းနှီးမဟုတ်ခဲ့။ "အလင်းရောင်" နှင့် အိပ်မက်ဖလား နှစ်ခုစလုံးက သူတို့မျှော်လင့်ထားသည့်အတိုင်း ဖြစ်လာခဲ့သည်။ သူတို့လိုအပ်သည်က ဒါအကုန်ပါပင်။

"လူ​ကြီးမင်းတို့ရဲ့အား​ပေးမှုကို ကျေးဇူးတုန့်ပြန်ဖို့ အိပ်မက်ဖလားက  ဖိုင်နယ်ပြပွဲကို သုံးရက်ရွှေ့ဆိုင်းဖို့ ဆုံးဖြတ်လိုက်ပါပြီ... အနာဂတ်မှာ အိပ်မက်ဖလားကို ဆက်လက်အား​ပေးကြဖို့ ကျွန်​တော်တို့ တောင်းဆိုပါတယ်... ကျွန်တော်တို့က ကျွန်​တော်တို့ရဲ့ မူလရည်ရွယ်ချက်​တွေကို မပြောင်းလဲဘဲ အိပ်မက်​တွေကို အကောင်အထည်ဖော်ဖို့ မျှော်လင့်နေကြတဲ့ ပန်းချီပညာရှင်အားလုံးအတွက် နေရာတစ်ခုအဖြစ် ဆက်လက်တည်ရှိနေမှာဖြစ်ပါတယ်" 

ကျောက်လီယိုက စိတ်ရင်းဖြင့် ပြောကြားခဲ့သည်။ သူ့အမူအရာက တည်ငြိမ်လေးနက်ပုံပေါ်သော်လည်း ထိုတည်​ငြိမ်မှုအောက်တွင် သူ နက်နက်ရှိုင်းရှိုင်းကို ရင်ထဲထိသွားခဲ့သည်။ သူ့မျက်လုံးများထဲတွင် မျက်ရည်များ လျှံတက်လာပြီး မကျသွားစေရန် ရုန်းကန်နေရသည်။

အားပေးကြွေးကြော်သံများ ထပ်မံ ထွက်ပေါ်လာပြန်သည်။ကျောက်လီယိုမရောက်မီတွင် ပတ်ဝန်းကျင်က အနည်းငယ်လေးနက်တည်တံ့နေသော်လည်း သူရောက်ရှိလာပြီးနောက် မြင်ကွင်းတစ်ခုလုံး ရွှင်လန်းတက်​ကြွလာခဲ့သည်။

အိပ်မက်ဖလားက တရုတ်နိုင်ငံတွင် နှစ်ပေါင်းများစွာ ရပ်တည်နိုင်ခဲ့သည်မှာ အကြောင်းမဲ့မဟုတ်​ပေ။မကြာသေးမီနှစ်များအတွင်း ပန်းချီပြိုင်ပွဲများစွာ ပေါ်ပေါက်လာခဲ့သော်လည်း အိပ်မက်ဖလယးက ပန်းချီပညာရှင်များအတွက် အထွတ်အမြတ်ထားရာ နေရာတစ်ခုအဖြစ် အမြဲသတ်မှတ်ခံခဲ့ရသည်။

ကျူးကောယွီက စင်မြင့်ပေါ်သို့ မတက်ခဲ့ပေ။လူအုပ်ကြီးတဖြည်းဖြည်း လူစုကွဲသွားသည်အထိ သူစောင့်နေပြီးမှ ကားပေါ်တက်ခဲ့သည်။

ကျူးကောယွီ ကားမောင်းထွက်သွားစဉ် ဆေးလ်ဗတ်စ်တာ၏အကြည့်များသည်  အိပ်မက်ဖလားပြပွဲခန်းမဆီတွင် သံမှိုစွဲနေခဲ့သည်။ဆေးလ်ဗတ်စ်တာက ခန်းမကို မမြင်နိုင်သောအခါမှသာ သူ့အကြည့်ကို ရုပ်သိမ်းလိုက်ပြီး ကျူးကောယွီအားပြောလိုက်၏။

"ဒီနေရာကို ငါကြိုက်တယ်"

ကျူးကောယွီက "ဒီနေရာ" ၏အဓိပ္ပါယ်ကို သိပြီး ပြုံးလိုက်သည်။

"နောက်တစ်ခါလာလည်ဖို့ဖိတ်ခေါ်ပါတယ်"

ဟုတ်သည်၊ဆေးလ်ဗတ်စ်တာ တရုတ်ပြည်ကနေ ပြန်သွားသည်။ သူ့အစီအစဉ်အရ မြို့တော်မှာ ပြပွဲပြီးလျှင် သူ့နိုင်ငံကို ပြန်သွားရမှာဖြစ်သည်။ သို့သော် "အလင်းရောင်" အပေါ်ထားသည့် သူ၏မျှော်လင့်ချက်ကြောင့် သူဆက်နေခဲ့သည်။"အလင်းရောင်"ကို မြင်လိုက်ရပြီဖြစ်၍ ပြန်သွားရမည့် အချိန်ရောက်​လေပြီ။

ဆေးလ်ဗတ်စ်တာ အခုထိ မ​ပြန်ချင်သေးဘဲ ချန်လီပြန်လာသည်ကို စောင့်ဆိုင်းပြီး ချန်လီ သူ့အား အထင်ကြီးစေအောင်လုပ်ကာ ချန်လီကို သူ့အား ကျူးကောယွီလို ဆရာတစ်ယောက် လူကြီးသူမတစ်ယောက်အဖြစ် မှတ်ယူစေချင်​လေသည်။ သို့ရာတွင်၊ အခြားတစ်ဖက်မှအရာများသည် နောက်ထပ်နှောင့်နှေးရန်မဖြစ်နိုင်သည့်အခြေအနေသို့ ရောက်ရှိ​နေခဲ့သည်။ သူပြန်မှရမည်။

"အိုင်း စိတ်မ​ကောင်းစရာပဲ"

ဆေးလ်ဗတ်စ်တာက သက်ပြင်းချလိုက်သည်။

"မင်းနောင်တရရင် နောက်တစ်ခေါက်ပြန်လာလေ"

ကျူးကောယွီက အဝေးပြေးလမ်းပေါ်ကနေ လေဆိပ်ဆီသို့  မောင်းရင်း ပြောလိုက်သည်။

"နောက်တစ်ခါ မင်းလာရင် ရှောင်လီက ပို​တောင်ကောင်းလာမှာ"

လက်ရှိမှာ ချန်လီ၏ပန်းချီစွမ်းရည်များသာမက ချန်လီကျန်းမာရေးကပါ ဆက်တိုက်ဆိုသလို တိုးတက်ကောင်းမွန်လာနေသည်။

"သူတကယ်ကောင်းလာလိမ့်မယ်" 

ဆေးလ်ဗတ်စ်တာက သဘောတူသည်။ချန်လီက သနားစိတ်ကိုသာမက လေးစားသဘောကျစိတ်ကိုပါဖြစ်ပေါ်စေသည့် လူငယ်တစ်ဦးဖြစ်သည်။

ထိုနောက်မှာတော့ သူတို့နှစ်ယောက် ကားထဲမှာ ရောက်တတ်ရာရာ စကားစမြည်ပြောခဲ့ကြပေမဲ့ စာကြောင်းတိုင်းက ချန်လီ၏ ဖွံ့ဖြိုးတိုးတက်မှုအတွက် သူလိုအပ်နေသည့်အရာ၊ သူတိုးတက်ရမည့် ဦးတည်ချက် စသည်များမှာပဲ သံသရာလည်နေသည်။အချို့သောအချက်များအပေါ် သဘောထားကွဲလွဲခဲ့ကြသော်လည်း ချန်လီကို လက်ရှိအချိန်တွင် အများ​ပြည်သူ၏ရှေ့သို့ ​ခြေချခွင့်မပြုရန် နှစ်ဦးစလုံး သဘောတူခဲ့ကြသည်။

အနာဂတ်မှာ ဤပုဂ္ဂိုလ်ကြီးနှစ်ဦး၏ သူ၏အသက်​မွေးဝမ်းလမ်းကြောင်းတွင် ပံ့ပိုးပေးမှုဖြင့် ချန်လီတစ်ယောက် ချောမွေ့စွာ ရွက်လွှင့်နိုင်မည်မှာသေချာသည်ဟု သူတို့ ယုံကြည်သည်။

ကျူးကောယွီ ဆေးဘ်ဗတ်စ်တာကို လေဆိပ်လိုက်ပို့ပြီးချိန်မှာ ကောင်းကင်က လုံးဝမှောင်​နေပြီ​​ဖြစ်သည်။ ကောင်းကင်မှ နှင်းပွင့်များ ကျလာပြီး နှင်းများဝေလာသည်။

နှင်းကျနေပြန်လေပြီ။

ကျူးကောယွီက သူ့ကားထဲသို့ အမြန် ဝင်ပြီး သူ့ကိုယ်ပေါ်မှ နှင်းပွင့်များကို ခါချလိုက်သည်။ထိုအချိန်တွင် သူ၏ဖုန်းသည် WeChat မက်ဆေ့ချ် ​ရောက်လာကြောင်း ညွှန်ပြသည့် အကြောင်းကြားချက်အသံတစ်ခု ထွက်လာခဲ့သည်။ကျူးကောယွီ သူ့ဖုန်းကို ကောက်ကိုင်လိုက်ပြီး WeChat ကိုဖွင့်လိုက်ရာ ဝေ့ချန်ဆီက မက်ဆေ့ချ်ကို တွေ့လိုက်သည်။ ၎င်းတွင် အပြာရောင်ကောင်းကင်၊ သဲသောင်ပြင်နှင့် နွေရာသီ၏ အလှတရားများ ပါဝင်သည့် ဓာတ်ပုံတချို့ပါရှိ​လေသည်။

သို့သော်လည်း ကျူး​ကောယွီ၏အာရုံကိုဖမ်းစားနိုင်သည်မှာ ချန်လီနှင့်ဝေ့ချန်တို့၏နှစ်​ယောက်တွဲ​ဓာတ်ပုံတစ်ပုံဖြစ်သည်။ တောက်ပသော နေရောင်အောက်တွင် သူတို့နှစ်ဦးက formal suitကိုယ်စီ၀တ်ဆင်ထားပြီး ကင်မရာကို ပြုံးပြ​နေသည်။

ကျူးကောယွီ၏အာရုံကို ဆွဲဆောင်နိုင်ရသည့် အကြောင်းရင်းမှာ ချန်လီ၏ နှုတ်ခမ်းများ ယောင်ယောင်လေး ကွေးညွတ်​နေသည်ကို မြင်လိုက်ရသောကြောင့် ဖြစ်သည်။

ဟုတ်သည်၊ ဤပုံထဲမှာ ချန်လီက ပြုံးနေသည်။မသိသာပေမဲ့ သူ့မျက်လုံးထဲက အမူအရာက အပြုံးတစ်ပွင့်ကိုပြသ​​နေသည်။ချန်လီ နှင့် ဝေ့ချန် ဩစတေးလျတွင် မည်သည့်အရာများတွေ့ကြုံခဲ့ရသည်ကို ကျူးကောယွီနားမလည်ပါချေ။မည်သို့ပင်ဆိုစေကာမူ ချန်လီက ပြုံးနေသည်– အမြဲတမ်း ခံစားချက်မဲ့နေသောအမူအရာဖြင့်ရှိနေသည့် ချန်လီဆီက စစ်မှန်သော အပြုံးတစ်ပွင့်ဖြစ်၏။

"အရမ်းလှတယ်"

ကျူးကောယွီက စကားနှစ်လုံး ပြန်ပြောပြီး ကားကို စက်နှိုးကာမောင်းထွက်သွားသည်။ ရှုခင်း​တွေတင်မကဘူး လူတွေလည်း လှတယ်...

ကျူးကောယွီက စိတ်ကောင်းဝင်​နေပြီး ကားမောင်းနေရင်း သီချင်းပင်ညည်းနေသေးသည်။မှန်ပေသည်၊ယခုအချိန်မှာ သူ၏စိတ်ကောင်းဝင်နေမှုကို အနှောက်အယှက်ဖြစ်စေမည့် ဖုန်းခေါ်ဆိုမှုမျိုးသာမရှိလျှင် တကယ့်ကို ပြီးပြည့်စုံသည့်နေ့​လေးတစ်နေ့ဖြစ်မှာပင်။

ကျူးကောယွီ ဖုန်းစခရင်ကို တစ်ချက်ကြည့်လိုက်သည်။လုရှို့ရန်၏အ​ဖေထံမှ ဖုန်းခေါ်ဆိုမှုဖြစ်ပြီး၊ သူနိုင်ငံခြားတွင်ရှိစဉ် သားဖြစ်သူအဖမ်းခံရခြင်းအကြောင်းကို ကြားခဲ့ရပြီး ဖုန်းမခေါ်မီ အခြေအနေကို လျင်မြန်စွာနားလည်​အောင်လုပ်ခဲ့ရသည်။

ပထမအကြိမ် ဖုန်းမြည်သောအခါ ကျူးကောယွီက မကိုင်ပေ။သူ့ဘာသူ အလိုအလျောက် ဖုန်းကျသွားသည်အထိ ဖုန်းကို မြည်စေခဲ့သည်။

ခဏကြာသောအခါ ဖုန်းထပ်မြည်လာပြန်သည်။ကျူးကောယွီက နောက်တစ်ကြိမ် တစ်ချက်ကြည့်လိုက်သော်လည်း မကိုင်ဘဲ ကားကိုပဲ အာရုံစိုက်နေလေသည်။

ဖုန်းက​နောက်တစ်ကြိမ်ထပ်ကျသွား​သော်သော်လည်း ခေါ်ဆိုသူက ဇွဲကောင်းနေကာ ထပ်မံခေါ်ဆိုခဲ့သည်။ ဤတစ်ကြိမ်တွင်၊ကျူးကောယွီက အဝေးပြေးလမ်းမ​ပေါ်မှ ထွက်လာပြီဖြစ်ပြီး ကားရပ်ရန် သင့်တော်သောနေရာကို ရှာပြီးမှ နောက်ဆုံးမှာ မရမကခေါ်နေသောဖုန်းကိုကိုင်လိုက်သည်။

"ကျူးကောယွီ အခြေအနေအကြောင်း ငါကြားပြီးပြီ"

လုရှို့ရန်၏အဖေက အာလာပသလ္လာပများပြောပြီး အချိန်မဖြုန်းတီးဘဲ လိုရင်းကိုတန်းသွားခဲ့သည်။ သူ့အသံက တောင်းပန်သံစွက်နေသည်။

"ငါ့သားက ဒီကိစ္စမှာ မှားခဲ့တာ ဝန်ခံပါတယ်... ဒါပေမဲ့ သူက ငယ်သေးတော့ စိတ်မြန်လက်မြန်ဖြစ်နေတဲ့အချိန်မှာ အမှားလုပ်မိခဲ့တာ... မင်းသူ့ကို ခွင့်လွှတ်ပြီး လွှတ်​ပေးပါ့လားကွာ"

"သူက မငယ်တော့ဘူး... အခုဆို တရားဥပဒေကအရွယ်ရောက်နေပြီ... အရွယ်မရောက်သေးသူတွေကိုပေးတဲ့ အကာအကွယ်နဲ့မသက်ဆိုင်တော့ဘူး" 

ကျူးကောယွီကဆိုသည်။

"ငါ အထောက်အထားတွေ တင်ပြပြီးပြီ... ဥပဒေနဲ့အညီ ဆောင်ရွက်သွားမှာ"

လုရှို့ရန်၏အဖေက ကျူးကောယွီက လွယ်လွယ်နှင့် အလျော့ပေးမည်မဟုတ်သည်ကို ခံစားမိပြီး အနည်းငယ်စိတ်ဓာတ်ကျလာသည်။ 

"သူက ဆယ့်ကိုးနှစ်ပဲ ရှိသေးတာ... ဒါက သူ့ဘဝကို ပျက်စီးစေလိမ့်မယ်... သူ့အသက်မွေးဝမ်းကြောင်းအလုပ်တောင် စရသေးတာမဟုတ်ဘူး...ကျူးကောယွီ ငါ့သားက မင်းကို 'ဦးလေး' လို့ခေါ်တာ... မင်းဘာလို့ဒီလောက်နှလုံးသားမဲ့နေတာလဲ...ရှို့ရန်ရဲ့ဘဝကို ဖျက်ဆီးဖို့ ကြိုးစားနေတာလား"

"ငါက သူ့ဘဝကို ဖျက်​ဆီးတယ်​..."

ကျူးကောယွီက နှာမှုတ်လိုက်သည်။  "သူ ငါ့တပည့်ကို ဖျက်ဆီးဖို့ မရမက ကြိုးစားခဲ့တုန်းကရော"

"ဒါပေမဲ့ မင်းရဲ့ကျောင်းသားက ဘာမှမဖြစ်ဘူးမလား"

တစ်ဖက်မှ ပြောင်ပြောင်းတင်းတင်း ရန်တုံ့လိုသော တုံ့ပြန်မှုတစ်ခု ထွက်ပေါ်လာသည်။

"မင်းရဲ့ကျောင်းသားက အဆင်ပြေတယ်လေ... ဒါကြောင့် ငါ့သားက ဘာအမှားမှ မလုပ်ခဲ့ဘူး"

"ဟားဟားဟား…"

ကျူးကောယွီက ရယ်စရာအကောင်းဆုံးဟာသကို ကြားလိုက်ရသလိုမျိုး မရယ်ဘဲ မ​နေနိုင်တော့ပေ။ အမှန်တွင်လည်း ဤသည်က ဟာသကြီးတစ်ခုပါပင်။ကျူးကောယွီ ဤဟာသက တစ်နှစ်တာ၏ ရယ်စရာအကောင်းဆုံးဟာသဟု သတ်မှတ်၍ရသည်ဟုခံစားရသည်။

ကျူးကောယွီက ပြင်းပြင်းထန်ထန် ရယ်မောရင်း မျက်ရည်များ စီးကျလာသည်။ကျူးကောယွီ၏ အထိန်းအကွပ်မဲ့သော ရယ်မောသံကို ကြားလိုက်ရသည်နှင့် လုရှို့ရန်၏အဖေ၏ အမူအရာမှာ မည်းမှောင်သွားသည်။ သူက ပြောလိုက်သည်။ 

"ကျူးကောယွီ ဒီနေ့ကို မှတ်ထားပါ... မင်းရဲ့တပည့်ချန်လီကို မင်းဒီ​လောက်တန်ဖိုးထားနေမှတော့ ငါအခုကြုံတွေ့နေရတာတွေကို မင်းကိုခံစားခွင့်ရအောင် ငါလုပ်ပေးမယ်...ငါရှိနေသရွေ့ မင်းရဲ့ကျောင်းသားက ကောင်းမွန်တဲ့အနာဂတ်မရှိ​စေရဘူး"

"လုလေ့ မင်းဘာတွေတွေးနေလဲ ငါသိတယ်"

ကျူးကောယွီက နောက်ဆုံးတွင် ရယ်ရပ်လိုက်ပြီး သူ့အမူအရာက လေးနက်သွား၏။

"ငါ့တပည့်ကို ဒုက္ခပေးချင်ရင် စမ်းကြည့်လေ... မင်းရဲ့သြဇာက ငါကျူးကောယွီထက်ကြီးသလား ငါကြည့်ချင်တယ်... မင်းသားရဲ့ခြေရာအတိုင်းမင်းလိုက်မှာကို ငါမတွေ့ချင်တာကြောင့် အခုရပ်လိုက်ဖို့ ငါအကြံပြုချင်တယ်"

လုရှို့ရန်၏အဖေလုလေ့က စိတ်ထဲမှာ အစီအစဥ် ဆွဲလိုက်ခါရှိ​သေးသော်လည်း ကျူးကောယွီက ချက်ချင်းတန်းဖြတ်မြင်နိုင်​လေသည်။လက်ရှိအချိန်မှာ ကျူးကောယွီ၏ ပြင်းထန်သော တုံ့ပြန်မှုနှင့် ရင်ဆိုင်ခဲ့ရပြီး ကျူးကောယွီပြောသမျှက အမှန်ဖြစ်သည်ကို သူသိသောကြောင့် ခဏတာ ပြောစရာစကားပျောက်ရှသွားခဲ့သည်။

ကျူးကောယွီက ချန်လီကို ကာကွယ်​ပေထားသရွေ့ သူဘာမှမလုပ်နိုင်မှန်းသိသဖြင့် လုလေ့ ဒေါသတကြီးနှင့် သူ့ဖုန်းကို ပစ်​ပေါက်လိုက်သည်။

ဖုန်းထဲကတဒူဒူအသံကိုကြားသောအခါ ကျူးကောယွီ၏ နှုတ်ခမ်းများ ကော့တက်သွားသည်။လုလေ့က သူ့ကိုစိန်ခေါ်ချင်လျှင် အတွေ့အကြုံနည်းလွန်းသေးသည်ဟု သူထင်သည်။

<< >>

💘