MM Story Teller

Chapter 70

Viewers 5k

🌌Chapter 70

လုမော့က ပွဲကြည့်ရှူသည့်ပလက်ဖောင်းတွင် ထိုင်လိုက်သည်။ ဇာ့ဂ်မျိုးနွယ်များက အမှန်ပင် တည့်တိုးဆန်ပြီး အသည်းမာသည့် မျိုးစိတ်များပင် ဖြစ်သည်။ အရေးကြီးဆုံး ကျေးဇူးတော်ပေးအခမ်းအနားပင် အလွန်တရာ ရိုးရှင်းလွန်းပေ၏။

အနိုင်ရသူက တစ်ယောက်သာလျှင်ရှိနိုင်ပြီး စည်းမျဥ်းများက အလွန် ရိုးရှင်းပေသည်။

အဆုံးတွင် ပြိုင်ကွင်း၌ မတ်တတ်ရပ်ကျန်ခဲ့သည့် မည်သူမဆို အောင်နိုင်သူပင်။

အထူးတလည် အမိန့်များမရှိဘဲ အမှန်စင်စစ်ကို အားအင် တဖြည်းဖြည်း ယုတ်လျော့သွားစေနိုင်သည့် ချေမှုန်းခြင်း တိုက်ပွဲတစ်ခုပင်ဖြစ်သည်။

တိုက်ပွဲတွင် စောစောရှုံးသွားသည့်သူက အကျိုးမရှိချေ။ သို့သော်လည်း တိုက်ပွဲစတင်ကတည်းက တစ်မနက်ခင်းလုံး လေထုက ပြင်းထန်လှပေသည်။ စိန်ခေါ်သူများက ဆက်လက်စိန်ခေါ်နေဆဲဖြစ်ပြီး ရှုံးနိမ့်သူများက အဆက်မပြတ် ထုတ်ပယ်ခံနေရသည်။

အဆုံးတွင်မူ ဤသည်က သူတို့ကိုယ်သူတို့ ထုတ်ဖော်ပြသနိုင်သည့် အခွင့်အရေးပင်။ အကယ်၍ အဆင့်အတန်းမြင့်မားသည့် အမျိုးသားဇာ့ဂ်တစ်ယောက်ယောက်၏ အာရုံကို ဖမ်းစားနိုင်လျှင် မည်သို့ဖြစ်သွားမည်ကို မည်သူမှ အတိအကျ မပြောနိုင်ချေ။

အမျိုးသမီးဇာ့ဂ်များစွာက ထိုကဲ့သို့သော ပုံသေအတွေးမအခေါ်များနှင့် လာခဲ့ကြခြင်း ဖြစ်သည်။

လုမော့ ပတ်ပတ်လည်ကို ကြည့်လိုက်သည်။ ၎င်းက စက်ဝိုင်းပုံသဏ္ဍာန် ပြိုင်ကွင်းတစ်ခုဖြစ်ပြီး ရှေးခေတ်ရောမပုံစံ ပွဲကြည့်စင်နှင့် ဆင်တူကာ ပွဲကြည့်ပရိသတ်ပေါင်း သောင်းနှင့်ချီ ဆံ့ပေသည်။

အခြားထိုင်ခုံများက လေဟာပြင်ဖြစ်သော်လည်း လုမော့ ယခု ထိုင်နေသည့်နေရာမှာ အဆင့်မြင့် အမျိုးသားဇာ့ဂ်များအတွက် ပြုလုပ်ထားခြင်း ဖြစ်သည်။ ၎င်းက ခိုင်ခံ့သော မှန်များနှင့် ဝန်းရံထားသည့် နေရာအသေးလေးတစ်ခုဖြစ်ကာ အပြင်ဘက်မှ နားကွဲမတတ် အားပေးချီးကျူးသံများအား ပိုင်းခြားထားလေသည်။

ရံဖန်ရံခါ အမျိုးသမီးဇာ့ဂ်များက သူတို့ခေါင်းများကို တိတ်တိတ်လေးလှည့်ကာ ဤနေရာကို သူတို့၏မျက်ဝန်းများနှင့် ထွင်းဖောက်မတတ် ကြည့်ကြသည်။

ဆံပင်အနက်ရောင်၊ အစိမ်းရောင်မျက်ဝန်းများနှင့်အမျိုးသားဇာ့ဂ်က အေးစက်စက်မျက်နှာထားနှင့် ရာထူးမြင့်သူများအတွက် ပြုလုပ်ထားသည့် ထိုင်ခုံပေါ်တွင် ခြေချိတ်ထိုင်နေကာ နှင်းဆီအား ရေနွေးငွေ့ဖြင့်ပေါင်းထားသော အဖြူရောင်ခွက်တစ်ခုကို ကိုင်ထားလေသည်။

သူက တစ်ငုံသောက်လိုက်သည်။

အမျိုးသားဇာ့ဂ်က ဘေးနားရှိ စားပွဲခုံပေါ် ခွက်ကို အေးအေးဆေးဆေး တင်လိုက်ကာ သူ့မျက်ခုံးများက ကြုတ်နေ၏။

သူ့ပုံစံက အလွန်အမင်း မပျော်မရွှင် ဖြစ်နေဟန်ပင်။

ထိုအခိုက် ပြိုင်ကွင်းမှ ချီးကျူးအော်ဟစ်သံများက ပြိုင်ကွင်းကို ပေါက်ကွဲထွက်လုနီးပါး အဆင့်တစ်ခုထိ ရောက်အောင် ရုတ်တရက် မြင့်တက်သွားသည်။

အရပ်ရှည်ရှည်ပုံရိပ်တစ်ခုက ပြိုင်ကွင်းတွင် ပေါ်လာခဲ့သည်။

သူက အနက်ရောင် စစ်တပ်ယူနီဖောင်းတစ်စုံကို ဝတ်ဆက်ထားပြီး လက်များက လက်အိတ်ဝတ်ထားသည်။ သူ၏ ထင်ရှားသည့် ငွေရောင်ဆံပင်နှင့် အနီရောင်မျက်လုံးများက ချက်ချင်း သူ၏ အထောက်အထားကို ဖော်ပြနေသည်။

သုံးခုမြောက်စစ်တပ်ရဲ့ ဗိုလ်မှူး...

လင်း...

"ဝှက် သယ် ဖက်...ဒီနှစ် ငါ တကယ်ကြီး သူ့ကို မြင်နိုင်တယ်ပေါ့...ငါ အိပ်မက်များ မက်နေတာလား ဘာလား..."

"ဘာကြီးလဲ...သူက အထီးကျန်သမားတစ်ယောက်ဆိုပြီး ကျော်ကြားတယ် မဟုတ်ဘူးလား..."

"မင်း ကျောက်တုံးတစ်တုံးအောက်မှာ နေနေတာလား...သူလက်ထပ်ပြီးတာဖြင့် ကြာလှပြီကွ..."

လူအုပ်ကြီး၏ အားပေးသံများအလယ်တွင် ငွေရောင်ဆံပင်ရှိသော အမျိုးသမီးဇာ့ဂ်က သေချာသည့် တစ်နေရာသို့ ခေါင်းကို လှည့်လိုက်ပြီး စစ်တပ်ဦးထုပ်ကို ဖြည်းညင်းစွာ ချွတ်ကာ ရင်ဘက်ရှေ့သို့ ထားလိုက်သည်။

သူက ခါးကိုတဖြည်းဖြည်း ဦးညွတ်ကာ ဂါရဝပြုလိုက်လေသည်။ ထိုအရိုအသေပြုမှုမှာ ဇာ့ဂ်မျိုးနွယ်စုတွင် ရှေးအဆန်ဆုံးနှင့် ဂုဏ်သိက္ခာအရှိဆုံး ဓလေ့ကျင့်ဝတ်တစ်ခုဖြစ်၏။

ငါ မင်းအတွက် အောင်ပွဲတွေအားလုံး ယူဆောင်ပေးမယ်...

ငါ မင်းကို အချစ်အားလုံးပေးမယ်...

မင်းအတွက် ငါတိုက်ပွဲဝင်မယ်...

ဤအမူအရာကို သူလုပ်လိုက်သည်နှင့် ပြိုင်ကွင်းအတွင်းရှိ အသံများက လှိုင်းလေထန်သော လှိုင်းများကဲ့သို့ ကျယ်လောင်လာပြီး လှိုင်းလုံးတစ်ခုပြီး တစ်ခုတက်လာကာ ယခင်တစ်ခုထက် မြင့်လာပြီး လူတိုင်းကို မူးဝေသွားစေသည်။

သို့သော်ငြားလည်း ပရိသတ်များကြား လင်းနှင့်ရင်းနှီးကျွမ်းဝင်သော သူတစ်ယောက်က မအော်ခဲ့ပေ။ ထိုအစား အံ့အားသင့်မှုဖြင့် ထိုသူက ပင့်သက်ရှိုက်လိုက်သည်။

ဟက်...

သေစမ်း...တကယ်တော့ မင်းက ဒီလိုအမျိုးသမီးဇာ့ဂ်မျိုးကိုး...

မှန်ခန်းထဲတွင် အနက်ရောင်ဆံပင်နှင့် အမျိုးသားဇာ့ဂ်က မည်သည့် ခံစားချက်အတက်အကျမှ မပြဘဲ သူ၏ နဂို မထူးခြားနားသော အပြုအမူအတိုင်းဆက်လက်ရှိနေဆဲဖြစ်၏။ သို့သော် တစ်ယောက်ယောက်က သူ့အား သေသေချာချာ ဂရုတစိုက်ကြည့်ရှုပါက သူ့နားများက ပန်းရောင်ဖျော့ဖျော့သန်းနေသည်ကို တွေ့ရမည်ဖြစ်သည်။ သူ၏ စိမ်းမြမြ အရောင်လက်နေသော မျက်ဝန်းများက ခန့်မှန်းရခက်လှ၏။

သူက အပူငွေ့ထွက်နေသည့် ကြွေခွက်ကို ကောက်ကိုင်ကာ တစ်ငုံပြီးတစ်ငုံ အဆက်မပြတ်သောက်လိုက်သည်။

သို့သော်ငြား သူ့နှလုံးသားထဲမှ အုံကြွမှုများကို ဖုံးကွယ်နေသည့်အလား သူ့လှုပ်ရှားမှုများက တောင့်တင်းနေပေသည်။ သူ မည်သည်ကို လုပ်နေမိသည်ကိုမသိခြင်း ဖြစ်ကောင်းဖြစ်နိုင်ပေသည်။

-------

လင်းက ဖြောင့်တန်းနေအောင် မတ်တတ်ရပ်လိုက်ပြီး သူ့ပြိုင်ဘက်ကိုမကြည့်မီ ဦးထုပ်ကို ပြန်ဆောင်းလိုက်သည်။

သူ့ကြည့်ရတာ နည်းနည်း ရင်းနှီးနေတယ်...

ပြိုင်ဘက်က အနည်းငယ် မောဟိုက်နေသည်။ သူက B အဆင့် အမျိုးသမီးဇာ့ဂ်တစ်ယောက် ဖြစ်သော်လည်း A အဆင့်အမျိုးသမီးဇာ့ဂ်များကိုပင် အနိုင်ယူနိုင်သည့် တိုက်ပွဲအတွေ့အကြုံ များစွာရှိကြောင်းကို ယခင်တိုက်ပွဲများမှ သက်သေပြခဲ့သည်။

"ခင်ဗျားက အရမ်း အထင်ကြီးစရာကောင်းတယ်လို့ ကျွန်တော်ကြားတယ်...ခင်ဗျားနဲ့တိုက်ခိုက်ဖို့ အခွင့်အရေးရတဲ့အတွက် ဝမ်းမြောက်မိပါတယ်..."

အမျိုးသမီးဇာ့ဂ်၏မျက်ဝန်းများက တလက်လက်တောက်ပနေသည်။

"ကျွန်တော့်နာမည်က ဟွေ့ယွီပါ...ကျွန်တော် ခင်ဗျားကို ဒီနေရာမှာ စိန်ခေါ်တယ်..."

( T/N - သူလေးကို မှတ်မိကြလားမသိဘူး VRတိုက်ပွဲဇုန်မှာ လုမော့နဲ့တွေ့တော့ ဂျင်းထည့်ခံလိုက်ရတဲ့ ကောင်လေးပါ၊😆 ပြီးတော့ လင်းနဲ့လည်း တစ်ခါတိုက်ခဲ့သေးတယ် )

ထိုရင်းနှီးကျွမ်းဝင်နေသည့် စကားက မည်သည့်နေရာမှ လာသည်ကို လင်း မမှတ်မိနိုင်သေးပေ။

သေးသွယ်သည့်ဓားသွားကို သူ့ခါးမှ ဆွဲထုတ်လိုက်ပြီး ခေါင်းညိတ်လိုက်သည်။

"ငါက လင်း ပါ..."

"ဒါပေမဲ့ မင်းအဲ့နာမည်ကို သိပ်မှတ်မိနေဖို့ မလိုပါဘူး..."

လင်းက ပြုံးဖြဲဖြဲလုပ်ပြလိုက်သည်။

"ငါက အရမ်းဒုက္ခပေးတတ်တယ်...ငါ ခဏခဏ နှာတောင်ချေမိတဲ့အထိကို လူတွေက မကြာခဏ ကျိန်ဆဲတတ်တယ်...အဲဒါကြောင့် နာမည်ထုတ်ပြောရတာကို မကြိုက်ဘူး..."

နေရောင်အောက်တွင် ဓားသွားက အေးစက်စက် အလင်းရောင်ကို ထုတ်လွှတ်နေသည်။

----------

မရေမတွက်နိုင်သော ဘောလုံးသဏ္ဍာန် ကင်မရာများက လေထဲတွင် လွင့်မျောနေပြီး ဤအေးစက်သောအလင်းကို ဇာ့ဂ်မျိုးနွယ်တစ်ခုလုံးထံ တိုက်ရိုက်ထုတ်လွှင့်နေ၏။ လိုင်းမိသည့်နေရာတိုင်းတွင် ၎င်းကို မြင်နိုင်ပေသည်။

သေချာပေါက် ထိုအထဲတွင် ဇာ့ဂ်မျိုးနွယ်၏ အထွတ်အထိပ်တွင် ရပ်တည်နေသည့် ပုလ္လင်ပေါ်မှ ဇာ့ဂ်ဧကရာဇ်လည်း ပါဝင်ပေသည်။

သူက တင်းကျပ်စွာ ပိတ်ထားသော ကျောက်တံခါးရှေ့တွင် မတ်တတ်ရပ်လျက် သူ့အမူအရာက တင်းမာ ခက်ထန်နေ၏။

သူ တတ်နိုင်ပါက ဤနေရာတွင် အမှန်တကယ် ရှိမနေချင်ပေ။

"အရှင်ဧကရာဇ်..."

ဇာ့ဂ်ဧကရာဇ်က မျက်ဝန်းများပိတ်ကာ သက်ပြင်းလေးလေးချလိုက်သည်။

"အားလုံး ပြန်သွားလိုက်ပါ..."

"ဟုတ်ကဲ့..."

သူ၏ အခြွေအရံများအားလုံး ထွက်သွားပြီးနောက်မှသာ ဇာ့ဂ်ဧကရာဇ် လက်ဆန့်ပြီး လေးလံလှသော ကျောက်တံခါးကို ပြင်းပြင်းထန်ထန် တွန်းဖွင့်လိုက်သည်။

လေးလံသော အသံတစ်ခုနှင့်အတူ ကျောက်တံခါးက ဖြည်းညင်းစွာ ပွင့်သွားခဲ့သည်။

ထူထဲသောမြူခိုးများက အက်ကွဲကြောင်းမှ တလိပ်လိပ်ထွက်လာပြီး ဇာ့ဂ်တိုင်း၏ စိတ်ကို လှုပ်ခတ်သွားစေသည့် အနံ့ချိုချိုလေးတစ်ခုကို သယ်ဆောင်လာသည်။

တံခါးကို တွန်းဖွင့်ပြီး အထဲမှအရာအားလုံး ပေါ်လွင်လာချိန်တွင် ဇာ့ဂ်ဧကရာဇ်၏အမူအရာက ပို၍ တင်းမာလာပေသည်။

နေရောင်က ဆေးခြယ်ထားသော ဖန်ပြတင်းများမှတဆင့် စိမ့်ဝင်လာပြီး မြေပြင်ပေါ်တွင် ရောင်စုံရောင်ခြည်များကို ကျရောက်စေသည်။

7 မီတာမှ 8 မီတာနီးပါး မြင့်မားလှသည့် အလွန့်အလွန် ကြီးမားလှသည့် ဧရာမအဖြူရောင်ရုပ်တုကြီးက အလယ်တွင် တည်ရှိနေပေသည်။ ရုပ်တုတွင် လှပသည့် မျက်နှာအသွင်အပြင်ရှိကာ မျက်လုံးများကို အသာအယာ ပိတ်ထားပြီး အလွန်သန့်စင်ပြီး ကရုဏာတရားကြီးမားသည့် အမူအရာရှိပေသည်။

ဤရုပ်တုက ဇာ့ဂ်တိုင်းက ချစ်မြတ်နိုးပြီး ကြည်ညိုကြသည့် ဇာ့ဂ်ဘုရင်မ၏ ရုပ်တုပင်ဖြစ်၏။

ရုပ်တုရှေ့တွင် ဧရာမရေချိုးကန်တစ်ခုရှိပြီး ၎င်းမှ ထွက်ပေါ်နေသည့် ထူထဲလှသည့် မြူခိုးများက လေထဲစိမ့်ဝင်ပျံ့နှံ့နေသည်။ မြူခိုးများကြားမှ နူးညံ့ပြီးသွယ်လျသည့် ပုံရိပ်တစ်ခုကို တစ်ယောက်ယောက်က ဝိုးတိုးဝါးတား မြင်နိုင်ပေသည်။

ဇာ့ဂ်ဧကရာဇ်က တံခါးပိတ်ကာ ရေချိုးကန်အစွန်းသို့ ဖြည်းညင်းစွာ ချဥ်းကပ်လာပြီး ဒူးတစ်ဖက်ထောက်ချလိုက်သည်။

"ကြည်ညိုလေးစားစရာကောင်းပြီး မြင့်မြတ်တဲ့အရှင်မ အဘယ့်ကြောင့် ကျွန်ုပ်ကို ဆင့်ခေါ်ရတာပါလဲ...ဘာကိစ္စများရှိလို့ပါလဲ..."

တောက်...(ရေစက်ကျသံ)

တောက်...

ရေသံနှင့်အတူ မြူမှုန်မှိန်ဖျော့သော အသွင်သဏ္ဌာန်က မြူခိုးများကို ဖယ်ထုတ်လိုက်ရာ ပိုကြည်လင်လာသည်။

"အိုး...ချစ်လှစွာသော ဇာ့ဂ်ဧကရာဇ်..."

ကြားရသူတိုင်းကို မျက်ရည်ကျစေနိုင်သည့် အလွန်နူးညံ့သိမ်မွေ့သည့် အသံတစ်သံက ပဲ့တင်ထပ်လာသည်။

သွယ်လျလှပသည့် လက်တစ်ဖက်က မြူခိုးများကြားမှ ထွက်ပေါ်လာပြီး တလက်လက်တောက်ပနေသည့် ရေစက်လေးများက နူးညံ့ဖြူဖျော့နေသည့် အသားအရေမှ ကျဆင်းနေကာ မြေပြင်တွင် သေးကငယ်သည့် အစွန်းလေးများ ဖြစ်သွားစေသည်။

အနုပညာတစ်ပါးနှင့်တူသည့် ထိုလက်က ဇာ့ဂ်ဧကရာဇ်၏ ပခုံးပေါ်ကို ညင်သာစွာ တင်လိုက်သည်။

အလွန်အမင်း ရွံရှာဖွယ်ကောင်းသည့် တစ်စုံတစ်ခုက သူ့ကို ရစ်ပတ်ထားသည့်အလား ဇာ့ဂ်ဧကရာဇ်၏ မျက်နှာက မခံစားနိုင်စွာ စက်ဆုပ်မှုများဖြင့် တွန့်ရှုံ့သွားသည်။

မြူခိုးများအတွင်းမှ ရုပ်တုနှင့် တစ်ထပ်တည်း တူညီသည့် မျက်နှာက ဇာ့ဂ်ဧကရာဇ်ရှေ့တွင် ပေါ်လာခဲ့သည်။ သို့သော်ငြား ဤမျက်နှာက မွန်မြတ်သန့်စင်မှုအရိပ်အယောင်များ ကင်းမဲ့နေပြီး ထိုအစား အော်ဂလီဆန်စရာ အကောင်းဆုံး လောဘများင့် ပြည့်နှက်နေသည်။

သူ့ပါးစပ်ကိုဟလိုက်ပြီး သူ့အသံက မထိန်းချုပ်နိုင်သည့် အလိုဆန္ဒများဖြင့် ပြည့်နှက်နေ၏။

"ငါ အဆင့်မြင့် အမျိုးသားဇာ့ဂ်တစ်ယောက်ရဲ့သွေးသားကို နောက်ဆုံးအကြိမ် အရသာခံခဲ့တာ သုံးနှစ်တောင် ရှိနေပြီ..."

ဇာ့ဂ်ဘုရင်မ၏ လည်ပင်းက ကျိုးသွားသကဲ့သို့ ကြောက်စရာကောင်းသည့် အတိုင်းအတာတစ်ခုအထိ သူ့ခေါင်းကို စောင်းလိုက်သည်။ သူ၏လှပသည့်မျက်လုံးများက ဇာ့ဂ်ဧကရာဇ်ကို တည့်တည့်မတ်မတ် စူးစိုက်ကြည့်နေသည်။

"ငါ့ရဲ့ချစ်စရာ ကျူးပြန့်လေး ငါ အရမ်းဗိုက်ဆာတယ်...ကြည့်လိုက်ပါဦး..."

သူက သူ့လက်မောင်းကို အနည်းငယ်လှုပ်ယမ်းလိုက်ပြီး တခဏမျှ ရေချိုးကန်ထဲမှ ထွက်လာပြီးနောက် ထိုလှပသည့် လက်မောင်းက သူ၏ယခင်တောက်ပမှုများ ပျောက်ဆုံးသွားသည်။ ကာလကြာရှည်အောင် လစ်လျူရှူခံထားရသည့် ရုပ်တုတစ်ခုကဲ့သို့ ၎င်းက အက်ကွဲကာ အမှတ်အသားများပေါ်လာသည်။

" ငါ လတ်လတ်ဆတ်ဆတ် အသွေးအသားတွေ လိုတယ်...မဟုတ်ရင် ငါခြောက်ကပ်သွားတဲ့အထိ ဆုတ်ယုတ်သွားလိမ့်မယ်..."

ဇာ့ဂ်ဧကရာဇ်က မျက်လုံးမှိတ်ကာ တီးတိုးပြောလိုက်သည်။

"ကျေးဇူးပြုပြီး ခဏသည်းခံလိုက်ပါဦး...A အဆင့်အမျိုးသားဇာ့ဂ်တွေက ရဖို့မလွယ်ဘူး..."

"ငါ ဘာကို ဂရုစိုက်ရမှာလဲ..."

ဇာ့ဂ်ဘုရင်မက အော်ဟစ်လိုက်ပြီး သူ့မျက်နှာက ဒေါသဖြင့် တွန့်ရှုံ့သွားသည်။

"ငါကတိကို ဆက်ထိန်းတယ်လေ...မင်းအသက်ရှင်နေသ၍ မင်းကသာ ငါအသိအမှတ်ပြုတဲ့ ဇာ့ဂ်ဧကရာဇ် အမြဲတမ်း ဖြစ်နေလိမ့်မယ်လို့...ငါအဲကတိကို လုပ်ပြီးသွားပြီ..မင်းကရော...မင်းက အမျိုးသားဇာ့ဂ်တစ်ယောက်တောင်မရသေးဘဲ ငါ့ရဲ့ကောင်းချီးတွေကို အဲ့ဒီအဆင့်နိမ့်ဇာ့ဂ်တွေအပေါ် နှစ်တိုင်း နှင်းအပ်ခိုင်းစေချင်နေတယ်..."

တစ်စက္ကန့်အတွင်းပင် သူ့စိတ်ခံစားချချက်များက အလွန်အမင်း ရူးသွပ်တက်ကြွသွားနိုင်ပေသည်။

သို့သော် ခြားနားသည့် အမူအရာတစ်ခုသို့ မပြောင်းပြောင်းလဲမီ တခဏသာ ကြာလိမ့်မည်ပင်။

"ငါ့တောင်းဆိုချက်တွေက မမြင့်ပါဘူး..."

ဇာ့ဂ်ဘုရင်မက နှုတ်ခမ်းစူကာ စိတ်ထိခိုက်နစ်နာသွားသည့် အသံဖြင့် ပြောလိုက်သည်။

"အခု အဲ့ဒီပြိုင်ကွင်းထဲမှာ အမျိုးသားဇာ့ဂ်တွေအများကြီး ရှိနေတာ မဟုတ်ဘူးလား... ဒီတိုင်း သာမာန်ကာလျှံကာ တစ်ယောက်လောက် ဖမ်းလိုက်လေ..."

မှန်တစ်ချက်ရှိနေသည့်အလား သူက လေထဲတွင် စက်ဝိုင်းများ ဆွဲလိုက်ပြီး တဖြည်းဖြည်း ပြိုင်ကွင်းထဲမှ အအခြေအနေကို ရောင်ပြန်ဟပ်စေလိုက်သည်။

"ကြည့်လိုက်...ဒီမှာ အမျိုးသားဇာ့ဂ်တွေအများကြီး ရှိနေတယ်...ဟက်..."

မှန်ထဲတွင် အစိမ်းရောင်မျက်လုံး အနက်ရောင်ဆံပင်ရှိသည့် အမျိုးသားဇာ့ဂ်တစ်ယောက်က ဇာ့ဂ်ဘုရင်မ၏ အာရုံကို ဖမ်းစားသွားသည်။ သူဆက်ကြည့်သည့်အခါ သူ့မျက်လုံးများက ပို၍ ပြူးကျယ်လာပြီး သွေးဆာနေသည့် စိတ်ဆန္ဒများက သူ့အကြည့်ထဲ တဖြည်းဖြည်း စိမ့်ဝင်လာသည်။

"ဟမ်း...ဒီတစ်ယောက်..."

"ဒီတစ်ယောက်က မရဘူး..."

ဇာ့ဂ်ဧကရာဇ် အလိုအလျောက် အော်ဟစ်လိုက်သည်။

"..."

ဇာ့ဂ်ဘုရင်မက ခေါင်းကိုဖြည်းညင်းစွာ လှည့်ကာ မျက်လုံးများ မှေးကျဥ်းလိုက်လျက် ပြောသည်။

"မင်းဘာပြောလိုက်တာလဲ..."

ဇာ့ဂ်ဧကရာဇ် နှုတ်ခမ်းများကို တင်းတင်းစေ့ထားလိုက်သည်။

လုမော့ကတော့ မဖြစ်ဘူး…

တိုးတက်ရေးအတွက် သူ့မျှော်လင့်ချက် အားလုံးကို ကလိန်းဇာ့ဂ်(လင်း)အပေါ်တွင် ပုံအပ်ထားလေသည်။ လုမော့သာသေသွားပါက သွေးပဋိညာဉ်စာချုပ်ကြောင့် ကလိန်းဇာ့ဂ်လည်း သေသွားလိမ့်မည်ဖြစ်သည်။

မျှော်လင့်ချက်ပျက်သုန်းနေသည့် လင်းက အသုံးဝင်ပေသည်။ သို့သော် ကလိန်းဇာ့ဂ်သာ သေသွားပါက သူ့မျှော်လင့်ချက်အားလုံး ပြတ်တောက်သွားလိမ့်မည်။

"ကျေးဇူးပြုပြီး တခြားအမျိုးသားဇာ့ဂ်ကို ရွေးချယ်ပေးပါ..."

ဇာ့ဂ်ဧကရာဇ်က အသနားခံလိုက်သည်။

ဇာ့ဂ်ဘုရင်မက ဇာ့ဂ်ဧကရာဇ်အား ရက်စက်ကြမ်းကြုတ်စွာ စိုက်ကြည့်လိုက်သည်။ သူ၏ခေါင်းမာနေသည့် အသွင်အပြင်က လိုချင်သည့်အရာမရသော ကလေးတစ်ယောက်နှင့် ဆင်တူကာ သူ့ဒေါသများကို ပွင့်ပွင့်လင်းလင်း ထုတ်ဖော်ပြသနေသည်။

ဇာ့ဂ်ဘုရင်မက ဒေါသပေါက်ကွဲတော့မည်ဟု ဇာ့ဂ်ဧကရာဇ် တွေးလိုက်ချိန်တွင် ဇာ့ဂ်ဘုရင်မက အော်ဟစ်ရယ်မောလိုက်သည်။

"အဆင်ပြေတယ်...ငါကတိပေးတယ်..."

"ဒါပေမဲ့ တံခါးအပြင်ဘက်က အဲ့ဒီအမျိုးသားဇာ့ဂ်ကို အစားထိုးတစ်ယောက်အနေနဲ့ သတ်မှတ်လိုက်မယ်...အဆင်ပြေလား..."

ဇာ့ဂ်ဧကရာဇ်က အကြည့်ကို နှိမ့်ချလိုက်ပြီး ပြောလိုက်သည်။

"ကောင်းပါပြီ..."

ကြမ်းကြုတ်ရက်စက်သည့် အရိပ်အယောင်တစ်ခုက သူ၏မှောင်မိုက်နေသည့် မျက်ဝန်းများထဲ လျှပ်တပြတ် လက်သွားသည်။

ဇာ့ဂ်ဧကရာဇ်က တံခါးကို တွန်းဖွင့်ကာ မျက်နှာပေါ်တွင် ညင်သာသည့် အပြုံးတစ်ခုကို ဖော်ထုတ်လျက် ပြောလိုက်သည်။

"စုန့်ကျန်းရှူး မင်း ဘာကိစ္စကြောင့်လာတာလဲ..."

အနက်ရောင်ဆံပင် အနက်ရောင်မျက်လုံးနှင့် အမျိုးသားဇာ့ဂ်က လျင်မြန်စွာ မတ်တတ်ရပ်လိုက်သည်။

ယခင်နှင့်ယှဥ်ပါက သူက မျက်တွင်းများ ပို၍ချောင်ကျနေပြီး ဖရိုဖရဲနှင့် ဖိုသီဖတ်သီဖြစ်နေကာ A အဆင့်အမျိုးသားဇာ့ဂ်တစ်ယောက်နှင့် လုံးဝမတူချေ။

"အရှင်ဧကရာဇ်..."

🌌🌌🌌

Prev Next