MM Story Teller

Chapter 71

Viewers 5k

🌌Chapter 71

"အရှင်ဧကရာဇ်..."

ဇာဂ့်ဧကရာဇ်ကို မြင်လိုက်သည်နှင့် ကယ်တင်ရှင်တစ်ယောက်ကို တွေ့လိုက်ရသည့်အလား စုန့်ကျန်းရှူး စိတ်လှုပ်ရှားစွာ မတ်တတ်ရပ်လိုက်သည်။

သူက များစွာပြောင်းလဲသွားပြီဖြစ်ပြီး ပြောင်းလဲမှုက သိမ်မွေ့နက်နဲလှပေသည်။ သူနှင့်ရင်းနှီးကျွမ်းဝင်သောသူများသာ တွေ့ပါလျှင် " ဒါက ညင်သာပြီးခံ့ညားလှတဲ့ စုန့်ကျန်းရှူးဟုတ်သေးရဲ့လား"ဟု တုန်လှုပ်ခြောက်ခြားသွားကြလိမ့်မည်ပင်။

သို့သော် အနီးကပ် စစ်ဆေးကြည့်ပါက ၎င်းက အမှန်ပင် စုန့်ကျန်ရှူးဖြစ်သည်။ ၎င်းမှာ သူ့မျက်နှာသွင်ပြင်က ပုံပျက်သွား၍ မဟုတ်ဘဲ အချို့နေရာလေးမျာူတွင်သာ မသိမသာ သိမ်သိမ်မွေ့မွေ့ ပြောင်းလဲသွား၍ဖြစ်၏။

တစ်ချိန်က ကြည်လင်တောက်ပခဲ့သော သူ၏အနက်ရောင်မျက်ဝန်းများက ယခုတွင် အနီရောင်သွေးကြောမျှင်များဖြင့် ပြည့်နှက်နေသည်။ အမျိုးသားဇာ့ဂ်များစွာတွင် တွေ့ရတတ်သည့် အချိန်အတော်ကြာအောင် အပျော်အပါးလိုက်စားသောကြောင့် အသက်ဓာတ်ယုတ်လျော့သွားသည့် လက္ခဏာဖြစ်သည့် နက်မှောင်သည့် စိမ်းမြမြအရောင်များ သန်းနေပေသည်။ ချောမွေ့ပြီး တင်းရင်းသည့် သူ့ပါးပြင်များပင် လျော့ရဲကျနေပေသည်။

ထိုကဲ့သို့ တိုတောင်းလှသည့် အချိန်တိုလေးတွင် ဤမျှ ပြင်းပြင်းထန်ထန် ပြောင်းလဲသွားရန် စုန့်ကျန်းရူး မည်သည်တို့ကို ကြုံတွေ့ခဲ့ရကြောင်း ခန့်မှန်းရခက်ပေသည်။ သို့သော် သေချာသည့်အချက်မှာ - သူ့အား အခြားအမျိုးသားဇာ့ဂ်များနှင့်ကွဲပြားစေသည့် ထူးခြားချက်များက အစပင်ရှာမရအောင် ပျောက်ကွယ်သွားခြင်းပင်။

ယခု ဤနေရာတွင် ရပ်နေသည်မှာ သာမာန် အဆင့်မြင့်အမျိုးသားဇာ့ဂ်တစ်ယောက်ထက် ဘာမှမပိုပေ။

ဇာ့ဂ်ဧကရာဇ်က သူ့အား တိတ်တဆိတ်ကြည့်ကာ ပြောလိုက်သည်။

"စုန့်ကျန်းရှူး...မင်း အများကြီး ပြောင်းလဲသွားတာပဲ..."

စုန့်ကျန်းရှူး အပြုံးတစ်ခုကို ဖျစ်ညှစ်ပြုံးပြလိုက်ပြီး လေးစားစရာကောင်းသည့် ဇာ့ဂ်ဧကရာဇ်ရှေ့မှောက်တွင် ရှက်ရွံ့မှုကို ခံစားလိုက်ရသည်။ သူ၏ နဂိုမူလ အခြေအနေကို ပြန်ရရောက်သွားသကဲ့သို့ပင်။ သို့သော် လျင်မြန်စွာပင် တည်ငြိမ်အေးဆေးသွားပြီး ဇာ့ဂ်ဧကရာဇ်ကို ပြောလိုက်သည်။

"အရှင်ဧကရာဇ် တချို့အရာလေးတွေကို နားလည်ချင်လို့ ကျွန်တော်လာခဲ့တာပါ..."

အရာအားလုံးက ထိုလောင်းကစားပြိုင်ပွဲမှ စတင်ခဲ့သည်ပင်။ သူ့ကံကြမ္မာအားလုံးကို လုမော့ထံ ဆုံးရှုံးသွားပြီးနောက် စုန့်ကျန်းရှူး စိတ်ရှုပ်ထွေးလာခဲ့သည်။

ဘာလို့လဲ...

ဘာလို့ လုမော့လို စက်ဆုပ်စရာကောင်းတဲ့လူက အဲ့လို ကောင်းမွန်တဲ့ဘဝမှာ နေနေရတာလဲ...

လုမော့က သနားကြင်နာမှု အနည်းငယ်မျှပင် မရှိဘဲ လင်းကို သူ့ထံမှ လုယူသွားခဲ့သည်။ သို့သော် သူ့ကိုအပြစ်ပေးရမည့်အစား ကောင်းကင်ဘုံက သူ့အား ဆုလာဘ်များချီးမြှင့်ရုံပင်မက ပို၍ပင် ထောက်ပံ့ပေးခဲ့လေသည်။

သူက အဆင့်များဆက်တိုက် တိုးတက်လာရုံမက စုန့်ကျန်းရှူးမတတ်နိုင်သည့် ချမ်းသာကြွယ်ဝမှုများပါ ပိုတိုးလာပေသည်။ ဤသည်က သူတို့ပြောကြသည့် 'မြင့်မြတ်ခြင်းက အထက်တန်းစားမျိုးနွယ်များအတွက် သာဓကဖြစ်ပြီး အနင်းခံအောက်ခြေလူတန်းစားများက ရွံစရာကောင်းသည်'ဟူသော စကားက အမှန်တကယ်ဖြစ်လာခြင်းလားဟု သူတွေးနေမိသည်။

အဲဒါက တကယ်ဒီလိုမျိုးလား...

စက်ဆုပ်စရာကောင်းလှသည့် လုမော့က ရှင်သန်နေချိန်တွင် စည်းမျဥ်းစည်းကမ်းနှင့်အညီ နေထိုင်ခဲ့သော သူကတော့ ခိုကိုးရာမဲ့ဘဝ ဖြစ်နေခဲ့ရသည်။

ထိုသံသယများဝင်လာသည်နှင့် စုန့်ကျန်းရှူးက အင်ပါယာကြယ်သို့ ပြန်လာခဲ့သည်။ သို့သော်ငြား နေထိုင်ခွင့်ပြုကဒ်မရှိ၍ သူက တရားမဝင် ခိုးနေထိုင်သူ တစ်ယောက်ဖြစ်လာခဲ့သည်။ ဤနေရာတွင် ဆက်လက်နေထိုင်နိုင်ရန်အတွက် များပြားသည့် အာမခံငွေများကို လစဥ်ပေးချေခဲ့ရ၏။

သို့သော်ငြား သူ့တွင် ငွေမကျန်တော့ပေ။ အင်ပါယာကြယ်မှ နှင်ထုတ်ခံရသည့် အခြေအနေနှင့် ရင်ဆိုင်ရသောအခါ ရွေးချယ်စရာမရှိဘဲ သူ့မာနကို မျိုသိပ်လျက် သူ့အား တစ်ကြိမ် ချစ်မြတ်နိုးလေးစားခဲ့ဖူးသော အမျိုးသမီးဇာ့ဂ်တစ်ယောက်ထံမှ အကူအညီကို ရှာဖွေခဲ့ရသည်။

"ပိုက်ဆံဘယ်လောက်လိုတာလဲ..."

စုန့်ကျန်းရှူးမှ စကားတစ်ခွန်းပြောလိုက်သည်နှင့် သူ့အတွက် ဘာမဆို လုပ်ပေးနိုင်သည့်အလား အမျိုးသမီးဇာ့ဂ်က ကြင်နာယုယစွာ ငေးကြည့်နေခဲ့သည်။

စုန့်ကျန်းရှူးက တွန့်ဆုတ်ဆုတ်နှင့် ငွေပမာဏကိုပြောပြလိုက်သည့်အခါ အမျိုးသမီးဇာ့ဂ်က တခဏမျှသာ အကြမ်းဖျင်းစဥ်းစားပြီး အဆင်သင့်သဘောတူလိုက်ပေသည်။

"အချိန်ခဏလောက်ပေးပါဦး မနက်ဖြန်ကျရင် အရှင့်အတွက် ကျွန်တော် ရအောင်ယူပေးပါ့မယ်..."

စုန့်ကျန်းရှူးက စိတ်သက်သာရာရစွာ သက်ပြင်းချလိုက်ပြီး လျင်မြန်စွာ ပြောလိုက်သည်။

"ငါမင်းကို နောက်တစ်ပတ်ကျရင် ပြန်ပေးပါ့မယ်..."

အမျ်ုးသမီးဇာ့ဂ်က သူ့ကို ညင်သာစွာ ကြည့်ကာ ပြောလိုက်သည်။

"ကျွန်တော် အရှင့်ကို ယုံပါတယ်..."

သူက ထိုကဲ့သို့ ယုံကြည်နူးညံ့သော မျက်ဝန်းများကို စိတ်ပျက်သွားခွင့်မပေးနိုင်ပေ။

ဒါပေမဲ့ အဲဒီ ငွေပမာဏကို တစ်လအတွင်း ဘယ်လိုပြန်ရှာရမလဲ…

အဖြေက တစ်ခုသာလျှင်ရှိ၏။

လောင်းကစား...

၎င်းက မဆင်မခြင် လှုပ်ရှားမှုတစ်ခုမဟုတ်သလို ကြံမိကြံရာ ထင်ရာစိုင်း ကြိုးစားမှုလည်း မဟုတ်ပေ။

၎င်းက ဆန်းကြယ်သည့် "ကံကြမ္မာ"တစ်ခုပင် ဖြစ်သည်။ အခြေအနေက မည်မျှဆိုးရွားနေပါစေ ပြိုင်ဘက်၏ လှည့်စားမှုကို လျစ်လျူရှုပြီး သူ လောင်းကစားပြိုင်ပွဲမှာ ရှိနေသ၍ နောက်ဆုံးရလဒ်က ဆန်းကြယ်စွာဖြင့် အမြဲလိုလို စုန့်ကျန်းရှူးဘက်သို့ မျက်နှာလိုက်နေမည်ပင်။

ဤကံတရားပေါ်မှီခိုပြီး စုန့်ကျန်းရှူးက ကနဦးတွင် ငွေပမာဏများစွာ ရခဲ့ပြီး အခြားသူများကို အကြိမ်ကြိမ် မျက်နှာပျက် အရှက်ရစေခဲ့သည်။

ဤတစ်ကြိမ်တွင်လည်း ခြွင်းချက်တစ်ခုဖြစ် လိမ့်မည် မဟုတ်ပေ။

ထိုယုံကြည်ချက်နှင့် စုန့်ကျန်းရှူးက ကာစီနိုထဲသို့ ငွေအမြောက်အများနှင့် ဝင်လာခဲ့သည်။

---------------

အလင်းရောင်မှိန်မှိန်နှင့် ဆူညံပွက်လောရိုက်နေသော ကာစီနိုထဲတွင် စုန့်ကျန်းရှူး၏မျက်နှာက ဖြူဖျော့နေပြီး သူ့ရှေ့မှကတ်များအား မြဲမြံစွာ ကြည့်နေသည်။

သူ့ယုံကြည်ချက်များက တစ်စတစ်စ လျော့ပါးသွားသည်။

တစ်ပတ်လုံးလုံး သူ ဤကာစီနိုတွင် ရှိနေခဲ့သည်။ သို့သော် ဒီတစ်ပတ်တွင် သူ၏ ဆန်းကြယ်လှသည့် "လောင်းကစားကံ" ကသူ့အား စွန့်ပစ်သွားပုံပေါ်သည်။ သူ မည်သည့်နေရာသို့ လောင်းလိုက်ပါစေ ရှုံးသွားရစမြဲသာ ဖြစ်၏။

အဆုံးတွင် ကြည့်နေကြသည့် ပရိသတ်များပါ သတိထားမိသွားသည်။ စုန့်ကျန်းရှူး မည်သည့်အချိန်လောင်းလောင်း သူလောင်းသည့်ဘက်နှင့် ဆန့်ကျင်စွာ လောင်းပြီး သူတို့ အကျိုးအမြတ်များရရှိနိုင်သည်။

အစပိုင်းတွင် စုန့်ကျန်းရှူးက ယုံကြည်ရန် ငြင်းပယ်ပြီး လောင်းကြေးကို ပိုတိုးမြှင့်ခဲ့သည်။ နောက်ဆုံး သူအသိဝင်လာချိန်တွင်မူ သူ့တိုကင်ပြားများ၏ ဆယ်ပုံပုံလျှင် တစ်ပုံသာ ကျန်ရှိတော့ပေသည်။

"လောင်းကြေးထပ်လိုက်ပါ… အခုထပ်ပေးပါ..."

ဖဲဝေသူက စုန့်ကျန်းရှူးအား ပြုံးပြလိုက်သည်။

"လူကြီးမင်း ဆက်တိုက်ရှုံးနေတာနော်...ဖြစ်နိုင်တာက လူကြီးမင်းရဲ့ကံတွေကို တခြားတစ်နေရာမှာ သုံးပြီး ဒီကျန်နေတဲ့ တိုကင်ပြားတွေကို လက်လျှော့လိုက်ဖို့ အချိန်ရောက်ပြီထင်တယ်..."

စုန့်ကျန်းရှူး၏မျက်လုံးများက သွေးနီရောင်သန်းလာပြီး သူ့သူငယ်အိမ်များက ကြောက်ရွံ့မှု ဆန္ဒမရှိမှုများဖြင့် တုန်ယင်နေသည်။

ပိုက်ဆံများကို သူပြန်ရမှဖြစ်မည်။ သို့မဟုတ်ပါက အမျိုးသမီးဇာ့ဂ်ကို သူ ထိုအကြောင်း ရှင်းပြနိုင်လိမ့်မည် မဟုတ်ပေ။ ယခုတစ်လှည့်သာ သူအနိုင်ရပါက အရှေ့က ရင်းနှီးမြှုပ်နှံမှုအားလုံးကို ပြန်ဖာထေးနိုင်လိမ့်မည်ပင်။

အချိန်ကြာမြင့်စွာ ကံမကောင်းပြီးနောက်တွင် ကံကြမ္မာ အလှည့်အပြောင်းဖြစ်ရန် အချိန်ရောက်ပြီဖြစ်သည်။

နောက်ဆုံး စုန့်ကျန်းရှူး စိတ်ဆုံးဖြတ်လိုက်ပြီး ကျန်ရှိနေသည့် တိုကင်ပြားများကို ဆွဲယူကာ အားလုံး ပုံအော၍ လောင်းလိုက်သည်။

"ဒီတစ်လှည့် အကုန်ထည့်မယ်..."

ဖဲဝေသူက အံ့သြခြင်းမရှိဘဲ စုန့်ကျန်းရှူးအား ကြည့်လိုက်သည်။

လောင်းကစားသမားအားလုံးက အတူတူပင်ဖြစ်သည်။ သူတို့ ပို၍ရှုံးလေလေ လက်လျော့လိုက်ရန် ပို မလိုလားလေပင်။ မတည်မြဲသော ကံအပေါ် မျှော်လင့်ချက်အားလုံးကို ပုံအပ်ပြီး သူတို့၏ ဆုံးရှုံးသမျှအားလုံးကို တစ်လှည့်အတွင်း ပြန်ရအောင် မျှော်လင့်နေကြကြသည်။

ကျိုးကြောင်းဆင်ခြင်မှုအနည်းငယ်ရှိသည့် မည်သူမဆို ဆုံးရှုံးမှုကို ဖြတ်တောက်သည့် အရေးပါမှုကို သိကြသည်။

သို့သော်ငြား လောင်းကစားသမားများက အတိအကျပင် လောင်းကစားသမားများသာ ဖြစ်ကြသည်။ သူတို့တွင် ကျိုးကြောင်းဆင်ခြင်နိုင်မှု မရှိပေ။

ဖဲဝေသူက ငုံ့ကာ ကတ်နှစ်ခုကို ဖော်ပြလိုက်သည်။ တစ္ဆေကတ်နှစ်ခုက စားပွဲပေါ်တွင် ထင်ထင်ရှားရှားရှိနေ၏။ ဖဲဝေသူက စုန့်ကျန်းရှူးအား တောင်းပန်စွာ ကြည့်လိုက်သည်။

"လူကြီးမင်း ရှုံးသွားပြီ..."

"လူကြီးမင်း ထပ်ရှုံးသွားပါပြီ..."

စုန့်ကျန်းရှူး မျက်လုံးများပြူးကျယ်ပြီး တိုကင်ပြားအားလုံးကို တိုက်ချပစ်လိုက်ရာ ရောင်စုံပလတ်စတစ် တိုကင်ပြားများ မြေကြီးပေါ် လွင့်စင် ပျံ့ကြဲသွားကြသည်။

သူ အော်ဟစ်ဟိမ်းဟောက်လိုက်သည်။

"ဒါ မဖြစ်နိုင်ဘူး မင်းလှည့်ကွက်တွေ သုံးထားတာပဲဖြစ်ရမယ်..."

ဖဲဝေသူက ပြိုလဲလုနီးပါး စုန့်ကျန်းရှူးကို ငုံ့ကြည့်ကာ အလွန်အမင်း ပရော်ဖက်ရှင်နယ်ဆန်သည့် အပြုံးတစ်ခုကို ပြုံးပြလိုက်သည်။

"လူကြီးမင်းက A အဆင့်အမျိုးသားဇာ့ဂ်တစ်ယောက်ဖြစ်နေရင်တောင် ကာစီနိုထဲကို ဝင်လာကတည်းက လောင်းကစားစည်းကမ်းတွေကို လိုက်နာပြီး အရှုံးကို လက်ခံသင့်ပါတယ်...လူကြီးမင်း ကျွန်တော်တို့ကို တင်းတင်းကြပ်ကြပ် ကိုင်တွယ်ရအောင် ဖိအားပေးမှာ မဟုတ်ဘူးလို့ ကျွန်တော်မျှော်လင့်ပါတယ်..."

"မဟုတ်ရင်တော့...ဒုက္ခရောက်သွားပါလိမ့်မယ်..."

စုန့်ကျန်းရှူး စိတ်ပျက်အားငယ်စွာ ခေါင်းကိုမော့လိုက်သည်။ ဖဲဝေသူက ဆောင့်ကြောင့်ထိုင်ကာ သူ့အား နှစ်သိမ့်ရန် ကြိုးစားလိုက်သည်။

"အနည်းဆုံးတော့ လူကြီးမင်းက အရာအားလုံးကို မပေါင်ထားရသေးဘူးလေ...တချို့အမျိုးသားဇာ့ဂ်တွေဆို သူတို့ဇာ့ဂ်ဘဝတစ်ခုလုံးကို ကာစီနိုထဲ အာမခံအနေနဲ့ ပေါင်ကြတာ..."

ဖဲဝေသူ၏ အကြည့်များက ထူခြားလေးနက်နေပေသည်။ စုန့်ကျန်းရှူး သူ့မျက်လုံးများနှင့် ဆုံလိုက်ချိန် ရုတ်တရက် ထိန်းချုပ်မရအောင် ကျောချမ်းသွားခဲ့သည်။

အသူရာချောက်နက်တစ်ခုထဲသို့ စိုက်ကြည့်နေရသကဲ့သို့ ခံစားလိုက်ရသည်။

စုန့်ကျန်းရှူး စကားမပြောဘဲ သူ့ကုတ်အင်္ကျီအား ပြန့်သွားအောင်ဆန့်ကာ လူအုပ်ကြီးအား တိတ်တဆိတ်တွန်းဖယ်၍ ကာစီနိုဝိုင်းထဲမှ ထွက်ခွာလာခဲ့သည်။

--------

အပြင်ဘက်တွင် အာရုဏ်တက်နေပြီဖြစ်ကာ ဆောင်းဦး၏နံနက်အစောပိုင်းက ထူထဲလှသည့် မြူများဖြင့်ပြည့်နှက်နေသည်။ စုန့်ကျန်းရှူး၏ နှလုံးသားက လေးလဲနေပြီး ဝိညာဥ်ပျောက်ဆုံးနေသကဲ့သို့ မြူမှုန်များထဲ လျှောက်သွားစဥ် သူခြေလှမ်းများက တုန်လှုပ်နေခဲ့သည်။

သူ့အသိစိတ်က ဗလာဖြစ်နေပြီး အသိဝင်လာချိန်တွင် အမျိုးသမီးဇာ့ဂ်၏ တံခါးဝသို့ ရောက်ရှိနေသည်ကို နားလည်လိုက်သည်။

ငါ ဘယ်လိုရှင်းပြရမလဲ...

အာမခံအတွက် ရည်ရွယ်ထားသည့် ငွေများကို ကာစီနိုတွင် ဆုံးရှုံးသွားခဲ့သည်။ သူက တရားမဝင်နေထိုင်သူ ဖြစ်နေဆဲဖြစ်ပြီး ယခုအခါတွင် သူ၏မြို့တော်နေထိုင်ခွင့်ကိုပင် ဆုံးရှုံးခဲ့သည်။

မဟုတ်ဘူး... ငါ ဘာမှမပြောနိုင်ဘူး...

တုန်လှုပ်မှုတစ်ခုက သူ့နှလုံးသားထဲ ဖြတ်ပြေးသွားပြီး သူပြန်လှည့်ပြေးရန် ပြင်လိုက်သည်။ ထိုအခိုက် စူးရှသည့် အချက်ပေးဥသြသံများက အဝေးမှမြည်လာခဲ့ပြီး တဖြည်းဖြည်းကျယ်လာကာ စုန့်ကျန်းရှူးအနားရောက်လာခဲ့သည်။

"ကျွီ..."

အမျ်ုးသမီးဇာ့ဂ်၏အိမ်ရှေ့သို့ ရပ်လိုက်ချိန်တွင် ရဲကား၏ ဘီးတာယာနှင့် မြေကြီး ပွတ်တိုက်လိုက်သည့်အသံ မြည်လာခဲ့သည်။

ကားတံခါးပွင့်လာပြီး ရဲအရာရှိများ ထွက်လာခဲ့သည်။ ခေါင်းဆောင်က လက်ဟန်ပြကာ အရှေ့မှတံခါးကို ပြင်းပြင်းထန်ထန် ကန်ဖွင့်လိုက်သည်။

စုန့်ကျန်းရှူး၏မျက်လုံးများ ပြူးကျယ်ကာ အနောက်မှာ ရပ်နေသည့် အမျိုးသမီးဇာ့ဂ်ထံ ချည်းကပ်ပြီး မေးလိုက်သည်။

"ရဲအရာရှိ ဘာများဖြစ်လို့လဲ..."

ခက်ထန်နေသည့် အမျိုးသမီးဇာ့ဂ်က စုန့်ကျန်းရှူးက အမျိုးသားဇာ့ဂ်တစ်ယောက်ဆိုသည်ကို မြင်လိုက်သည့်အခါ အမူအရာ ပျော့ပြောင်းသွားပြီး ညင်သာစွာ ပြောလိုက်သည်။

"ဒီမှာနေတဲ့ အမျိုးသမီးဇာ့ဂ်က ကုမ္ပဏီတစ်ခုရဲ့ဘဏ္ဍာရေးအရာရှိလေ...သူက ပမာဏတော်တော်များတဲ့ ကုမ္ပဏီပိုင်ငွေတွေက်ု အလွဲသုံးစားလုပ်တယ်လို့ ရှာတွေ့ထားတယ်...အဲ့ကြောင့် မေးခွန်းနည်းနည်းမေးစရာရှိလို့ ခေါ်သွားမလို့ပါ..."

စုန့်ကျန်းရှူး ဖြူဖျော့သွားသည်။

သူက ထိတ်လန့်သွားပြီး မတ်တတ်ရပ်နေခဲ့သည်။

ငါ ဘာလုပ်သင့်လဲ...အမျိုးသမီးဇာ့ဂ်က အဲ့ပိုက်ဆံတွေ ငါ့ကို ပေးခဲ့တာကို ရှာတွေ့သွားပြီး ဖော်ထုတ်ခံလိုက်ရရင် ငါ့ကိုလည်း ဖမ်းသွားမှာလား...

၎င်းက သူ့ဘဝအား အဆုံးသတ်သွားစေလိမ့်မည်။

ပိုက်ဆံသာ ဤနေရာ၌ ရှိနေသေးလျှင်...

သို့သော် ယခုတွင် သူက အားလုံးဆုံးရှုံးသွားပြီပင်။

ဒေါသတကြီးအော်ဟစ်သံက အတွင်းမှ ထွက်ပေါ်လာခဲ့သည်။

" ကိုယ့်ကိုကိုယ် အိန္ဒြေရရနေပါ..."

တွန်းထိုးရုန်းကန်နေသည့် အသံများမရှိပေ။ ရဲအရာရှိများက အမျိုးသမီးဇာ့ဂ်တစ်ယောက်အား စောင့်ကြပ်ပြီးခေါ်ထုတ်လာခဲ့သည်။ အမျိုးသမီးဇာ့ဂ်က နူးညံ့သည့် အိပ်ရာဝင်ဝတ်စုံကိုပင် ဝတ်ဆင်ထားပြီး အိပ်ငိုက်နေသည့် အရိပ်အယောင်များက သူ့မျက်နှာပေါ်တွင် ရှိနေဆဲဖြစ်သည်။

အပြင်ခေါ်ထုတ်ခံလာရသည့်အခါ သူ့အကြည့်များက စုန့်ကျန်းရှူးပေါ်ကို ရောက်သွားသည်။

သူတို့အကြည့်ချင်းစုံသွားသည့်အခိုက် စုန့်ကျန်းရှူး၏စိတ်က ဗလာဖြစ်သွားသော်လည်း သူ့နှလုံးသားက ထိတ်ထိတ်ပျာပျာဖြစ်ကာ ကြောက်ရွံ့မှုများဖြင့် ပြည့်နှက်သွားသည်။

အမျိုးသမီးဇာ့ဂ်က တည်ငြိမ်အေးဆေးစွာ စုန့်ကျန်းရှူးအား ကြည့်လိုက်ပြီး သူ၏ညင်သာနူးညံ့မှုကပြောင်းလဲမသွားချေ။ သူ၏တလက်လက်တောက်ပတေသော မျက်ဝန်းများတွင် စုန့်ကျန်းရှူး၏ပုံရိပ်ကသာလျှင် ကျန်ရှိနေခဲ့သည်။

ရဲအရာရှိက သိချင်စိတ်ပြင်းပြစွာနှင့် မေးလိုက်သည်။

"လူကြီးမင်း ဒီအမျိုးသမီးဇာ့ဂ်ကို သိလား..."

"..."

စုန့်ကျန်းရှူးက ရုတ်တရက် ခေါင်းကိုငုံ့ကာ အက်ကွဲနေသောအသံဖြင့် ပြောလိုက်သည်။

"မဟုတ်ဘူး...ကျွန်တော် သူ့ကိုမသိဘူး..."

"ကောင်းပါပြီ...လူကြီးမင်းက သေချာပေါက် သူ့လို အမျိုးသမီးဇာ့ဂ်ကို သိတာ ဖြစ်နိုင်ပါ့မလဲ.. "

စုန့်ကျန်းရှူးက ခေါင်းအား ဆက်လက်ငုံ့ထားခဲ့သည်။ ရဲအရာရှိများက သူ့အား ဖြတ်ကျော်ကာ အမျိုးသမီးဇာ့ဂ်အား ခေါ်ဆောင်သွားပြီး သူမြင်နိုင်သမျှမှာ ကြမ်းတမ်းနေသည့် မြေပြင်အား နင်းဖြတ်သွားသည့် အမျိုးသမီးဇာ့ဂ်၏ ခြေဗလာများဖြစ်ကာ ထိုခြေချင်းဝတ်အား သံခြေချင်းများဖြင့် ရစ်ပတ်ထားသည်။

အမျိုးသမီးဇာ့ဂ်က စကားတစ်လုံးမှ မပြောခဲ့ပေ။

ထိုအခိုက်အတန့် စုန့်ကျန်းရှူး တစ်စုံတစ်ရာကို နားလည်သဘောပေါက်လိုက်သည်။

သူ့အတွက် အမျိုးသမီးဇာ့ဂ်က ဖုံးကွယ်ပေးထားလိမ့်မည်ဖြစ်ပြီး သူချေးခဲ့သော ထိုများပြားလှသည့် ငွေပမာဏကလည်း ယခုလိုပင် တိမ်ကောပျောက်ကွယ်သွားလိမ့်မည်ပင်။

ကပ်ဘေးကြီးကြီးမားမားမှ ရှင်သန်လာပြီးနောက်စိတ်သက်သာရာရမှုက သူ့စိတ်ထဲ တဟုန်ထိုးတက်လာခဲ့သည်။

အဲ့တော့ ဒီလိုဖြစ်သွားတာကိုး...

ဒါက ဒီလိုမျိုးကိုး...

ငါ တစ်လျှောက်လုံး မှားနေခဲ့တာပဲ...

ဤကမ္ဘာကြီးက သူလာခဲ့သည့် နေရာနှင့်မတူညီပေ။ ထိုကမ္ဘာတွင် သူကျင့်သုံးခဲ့သည့် စည်းမျဥ်းစည်းကမ်းများနှင့် ကိုယ့်ကျင့်တရားများက ဤနေရာ၌ အသုံးမဝင်ပေ။

လိုက်လျောညီထွေစွာ ရှင်သန်ခြင်းကသာလျှင် မှန်ကန်ပေသည်။

ငါ့မှာ လေးစားစရာအကောင်းဆုံး A အဆင့်အမျိုးသားဇာ့ဂ်တစ်ယောက် ဖြစ်ဖို့ ကံကြမ္မာရှိနေတည်းက ဘာလို့ ဒါကို ကောင်းကောင်းအသုံးမချရမှာလဲ...

သူ၏ကိုယ်ကျင့်တရားက ဖြောင့်မတ်မှန်ကန်လွန်းနေ၍သာ လင်းက သူ့လက်ထဲမှ ထွက်ပြေးလွတ်မြောက်သွားခြင်း ဖြစ်ပေသည်။

အစကတည်းက သူသာ အခြားသောအမျိုးသားဇာ့ဂ်များကဲ့သို့ လင်းအတွက် စည်းမျဥ်းများ ချမှတ်ထားခဲ့ပါက လင်းမှာ ထိုကဲ့သို့ ရိုင်းစိုင်းသော အတွေးများတွေးနိုင်လိမ့်မည် မဟုတ်ဘဲ ထွက်ပြေးရဲလိမ့်မည်မဟုတ်ချေ။

ယခုအချိန်မှစပြီး နောက်တစ်ကြိမ် ဘယ်သောအခါမှ ထိုသို့ ရူးမိုက်လိမ့်မည် မဟုတ်ပေ။

-------

"ကျွန်တော် သင်ခန်းစာတစ်ခုကို နားလည်လိုက်ရတယ်..."

စုန့်ကျန်းရှူးက ဇာ့ဂ်ဧကရာဇ်ကို ကြည့်ပြီး ပေါ့ပေါ့ပါးပါး ပြုံးပြကာ ပြောလိုက်သည်။

"ကျွန်တော် ဘယ်လို ရှုံးနိမ့်သွားလဲဆိုတာ နောက်ဆုံးတော့ ကျွန်တာ် နားလည်သွားပြီ..."

ဇာ့ဂ်ဧကရာဇ်က စုန့်ကျန်းရှူး၏ မျက်လုံးများကို နက်ရှိုင်းစွာ စိုက်ကြည့်ပြီး တုံ့ပြန်လိုက်သည်။

"ဒီတော့ အဲ့လိုဖြစ်သွားတာကိုး..."

မူလက ဝမ်ကောအား လုမော့က ခေါ်ဆောင်သွားပြီး အင်ပါယာကြယ်မှ ထွက်ခွာသွားပြီးဖြစ်ကြောင်းကို စုန့်ကျန်းရှူးအား မည်သို့ရှင်းပြရမည်ကို သူစိုးရိမ်နေသေးသည်။

သို့သော် ယခုကြည့်ရသည်မှာ စုန့်ကျန်းရှူးက ထိုအကြောင်းကို ထပ်ပြီးဂရုမစိုက်တော့သည့်ပုံ ပေါ်ပေသည်။

"တောင်းပန်ပါတယ်...ငါ့မှာ အခု အရေးတကြီးကိစ္စတစ်ခု တက်ရောက်စရာ တစ်ခုရှိသေးလို့..."

ဇာ့ဂ်ဧကရာဇ်က တည်ငြိမ်စွာပြောလိုက်သည်။

"မင်းဒီမှာ ခဏစောင့်နေလိုက်ပါ..."

စုန့်ကျန်းရှူး မြန်မြန် ပြန်ပြောလိုက်သည်။

"ဟုတ် ရပါတယ်...ရပါတယ်..."

"ဒါပေမဲ့ မင်းဒီတံခါးထဲကို မဝင်ရဘူး..."

ဇာ့ဂ်ဧကရာဇ်က လေးလေးနက်နက် ပြောလိုက်သည်။

"မင်း ဝင်ခဲ့မိရင် ဝမ်းနည်းစရာအကောင်းဆုံး အခြေအနေကို ကြုံရလိမ့်မယ်..."

စုန့်ကျန်းရှူးက သဘာဝကျစွာပင် ချက်ချင်းသဘောတူလိုက်သည်။

"ဟုတ်ကဲ့ပါ အရှင်ဧကရာဇ်..."

သို့သော်ငြား ဇာ့ဂ်ဧကရာဇ် အခန်းထဲမှ ထွက်သွားသည်နှင့်တစ်ပြိုင်နက် စုန့်ကျန်းရှူး တံခါးနားကို ချက်ချင်း ချဥ်းကပ်လိုက်သည်။

လျှပ်တပြက် အကြည့်တစ်ချက်သာ ဖြစ်သော်လည်း တံခါးအက်ကွဲကြောင်းမှတစ်ဆင့် တစ်သက်မမေ့နိုင်စရာ မြင်ကွင်းတစ်ခုကို မြင်လိုက်ပြီးပြီဖြစ်၏။

🌌🌌🌌

အစ်ကိုစုန့်ကလည်း ကူးပြောင်းလာတာထင်တယ်

တံခါးထဲ မဝင်ပါနဲ့ဆိုတာကို သွားဝင်လို့ ဒုက္ခရောက်ဦးမယ် ဧကရာဇ်ကလည်း ဝင်ချင်အောင်လို့ တမင်ပြောသွားတာလားမသိဘူး🥲

Prev Next