Chapter 189

💘Chapter 189 

အောင်ပွဲခံတာစောလွန်းတယ်

[ဒီနေရာက ငါတို့အနုပညာဌာနရဲ့ စက်ဘီးထားတဲ့နေရာနဲ့တူသလိုပဲ...ချန်လီက ဘာလို့ အဲ့မှာရှိနေတာလဲ...သူ ဒီနေ့ စက်ဘီးစီးပြီးလာခဲ့တာလား...။]

ချန်လီအနောက်မှ ရောက်မှလာသည့်ကျောင်းသားများက အတန်း၏အုပ်စုဖွဲ့စကားပြောခန်းတွင် ချန်လီကြားသွားမည်ကိုစိုး၍ စာအရှည်ကြီးရိုက်နေကြသည်။ သူတို့က အသံမက်ဆေ့ချ်များကို မသုံးရဲကြသောကြောင့် နာကျင်စွာဖြင့် စာလုံးတစ်လုံးချင်းရိုက်နေကြရ၏။

ထိုစာကိုရိုက်ပြီး‌နောက် အတန်းအုပ်စုကြီးမှာ တိတ်ဆိတ်သွားတော့သည်။ သူတို့က စာကိုသေချာဖတ်နေကြနေခြင်းလား သို့မဟုတ် တစ်ခုခုကို တွေးတောနေကြခြင်းလား မသိရချေ။ တိတ်ဆိတ်မှုက ခေါင်းလောင်းသံမြည်မလာခင်အထိ ကြီးစိုးနေကာ စာအသစ်လည်း ပေါ်လာပေ။ 

အတန်းကအကြာကြီး မဟုတ်သောကြောင့် သူတို့က စိတ်ဝင်တစားဖြင့် နားထောင်လိုက်ကြ၏။ အတန်းပြီးသည့်အခါ တိတ်ဆိတ်နေသည့် အုပ်စုဖွဲ့စကားပြောခန်းတွင် စာအသစ်တစ်စောင် ရောက်နေလေသည်။ 

“ဒီည XXလမ်းမှာ ငါတစ်ခုခုလုပ်စရာရှိတယ်...ငါနဲ့ သွားချင်တဲ့သူရှိလား” XXလမ်းက Qတက္ကသိုလ်သို့ ဦးတည်နေသည့်လမ်းဖြစ်ပြီး ချန်လီသွားလာနေသည့်လမ်းလည်းဖြစ်သည်။ 

စကားပြောခန်းထဲရှိ ကျောင်းသားများက စာ၏ဆိုလိုရင်းကို ချက်ချင်းနားလည်သွားကြပြီး တုံ့ပြန်မှုများ ပြုလုပ်လာကြသည်။

“ငါပါမယ်...အတူတူသွားရအောင်”

“ငါလည်း ဒီနေ့လုပ်စရာလေးရှိနေတာ...တခြားတစ်ယောက်ယောက်နဲ့ လမ်းကြုံလိမ့်မယ်လို့ ထင်မထားဘူး...အခုတော့ တစ်ယောက်တည်း မပျင်းရတော့ဘူး”

ကျောင်းသားများစွာက တုံ့ပြန်လာကြ၏။ သူတို့တွင် တူညီသည့် အတွေးတစ်ခုသာရှိနေ၏။ ဒီနေ့က ချန်လီတစ်ယောက်တည်း ကျောင်းလာသည့် နေ့ဖြစ်ပြီး သူတို့အားလုံးက သူ၏လုံခြုံမှုကို စိုးရိမ်နေကြသည်။ ကူညီဖေးမချင်သော်လည်း သိသိသာသာလုပ်၍မရနိုင်ကြောင်းလည်း သိကြသည်။ ထို့ကြောင့် ဆွေနွေးမှုများ ပြုလုပ်ပြီးနောက်တွင် သူတို့က တိတ်တဆိတ်လှုပ်ရှားရန်ဆုံးဖြတ်လိုက်ကြသည်။ 

ချန်လီကတော့ သူ့အတန်းဖော်များကြားမှ ဆွေးနွေးမှုများကို သတိမထားမိချေ။ 

Qတက္ကသိုလ်မှ ထွက်လာပြီးနောက် ဝေ့ချန်က တက္ကစီငှား၍ ချန်ဖုန်းအုပ်စုသို့ သွားလိုက်သည်။ ချန်ဖုန်းအုပ်စုသို့ ‌ရောက်သောအခါ အလုပ်ချိန်စတင်ရုံလေးဖြစ်သောကြောင့် ဝေ့ချန်ကို အချိန်တိကျသည်ဟုဆိုနိုင်သည်။ (**သူလည်း စက်ဘီးစီးပြီးလိုက်တာထင်တယ်)

ဒီနေ့က ဧပြီလ၏ ပထမဆုံး တနင်္လာနေ့ဖြစ်သောကြောင့် ချန်ဖုန်းအုပ်စုတွင် အစည်းအဝေးကျင်းပလိမ့်မည်။ သူ့ရုံးခန်းသို့ရောက်ပြီး အစည်းအဝေးအတွက် လိုအပ်သည်များကို စုစည်းပြီး‌နောက် ဝေ့ချန်က ထိပ်ဆုံးအထပ်ရှိ အစည်းအဝေးခန်းသို့ သွားလိုက်၏။

အစည်းအဝေးအခန်းထဲသို့ နောက်ဆုံးမှရောက်လာသူဖြစ်သော်လည်း နောက်ကျနေသည်မျိုးတော့မဟုတ်ပေ။ 

ဝေ့ချန်က အခန်းထဲရှိလူများကို ခေါင်းညိတ်ပြလိုက်၍ သူ့နေရာတွင်ထိုင်လိုက်သည်။ သူနှင့်မျက်နှာချင်းဆိုင်တွင် လက်ထောက်အထွေထွေမန်နေဂျာ လီမင်ချန်းထိုင်နေသည်။ လွန်ခဲ့သည့်အပတ်က မက်စ်၏ ဈေးကွက်မြှင့်တင်ရေးဒါရိုက်နှင့် ကောင်းမွန်သည့်ဆွေးနွေးမှုများ ဖြစ်မြောက်ခဲ့၍ဖြစ်နိုင်သည်။ သူက အတော်လေး ကျေနပ်နေပုံရနေ၏။ တစ်ဖက်တွင်တော့ ကျိုးထုံဖမ်းက တည်တည်ငြိမ်ငြိမ်ရှိနေသော်လည်း သူ၏ အနည်းငယ် တုန်ယင်နေသည့် ခြေထောက်များက ခံစားချက် အစစ်အမှန်များကို ဖော်ပြနေသည်။ ကိစ္စများက သူ့အတွက် ကောင်းကောင်းမွန်မွန်ဖြစ်နေသည့်ပုံပင်။ 

“ဒါရိုက်တာဝေ့...အခုနောက်ပိုင်း အလုပ်ရှုပ်နေတယ်နော်” လီမင်ချန်းက အပြုံးထဲတွင် စောင်းမြောင်းခြင်းများဖြင့် ပြောလာသည်။ 

မက်စ်နှင့် ဆက်ဆံရေးများတည်ဆောက်ရန်အတွက် ဝေ့ချန်က ကုမ္ပဏီမှ တစ်ပတ်နီးပါး ပျက်ကွက်သွားသည်ကို အားလုံးသိကြသည်။ ချန်ဖုန်းအုပ်စု၏ ဈေးကွက်မြှင့်တင်ရေးဒါရိုက်တာအနေနှင့် မက်စ်နှင့်ပူးပေါင်းရန် အခွင့်အလမ်းရှိပြီး ချန်ဖုန်းအုပ်စုကို တရုတ်နိုင်ငံတွင် မက်စ်၏ သီးသန့်ကိုယ်စားလှယ်ကုမ္ပဏီ ဖြစ်လာရန် လုပ်ခြင်းက သူ့အတွက် ပုံမှန်သာဖြစ်သည်။ ဝေ့ချန်၏ကြိုးစားအားထုတ်မှုများက အကြောင်းအရင်းမရှိဘဲ မနေပေ။ 

သို့သော်လည်း လွန်ခဲ့သည့်အပတ်တွင် ကျိုးထုံဖမ်းနှင့် လီမင်ချန်းတို့က မက်စ်၏ ဈေးကွက်မြှင့်တင်ရေးဒါရိုက်တာ လက်ခံခြင်းခံခဲ့ရကြောင်းကိုလည်း အခန်းထဲတွင်ရှိနေသည့် အားလုံး သိကြသည်။ မက်စ်၏ ဈေးကွက်မြှင့်တင်ရေးဒါရိုက်တာက အခြားကုမ္ပဏီများကို လေ့လာရာတွင်တောင်မှ ကျိုးထုံဖမ်းနှင့် လီမင်ချန်းတို့က သူနှင့်အမြဲရှိနေခဲ့ကာ သူတို့ ဝေ့ချန်ကို မတွေ့ခဲ့ချေ။

အဲ့ဒါကြောင့် ဝေ့ချန်က ဘယ်ကိုသွားပြီး မက်စ်ရဲ့လူတွေနဲ့ ဆက်ဆံရေးတွေ တည်ထောင်တာလဲ...ပြီးခဲ့တဲ့အပတ်မှာ ဝေ့ချန်က ယူအက်စ်အထိ ကိုယ်တိုင်ကိုယ်ကျသွားပြီး မက်စ်ရဲ့ ဥက္ကဌကို သွားတွေ့ခဲ့တာလား...။

အခြားသူများ၏ စူးစမ်းနေသည့် အကြည့်များကိုရင်ဆိုင်နေရသည့်တိုင် ဝေ့ချန် တည်တည်ငြိမ်ငြိမ် ရှိနေဆဲဖြစ်သည်။ သူကခုံတွင် အေးအေးလူလူဖြင့် ထိုင်နေကာ အစည်းအဝေးစရန်စောင့်နေ၏။

လပတ်စဥ်အစည်းအဝေးများက တူညီသည့်အ‌ကြောင်းအရာများသာဖြစ်ပြီး ဒီတစ်ခေါက်လည်း ခြွင်းချက်မရှိချေ။ သူတို့က လွန်ခဲ့သည့်လ၏ လုပ်ဆောင်ချက်များနှင့် ဌာနတစ်ခုချင်းစီ၏ လုပ်ဆောင်ချက်များကို ပြန်လည်သုံးသပ်ကြပြီး နောက်လအတွက် ပန်းတိုင်များကိုချမှတ်ကြသည်။ ၎င်းက သာမန်ဆွေးနွေးမှုများသာ ဖြစ်သော်လည်း လစဥ်လတိုင်း ပြုလုပ်ရသည်။

သေချာသည်ကတော့ ထိုလုပ်ရိုးလုပ်စဥ်အကြောင်းအရာများအပြင် မှတ်ချက်ပေးခြင်းနှင့် ကဲ့ရဲ့ဝေဖန်ခြင်းများလည်း ရှိ၏။ ဌာနအားလုံးက သူတို့၏သတ်မှတ်ချက်များကို မရောက်နိုင်ကြချေ။ တစ်ဖက်တွင်တော့ ဝေ့ချန်၏ ဈေးကွက်မြှင့်တင်ရေးဌာနက လတိုင်း ချီးကျူးခံရကာ ဝန်ထမ်းများ မျက်လုံးထဲတွင် ၎င်းကပုံမှန်ကိစ္စလိုဖြစ်လာခဲ့သည်။ 

သို့သော်ငြားလည်း လစဥ်အစည်းအဝေးတိုင်းတွင် လတိုင်း တိုးတက်မှုကိုထိန်းသိမ်းထားသည့်အတွက် ‌ဝေ့ချန်ကို လေးစားအားကျသည့် မျက်လုံးများဖြင့် ကြည့်ကြပြီး အသိအမှတ်ပြုကြလိမ့်မည်။ 

ဝေ့ချန်၏ လုပ်ဆောင်ရည်များက အခြားသူများနှင့် လုံးဝကွာခြားလေသည်။

ဤလပတ်ကလည်း ခြွင်းချက်မရှိဘဲ လုပ်ဆောင်ချက်များက တိုးတက်နေဆဲဖြစ်သည်။ ဝန်ထမ်းများက နံပါတ်များကိုမြင်သောအခါ အဆင်မပြတ်ကောင်းမွန်သည့်ရလဒ်များကြောင့် ထုံထိုင်းထိုင်းပင် ဖြစ်လာကြ‌၏။ ဘယ်အချိန်မှ ဈေးကွက်မြှင့်တင်ရေးဌာနရဲ့ လုပ်ဆောင်ချက်တွေ မတိုးတက်မှာလဲ...။ ဒါက တကယ်ကို အံ့ဩစရာ ကောင်းလိမ့်မည်ပင်။ 

ပုံမှန်လုပ်ရိုးလုပ်စဥ်များ ပြီးသွားပြီးနောက် အစည်းအဝေးက မပြီးသေးပေ။ မက်စ်၏ လုပ်ငန်းများအကြောင်း ဆက်ဆွေးနွေးကြသည်။ ချန်ဖုန်းအုပ်စုက မက်စ်ကို မျက်စိကျနေရုံသာမက နိုင်ငံထဲမှ တတ်နိုင်သည့်ကုမ္ပဏီများကလည်း မက်စ်ကို မျက်စိကျနေကြသောကြောင့် ၎င်းက အရေးပါသည့် ကိစ္စတစ်ခု ဖြစ်လေသည်။ 

မက်စ်က နိုင်ငံထဲအထိ ဝင်‌ရောက်လာကာ သူတို့၏ယာဥ်များကို မည်သည့်အချိန်တွင် ဝယ်ယူနိုင်မလဲကို ချန်ဖုန်းအုပ်စုမှ ထိပ်တန်းမန်နေဂျာများဖြင့် လိုက်လံစုံစမ်းနေသည့် ကောလဟလများလည်း ပျံ့လွင့်နေသည်။ 

ထို့ကြောင့် မက်စ်နှင့် လက်တွဲသည့် ပရောဂျက်က ချန်ဖုန်းအုပ်စုအတွက် မဖြစ်မနေ အောင်မြင်ရမည့် ပရောဂျက်ဖြစ်သည်။ 

သို့သော်လည်း ဆွေးနွေးခြင်းက အရှိန်မရသေးခင်တွင် ကျိုးထုံဖမ်း၏ အချက်ပြမှုအောက်တွင် လီမင်ချန်း ထရပ်လိုက်သည်။ 

“လွန်ခဲ့တဲ့အပတ်မှာ ကျုပ်တို့ မက်စ်ရဲ့ ဈေးကွက်မြှင့်တင်ရေးဒါရိုက်တာဖြစ်တဲ့ မစ္စတာတွမ်နဲ့ အဖော်ပြုပေးပြီး တရုတ်ဈေးကွက်ကို စူးစမ်းခဲ့ကြတယ်...မစ္စတာတွမ်က ကျုပ်တို့အုပ်စုကို ချီးမွမ်းပြီး ကျုပ်တို့နဲ့ လက်တွဲတာကသာ အကောင်းဆုံးရွေးချယ်မှုဖြစ်တယ်လို့ ယုံကြည်ခဲ့ပါတယ်...ဒါပေမယ့် မစ္စတာတွမ်က မက်စ်ရဲ့ ဈေးကွက်မြှင့်တင်ရေးဒါရိုက်တာရှိသေးတာ...သူက မနေ့ကပဲ ယူအက်စ်ကို ပြန်‌ရောက်ပြီး အခြေအနေတွေကို အထက်ကိုတင်ပြမယ်လို့ ပြောခဲ့ပါတယ်...ချန်ဖုန်းအုပ်စုက မက်စ်ရဲ့ သီးသန့်ကိုယ်စားလှယ်ဖြစ်လာနိုင်ချေက အရမ်းမြင့်တယ်လို့ ကျုပ်‌တော့ယုံကြည်တယ်” 

လီမင်ချန်းက ထိုသို့ပြောရုံသာမကသေးပေ။

 “မစ္စတာတွမ်က ကျုပ်တို့ဆီက အကျိုးအမြတ်တွေ ရသွားပါသေးတယ်... ဒါကြောင့် ကျုပ်တို့ကိုယ်စား မပြောပေးဘူးဆိုရင် မှန်ကန်ရာမရောက်သလို၊ စည်းမျဥ်းတွေကို မလိုက်နာရာလည်း ရောက်လိမ့်မယ်”

လီမင်ချန်းက ထိုစကားများကို‌ ပြောနေချိန်တွင် သူ့အကြည့်များက ဝေ့ချန်အပေါ်တွင်သာ ရန်လိုမှု၊ ရန်စမှုများဖြင့် ရှိနေသည်။ ဤအောင်မြင်မှုက လီမင်ချန်း၊ ကျိုးထုံဖမ်းနှင့် မစ္စတာတွမ်တို့ တစ်ပတ်တိတိ ပူးပေါင်းအားထုတ်လိုက်ခြင်းမှ ရရှိလာခြင်းဖြစ်သည်။ ထိုအပတ်၌ ဝေ့ချန် မည်မျှပင် လည်ပတ်ခဲ့ပါစေဦး၊ မက်စ်၏လူများကို ဆက်သွယ်ရန် နည်းလမ်းရှာမတွေ့နိုင်ခဲ့ချေ။ 

လီမင်ချန်းက သူ့ကိုယ်ပိုင်တင်ပြချက်တွင် ယုံကြည်ချက်ရှိနေ၏။

ဝေ့ချန်က လီမင်ချန်း၏ အကြည့်များကို သတိထားမိသော်လည်း မည်သို့မှ မတုံ့ပြန်လိုက်ချေ။ သူတို့ မျက်လုံးချင်းဆုံသွားချိန်တွင် ဝေ့ချန်က ဤကိစ္စအား အ‌လေးမထားသကဲ့သို့ လီမင်ချန်းကို ယဥ်ယဥ်ကျေးကျေးဖြင့် ခေါင်းညိတ်ပြလိုက်သည်။ 

ဝေ့ချန်၏ အပြုအမူများက လီမင်ချန်းအား ခေါင်းအုံးပျော့ပျော့လေးကို ထိုးလိုက်ရသကဲ့သို့ ခံစားရစေသည်။ 

လီမင်ချန်း တွေးလိုက်၏။ ‘မက်စ်နဲ့ စာချုပ်ကိုမြင်ပြီးတဲ့နောက်မှ မင်းရဲ့ ဒီပုံစံကို ဆက်ထိန်းထားနိုင်ဦးမလား မြင်ချင်မိတယ်...ဖြစ်လာတဲ့အခါမှ မနာလိုတာတွေ မပြလာနဲ့...ဒီသဘောတူညီမှုကနေ ရလာတဲ့ ချန်ဖုန်းရဲ့ လုပ်ဆောင်ချက်က မင်းယူ‌လာပေးတဲ့ တိုးတက်မှုစုစုပေါင်းထက် ကျော်သွားမှာ...’

လီမင်ချန်း၏ ဝေ့ချန်အပေါ် ပစ်မှတ်ထားနေခြင်းက အခြေအမြစ်မရှိဘဲတော့ မဟုတ်ပေ။ ပထမတစ်ချက်မှာ ဝေ့ချန်က ကျူးကောဖုန်းနှင့် တစ်လှေတည်းဖြစ်ပြီး ချန်ဖုန်းကို ရောက်လာသည့်အချိန်မှစ၍ ကျိုးထုံဖမ်းဆီမှ အကျိုးအမြတ်များစွာကို ဖြတ်ယူသွားခဲ့သည်။ ကျိုးထုံဖမ်းက ဝေ့ချန်အပေါ် မကျေနပ်ချက်များရှိလေသည်။ လီမင်ချန်းကလည်း ကျိုးထုံဖမ်းနှင့် တစ်လှေတည်းဖြစ်သောကြောင့် ဝေ့ချန်အပေါ် ကောင်းမွန်သည့် အမြင်များမရှိချေ။

ဒုတိယအချက်မှာ ဝေ့ချန်ရောက်ရှိလာမှုက လီမင်ချန်း၏ လက်ထောက်အထွေထွေမန်နေဂျာဆိုသည့် ရာထူးကို ရှုပ်ထွေးသွားစေခဲ့သည်။ ယခင်က ထိုရာထူးမှာ အာဏာရှိပြီး အရောင်းဌာန၊ ‌ဈေးကွက်မြှင့်တင်ရေးဌာနနှင့် အခြားဌာနများအပေါ် ထိန်းချုပ်နိုင်သည်။ သို့သော်‌ ဝေ့ချန်ကြောင့် အရောင်းဌာနနှင့် ဈေးကွက်မြှင့်တင်ရေးဌာနများမှာ ပေါင်းစည်းသွားခဲ့ပြီး လီမင်ချန်း၏ လက်ထောက်အထွေထွေမန်နေဂျာနေရာကို ကျော်လွန်၍ ဘုတ်အဖွဲ့သို့ တိုက်ရိုက်တင်ပြကြရသည်။ သူ၏ အာဏာက သိသိသာသာလျှော့ချခံလိုက်ရပြီး ရာထူးက မထင်မရှားလေးဖြစ်သွားခဲ့၏။ ဥက္ကဌရှန့်ကျားချီသာ သူတို့နှစ်ဖက်ကြားတွင် ဟန်ချက်မညီစေခဲ့ပါက လက်ထောက်ထွေအထွေမန်နေဂျာအဖြစ် သူ၏ရာထူးမှာ ပယ်ရှားခံခဲ့ရလိမ့်မည်ပင်။ 

နောက်ဆုံးအချက်အနေနှင့် ဝေ့ချန် ကုမ္ပဏီကိုရောက်လာသည့်အချိန်မှစ၍ သူက ကောင်းမွန်သည့် ရလဒ်များကို အဆက်မပြတ်ရရှိခဲ့သည်။ လီမင်ချန်းကတော့ သူ၏ လက်ထောက်အထွေထွေမန်နေဂျာဆိုသည့် ရာထူးနှင့် သိသာသည့် တိုးတက်မှုများကို မလုပ်ဆောင်နိုင်ခဲ့ချေ။ ကုမ္ပဏီဝန်ထမ်းများက သူနှင့် ဝေ့ချန်ကို တိတ်တဆိတ် နှိုင်းယှဥ◌်လာခဲ့ကြသည်။ 

လီမင်ချန်းက ဝေ့ချန်နှင့် အသက်အရွယ်အရရော၊ အသွင်အပြင်အရရှုံးခြင်းကို စိတ်မရှိပေ။ ဝေ့ချန်က တကယ်ကို ငယ်ရွယ်ပြီးချောမောကြောင်း သူအသိအမှတ်ပြု၏။ သို့သော်လည်း ယှဥ်ပြိုင်ခြင်းနှင့် ပတ်သက်လာလျှင် အခြားသူများ၏ ဝေဖန်ဆုံးဖြတ်ခံရခြင်းက လီမင်ချန်းလက်မခံနိုင်သည့်အရာဖြစ်သည်။ 

ထိုအရာများစုပေါင်းလာပြီး လီမင်ချန်း မကျေနပ်ချက်များ များပြားလာခဲ့၏။ လူတို့က သူတို့၏ ဂုဏ်သိက္ခာများအတွက် တိုက်ခိုက်ကြပြီး လီမင်ချန်းလည်း ဝေ့ချန်ကို နောက်တစ်ခေါက်မရှုံးရန် စိတ်ပိုင်းဖြတ်ခဲ့သည်။ ထို့ကြောင့် ဒီတစ်ကြိမ်တွင် ကျိုးထုံဖမ်းက သူ့ကို မက်စ်၏ဈေးကွက်မြှင့်တင်ရေးဒါရိုက်တာ မစ္စတာတွမ်နှင့် သွားတွေ့ရာတွင် ခေါ်သွားရန် ကျိုးကျိုးနွံနွံနေခဲ့၏။ မစ္စတာတွမ်အရှေ့တွင်လည်း ယဥ◌်ယဥ◌်ကျေးကျေးပြုမူကာ မက်စ်ပရောဂျက်ကိုရရန် ကြိုးစားခဲ့သည်။ 

အဆုံးတွင်တော့ သူက ကျိုးကြောင်းဆီလျော်စွာဖြင့် ရလဒ်အား ကျေနပ်ခဲ့၏။ အနည်းဆုံးတော့ မစ္စတာတွမ် ပြန်သွားချိန်တွင် သူက တရုတ်နိုင်ငံ၌ မက်စ်၏ သီးသန့်ကိုယ်စားလှယ်က ချန်ဖုန်းအုပ်စုသာ ဖြစ်လိမ့်မည်ဟု အာမခံသွားခဲ့သည်။ 

ရလဒ်အနေနှင့် လက်ရှိအစည်းအဝေးတွင် လီမင်ချန်း ယုံကြည်ချက်အပြည့်ရှိနေကာ ဝေ့ချန်အရှုံးကို မည်သို့ ရင်ဆိုင်မလဲပင် ကြည့်ရန် စိတ်အားထက်သန်နေမိသည်။ 

ကျိုးထုံဖမ်းက လီမင်ချန်းအား သူ၏အောင်မြင်မှုကို ဖော်ပြရန် ခွင့်ပြုထားသည်။ နောက်ဆုံးတော့လည်း မက်စ်ပရောဂျက်က သူတို့အတွက် သေချာနေပြီဖြစ်သည်။ ဝေ့ချန်၏လွှမ်းမိုးမှုကို အကြာကြီးခံခဲ့ရပြီးနောက်တွင် ယခုတွင်‌တော့ လီမင်ချန်းက သူ၏အသစ်စက်စက် အောင်မြင်မှုအား ဂုဏ်ယူနေသည်က တရားမျှတလေသည်။ 

ရှန့်ကျားချီက သူတို့၏ အမူအရာများကိုကြည့်၍ ရယ်စရာကောင်းသည်ဟု ခံစားလိုက်ရသည်။ မည်သည့်အရာမှ အဆုံးမသတ်ရသေးဘဲ သူတို့က ယုံကြည်ချက်များလွန်ကဲနေကြ၏။ နောက်ကြုံလာမယ့် ကြမ်တမ်းတဲ့လက်တွေ့ကို တကယ်ပဲ မကြောက်ကြဘူးလား…။

“ဒါရိုက်တာဝေ့…ပြီးခဲ့တဲ့အပတ်မှာ ဘာရခဲ့လဲ ပြောပြပေးနိုင်မလား” ရှန့်ကျားလီက တစ်ဖက်တွင် တိတ်တဆိတ် အောင်ပွဲခံနေကြသည့် လူနှစ်ယောက်ကို လျစ်လျူရှုလိုက်ပြီး ဝေ့ချန်ကို တိုက်ရိုက်မေးလိုက်သည်။ 

သို့သော်လည်း သူ ထိုမေးခွန်းကိုမေးလိုက်ချိန်တွင် အခန်းထဲ၌ ရယ်သံတိုးတိုးလေးများထွက်လာသည်။ အချို့က ဥက္ကဌမှာ စိတ်လွတ်သွားပြီလားဟုပင် တွေးနေကြ၏။

ဝေ့ချန်က ပြီးခဲ့တဲ့အပတ်မှာ ဘာရခဲ့မှာလဲ…။ မက်စ်က မစ္စတာတွမ်က ဒုဥက္ကဌကျိုးထုံဖမ်း၊ လက်ထောက်အထွေထွေမန်နေဂျာ လီမင်ချန်းတို့နှင့် တွေ့ဆုံခဲ့ပြီးဖြစ်သည်။ ဝေ့ချန်က မက်စ်အုပ်စုနှင့် ဆက်သွယ်ရန် မလုပ်နိုင်ခဲ့ချေ။ သူဘယ်လိုရလဒ်မျိုးရနိုင်မှာမို့လို့လဲ..။

ဥက္ကဌက ဝေ့ချန်က စကားဝိုင်းအထဲသို့ မထင်မှတ်ဘဲ ဝင်ရောက်စေကာ အုပ်စု၏ ရယ်စရာအဖြစ်လုပ်ချင်နေပုံရသည်။ 

လူများက ဟိုတွေးဒီတွေးနှင့် နောက်ဆုံးတွင် တူညီသည့်အတွေးနှင့် နိဂုံးချုပ်သွားကြသည်။ 

ကြည့်ရသည်မှာ ဒီတစ်ခေါက်တွင် ဝေ့ချန်က မက်စ် ပရောဂျက်ကို ရယူရန် ကျဆုံးခဲ့ပြီး ဥက္ကဌကို စိတ်မကျေမနပ် ဖြစ်သွားစေခဲ့ပုံပင်။ ထို့ကြောင့် သူ၏ကျဆုံးမှုကို လူသိရှင်ကြားဖော်ထုတ်ရင်း ဝေ့ချန်ကို သင်ခန်းစာပေးချင်နေသည်။ ဝေ့

ချန်က ဥက္ကဌယုံကြည်ရသည့် လက်ထောက်တစ်ယောက် မဟုတ်ဘဲ သူ့ကို ဥပမာပေး၍ ပြသချင်နေခြင်းဖြစ်ပေလိမ့်မည်။

💘