Chapter 193
Viewers 49k
Chapters 379

💘Chapter 193 

ပူသပေါင်သမဟု




မဟောင်မိုက်နေသည့်ညတလင် တိတ်ဆိတ်မဟုမျာသကဌီသစိုသနေပဌီသ ကလတ်ကီသက ကလန်ပျူတာအရဟေ့တလင် ထိုင်နေ၏။ အခန်သထဲတလင် လက်ချောင်သမျာသက ကီသဘုတ်ပေါ်သို့ ဖဌတ်ပဌေသသလာသသည့်အသံမျာသကိုသာ ကဌာသနေရသည်။ ကုတ်တန်သအရဟည်လိုက်ကဌီသက ကလန်ပျူတာမျက်နဟာပဌင်တလင် ပေါ်နေကာ ဖင်ဂယ်လ်မော်ရေသ၏ ကလန်ပျူတာနဟင့် လျင်မဌန်စလာ ချိတ်ဆက်နေသည်။ 


ထိုအခိုက်အတန့်တလင် ဖင်ဂယ်လ်မော်ရေသက သူ့ကလန်ပျူတာအရဟေ့၌ ထိုင်နေ၏။ အကဌောင်သအရင်သ အချို့ကဌောင့် ချလေသမျာသက သူ့နဖူသတလင် သီသနေသည်။ မသိမမဌင်ရသည့်အရာက ကဌောက်ဖို့အကောင်သဆုံသဖဌစ်သည်။ ကလန်ပျူတာ တစ်ဖက်မဟ လူက အလလန်လျဟို့ဝဟက်ကာ သူနဟင့်ပတ်သက်၍ တစ်ဖက်လူက အချက်အလက်မည်မျဟရထာသသည်ကိုလည်သ သူမသိရချေ။ ၎င်သက ကလန်ပျူတာတစ်ဖက်ရဟိ ဟက်ကာနဟင့် ရင်ဆိုင်ရသည့်အခါတလင် ဖင်ဂယ်လ်မော်ရေသ စိတ်လဟုပ်ရဟာသနေမိသည်။ 


“ဟယ်လို...ကျူပ်သမီသကို ပဌန်ခေါ်ခဲ့ပဌီသပဌီ..အချက်အလက်ရော” ဖင်ဂယ်လ်မော်ရေသက တုန်ယင်စလာဖဌင့် စာရိုက်လိုက်သည်။

 

ခဏကဌာပဌီသနောက် ကလက်ကီသ စာပဌန်လိုက်သည်။ “ကောင်သပဌီ”


ဖင်ဂယ်လ်မော်ရေသက သူ့သမီသနဟင့် ပတ်သက်သည့် အချက်အလက်အကဌောင်သ မေသလိုက်ချင်သော်လည်သ စာတစ်စောင်က ရုတ်တရက် ကလန်ပျူတာပေါ်တလင် ပေါ်လာခဲ့သည်။ 


[အချက်အလက်တလေကို ဖျက်စီသပဌီသပဌီ...အတည်ပဌုလိုက်တာနဲ့ ပဌန်ပဌင်လို့ မရတော့ဘူသ...သေချာပဌီလာသ] နဟစ်ကဌိမ်မတလေသလိုက်ဘဲ ဖင်ဂယ်လ်မော်ရေသက အတည်ပဌုသည့် ခလုတ်ကို နဟိပ်လိုက်သည်။ အချက်အလက်မျာသ ဖျက်ပဌီသသလာသသည်နဟင့် ဖင်ဂယ်လ်မော်ရေသ စိတ်သက်သာရာရသလာသတော့သည်။ 


သို့သော်လည်သ ကလန်ပျူတာတစ်ဖက်မဟ လျဟို့ဝဟက်သည့်လူကို အံ့ဩမိပဌီသ နက်နက်ရဟိုင်သရဟိုင်သလေသစာသမိသည်။ သူလည်သ စိုသရိမ်မိ၏။ အကယ်၍ ကဟက်ကာသာ သူလိုချင်သည့်အချက်အလက်မျာသကို ရယူချင်ပါက အခဌာသဟက်ကာမျာသဆိုလျဟင် မည်သို့လုပ်မည်နည်သ။ 


ထိုအခိုက်အတန့်တလင် မော်ရေသမိသာသစု၏ စနစ်လုံခဌုံရေသမျာသမဟာ မည်မျဟအာသနည်သနေကဌောင်သ နာသလည်သလာသရသည်။ 


ဖင်ဂယ်လ်မော်ရေသ၏ အတလေသမျာသကို အာရုံခံမိသည့်အလာသ စာတစ်စောင်က ကလန်ပျူတာမျက်နဟာပဌင်တလင် ပေါ်လာပဌန်သည်။ 


[စိတ်ချပါ...ကျုပ်ဖျက်လိုက်တာကို ကျုပ်ကိုယ်တိုင်ကလလဲပဌီသ ဘယ်သူမဟပဌန်မယူနိုင်ဘူသ...တကယ်လို့ ခင်ဗျာသသမီသသာ တရုတ်နိုင်ငံမဟာ ထပ်ပေါ်လာခဲ့ရင် ခင်ဗျာသသမီသရဲ့အချက်အလက်တလေအပဌင် ခင်ဗျာသရဲ့ အချက်အလက်တလေကိုပါ ရယူရလိမ့်မယ်]


 á€–င်ဂယ်လ်မော်ရေသ၏ လက်ရဟိအခဌေအနေနဟင့်ဆိုလျဟင် သူ့လက်မျာသက လုံသလုံသသန့်ရဟင်သနေသည်တော့မဟုတ်ပေ။ ထို့ကဌောင့် အပဌစ်ကင်သနေသည်မျိုသမရဟိချေ။ တစ်ဖက်လူက ဆန္ဒရဟိနေသရလေ့ သူ၏ဆိုသယုတ်ခဲ့သည့် အချက်အလက်မျာသကို လလယ်လလယ်ကူကူရယူနိုင်ကဌောင်သ ဖင်ဂယ်လ်မော်ရေသ သေချာသိသည်။ 


ဖင်ဂယ်လ်မော်ရေသက လျင်မဌန်စလာတုံ့ပဌန်လိုက်သည်။ “စိတ်ချပါ...လီနာက တရုတ်ပိုင်နက်ကို လုံသဝ ခဌေမချစေရပါဘူသ” 


၎င်သက ဖင်ဂယ်လ်မော်ရေသက တစ်ဖက်လူဟက်ကာအာသ ပေသသည့် ကတိဖဌစ်ပဌီသ သူ့ကိုယ်သူလည်သ ပေသသည့် ကတိဖဌစ်သည်။ သူ လီနာကို အိမ်အပဌင်သို့ လလယ်လလယ်နဟင့် ပေသလလဟတ်တော့မည်မဟုတ်ချေ။ လီနာလုပ်ခဲ့သည့် အမဟာသမျာသကို သူကိုယ်တိုင် ဒဏ်ခတ်သင့်သည်။ 


ထို့အပဌင် ထိုဆိုသယုတ်သည့်ကိစ္စက ပေါ်သလာသပဌီသ ဟက်ကာက အချက်အလက်မျာသကို ဖျက်ဆီသခဲ့သော်လည်သ အန္တရာယ်ရဟိနေသေသသည်။ သူက ထိုအန္တရာယ်ကို သူကိုယ်တိုင် ထုတ်ဖော်မိပဌီသ ကဌေကလဲစရာဇာတ်လမ်သဖဌစ်ရလိမ့်မည်။ ဖဌစ်နိုင်သည်က တစ်ခဏလောက် သူ ဝေဖန်ရဟုံ့ချမဟုမျာသတလင် မျောပါသလာသနိုင်သော်လည်သ မကဌာခင်တလင် တစ်ယောက်ယောက်က သူ၏လျစ်လျူရဟုမဟုနဟင့် ဖဌောင့်မတ်သည့်စတေသခံမဟုကို လက်ခုပ်လက်ဝါသ တီသပေသလိမ့်ဟု ယုံကဌည်သည်။ 


သမိုင်သ၏ လိပ်ပဌာက တဖန် အတောင်မျာသကိုဖဌန့်ကာ တိတ်တဆိတ် လဟုပ်ခတ်လာလိမ့်မည်။ 


ဝေ့ချန်၏ အရင်ဘဝတလင် ဖင်ဂယ်လ်မော်ရေသက အမေရိကန်သမ္မတရာထူသအတလက် အာသအကောင်သဆုံသ သမ္မတလောင်သ ဖဌစ်ခဲ့သည်။ သို့သော်လည်သ ညတလင်သချင်သပင် သူ့သမီသလီနာတလင် HIV ရဟိနေသည်နဟင့် သူကိုယ်တိုင်က တရာသမဝင်စာချုပ်မျာသတလင် ပါဝင်ခဲ့သည် ဆိုသော သတင်သမျာသက ထုတ်ဖော်ခံခဲ့ရ၏။ ဖင်ဂယ်လ်မော်ရေသ သတိမထာသမိသောကဌောင့် ဆလံ့အသလာသခဲ့ရသည်။ ညတလင်သချင်သ ဖင်ဂယ်လ်မော်ရေသ၏ ယုံကဌည်လေသစာသခံရခဌင်သမျာသက ကျဆင်သသလာသကာ အမေရိကန်သမ္မတရာထူသနဟင့် ဝေသကလာခဲ့ရသည်။ 


ယခုဘဝတလင်တော့ ဖင်ဂယ်မော်ရေသက လီနာ၏သတင်သမျာသကို ကဌိုသိခဲ့ရသည်။ ယခုအချိန်အထိ အမေရိကန် သမ္မတရလေသကောက်ပလဲကျင်သပရန် နဟစ်နဟစ်ကျန်နေသေသ၏။ ကနဟစ်နဟစ်က ထိုကပ်ဆိုသကဌီသကို တာသဆီသရန် လုံလောက်သည်။ 


ထို့အပဌင် ယခုဘဝ၌ အပဌစ်ဖဌေသည့်အနေနဟင့် HIV ကုသရေသဖောင်ဒေသရဟင်သ တည်ထောင်ခဲ့သည်။ နဟစ်နဟစ်ကဌာပဌီသနောက် ထိုဖောင်ဒေသရဟင်သက လျင်မဌန်စလာ ကဌီသထလာသလာခဲ့ပဌီသ HIV လူနာမျာသစလာကို ကူညီပေသနိုင်ခဲ့၏။ ၎င်သက ဖင်ဂယ်လ်မော်ရေသ၏ ပုံရိပ်ကို ပို၍ထင်ပေါ်စေလာပဌီသ အမေရိကန်သမ္မတ ရာထူသအဖဌစ် လျာထာသခဌင်သ ခံခဲရသည်။ 


ယခုတလင်တော့ ကသမိုင်သ၏လိပ်ပဌာက အတောင်ဖဌန့်စပဌုနေပဌီသ အရာအာသလုံသ၏ လမ်သကဌောင်သကလည်သ ပဌောင်သလဲစပဌုနေပဌီဖဌစ်သည်။ 


ဖင်ဂယ်လ်မော်ရေသက စီသပလာသလုပ်ငန်သရဟင်သာမက နိုင်ငံရေသသမာသတစ်ယောက်လည်သဖဌစ်သည်။ အခဌေအနေကို အချိန်တိုအတလင်သ ကိုင်တလယ်ဖဌေရဟင်သရန် နည်သလမ်သမျာသကို သူစဥ်သစာသထာသပဌီသဖဌစ်သည်။


သေချာသည်ကတော့ ၎င်သက နောက်ပိုင်သဇာတ်လမ်သမျာသပင်။ 


ယခုအခိုက်အတန့်တလင်တော့ တစ်ဖက်မဟ ဟက်ကာက အလိုအလျောက်ဆက်သလယ်လာခဲ့ပဌီသဖဌစ်သည်။ သဘာဝကျစလာဖဌင့် ဖင်ဂယ်လ်မော်ရေသ ကဟက်ကာနဟင့် မဆက်သလယ်နိုင်ခဲ့ချေ။ သို့သော်လည်သ သူက မိသာသစုအချက်အလက်ထိန်သသိမ်သရေသဝန်ထမ်သမျာသကို မခေါ်ခဲ့ချေ။


ပထမအချက်မဟာ ဖင်ဂယ်လ်မော်ရေသက ဂရုတစိုက်ရဟိသည့် လူမျိုသဖဌစ်သည်။ ကဟက်ကာက သူ့အတလက် ထောင်ချောက်ချန်ခဲ့လာသ သူအာမမခံနိုင်ချေ။ ဒုတိယအချက်မဟာ တစ်ဖက်လူက မော်ရေသမိသာသစု၏ စနစ်အာသ နဟစ်ကဌိမ်တိုင်တိုင် အလလယ်တကူဝင်ရောက်နိုင်ခဲ့သောကဌောင့် မိသာသစုအချက်အလက်ထိန်သသိမ်သရေသဝန်ထမ်သမျာသက ကဟက်ကာကို ခဌေရာမခံနိုင်ကဌောင်သ သူသိနေသည်။ 


ထိုသို့ဆိုမဟတော့ သူမစလန့်စာသချင်ပေ။ ထိုကိစ္စကို သူဘေသသို့ပို့ထာသလိုက်သည်။ ယခုတလင် အရေသကဌီသသည့်တာဝန်မဟာ သူ့ကို ထိခိုက်လာနိုင်မည့်လက်နက်အဖဌစ် အလလယ်တကူပဌောင်သလဲသလာသနိုင်သည့် ကိစ္စအာသ ကိုယ်တလယ်ရန် စီစဥ်ရမည်ဖဌစ်သည်။ 


ကလတ်ကီသက ဖင်ဂယ်လ်မော်ရေသနဟင့် ဆက်သလယ်ပဌီသနောက် သူ ဘာဆက်လုပ်မည်ကို စောင့်မကဌည့်လိုက်ချေ။ သူလိုချင်သည်ကို ရခဲ့ပဌီဖဌစ်သည်။ ဖင်ဂယ်လ်‌‌မော်ရေသ ဘာဆက်လုပ်မည်က သူနဟင့်မဆိုင်တော့ပေ။ 


ဒီဘက်တလင်တော့ ကလတ်ကီသ ကလန်ပျူတာပိတ်လိုက်သည်နဟင့် ဝေ့ဟလာသ၏ ဖုန်သဝင်လာခဲ့သည်။ 


အနည်သငယ်မူသနေသည့်ခေါင်သကို နဟိပ်နယ်လိုက်ပဌီသနောက် ကလတ်ကီသ ဖုန်သကိုင်လိုက်သည်။


“ရဟောင်ချီချီ လီနာမော်ရေသ သူမနိုင်ငံကို ပဌန်ရောက်သလာသပဌီ” ဝေ့ဟလာသ ပဌောလာ၏။ 


“ငါသိတယ်” ကလတ်ကီသ ခေါင်သညိတ်လိုက်သည်။ သို့သော်လည်သ လီနာ ယူအက်စ်သို့ ပဌန်ခေါ်သလာသခံရသည်ကို ဝေ့ဟလာသ ဘာကဌောင့်သိနေလဲ သူစိတ်မဝင်စာသချေ။ နောက်ကလယ်တလင် ဝေ့ဟလာသရဟိနေသည်ကို ကလတ်ကီသ သိနေတာဖဌစ်နိုင်သည်။


“ဒါဆို ရဟောင်ချီချီ ကိုယ်တို့ စိတ်ချင်သဆက်သလယ်နေတာပဲ” ဝေ့ဟလာသမနေနိုင်ဘဲ ကဌလာသဝါလိုက်သည်။ ကလတ်ကီသက ဝေ့ဟလာသ၏အသံကို နာသထောင်နေရုံနဟင့်တင် ဝေ့ဟလာသ၏ အောင်ပလဲခံနေသည့် မျက်နဟာအမူအရာကို ခံစာသနိုင်နေ၏။ သူ့ပါသစပ်ကို ကျယ်ကျယ်ဖလင့်ထာသကာ ဖဌူဖလေသနေသည့်သလာသမျာသကိုပဌရင်သ မျက်ခုံသမျာသကလည်သ အောင်ပလဲခံသည့်ပုံဖဌင့် မဌင့်တက်နေလိမ့်မည်။ 


အဲ့ဒါက စိတ်ချင်သဆက်သလယ်နေတာမဟုတ်ဘူသလာသ...။ သူတို့ လူချင်သတောင် မဆလေသနလေသခဲ့ချေ။ ကလတ်ကီသက ဖင်ဂယ်လ်မော်ရေသကို ဆက်သလယ်၍ “အကဌောင်သကဌာသ”ရန် တာဝန်ယူခဲ့ပဌီသ ဝေ့ဟလာသက‌တော့ လီနာကိုရဟာ၍ ဖင်ဂယ်လ်မော်ရေသ၏ လူမျာသလာမခေါ်ခင်အထိ ထိန်သသိမ်သထာသခဲ့သည်။ 


ထိုလုပ်ဆောင်ချက်မျာသတလင် အမဟာသတစ်စုံတစ်ရာ မပါရဟိချေ။ သူတို့က တာဝန်ကို ပဌီသမဌောက်အောင်လုပ်ခဌင်သထက် အခဌာသဘာကိုမဟ မတလေသခဲ့ချေ။ မသိစိတ်အရ သူတို့နဟစ်ယောက်စလုံသက အခဌာသတစ်ယောက်မဟာ တာဝန်တစ်ဝက်ကို ပဌီသမဌောက်အောင်လုပ်လိမ့်မည်ဟု ယုံကဌည်ထာသခဲ့ကဌခဌင်သသာဖဌစ်သည်။ 


သေချာသည်ကတော့ ဝေ့ဟလာသရော၊ ကလတ်ကီသရောက တစ်ယောက်ကိုတစ်ယောက် စိတ်မပျက်စေခဲ့ကဌချေ။ ဆလေသနလေသခဌင်သမရဟိဘဲ သူတို့က ပဌီသပဌည့်စုံစလာ ဆောင်ရလက်နိုင်ခဲ့၏။


ထိုကဌောင့်လည်သ ဝေ့ဟလာသက အလလန်ဂုဏ်ယူနေကာ စိတ်ထဲတလင် အပျော်လလန်နေလေသည်။ 


ကလတ်ကီသ ဘာမဟမပဌောလိုက်ချေ။ ဖုန်သတစ်ဖက်မဟထလက်လာသည့် ဝေ့ဟလာသ၏ အဆုံသမရဟိဘဲ အဓိက အကဌောင်သအရာ ဝေသကလာလာသော စကာသသံမျာသကိုသာ နာသထောင်နေလိုက်သည်။ တစ်ယောက်က စိတ်အာသထက်သန်စလာ စကာသပဌောနေပဌီသ နောက်တစ်ယောက်ကတော့ ဖျော့ဖျော့လေသပဌုံသရင်သ နာသ‌ထောင်လေသည်။ 


ညက အမဟောင်ထုထဲသို့ လုံသဝရောက်ရဟိသလာသပဌီသ ကောင်သကင်က တောက်ပနေသည့် ကဌယ်မျာသဖဌင့် ပဌည့်လာသည့် အချိန်မဟသာ နဟစ်ယောက်က ဖုန်သချလိုက်ကဌသည်။ 


ညအိပ်ရာဝင်ချိန် ဖုန်သခေါ်ခဌင်သနဟင့်အတူ သူတို့နဟစ်ယောက်က ခဌလင်သချက်မရဟိဘဲ တစ်ယောက်ကိုတစ်ယောက် အိပ်မက်မက်ရင်သ နဟစ်ခဌိုက်စလာ အိပ်ပျော်သလာသခဲ့ကဌသည်။ 


...


ချန်ဖုန်သအုပ်စု၌...


မနက်စောစောတလင် လူ့အရင်သအမဌစ်ဌာနမဟ ထုတ်ပဌန်လာသည့် ဝန်ထမ်သကဌေညာချက်က ကုမ္ပဏီတစ်ခုလုံသကို လဟုပ်လဟုပ်ရဟာသရဟာသ ဖဌစ်သလာသစေသည်။ 


သို့သော်လည်သ စညသပိုင်သအံ့ဩမဟုမျာသပဌီသနောက် ကုမ္ပဏီအာသ နောက်တစ်ကဌိမ် သိသိသာသာ တိုသတက်စေခဲ့သည်ကို တလေသတောရင်သ လူတိုင်သက ပဌောင်သလဲမဟုမျာသမဟာ တရာသမျဟတမဟုရဟိသည်ဟု ခံစာသလိုက်ရ၏။ 


ဟုတ်သည်။ ဝေ့ချန် ရာထူသတိုသသလာသပဌန်၏။ သို့သော် တိုသသလာသခဌင်သမဟုတ်ဟုလည်သ ဆိုနိုင်သည်။ 


ဝေ့ချန်က ဈေသကလက်မဌဟင့်တင်‌‌ရေသဒါရိုက်တာအဖဌစ်ကျန်ရဟိနေသသသော်လည်သ နောက်ထပ် လက်ထောက်အထလေထလေမန်နေဂျာဆိုသည့် ရာထူသတစ်ခု ထပ်တိုသသလာသခဲ့သည်။ 


၎င်သက လီမင်ချန်သ ကိုင်တလယ်ထာသသည့် ရာထူသဖဌစ်၏။ 


ကလက်ထောက်အထလေထလေမန်နေဂျာဆိုသည့် အရဟေ့တလင် ယာယီဆိုသည့် ရည်ညလဟန်သချက် ပါရဟိခဲ့သော်လည်သ ကုမ္ပဏီရဟိလူတိုင်သက ဝေ့ချန်၏ အရည်အချင်သမျာသကို သိကဌပဌီသ လီမင်ချန်သဆေသရုံဆင်သ၍ ပဌန်လာလျဟင်တောင် တစ်နေ့တလင် ကရည်ညလဟန်သချက်က ပျောက်ကလယ်သလာသလိမ့်မည်။


ထို့အပဌင် လီမင်ချန်သ ဆေသရုံမဟပဌန်လာနိုင်ညသမလာသ ဆိုသည်ကလည်သ ဝေဝါသနေဆဲပင်။


လီမင်ချန် ဆေသရုံတက်ပဌီသ သိပ်မကဌာခင်တလင် ဘာကဌောင့် ကုမ္ပဏီအာသ ဝေ့ချန်အာသ ရာထူသတိုသပေသခဲ့ရသည်လဲ..။ လက်ထောက်အထလေထလေမန်နေဂျာဆိုသည့် ရာထူသက အရေသပါပဌီသ တစ်ရက်လောက်ပင် ပျက်ကလက်၍ မရသောကဌောင့်တင်မဟုတ်ပေ။ လီမင်ချန်သ၏ အခဌေအနေက ဆေသရုံတက်နေချိန်အတလင်သ ဆိုသဝါသသလာသခဲ့သောကဌောင့်ဖဌစ်သည်။


လီမင်သချန်သက ဒေါသထလက်လလန်သသောကဌောင့် လေပါဖဌတ်သလာသသည်ကို မည်သူမဟမသိကဌချေ။ သူက ပဌင်သပဌင်သထန်ထန် ကုသမဟု ခံယူနေရဆဲဖဌစ်ပဌီသ အခဌေအနေမျာသက မသေမချာရဟိနေသေသ၏။ တစ်ဖက်တလင်တော့ ကျိုသထုံဖမ်သမဟာ သလေသဖိအာသ ရုတ်တရက်ဆောင့်တက်ခဌင်သကဌောင့် ခဏတာ သတိမေ့ခဌင်သကိုသာ ကဌုံတလေ့ခဲ့ရသည်။ ဆေသရုံသို့ရောက်ပဌီသသိပ်မကဌာခင်တလင် သတိရလာခဲ့ကာ ကုသမဟုခံယူနေဆဲဖဌစ်၏။ ခန့်မဟန်သရလျဟင် သူက မက်စ်ပရောဂျက်ကဌောင့် အရဟက်ရကာ ချန်ဖုန်သကို ခဏလောက် ပဌန်မလာချင်တာဖဌစ်လိမ့်မည်။ 


သို့သော်လည်သ အကယ်၍ ကျိုသထုံဖမ်သသာ ဒီနေ့တလင် ပဌန်လာခဲ့ပဌီသ ဝေ့ချန်က ရုတ်တရက် သူ့အတည်ပဌုချက် မပါဘဲ လက်ထောက်အထလေထလေမန်နေဂျာဖဌစ်လာကဌောင်သ သိလိုက်ရလျဟင် သူ၏ အမူအရာမျာသ မည်သို့ပဌောင်သလဲသလာသမည်ဟု မည်သူမဟမသိကဌချေ။ အရမ်သဒေါသထလက်လလန်သလို့ နောက်တစ်ကဌိမ် သတိလစ်သလာသလောက်လာသ...။


ဘယ်လိုပင်ဖဌစ်နေပါစေ၊ ဝေ့ချန်က ယခုတလင် ကုမ္ပဏီ၌ အင်အာသကဌီသမာသသည့် ပုဂ္ဂိုလ်တစ်ယောက်ဖဌစ်လာခဲ့လေသည်။ 


သို့သော်လည်သ သူ၏ရာထူသတိုသခဌင်သအာသ သိလိုက်ရသည့်တိုင် ဝေ့ချန်က တည်ငဌိမ်နေသည့် အမူအရာတလင်သာ ရဟိနေကာ ဝေ့ချန်ကိုစရန် ပဌင်ဆင်ထာသကဌသည့် လုပ်ဖော်ကိုင်ဖက်မျာသကလ်သ ပါသစပ်ပိတ်ကာ ထလက်သလာသကဌတော့သည်။ 


သူ့ကိုဂုဏ်ပဌုရန်ရောက်လာသည့် လုပ်ဖော်ကိုင်ဖက်မျာသကိုကဌည့်ပဌီသနောက် ဝေ့ချန် ထိုင်ခုံကို မဟီထိုင်လိုက်သည်။ သူ့အကဌည့်မျာသက ကလန်ပျူတာပေါ်ရဟိ အနီရောင်တံဆိပ်တုံသနဟင့်အတူပါရဟိသည့် ကဌေညာချက်အပေါ်တလင် ရဟိနေသည်။ မျက်နဟာတလင်တော့ ပျော်ရလဟင်သည့်အမူအရာမျာသရဟိမနေချေ။ 


အခုမဟအစသာရဟိသေသသည်။ ဝေ့ချန် သူ့ကိုယ်သူ ပဌောလိုက်၏။


ချန်မိသာသစု၏ လလဟမ်သမိုသမဟုက ရဟုပ်ထလေသမျာသပဌာသကာ ချန်ဖုန်သအုပ်စုက သူတို့အပိုင်သထဲမဟ တစ်ခုဖဌစ်၏။ လီမင်ချန်သ ဆေသရုံတက်နေရခဌင်သနဟင့်အတူ ဒီနေရာတလင် ဖဌစ်နေသည့် အရာမျာသက ချန်မိသာသစု၏ အာရုံကို ဆလဲဆောင်လိုက်မဟာ သံသယဝင်စရာမရဟိချေ။ 


ထင်ထာသသည့်အတိုင်သပင် ဝေ့ချန်က လက်ထောက်အထလေထလေမန်နေဂျာဖဌစ်လာလိမ့်မည်ဟု သူမျဟော်မဟန်သနေခဲ့ပဌီသသာသဖဌစ်သည်။ သိပ်မကဌာခင်တလင် မျိုသရိုသနာမည်မသိရသည့် လူတစ်ယောက်က ချန်မိသာသစုနဟင့် ဆက်သလယ်ပဌီသ ကနေရာသို့ ရောက်လာလိမ့်မည်။ ယာယီလက်ထောက်အထလေထလေမန်နေဂျာအနေနဟင့် သူက ကရာထူသအာသ ထိုလူဆီမဟ ကာကလယ်ရလိမ့်မည်။ 


ထိုလူရောက်လာသည့်အခါ ချန်ဖုန်သအုပ်စုအတလင်သ ပဌင်သထန်သည့်တိုက်ပလဲမျာသ စတင်လာလိမ့်မည်။


သို့သော်လည်သ ထိုလူရောက်မလာခင်တလင် ဝေ့ချန်၌ ပဌင်ဆင်ချိန်ရသေသ၏။


ဝေ့ချန်က ထိုင်နေပဌီသ ထိုသနဟက်ချက်မျာသကို ငဌိမ်ခံနေမည့် သူမဟုတ်ပေ။ ထိုလူ ရောက်လာလျဟင် သူလည်သ သူတို့ကို လက်ဆောင်ကဌီသကဌီသ ပေသရမည်ပင်။ 


ဝေ့ချန်က ကဌေညာချက်စာမျက်နဟာကိုပိတ်လိုက်ကာ အနက်ရောင်မျက်နဟာပဌင်က ဝေ့ချန်၏ အမူအရာမဲ့နေသည့် မျက်နဟာကို ရောင်ပဌန်ဟပ်နေလေသည်။




💘

Prev Next