MM Story Teller

Chapter 52

Viewers 2k

👨‍❤️‍👨Chapter 52

ချန်နင်က အေးစက်စက် မျက်နှာနှင့် ရှီသွမ်းကို ချောင်းကြည့်လိုက်ရင်း အနည်းငယ် တွန့်မိသွားသည်။

ကြိုးဆွဲတင်ပေးသူက ဥက္ကဌရှီပင်။ ချန်နင်က သခင်လေးသွမ့်ကို မလိမ်ချင်သော်လည်း ဥက္ကဌရှီက သခင်လေးသွမ့် သိစေချင်ပုံမရသလို သူ့အနေနှင့် အထက်လူကြီး၏ အမိန့်ကို ဖီဆန်လို့လည်း မရချေ။

ချန်နင်က ကျောက်ဆောင်နှင့် နေရာကျဥ်းကျဥ်းလေးကြား ပိတ်မိနေသည်။

ဒီလို ခက်ခဲတဲ့ ပြဿနာကို ဘာလို့ ဥက္ကဌရှီကို ကိုယ်တိုင် မဖြေရှင်းခိုင်းရမှာလဲ....

" ဥက္ကဌရှီ....သခင်လေးသွမ့်က ဝီချတ်ကနေ ကျေးဇူးတင်ကြောင်း ပြောလာတယ်..." သူ့စကားများက ကျစ်လျစ်ပြီး အပိုအလိုမရှိချေ။

ထိုအကြောင်း ကြားသောအခါ ရှီသွမ်းက အံ့သြသွားဟန်မရှိပဲ နှုတ်ခမ်းထောင့်စွန်းလေးများပင် အနည်းငယ် တွန့်ကွေးကုန်သည်။ တော်တော်ကြာသည်ထိ ချန်နင်က တစ်ဖက်လူ၏ မျက်လုံးထဲမှ ဂုဏ်ယူနေဟန် အရိပ်အရောင်တို့ကို အတိုင်းသား တွေ့နေရသည်။

ချန်နင်က ဂုဏ်ယူစရာ ဘာရှိလည်းဟု တွေးနေမိသည်။ NTရဲ့ အဓိကရှယ်ယာရှင်ဖြစ်လို့ ဂုဏ်ယူနေတာလား ဒါမှမဟုတ် သခင်လေးသွမ့်ကို ကူညီနိုင်လိုက်လို့ ဂုဏ်ယူနေတာများလား။

အမှန်က ရှီသွမ်းမှာ သူ့ကိုယ်သူ ဂုဏ်ယူနေခြင်းမျိုး မဟုတ်ချေ။ သွမ့်ရှူးထုံ၏ ဥာဏ်ရည်နှင့် နောက်ကွယ်က ကိစ္စကို ဖော်ထုတ်နိုင်လောက်မှန်း သူခန့်မှန်းထားပြီးသား ဖြစ်သော်လည်း ပြန်ကြားရသောအခါ ဂုဏ်ယူမိသည့်စိတ်ကို ထိန်းမရပေ။

" သူက အမြဲတမ်း ထက်မြက်နေတာပဲ..." ရှီသွမ်းက မနေနိုင်ပဲ ချီးကျူးမိသည် " အမှန်အတိုင်းသာ ပြောလိုက်ပါ..."

ရှီသွမ်းက ဘာမှပြန်ရဖို့ မမျှော်လင့်ထားပေ။ သူက လူငယ်လေးအတွက် ပြဿနာကို ဖြေရှင်းပေးချင်ရုံလေးသာ။

ချန်နင်က အမိန့်အတိုင်း ပြန်ဖြေလိုက်သည် [: သခင်လေးသွမ့်သာ ကျေးဇူးတင်ချင်ရင် ဥက္ကဌရှီကိုပဲ ကျေးဇူးတင်လိုက်ပါ....]

ချန်နင့်ဆီက ပြန်စာကို ရသောအခါ သွမ့်ရှူးထုံက နောက်ပြန်မှီလိုက်ရင်း သက်ပြင်းချမိသည်။ သူက ရှီသွမ်းကို အများကြီး အကြွေးတင်နေသည်။ သူ ဘယ်လိုမျိုး ပြန်ဆပ်ရမည်လဲ။

သူဘာပဲလုပ်ခဲ့လုပ်ခဲ့ လူကိုယ်တိုင် ကျေးဇူးတင်ဖို့ လိုနေသေးသည်။

ဝီချတ်က စာပို့သံ ထွက်လာသည့်အချိန် ရှီသွမ်းက ဖုန်းကို ချက်ချင်း ကောက်ကိုင်လိုက်ပြီး ဝင်ကြည့်လိုက်သည်။ သို့သော်လည်း မက်ဆေ့ချ်ကို မြင်လိုက်သောအခါ သူ့ပျော်ရွှင်မှုတို့က ပျောက်ကွယ်သွားလေသည်။

ရှူးထုံ [: ဦးလေးရှီ...ကျေးဇူးတင်ပါတယ်...]

စာလုံးလေး လေးလုံးနှင့် ယဥ်ကျေးသည့် အသုံးအနှုန်းက သူတို့နှစ်ယောက်ကြား သူစိမ်းဆန်နေ၍ ရှီသွမ်း၏ စိတ်ကို မည်းမှောင်သွားစေသည်။

ရှီသွမ်းက သူနှင့်သွမ့်ရှူးထုံတို့ ပြောခဲ့ကြသည့် စကားပြောမှတ်တမ်းကို လျှောက်ကြည့်လိုက်ရင်း လူငယ်လေးက သူ့ကို စည်းခြားထားမှန်း ပိုလို့ သေချာသွားရသည်။

ယခင်က လူငယ်လေးမှာ အီမိုဂျီလေးများ ပို့တတ်သော်လည်း ယခု ဘာမှပို့မလာချေ။

ရှီသွမ်းက အချိန်အတော်ကြာသည်ထိ စာရိုက်နေခဲ့သော်လည်း နောက်ဆုံးတွင် စာလုံးလေးနှစ်လုံးသာ ပို့ပေးလိုက်သည် :[ ရပါတယ်...]

သူက စိတ်ပျက်လက်ပျက်နှင့် ဖုန်းချထားလိုက်သည်။ နဖူးပေါ် လက်တင်ရင်း ယခင်က ဘာဖြစ်ခဲ့၍လည်း သေချာပြန်စဥ်းစားမိသည်။ လူငယ်လေးက ဂုဏ်ပြုပွဲလုပ်သည့်ည နောက်ပိုင်းမှာစပြီး ခပ်တန်းတန်း ဖြစ်သွားခြင်းပင်။

အဲ့ဒီညတုန်းက သူမလုပ်သင့်တာ တစ်ခုခုများ လုပ်ခဲ့မိလို့လား။

ထိုညက အဖြစ်အပျက်ဆီ ပြေးစဥ်းစားရင်း အဖြေရှာမိသည်။ သူတို့ အိမ်ပြန်ရောက်သည့်အချိန် သူမေးခဲ့သည့် မေးခွန်းတစ်ခုကလွဲ၍ သူဘာမှ စည်းမကျော်ခဲ့ပေ။

ဒီလိုကံဆိုးနေရတာက အဲ့ဒီမေးခွန်းကြောင့် ဖြစ်နေမလား။

ရှီသွမ်း ထိုအကြောင်း စဥ်းစားနေသည့်အချိန် သွမ့်ရှူးထုံကလည်း ရှီသွမ်း ပြောခဲ့သည့်အရာကို ကြိုးစားစဥ်းစားနေရသည်။

စားသောက်ပွဲညတွင် သွမ့်ရှူးထုံက မူးနေသော်လည်း အသိစိတ်ရှိနေသေး၍ သူနိုးလာသည့်အချိန် ဖြစ်ခဲ့သည့် ကိစ္စတို့ကို မသဲမကွဲ မှတ်မိနေသေးသည်။

ရှီသွမ်းက သူ့ကို ဖိန်ရော့ဝိန်းကို သဘောကျလားဟု မေးခဲ့သည်။

သူ ငြင်းခဲ့သည်။

ထိုအဖြေကို ကြားခဲ့စဥ်က ရှီသွမ်းမှာ ပျော်သွားပုံပင်။

သွမ့်ရှူးခုံက ထိုမှတ်ဥာဏ်အစိတ်အပိုင်း သုံးခုကို ဆက်စပ်ကြည့်သောအခါ ရှီသွမ်းက ဖိန်ရော့ဝိန်းအပေါ် ခံစားချက်ရှိနေမှန်း သံသယမဝင်မိဖို့ရာ ခက်ခဲလေသည်။ ရှီသွမ်းက အချစ်ပြိုင်ဘက်ဖြစ်ခဲ့ဖူးပြီး မိတ်ဆွေဖြစ်လာသော သူ့အတွက် နောက်ဆုတ်ပေးခဲ့ခြင်းသာ ဖြစ်သည်။

ရှီသွမ်းမူးနေသည့် ညကလည်း သူမကို မကြိုက်ဘူးဟု ပြောခဲ့သည်။ ယင်းက ရှီသွမ်းမှာ အချစ်ရေးထက် မိတ်ဆွေဆက်ဆံရေးကို ရွေးချယ်လိုက်ခြင်း ဖြစ်နိုင်သည်။

သွမ့်ရှူးထုံကလည်း လူနှစ်ယောက်ကြားက အချစ်ရေးကို ခွဲပစ်သည့် တတိယလူ မဖြစ်ချင်ပေ။ သူက ဖိန်ရော့ဝိန်းကို မကြိုက်သော်လည်း ရှီသွမ်းကို ချစ်မိသွားမှာ ကြောက်နေမိသည်။

အဝေးမှာနေသည်က အကောင်းဆုံး နည်းလမ်းပင်။

သို့သော်လည်း ရှီသွမ်းက ထပ်ပြီး တိတ်တိတ်လေး ကူညီလာပြန်၍ တည်ငြိမ်နေသော သူ့အတွေးများကို ပြန်ပြီး မုန်တိုင်းထန်စေသည်။ သူ့နားမလာတော့ဖို့ သူ့ကို မကူညီတော့ဖို့ ရှီသွမ်းဆီ သွားပြောလို့လည်း မရနိုင်ချေ။ ထိုအပြုအမူက ကျေးဇူးကန်းသည့်သူများ၏ အပြုအမူမျိုး မဟုတ်လျှင် ဘယ်အရာကများ ရှိနိုင်ဦးမည်နည်း။

သွမ့်ရှူးထုံက အသက်ပြင်းပြင်းရှူရင်း စိတ်ကို အေးအေးထားကာ စိတ်ထဲ "တတိယဇာတ်လိုက်က ဇာတ်လိုက်မကို ကြိုက်တာ" ဟု ဆယ်ကြိမ်တိုင်တိုင် နှလုံးသွင်းပြီးမှ စာပြန်ဖို့ အားရှိလာသည် [: စနေနေ့အားရင် ညစာအတူတူစားကြမလား...]

ရှီယွိက ကျောင်းပြန်ဖွင့်၍ ယန်မြို့တော်သို့ ပြန်ရသောအခါ ဦးလေးစွင်းနှင့် စာဖိုမှူး အိမ်တော်ထိန်းတို့ကလည်း သူနှင့်အတူ ပြန်လိုက်သွားကြသည်။

ဦးလေးစွင်းက ရှီသွမ်းနှင့် သိပ်မခွဲချင်သော်လည်း သခင်ငယ်လေးက သူဂရုစိုက်ပေးဖို့ လိုအပ်နေသည့်အပြင် ရှီသွမ်းကလည်း သူ့အိမ် လူများနေမှာကို မကြိုက်ချေ။

ရှီသွမ်းက ဤရက်များအတွင်း အပြင်ထွက်စားရသည်။ သူက စာဖိုမှူးနောက်တစ်ယောက် မရှာနိုင်သည်မျိုး မဟုတ်ပဲ သူ့ဘေးနား လူများနေမှာကို သဘောမကျ၍ ဖြစ်သည်။ ထိုတင်မက သူက အိမ်ပြန်မလာသည်က များ၍ စာဖိုမှူးခန့်ဖို့ မလိုအပ်ချေ။

သွမ့်ရှူးထုံက ဤအကြောင်းကို မသိ၍မဟုတ် သူသိလျှင်လည်း သူဘာမှမလုပ်ပေးနိုင်၍ ဖြစ်သည်။

ရှီသွမ်းနှင့် ပတ်သတ်ပြီး ဘယ်လောက်ခံစားနေရပါစေ အဖြောင့်တစ်ယောက်ကို မဆွဲမိအောင် သူ့ကိုယ်သူ တားရလိမ့်မည်။

သွမ့်ရှူးထုံက ရှီသွမ်းကို ညစာကျွေးမည့် အခွင့်အရေးကို သုံးပြီး လက်ဆောင်တစ်ခုပေးဖို့ ပြင်ဆင်ထားသည်။ သူ့ကို အများကြီး ကူညီထား၍ ကျေးဇူးပြန်ဆပ်သည်ဟု သဘောထားလိုက်ရုံပင်။

လက်ဆောင်က အသေးအမွှားလေး ဖြစ်နေစေကာမူ အနည်းဆုံး သူ့စိတ်ကို နားလည်သွားနိုင်သည်။

ရှီသွမ်းက သူ့ဖိတ်ကြားချက်ကို လက်ခံလိုက်ချိန် သွမ့်ရှူးထုံက တစ်ခဏမျှ တွေဝေသွားပြီး နောက်မှ သူ့အိမ်တွင် တစ်ခြားတစ်ယောက် ရှိနေသေးမှန်း ရုတ်တရက် သတိရသွားသည်။

စိတ်တိုတိုနှင့် သူ့နဖူးသူ ပြန်ရိုက်လိုက်မိသည်။ လုရှီက သေချာပေါက် တစ်ခြားသူတွေကို မြင်ချင်မှာ မဟုတ်ဘူး။ သွမ့်ရှူးထုံက ရှီသွမ်း၏ ကိုယ်ကျင့်တရားကို ယုံကြည်ပေမယ့် လုရှီက ရှီသွမ်းနှင့် မရင်းနှီးပေ။

ဖိတ်ထားပြီးပြီဖြစ်၍ ချက်ချင်း ပြန်ရုတ်သိမ်းလိုက်လို့ကလည်း မဖြစ်ချေ။ သူက ပြန်စဥ်းစားလိုက်ပြီး မက်ဆေ့ချ်ကို စာပြန်ပြင်လိုက်သည် :[ ဒီတစ်ပတ်စနေမှာ လုပ်စရာလေးတစ်ခုရှိမှန်း အခုမှ မှတ်မိသွားလို့ နောက်တစ်ပတ် စနေဆိုရင်ရော....]

လုရှီက ဆယ်ရက်ပဲ နေမှာဖြစ်သည်။ နောက်တစ်ပတ်စနေဆို ယန်မြို့တော်ကို ပြန်သွားလောက်ပြီ ဖြစ်သည်။

ရှီသွမ်းက မက်ဆေ့ချ်ကို ရသောအခါ ဇဝေဇဝါ ဖြစ်သွားရသည်။ ဘာလို့ တစ်ဖက်လူက အမြန်အဆန် အစီအစဥ်ပြောင်းလိုက်ရတာလဲ...။ သို့သော်လည်း သူက အများကြီး စဥ်းစားမနေပဲ သဘောတူလိုက်၏။

ညနေ ကိုးနာရီတွင် လျိုကျစ်ဖေးက သူတို့အိမ်ရာဝန်းထဲသို့ ကားမောင်းဝင်လာသည်။

သူတို့က သွမ့်ရှူးထုံ၏ အိမ်နားကို ရောက်သောအခါ ရှီသွမ်းက အိမ်ဘက်ကို အမှတ်တမဲ့ လှည့်ကြည့်မိရင်း ရုတ်တရက် အံ့သြသွားရသည်။

သွမ့်ရှူးထုံ၏ အိပ်ခန်းက ဒုတိယထပ်၏ အရှေ့ဘက်ပိုင်းတွင် ရှိနေမှန်း သိထား၍ သူ့ဘက်က ကြည့်လျှင် အထဲက မီးများကို ရှင်းရှင်းလင်းလင်း မြင်ရသည်။

ဤသည်က ထူးဆန်းသည် မဟုတ်။ ထူးဆန်းနေသည့်အရာက တစ်ခါမှ မသုံးသည့် ဒုတိယထပ်က နောက်ဆုံးအခန်းကပါ မီးလင်းနေ၍ ဖြစ်သည်။

သူက စက္ကန့်အနည်းငယ်မျှ စဥ်းစားကြည့်သည်။ သွမ့်ရှူးထုံက နောက်တစ်ပတ်စနေကို ပြောင်းလိုက်တာ ဧည့်သည်ရှိနေလို့လား။

ရှီသွမ်းက မသိလိုက်ပါပဲ ဖုန်းစက်ဖွင့်လိုက်မိသည်။ မီးလင်းနေသော ဖုန်းမျက်နှာပြင်ကို ကြည့်လိုက်ရင်း ရုတ်တရက် သူ့အဖြစ်သူ ရယ်လိုက်မိလေသည်။

******

ကတိပေးထားသည့်အတိုင်း သွမ့်ရှူးထုံက သုံးရက်အတွင်း အထူးလိမ်းဆေးကို ပြင်ဆင်နိုင်ခဲ့ပြီး ဓါတ်ခွဲခန်းကနေ လုရှီအတွက် ယူလာပေးခဲ့သည်။

" အညွှန်းပါတယ်နော်...အဲ့ဒီအတိုင်း လိုက်လုပ်ပေးရင် ကောင်းသွားမှာပါ..."

လုရှီက ခေါင်းညိမ့်ပြလိုက်ရင်း သူ့အခန်းသူ ပြန်သွားလိုက်သည်။ ဆေးလိမ်းပြီးနောက် သူက ဖုန်းကောက်ကိုင်ပြီး လိုက်ဖ်ကို ကြည့်တော့သည်။

ယခုခေတ်တွင် အင်တာနက်ပေါ်၌ လိုက်ဖ်လွှင့်သည့် ဗီဒီယိုများ တော်တော်များများ ရှိလာခဲ့ပြီဖြစ်သည်။ လုရှီက လိုက်ဖ်ကြည့်ရသည်ကို သဘောကျ၍ သူ့ဖုန်းက အမြဲတမ်း သူ့လက်ထဲတွင် ရှိနေသည်။

ပွဲဦးထွက်ချိန်ကစ ယခုအထိ ဤသုံးရက်ကသာ သူ့အတွက် အကျေနပ်ဆုံးအချိန် ဖြစ်ခဲ့သည်။

သူက နွေဦးပန်းနံပါတ်၂နှင့် ပတ်သက်သည့် လိုက်ဖ်များအားလုံးကို ကြည့်ခဲ့သည်။ အချို့က အမာရွတ်ဟောင်းများကို ပြကြပြီး အချို့ အမာရွတ်အသစ်များကို ပြကြသည်။ အမာရွတ်ဟောင်းများက ထိရောက်ကြောင်းပြဖို့ အချိန်ပိုလိုအပ်ပြီး အမာရွတ်သစ်များက ခဏအတွင်း အမြန်အဆန် ရလဒ်ကို ပြခဲ့သည်။

နွေဦးပန်းနံပါတ်၂၏ သုံးစွဲပုံအညွှန်းက အလွန်ရိုးရှင်းသည်။ လိုက်ဖ်လွှင့်သည့်သူက သူတို့ဒဏ်ရာရခဲ့သည့် သက်တမ်းနှင့် ဆေးအညွှန်းကို ချိန်ကြည့်လိုက်ရုံပင်။

သို့သော်လည်း အချို့ မနေနိုင်မထိုင်နိုင်လုပ်ကြသည့်သူအချို့ ရှိနေသည်။ သူတို့က လိုက်ဖ်လွှင့်ချင်၍ တမင်သက်သက် ဓါးရှအောင်လုပ်ပြီး လိမ်းပြသူများ ဖြစ်သည်။

ထိုဒဏ်ရာအသေးစားမျိုးအတွက် လူ့အရေပြားက သူ့အလိုလို ကုသနိုင်သည်။ အမာရွတ်ဖယ်ဖို့က လိုကိုမလိုချေ။ ဆေးက ဒဏ်ရာနက်ပြီး အမာရွတ်ရှိသူများအတွက်သာ လုပ်ပေးထားခြင်း ဖြစ်သည်။

လိုက်ဖ်ပေါင်းများစွာကို ကြည့်ပြီးနောက် လုရှီက ရုတ်တရက် နည်းနည်းပင်ပန်းသွားသလို ခံစားမိ၍ လိုက်ဖ်ကြည့်သည့် ဆော့ဖ်ဝဲမှ ထွက်လိုက်သည်။ တော်တော်ကြာအောင် စဥ်းစားကြည့်ပြီးနောက် သူက ဝေ့ပေါ်ဖွင့်ပြီး နွေဦးပန်းနံပါတ်၂၏ အွန်လိုင်းရီဗျူးများကို ကြည့်ရန်ပြင်လိုက်သည်။

လိုက်ဖ်လွှင့်ထားသည့် အရှိန်ကြောင့် နွေဦးဆောင်းဦးခန်းမက နာမည်ကြီးနေပြီး ဝေ့ပေါ်ရှိ ဆွေးနွေးမှုများလည်း အရှိန်မြင့်နေသည်။ သူက နွေဦးဆောင်းဦးခန်းမ၏ တရားဝင်ဘလော့ကို ဝင်ကြည့်လိုက်သောအခါ ဖန်ပေါင်းသန်းနှင့်ချီ ရထားမှန်း တွေ့လိုက်ရသည်။ နွေဦးပန်းနံပါတ်၁က နွေဦးဆောင်းဦးခန်းမအတွက် ဖန်အများကြီး ခေါ်ပေးနိုင်၍ထင် ပြည်တွင်းတွင် တစ်ဟုန်ထိုး ရေပန်းစားနေသည်။

အစက တရားဝင်ဘလော့၏ ကောမန့်နေရာကို ဝင်ကြည့်ချင်ခဲ့သော်လည်း followနေရာကို မတော်တဆ နှိပ်မိသွားသည်။

ရုတ်တရက် ဘာလုပ်ရမှန်းမသိဖြစ်သွားသော်လည်း ထိုအတိုင်းထားလိုက်ရန်သာ ဆုံးဖြတ်လိုက်သည်။ မည်သို့ဆိုစေ သူ့အောင်မြင်မှုကလည်း တော်တော်ကြာသည်ထိ ရပ်နေ၍ မည်သူမှလည်း ဂရုစိုက်နေကြမည် မဟုတ်ပေ။

လင်မန့်မန့်ကလည်း ရှေ့ကနေ နွေဦးဆောင်းဦးခန်းမ၏ တရားဝင်ဘလော့ကို followပြထား၍ သူ့မှာ ကြောက်စရာ မရှိချေ။

နွေဦးဆောင်းဦးခန်းမက ဖန်ပေါင်း သန်းနှင့်ချီ ရှိလေသည်။ ကောမန့်နေရာကလည်း သက်ဝင်စိုပြေလျက်ရှိကာ အများစုက နွေဦးပန်းနံပါတ်၂၏ စွမ်းရည်ကို ဆွေးနွေးနေကြသည်။

ဘလော့ဂါထဲတွင် ဆေးဝါးဓါတုပိုင်းတွင် ကျွမ်းကျင်သည့် ဘလော့ဂါများပင် ရှိနေသည်။ သူတို့က ဆေးပုလင်းဝယ်ပြီး ပါဝင်ပစ္စည်းများကို ဓါတ်ခွဲခန်းတွင် စမ်းသပ်ကာ ရလဒ်ကို ထုတ်ပြန်ပေးမည်ဟု ပြောနေကြသည်။ ထို့ကြောင့် လူတော်တော်များများ စိတ်ဝင်စားလာကြသည်။

သူက ထိုကောမန့်များကို ကြည့်နေသည့်အချိန် သူ့ဝေ့ပေါ်တွင် ဖန်များ အုံးအုံးကျက်ကျက် ဖြစ်နေကြမှန်း သူမသိချေ။

သူသိသည့်အချိန်က နောက်တစ်နေ့ မနက်ပင် ရောက်နေသည်။ " ပုံပျက်သွားတဲ့ ရုပ်ရှင်ဧကရာဇ်ကြီးက နွေဦးဆောင်းဦးဘလော့ကို followထားတယ်" ဆိုသည့် ခေါင်းစဥ်က ရှာဖွေမှုများနေသည်။

ဒီခေါင်းစဥ်ကြီးက....ကြည့်မိသူတိုင်းက စကားလုံးသုံးတာ ရက်စက်လွန်းသည်ဟု ထင်မိကြသည်။

လုရှီက အနည်းငယ် စိတ်လှုပ်ရှားသွားသော်လည်း လွန်ခဲ့သည့် နှစ်နှစ်အတွင်း အသားကျနေခဲ့ပြီးဖြစ်၍ စိတ်ထဲ မထားတော့ပေ။ မနက်စာ စားသည့်အချိန် သွမ့်ရှူးထုံကို မြင်သောအခါ မတတ်နိုင်ပဲ ရယ်မိသည် " ဒါက အင်တာနက်ပေါ်က လတ်တလော ရေပန်းစားနေတဲ့ ရှာဖွေမှုစာရင်းကြောင့် များလား..."

သွမ့်ရှူးထုံက ခေါင်းညိမ့်ပြလာသည်။ သူက လုရှီ၏ followထားတာကို သုံးပြီး နွေဦးပန်းနံပါတ်၂ကို ကြော်ငြာဖို့ မျှော်လင့်ခဲ့သော်လည်း ထိုမျှော်လင့်ချက်က လုရှီပြန်ကောင်းပြီးမှသာ ဆန္ဒရှိခဲ့ခြင်းဖြစ်သည်။ လက်ရှိအခြေအနေတွင် သူလုံးဝ ပျော်မနေချေ။

" ကိစ္စမရှိပါဘူး...လွန်ခဲ့တဲ့ နှစ်နှစ်ကဆို ဒီထက်တောင် ပိုရက်စက်ပါသေးတယ်..." လုရှီက အေးအေးဆေးဆေးပင်။

အင်တာနက်ပေါ်က အကြင်နာတရားကင်းမဲ့သည့် ကောမန့်များအကြောင်း ပြန်စဥ်းစားမိရင်း သွမ့်ရှူးထုံက အခိုင်အမာပြောလာသည် " နှစ်လအတွင်း သူတို့တွေ ခင်ဗျားရဲ့ ပုံစံအသစ်ကို မြင်ရစေမယ်..."

ပြန်ကောင်းဖို့ တစ်ရာရာခိုင်နှုန်း မသေချာသော်လည်း နည်းနည်းကျန်တာလေးကို မိတ်ကပ်နှင့် ဖုံးလို့ရသည်။

လုရှီရုပ်အတိုင်းဆို ရလဒ်က အရင်ကလောက် ကြည့်မကောင်းနိုင်လောက်သော်လည်း အခြားသူများထက်တော့ သာနိုင်သေးသည်။

အများစုက ရုပ်ရှင်ဧကရာဇ်ဟောင်း လုရှီက သူ့မျက်နှာ ပြန်ကောင်းချင်လို့ ရူးသွားပြီဟု တွေးကုန်ကြသည်။ နွေဦးပန်းနံပါတ်၂ကို မျှော်လင့်ချက်ထားနေ၍ သူက အကန့်အသတ်ကို ကျော်သွားလေပြီ။

သစ္စာရှိဖန်များက စိတ်မကောင်းဖြစ်မိ၍ နေ့တိုင်း ဆုတောင်းပေးနေကြသည်။

ကီးဘုတ်မှင်စာများကဖြင့် နေ့တိုင်း လှောင်ရယ်ပြီး အနိုင်ကျင့်နေကြသည်။

သို့သော်လည်း သိပ်ပြီး အာရုံစိုက်မခံလိုက်ရပေ။ ဘယ်သူကများ ပုံပျက်သွားတဲ့ ရုပ်ရှင်ဧကရာဇ်ကို စိတ်ဝင်စားနေမှာလဲ...

ရေပန်းစားနေသည့် ခေါင်းစဥ်ကလည်း ခဏလေးသာ ဖြစ်၍ လူများကလည်း စိတ်ထဲမရှိကြတော့ပေ။သို့သော်လည်း နေ့စဥ်နေ့တိုင်း အလုပ်ရှုပ်နေသည့် ဥက္ကဌရှီက ထိုခေါင်းစဥ်ကို တော်တော်လေး စိတ်ထဲထားနေမိသည်။

သူက နွေဦးဆောင်းဦးခန်းမနှင့် ပတ်သက်လျှင် အာရုံစိုက်တတ်၍လည်း ဖြစ်နိုင်သည်။

တစ်ဖက်တွင်လည်း ချန်နင်က လေဖိအားဒဏ်ကို ကြိုးစားခုခံနေရသည်။ သူ့စိတ်ထဲ တိတ်တိတ်လေး အပြစ်တင်မိသည် : ဥက္ကဌရှီ ဘာတွေဖြစ်နေတာလဲ...ဒီနှစ်ရက်အတွင်း မပျော်မရွှင်ဖြစ်နေတာပဲ...

“နွေဦးပန်း နံပါတ်၂ကို ဝယ်ပြီးပြီလား..." ရှီသွမ်းက ရုတ်တရက် မေးလာသည်။

ချန်နင်က အမြန်ခေါင်းညိမ့်ပြလိုက်ရသည် " ဝယ်ယူစုဆောင်းရေးဌာနကို အကြောင်းကြားထားပြီးပါပြီ....နောက်တစ်ပတ်အတွင်း ဝေပေးကြတော့မှာပါ...."

ရှီသွမ်းက ခေါင်းညိမ့်လိုက်ပြီး မေးလာသည် " လုရှီကို သိလား..."

ဘယ်သူ....ဘာလို့ နာမည်ကို ရင်းနှီးနေရတာလဲ...

ချန်နင်က ဦးနှောက်ကို အလုပ်ပေးလိုက်ရင်း ရုတ်တရက် အလင်းရလာသည် " ဥက္ကဌရှီက ရုပ်ရှင်ဧကရာဇ်လုကို ပြောနေတာများလား..."

“အင်း..." ရှီသွမ်းက ခံစားချက်မရှိသော မျက်နှာနှင့် ပြန်ဖြေလာသည် " သူ့မျက်နှာ ထိခိုက်ထားတဲ့အကြောင်းကို သိလား..."

ရေပန်းစားနေသော ခေါင်းစဥ်ကို ကြည့်ပြီးနောက် သွမ့်ရှူးထုံနှင့် အတူတူနေနေသည့်သူက ဤလုရှီဖြစ်နိုင်မှန်း သံသယဝင်စရာ ရသွားသည်။

👨‍❤️‍👨

Prev Next