MM Story Teller

Chapter 58

Viewers 4k

👨‍❤️‍👨Chapter 58

“လက်ထောက်ဒါရိုက်တာသွမ့်...တွေ့ကြပြန်ပြီဗျာ..."

ရွှီယာ့ဇယ်က စစ်ပြန်တိုက်ဖို့ အလှလေးကို ခေါ်လာပြန်သည်။ သူက ဤအခွင့်အရေးကို ဖမ်းဆုပ်ပြီး စကားနိုင်လုလိုက်သည် " စိတ်မကောင်းစရာပဲ...နွေဦးပန်းစီးရီးက ရောင်းကောင်းနေပေမယ့် ဒီပြပွဲမှာ ရွေးချယ်မခံလိုက်ရရှာဘူး..."

သွမ့်ရှူးထုံက ထိုလူ့ကို မေးကိုမေးရတော့သည် " ခင်ဗျား တစ်ယောက်ယောက်နဲ့ စကားပြောတဲ့အခါတိုင်း ကိုယ့်ကိုယ်ကို မိတ်မဆက်တတ်ဘူးလား..."

သူက ဤလူက ဘယ်သူလဲ လုံးဝမသိချေ။ သူ့ကို ရန်ရှာဖို့ လာလာနေသည့်အတွက် ထိုလူက တော်တော်လေး ထူးဆန်းနေသည်။

ရွှီယာ့ဇယ်က ထပ်ပြီး အရေးနိမ့်သွားပြန်သည်။ မျက်နှာကို ကြည်လင်အောင် ထားခဲ့သော်လည်း ဒေါသထွက်လာ၍ ဝက်အသည်းရောင် ပြောင်းလာပြီ ဖြစ်သည်။

“သွမ့်ရှူးထုံ...ဟန်ဆောင်နေတာ ရပ်လိုက်တော့...ဘယ်သူကများ မင်းရဲ့ အော်ဂလီဆန်စရာ အကျင့်ကို မသိလို့လဲ...မိန်မိန်က မင်းအကြောင်း ငါ့ကို အားလုံး ပြောပြထားပြီးပြီ..."

ရွှီယာ့ဇယ်က နှာမှုတ်လိုက်ရင်း သွမ့်ရှူးထုံနား တိုးသွားလိုက်သည် " မင်းက လူတွေနဲ့ sexတောင် မလုပ်နိုင်တာ...ဘယ်သူ့ကို ရှိုးလုပ်ပြဖို့ ကောင်မလေးတွေ အများကြီး ထားနေရတာလဲ..."

ထိုစာကြောင်းက အမျိုးသားတစ်ယောက်၏ ဂုဏ်သိက္ခာကို သိသိသာသာကို စော်ကားနေသည်။ ရွှီယာ့ဇယ်က သွမ့်ရှူးထုံ ဒေါသထွက်သွားပြီး သခင်လေးသွမ့်က ဘယ်လိုလူစားမျိုးဆိုတာကို လူတိုင်းကို မြင်ဖူးစေချင်မိသည်။ နွေဦးဆောင်းဦးခန်းမက ဘယ်လိုလုပ် ယာ့လန်ကို ယှဥ်ဖို့ အရည်အချင်းရှိမှာလဲ။

သို့သော်လည်း စိတ်မကောင်းစရာက မတူညီသော စိတ်ထားနှင့် လူငယ်လေးက သူ့ကို စိတ်ခုသွားပုံမရချေ။ တည်ငြိမ်သည့် အကြည့်နှင့် သူက မှတ်ချက်ပေးလိုက်သည် " ခင်ဗျားရဲ့ မျက်နှာအသားအရေက သိပ်မကောင်းဘူး...တစ်ချို့နေရာတွေမှာ အရမ်းအသုံးများထားတာ တွေ့ရတယ်...ဆေးရုံသွားပြီး စစ်ဆေးကြည့်ဖို့ အကြံပေးချင်တယ်..."

" မင်း ဘာတွေ လျှောက်ပြောနေရတာလဲကွ..." ရွှီယာ့ဇယ်က သူ့သိက္ခာကို ထိပါးခံလိုက်ရချိန် ဒေါသတကြီး အော်လိုက်မိသည်။

သူတို့ပုံစံက လူစုတစ်စုနှင့် မီဒီယာအချို့ကို ဆွဲဆောင်မိသွားသည်။

သွမ့်ရှူးထုံက အန္တရာယ်မများသည့် အပြုံးတစ်ခု ပြုံးပြလာသည်။

" ကျွန်တော် ပြောတာ ယာ့လန်လည်း နိုင်ငံတကာထိ ထိုးဖောက်နိုင်ပါစေလို့...ပြီးတော့ ခင်ဗျား ဘယ်သူလဲ ကျွန်တော် တကယ် မသိဘူး...အဲ့ဒီအတွက် တောင်းပန်ပါတယ်..."

ရွှီယာ့ဇယ် "...."

တစ်ခြားသူများက ကြည့်နေကြ၍ ရွှီယာ့ဇယ်က သူ့ပုံရိပ်ကို ထိန်းပြီး အားတင်းပြုံးလိုက်ရသည်။

" ကျွန်တော်က ရွှီယာ့ဇယ်ပါ...ယာ့လန်ရဲ့ အထွေထွေ မန်နေဂျာ...နွေဦးဆောင်းဦးခန်းမရဲ့ ထုတ်ကုန်တွေလည်း ရောင်းကောင်းဖို့ ဆုတောင်းပေးပါတယ်..."

သူတို့က ကိုယ်ပိုင်အချိန်များတွင် ကြိုက်သလို လုပ်နိုင်သော်လည်း အများရှေ့ရောက်သောအခါ တစ်ဖက်လူ၏ စီးပွားရေးကို အပြန်အလှန် ထောက်ပံ့ပေးရသည်။

သူက အများရှေ့တွင် သွမ့်ရှူးထုံ၏ ပုံရိပ်ကို ပျက်စီးသွားစေချင်သော်လည်း သွမ့်ရှူးထုံက ပါးပါးလေး ရှောင်လိုက်နိုင်သည်။ သူ့မှာ လွတ်လမ်းမရှိတော့ပေ။

ရွှီယာ့ဇယ်က မတတ်နိုင်ပဲ ဒေါသထွက်ထွက်နှင့် ပြန်လိုက်ရသည်။

သွမ့်ရှူးထုံက သူ့စကားများကို စိတ်ထဲ မထားသော်လည်း ရွှီယာ့ဇယ် မြောက်ကြွကြွနိုင်သည်ကို မြင်ပြီးနောက် ယာ့လန်၏ ထုတ်ကုန်အသစ်များကို ကြည့်ချင်မိသည်။

ယာ့လန်က ထုတ်ကုန်သစ်တစ်ခုကို ထုတ်ထားပြီး စွမ်းရည်ကလည်း နွေဦးပန်းနံပါတ်၁ကို ယှဥ်နိုင်သည်ဟု ပြောနေကြသည်။ ယင်းက စျေးကွက်ဆင်းချင်ရုံလား အမှန်တရားလား သူသေချာမသိပေ။

သွမ့်ရှူးထုံက ယာ့လန်၏ ပြပွဲနေရာသို့ သွားလိုက်သည်။ ယာယီမဏ္ဍပ်တွင် ထုတ်ကုန်အကြောင်း ရှင်းပြဖို့ ကျွမ်းကျင်သူများ ခေါ်ထားလေသည်။

သွမ့်ရှူးထုံက ထုတ်ကုန်သစ်တစ်ခုကို ကောက်ကိုင်လိုက်သည်နှင့် ဝန်ထမ်းက ထိုထုတ်ကုန်ကောင်းကြောင်း အမွှန်းတင်ပြီး ပြောလာကာ နောက်ဆုံး နွေဦးပန်းနံပါတ်၁အကြောင်း ပါလာသည်။

“ဒါက တကယ်ပဲ တစ်ပတ်အတွင်း ချွေးပေါက်တွေ ကျဥ်းသွားစေနိုင်တယ်ပေါ့..."

ဝန်ထမ်းက အသံထွက်လာသည် " ဒါပေါ့....မယုံရင် နှိုင်းယှဥ်ထားတဲ့ ဇယားကို ကြည့်လို့ရတယ်..."

သွမ့်ရှူးထုံက နမူနာဗူးကို အများကြီး ညစ်ကြည့်လိုက်သည်။ သူက တစ်ခဏမျှ သေသေချာချာ လေ့လာကြည့်ပြီးနောက် မေးလာသည် " ဒီထုတ်ကုန်သစ်ကို ဘယ်သူက ထုတ်တာလဲ မသိဘူး..."

ဝန်ထမ်းက တစ်ခဏမျှ အံ့သြသွားရသည်။ သာမန်လူကတော့ ထုတ်ကုန်ထုတ်တဲ့ သူကို မမေးလာဘူးလေ။ သို့သော်လည်း သူက ပြန်ဖြေလိုက်ရသည်။

" သုတေသနအဖွဲ့ကို ဦးဆောင်တာ အထွေထွေမန်နေဂျာ ရွှီယာ့ဇယ်ပါ..."

" သူက မန်နေဂျာ မဟုတ်ဘူးလား..." သွမ့်ရှူးထုံက နားမလည်သလို ဖြစ်သွားသည် " သူက ဘာလို့ နည်းပညာပိုင်းတွေ လုပ်နေရတာလဲ..."

" မန်နေဂျာရွှီမှာ ကျွမ်းကျင်တဲ့ နောက်ခံ ရှိပြီးတော့ သုတေသနလုပ်ငန်းတွေ စီမံရတာ ကြိုက်ပါတယ်..."

“သြော်..." သွမ့်ရှူးထုံက ခေါင်းညိမ့်မိသည်။ ဒါဆို ရွှီယာ့ဇယ်မှာက ခေါင်းစဥ်တစ်ခုထက်မနည်း အလုပ်တွေ ရှိတာပဲ။

ဒီရွှီယာ့ဇယ်က ယာ့လန်လို ကုမ္ပဏီကြီးကို ကောင်းကောင်း စီမံတတ်ရုံမကဘူး ပိုနေတဲ့ အချိန်မှာ ထုတ်ကုန်တွေ ထုတ်နိုင်သေးတယ်။ ဒီမန်နေဂျာရွှီက တကယ် ဘက်စုံတော်တဲ့သူပဲ။ အင်း...ဒီဟာသက မလွန်လောက်ပါဘူး။

သွမ့်ရှူးထုံက ထုတ်ကုန်ကို စမ်းသပ်ဖို့ ကိရိယာမသုံးလျှင်ပင် သူကျင်လည်ခဲ့တာ ကြာပြီဖြစ်၍ အာရုံခံနိုင်စွမ်းက အတိုင်းတာတစ်ခုထိ ရှိသည်။

ယာ့လန်၏ ထုတ်ကုန်သစ်က တစ်ပတ်အတွင်း စွမ်းရည်ပြသည်ဆိုသည့် အပြောနှင့် နွေဦးပန်းနံပါတ်၁ကို နာမည်ကျအောင် လုပ်နေသည်။ သို့သော်လည်း တကယ်တမ်း စွမ်းရည်က စံမမှီပေ။

ထို့ပြင် ပြဿနာတစ်ခု ရှိနေသည်။ ယခင်က နွေဦးပန်းနံပါတ်၁ကို စျေးကွက်ထဲ ပထမဆုံး ဖြန့်ဖြူးရောင်းချခဲ့စဥ်က ဘေးထွက်ဆိုးကျိုးရှိသည်ဟု လူများက ပြောခဲ့ကြသည်။ သို့သော်လည်း သေချာစစ်ဆေးကြည့်ပြီးနောက် ဆိုးကျိုးမရှိကြောင်း သက်သေပြနိုင်ခဲ့သည်။ ယခုယာ့လန်၏ ထုတ်ကုန်သစ်က အမှန်ပင် ပြဿနာတစ်ချို့ ရှိနေသည်။

သွမ့်ရှူးထုံက ထိုထုတ်ကုန်ကို စစ်ဆေးကြည့်ဖို့ ပရော်ဖက်ရှင်နယ်ကိရိယာ မသုံးခဲ့၍ ဘာမှားနေလဲ အတိအကျပြောဖို့ ခဲယဥ်းနေသည်။

ယာ့လန်နေရာကနေ ထွက်လာခဲ့ပြီးနောက် သွမ့်ရှူးထုံက လျှောက်သွားကြည့်လိုက်ရင်း အခမ်းအနားက ပြပွဲနေရာတိုင်းကို ကြည့်မိသည်။ ယခုက အခြေအနေကို ကောင်းကောင်းသတိထားမိသွားပြီ ဖြစ်သည်။ သူက ဟယ်ယွင့်ဆီ မက်ဆေ့ချ်ပို့ရန် ပြင်လိုက်သည်နှင့် ထိုလူ့ဆီကနေ ဝီချတ်မက်ဆေ့ချ် ပို့လာလေသည် [: နွေဦးပန်းနံပါတ်၃က စစ်ဆေးချက် အောင်သွားပြီ... ]

သွမ့်ရှူးထုံ၏ ခေါင်းထဲ မေးခွန်းပေါင်းများစွာ တန်းစီသွားရသည်။ဘယ်အချိန်က နွေဦးပန်းနံပါတ်၃က ရှိသွားရတာလဲ။

သူက ချက်ချင်း စာပြန်လိုက်သည် [: နွေဦးပန်း နံပါတ်၃ ဟုတ်လား...]

ဟယ်ယွင့်က ပြန်ဖြေလာသည် [: စုံတွဲ မျက်လုံးလိမ်းခရင်လေ...နောက်ဆုံးတစ်ခေါက် မင်း လမ်းပြသွားခဲ့ပြီးတော့ သုတေသနက ရှောရှောရှူရှူ ပြီးခဲ့တယ်...ပြီးတော့ ထုတ်ကုန်ရဲ့ အာနိသင်ကလည်း ပိုအဆင့်မြင့်လာခဲ့တယ်...ဒါကြောင့် အဲ့ဒါကို နွေဦးပန်းစီးရီးထဲ ထည့်ချင်လို့...ရနိုင်မလား...]

အစကတည်းက ဟယ်ယွင့်မှာ သူတစ်ယောက်တည်း မူပိုင်ယူဖို့ မစဥ်းစားထားပေ။ သွမ့်ရှူးထုံကြောင့် မဟုတ်လျှင် သူက မျက်လုံးလိမ်းခရင်အသစ် ထုတ်နိုင်လျှင်တောင်မှ အာနိသင်က ထိပ်တန်းအဆင့် မဖြစ်နိုင်လောက်ချေ။

သွမ့်ရှူးထုံ[ : ဒါက ခင်ဗျားတို့ အဖွဲ့ရဲ့ ကြိုးစားအားထုတ်မှုရဲ့ ရလဒ်ပါ...ကျွန်တော်က ဘာမှမလုပ်ခဲ့ရပါဘူး...]

ဟယ်ယွင့်[ : သူတို့ရဲ့ အမြင်ကို မေးကြည့်လိုက်တော့ သူတို့အားလုံး ထောက်ခံကြတယ်...မင်းက ခေါင်းလေး ညိမ့်လိုက်ရုံပါပဲ...ပြီးတော့ မူပိုင်ခွင့်ကို မှတ်တမ်းထဲ ထည့်မှာဆိုတော့ နွေဦးပန်းစီးရီးတွေရဲ့ နာမည်ကို အားကိုးလို့ရတယ်လေ... ]

သွမ့်ရှူးထုံက ဒါရိုက်တာဟယ်မှာ သူပထမဆုံး တွေ့ဖူးသည့် အချိန်ထက် ပိုပြီး တက်ကြွလာကြောင်း ပြောရပေမည်။ ယခု ဟယ်ယွင့်က သူ့အရည်အချင်းကို ပြဖို့ နေရာရှိလာပြီး မြိုသိပ်မထားတော့ပဲ သတ္တိရှိလာခဲ့သည်။

ဟယ်ယွင့်က ထိုအတိုင်း လုပ်လာ၍ သွမ့်ရှူးထုံကလည်း မငြင်းနိုင်တော့ပေ[ : ကောင်းပါပြီ...ဒါပေမယ့် ကျွန်တော့်နာမည်ကို ထုတ်လုပ်သူနေရာမှာ ရေးဖို့ မလိုပါဘူးဗျာ...]

ဟယ်ယွင့်က ပြန်မဖြေပဲ အီမိုဂျီလေးသာ ပြန်ပို့လာသည်။

ကူကယ်ရာမဲ့ပြီး စိတ်ညစ်လာ၍ သွမ့်ရှူးထုံက မျက်နှာသုတ်ပဝါထဲ မျက်နှာအပ်လိုက်မိသည်။

ကျိုင်ကျွင့်က သူခန့်မှန်းထားသည့်အတိုင်း သိပ်မကြာခင် မက်ဆေ့ချ် ပို့လာသည်။

ကျိုင်ကျွင့်က ပြောလာသည် [: သခင်လေးသွမ့်...သတင်းကောင်းနှစ်ခု ရှိတယ်ဗျို့...ကျွန်တော်တို့ NTနဲ့ သဘောတူညီမှုရပြီး သိပ်မကြာခင် ဓါတ်ခွဲခန်းအသစ်တစ်ခု ဆောက်နိုင်တော့မှာ...ပြီးတော့ ဆေးရုံနဲ့ ကုမ္ပဏီတော်တော်များများက နွေဦးပန်းနံပါတ်၂ကို အော်ဒါမှာလာကြတယ်...ကျွန်တော်တို့ စျေးကွက်ဖြန့်သင့်လား...]

သာမန်လူများအတွက် နွေဦးပန်းနံပါတ်၂၏ စွမ်းရည်က သက်သေပြဖို့ အချိန်ယူရသော်လည်း ထိုအရာနှင့် ဆက်စပ်နေသည့် နယ်ပယ်များတွင် နွေဦးပန်းနံပါတ်၂၏ စွမ်းရည်ကို အကဲဖြတ်ဖို့က အလွယ်လေးပင်။

နွေဦးပန်းနံပါတ်၂၏ တိုးတက်လာသည့် ဖြစ်စဥ်ကို မစိစစ်နိုင်လျှင်ပင် ကြည့်လိုက်သည်နှင့် အဖြေက ရှင်းနေသည်။

သွမ့်ရှူးထုံက သူ့အောင်မြင်မှု အလွဲသုံးစား လုပ်ခံရမှာ မစိုးရိမ်ပေ။ သူ့စာကလည်း JMCကို ပြထားပြီးပြီဖြစ်၍ တစ်ခြားသူများ သူ့ထုတ်ကုန်ကို ခိုးချင်တိုင်း ခိုးလို့ရမှာ မဟုတ်ပေ။

သွမ့်ရှူးထုံက နည်းပညာသမား ဖြစ်သည်။ ထုတ်လုပ်ရေးပိုင်းက သူ့အပိုင်းမဟုတ်၍ ပြန်ဖြေလိုက်သည်[ : မန်နေဂျာကျိုင်ပဲ ထုတ်လုပ်ရေးပိုင်းကို ဆုံးဖြတ်လိုက်ပါဗျာ...]

စိတ်ကျေနပ်စရာ အဖြေကို ရသွား၍ ကျိုင်ကျွင့်က ပျော်ပျော်ရွှင်ရွှင်နှင့် လုပ်ငန်း ဆွေးနွေးတော့သည်။

သွမ့်ရှူးထုံ က လက်ထဲတွင် ဖုန်းကိုင်ထားဆဲ ဖြစ်သည်။ သူ့စိတ်က ဘန်းခနဲ ဖြစ်သွားသည်။ ဓါတ်ခွဲခန်းသစ်တစ်ခု လုပ်ပြီးသွားချိန် လှေကားအသစ်တစ်ခု တက်နိုင်တော့မည် ဖြစ်သည်။

သို့သော်လည်း ထိုအရာမတိုင်ခင် သူတို့က သင့်တော်သည့် သုတေသနဝန်ထမ်းများ ခန့်ရဦးမည်။

မနက်ခင်းအချိန်က အလျင်အမြန် ကုန်ဆုံးသွားသည်။ နေ့လည်ပိုင်းတွင် သွမ့်ရှူးထုံနှင့် ရှီသွမ်းက အတူတူ နေ့လည်စာစားကြရန် ချိန်းထားလိုက်သည်။

သူ့ခံစားချက်များကို နှလုံးသားထဲတွင် မြုပ်နှံလိုက်ပြီးနောက် သွမ့်ရှူးထုံက ရှီသွမ်းနှင့် မျက်နှာချင်းဆိုင်သည့်အချိန် အရင်ကလောက် မသက်မသာ မဖြစ်မိတော့ပေ။ သွမ့်ရှူးထုံက စကားပြောရင်း ရယ်မောနေသည်။ နောက်ဆုံး သူက ညည်းညူလာ၏

" နေ့လည်ပိုင်းမှာ အစည်းအဝေးခန်းထဲ ထိုင်ပြီး မိန့်ခွန်းပြောတာ နားထောင်ရပြန်ဦးမယ်..."

ရှီသွမ်းက မပြောင်းမလဲ မျက်နှာနှင့် ပြောလာလေသည် " ကိုယ် တတ်နိုင်သလောက် အတိုချုံး ပြောပါ့မယ်..."

သွမ့်ရှူးထုံ :???

ရှီသွမ်းက ကိုယ်စားလှယ်အဖြစ် မိန့်ခွန်းပြောရမည့်အကြောင်း မစဥ်းစားခဲ့မိပေ။

လူငယ်လေးက တောင်းပန်ရမလား ဝေခွဲမရဖြစ်နေချိန် ရှီသွမ်းက ထရပ်ပြီး ပြောလာသည်။ " ကိုယ် သွားစရာလေး ရှိသေးလို့ မင်း စားနေနှင့်ပါ..."

ထိုလူက ခြေတံရှည်ကြီးများနှင့် လျှောက်ထွက်သွားလေသည်။

သွမ့်ရှူးထုံက အသက်ရှူရင်း သက်ပြင်းချမိသည်။ ရှီသွမ်းက သူ့ကို သဘောမကျရင်လည်း ထားလိုက်ပါတော့။ ဘာပဲဖြစ်ဖြစ် သူက ရှီသွမ်းနဲ့ တွဲရဖို့ မျှော်လင့်ချက်မှ မရှိတော့တာကို။

ရှီသွမ်းက ပွဲစီစဥ်သည့်သူရှိရာ လျှောက်သွားလိုက်သည်။ မန်နေဂျာ ဖော်ဖော်ရွေရွေ ပြုံးပြလာပြီး ရှီသွမ်းနှင့် လက်ဆွဲနှုတ်ဆက်လာသည်။

“မစ္စတာရှီကတော့ အမြဲတမ်း ခန့်ညားနေတာပဲဗျာ..."

ရှီသွမ်းက ခပ်ဖွဖွလေး ပြုံးပြလာသည် " ကျွန်တော့်ကို ဖိတ်ကြားတဲ့အတွက် ကျေးဇူးတင်ရမှာပါ... ကျွန်တော့်အနေနဲ့ ဂုဏ်ယူမိပါတယ်..."

မန်နေဂျာက ပိုလို့တောင် ပြုံးပြလာသည် " မစ္စတာရှီကို ပြပွဲမှာ စိတ်ဝင်စားလာအောင် ဆောင်ရွက်နိုင်တာ ဂုဏ်ယူစရာပါဗျာ...ဒီနေ့လည်ပိုင်း မိန့်ခွန်းက..."

" ကျွန်တော် အဲ့ဒီအကြောင်း ပြောမလို့ပါ..." ရှီသွမ်းက ဖြတ်ပြောလိုက်သည် " နေ့လည်ပိုင်းမှာ ကုမ္ပဏီဘက်က အရေးပေါ် ဗီဒီယိုကော အစည်းအဝေး ရှိလို့ သုံးနာရီ မထိုးခင် ဟိုတယ်ကို အရောက်ပြန်မှ ဖြစ်မှာပါ...မိန့်ခွန်းကို အတိုချုပ်ပဲ ပြောနိုင်လောက်မယ်..."

“သုံးနာရီလား..." မန်နေဂျာက မျက်မှောင်ကြုတ်မိသည် " အချိန်က တကယ် ကျပ်တာပဲ..."

မိန့်ခွန်းပြောရမည့်သူက ရှီသွမ်းတစ်ယောက်တည်း မဟုတ်ပေ။ ကြီးကြပ်သူများ ဦးဆောင်ကုမ္ပဏီများနှင့် အခြားလုပ်ငန်းစုများပါ စင်ပေါ်တက်ပြီး မိန့်ခွန်းပြောရမည် ဖြစ်သည်။

သို့သော်လည်း အားလုံးထဲတွင် ရှီသွမ်းက အရေးအပါဆုံးလူ ဖြစ်နေ၍ မန်နေဂျာက ကောင်းကျိုးဆိုးကျိုးကို ချင့်ချိနိမိသည်။

“ဒီလိုလုပ်ပါလား...ကျွန်တော်တို့ ကိုယ်စားလှယ် တစ်ယောက်ချင်းစီရဲ့ မိန့်ခွန်းကို ဆယ့်ငါးမိနစ်လောက်ပဲ ကန့်သတ်လိုက်ရင်ရော..."

ရှီသွမ်း၏ မျက်လုံးထက် ကျေးဇူးတင်သည့် အရိပ်ရောင် ပေါ်ထွက်လာသည်။ သူ၏ နဂိုအေးစက်စက် အရှိန်အဝါထက် ပိုပြီး ဖော်ရွေပုံပေါက်သွားလေသည် ။

" ကျေးဇူးအများကြီး တင်ပါတယ်..."

မန်နေဂျာက ရှီသွမ်း၏ မျက်နှာထားကို ကြည့်လိုက်ရင်း ရုတ်တရက် ဆုံးဖြတ်သည့်နေရာတွင် သူပိုတော်လာသည်ဟု ခံစားမိသည်။ ယခုလို အသေးအမွှားကိစ္စမျိုးက ရှီသွမ်း၏ ဆန္ဒကို ဖြည့်ဆည်းပေးလိုက်လို့ ဘာမှမဆုံးရှုံးသွားပေ။

နေ့လည်ပိုင်း ရောက်လာသည့်အချိန် သွမ့်ရှူးထုံက အစည်းအဝေးခန်းမဆီ သွားလိုက်ပြီး တစ်နေ့လည်လုံး နားနှိပ်စက်ခံဖို့ ပြင်ထားသော်လည်း ကြီးကြပ်ရေးမှူးက ဆယ့်ငါးမိနစ်သာ ပြောသွားမှန်း သိလိုက်ရသည်။

ကျန်ရှန်းပဲ အရင်တုန်းက ကြီးကြပ်ရေးမှူးတွေပြောတာက အကြာဆုံးနဲ့ ပျင်းစရာအကောင်းဆုံးလို့ ပြောခဲ့တာ မဟုတ်ဘူးလား။

နောက်ပြောမည့်သူက ဦးဆောင်ကုမ္ပဏီ ယာ့လန်ဖြစ်သည်။

ယာ့လန်၏ ကိုယ်စားလှယ်က ရွှီယာ့ဇယ် ဖြစ်သည်။ စင်ပေါ်တက်လိုက်ပြီးနောက် သူက ပရိတ်သတ်ဘက်ကို တစ်ချက်ကြည့်လိုက်ရင်း ပရိသတ်နောက်နားတွင် ထိုင်နေသည့် သွမ့်ရှူးထုံကို ခဏလေးနှင့် မြင်သွားလေသည်။ သူက စိတ်ထဲ လှောင်ရယ်လိုက်သည်။

နွေဦးဆောင်းဦးခန်းမရဲ့ ထုတ်ကုန်က ရောင်းကောင်းလဲ ဘာအရေးလဲ။ သွမ့်ရှူးထုံက ပရိသတ်ထဲမှာ ထိုင်နေရပြီး သူများပြောတာကို ငြိမ်ငြိမ်လေး နားထောင်နေရတယ်လေ။

သူ့ကိုယ်သူ ကျေနပ်နေ၍ ကြီးကြပ်ရေးမှူး ပြောသည့် စကားကို လုံးဝမေ့သွားလေသည်။ ဆယ့်ငါးမိနစ်ကြာပြီးသည်ထိ သူက မရပ်ဘဲဆက်ပြောနေဆဲပင်။ ဝန်ထမ်းတစ်ယောက်က သူ့ကို မျက်လုံးမှိတ်ပြနေသော်လည်း သူလုံးဝ မမြင်မိချေ။

နှစ်ဆယ့်ငါးမိနစ်လောက် ကြာမှ ရုတ်တရက် သတိရသွား၍ စကားအမြန်ဖြတ်ရတော့သည်။

တိုက်တိုက်ဆိုင်ဆိုင် သူနောက်က မိန့်ခွန်းပြောမည့်သူက အီလက်ထရွန်းနစ် သတင်းအချက်အလက် ကုမ္ပဏီ၏ ကိုယ်စားလှယ် ရှီသွမ်းဖြစ်နေသည်။

ရှီသွမ်း စင်ပေါ် တက်ပြီးနောက် သူက တိုတိုနှင့်လိုရင်းသာ ပြောသွားသည်။

" ဒီပြပွဲမှာ ပါဝင်ဖို့ ဖိတ်ကြားခံရတဲ့အတွက် ဂုဏ်ယူမိပါတယ်....ယုံကြည်ပေးတဲ့အတွက်လည်း ကျေးဇူးတင်ပါတယ်...အီလက်ထရွန်းနစ် သတင်းအချက်အလက် နယ်ပယ်က ပြီးခဲ့တဲ့နှစ်တွေမှာ တိုးတက်အောင်မြင်လာခဲ့တယ်လို့ ယုံကြည်ပါတယ်...မင်းတို့ရဲ့ ကြိုးစားအားထုတ်မှုနဲ့ဆို အနာဂတ်မှာ တိုးတက်ကြီးပွားလာလိမ့်မယ်လို့ ယုံကြည်ပါတယ်...အချိန်က ကန့်သတ်ထားတာမို့ ဒီနေရာမှာ အသေးစိတ် မပြောတော့ပါဘူး..."

ပရိသတ်ထဲက လူတိုင်းက ခေါင်းငုံ့ပြီး ကျိတ်ရယ်နေကြသော်လည်း ရွှီယာ့ဇယ်၏ မျက်နှာက ရှက်စိတ်ကြောင့် ရဲတွတ်နေပြီဖြစ်သည်။ သူက တွင်းတစ်တွင်းရှာပြီး ပုန်းနေချင်မိတော့သည်။

သွမ့်ရှူးထုံက တစ်ခဏမျှ အံ့သြသွားသော်လည်း မနေနိုင်ဘဲရယ်လိုက်မိသည်။

သူ့ဘေးက တစ်ယောက်က ပြောနေသည် " ဥက္ကဌရှီက တော်တော်လေး သီးသန့်ဆန်တယ်လို့ ထင်ခဲ့တာ... ရယ်စရာပြောတတ်မယ်လို့ မထင်ထားခဲ့ဘူး...ရွှီယာ့ဇယ် ဖြစ်သွားတာကို မြင်လိုက်လား....ရယ်ချင်စရာကြီး..."

“ဟားဟား...ဘယ်သူ့ကို သွားအပြစ်တင်ရမှာလဲ...သူတို့က နေ့လည်ကတည်းက သတိပေးစာ ပို့ထားပြီးသား...လူတစ်ယောက်ကို ဆယ့်ငါးမိနစ်ပဲ ပြောရမယ်လို့ မှာထားတာ...လူငယ်တွေက အချိန်ကို မလေးစားတတ်ရုံလေးပါ...."

ပွင့်ပွင့်လင်းလင်းပြောရလျှင် အကြီးပိုင်းများက ရွှီယာ့ဇယ်ကို အရာမသွင်းကြပေ။

သူက မိုက်မဲသည့် ကောင်စုတ်လေးတစ်ယောက်သာ ဖြစ်သည်။ သူ့အဖေအရှိန်အဝါကြောင့် မဟုတ်လျှင် ကြီးကြပ်ရေးမှူးများက သူ့ကို စင်ပေါ် စကားပြောခွင့် ပေးကြလိမ့်မည် မဟုတ်ပေ။

ထိုမျှမက သူက သူ့ကိုယ်သူလည်း ငတုံးဖြစ်အောင် လုပ်ခဲ့လေသည်။

သွမ့်ရှူးထုံက ပြုံးနေရင်း တောင့်ခနဲဖြစ်သွားမိသည်။ ရှီသွမ်း...သူ သူပြောလိုက်လို့ ကြီးကြပ်ရေးမှူးဆီ သွားပြီး ဆွေးနွေးခဲ့တာတော့ မဟုတ်လောက်ဘူး မို့လား....

မဟုတ်လောက်ပါဘူး...ဘယ်လိုလုပ် ဖြစ်နိုင်မှာလဲ...

*****

စာရေးသူမှာ ပြောစရာအချို့ရှိပါတယ်။

ရှီသွမ်း : " ကျွန်တော့်နာမည်က ရှီရွေ့ဆိုတာကို လူဘယ်နှစ်ယောက်လောက် စဥ်းစားမိလဲ သိချင်ရုံလေးပါ"

[T/N: ရှီသွမ်းရဲ့ သွမ်းနဲ့ ရှီရွေ့ရဲ့ ရွေ့က တရုတ်စာလုံး နည်းနည်းဆင်ပါတယ်။ သွမ်းက အဆုံးသတ်လို့ အဓိပ္ပါယ်ရပြီး ရွေ့က ကံကောင်းတယ်လို့ အဓိပ္ပါယ်ရတယ်။ ဒါကြောင့် သွမ့်ရှူးထုံက ရှီသွမ်းနားမှာနေပြီး ကံကောင်းနေတယ်လို့ ပြောတာပါ။ ရှီရွေ့= ရှီကံကောင်းလေးပေါ့]

👨‍❤️‍👨

Prev Next