MM Story Teller

Chapter 63

Viewers 4k

👨‍❤️‍👨Chapter 63

ရှီမိသားစု၏ ပုံစံကိုက ဤအတိုင်းဖြစ်သည်။ ကလေးဘဝကနေ ယခုအချိန်ထိ ရှီသွမ်းက အကြီးတွေဆီမှ လက်ဆောင်မရဖူး၍ ရှီယွိကို လက်ဆောင်ပေးရကောင်းမှန်းလည်း မသိပေ။

သွမ့်ရှူးထုံက ရှီသွမ်း၏ မျက်နှာအမူအရာကို တွေ့သောအခါ ဘာဖြစ်နေမှန်း တန်းသိလိုက်သည်။ ကလေးဆိုသည်က လက်ဆောင်ရလျှင် ပျော်တတ်ကြသည်။ ယင်းက လက်ဆောင်ကြောင့် မဟုတ်ပဲ လက်ဆောင်ရသည့် ခံစားချက်က အချစ်ခံရသလို ခံစားမိ၍ပင်။

" ဦးလေးရှီတို့နှစ်ယောက်က တစ်ယောက်နဲ့တစ်ယောက် မတွေ့တာကြာပြီလေ...အိမ်ပြန်တဲ့အခါ လက်ဆောင်ယူသွားရင် သူလည်း ပျော်သွားလောက်တယ်..."

ရှီသွမ်းက သွမ့်ရှူးထုံ၏ လမ်းညွှန်မှုကို လက်ခံလိုက်ပြီး တာဝန်သိသိနှင့် အကြံတောင်းလာသည် " ဒါဆို ကိုယ်သူ့ကို ဘာလက်ဆောင် ပေးသင့်လဲ..."

" ခင်ဗျား သူ့အရွယ်တုန်းက ကြိုက်ခဲ့တဲ့အရာကို ကြိုးစားပြီး စဥ်းစားကြည့်ပေါ့ဗျာ... " ဤအကြောင်းပြောရင်း သွမ့်ရှူးထုံက ဖုန်းထဲကနေ ရှာလိုက်သည်

: ဆယ်ကျော်သက်ကောင်လေးတွေ ဘာလက်ဆောင်မျိုး ကြိုက်ကြလဲ...

အဖြောင့်သမား ရှီသွမ်းက ပြန်ဖြေလာသည် " ကိုယ့်မှာ ဘာကြိုက်တယ်ဆိုတာမျိုး မရှိခဲ့ပါဘူး..."

[*T/N: ကျစ်နန် - " အဖြောင့်ကြီး" ဒါက ကျိုးသင့်ကြောင်းသင့်ရှိလွန်းပြီး စတီးလို ဖြောင့်လွန်းတဲ့သူ...မိန်းမတွေရဲ့စိတ်ကို မသိတဲ့သူ...တစ်နည်းပြောရရင် နလပိန်းတုံးယောကျ်ား...]

သွမ့်ရှူးထုံ " ..." ဟုတ်သားပဲ။ ရှီသွမ်းက အဲ့ဒီအရွယ်တုန်းက ခက်ခဲတဲ့အချိန်ကို ရုန်းကန်ခဲ့ရတာ။ သူ့မှာ ကြိုက်တဲ့အရာမျိုး စဥ်းစားနေဖို့ ဘယ်အချိန်ရှိမှာလဲ။

သွမ့်ရှူးထုံ၏ နှလုံးသားလေး၏ ရှီသွမ်းအတွက် ထပ်ပြီးနာကျင်လာပြန်သည်။

“ ဒါဆို အခုရော ခင်ဗျားကြိုက်တဲ့ အရာ ရှိပြီလား..." သူက မေးလိုက်သည်။

ရှီသွမ်းက သူ့ကို တိတ်တိတ်လေး ကြည့်လာပြီး စကားမဆိုချေ။

ထိုလူ့မျက်လုံးများက ပုံမှန်အချိန်လို စူးရှမနေချေ။ သူ၏ မျက်တောင်ထူစိပ်စိပ်များက အနည်းငယ် ညွှတ်ကိုင်းနေ၍ ဖြူစင်ပြီး သနားစရာကောင်းသည့် ပုံစံလေး ဖြစ်နေ၏။

သွမ့်ရှူးထုံ သူ့ကိုယ်သူ တွေးမိသည်။ခင်ဗျား တစ်စုံတစ်ယောက်ကို သဘောကျတဲ့အခါ ခင်ဗျားရဲ့ နှင်းဆီရောင်ခြယ် မျက်ဝန်းအိမ်တွေက အရမ်း အားပြင်းတာပဲ။

သူက ခေါင်းစဥ်ကို အမြန်ပြောင်းလိုက်သည် " ဦးလေးစွင်းကို ရှီယွိ ဘာကြိုက်လဲ မေးကြည့်ရင်ရော..."

ရှီသွမ်းက အိမ်တွင် သိပ်မနေသည့်အပြင် ရှီယွိနှင့် အချိန်မဖြုန်းဖူး၍ ရှီယွိကို ဂရုမစိုက်ပေးမိဟန်ပင်။ ဤအချက်နှင့် ပတ်သတ်ပြီး ငြင်းဆန်စရာမရှိပေ။ သို့သော်လည်း ယခုကစပြီး အတိတ်က လျစ်လျူရှုခဲ့သည်များကို ဖြေးဖြေးချင်း ပြန်ပြင်သွားနိုင်သည်။

ရှီသွမ်းက ခေါင်းညိမ့်ပြလိုက်ပြီး ဦးလေးစွင်းဆီ မက်ဆေ့ချ် ပို့လိုက်သည်။

ဦးလေးစွင်းက အရမ်းဝမ်းသာသွားပြီး လှိုက်လှိုက်လှဲလှဲ စာပြန်လာသည် :[ သခင်ငယ်လေးက ဘတ်စ်ကတ်ဘော ကစားရတာ ကြိုက်တယ်...သူ အရင်တုန်းက ဝယ်ခဲ့တဲ့ ဘောလုံးက အခု ဟောင်းနေပြီ...ပြီးတော့ ကျောင်းတွေ ပြန်ဖွင့်တော့ သူက စာအရမ်းလုပ်နေခဲ့တာနဲ့ အသစ်ဝယ်ဖို့ အပြင်မထွက်မိဘူးရယ်...]

ဦးလေးစွင်းက တည့်တည့်မပြောပဲ စကားလှအောင် ပြောခဲ့သည်။ အထင်ကြီးလောက်စရာပင်။

သွမ့်ရှူးထုံက ဦးလေးစွင်းကို ရင်ထဲကနေ ချီးမွမ်းလိုက်ပြီး ပြောလာသည် " ကျွန်တော်တို့ ယန်မြို့တော်ဆီ ရောက်တဲ့အခါ ဘောလုံးဝယ်ဖို့ ခင်ဗျားနဲ့ အတူလိုက်ခဲ့မယ်လေ..."

ကိစ္စမျိုးစုံကို စီမံခန့်ခွဲရသည့် ဥက္ကဌကြီးရှီက ဤသို့လုပ်လည်း မမှားလောက်ဟု ထင်မိသည်။ သူက သံသယမဝင်ပဲ ပြန်ဖြေလာသည် " ဟုတ်ပြီ..."

ရထားလေးက ယန်မြို့တော်ဆီ ရောက်သည့်အချိန် ရှီသွမ်းက သူနှင့် ထိုင်ခုံလှဲပေးခဲ့သည့် ကောင်မလေးဆီ အထုပ်ချပေးရန် သွားလိုက်သည်။ ပြီးနောက် သွမ့်ရှူးထုံနှင့် ချိန်ထားသည့် နေရာဆီ ပြန်သွားလိုက်သည်။

ရထားထဲက လူသွားလမ်းလေးက ကျဥ်း၍ တစ်ယောက်တည်းသာ သွားလို့ရပြီး ရှေ့ကသွားနေသည့်လူနောက် လိုက်ရသည်။ တစ်ခါတစ်ခါ သွမ့်ရှူးထုံက နောက်ပြန်ကြည့်ပြီး ရှီသွမ်းဆီ ပြုံးပြလိုက် စကားပြောလိုက် လုပ်နေသေးသည်။ ထိုလူ့ဘက်ကလည်း အကြိမ်တိုင်း နူးနူးညံ့ညံ့ တုန့်ပြန်လာလေသည်။

လူအုပ်ထဲမှ ရှီသွမ်းနှင့် ထိုင်ခုံလှဲခဲ့သည့် မိန်းမငယ်လေးက မနေနိုင်ဘဲ ဖုန်းနှင့် ဓါတ်ပုံရိုက်မိလေသည်။ ရထားပေါ်မှ ဆင်းပြီးနောက် သူမ၏ အတန်းဂရုချတ်ထဲသို့ စိတ်လှုပ်ရှားစွာ ပုံပို့လိုက်သည်။

[" ငါ အမြန်ရထားပေါ်မှာ လူချောလေးနှစ်ယောက်ကို တွေ့ခဲ့တယ်ဟေ့..."]

[" အစတုန်းကတော့ ငါမယုံဘူး...ဒါပေမယ့် ဓါတ်ပုံကို ဖွင့်ကြည့်ပြီးမှ အရမ်းအံ့သြသွားတာပဲ...အား...ငါတော့ သေပြီ..."]

[“အိုး မိုင် ဂေါ့...ချောလိုက်တာဟယ်...နှစ်ယောက်စလုံးက လုံးဝ စတိုင်မတူဘူးနော်...ဒါပေမယ့် နှစ်ယောက်လုံး အရမ်း ကြည့်ကောင်းတယ်..."]

[" အရမ်း...အရမ်း ချစ်စရာကောင်းတယ်..."]

[“ဟေ့...ဘာလို့ သူ့ကို ကြည့်ရတာ နည်းနည်း ရင်းနှီးနေရတာလဲ...ကျယ်မေ့တို့ နင်တို့အကုန်လုံး နွေဦးပန်းနံပါတ်၁ သုံးတယ်မို့လား....တစ်ခုခု ရင်းနှီးနေတယ်လို့ မတွေးမိကြဘူးလား..."]

ထိုမိန်းကလေးက ပြောပြီးသည်နှင့် စက်ဘီးပေါ်က လူငယ်လေးတစ်ယောက်၏ ပုံကို ဂရုချတ်ထဲ ပို့လာလေသည်။

ဂရုချတ်တစ်ခုလုံး တောင့်ခဲသွားကြသည်။

ရှီသွမ်းနှင့် ထိုင်ခုံလဲခဲ့သည့်သူက သူမ၏ မှတ်ဥာဏ်များကို ပြန်ပြီး တူးဆွကြည့်သည်။ သူမက သူများပြောသည့်အတိုင်း လိုက်ပြီး နွေဦးဆောင်းဦးခန်းမကို မကောင်းပြောခဲ့သည့် အကြောင်း ပြန်တွေးမိသည်။ နွေဦးဆောင်းဦးခန်းမ၏ နာမည်ပြန်တက်လာသောအခါ သူမက တလောင်သွမ့်၏ အမာခံဖန်ကြီး ဖြစ်လာခဲ့သည်။ သူမက ဤပုံကို တစ်ခါမှ မမြင်ဖူးခြင်းမဟုတ်ဘဲ အပြင်ကလူက ဓါတ်ပုံထဲကထက် အဆတစ်ရာလောက် ပိုချောနေ၍ပင်။

[T/N : တလောင် - Big shotကြီး...ဆရာကြီး]

သူမက နောင်တရသွားသလို သက်ပြင်းချမိသည်။ သူမမှာ သွမ့်ရှူးထုံကို အစကနေ အဆုံးထိ မမှတ်မိခဲ့ပါချေ။

ဂရုချတ်က ပြန်ပြီး အသက်ဝင်လာခဲ့သည်။

" တလောင်လည်း အမြန်ရထားစီးမယ်လို့ မထင်ထားခဲ့ဘူး...ပြီးတော့လည်း ဒုတိယတန်းမှာ စီးတာ..."

ရှီသွမ်းနှင့် ထိုင်ခုံလဲခဲ့သည့် ကောင်မလေးက ရထားပေါ်တွင် ဖြစ်ခဲ့သည့်အကြောင်းကို ပြန်လည်ဝေမျှလာသည်။ သူမက သူတို့ထဲက တစ်ယောက်နှင့် ထိုင်ခုံလှဲပြီး ထိုလူကလည်း သူမကို အထုပ်ဆွဲကူပေးခဲ့ကြောင်း အတန်းဖော်များကို ပြောပြခဲ့သည်။ နောက်ဆုံးတွင် သူမက ဆုံးဖြတ်ချက်ချလိုက်ဟန် ပြောလိုက်သည်

" အားးးးးး တလောင်သွမ့်နဲ့ သူ့သူငယ်ချင်းတို့ နှစ်ယောက်လုံး အရမ်းယဥ်ကျေးတာ...ငါ တစ်ခု ကြေညာလိုက်မယ်...အခုကစပြီး ငါက သူ့ရဲ့ အမာခံဖန်ဖြစ်သွားပြီ...တစ်ဘဝလုံး နောင်တမရဘူး..."

အမှတ်မထင် တစ်ယောက်ယောက်က ထိုပုံကို အင်တာနက်ပေါ် တင်လိုက်၍ ဆွေးနွေးမှုများ တစ်အုံနွေးနွေးတက်လာခဲ့သည်။

စစချင်းတွင် သွမ့်ရှူးထုံနှင့် ရှီသွမ်းတို့ပုံက လူနည်းစုကိုသာ ဆွဲဆောင်နိုင်ခဲ့သည်။

သို့သော်လည်း သွမ့်ရှူးထုံ၏ ဇာတ်မြစ်နှင့် နွေဦးဆောင်းဦးခန်းမ၏ နွေဦးပန်းနံပါတ်၃ ကြေညာချက်ပါ ပူးတွဲထွက်လာသောအခါ ဤဓါတ်ပုံက ချက်ချင်း ပလူပျံသွားတော့သည်။

ဓာတ်ပုံရိုက်ရသည့် အနေအထားကြောင့် ရှီသွမ်းနှင့် ထိုင်ခုံလဲခဲ့သည့် ကောင်မလေးမှာ သွမ့်ရှူးထုံ၏ အရှေ့ပိုင်း မျက်နှာလေးကိုသာ ရိုက်မိပြီး ရှီသွမ်းကလည်း ဓါတ်ပုံထဲတွင် သုံးပုံတစ်ပုံလောက်သာ ပါသည်။ ရှီသွမ်းနှင့် မရင်းနှီးကြသည့်သူများက ဓါတ်ပုံထဲက သူ့ကို ပုံမဖမ်းနိုင်ခဲ့ပေ။

စခရင်ကို လျက်ပြီး အင်တာနက်ပေါ်က လူများက ဓါတ်ပုံကို ဆွေးနွေးကြတော့သည်။

[*T/N: စခရင်လျက်တာ ပို့စ်ကို လိုက်ခ်ပေးတာပါ]

[" ဒါက နွေဦးဆောင်းဦးခန်းမရဲ့ ကြော်ငြာဖန်တီးတဲ့ နည်းလမ်းသစ်လား....ကိုယ်စားလှယ် ငှားမယ့်အစား သခင်လေးသွမ့်ကိုပဲ လူရှေ့ထွက်ခိုင်းလိုက်တော့တာလား..."]

[" အား....အား...အား... သခင်လေးသွမ့်ရဲ့ ပုံစံလေးက အရမ်းနူးညံ့တာပဲ.... အဲ့ဒီအပြုံးလေးကြောင့် ငါတော့ သေပြီ..." ]

[“ သခင်လေးသွမ့်ကို နူးညံ့သွားအောင် လုပ်နိုင်တဲ့သူကိုပဲ သိချင်နေမိတယ်..." ]

[“စုံတွဲမျက်လုံးလိမ်းခရင်လား...ဟဟ...ငါ ဝယ်ပြီ ငါဝယ်ပြီ..."]

[" ဒါက တစ်ကိုယ်တည်းသမားတွေကို ခွဲခြားနေတာပဲ..." ]

[“ဘယ်လို ယောကျ်ားကြီးတွေက မျက်လုံးလိမ်းခရင် သုံးမှာလဲ...မိန်းကလေးတွေပဲ သုံးကြတာ မဟုတ်ဘူးလား..."]

[" ဟေး @သွမ့်လုပ်ငန်းစု @ရှီလုပ်ငန်းစု @ ကျင်းရှီကျောက်မျက်ရတနာ ... ခင်ဗျားတို့တွေ ကုမ္ပဏီအကျိုးအမြတ်ရအောင် ပေးချင်ကြသေးလား..."]

[“ဟားဟား...အပေါ်ထပ်ကလူ...မင်းကြောင့် ဖင်ထွက်မတတ် ရယ်လိုက်ရတယ်...နွေဦးဆောင်းဦးခန်းမရဲ့ သုတေသနလုပ်တဲ့ အရှိန်နဲ့ဆို ဘော့စ်ကြီးသုံးယောက် ဝန်ထမ်းတွေကို ပေးရတာနဲ့ မွဲရလိမ့်မယ်..."]

[" အဲ့ဒီနှစ်ယောက်က လိုက်တယ်လို့ မထင်ကြဘူးလား..." ]

[“အပေါ်ထပ်ကလူ...နင့်မျက်လုံးတွေ ပုပ်နေပြီ...လစ်လိုက်တော့..."]

[T/N : ပုပ်နေတဲ့ မိန်းမ ပုပ်နေတဲ့ ယောက်ျား ဆိုတာက ဖူဂျိုရှီ ဖူဒန်ရှီတွေရဲ့ တရုတ်ဗားရှင်းပါ]

စစချင်းတွင် အွန်လိုင်းပေါ်က ဆူဆူညံညံအသံများက ဟာသလုပ်နေခြင်းသာ ဖြစ်သည်။ ဘယ်သူမှ ရေးကြီးခွင်ကျယ် လုပ်ဖို့ ကြိုးစားနေခြင်း မဟုတ်သော်လည်း ရွှီယာ့ဇယ်ဆီက ကောမန့်က အင်တာနက်က လူများကို အခြားအတွေးများ ဝင်သွားစေသည်။

ရွှီယာ့ဇယ် ဗွီ : [သွမ့်မိသားစုနဲ့ ရှီမိသားစုရဲ့ ဆက်ဆံရေးက တကယ်ကောင်းတာပဲ...အနာဂတ်မှာ သူတို့က အမျိုးတောင် တော်လာနိုင်လောက်တယ် [ ခွေးခေါင်းပုံ] [ခွေးခေါင်းပုံ]]

[T/N: ရွှီယာ့ဇယ်နောက်မှာ ဗွီဆိုတဲ့ စာလုံးလေး ပါတာက blue mark လိုမျိုးထင်ပါတယ်]

ရွှီယာ့ဇယ်က နာမည်ကျနေသော်လည်း ဖန်ဂဲလ်လေးများ ရှိနေသေးသည်။ အိုးမွှေရတာ ကြိုက်သည့် အင်တာနက်သုံးစွဲသူများလည်း ရှိနေသေး၍ပင်။ အုပ်စုနှစ်ခုက သူရေးသည့် ကောမန့်ကို ပြန်တင်ပေးနေကြသည်။

[" ဒါဆို အဲ့ဒီလူက မစ္စတာရှီပေါ့..."]

[" ရှီသွမ်းက သွမ့်စစ်ဖူနဲ့ လက်ထပ်ချင်တယ်လို့ ပြောနေတာလား..."]

[" အပေါ်ထပ်ကလူ ပြောတာ အဓိပ္ပါယ်ရှိတယ်...ရှီမိသားစုနဲ့ သွမ့်မိသားစုက အမြဲတမ်း ဆက်ဆံရေးကောင်းခဲ့တယ်...ရှီလုပ်ငန်းစုကလည်း အကြိမ်တိုင်းနွေဦးဆောင်းဦးခန်းမရဲ့ ထုတ်ကုန်တွေကို အားပေးခဲ့တာ....ဒါက သူ့ယောက်ဖလောင်းကို ထောက်ပံ့ပေးတယ်ဆိုတာ ပြနေတာပဲ မဟုတ်လား..."]

[“သောက်ကျိုးနည်း...ဒါဆို အရမ်းအင်အားကြီးတဲ့ ပူးပေါင်းမှု ဖြစ်လာမှာ မဟုတ်ဘူးလား..." ]

ရွှီယာ့ဇယ်က သူနှင့်အတွေးတူသည့်သူ ရှိမလားရှာရင်း ကောမန့်များကို ကြည့်လိုက်သည်။ သို့သော်လည်း ထိုသို့ကောမန့်များကို တွေ့လိုက်ရသောအခါ ဖုန်းကို ပစ်ပေါက်မိသည်ထိ ဒေါသထွက်သွားရသည်။ ဒီလူတွေ ဦးနှောက်များ မကောင်းကြတော့ဘူးလား။ သူပြောချင်တာက ရှင်းရှင်းလင်းလင်းကို သွမ့်ရှူးထုံနဲ့ ရှီသွမ်းတို့အကြောင်းလေ...သွမ့်စစ်ဖူနဲ့ ရှီသွမ်းရဲ့ အကြောင်း မဟုတ်ဘူး။

သို့သော်လည်း ပုံမှန်လူများက သူ့ကောမန့်ကို မြင်သောအခါ သွမ့်စစ်ဖူနှင့် ရှီသွမ်းတို့က လက်ထပ်တော့မည်ဟု သေချာပေါက် တွေးမိကြမည်ပင်။

အလုပ်ထဲတွင် မျက်ခုံးတစ်လှုပ်လှုပ်နှင့် သွမ့်စစ်ဖူက မီးပုံအပြင်တွင် နေသည့်တိုင် မီးစင်ခံနေရသည်။ သူမက မသိသေးသော်လည်း သွမ့်ရှန်ယဲ့ ဖုန်းခေါ်လာမှ အကြောင်းစုံ သိသွားရသည်။

“စစ်ဖူ....သမီးနဲ့ ရှီသွမ်းက ဘာတွေလဲ..."

သွမ့်စစ်ဖူ : " ဘာတွေလဲ ဆိုတာ ဘာကိုပြောချင်တာလဲ အဖေ..."

သွမ့်ရှန်ယဲ့၏ လေသံက တော်တော်လေး တည်ငြိမ်နေသည်။ စိတ်ဆိုးနေသံလည်း မရှိသလို ဝမ်းသာအယ်လှဲဖြစ်နေပုံလည်း မရချေ ။

" အခုလေးတင် တစ်ယောက်ယောက်က မေးလာတာ...သမီးနဲ့ ရှီသွမ်းက တွဲနေကြတာလားတဲ့..."

သွမ့်စစ်ဖူက ပြောစရာစကားမရှိ ဖြစ်သွားရသည်။ သူမက ရှီသွမ်းနှင့် ဆက်တောင်မဆက်သွယ်ဖူးပေ။ လိုင်းပေါ်ကနေ တွဲလို့ရသည်ဟု ဆွဲပြောရအောင်လည်း သူတို့က ဘယ်လိုလုပ် တွဲနိုင်မည်နည်း။ အဲ့လိုမေးခွန်း မေးလာတဲ့သူက ဓါတ်လိုက်လို့ ဦးနှောက်သေသွားတာများလား...ဒါမှမဟုတ် တစ်ခုခုများလား...

" မတွဲပါဘူး...သမီး သူနဲ့ စကားတောင်မပြောဖူးဘူး.

.." သူမစိတ်ထဲ သူမ၏အလုပ်သာ ရှိသည်။ အချစ်ကို ခေါ်နေကြတဲ့အရာက ဘာများလဲ။ စားလို့ရလို့လား။

သေချာပေါက် သွမ့်ရှန်ယဲ့က သူ့သမီးကို ယုံကြည်သည်။ သူက တစ်ခြားမမေးတော့ပဲ ဖုန်းချလိုက်သည်။

သူမအဖေနှင့် ဖုန်းပြောပြီးသွားချိန် သွမ့်စစ်ဖူက သူမလက်ထောက်ကို ကောလဟာလအကြောင်း စစ်ဆေးခိုင်းရတော့သည်။ အကြောင်းရင်းကို သေချာသိပြီးချိန် သူမက သွမ့်ရှူးထုံကို တိုက်ရိုက်ဖုန်းခေါ်လိုက်သည်။

ထိုအချိန် သွမ့်ရှူးထုံကလည်း ယန်မြို့တော်ကို ရောက်နေပြီဖြစ်သည်။

ရှီသွမ်းက ဘူတာကို လာကြိုမည့် ဒရိုင်ဘာရှိ၍ သူတို့အထုပ်များကို အရင်ဆုံး သွမ့်မိသားစုအိမ်တော်ဆီ ပို့ခိုင်းထားလိုက်သည်။ ထို့နောက် နှစ်ယောက်သား ဘတ်စ်ကတ်ဘောဝယ်ရန် အတူတူသွားလိုက်ကြသည်။

သွမ့်ရှူးထုံက သွမ့်စစ်ဖူဆီကနေ ဖုန်းဝင်လာ၍ အံ့သြသွားရသည်။

" အစ်မ...ရှီသွမ်းက ကျွန်တော်နဲ့အတူတူ ယန်မြို့တော်ကို အမြန်ရထားစီးလာခဲ့တာ အမှန်ပါပဲ..."

သွမ့်စစ်ဖူက အံ့သြသွားရသည် " နင် အမြန်ရထားစီးတာကို နားလည်ပေမယ့် သူ့မှာ ကားရှိတယ် မဟုတ်ဘူးလား..."

သွမ့်ရှူးထုံ "...ဒီနေ့ အမြန်လမ်းမပေါ်မှာ ကားတွေ ညှပ်နေတာ....သူ အဲ့လိုဖြစ်မှာကို ကြိုတွေးမိလို့နေမယ်..."

စက္ကန့်အနည်းငယ်ခန့် တိတ်နေပြီးမှ သွမ့်စစ်ဖူက ပြောလာသည် "နင်ပြန်လာတာ ကောင်းတယ်...ငါလည်း ဒီနေ့ညနေ အိမ်ပြန်မှာ...ညစာအတူတူစားကြတာပေါ့..."

" ဟုတ်..."

ဖုန်းချလိုက်ပြီးနောက် ရှီသွမ်းက ဘတ်စ်ကတ်ဘော ရွေးပြီးပြီဖြစ်၍ မေးလာသည် " ဘာကိစ္စလဲ..."

သူက မစပ်စုချင်သော်လည်း သွမ့်ရှူးထုံက သူ့အကြောင်း ပြောသွား၍ မနေနိုင်ပဲ မေးမိသည်။

သူနှင့် လူငယ်လေးနှင့် ပတ်သက်လာလျှင် ဂရုစိုက်ရတော့မည်။

သွမ့်ရှူးထုံက ရယ်လည်းမရယ်နိုင် ငိုလည်းမငိုနိုင် ဖြစ်နေမိသည်။ သူက ဝေ့ပေါ် ဖွင့်လိုက်ပြီး သူ့ကို ပြလိုက်သည်။

" အခု...ခင်ဗျားက ကျွန်တော့်အစ်မကို လက်ထပ်ချင်နေတယ်ဆိုပြီး သတင်းတွေ ထွက်နေတယ်...ကျွန်တော့်အစ်မက ဘာတွေဖြစ်နေတာလဲလို့ မေးနေတာ..."

ရှီသွမ်း "...." ဒီလူတွေက တကယ် တွေးတတ်ကြလွန်းတယ်။

အင်တာနက်သုံးစွဲသူများ၏ ဦးနှောက်စွမ်းရည်က မိုးကောင်းကင်လောက် မကတော့ပေ။ သူတို့က ပြောစရာတစ်ကြောင်းလောက် တွေ့သည်နှင့် ဇာတ်လမ်းဆင်လိုက်ကြတော့သည်။

လက်ထပ်ပြီးသွားလျှင် ချမ်းသာပြီး အင်အားကြီးသည့်သူများ အားလုံးက အကျယ်တဝင့် ဖော်ပြခံရတော့သည်။

သို့သော်လည်း ဘယ်သူမှ အခြားလမ်းကြောင်းတစ်ခုကို မစဥ်းစားမိကြပေ။

ရှီသွမ်းက တိတ်နေပြီးမှ သူနှင့် အတည်တကျ ဆွေးနွေးလာသည် " မင်း ရှင်းသွားအောင် ထုတ်ပြန်ချက် ထုတ်ချင်လား..."

သူ့မှာ ယခင်က ဖိန်ရော့ဝိန်းကြောင့် အထင်လွဲခံရဖူးပြီး ယခုက သူက တစ်ယောက်ယောက်နောက်ကို လိုက်နေခြင်းဖြစ်သည်။ သေချာပေါက် သွမ့်ရှူးထုံကလွဲပြီး အခြားသူ၏ ကိစ္စထဲ ဝင်မပါနိုင်ပေ။

သွမ့်ရှူးထုံက ခေါင်းခါပြလာသည် " ရွှီယာ့ဇယ်ရဲ့ စကားတွေက မသေချာမရေရာဘူး...ပြီးတော့ အင်တာနက်ပေါ်ကလူတွေရဲ့ ဟာသတွေကို အတည်ယူနေစရာ မလိုပါဘူး... အဲ့ဒါကြောင့် သူတို့ကို လိုက်ရှင်းပြနေဖို့ မလိုအပ်ဘူး..."

အင်တာနက်သုံးစွဲသူများက တစ်ခဏမျှ စကားပြောနေကြပြီးနောက် အပူလှိုင်းက ကျသွားပြီဖြစ်ပြီး ယင်းက ကြက်တစ်ကောင်ကို ခြေထောက်နှင့် ဖိသတ်လိုက်သလိုမျိုးပင်။

ရှီသွမ်းက နာနာခံခံနှင့် ဘာမှထပ်မပြောလာတော့ပေ။

***

စာရေးသူမှာ ပြောစရာအချို့ရှိပါတယ်။

ရွှီယာ့ဇယ် : ငါ့cpကို မင်းတို့ နားမလည်ကြဘူး [ ဝူးဝူးဝူး...]

👨‍❤️‍👨

Prev Next