Chapter 33

📽️ Chapter 33

အခြေအနေ : ပိုးသားအနက်ရောင် 

ရန်ရှူက ဝေ့ပေါ်မှ ကွန်မန့်များကို တစ်ခဏမျှ  ပျော်ပျော်ပါးပါး ဖတ်နေခဲ့ပြီး ဖန်များမှ ထိုလက်ဆောင်ကို ဟာသလုပ်ကြလျှင် သူကလည်း နောက်ကလိုက်ပြောပေလိမ့်မည်။ 

သူ သတိတရ ပြန်ကြည့်လိုက်သောအခါ စန့်ရှန်းက စာပြန်ထားပြီးသား ဖြစ်နေသော်လည်း အကြောင်းအရာကမူ ခြင်ဆေးခွေနှင့် လာလားမှ မသက်ဆိုင်နေပေ။ 

X: [ပုံ] 

X: [ကြောင်ဝါလေးက မွေးပြီးသွားပြီ... ဒါပေမယ့် ဘယ်ကြောင်ပေါက်လေးကမှ အနက်နဲ့အဖြူ မပါဘူး... ကြောင်တွေရဲ့ အရောင်မျိုးရိုးလိုက်နှုန်းက အရမ်းမြင့်တယ်လေ... ဒါနဲ့ ကိုယ်လည်း ဒေါက်တာကို စမ်းသပ်ပေးဖို့ မေးလိုက်တာ... ကြောင်ပေါက်လေးတွေက နွားအကွက်ကြောင်လေးဆီက မွေးတာ မဟုတ်ကြဘူး…] 

ရန်ရှူ၏ မတိုင်မီက စိတ်လှုပ်ရှားမှုများက ပြန်မသက်သာသေးသော်လည်း ကြောင်ပေါက်လေးများကို မြင်လိုက်ရပြီးနောက် ချက်ချင်း စိတ်နူးညံ့သွားလေသည်။ 

ကြည့်ရတာ ကြောင်တွေလည်း သွေးသားတော်စပ်မှု ရှိမရှိ စစ်ဆေးလို့ရတယ်ထင်တယ်... 

သူက ချက်ချင်း စာရိုက်ကာ မေးလိုက်သည်။ [နွားပုံအကွက်ကြောင်က သူတို့အဖေ မဟုတ်ဘူးလား... ဒါပေမယ့် ပြတင်းပေါက်မှာ သူတို့ကို တွေ့လိုက်ရတုန်းက အဲ့တစ်ကောင်ပဲလေ…] 

X:[ကိုယ်ကတော့ နွားအကွက်ကြောင်လေးက ကြောင်ဝါလေးကို အတင်းအကြပ် လိုက်ခဲ့တာ ထင်တယ်... အဲ့ဒီအချိန်တုန်းက ကြောင်ဝါလေးက ကိုယ်ဝန် ရှိနေပြီးသားလေ... သူက ဗိုက်ဆာလွန်းလို့ မင်းရဲ့ ပြတင်းပေါက်အပြင်ဘက်ကို ကြောင်စာလာစားတာပဲ... နွားအကွက်ကြောင်လေးက ဒါကို အခွင့်ကောင်းယူလိုက်လို့ ကြောင်ဝါလေးကလည်း ကလေးကို ကာကွယ်ချင်ဇောနဲ့ လိုက်လျောပေးခဲ့ရတာ…] 

RS: [နွားအကွက်ကြောင်လေးက တော်တော်လွန်သွားပြီ…] 

X:[ ကြောင်လေးကလည်း ကြောင်ဝါလေးရဲ့ အခြေအနေကို မသိလောက်ဘူး... ပြီးတော့ မိတ်လိုက်ကာလ ရောက်နေတာလေ သဘာဝပါပဲ... နောက်ပိုင်းအပြုအမူတွေကို ကြည့်ရရင် ကြောင်လေးက ကြောင်ဝါလေးအပေါ် မဆိုးဘူး... တစ်ချိန်လုံး အနားမှာ နေပြီးတော့ ကာကွယ်ပေးတယ်ဆိုတော့ ကျေလောက်ပြီလို့ သတ်မှတ်လို့ ရပါတယ်.... ကြောင်ပေါက်လေးတွေရဲ့ အဖေရင်းထက်တောင် ပိုကောင်းသေးတယ်…] 

ရန်ရှူက ဖုန်းကြည့်နေရင်း ယင်းက အတော်လေး အံ့သြဖွယ်ကောင်းသည်ဟု ခံစားလိုက်ရသည်။ ကြောင်များ အကြားတွင်လည်း သုံးပွင့်ဆိုင်အချစ်တစ်ခု ရှိနေပုံရပြီး နှိပ်စက်ညှင်းပန်းခြင်းမှ သာယာမှု ရရှိနေသည့် ဆက်ဆံရေး ဖြစ်နေသည်။  

သူနှင့် စန့်ရှန်းကြားမှ ဆက်ဆံရေးထက်ပင် ဆိုးဝါးနေသေးသည်။ 

သူ စာထပ်ရိုက်ကာ စာပြန်လိုက်သည်။: [ကြောင်ပေါက်လေးတွေကို ဘယ်အချိန် လာခေါ်လို့ ရမလဲ] 

X: [အဖြူအမဲလေးကို လာခေါ်လို့ ရပြီ... ကြောင်ဝါလေးကတော့ ကလေးတွေကို ဂရုစိုက်ဖို့ လိုနေတုန်းပဲ... သူကအခုထိ နေမကောင်းသေးဘူး... ကိုယ်သူ့ကို ဆေးရုံမှာ ဆက်ထားဖို့ စီစဥ်ထားတယ်…] 

RS: [နွားအကွက်ကြောင်လေးကို ငါ့ဆီပို့လိုက်ပါ... ငါသူ့ကို မွေးလိုက်မယ်…] 

X: [သာ့ကောနဲ့ မတည့်လောက်ဘူးထင်တယ်…] 

RS: [အဲ့ဒီတော့…] 

X: [ကိုယ်က နွားအကွက်ကိုရော ကြောင်ဝါလေးကိုရော မွေးလိုက်မယ်လေ... ဘယ်သူက ကြောင်ပေါက်လေး လေးကောင်ကို မွေးချင်မလဲ မေးကြည့်ပါလား... မရှိရင် ကိုယ်သူတို့ကို မွေးစားလိုက်မယ်…] 

သူက စန့်ရှန်း ပို့လိုက်သော ပုံကို သိမ်းလိုက်ပြီးနောက် သူငယ်ချင်းအသိုင်းအဝိုင်းတွင် ပြန်တင်လိုက်သည်: [ကြောင်ပေါက်လေးတွေကို မွေးစားချင်တဲ့သူ ရှိလား...လိုအပ်ချက်တွေကတော့ ဂရုစိုက်တတ်ပြီး ချမ်းသာရမယ်…]

[ပုံ] 

ပိုစ့်တင်ပြီး မကြာမီ လျို့ရွှမ်းထံမှ စာရောက်လာလေသည်။ 

[အစ်ကိုရန်... ကျွန်တော် အဲ့ဒီအဖြူလေးကို မျက်စိကျနေတယ်…] 

ရန်ရှူက ကုတင်ခေါင်းရင်းကို မှီ၍ ပြန်ဖြေလိုက်သည်: [မင်းက ကြောင်မွေးဖို့ အချိန် ရှိလို့လား…] 

လျို့ရွှမ်း: [ကျွန်တော့်မှာ ငွေရှိတယ်လေ... ဟားဟား] 

RS: [သေချာလို့လား... မွေးမယ်ဆိုရင် တစ်ဘဝလုံး တာဝန်ယူသွားရမှာနော်…] 

လျို့ရွှမ်း: [အစ်ကို မသေမချာ ဖြစ်နေတဲ့ ကိစ္စ ထပ်ရှိသေးလား…] 

RS: [ကောင်းပြီလေ... လေးလ ကြာပြီးရင် မင်းဆီ ပို့ပေးမယ်…] 

လျို့ရွှမ်း: [ ဟုတ်ကဲ့ပါ…] 

RS: [ဒါဆို အရင်ဆုံး ကြောင်ပေါက်လေးတွေ လိုအပ်မဲ့ အရာတွေကို ပြင်ဆင်သင့်တယ်…] 

လျို့ရွှမ်း: [ကြောင်စာ... အလိုအလျောက် ရေဖြည်ပေးတဲ့စက်၊ အနွေးသေတ္တာ၊ ပြီးတော့ရော...] 

ရန်ရှူကလည်း သာ့ကော သူ့ထံသို့ ရောက်လာကတည်းက အတွေ့အကြုံရင့် ကြောင်မွေးသူ ဖြစ်လာခဲ့သည်။ ထို့ကြောင့် လက်ဝယ်ထားသင့်သည့် ဆေးဝါးများကို စာရင်းပြုစုကာ သတိထားရမည့်ကိစ္စများကို ညွှန်ကြားပေးလိုက်သည်။ 

မသိလိုက်မသိဘာသာဖြင့် နှစ်ယောက်သားက ညနက်သည်အထိ စကားပြောခဲ့ကြလေသည်။ 

ရန်ရှူက သမ်းဝေလိုက်ပြီးနောက် အိပ်ရာဝင်ရန် ပြင်လိုက်သော်လည်း စောင်ထဲသို့ ဝင်လိုက်သည်နှင့် စန့်ရှန်းထံမှ စာတစ်စောင် ရောက်လာခဲ့လေသည်။ [အိမ်ရောက်ပြီ... ကိုယ်ရေချိုးတော့မှာ... မှတ်တမ်းတင်ထားဖို့ လိုသေးလား…] 

ရန်ရှူက တုံ့ဆိုင်းမနေဘဲ ဗီဒီယိုကော တန်းခေါ်လိုက်၏။ 

တစ်ဖက်လူက မကြာမီ လက်ခံလိုက်လေသည်။

ဆက်သွယ်မှု ချိတ်ဆက်လိုက်သောအခါ စန့်ရှန်းက ခွေးကို ပွတ်သပ်ပေးနေခဲ့သည်။ ဗီဒီယိုထဲတွင် စန့်ရှန်း၏ လက်ဖဝါးကြီးကို တွေ့နေရပြီး အသံကပါ နောက်ကလိုက်လာသည်။ 

"ဒါ မင်းတို့ အမေလေ... မင်းတို့အမေရဲ့ အသံကို လာနားထောင်လိုက်…" 

"ငါက သူတို့ ဦးလေးနေရာမှာပဲ ရှိသေးတယ်…"

ရန်ရှူ ချက်ချင်း ကန့်ကွက်လိုက်သည်။ 

စန့်ရှန်းက ထိုအခြေအနေကို အခွင့်ကောင်းယူကာ နာမည်ပြန်ပြောင်းပေးလိုက်သည်။

"မင်းတို့ဦးလေးလေ... ဦးလေးရဲ့ အသံကို လာနားထောင်လှည့်…" 

"ငါက သူတို့ရဲ့ ဦးလေးဆို မင်းနဲ့ ငါက ဘယ်လို ဆက်ဆံရေးလဲ…" 

ထိုမေးခွန်းကို မေးပြီးနောက် ရန်ရှူတစ်ယောက် စန့်ရှန်းထံမှ ချစ်သူ၊ အတွဲတွေ စသဖြင့် ပြောလာမည်ဟု နှလုံးသားထဲတွင် မျှော်လင့်ချက်အချို့ ရှိခဲ့သေးသည်။ 

ဤနည်းဖြင့် ထိုအခွင့်အရေး၌ စကားနည်းနည်းလောက် ပြောဆို၍ အတူပြန်ရှိကြမည်။ 

သို့သော်လည်း မည်သူကမျှ စန့်ရှန်း ပြန်ဖြေလာမည့် စကားကို ကြိုမသိနိုင်ခဲ့ပေ။ 

"ကိုယ်က မင်းရဲ့ အဘိုးလေ…" 

"..." ရန်ရှူ ချက်ချင်း ဖုန်းချချင်သွားသည်။ 

စန့်ရှန်းမှာ ရန်ရှူ၏ အဘိုးနေရာနှင့် အမှန်ပင် သက်ဆိုင်နေပါ၏။ 

ရှန်ရှူမသိခဲ့သည့် လွန်ခဲ့သော နှစ်ပေါင်းများစွာက စန့်နှင့် ရန်မိသားစုနှစ်ခုက သွေးသောက်ညီအစ်ကိုများ ဖြစ်ခဲ့ကြပြီး စီးပွားရေးလုပ်ငန်းတစ်ခု စပ်တူ ထူထောင်ခဲ့ကြလေသည်။ 

နောက်ပိုင်းတွင် အကြိမ်ရေအချို့ စီးပွားပျက်ပြီးနောက် မိသားစုနှစ်စုက အဆက်အသွယ် မရှိကြတော့ပေ။ 

ရန်ရှူတစ်ယောက် စန့်ရှန်း၏အိမ်သို့ ရောက်သွားမှသာ မိသားစုနှစ်စုကြား ထိုကဲ့သို့ ဆက်ဆံရေး ရှိခဲ့ကြောင်း သိလိုက်ရခြင်း ဖြစ်သညိ။ 

ရန်မိသားစုက ကြီးပွားတိုးတက်လာခဲ့ပြီး လုပ်စရာမရှိလျှင် ကလေးထိုင်မွေးနေသည့်အတွက် တရားမဝင်ကလေးများပင် ရှိလာခဲ့သည်။ အလွန် ရှုပ်ယှက်ခတ်နေသဖြင့် ရန်ရှူမှာ သူ့တစ်သက်၌ မျိုးဆက်မည်မျှ ရှိနေမှန်းပင် မသိခဲ့ရပေ။ 

သို့သော်ငြား စန့်မိသားစုဝင်များက နောက်ကျမှ လက်ထပ်ကြပြီး ကလေးရနောက်ကျသည့်အပြင် မိသားစုခေါင်းဆောင်များကလည်း သစ္စာရှိကာ သူတို့၏ဇနီးများကို စိတ်သောက ရောက်ရမည့် အဖြစ်မျိုး မရောက်လိုကြချေ။ အချိန် ကြာလာသောအခါ စန့်ရှန်းက အကြောင်းအရင်းအချို့ကြောင့် ရန်ရှူ၏အဘိုးမျိုးဆက် ဖြစ်လာပြီး စန့်မိသားစု၏ တစ်ဦးတည်းသော အတ္ထုပတ္တိ ဖြစ်လာခဲ့လေသည်။ 

ရန်ရှူက နှလုံးသားထဲတွင် တိတ်တဆိတ်ပြောမိသည်။

စန့်ရှန်း... မင်းသာ တစ်နေ့ တစ်နာရီလောက် ခွေးကောင် မဖြစ်ဘဲနေခဲ့ရင် နှစ်နှစ်လောက် လမ်းခွဲစရာ မလိုဘူးကွ…

ဒါကြီးက အမှန်ဆိုရင်တောင် ဒီလို အခြေအနေမှာ ထုတ်မပြောသင့်ဘူးလေ... 

ရန်ရှူ ဒေါသထွက်ရလွန်း၍ သွားများပင် ကျင်လာသည်။ 

"ငါ မင်းကို မကြည့်ချင်တော့ဘူး... မင်းက မဲနက်နေပြီ…" 

ရန်ရှူ ပြန်လည်တိုက်ခိုက်လိုက်သည်။ 

"ကိုယ်က မဲနက်နေတာလား…"

စန့်ရှန်းက လက်ကို မကာ သူ့ကိုယ်ပိုင်အသားအရည်ကို ကြည့်လိုက်သည်။ 

သူနှင့် ဟို့မော့တို့က သဘာဝကျကျပင် နှိုင်းယှဥ်၍ မရပေ။ ဟို့မော့က ဖြူဖွေးအေးစက်နေသော အသားအရောင် ရှိလျှင် ရန်ရှူက ပန်းရောင်သန်းသည့် အဖြူရောင် အသားအရည် ဖြစ်သည်။ 

စန့်ရှန်းက သာမန်အသားအရည်သာ ဖြစ်ပြီး မဲနက်မနေသော်လည်း နေလောင်၍ ညိုနေခဲ့သည်။ 

ရန်ရှူက ခပ်ရှင်းရှင်း အော်ပေးလိုက်၏။

"မဲနေတာ…" 

စန့်ရှန်း အဆုံးတွင် နားလည်သွားသည်။

"အိုး... မင်းကလည်း အရပ်ပုတယ်လေ…" 

ရန်ရှူ ဟိန်းဟောက် လာလေတော့သည်။

"စန့်ရှန်း မင်းသေချင်နေပြီလား... ဒီနေ့ ငါနဲ့ ငြင်းခုန်တော့မယ်ပေါ့လေ…" 

"ဒါက သိပ်ပြီးတော့ အသုံးမဝင်ဘူးနော်... ရှည်ရှည်ပုပု ကိစ္စမရှိပါဘူး... စိတ်အေးအေးထားစမ်းပါ…" 

"စန့်ရှန်း... မင်းငါ့ကို စိတ်ကုန်အောင် လာလုပ်နေတာလား... ဟမ်... မင်းမျိုးမစစ်ကောင်... ငါမင်းနဲ့ လမ်းခွဲလိုက်တာ မတော်တဆ တစ်ခုပဲလား... မတော်တဆ မဟုတ်ဘူးကွ... ငါတို့ လမ်းခွဲတိုင်း မင်းငါ့ကို ဒေါသထွက်ရင်တောင် ငါ့ကိစ္စမဟုတ်ဘူး... သူတို့တွေက ငါ့ကို ဒေါသထွက်လွယ်တယ်လို့ပဲ ပြောနေကြတယ်... ငါမင်းနဲ့ တွေ့တိုင်း ဘယ်လိုလုပ်ပြီး ဒေါသမထွက်ဘဲ နေမှာလဲ…" 

"ဟုတ်ပါပြီ... ကိုယ်မှားတာပါ... ဒေါသမထွက်ပါနဲ့တော့... ဟုတ်ပြီလား…"

စန့်ရှန်းက ဖုန်းကိုင်ထားလျက် အိမ်ထဲတွင် လမ်းလျှောက်နေခဲ့သည်။ 

"ငါ့ကို ဆန့်ကျင်ပြီးသွားတော့ စိတ်လျှော့စေချင်ပြီပေါ့.... ဆုတောင်းရေကန်ထဲက မျိုးမစစ်ကောင်တွေတောင် မင်းလောက် အပြောင်းအလဲမမြန်ဘူး…" 

"မပုပါဘူးဆို... ဒါကြောင့် တော်လိုက်တော့…" 

“အဲဒါကို ငါ့ကို သုံးခိုင်းဖို့ မင်းအတွက် လုံလောက်သွားပြီလား…" 

"..." 

စန့်ရှန်း ရုတ်တရက် လည်နင်သွားလေသည်။ အဖဖြေမရှိခဲ့လျှင်ပင် အဖြေပေးပြီးသား ဖြစ်နေပြီဟု ထင်ရလေသည်။ 

စန့်ရှန်းမှာ ရန်ရှူ ဖုန်းချသွားသည်ကို တွေ့ရမှ အသိပြန်ဝင်လာရသည်။ 

စန့်ရှန်း၏ အတွေ့အကြုံအရ ချက်ချင်း ပြန်ခေါ်လျှင်လည်း ရန်ရှူက သေချာပေါက် ကိုင်မည်မဟုတ်ပေ။

မခေါ်ပြန်လျှင်လည်း ရန်ရှူက ဒေါသပိုကြီးလာမည်။ 

ထို့ကြောင့် စန့်ရှန်းက ဆိုဖာပေါ်တွင် ထိုင်ကာ ရန်ရှူကို စာအိတ်နီပို့လိုက်ပြီးနောက် ခေါင်းစဥ်ကို တည်းဖြတ်လိုက်သည်။

X: [ကိုယ်မှားသွားပါတယ်…] 

X: [စိတ်မဆိုးပါနဲ့…] 

X: [ကိုယ်မင်းကို လက်ဆောင် တစ်ခုပေးချင်လို့…] 

X: [မင်းဘက်က ပူးပေါင်းဖို့ လိုလောက်မယ်…] 

X: [လုပ်ရိုးလုပ်စဥ်တွေကို ကျော်ဖြတ်ဖို့လေ…] 

ကိုယ်မင်းကို အရမ်းသဘောကျတယ် [အသည်းပုံ]: [ဘာလဲ…] 

ကိုယ်မင်းကို အရမ်းသဘောကျတယ် [အသည်းပုံ]: [ဘာလဲ... မင်းက ငါနဲ့ ပြည်ပကို ပြောင်းတော့မလို့လား…]

စန့်ရှန်းက ထိုစာကြောင်းများကို ကြည့်ကာ ရန်ရှူ မတိုင်မီက မေးခဲ့သည့် မေးခွန်းကို စဥ်းစားလိုက်မိပြီးနောက် သူတို့အတူတူ ပြန်ချိတ်ဆက်သွားပြီးမှ ရုတ်တရက် နားလည်သွားလေသည်။ 

ရန်ရှူက သူ့ထံမှ အတူပြန်တွဲကြမည့်အကြောင်း ပြောလာမည်ဟု မျှော်လင့်ထားခဲ့ပုံရသော်လည်း သူ့ဘက်က မပြောခဲ့လိုက်ပေ။ ယင်းက ရန်ရှူတစ်ယောက် စိတ်ပျက်သွားပြီးနောက် ဒေါသတကြီး ဖြစ်လာရသည့် အကြောင်းအရင်း ဖြစ်ပေလိမ့်မည်။ 

သူ ချက်ချင်းဆိုသလို ပြန်စာပို့လိုက်သည်: [မင်းဆီ ဟယ်လီကော်ပတာ တစ်စီး ပို့လိမ့်မယ်…] 

တစ်ဖက်လူက အချိန်အတော်ကြာသည်အထိ ပြန်မဖြေပုံအရ စျေးနှုန်းကို သွားရောက်စစ်ဆေးနေခြင်း ဖြစ်မည်ဟု ခန့်မှန်းလိုက်သည်။ 

ရန်ရှူ၏ ပိုက်ဆံအပေါ် စွဲလန်းမှု အဆင့်အရ သေသေချာချာ ကြည့်ပေလိမ့်မည်။  

စန့်ရှန်းက အလျင်မလိုသဖြင့် တိတ်တဆိတ် စောင့်ပေးနေခဲ့သည်။ 

"လေးဆယ့်ငါးသန်း.... ဒီမော်ဒယ်က အရမ်းမိုက်တာပဲ…" 

ရန်ရှူက နှံ့နှံ့စပ်စပ် ကြည့်နေခဲ့သည်။

"ရွှေရောင်လေးဆို ကောင်းမလား... အမဲလေးက ပိုကောင်းလောက်လား... ဒါက မရွေးလို့ရော ရလား... ကြည့်ရအောင်... ကျွတ်... ဒီကုမ္ပဏီရဲ့ ဝယ်ယူမှုလုပ်ငန်းစဥ်ကို မိတ်ဆက်ပေးတဲ့လူသိပ်မများဘူးပဲ... ဟယ်လီကော်ပတာကို ဝယ်တဲ့သူ သိပ်မရှိလို့လား... အိုး... ကမ္ဘာပေါ်မှာ 98ယောက်ပဲ ရှိတယ်... တရုတ်မှာဆို ငါက ဒီဟာပိုင်တဲ့ ပထမဆုံးလူ ဖြစ်မနေဘူးလား... အင်း…" 

ရန်ရှူက တစ်ခဏမျှ ကြည့်လိုက်ပြီးနောက် စန့်ရှန်းကို စာပြန်လိုက်သည်: [ အိုး... အဆင်ပြေပါတယ်…] 

X: [ကိုယ် မင်းရဲ့ ရိုက်ကူးရေး အစီအစဥ်တွေကို ကြည့်လိုက်တယ်... ဆယ်ရက်ကြာရင် နှစ်ရက် အားလပ်ရက် ရမယ်... လုပ်ထုံးလုပ်နည်းလေးတွေ ကျော်ဖြတ်ဖို့အတွက် ပြန်လာဖို့ လေယာဥ် စီစဥ်ပေးထားမယ်နော်…] 

RS: [ကောင်းပြီလေ…] 

X: [အင်း ဒါဆို ကိုယ်ရေချိုးတော့မယ်…] 

ရန်ရှူက ဖုန်းမျက်နှာပြင်ကို ကြည့်ရင်း ဒေါသထွက်လာရပြန်သည်။ ဟယ်လီကော်ပတာဖြင့် အချော့ခံလိုက်ရပါသော်ငြား စန့်ရှန်းက တစ်ယောက်တည်း ရေသွားချိုးသည့်အတွက် ဒေါသထွက်သွားပြန်သည်။ 

ရန်ရှူက စောင်အောက်တွင် လဲလျောင်းနေလျက်က ဒေါသတကြီး ပြန်လှန်လိုက်သည်။ စန့်ရှန်း ပို့လိုက်သည့် ဗီဒီယိုကော ခေါ်ဆိုမှုကို တွေ့သောအခါ ချက်ချင်းဆိုသလို ပျော်သွားရပြန်လေသည်။ နှုတ်ခမ်းထောင့်လေးများ ကွေးတက်ကာ အပြုံးလေးတစ်ခု ပွင့်ဟလာသော်ငြား ဗီဒီယိုကော ပြန်ဖြေသောအခါ စိတ်ခံစားချက်များ မပေါ်လွင်စေရန် တင်းထားလိုက်လေသည်။ 

ရန်ရှူက စန့်ရှန်းကို တစ်လျှောက်လုံး အဖက်မလုပ်သည့်အလား မျက်နှာကြီး တင်းထားသော်လည်း လုပ်ငန်းစဥ်တစ်ခုလုံးကိုမူ တလေးတနက် ကြည့်ရှုနေခဲ့လေသည်။ ရေချိုးသည့်အပိုင်းပြီးသွားပြီးနောက် စန့်ရှန်းနှင့် ညနက်သည်အထိ စကားပြောခဲ့လေသည်။ 

သို့ရာတွင် စန့်ရှန်း ဖွင့်ဟပြောပြလာသည့် တစ်စုံတစ်ခုကြောင့် ရန်ရှူ လည်နင်သွားသည်နှင့်သာ အမြဲအဆုံးသတ်သွားလေသည်။ 

ဤနည်းဖြင့် နှစ်ယောက်သားက မခွဲမခွာ စကားပြောဆိုနေကြဆဲ ဖြစ်သည်။ 

ဆယ်ရက်ကြာသောအခါ ရန်ရှူက စန့်ရှန်း၏ ရုံးခန်းသို့ တန်းသွားခဲ့သည်။ 

ကုမ္ပဏီထဲမှ ဝန်ထမ်းများက သူတို့၏ အုပ်စုမှ ဖျော်ဖြေရေးကုမ္ပဏီတစ်ခု ဝယ်ယူလိုက်ကြောင်း သိခဲ့ရသော်လည်း ထိုကုမ္ပဏီမှ အနုပညာရှင်များက သူတို့ကုမ္ပဏီထံ လာရောက်ကြမည်ဟု တစ်ခါမှ တွေးမထားခဲ့ဖူးပေ။ ထိုသူက သူတို့၏ ကုမ္ပဏီကို အေးအေးဆေးဆေးပင် ဝင်လာခဲ့သေးသည်။ 

ရန်ရှူက နေကာမျက်မှန်ကို ဝံ့ဝံ့ကြွားကြွား တပ်ထားပြီး ရှန်းကျွင့်ကျင်းက သူ့ကိုအဖော်ပြုလျက် ဓာတ်လှေကားထဲသို့ ဝင်လာခဲ့သည်။ 

ဝန်ထမ်းများစွာကလည်း အသိစိတ် ရှိကြသဖြင့် အပျော်အနေနှင့် လိုက်သွားခြင်းမျိုး မရှိကြပေ။ 

သို့သော်ငြား သတင်းကြားပြီး ရောက်လာကြသည့် ဝန်ထမ်းများစွာ ရှိနေကြဆဲပင်။ ထို့ကြောင့် တစ်ချက်ကြည့်ရန်အတွက် လော်ဘီထဲတွင် စုရုံးရုံး ဖြစ်နေခဲ့ကြသည်။ ဖောက်ထွင်းမြင်ရသည့် မှန်ဓါတ်လှေကားတွင် ရန်ရှူက ရှန်းကျွင့်ကျင်းနှင့် စကားပြောနေသည်ကို တွေ့ခဲ့ကြရသည်။  

ယခင်ထိပ်တန်းအဆင့် နာမည်ကျော်ဟု ဆိုရမည့်အတိုင်း အရှိန်အဝါများက အထင်ကြီးလောက်ဖွယ် ဖြစ်၏။ ခြေလှမ်းရပ်လိုက်တိုင်း အိုင်ဒေါဒရာမာကို ရိုက်ကူးနေသည့်အလား ပိုစတာတစ်ခု ကြည့်နေရသည့်အတိုင်း ဖြစ်သည်။ 

သို့သော်ငြား ဓါတ်လှေကားထဲမှ စကားအကြောင်းအရာကမူ... 

ရန်ရှူက ဖောက်ထွင်းမြင်ရသော ဓါတ်လှေကား၏ အပြင်ဘက်မှ လူများကို ကြည့်ကာ ရေရွတ်လိုက်သည်။  

"မာလာထန်းနဲ့ ကျောက်ပုစွန် စားချင်တယ်…" 

"စန့်ရှန်းက ထိပ်တန်းအဆင့်လို့ခေါ်တဲ့ စားသောက်ဆိုင်တွေကနေ မှာပေးမယ်လို့ ထင်တယ်... အဆုံးကျတော့ မင်းက တောက်ပြောင်လွန်းတဲ့ အရာတွေကို သဘောကျတာပဲလေ... ရုတ်တရက်ကြီး လက်တွေ့ဆန်လာမယ်လို့ ဘယ်သူက ထင်မှာလဲ…" 

"ကျစ်... ကုတ်(coke)တစ်ဘူး‌ရောပဲ…" 

"တစ်ယောက်ယောက်ကို ဝယ်ခိုင်းလိုက်မယ်…" 

"မဟုတ်သေးပါဘူး... မစ်တီးနဲ့ ကုတ်ကို သောက်လိုက်တာနဲ့ တစ်ညလုံး အိပ်မပျော်တော့ဘူး... အဲဒါတွေက ငါ့ကို အရမ်း စိတ်လန်းဆန်းစေတာလေ... အဲဒါတွေရဲ့ ငါ့အပေါ် သက်ရောက်မှုက ကုတ်ထက် ပိုကောင်းသေးတယ်…"

📽️